| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
၆. သုရာပာနဝဂ္ဂော
6. Surāpānavaggo
၁. သုရာပာနသိက္ခာပဒဝဏ္ဏနာ
1. Surāpānasikkhāpadavaṇṇanā
၃၂၆-၃၂၈. သုရာပာနဝဂ္ဂသ္သ ပဌမသိက္ခာပဒေ ဝတိယာတိ ဂာမပရိက္ခေပဝတိယာ။ ပာဠိယံ ပိဋ္ဌသုရာဒီသု ပိဋ္ဌံ ဘာဇနေ ပက္ခိပိတ္ဝာ တဇ္ဇံ ဥဒကံ ဒတ္ဝာ မဒ္ဒိတ္ဝာ ကတာ ပိဋ္ဌသုရာ။ ဧဝံ ပူဝေ ဩဒနေ စ ဘာဇနေ ပက္ခိပိတ္ဝာ တဇ္ဇံ ဥဒကံ ဒတ္ဝာ မဒ္ဒိတ္ဝာ ကတာ ပူဝသုရာ ဩဒနသုရာတိ စ ဝုစ္စတိ။ ‘‘ကိဏ္ဏာ’’တိ ပန တသ္သာ သုရာယ ဗီဇံ ဝုစ္စတိ။ ယေ သုရာမောဒကာတိပိ ဝုစ္စန္တိ, တေ ပက္ခိပိတ္ဝာ ကတာ ကိဏ္ဏပက္ခိတ္တာ။ ဟရီတကီသာသပာဒိနာနာသမ္ဘာရေဟိ သံယောဇိတာ သမ္ဘာရသံယုတ္တာ။
326-328. Surāpānavaggassa paṭhamasikkhāpade vatiyāti gāmaparikkhepavatiyā. Pāḷiyaṃ piṭṭhasurādīsu piṭṭhaṃ bhājane pakkhipitvā tajjaṃ udakaṃ datvā madditvā katā piṭṭhasurā. Evaṃ pūve odane ca bhājane pakkhipitvā tajjaṃ udakaṃ datvā madditvā katā pūvasurā odanasurāti ca vuccati. ‘‘Kiṇṇā’’ti pana tassā surāya bījaṃ vuccati. Ye surāmodakātipi vuccanti, te pakkhipitvā katā kiṇṇapakkhittā. Harītakīsāsapādinānāsambhārehi saṃyojitā sambhārasaṃyuttā.
မဓုကတာလနာဠိကေရာဒိပုပ္ဖရသော စိရပရိဝာသိတော ပုပ္ဖာသဝော။ ပနသာဒိဖလရသော ဖလာသဝော။ မုဒ္ဒိကာရသော မဓ္ဝာသဝော။ ဥစ္ဆုရသော ဂုဠာသဝော။ ဟရီတကာမလကကဋုကဘဏ္ဍာဒိနာနာသမ္ဘာရာနံ ရသော စိရပရိဝာသိတော သမ္ဘာရသံယုတ္တော။ ဗီဇတော ပဋ္ဌာယာတိ သမ္ဘာရေ ပဋိယာဒေတ္ဝာ စာဋိယံ ပက္ခိတ္တကာလတော, တာလနာဠိကေရာဒီနံ ပုပ္ဖရသသ္သ ဂဟိတအဘိနဝကာလတောယေဝ စ ပဋ္ဌာယ။
Madhukatālanāḷikerādipuppharaso ciraparivāsito pupphāsavo. Panasādiphalaraso phalāsavo. Muddikāraso madhvāsavo. Ucchuraso guḷāsavo. Harītakāmalakakaṭukabhaṇḍādinānāsambhārānaṃ raso ciraparivāsito sambhārasaṃyutto. Bījato paṭṭhāyāti sambhāre paṭiyādetvā cāṭiyaṃ pakkhittakālato, tālanāḷikerādīnaṃ puppharasassa gahitaabhinavakālatoyeva ca paṭṭhāya.
၃၂၉. လောဏသောဝီရကံ သုတ္တဉ္စ အနေကေဟိ ဘေသဇ္ဇေဟိ အဘိသင္ခတော အမဇ္ဇဘူတော အာသဝဝိသေသော။ ဝာသဂ္ဂာဟာပနတ္ထန္တိ သုဂန္ဓိဘာဝဂ္ဂာဟာပနတ္ထံ။ အစိတ္တကံ လောကဝဇ္ဇန္တိ ဧတ္ထ ယံ ဝတ္တဗ္ဗံ, တံ ပဌမပာရာဇိကဝဏ္ဏနာယံ ဝုတ္တနယေန ဝေဒိတဗ္ဗံ။ သေသမေတ္ထ ဥတ္တာနမေဝ။ မဇ္ဇဘာဝော, တသ္သ ပာနဉ္စာတိ ဣမာနိ ပနေတ္ထ ဒ္ဝေ အင္ဂာနိ။
329.Loṇasovīrakaṃ suttañca anekehi bhesajjehi abhisaṅkhato amajjabhūto āsavaviseso. Vāsaggāhāpanatthanti sugandhibhāvaggāhāpanatthaṃ. Acittakaṃ lokavajjanti ettha yaṃ vattabbaṃ, taṃ paṭhamapārājikavaṇṇanāyaṃ vuttanayena veditabbaṃ. Sesamettha uttānameva. Majjabhāvo, tassa pānañcāti imāni panettha dve aṅgāni.
သုရာပာနသိက္ခာပဒဝဏ္ဏနာ နိဋ္ဌိတာ။
Surāpānasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၆. သုရာပာနဝဂ္ဂော • 6. Surāpānavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၁. သုရာပာနသိက္ခာပဒဝဏ္ဏနာ • 1. Surāpānasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁. သုရာပာနသိက္ခာပဒဝဏ္ဏနာ • 1. Surāpānasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. သုရာပာနသိက္ခာပဒဝဏ္ဏနာ • 1. Surāpānasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁. သုရာပာနသိက္ခာပဒ-အတ္ထယောဇနာ • 1. Surāpānasikkhāpada-atthayojanā
