| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
6. ஸுராபானவக்³கோ³
6. Surāpānavaggo
1. ஸுராபானஸிக்கா²பத³வண்ணனா
1. Surāpānasikkhāpadavaṇṇanā
326. ஸுராபானவக்³க³ஸ்ஸ பட²மஸிக்கா²பதே³ – ப⁴த்³த³வதிகாதி ஏகோ கா³மோ, ஸோ ப⁴த்³தி³காய வதியா ஸமன்னாக³தத்தா ஏதங் நாம லபி⁴. பதா²வினோதி அத்³தி⁴கா. தேஜஸா தேஜந்தி அத்தனோ தேஜஸா ஆனுபா⁴வேன நாக³ஸ்ஸ தேஜங். காபோதிகாதி கபோதபாத³ஸமவண்ணரத்தோபா⁴ஸா. பஸன்னாதி ஸுராமண்ட³ஸ்ஸேதங் அதி⁴வசனங். அனநுச்ச²வியங் பி⁴க்க²வே ஸாக³தஸ்ஸாதி பஞ்சாபி⁴ஞ்ஞஸ்ஸ ஸதோ மஜ்ஜபானங் நாம ந அனுச்ச²வியந்தி வுத்தங் ஹோதி.
326. Surāpānavaggassa paṭhamasikkhāpade – bhaddavatikāti eko gāmo, so bhaddikāya vatiyā samannāgatattā etaṃ nāma labhi. Pathāvinoti addhikā. Tejasā tejanti attano tejasā ānubhāvena nāgassa tejaṃ. Kāpotikāti kapotapādasamavaṇṇarattobhāsā. Pasannāti surāmaṇḍassetaṃ adhivacanaṃ. Ananucchaviyaṃ bhikkhave sāgatassāti pañcābhiññassa sato majjapānaṃ nāma na anucchaviyanti vuttaṃ hoti.
328. புப்பா²ஸவோ நாம மது⁴கபுப்பா²தீ³னங் ரஸேன கதோ. ப²லாஸவோ நாம முத்³தி³கப²லாதீ³னி மத்³தி³த்வா தேஸங் ரஸேன கதோ. மத்⁴வாஸவோ நாம முத்³தி³கானங் ஜாதிரஸேன கதோ; மக்கி²கமது⁴னாபி கரியதீதி வத³ந்தி. கு³ளாஸவோ நாம உச்சு²ரஸாதீ³ஹி கரியதி. ஸுரா நாம பிட்ட²கிண்ணபக்கி²த்தா; நாளிகேராதீ³னம்பி ரஸேன கதா ஸுராத்வேவ ஸங்க்²யங் க³ச்ச²தி, தஸ்ஸாயேவ கிண்ணபக்கி²த்தாய மண்டே³ க³ஹிதே மேரயொத்வேவ ஸங்க்²யங் க³ச்ச²தீதி வத³ந்தி. அந்தமஸோ குஸக்³கே³னபி பிவதீதி ஏதங் ஸுரங் வா மேரயங் வா பீ³ஜதோ பட்டா²ய குஸக்³கே³ன பிவதோபி பாசித்தியந்தி அத்தோ². ஏகேன பன பயோகே³ன ப³ஹும்பி பிவந்தஸ்ஸ ஏகா ஆபத்தி. விச்சி²ந்தி³த்வா விச்சி²ந்தி³த்வா பிவதோ பயோக³க³ணனாய ஆபத்தியோ.
328.Pupphāsavo nāma madhukapupphādīnaṃ rasena kato. Phalāsavo nāma muddikaphalādīni madditvā tesaṃ rasena kato. Madhvāsavo nāma muddikānaṃ jātirasena kato; makkhikamadhunāpi kariyatīti vadanti. Guḷāsavo nāma ucchurasādīhi kariyati. Surā nāma piṭṭhakiṇṇapakkhittā; nāḷikerādīnampi rasena katā surātveva saṅkhyaṃ gacchati, tassāyeva kiṇṇapakkhittāya maṇḍe gahite merayotveva saṅkhyaṃ gacchatīti vadanti. Antamaso kusaggenapi pivatīti etaṃ suraṃ vā merayaṃ vā bījato paṭṭhāya kusaggena pivatopi pācittiyanti attho. Ekena pana payogena bahumpi pivantassa ekā āpatti. Vicchinditvā vicchinditvā pivato payogagaṇanāya āpattiyo.
