| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
৬. সুরাপানৰগ্গো
6. Surāpānavaggo
১. সুরাপানসিক্খাপদৰণ্ণনা
1. Surāpānasikkhāpadavaṇṇanā
সুরাপানৰগ্গস্স পঠমে সুরামেরযপানেতি এত্থ পিট্ঠাদীহি কতং মজ্জং সুরা, পুপ্ফাদীহি কতো আসৰো মেরযং, তদুভযম্পি বীজতো পট্ঠায কুসগ্গেনাপি পিৰতো পযোগে পযোগে পাচিত্তিযং।
Surāpānavaggassa paṭhame surāmerayapāneti ettha piṭṭhādīhi kataṃ majjaṃ surā, pupphādīhi kato āsavo merayaṃ, tadubhayampi bījato paṭṭhāya kusaggenāpi pivato payoge payoge pācittiyaṃ.
কোসম্বিযং সাগতত্থেরং আরব্ভ মজ্জপিৰনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, তিকপাচিত্তিযং, অমজ্জে মজ্জসঞ্ঞিস্স, ৰেমতিকস্স ৰা দুক্কটং। অমজ্জসঞ্ঞিস্স, অমজ্জং মজ্জৰণ্ণগন্ধরসং লোণসোৰীরকং ৰা সুত্তং ৰা পিৰতো, ৰাসগ্গাহাপনত্থং ঈসকং মজ্জং পক্খিপিত্ৰা সূপাদীনি পচন্তি, তেসু সূপসম্পাকাদীসু , আমলকরসাদীহি অমজ্জং মজ্জসদিসং অরিট্ঠং করোন্তি, তং পিৰতো, উম্মত্তকাদীনঞ্চ অনাপত্তি। মজ্জভাৰো, তস্স পানঞ্চাতি ইমানেত্থ দ্ৰে অঙ্গানি। সমুট্ঠানাদীনি এল়কলোমসদিসানি, ইদং পন লোকৰজ্জং, অকুসলচিত্তং, তিৰেদনন্তি।
Kosambiyaṃ sāgatattheraṃ ārabbha majjapivanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, amajje majjasaññissa, vematikassa vā dukkaṭaṃ. Amajjasaññissa, amajjaṃ majjavaṇṇagandharasaṃ loṇasovīrakaṃ vā suttaṃ vā pivato, vāsaggāhāpanatthaṃ īsakaṃ majjaṃ pakkhipitvā sūpādīni pacanti, tesu sūpasampākādīsu , āmalakarasādīhi amajjaṃ majjasadisaṃ ariṭṭhaṃ karonti, taṃ pivato, ummattakādīnañca anāpatti. Majjabhāvo, tassa pānañcāti imānettha dve aṅgāni. Samuṭṭhānādīni eḷakalomasadisāni, idaṃ pana lokavajjaṃ, akusalacittaṃ, tivedananti.
সুরাপানসিক্খাপদৰণ্ণনা নিট্ঠিতা।
Surāpānasikkhāpadavaṇṇanā niṭṭhitā.
২. অঙ্গুলিপতোদকসিক্খাপদৰণ্ণনা
2. Aṅgulipatodakasikkhāpadavaṇṇanā
দুতিযে অঙ্গুলিপতোদকেতি অঙ্গুলীহি উপকচ্ছকাদিঘট্টনং ৰুচ্চতি, অপিচ যেন কেনচি সরীরাৰযৰেন হসাধিপ্পাযস্স উপসম্পন্নং ফুসতো পাচিত্তিযং।
Dutiye aṅgulipatodaketi aṅgulīhi upakacchakādighaṭṭanaṃ vuccati, apica yena kenaci sarīrāvayavena hasādhippāyassa upasampannaṃ phusato pācittiyaṃ.
