| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
6. ஸுராபானவக்³கோ³
6. Surāpānavaggo
1. ஸுராபானஸிக்கா²பத³வண்ணனா
1. Surāpānasikkhāpadavaṇṇanā
326-328. ஸுராபானவக்³க³ஸ்ஸ பட²மஸிக்கா²பதே³ வதியாதி கா³மபரிக்கே²பவதியா. பாளியங் பிட்ட²ஸுராதீ³ஸு பிட்ட²ங் பா⁴ஜனே பக்கி²பித்வா தஜ்ஜங் உத³கங் த³த்வா மத்³தி³த்வா கதா பிட்ட²ஸுரா. ஏவங் பூவே ஓத³னே ச பா⁴ஜனே பக்கி²பித்வா தஜ்ஜங் உத³கங் த³த்வா மத்³தி³த்வா கதா பூவஸுரா ஓத³னஸுராதி ச வுச்சதி. ‘‘கிண்ணா’’தி பன தஸ்ஸா ஸுராய பீ³ஜங் வுச்சதி. யே ஸுராமோத³காதிபி வுச்சந்தி, தே பக்கி²பித்வா கதா கிண்ணபக்கி²த்தா. ஹரீதகீஸாஸபாதி³னானாஸம்பா⁴ரேஹி ஸங்யோஜிதா ஸம்பா⁴ரஸங்யுத்தா.
326-328. Surāpānavaggassa paṭhamasikkhāpade vatiyāti gāmaparikkhepavatiyā. Pāḷiyaṃ piṭṭhasurādīsu piṭṭhaṃ bhājane pakkhipitvā tajjaṃ udakaṃ datvā madditvā katā piṭṭhasurā. Evaṃ pūve odane ca bhājane pakkhipitvā tajjaṃ udakaṃ datvā madditvā katā pūvasurā odanasurāti ca vuccati. ‘‘Kiṇṇā’’ti pana tassā surāya bījaṃ vuccati. Ye surāmodakātipi vuccanti, te pakkhipitvā katā kiṇṇapakkhittā. Harītakīsāsapādinānāsambhārehi saṃyojitā sambhārasaṃyuttā.
மது⁴கதாலனாளிகேராதி³புப்ப²ரஸோ சிரபரிவாஸிதோ புப்பா²ஸவோ. பனஸாதி³ப²லரஸோ ப²லாஸவோ. முத்³தி³காரஸோ மத்⁴வாஸவோ. உச்சு²ரஸோ கு³ளாஸவோ. ஹரீதகாமலககடுகப⁴ண்டா³தி³னானாஸம்பா⁴ரானங் ரஸோ சிரபரிவாஸிதோ ஸம்பா⁴ரஸங்யுத்தோ. பீ³ஜதோ பட்டா²யாதி ஸம்பா⁴ரே படியாதெ³த்வா சாடியங் பக்கி²த்தகாலதோ, தாலனாளிகேராதீ³னங் புப்ப²ரஸஸ்ஸ க³ஹிதஅபி⁴னவகாலதோயேவ ச பட்டா²ய.
Madhukatālanāḷikerādipuppharaso ciraparivāsito pupphāsavo. Panasādiphalaraso phalāsavo. Muddikāraso madhvāsavo. Ucchuraso guḷāsavo. Harītakāmalakakaṭukabhaṇḍādinānāsambhārānaṃ raso ciraparivāsito sambhārasaṃyutto. Bījato paṭṭhāyāti sambhāre paṭiyādetvā cāṭiyaṃ pakkhittakālato, tālanāḷikerādīnaṃ puppharasassa gahitaabhinavakālatoyeva ca paṭṭhāya.
329. லோணஸோவீரகங் ஸுத்தஞ்ச அனேகேஹி பே⁴ஸஜ்ஜேஹி அபி⁴ஸங்க²தோ அமஜ்ஜபூ⁴தோ ஆஸவவிஸேஸோ. வாஸக்³கா³ஹாபனத்த²ந்தி ஸுக³ந்தி⁴பா⁴வக்³கா³ஹாபனத்த²ங். அசித்தகங் லோகவஜ்ஜந்தி எத்த² யங் வத்தப்³ப³ங், தங் பட²மபாராஜிகவண்ணனாயங் வுத்தனயேன வேதி³தப்³ப³ங். ஸேஸமெத்த² உத்தானமேவ. மஜ்ஜபா⁴வோ, தஸ்ஸ பானஞ்சாதி இமானி பனெத்த² த்³வே அங்கா³னி.
329.Loṇasovīrakaṃ suttañca anekehi bhesajjehi abhisaṅkhato amajjabhūto āsavaviseso. Vāsaggāhāpanatthanti sugandhibhāvaggāhāpanatthaṃ. Acittakaṃ lokavajjanti ettha yaṃ vattabbaṃ, taṃ paṭhamapārājikavaṇṇanāyaṃ vuttanayena veditabbaṃ. Sesamettha uttānameva. Majjabhāvo, tassa pānañcāti imāni panettha dve aṅgāni.
ஸுராபானஸிக்கா²பத³வண்ணனா நிட்டி²தா.
Surāpānasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. ஸுராபானவக்³கோ³ • 6. Surāpānavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. ஸுராபானஸிக்கா²பத³வண்ணனா • 1. Surāpānasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. ஸுராபானஸிக்கா²பத³வண்ணனா • 1. Surāpānasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. ஸுராபானஸிக்கா²பத³வண்ணனா • 1. Surāpānasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. ஸுராபானஸிக்கா²பத³-அத்த²யோஜனா • 1. Surāpānasikkhāpada-atthayojanā
