| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
6. ஸுராபானவக்³கோ³
6. Surāpānavaggo
1. ஸுராபானஸிக்கா²பத³வண்ணனா
1. Surāpānasikkhāpadavaṇṇanā
பிட்டா²தீ³ஹி கதங் மஜ்ஜங் ஸுராதி பிட்ட²பூவஓத³னகிண்ணஸம்பா⁴ரேஹி கதங் மஜ்ஜங் ஸுராதி அத்தோ². இத³ங் வுத்தங் ஹோதி – பிட்ட²ஸுரா, பூவஸுரா, ஓத³னஸுரா, கிண்ணபக்கி²த்தா, ஸம்பா⁴ரஸங்யுத்தாதி (பாசி॰ 328) இமானி பஞ்ச ஸுரா நாமாதி. தத்த² பிட்ட²ங் பா⁴ஜனே பக்கி²பித்வா தஜ்ஜங் உத³கங் த³த்வா மத்³தி³த்வா கதா பிட்ட²ஸுரா (ஸாரத்த²॰ டீ॰ பாசித்திய 3.326-328). ஏவங் ஸேஸாஸுபி. கிண்ணாதி பன தஸ்ஸா ஸுராய பீ³ஜங் வுச்சதி. யே ‘‘ஸுராமோத³கா’’திபி வுச்சந்தி, தே பக்கி²பித்வா கதா கிண்ணபக்கி²த்தா. ஹரீதகிஸாஸபாதி³னானாஸம்பா⁴ரேஹி ஸங்யோஜிதா ஸம்பா⁴ரஸங்யுத்தா.
Piṭṭhādīhikataṃ majjaṃ surāti piṭṭhapūvaodanakiṇṇasambhārehi kataṃ majjaṃ surāti attho. Idaṃ vuttaṃ hoti – piṭṭhasurā, pūvasurā, odanasurā, kiṇṇapakkhittā, sambhārasaṃyuttāti (pāci. 328) imāni pañca surā nāmāti. Tattha piṭṭhaṃ bhājane pakkhipitvā tajjaṃ udakaṃ datvā madditvā katā piṭṭhasurā (sārattha. ṭī. pācittiya 3.326-328). Evaṃ sesāsupi. Kiṇṇāti pana tassā surāya bījaṃ vuccati. Ye ‘‘surāmodakā’’tipi vuccanti, te pakkhipitvā katā kiṇṇapakkhittā. Harītakisāsapādinānāsambhārehi saṃyojitā sambhārasaṃyuttā.
புப்பா²தீ³ஹி கதோ ஆஸவோ மேரயந்தி புப்ப²ப²லமது⁴கு³ளஸம்பா⁴ரேஹி கதோ சிரபரிவாஸிதோ மேரயந்தி அத்தோ². இத³ங் வுத்தங் ஹோதி – புப்பா²ஸவோ, ப²லாஸவோ, மத்⁴வாஸவோ, கு³ளாஸவோ, ஸம்பா⁴ரஸங்யுத்தோதி பஞ்சமேரயங் நாமாதி. தத்த² மது⁴கதாலனாளிகேராதி³ புப்ப²ரஸோ சிரபரிவாஸிதோ புப்பா²ஸவோ. பனஸாதி³ப²லரஸோ ப²லாஸவோ. முத்³தி³காரஸோ மத்⁴வாஸவோ. ஸமந்தபாஸாதி³காயங் பன ‘‘ப²லாஸவோ நாம முத்³தி³காப²லாதீ³னி மத்³தி³த்வா தேஸங் ரஸேன கதோ. மத்⁴வாஸவோ நாம முத்³தி³கானங் ஜாதிரஸேன கதோ, மக்கி²காமது⁴னாபி கரீயதீதி வத³ந்தீ’’தி (பாசி॰ அட்ட²॰ 328) வுத்தங். உச்சு²ரஸோ கு³ளாஸவோ. ஹரீதகாமலககடுகப⁴ண்டா³தி³னானாஸம்பா⁴ரானங் ரஸோ சிரபரிவாஸிதோ ஸம்பா⁴ரஸங்யுத்தோ. எத்த² ச ஸுராய, மேரயஸ்ஸ ச ஸமானேபி ஸம்பா⁴ரஸங்யோகே³ மத்³தி³த்வா கதா ஸுரா, சிரபரிவாஸிதமத்தேன மேரயந்தி ஏவமிமேஸங் நானாகரணங் த³ட்ட²ப்³ப³ங். பீ³ஜதோ பட்டா²யாதி ஸம்பா⁴ரே படியாதெ³த்வா சாடியங் பக்கி²த்தகாலதோ சேவ தாலனாளிகேராதீ³னங் புப்ப²ரஸஸ்ஸ அபி⁴னவகாலதோ ச பட்டா²ய.
Pupphādīhi kato āsavo merayanti pupphaphalamadhuguḷasambhārehi kato ciraparivāsito merayanti attho. Idaṃ vuttaṃ hoti – pupphāsavo, phalāsavo, madhvāsavo, guḷāsavo, sambhārasaṃyuttoti pañcamerayaṃ nāmāti. Tattha madhukatālanāḷikerādi puppharaso ciraparivāsito pupphāsavo. Panasādiphalaraso phalāsavo. Muddikāraso madhvāsavo. Samantapāsādikāyaṃ pana ‘‘phalāsavo nāma muddikāphalādīni madditvā tesaṃ rasena kato. Madhvāsavo nāma muddikānaṃ jātirasena kato, makkhikāmadhunāpi karīyatīti vadantī’’ti (pāci. aṭṭha. 328) vuttaṃ. Ucchuraso guḷāsavo. Harītakāmalakakaṭukabhaṇḍādinānāsambhārānaṃ raso ciraparivāsito sambhārasaṃyutto. Ettha ca surāya, merayassa ca samānepi sambhārasaṃyoge madditvā katā surā, ciraparivāsitamattena merayanti evamimesaṃ nānākaraṇaṃ daṭṭhabbaṃ. Bījato paṭṭhāyāti sambhāre paṭiyādetvā cāṭiyaṃ pakkhittakālato ceva tālanāḷikerādīnaṃ puppharasassa abhinavakālato ca paṭṭhāya.
லோணஸோவீரகங் வா ஸுத்தங் வாதி இமே த்³வே அனேகேஹி பே⁴ஸஜ்ஜேஹி அபி⁴ஸங்க²தா ஆஸவவிஸேஸா. வாஸக்³கா³ஹாபனத்த²ந்தி ஸுக³ந்த⁴பா⁴வகா³ஹாபனத்த²ங். வத்து²ங் அஜானநதாய செத்த² அசித்தகதா வேதி³தப்³பா³. அகுஸலேனேவ பாதப்³ப³தாய லோகவஜ்ஜங். யங் பனெத்த² வத்தப்³ப³ங் ஸியா, தங் ஸப்³ப³ங் பட²மபாராஜிகவண்ணனாய வுத்தனயமேவ.
Loṇasovīrakaṃ vā suttaṃ vāti ime dve anekehi bhesajjehi abhisaṅkhatā āsavavisesā. Vāsaggāhāpanatthanti sugandhabhāvagāhāpanatthaṃ. Vatthuṃ ajānanatāya cettha acittakatā veditabbā. Akusaleneva pātabbatāya lokavajjaṃ. Yaṃ panettha vattabbaṃ siyā, taṃ sabbaṃ paṭhamapārājikavaṇṇanāya vuttanayameva.
ஸுராபானஸிக்கா²பத³வண்ணனா நிட்டி²தா.
Surāpānasikkhāpadavaṇṇanā niṭṭhitā.
