| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
6. සුරාපානවග්‌ගො
6. Surāpānavaggo
1. සුරාපානසික්‌ඛාපදවණ්‌ණනා
1. Surāpānasikkhāpadavaṇṇanā
326-328. සුරාපානවග්‌ගස්‌ස පඨමසික්‌ඛාපදෙ වතියාති ගාමපරික්‌ඛෙපවතියා. පාළියං පිට්‌ඨසුරාදීසු පිට්‌ඨං භාජනෙ පක්‌ඛිපිත්‌වා තජ්‌ජං උදකං දත්‌වා මද්‌දිත්‌වා කතා පිට්‌ඨසුරා. එවං පූවෙ ඔදනෙ ච භාජනෙ පක්‌ඛිපිත්‌වා තජ්‌ජං උදකං දත්‌වා මද්‌දිත්‌වා කතා පූවසුරා ඔදනසුරාති ච වුච්‌චති. ‘‘කිණ්‌ණා’’ති පන තස්‌සා සුරාය බීජං වුච්‌චති. යෙ සුරාමොදකාතිපි වුච්‌චන්‌ති, තෙ පක්‌ඛිපිත්‌වා කතා කිණ්‌ණපක්‌ඛිත්‌තා. හරීතකීසාසපාදිනානාසම්‌භාරෙහි සංයොජිතා සම්‌භාරසංයුත්‌තා.
326-328. Surāpānavaggassa paṭhamasikkhāpade vatiyāti gāmaparikkhepavatiyā. Pāḷiyaṃ piṭṭhasurādīsu piṭṭhaṃ bhājane pakkhipitvā tajjaṃ udakaṃ datvā madditvā katā piṭṭhasurā. Evaṃ pūve odane ca bhājane pakkhipitvā tajjaṃ udakaṃ datvā madditvā katā pūvasurā odanasurāti ca vuccati. ‘‘Kiṇṇā’’ti pana tassā surāya bījaṃ vuccati. Ye surāmodakātipi vuccanti, te pakkhipitvā katā kiṇṇapakkhittā. Harītakīsāsapādinānāsambhārehi saṃyojitā sambhārasaṃyuttā.
මධුකතාලනාළිකෙරාදිපුප්‌ඵරසො චිරපරිවාසිතො පුප්‌ඵාසවො. පනසාදිඵලරසො ඵලාසවො. මුද්‌දිකාරසො මධ්‌වාසවො. උච්‌ඡුරසො ගුළාසවො. හරීතකාමලකකටුකභණ්‌ඩාදිනානාසම්‌භාරානං රසො චිරපරිවාසිතො සම්‌භාරසංයුත්‌තො. බීජතො පට්‌ඨායාති සම්‌භාරෙ පටියාදෙත්‌වා චාටියං පක්‌ඛිත්‌තකාලතො, තාලනාළිකෙරාදීනං පුප්‌ඵරසස්‌ස ගහිතඅභිනවකාලතොයෙව ච පට්‌ඨාය.
Madhukatālanāḷikerādipuppharaso ciraparivāsito pupphāsavo. Panasādiphalaraso phalāsavo. Muddikāraso madhvāsavo. Ucchuraso guḷāsavo. Harītakāmalakakaṭukabhaṇḍādinānāsambhārānaṃ raso ciraparivāsito sambhārasaṃyutto. Bījato paṭṭhāyāti sambhāre paṭiyādetvā cāṭiyaṃ pakkhittakālato, tālanāḷikerādīnaṃ puppharasassa gahitaabhinavakālatoyeva ca paṭṭhāya.
329. ලොණසොවීරකං සුත්‌තඤ්‌ච අනෙකෙහි භෙසජ්‌ජෙහි අභිසඞ්‌ඛතො අමජ්‌ජභූතො ආසවවිසෙසො. වාසග්‌ගාහාපනත්‌ථන්‌ති සුගන්‌ධිභාවග්‌ගාහාපනත්‌ථං. අචිත්‌තකං ලොකවජ්‌ජන්‌ති එත්‌ථ යං වත්‌තබ්‌බං, තං පඨමපාරාජිකවණ්‌ණනායං වුත්‌තනයෙන වෙදිතබ්‌බං. සෙසමෙත්‌ථ උත්‌තානමෙව. මජ්‌ජභාවො, තස්‌ස පානඤ්‌චාති ඉමානි පනෙත්‌ථ ද්‌වෙ අඞ්‌ගානි.
329.Loṇasovīrakaṃ suttañca anekehi bhesajjehi abhisaṅkhato amajjabhūto āsavaviseso. Vāsaggāhāpanatthanti sugandhibhāvaggāhāpanatthaṃ. Acittakaṃ lokavajjanti ettha yaṃ vattabbaṃ, taṃ paṭhamapārājikavaṇṇanāyaṃ vuttanayena veditabbaṃ. Sesamettha uttānameva. Majjabhāvo, tassa pānañcāti imāni panettha dve aṅgāni.
සුරාපානසික්‌ඛාපදවණ්‌ණනා නිට්‌ඨිතා.
Surāpānasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 6. සුරාපානවග්‌ගො • 6. Surāpānavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 1. සුරාපානසික්‌ඛාපදවණ්‌ණනා • 1. Surāpānasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 1. සුරාපානසික්‌ඛාපදවණ්‌ණනා • 1. Surāpānasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. සුරාපානසික්‌ඛාපදවණ්‌ණනා • 1. Surāpānasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 1. සුරාපානසික්‌ඛාපද-අත්‌ථයොජනා • 1. Surāpānasikkhāpada-atthayojanā