সাৰত্থিযং ছব্বগ্গিযে আরব্ভ অঙ্গুলিপতোদকেন হসনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, তিকপাচিত্তিযং, অনুপসম্পন্নে তিকদুক্কটং, ইধ পন ভিক্খুনীপি ভিক্খুস্স, ভিক্খু চ ভিক্খুনিযা অনুপসম্পন্নো এৰ, কাযপ্পটিবদ্ধাদীসু সব্বত্থ দুক্কটমেৰ। ন হসনাধিপ্পাযস্স, সতি করণীযে আমসতো, উম্মত্তকাদীনঞ্চ অনাপত্তি। হসাধিপ্পাযতা, উপসম্পন্নস্স কাযেন কাযামসনন্তি ইমানেত্থ দ্ৰে অঙ্গানি। সমুট্ঠানাদীনি পঠমপারাজিকসদিসানেৰাতি।
Sāvatthiyaṃ chabbaggiye ārabbha aṅgulipatodakena hasanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, anupasampanne tikadukkaṭaṃ, idha pana bhikkhunīpi bhikkhussa, bhikkhu ca bhikkhuniyā anupasampanno eva, kāyappaṭibaddhādīsu sabbattha dukkaṭameva. Na hasanādhippāyassa, sati karaṇīye āmasato, ummattakādīnañca anāpatti. Hasādhippāyatā, upasampannassa kāyena kāyāmasananti imānettha dve aṅgāni. Samuṭṭhānādīni paṭhamapārājikasadisānevāti.
অঙ্গুলিপতোদকসিক্খাপদৰণ্ণনা নিট্ঠিতা।
Aṅgulipatodakasikkhāpadavaṇṇanā niṭṭhitā.
৩. হসধম্মসিক্খাপদৰণ্ণনা
3. Hasadhammasikkhāpadavaṇṇanā
ততিযে উদকে হসধম্মেতি উদককীল়া ৰুচ্চতি। তস্মা যো ভিক্খু উপরিগোপ্ফকে উদকেযেৰ গচ্ছন্তো হসাধিপ্পাযো নিমুজ্জতি ৰা উম্মুজ্জতি ৰা, তস্স নিমুজ্জনাদীনং অত্থায ওতরন্তস্স হত্থৰারে পদৰারে দুক্কটং, নিমুজ্জনুম্মুজ্জনেসু পযোগে পযোগে পাচিত্তিযং, নিমুজ্জিত্ৰা অন্তোউদকেযেৰ গচ্ছন্তস্স হত্থৰারপদৰারেসু, তরন্তস্স ৰা যেন যেন অঙ্গেন তরতি, তস্স তস্স পযোগে পযোগে পাচিত্তিযং।
Tatiye udake hasadhammeti udakakīḷā vuccati. Tasmā yo bhikkhu uparigopphake udakeyeva gacchanto hasādhippāyo nimujjati vā ummujjati vā, tassa nimujjanādīnaṃ atthāya otarantassa hatthavāre padavāre dukkaṭaṃ, nimujjanummujjanesu payoge payoge pācittiyaṃ, nimujjitvā antoudakeyeva gacchantassa hatthavārapadavāresu, tarantassa vā yena yena aṅgena tarati, tassa tassa payoge payoge pācittiyaṃ.
সাৰত্থিযং সত্তরসৰগ্গিযে ভিক্খূ আরব্ভ উদকে কীল়নৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, তিকপাচিত্তিযং, উদকে অহসধম্মে হসধম্মসঞ্ঞিনো, ৰেমতিকস্স ৰা দুক্কটং, তথা নাৰায কীল়তো হত্থেন ৰা পাদেন ৰা কট্ঠেন ৰা কথলায ৰা উদকং পহরতো, ভাজনগতং উদকং ৰা কঞ্জিকাদীনি ৰা চিক্খল্লং ৰা খিপনকীল়ায কীল়তো দুক্কটং। অত্থজোতকং পন অক্খরং ছিন্দিতুং ৰট্টতি। ন হসাধিপ্পাযস্স, সতি করণীযে ওতরিত্ৰা নিমুজ্জনাদীনি করোন্তস্স, পারং গচ্ছতো, আপদাসু, উম্মত্তকাদীনঞ্চ অনাপত্তি। উপরিগোপ্ফকতা, হসাধিপ্পাযেন কীল়নন্তি ইমানেত্থ দ্ৰে অঙ্গানি। সমুট্ঠানাদীনি পঠমপারাজিকসদিসানীতি।
Sāvatthiyaṃ sattarasavaggiye bhikkhū ārabbha udake kīḷanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, udake ahasadhamme hasadhammasaññino, vematikassa vā dukkaṭaṃ, tathā nāvāya kīḷato hatthena vā pādena vā kaṭṭhena vā kathalāya vā udakaṃ paharato, bhājanagataṃ udakaṃ vā kañjikādīni vā cikkhallaṃ vā khipanakīḷāya kīḷato dukkaṭaṃ. Atthajotakaṃ pana akkharaṃ chindituṃ vaṭṭati. Na hasādhippāyassa, sati karaṇīye otaritvā nimujjanādīni karontassa, pāraṃ gacchato, āpadāsu, ummattakādīnañca anāpatti. Uparigopphakatā, hasādhippāyena kīḷananti imānettha dve aṅgāni. Samuṭṭhānādīni paṭhamapārājikasadisānīti.