329. அமஜ்ஜஞ்ச ஹோதி மஜ்ஜவண்ணங் மஜ்ஜக³ந்த⁴ங் மஜ்ஜரஸந்தி லோணஸோவீரகங் வா ஸுத்தங் வா ஹோதி. ஸூபஸம்பாகேதி வாஸகா³ஹாபனத்த²ங் ஈஸகங் மஜ்ஜங் பக்கி²பித்வா ஸூபங் பசந்தி, தஸ்மிங் அனாபத்தி. மங்ஸஸம்பாகேபி ஏஸேவ நயோ. தேலங் பன வாதபே⁴ஸஜ்ஜத்த²ங் மஜ்ஜேன ஸத்³தி⁴ங் பசந்தி, தஸ்மிம்பி அனதிக்கி²த்தமஜ்ஜேயேவ அனாபத்தி, யங் பன அதிக்கி²த்தமஜ்ஜங் ஹோதி, எத்த² மஜ்ஜஸ்ஸ வண்ணக³ந்த⁴ரஸா பஞ்ஞாயந்தி, தஸ்மிங் ஆபத்தியேவ. அமஜ்ஜங் அரிட்ட²ந்தி யோ அரிட்டோ² மஜ்ஜங் ந ஹோதி, தஸ்மிங் அனாபத்தி. ஆமலகாதீ³னங்யேவ கிர ரஸேன அரிட்ட²ங் கரொந்தி, ஸோ மஜ்ஜவண்ணக³ந்த⁴ரஸோயேவ ஹோதி, ந ச மஜ்ஜங்; தங் ஸந்தா⁴யேதங் வுத்தங். யோ பன ஸம்பா⁴ரபக்கி²த்தோ, ஸோ மஜ்ஜங் ஹோதி, பீ³ஜதோ பட்டா²ய ந வட்டதி. ஸேஸமெத்த² உத்தானமேவ. ஏளகலோமஸமுட்டா²னங் – கிரியங், நோஸஞ்ஞாவிமொக்க²ங், அசித்தகங், லோகவஜ்ஜங், காயகம்மங் அகுஸலசித்தங், திவேத³னந்தி. வத்து²அஜானநதாய செத்த² அசித்தகதா வேதி³தப்³பா³, அகுஸலேனேவ பாதப்³ப³தாய லோகவஜ்ஜதாதி.
329.Amajjañca hoti majjavaṇṇaṃ majjagandhaṃ majjarasanti loṇasovīrakaṃ vā suttaṃ vā hoti. Sūpasampāketi vāsagāhāpanatthaṃ īsakaṃ majjaṃ pakkhipitvā sūpaṃ pacanti, tasmiṃ anāpatti. Maṃsasampākepi eseva nayo. Telaṃ pana vātabhesajjatthaṃ majjena saddhiṃ pacanti, tasmimpi anatikkhittamajjeyeva anāpatti, yaṃ pana atikkhittamajjaṃ hoti, ettha majjassa vaṇṇagandharasā paññāyanti, tasmiṃ āpattiyeva. Amajjaṃ ariṭṭhanti yo ariṭṭho majjaṃ na hoti, tasmiṃ anāpatti. Āmalakādīnaṃyeva kira rasena ariṭṭhaṃ karonti, so majjavaṇṇagandharasoyeva hoti, na ca majjaṃ; taṃ sandhāyetaṃ vuttaṃ. Yo pana sambhārapakkhitto, so majjaṃ hoti, bījato paṭṭhāya na vaṭṭati. Sesamettha uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, lokavajjaṃ, kāyakammaṃ akusalacittaṃ, tivedananti. Vatthuajānanatāya cettha acittakatā veditabbā, akusaleneva pātabbatāya lokavajjatāti.
ஸுராபானஸிக்கா²பத³ங் பட²மங்.
Surāpānasikkhāpadaṃ paṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. ஸுராபானவக்³கோ³ • 6. Surāpānavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. ஸுராபானஸிக்கா²பத³வண்ணனா • 1. Surāpānasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. ஸுராபானஸிக்கா²பத³வண்ணனா • 1. Surāpānasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. ஸுராபானஸிக்கா²பத³வண்ணனா • 1. Surāpānasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. ஸுராபானஸிக்கா²பத³-அத்த²யோஜனா • 1. Surāpānasikkhāpada-atthayojanā
