| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. ஸுராத⁴ஸுத்தங்
10. Surādhasuttaṃ
72. ஸாவத்தி²னிதா³னங். அத² கோ² ஆயஸ்மா ஸுராதோ⁴ ப⁴க³வந்தங் ஏதத³வோச – ‘‘கத²ங் நு கோ², ப⁴ந்தே, ஜானதோ கத²ங் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானாபக³தங் மானஸங் ஹோதி, விதா⁴ ஸமதிக்கந்தங் ஸந்தங் ஸுவிமுத்த’’ந்தி? ‘‘யங் கிஞ்சி, ஸுராத⁴, ரூபங் அதீதானாக³தபச்சுப்பன்னங்…பே॰… யங் தூ³ரே ஸந்திகே வா, ஸப்³ப³ங் ரூபங் – ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா அனுபாதா³விமுத்தோ ஹோதி. யா காசி வேத³னா… யா காசி ஸஞ்ஞா… யே கேசி ஸங்கா²ரா… யங் கிஞ்சி விஞ்ஞாணங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் விஞ்ஞாணங் – ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா அனுபாதா³விமுத்தோ ஹோதி. ஏவங் கோ², ஸுராத⁴, ஜானதோ ஏவங் பஸ்ஸதோ இமஸ்மிஞ்ச ஸவிஞ்ஞாணகே காயே, ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானாபக³தங் மானஸங் ஹோதி விதா⁴ ஸமதிக்கந்தங் ஸந்தங் ஸுவிமுத்த’’ந்தி…பே॰… அஞ்ஞதரோ ச பனாயஸ்மா ஸுராதோ⁴ அரஹதங் அஹோஸீதி. த³ஸமங்.
72. Sāvatthinidānaṃ. Atha kho āyasmā surādho bhagavantaṃ etadavoca – ‘‘kathaṃ nu kho, bhante, jānato kathaṃ passato imasmiñca saviññāṇake kāye bahiddhā ca sabbanimittesu ahaṅkāramamaṅkāramānāpagataṃ mānasaṃ hoti, vidhā samatikkantaṃ santaṃ suvimutta’’nti? ‘‘Yaṃ kiñci, surādha, rūpaṃ atītānāgatapaccuppannaṃ…pe… yaṃ dūre santike vā, sabbaṃ rūpaṃ – ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya disvā anupādāvimutto hoti. Yā kāci vedanā… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ – ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya disvā anupādāvimutto hoti. Evaṃ kho, surādha, jānato evaṃ passato imasmiñca saviññāṇake kāye, bahiddhā ca sabbanimittesu ahaṅkāramamaṅkāramānāpagataṃ mānasaṃ hoti vidhā samatikkantaṃ santaṃ suvimutta’’nti…pe… aññataro ca panāyasmā surādho arahataṃ ahosīti. Dasamaṃ.
அரஹந்தவக்³கோ³ ஸத்தமோ.
Arahantavaggo sattamo.
தஸ்ஸுத்³தா³னங் –
Tassuddānaṃ –
உபாதி³யமஞ்ஞமானா, அதா²பி⁴னந்த³மானோ ச;
Upādiyamaññamānā, athābhinandamāno ca;
அனிச்சங் து³க்க²ங் அனத்தா ச, அனத்தனீயங் ரஜனீயஸண்டி²தங்;
Aniccaṃ dukkhaṃ anattā ca, anattanīyaṃ rajanīyasaṇṭhitaṃ;
ராத⁴ஸுராதே⁴ன தே த³ஸாதி.
Rādhasurādhena te dasāti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8-10. ரஜனீயஸண்டி²தஸுத்தாதி³வண்ணனா • 8-10. Rajanīyasaṇṭhitasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8-10. ரஜனீயஸண்டி²தஸுத்தாதி³வண்ணனா • 8-10. Rajanīyasaṇṭhitasuttādivaṇṇanā