হসধম্মসিক্খাপদৰণ্ণনা নিট্ঠিতা।
Hasadhammasikkhāpadavaṇṇanā niṭṭhitā.
৪. অনাদরিযসিক্খাপদৰণ্ণনা
4. Anādariyasikkhāpadavaṇṇanā
চতুত্থে অনাদরিযেতি পুগ্গলস্স ৰা ধম্মস্স ৰা অনাদরকরণে। তস্মা যো ভিক্খু উপসম্পন্নেন পঞ্ঞত্তেন ৰুচ্চমানো তস্স ৰা ৰচনং অকত্তুকামতায, তং ৰা ধম্মং অসিক্খিতুকামতায অনাদরিযং করোতি, তস্স তস্মিং অনাদরিযে পাচিত্তিযং।
Catutthe anādariyeti puggalassa vā dhammassa vā anādarakaraṇe. Tasmā yo bhikkhu upasampannena paññattena vuccamāno tassa vā vacanaṃ akattukāmatāya, taṃ vā dhammaṃ asikkhitukāmatāya anādariyaṃ karoti, tassa tasmiṃ anādariye pācittiyaṃ.
কোসম্বিযং ছন্নত্থেরং আরব্ভ অনাদরিযকরণৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, তিকপাচিত্তিযং, অনুপসম্পন্নে তিকদুক্কটং, উপসম্পন্নেন ৰা অনুপসম্পন্নেন ৰা ‘‘ইদং ন সল্লেখায সংৰত্ততী’’তিআদিনা নযেন অপঞ্ঞত্তেন ৰুচ্চমানস্স অনাদরিযেপি দুক্কটমেৰ। পৰেণিআগতং পন উগ্গহং গহেত্ৰা ‘‘এৰং অম্হাকং আচরিযানং উগ্গহো পরিপুচ্ছা’’তি (পাচি॰ ৩৪৪) ভণন্তস্স, উম্মত্তকাদীনঞ্চ অনাপত্তি। উপসম্পন্নস্স পঞ্ঞত্তেন ৰচনং, অনাদরিযকরণন্তি ইমানেত্থ দ্ৰে অঙ্গানি। সমুট্ঠানাদীনি অদিন্নাদানসদিসানি, ইদং পন দুক্খৰেদনন্তি।
Kosambiyaṃ channattheraṃ ārabbha anādariyakaraṇavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, anupasampanne tikadukkaṭaṃ, upasampannena vā anupasampannena vā ‘‘idaṃ na sallekhāya saṃvattatī’’tiādinā nayena apaññattena vuccamānassa anādariyepi dukkaṭameva. Paveṇiāgataṃ pana uggahaṃ gahetvā ‘‘evaṃ amhākaṃ ācariyānaṃ uggaho paripucchā’’ti (pāci. 344) bhaṇantassa, ummattakādīnañca anāpatti. Upasampannassa paññattena vacanaṃ, anādariyakaraṇanti imānettha dve aṅgāni. Samuṭṭhānādīni adinnādānasadisāni, idaṃ pana dukkhavedananti.
অনাদরিযসিক্খাপদৰণ্ণনা নিট্ঠিতা।
Anādariyasikkhāpadavaṇṇanā niṭṭhitā.
৫. ভিংসাপনসিক্খাপদৰণ্ণনা
5. Bhiṃsāpanasikkhāpadavaṇṇanā
পঞ্চমে ভিংসাপেয্যাতি ভিংসাপনত্থং রূপাদীনি উপসংহরেয্য, ভযানককথং ৰা কথেয্য। সো পন ভাযতু ৰা, মা ৰা, ইতরস্স পাচিত্তিযং।
Pañcame bhiṃsāpeyyāti bhiṃsāpanatthaṃ rūpādīni upasaṃhareyya, bhayānakakathaṃ vā katheyya. So pana bhāyatu vā, mā vā, itarassa pācittiyaṃ.
