| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৬. সুরাপানৰগ্গো
6. Surāpānavaggo
১. সুরাপানসিক্খাপদৰণ্ণনা
1. Surāpānasikkhāpadavaṇṇanā
৩২৬. সুরাপানৰগ্গস্স পঠমসিক্খাপদে – ভদ্দৰতিকাতি একো গামো, সো ভদ্দিকায ৰতিযা সমন্নাগতত্তা এতং নাম লভি। পথাৰিনোতি অদ্ধিকা। তেজসা তেজন্তি অত্তনো তেজসা আনুভাৰেন নাগস্স তেজং। কাপোতিকাতি কপোতপাদসমৰণ্ণরত্তোভাসা। পসন্নাতি সুরামণ্ডস্সেতং অধিৰচনং। অননুচ্ছৰিযং ভিক্খৰে সাগতস্সাতি পঞ্চাভিঞ্ঞস্স সতো মজ্জপানং নাম ন অনুচ্ছৰিযন্তি ৰুত্তং হোতি।
326. Surāpānavaggassa paṭhamasikkhāpade – bhaddavatikāti eko gāmo, so bhaddikāya vatiyā samannāgatattā etaṃ nāma labhi. Pathāvinoti addhikā. Tejasā tejanti attano tejasā ānubhāvena nāgassa tejaṃ. Kāpotikāti kapotapādasamavaṇṇarattobhāsā. Pasannāti surāmaṇḍassetaṃ adhivacanaṃ. Ananucchaviyaṃ bhikkhave sāgatassāti pañcābhiññassa sato majjapānaṃ nāma na anucchaviyanti vuttaṃ hoti.
৩২৮. পুপ্ফাসৰো নাম মধুকপুপ্ফাদীনং রসেন কতো। ফলাসৰো নাম মুদ্দিকফলাদীনি মদ্দিত্ৰা তেসং রসেন কতো। মধ্ৰাসৰো নাম মুদ্দিকানং জাতিরসেন কতো; মক্খিকমধুনাপি করিযতীতি ৰদন্তি। গুল়াসৰো নাম উচ্ছুরসাদীহি করিযতি। সুরা নাম পিট্ঠকিণ্ণপক্খিত্তা; নাল়িকেরাদীনম্পি রসেন কতা সুরাত্ৰেৰ সঙ্খ্যং গচ্ছতি, তস্সাযেৰ কিণ্ণপক্খিত্তায মণ্ডে গহিতে মেরযোত্ৰেৰ সঙ্খ্যং গচ্ছতীতি ৰদন্তি। অন্তমসো কুসগ্গেনপি পিৰতীতি এতং সুরং ৰা মেরযং ৰা বীজতো পট্ঠায কুসগ্গেন পিৰতোপি পাচিত্তিযন্তি অত্থো। একেন পন পযোগেন বহুম্পি পিৰন্তস্স একা আপত্তি। ৰিচ্ছিন্দিত্ৰা ৰিচ্ছিন্দিত্ৰা পিৰতো পযোগগণনায আপত্তিযো।
328.Pupphāsavo nāma madhukapupphādīnaṃ rasena kato. Phalāsavo nāma muddikaphalādīni madditvā tesaṃ rasena kato. Madhvāsavo nāma muddikānaṃ jātirasena kato; makkhikamadhunāpi kariyatīti vadanti. Guḷāsavo nāma ucchurasādīhi kariyati. Surā nāma piṭṭhakiṇṇapakkhittā; nāḷikerādīnampi rasena katā surātveva saṅkhyaṃ gacchati, tassāyeva kiṇṇapakkhittāya maṇḍe gahite merayotveva saṅkhyaṃ gacchatīti vadanti. Antamaso kusaggenapi pivatīti etaṃ suraṃ vā merayaṃ vā bījato paṭṭhāya kusaggena pivatopi pācittiyanti attho. Ekena pana payogena bahumpi pivantassa ekā āpatti. Vicchinditvā vicchinditvā pivato payogagaṇanāya āpattiyo.
