| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༦. སུརཱཔཱནཝགྒོ
6. Surāpānavaggo
༡. སུརཱཔཱནསིཀྑཱཔདཝཎྞནཱ
1. Surāpānasikkhāpadavaṇṇanā
༣༢༦-༣༢༨. སུརཱཔཱནཝགྒསྶ པཋམསིཀྑཱཔདེ ཝཏིཡཱཏི གཱམཔརིཀྑེཔཝཏིཡཱ། པཱལི༹ཡཾ པིཊྛསུརཱདཱིསུ པིཊྛཾ བྷཱཛནེ པཀྑིཔིཏྭཱ ཏཛྫཾ ཨུདཀཾ དཏྭཱ མདྡིཏྭཱ ཀཏཱ པིཊྛསུརཱ། ཨེཝཾ པཱུཝེ ཨོདནེ ཙ བྷཱཛནེ པཀྑིཔིཏྭཱ ཏཛྫཾ ཨུདཀཾ དཏྭཱ མདྡིཏྭཱ ཀཏཱ པཱུཝསུརཱ ཨོདནསུརཱཏི ཙ ཝུཙྩཏི། ‘‘ཀིཎྞཱ’’ཏི པན ཏསྶཱ སུརཱཡ བཱིཛཾ ཝུཙྩཏི། ཡེ སུརཱམོདཀཱཏིཔི ཝུཙྩནྟི, ཏེ པཀྑིཔིཏྭཱ ཀཏཱ ཀིཎྞཔཀྑིཏྟཱ། ཧརཱིཏཀཱིསཱསཔཱདིནཱནཱསམྦྷཱརེཧི སཾཡོཛིཏཱ སམྦྷཱརསཾཡུཏྟཱ།
326-328. Surāpānavaggassa paṭhamasikkhāpade vatiyāti gāmaparikkhepavatiyā. Pāḷiyaṃ piṭṭhasurādīsu piṭṭhaṃ bhājane pakkhipitvā tajjaṃ udakaṃ datvā madditvā katā piṭṭhasurā. Evaṃ pūve odane ca bhājane pakkhipitvā tajjaṃ udakaṃ datvā madditvā katā pūvasurā odanasurāti ca vuccati. ‘‘Kiṇṇā’’ti pana tassā surāya bījaṃ vuccati. Ye surāmodakātipi vuccanti, te pakkhipitvā katā kiṇṇapakkhittā. Harītakīsāsapādinānāsambhārehi saṃyojitā sambhārasaṃyuttā.
མདྷུཀཏཱལནཱལི༹ཀེརཱདིཔུཔྥརསོ ཙིརཔརིཝཱསིཏོ པུཔྥཱསཝོ། པནསཱདིཕལརསོ ཕལཱསཝོ། མུདྡིཀཱརསོ མདྷྭཱསཝོ། ཨུཙྪུརསོ གུལཱ༹སཝོ། ཧརཱིཏཀཱམལཀཀཊུཀབྷཎྜཱདིནཱནཱསམྦྷཱརཱནཾ རསོ ཙིརཔརིཝཱསིཏོ སམྦྷཱརསཾཡུཏྟོ། བཱིཛཏོ པཊྛཱཡཱཏི སམྦྷཱརེ པཊིཡཱདེཏྭཱ ཙཱཊིཡཾ པཀྑིཏྟཀཱལཏོ, ཏཱལནཱལི༹ཀེརཱདཱིནཾ པུཔྥརསསྶ གཧིཏཨབྷིནཝཀཱལཏོཡེཝ ཙ པཊྛཱཡ།
Madhukatālanāḷikerādipuppharaso ciraparivāsito pupphāsavo. Panasādiphalaraso phalāsavo. Muddikāraso madhvāsavo. Ucchuraso guḷāsavo. Harītakāmalakakaṭukabhaṇḍādinānāsambhārānaṃ raso ciraparivāsito sambhārasaṃyutto. Bījato paṭṭhāyāti sambhāre paṭiyādetvā cāṭiyaṃ pakkhittakālato, tālanāḷikerādīnaṃ puppharasassa gahitaabhinavakālatoyeva ca paṭṭhāya.
༣༢༩. ལོཎསོཝཱིརཀཾ སུཏྟཉྩ ཨནེཀེཧི བྷེསཛྫེཧི ཨབྷིསངྑཏོ ཨམཛྫབྷཱུཏོ ཨཱསཝཝིསེསོ། ཝཱསགྒཱཧཱཔནཏྠནྟི སུགནྡྷིབྷཱཝགྒཱཧཱཔནཏྠཾ། ཨཙིཏྟཀཾ ལོཀཝཛྫནྟི ཨེཏྠ ཡཾ ཝཏྟབྦཾ, ཏཾ པཋམཔཱརཱཛིཀཝཎྞནཱཡཾ ཝུཏྟནཡེན ཝེདིཏབྦཾ། སེསམེཏྠ ཨུཏྟཱནམེཝ། མཛྫབྷཱཝོ, ཏསྶ པཱནཉྩཱཏི ཨིམཱནི པནེཏྠ དྭེ ཨངྒཱནི།
329.Loṇasovīrakaṃ suttañca anekehi bhesajjehi abhisaṅkhato amajjabhūto āsavaviseso. Vāsaggāhāpanatthanti sugandhibhāvaggāhāpanatthaṃ. Acittakaṃ lokavajjanti ettha yaṃ vattabbaṃ, taṃ paṭhamapārājikavaṇṇanāyaṃ vuttanayena veditabbaṃ. Sesamettha uttānameva. Majjabhāvo, tassa pānañcāti imāni panettha dve aṅgāni.
སུརཱཔཱནསིཀྑཱཔདཝཎྞནཱ ནིཊྛིཏཱ།
Surāpānasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༦. སུརཱཔཱནཝགྒོ • 6. Surāpānavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༡. སུརཱཔཱནསིཀྑཱཔདཝཎྞནཱ • 1. Surāpānasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༡. སུརཱཔཱནསིཀྑཱཔདཝཎྞནཱ • 1. Surāpānasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. སུརཱཔཱནསིཀྑཱཔདཝཎྞནཱ • 1. Surāpānasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡. སུརཱཔཱནསིཀྑཱཔད-ཨཏྠཡོཛནཱ • 1. Surāpānasikkhāpada-atthayojanā