সাৰত্থিযং ছব্বগ্গিযে ভিক্খূ আরব্ভ ভিংসাপনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, তিকপাচিত্তিযং। অনুপসম্পন্নে তিকদুক্কটং, ন ভিংসাপেতুকামস্স তথা করোতো, উম্মত্তকাদীনঞ্চ অনাপত্তি। উপসম্পন্নতা, তস্স দস্সনসৰনৰিসযে ভিংসাপেতুকামতায ৰাযামনন্তি ইমানেত্থ দ্ৰে অঙ্গানি। সমুট্ঠানাদীনি অনন্তরসিক্খাপদসদিসানেৰাতি।
Sāvatthiyaṃ chabbaggiye bhikkhū ārabbha bhiṃsāpanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ. Anupasampanne tikadukkaṭaṃ, na bhiṃsāpetukāmassa tathā karoto, ummattakādīnañca anāpatti. Upasampannatā, tassa dassanasavanavisaye bhiṃsāpetukāmatāya vāyāmananti imānettha dve aṅgāni. Samuṭṭhānādīni anantarasikkhāpadasadisānevāti.
ভিংসাপনসিক্খাপদৰণ্ণনা নিট্ঠিতা।
Bhiṃsāpanasikkhāpadavaṇṇanā niṭṭhitā.
৬. জোতিসিক্খাপদৰণ্ণনা
6. Jotisikkhāpadavaṇṇanā
ছট্ঠে ৰিসিব্বনাপেক্খোতি তপ্পিতুকামো। সমাদহেয্যাতি জালেয্য, অঞ্ঞত্র তথারূপপ্পচ্চযাতি পদীপুজ্জালনং ৰা পত্তপচনাদীসু জোতিকরণং ৰাতি এৰরূপং পচ্চযং ৰিনা। তত্রাযং ৰিনিচ্ছযো – সযং সমাদহন্তস্স অরণিসণ্ঠাপনতো পট্ঠায যাৰ জালা ন উট্ঠহতি, তাৰ সব্বপ্পযোগেসু দুক্কটং, জালুট্ঠানে পাচিত্তিযং। সমাদহাপেন্তস্স আণত্তিযা দুক্কটং, সকিং আণত্তেন বহুম্পি সমাদহিতে একমেৰ পাচিত্তিযং।
Chaṭṭhe visibbanāpekkhoti tappitukāmo. Samādaheyyāti jāleyya, aññatra tathārūpappaccayāti padīpujjālanaṃ vā pattapacanādīsu jotikaraṇaṃ vāti evarūpaṃ paccayaṃ vinā. Tatrāyaṃ vinicchayo – sayaṃ samādahantassa araṇisaṇṭhāpanato paṭṭhāya yāva jālā na uṭṭhahati, tāva sabbappayogesu dukkaṭaṃ, jāluṭṭhāne pācittiyaṃ. Samādahāpentassa āṇattiyā dukkaṭaṃ, sakiṃ āṇattena bahumpi samādahite ekameva pācittiyaṃ.
ভগ্গেসু সম্বহুলে ভিক্খূ আরব্ভ জোতিং সমাদহিত্ৰা ৰিসিব্বনৰত্থুস্মিং পঞ্ঞত্তং, ‘‘অগিলানো, অঞ্ঞত্র তথারূপপ্পচ্চযা’’তি ইমানেত্থ দ্ৰে অনুপঞ্ঞত্তিযো, সাধারণপঞ্ঞত্তি, সাণত্তিকং, তিকপাচিত্তিযং, গিলানস্স অগিলানসঞ্ঞিনো, ৰেমতিকস্স ৰা দুক্কটং, তথা পটিলাতং উক্খিপন্তস্স, তঞ্চ অৰিজ্ঝাতং উক্খিপিত্ৰা যথাঠানে ঠপেন্তস্স। ৰিজ্ঝাতং পন জালযতো পাচিত্তিযমেৰ। গিলানস্স গিলানসঞ্ঞিস্স , অঞ্ঞেন কতং ৰা ৰীতচ্চিতঙ্গারং ৰা ৰিসিব্বেন্তস্স, পদীপজোতিকজন্তাঘরাদিকে তথারূপপ্পচ্চযে, আপদাসু, উম্মত্তকাদীনঞ্চ অনাপত্তি। অগিলানতা, অনুঞ্ঞাতকারণাভাৰো, ৰিসিব্বেতুকামতা, সমাদহনন্তি ইমানেত্থ চত্তারি অঙ্গানি। সমুট্ঠানাদীনি সঞ্চরিত্তে ৰুত্তনযেনেৰ ৰেদিতব্বানীতি।
Bhaggesu sambahule bhikkhū ārabbha jotiṃ samādahitvā visibbanavatthusmiṃ paññattaṃ, ‘‘agilāno, aññatra tathārūpappaccayā’’ti imānettha dve anupaññattiyo, sādhāraṇapaññatti, sāṇattikaṃ, tikapācittiyaṃ, gilānassa agilānasaññino, vematikassa vā dukkaṭaṃ, tathā paṭilātaṃ ukkhipantassa, tañca avijjhātaṃ ukkhipitvā yathāṭhāne ṭhapentassa. Vijjhātaṃ pana jālayato pācittiyameva. Gilānassa gilānasaññissa , aññena kataṃ vā vītaccitaṅgāraṃ vā visibbentassa, padīpajotikajantāgharādike tathārūpappaccaye, āpadāsu, ummattakādīnañca anāpatti. Agilānatā, anuññātakāraṇābhāvo, visibbetukāmatā, samādahananti imānettha cattāri aṅgāni. Samuṭṭhānādīni sañcaritte vuttanayeneva veditabbānīti.
