| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
६. सुरापानवग्गो
6. Surāpānavaggo
१. सुरापानसिक्खापदवण्णना
1. Surāpānasikkhāpadavaṇṇanā
३२८. छट्ठवग्गस्स पठमे पाळियं किण्णपक्खित्ताति पिट्ठपूवादिं अपक्खिपित्वा किण्णसङ्खातं धञ्ञङ्कुरादिसुराबीजं पक्खिपित्वा कता। सम्भारसंयुत्ताति सासपादिअनेकसम्भारेहि सञ्ञुत्ता।
328. Chaṭṭhavaggassa paṭhame pāḷiyaṃ kiṇṇapakkhittāti piṭṭhapūvādiṃ apakkhipitvā kiṇṇasaṅkhātaṃ dhaññaṅkurādisurābījaṃ pakkhipitvā katā. Sambhārasaṃyuttāti sāsapādianekasambhārehi saññuttā.
मधुकतालनाळिकेरादिपुप्फादिरसो चिरपरिवासितो पुप्फासवो नाम। तथा पनसादि फलासवो। मुद्दिकरसो मध्वासवो। उच्छुरसो गुळासवो। तिफलतिकटुकादिनानासम्भारानं रसो चिरपरिवासितो सम्भारसंयुत्तो। बीजतो पट्ठायाति यथावुत्तानं पिट्ठादीनं मज्जत्थाय भाजने पक्खित्तकालतो पट्ठाय।
Madhukatālanāḷikerādipupphādiraso ciraparivāsito pupphāsavo nāma. Tathā panasādi phalāsavo. Muddikaraso madhvāsavo. Ucchuraso guḷāsavo. Tiphalatikaṭukādinānāsambhārānaṃ raso ciraparivāsito sambhārasaṃyutto. Bījato paṭṭhāyāti yathāvuttānaṃ piṭṭhādīnaṃ majjatthāya bhājane pakkhittakālato paṭṭhāya.
३२९. लोणसोवीरकं सुत्तञ्च अनेकेहि दब्बसम्भारेहि अभिसङ्खतो भेसज्जविसेसो। उय्युत्तसिक्खापदानं अचित्तकलोकवज्जेसु लोकवज्जता पुब्बे वुत्तनयावाति तत्थ किञ्चिपि अवत्वा इध तेहि असाधारणवत्थुविसेससिद्धाय अचित्तकपक्खेपि अकुसलचित्तताय तं लोकवज्जतादिविसेसं दस्सेतुमेव ‘‘वत्थुअजाननताय चेत्था’’तिआदिना वुत्तन्ति वेदितब्बं। यं पनेत्थ वत्तब्बं, तं पठमपाराजिकवण्णनायं वित्थारतो सारत्थदीपनियं विरद्धट्ठानविसोधनवसेन वुत्तन्ति तत्थेव गहेतब्बं। मज्जभावो, तस्स पानञ्चाति इमानेत्थ द्वे अङ्गानि।
329.Loṇasovīrakaṃ suttañca anekehi dabbasambhārehi abhisaṅkhato bhesajjaviseso. Uyyuttasikkhāpadānaṃ acittakalokavajjesu lokavajjatā pubbe vuttanayāvāti tattha kiñcipi avatvā idha tehi asādhāraṇavatthuvisesasiddhāya acittakapakkhepi akusalacittatāya taṃ lokavajjatādivisesaṃ dassetumeva ‘‘vatthuajānanatāya cetthā’’tiādinā vuttanti veditabbaṃ. Yaṃ panettha vattabbaṃ, taṃ paṭhamapārājikavaṇṇanāyaṃ vitthārato sāratthadīpaniyaṃ viraddhaṭṭhānavisodhanavasena vuttanti tattheva gahetabbaṃ. Majjabhāvo, tassa pānañcāti imānettha dve aṅgāni.
सुरापानसिक्खापदवण्णना निट्ठिता।
Surāpānasikkhāpadavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ६. सुरापानवग्गो • 6. Surāpānavaggo
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महाविभङ्ग-अट्ठकथा • Mahāvibhaṅga-aṭṭhakathā / १. सुरापानसिक्खापदवण्णना • 1. Surāpānasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / १. सुरापानसिक्खापदवण्णना • 1. Surāpānasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / १. सुरापानसिक्खापदवण्णना • 1. Surāpānasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १. सुरापानसिक्खापद-अत्थयोजना • 1. Surāpānasikkhāpada-atthayojanā
