| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
၆. သုရာပာနဝဂ္ဂော
6. Surāpānavaggo
၁. သုရာပာနသိက္ခာပဒဝဏ္ဏနာ
1. Surāpānasikkhāpadavaṇṇanā
၃၂၈. ဆဋ္ဌဝဂ္ဂသ္သ ပဌမေ ပာဠိယံ ကိဏ္ဏပက္ခိတ္တာတိ ပိဋ္ဌပူဝာဒိံ အပက္ခိပိတ္ဝာ ကိဏ္ဏသင္ခာတံ ဓညင္ကုရာဒိသုရာဗီဇံ ပက္ခိပိတ္ဝာ ကတာ။ သမ္ဘာရသံယုတ္တာတိ သာသပာဒိအနေကသမ္ဘာရေဟိ သညုတ္တာ။
328. Chaṭṭhavaggassa paṭhame pāḷiyaṃ kiṇṇapakkhittāti piṭṭhapūvādiṃ apakkhipitvā kiṇṇasaṅkhātaṃ dhaññaṅkurādisurābījaṃ pakkhipitvā katā. Sambhārasaṃyuttāti sāsapādianekasambhārehi saññuttā.
မဓုကတာလနာဠိကေရာဒိပုပ္ဖာဒိရသော စိရပရိဝာသိတော ပုပ္ဖာသဝော နာမ။ တထာ ပနသာဒိ ဖလာသဝော။ မုဒ္ဒိကရသော မဓ္ဝာသဝော။ ဥစ္ဆုရသော ဂုဠာသဝော။ တိဖလတိကဋုကာဒိနာနာသမ္ဘာရာနံ ရသော စိရပရိဝာသိတော သမ္ဘာရသံယုတ္တော။ ဗီဇတော ပဋ္ဌာယာတိ ယထာဝုတ္တာနံ ပိဋ္ဌာဒီနံ မဇ္ဇတ္ထာယ ဘာဇနေ ပက္ခိတ္တကာလတော ပဋ္ဌာယ။
Madhukatālanāḷikerādipupphādiraso ciraparivāsito pupphāsavo nāma. Tathā panasādi phalāsavo. Muddikaraso madhvāsavo. Ucchuraso guḷāsavo. Tiphalatikaṭukādinānāsambhārānaṃ raso ciraparivāsito sambhārasaṃyutto. Bījato paṭṭhāyāti yathāvuttānaṃ piṭṭhādīnaṃ majjatthāya bhājane pakkhittakālato paṭṭhāya.
၃၂၉. လောဏသောဝီရကံ သုတ္တဉ္စ အနေကေဟိ ဒဗ္ဗသမ္ဘာရေဟိ အဘိသင္ခတော ဘေသဇ္ဇဝိသေသော။ ဥယ္ယုတ္တသိက္ခာပဒာနံ အစိတ္တကလောကဝဇ္ဇေသု လောကဝဇ္ဇတာ ပုဗ္ဗေ ဝုတ္တနယာဝာတိ တတ္ထ ကိဉ္စိပိ အဝတ္ဝာ ဣဓ တေဟိ အသာဓာရဏဝတ္ထုဝိသေသသိဒ္ဓာယ အစိတ္တကပက္ခေပိ အကုသလစိတ္တတာယ တံ လောကဝဇ္ဇတာဒိဝိသေသံ ဒသ္သေတုမေဝ ‘‘ဝတ္ထုအဇာနနတာယ စေတ္ထာ’’တိအာဒိနာ ဝုတ္တန္တိ ဝေဒိတဗ္ဗံ။ ယံ ပနေတ္ထ ဝတ္တဗ္ဗံ, တံ ပဌမပာရာဇိကဝဏ္ဏနာယံ ဝိတ္ထာရတော သာရတ္ထဒီပနိယံ ဝိရဒ္ဓဋ္ဌာနဝိသောဓနဝသေန ဝုတ္တန္တိ တတ္ထေဝ ဂဟေတဗ္ဗံ။ မဇ္ဇဘာဝော, တသ္သ ပာနဉ္စာတိ ဣမာနေတ္ထ ဒ္ဝေ အင္ဂာနိ။
329.Loṇasovīrakaṃ suttañca anekehi dabbasambhārehi abhisaṅkhato bhesajjaviseso. Uyyuttasikkhāpadānaṃ acittakalokavajjesu lokavajjatā pubbe vuttanayāvāti tattha kiñcipi avatvā idha tehi asādhāraṇavatthuvisesasiddhāya acittakapakkhepi akusalacittatāya taṃ lokavajjatādivisesaṃ dassetumeva ‘‘vatthuajānanatāya cetthā’’tiādinā vuttanti veditabbaṃ. Yaṃ panettha vattabbaṃ, taṃ paṭhamapārājikavaṇṇanāyaṃ vitthārato sāratthadīpaniyaṃ viraddhaṭṭhānavisodhanavasena vuttanti tattheva gahetabbaṃ. Majjabhāvo, tassa pānañcāti imānettha dve aṅgāni.
သုရာပာနသိက္ခာပဒဝဏ္ဏနာ နိဋ္ဌိတာ။
Surāpānasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၆. သုရာပာနဝဂ္ဂော • 6. Surāpānavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၁. သုရာပာနသိက္ခာပဒဝဏ္ဏနာ • 1. Surāpānasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၁. သုရာပာနသိက္ခာပဒဝဏ္ဏနာ • 1. Surāpānasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၁. သုရာပာနသိက္ခာပဒဝဏ္ဏနာ • 1. Surāpānasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁. သုရာပာနသိက္ခာပဒ-အတ္ထယောဇနာ • 1. Surāpānasikkhāpada-atthayojanā