জোতিসিক্খাপদৰণ্ণনা নিট্ঠিতা।
Jotisikkhāpadavaṇṇanā niṭṭhitā.
৭. নহানসিক্খাপদৰণ্ণনা
7. Nahānasikkhāpadavaṇṇanā
সত্তমে নহাযেয্যাতি যো ভিক্খু মজ্ঝিমদেসে নহানদিৰসতো পট্ঠায অদ্ধমাসে অপুণ্ণে অঞ্ঞত্র সমযা ‘‘নহাযিস্সামী’’তি চুণ্ণং ৰা মত্তিকং ৰা অভিসঙ্খরোতি, তস্স ততো পট্ঠায সব্বপ্পযোগেসু দুক্কটং, নহানপরিযোসানে পাচিত্তিযং। সমযেসু পরিৰেণসম্মজ্জনমত্তম্পি কম্মসমযো, অদ্ধযোজনং গন্তুকামস্স, গচ্ছতো, গতস্স ৰা অদ্ধানগমনসমযো, সরজেন ৰাতেন ওকিণ্ণস্স দ্ৰীসু ৰা তীসু ৰা উদকফুসিতেসু কাযে পতিতেসু ৰাতৰুট্ঠিসমযোতি ৰেদিতব্বো। সেসং উত্তানমেৰ।
Sattame nahāyeyyāti yo bhikkhu majjhimadese nahānadivasato paṭṭhāya addhamāse apuṇṇe aññatra samayā ‘‘nahāyissāmī’’ti cuṇṇaṃ vā mattikaṃ vā abhisaṅkharoti, tassa tato paṭṭhāya sabbappayogesu dukkaṭaṃ, nahānapariyosāne pācittiyaṃ. Samayesu pariveṇasammajjanamattampi kammasamayo, addhayojanaṃ gantukāmassa, gacchato, gatassa vā addhānagamanasamayo, sarajena vātena okiṇṇassa dvīsu vā tīsu vā udakaphusitesu kāye patitesu vātavuṭṭhisamayoti veditabbo. Sesaṃ uttānameva.
রাজগহে সম্বহুলে ভিক্খূ আরব্ভ ন মত্তং জানিত্ৰা নহাযনৰত্থুস্মিং পঞ্ঞত্তং, ‘‘অঞ্ঞত্র সমযা’’তি অযমেত্থ ছব্বিধা অনুপঞ্ঞত্তি, সাধারণপঞ্ঞত্তি, অনাণত্তিকং, তিকপাচিত্তিযং, অতিরেকদ্ধমাসে ঊনকসঞ্ঞিনো, ৰেমতিকস্স ৰা দুক্কটং। অতিরেকসঞ্ঞিস্স, সমযে ৰা নহাযন্তস্স, যো ৰা নদীপারং গচ্ছন্তো ৰালুকং উক্কিরিত্ৰা কতআৰাটেসুপি নহাযতি, তস্স, পচ্চন্তিমে জনপদে সব্বেসং, আপদাসু, উম্মত্তকাদীনঞ্চ অনাপত্তি। মজ্ঝিমদেসো, ঊনকদ্ধমাসে নহানং, সমযানং ৰা নদীপারগমনস্স ৰা আপদানং ৰা অভাৰোতি ইমানেত্থ তীণি অঙ্গানি। সমুট্ঠানাদীনি এল়কলোমসদিসানেৰাতি।
Rājagahe sambahule bhikkhū ārabbha na mattaṃ jānitvā nahāyanavatthusmiṃ paññattaṃ, ‘‘aññatra samayā’’ti ayamettha chabbidhā anupaññatti, sādhāraṇapaññatti, anāṇattikaṃ, tikapācittiyaṃ, atirekaddhamāse ūnakasaññino, vematikassa vā dukkaṭaṃ. Atirekasaññissa, samaye vā nahāyantassa, yo vā nadīpāraṃ gacchanto vālukaṃ ukkiritvā kataāvāṭesupi nahāyati, tassa, paccantime janapade sabbesaṃ, āpadāsu, ummattakādīnañca anāpatti. Majjhimadeso, ūnakaddhamāse nahānaṃ, samayānaṃ vā nadīpāragamanassa vā āpadānaṃ vā abhāvoti imānettha tīṇi aṅgāni. Samuṭṭhānādīni eḷakalomasadisānevāti.
