| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
8. ஸுராத⁴த்தே²ரகா³தா²வண்ணனா
8. Surādhattheragāthāvaṇṇanā
கீ²ணா ஹி மய்ஹங் ஜாதீதிஆதி³கா ஆயஸ்மதோ ஸுராத⁴த்தே²ரஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதங் பத்தோ ஏகதி³வஸங் ஸத்தா²ரங் தி³ஸ்வா பஸன்னமானஸோ மாதுலுங்க³ப²லங் அதா³ஸி. ஸோ தேன புஞ்ஞகம்மேன தே³வலோகே நிப்³ப³த்தித்வா அபராபரங் புஞ்ஞானி கத்வா ஸுக³தீஸுயேவ ஸங்ஸரந்தோ இமஸ்மிங் பு³த்³து⁴ப்பாதே³ அனந்தரங் வுத்தஸ்ஸ ராத⁴த்தே²ரஸ்ஸ கனிட்டோ² ஹுத்வா நிப்³ப³த்தி, ஸுராதோ⁴திஸ்ஸ நாமங் அஹோஸி. ஸோ ஜெட்ட²பா⁴தரி ராதே⁴ பப்³ப³ஜிதே ஸயம்பி பப்³ப³ஜித்வா விபஸ்ஸனாய கம்மங் கரொந்தோ நசிரஸ்ஸேவ அரஹத்தங் பாபுணி. தேன வுத்தங் அபதா³னே (அப॰ தே²ர 2.51.68-72) –
Khīṇāhi mayhaṃ jātītiādikā āyasmato surādhattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinanto sikhissa bhagavato kāle kulagehe nibbattitvā viññutaṃ patto ekadivasaṃ satthāraṃ disvā pasannamānaso mātuluṅgaphalaṃ adāsi. So tena puññakammena devaloke nibbattitvā aparāparaṃ puññāni katvā sugatīsuyeva saṃsaranto imasmiṃ buddhuppāde anantaraṃ vuttassa rādhattherassa kaniṭṭho hutvā nibbatti, surādhotissa nāmaṃ ahosi. So jeṭṭhabhātari rādhe pabbajite sayampi pabbajitvā vipassanāya kammaṃ karonto nacirasseva arahattaṃ pāpuṇi. Tena vuttaṃ apadāne (apa. thera 2.51.68-72) –
‘‘கணிகாரங்வ ஜலிதங், புண்ணமாயேவ சந்தி³மங்;
‘‘Kaṇikāraṃva jalitaṃ, puṇṇamāyeva candimaṃ;
ஜலந்தங் தீ³பருக்க²ங்வ, அத்³த³ஸங் லோகனாயகங்.
Jalantaṃ dīparukkhaṃva, addasaṃ lokanāyakaṃ.
‘‘மாதுலுங்க³ப²லங் க³ய்ஹ, அதா³ஸிங் ஸத்து²னோ அஹங்;
‘‘Mātuluṅgaphalaṃ gayha, adāsiṃ satthuno ahaṃ;
த³க்கி²ணெய்யஸ்ஸ வீரஸ்ஸ, பஸன்னோ ஸேஹி பாணிபி⁴.
Dakkhiṇeyyassa vīrassa, pasanno sehi pāṇibhi.
‘‘ஏகதிங்ஸே இதோ கப்பே, யங் ப²லங் அத³தி³ங் ததா³;
‘‘Ekatiṃse ito kappe, yaṃ phalaṃ adadiṃ tadā;
து³க்³க³திங் நாபி⁴ஜானாமி, ப²லதா³னஸ்ஸித³ங் ப²லங்.
Duggatiṃ nābhijānāmi, phaladānassidaṃ phalaṃ.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்வா ஸாஸனஸ்ஸ நிய்யானிகபா⁴வத³ஸ்ஸனத்த²ங் அஞ்ஞங் ப்³யாகரொந்தோ ‘‘கீ²ணா ஹீ மய்ஹ’’ந்திஆதி³னா கா³தா²த்³வயமாஹ.
Arahattaṃ pana patvā sāsanassa niyyānikabhāvadassanatthaṃ aññaṃ byākaronto ‘‘khīṇā hī mayha’’ntiādinā gāthādvayamāha.
135-6. தத்த² கீ²ணாதி க²யங் பரியோஸானங் க³தா. ஜாதீதி ப⁴வோ ப⁴வனிப்³ப³த்தி வா. வுஸிதங் ஜினஸாஸனந்தி ஜினஸ்ஸ ஸம்மாஸம்பு³த்³த⁴ஸ்ஸ ஸாஸனங் மக்³க³ப்³ரஹ்மசரியங் வுட்ட²ங் பரிவுட்ட²ங். பஹீனோ ஜாலஸங்கா²தோதி ஸத்தஸந்தானஸ்ஸ ஒத்த²ரணதோ நிஸ்ஸரிதுங் அப்பதா³னதோ ச ‘‘ஜாலஸங்கா²தோ’’தி ச லத்³த⁴னாமா தி³ட்டி² அவிஜ்ஜா ச பஹீனா மக்³கே³ன ஸமுச்சி²ன்னா. ப⁴வனெத்தி ஸமூஹதாதி காமப⁴வாதி³கஸ்ஸ ப⁴வஸ்ஸ நயனதோ பவத்தனதோ ப⁴வனெத்திஸஞ்ஞிதா தண்ஹா ஸமுக்³கா⁴டிதா. யஸ்ஸத்தா²ய பப்³ப³ஜிதோதி யஸ்ஸ அத்தா²ய யத³த்த²ங் அஹங் அகா³ரஸ்மா கே³ஹதோ அனகா³ரியங் பப்³ப³ஜ்ஜங் பப்³ப³ஜிதோ உபக³தோ. ஸோ ஸப்³பே³ஸங் ஓரம்பா⁴கி³யுத்³த⁴ம்பா⁴கி³யப்பபே⁴தா³னங் ஸங்யோஜனானங் ப³ந்த⁴னானங் க²யபூ⁴தோ அத்தோ² நிப்³பா³னஸங்கா²தோ பரமத்தோ² அரஹத்தஸங்கா²தோ ஸத³த்தோ² ச மயா அனுப்பத்தோ அதி⁴க³தோதி அத்தோ².
135-6. Tattha khīṇāti khayaṃ pariyosānaṃ gatā. Jātīti bhavo bhavanibbatti vā. Vusitaṃ jinasāsananti jinassa sammāsambuddhassa sāsanaṃ maggabrahmacariyaṃ vuṭṭhaṃ parivuṭṭhaṃ. Pahīno jālasaṅkhātoti sattasantānassa ottharaṇato nissarituṃ appadānato ca ‘‘jālasaṅkhāto’’ti ca laddhanāmā diṭṭhi avijjā ca pahīnā maggena samucchinnā. Bhavanetti samūhatāti kāmabhavādikassa bhavassa nayanato pavattanato bhavanettisaññitā taṇhā samugghāṭitā. Yassatthāya pabbajitoti yassa atthāya yadatthaṃ ahaṃ agārasmā gehato anagāriyaṃ pabbajjaṃ pabbajito upagato. So sabbesaṃ orambhāgiyuddhambhāgiyappabhedānaṃ saṃyojanānaṃ bandhanānaṃ khayabhūto attho nibbānasaṅkhāto paramattho arahattasaṅkhāto sadattho ca mayā anuppatto adhigatoti attho.
ஸுராத⁴த்தே²ரகா³தா²வண்ணனா நிட்டி²தா.
Surādhattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 8. ஸுராத⁴த்தே²ரகா³தா² • 8. Surādhattheragāthā
