| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
7. සුප්‌පවාසාසුත්‌තවණ්‌ණනා
7. Suppavāsāsuttavaṇṇanā
57. සත්‌තමෙ පජ්‌ජනිකන්‌ති තස්‌ස නිගමස්‌ස නාමං. කොලියානන්‌ති කොලරාජකුලානං. ආයුං ඛො පන දත්‌වාති ආයුදානං දත්‌වා. ආයුස්‌ස භාගිනී හොතීති ආයුභාගපටිලාභිනී හොති, ආයුං වා භජනිකා හොති, ආයුප්‌පටිලාභිනීති අත්‌ථො. සෙසපදෙසුපි එසෙව නයො.
57. Sattame pajjanikanti tassa nigamassa nāmaṃ. Koliyānanti kolarājakulānaṃ. Āyuṃ kho pana datvāti āyudānaṃ datvā. Āyussa bhāginī hotīti āyubhāgapaṭilābhinī hoti, āyuṃ vā bhajanikā hoti, āyuppaṭilābhinīti attho. Sesapadesupi eseva nayo.
රසසා උපෙතන්‌ති රසෙන උපෙතං රසසම්‌පන්‌නං. උජ්‌ජුගතෙසූති කායවඞ්‌කාදිරහිතත්‌තා උජුකමෙව ගතෙසු ඛීණාසවෙසු. චරණූපපන්‌නෙසූති පඤ්‌චදසහි චරණධම්‌මෙහි සමන්‌නාගතෙසු. මහග්‌ගතෙසූති මහත්‌තං ගතෙසු. ඛීණාසවානඤ්‌ඤෙවෙතං නාමං. පුඤ්‌ඤෙන පුඤ්‌ඤං සංසන්‌දමානාති පුඤ්‌ඤෙන සද්‌ධිං පුඤ්‌ඤං ඝටයමානා. මහප්‌ඵලා ලොකවිදූන වණ්‌ණිතාති එවරූපා දානසඞ්‌ඛාතා දක්‌ඛිණා තිවිධලොකං විදිතං කත්‌වා ඨිතත්‌තා ලොකවිදූනං බුද්‌ධානං වණ්‌ණිතා, බුද්‌ධෙහි පසත්‌ථාති අත්‌ථො. යඤ්‌ඤමනුස්‌සරන්‌තාති යඤ්‌ඤං දානං අනුස්‌සරන්‌තා. වෙදජාතාති තුට්‌ඨිජාතා.
Rasasā upetanti rasena upetaṃ rasasampannaṃ. Ujjugatesūti kāyavaṅkādirahitattā ujukameva gatesu khīṇāsavesu. Caraṇūpapannesūti pañcadasahi caraṇadhammehi samannāgatesu. Mahaggatesūti mahattaṃ gatesu. Khīṇāsavānaññevetaṃ nāmaṃ. Puññena puññaṃ saṃsandamānāti puññena saddhiṃ puññaṃ ghaṭayamānā. Mahapphalā lokavidūna vaṇṇitāti evarūpā dānasaṅkhātā dakkhiṇā tividhalokaṃ viditaṃ katvā ṭhitattā lokavidūnaṃ buddhānaṃ vaṇṇitā, buddhehi pasatthāti attho. Yaññamanussarantāti yaññaṃ dānaṃ anussarantā. Vedajātāti tuṭṭhijātā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. සුප්‌පවාසාසුත්‌තං • 7. Suppavāsāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7-10. සුප්‌පවාසාසුත්‌තාදිවණ්‌ණනා • 7-10. Suppavāsāsuttādivaṇṇanā