নহানসিক্খাপদৰণ্ণনা নিট্ঠিতা।
Nahānasikkhāpadavaṇṇanā niṭṭhitā.
৮. দুব্বণ্ণকরণসিক্খাপদৰণ্ণনা
8. Dubbaṇṇakaraṇasikkhāpadavaṇṇanā
অট্ঠমে অলভীতি লভো, লভো এৰ লাভো, কিং অলভি? চীৰরং, কীদিসং? নৰং, ইতি ‘‘নৰচীৰরলাভেনা’’তি ৰত্তব্বে অনুনাসিকলোপং অকত্ৰা নৰংচীৰরলাভেনাতি ৰুত্তং, পটিলদ্ধনৰচীৰরেনাতি অত্থো। মজ্ঝে ঠিতপদদ্ৰযে পনাতি নিপাতমত্তং। ভিক্খুনাতি যেন লদ্ধং, তস্স নিদস্সনং, সেসং পদত্থতো উত্তানমেৰ। অযং পনেত্থ ৰিনিচ্ছযো – নিৰাসনপারুপনুপগং চীৰরং লভিত্ৰা তস্স নিট্ঠিতরজনস্স যস্মিং ৰা তস্মিং ৰা পদেসে কংসনীলেন ৰা পত্তনীলেন ৰা কদ্দমেন ৰা যেন কেনচি কাল়কেন ৰা মোরক্খিমণ্ডলমঙ্গুলপিট্ঠীনং অঞ্ঞতরপ্পমাণং কপ্পবিন্দুং আদিযিত্ৰা তং চীৰরং পরিভুঞ্জিতব্বং, অনাদিযিত্ৰা পরিভুঞ্জন্তস্স পাচিত্তিযং।
Aṭṭhame alabhīti labho, labho eva lābho, kiṃ alabhi? Cīvaraṃ, kīdisaṃ? Navaṃ, iti ‘‘navacīvaralābhenā’’ti vattabbe anunāsikalopaṃ akatvā navaṃcīvaralābhenāti vuttaṃ, paṭiladdhanavacīvarenāti attho. Majjhe ṭhitapadadvaye panāti nipātamattaṃ. Bhikkhunāti yena laddhaṃ, tassa nidassanaṃ, sesaṃ padatthato uttānameva. Ayaṃ panettha vinicchayo – nivāsanapārupanupagaṃ cīvaraṃ labhitvā tassa niṭṭhitarajanassa yasmiṃ vā tasmiṃ vā padese kaṃsanīlena vā pattanīlena vā kaddamena vā yena kenaci kāḷakena vā morakkhimaṇḍalamaṅgulapiṭṭhīnaṃ aññatarappamāṇaṃ kappabinduṃ ādiyitvā taṃ cīvaraṃ paribhuñjitabbaṃ, anādiyitvā paribhuñjantassa pācittiyaṃ.
সাৰত্থিযং সম্বহুলে ভিক্খূ আরব্ভ অত্তনো চীৰরঅজাননৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, তিকপাচিত্তিযং, আদিন্নে অনাদিন্নসঞ্ঞিনো, ৰেমতিকস্স ৰা দুক্কটং। আদিন্নসঞ্ঞিস্স , কপ্পে নট্ঠে, কপ্পকতোকাসে জিণ্ণে, কপ্পকতেন অকপ্পকতে সংসিব্বিতে, পচ্ছা আরোপিতেসু অগ্গল়অনুৰাতপরিভণ্ডেসু তং পরিভুঞ্জন্তস্স, উম্মত্তকাদীনঞ্চ অনাপত্তি। ৰুত্তপ্পকারস্স চীৰরস্স অকতকপ্পকতা, ন নট্ঠচীৰরাদিতা, নিৰাসনং ৰা পারুপনং ৰাতি ইমানেত্থ তীণি অঙ্গানি। সমুট্ঠানাদীনি এল়কলোমসদিসানি, ইদং পন কিরিযাকিরিযন্তি।
Sāvatthiyaṃ sambahule bhikkhū ārabbha attano cīvaraajānanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, ādinne anādinnasaññino, vematikassa vā dukkaṭaṃ. Ādinnasaññissa , kappe naṭṭhe, kappakatokāse jiṇṇe, kappakatena akappakate saṃsibbite, pacchā āropitesu aggaḷaanuvātaparibhaṇḍesu taṃ paribhuñjantassa, ummattakādīnañca anāpatti. Vuttappakārassa cīvarassa akatakappakatā, na naṭṭhacīvarāditā, nivāsanaṃ vā pārupanaṃ vāti imānettha tīṇi aṅgāni. Samuṭṭhānādīni eḷakalomasadisāni, idaṃ pana kiriyākiriyanti.