৩২৯. অমজ্জঞ্চ হোতি মজ্জৰণ্ণং মজ্জগন্ধং মজ্জরসন্তি লোণসোৰীরকং ৰা সুত্তং ৰা হোতি। সূপসম্পাকেতি ৰাসগাহাপনত্থং ঈসকং মজ্জং পক্খিপিত্ৰা সূপং পচন্তি, তস্মিং অনাপত্তি। মংসসম্পাকেপি এসেৰ নযো। তেলং পন ৰাতভেসজ্জত্থং মজ্জেন সদ্ধিং পচন্তি, তস্মিম্পি অনতিক্খিত্তমজ্জেযেৰ অনাপত্তি, যং পন অতিক্খিত্তমজ্জং হোতি, এত্থ মজ্জস্স ৰণ্ণগন্ধরসা পঞ্ঞাযন্তি, তস্মিং আপত্তিযেৰ। অমজ্জং অরিট্ঠন্তি যো অরিট্ঠো মজ্জং ন হোতি, তস্মিং অনাপত্তি। আমলকাদীনংযেৰ কির রসেন অরিট্ঠং করোন্তি, সো মজ্জৰণ্ণগন্ধরসোযেৰ হোতি, ন চ মজ্জং; তং সন্ধাযেতং ৰুত্তং। যো পন সম্ভারপক্খিত্তো, সো মজ্জং হোতি, বীজতো পট্ঠায ন ৰট্টতি। সেসমেত্থ উত্তানমেৰ। এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, লোকৰজ্জং, কাযকম্মং অকুসলচিত্তং, তিৰেদনন্তি। ৰত্থুঅজাননতায চেত্থ অচিত্তকতা ৰেদিতব্বা, অকুসলেনেৰ পাতব্বতায লোকৰজ্জতাতি।
329.Amajjañca hoti majjavaṇṇaṃ majjagandhaṃ majjarasanti loṇasovīrakaṃ vā suttaṃ vā hoti. Sūpasampāketi vāsagāhāpanatthaṃ īsakaṃ majjaṃ pakkhipitvā sūpaṃ pacanti, tasmiṃ anāpatti. Maṃsasampākepi eseva nayo. Telaṃ pana vātabhesajjatthaṃ majjena saddhiṃ pacanti, tasmimpi anatikkhittamajjeyeva anāpatti, yaṃ pana atikkhittamajjaṃ hoti, ettha majjassa vaṇṇagandharasā paññāyanti, tasmiṃ āpattiyeva. Amajjaṃ ariṭṭhanti yo ariṭṭho majjaṃ na hoti, tasmiṃ anāpatti. Āmalakādīnaṃyeva kira rasena ariṭṭhaṃ karonti, so majjavaṇṇagandharasoyeva hoti, na ca majjaṃ; taṃ sandhāyetaṃ vuttaṃ. Yo pana sambhārapakkhitto, so majjaṃ hoti, bījato paṭṭhāya na vaṭṭati. Sesamettha uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, lokavajjaṃ, kāyakammaṃ akusalacittaṃ, tivedananti. Vatthuajānanatāya cettha acittakatā veditabbā, akusaleneva pātabbatāya lokavajjatāti.
সুরাপানসিক্খাপদং পঠমং।
Surāpānasikkhāpadaṃ paṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৬. সুরাপানৰগ্গো • 6. Surāpānavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. সুরাপানসিক্খাপদৰণ্ণনা • 1. Surāpānasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. সুরাপানসিক্খাপদৰণ্ণনা • 1. Surāpānasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. সুরাপানসিক্খাপদৰণ্ণনা • 1. Surāpānasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. সুরাপানসিক্খাপদ-অত্থযোজনা • 1. Surāpānasikkhāpada-atthayojanā