দুব্বণ্ণকরণসিক্খাপদৰণ্ণনা নিট্ঠিতা।
Dubbaṇṇakaraṇasikkhāpadavaṇṇanā niṭṭhitā.
৯. ৰিকপ্পনসিক্খাপদৰণ্ণনা
9. Vikappanasikkhāpadavaṇṇanā
নৰমে ৰিকপ্পেত্ৰাতি এত্থ দ্ৰে ৰিকপ্পনা সম্মুখাৰিকপ্পনা পরম্মুখাৰিকপ্পনা চ। কথং সম্মুখাৰিকপ্পনা হোতি? চীৰরানং একবহুভাৰং সন্নিহিতাসন্নিহিতভাৰঞ্চ ঞত্ৰা ‘ইমং চীৰর’ন্তি ৰা ‘ইমানি চীৰরানী’তি ৰা ‘এতং চীৰর’ন্তি ৰা ‘এতানি চীৰরানী’তি ৰা ৰত্ৰা ‘তুয্হং ৰিকপ্পেমী’তি ৰত্তব্বং, অযমেকা সম্মুখাৰিকপ্পনা। এত্তাৰতা নিধেতুং ৰট্টতি, পরিভুঞ্জিতুং পন ৰিস্সজ্জেতুং ৰা অধিট্ঠাতুং ৰা ন ৰট্টতি। ‘‘ময্হং সন্তকং, ময্হং সন্তকানি পরিভুঞ্জ ৰা ৰিস্সজ্জেহি ৰা যথাপচ্চযং করোহী’’তি (পাচি॰ ৩৭৪) এৰং পন ৰুত্তে পচ্চুদ্ধারো নাম হোতি, ততো পভুতি পরিভোগাদযোপি ৰট্টন্তি। অপরো নযো, তথেৰ চীৰরানং একবহুভাৰং সন্নিহিতাসন্নিহিতভাৰঞ্চ ঞত্ৰা তস্সেৰ ভিক্খুনো সন্তিকে ‘ইমং চীৰর’ন্তি ৰা ‘ইমানি চীৰরানী’তি ৰা ‘এতং চীৰর’ন্তি ৰা ‘এতানি চীৰরানী’তি ৰা ৰত্ৰা পঞ্চসু সহধম্মিকেসু অঞ্ঞতরস্স অত্তনা অভিরুচিতস্স যস্স কস্সচি নামং গহেত্ৰা ‘‘তিস্সস্স ভিক্খুনো ৰিকপ্পেমী’’তি ৰা ‘‘তিস্সায ভিক্খুনিযা, সিক্খমানায, সামণেরস্স, তিস্সায সামণেরিযা ৰিকপ্পেমী’’তি ৰা ৰত্তব্বং, অযং অপরাপি সম্মুখাৰিকপ্পনা। এত্তাৰতা নিধেতুং ৰট্টতি, পরিভোগাদীসু একম্পি ন ৰট্টতি। তেন পন ভিক্খুনা ‘‘তিস্সস্স ভিক্খুনো সন্তকং…পে॰… তিস্সায সামণেরিযা সন্তকং পরিভুঞ্জ ৰা ৰিস্সজ্জেহি ৰা যথাপচ্চযং করোহী’’তি ৰুত্তে পচ্চুদ্ধারো নাম হোতি, ততো পভুতি পরিভোগাদযোপি ৰট্টন্তি।
Navame vikappetvāti ettha dve vikappanā sammukhāvikappanā parammukhāvikappanā ca. Kathaṃ sammukhāvikappanā hoti? Cīvarānaṃ ekabahubhāvaṃ sannihitāsannihitabhāvañca ñatvā ‘imaṃ cīvara’nti vā ‘imāni cīvarānī’ti vā ‘etaṃ cīvara’nti vā ‘etāni cīvarānī’ti vā vatvā ‘tuyhaṃ vikappemī’ti vattabbaṃ, ayamekā sammukhāvikappanā. Ettāvatā nidhetuṃ vaṭṭati, paribhuñjituṃ pana vissajjetuṃ vā adhiṭṭhātuṃ vā na vaṭṭati. ‘‘Mayhaṃ santakaṃ, mayhaṃ santakāni paribhuñja vā vissajjehi vā yathāpaccayaṃ karohī’’ti (pāci. 374) evaṃ pana vutte paccuddhāro nāma hoti, tato pabhuti paribhogādayopi vaṭṭanti. Aparo nayo, tatheva cīvarānaṃ ekabahubhāvaṃ sannihitāsannihitabhāvañca ñatvā tasseva bhikkhuno santike ‘imaṃ cīvara’nti vā ‘imāni cīvarānī’ti vā ‘etaṃ cīvara’nti vā ‘etāni cīvarānī’ti vā vatvā pañcasu sahadhammikesu aññatarassa attanā abhirucitassa yassa kassaci nāmaṃ gahetvā ‘‘tissassa bhikkhuno vikappemī’’ti vā ‘‘tissāya bhikkhuniyā, sikkhamānāya, sāmaṇerassa, tissāya sāmaṇeriyā vikappemī’’ti vā vattabbaṃ, ayaṃ aparāpi sammukhāvikappanā. Ettāvatā nidhetuṃ vaṭṭati, paribhogādīsu ekampi na vaṭṭati. Tena pana bhikkhunā ‘‘tissassa bhikkhuno santakaṃ…pe… tissāya sāmaṇeriyā santakaṃ paribhuñja vā vissajjehi vā yathāpaccayaṃ karohī’’ti vutte paccuddhāro nāma hoti, tato pabhuti paribhogādayopi vaṭṭanti.
কথং পরম্মুখাৰিকপ্পনা হোতি? চীৰরানং তথেৰ একবহুভাৰং সন্নিহিতাসন্নিহিতভাৰঞ্চ ঞত্ৰা ‘ইমং চীৰর’ন্তি ৰা ‘ইমানি চীৰরানী’তি ৰা ‘এতং চীৰর’ন্তি ৰা ‘এতানি চীৰরানী’তি ৰা ৰত্ৰা ‘‘তুয্হং ৰিকপ্পনত্থায দম্মী’’তি ৰত্তব্বং। তেন ৰত্তব্বো ‘‘কো তে মিত্তো ৰা সন্দিট্ঠো ৰা’’তি। ততো ইতরেন পুরিমনযেনেৰ ‘তিস্সো ভিক্খূ’তি ৰা…পে॰… ‘তিস্সা সামণেরী’তি ৰা ৰত্তব্বং। পুন তেন ভিক্খুনা ‘‘অহং তিস্সস্স ভিক্খুনো দম্মী’’তি ৰা…পে॰… ‘‘তিস্সায সামণেরিযা দম্মী’’তি ৰা ৰত্তব্বং , অযং পরম্মুখাৰিকপ্পনা। এত্তাৰতা নিধেতুং ৰট্টতি, পরিভোগাদীসু একম্পি ন ৰট্টতি। তেন পন ভিক্খুনা দুতিযসম্মুখাৰিকপ্পনাযং ৰুত্তনযেনেৰ ‘‘ইত্থন্নামস্স সন্তকং পরিভুঞ্জ ৰা ৰিস্সজ্জেহি ৰা যথাপচ্চযং করোহী’’তি ৰুত্তে পচ্চুদ্ধারো নাম হোতি, ততো পভুতি পরিভোগাদযোপি ৰট্টন্তীতি। পত্তৰিকপ্পনাযম্পি এসেৰ নযো। ইতি ইমাসু দ্ৰীসু ৰিকপ্পনাসু যায কাযচি ৰিকপ্পনায পঞ্চসু সহধম্মিকেসু যস্স কস্সচি চীৰরং ৰিকপ্পেত্ৰা ৰুত্তনযেন অকতপ্পচ্চুদ্ধারং ৰা যেন ৰিনযকম্মং কতং, তস্স ৰা ৰিস্সাসেন অগ্গহেত্ৰা পরিভুঞ্জন্তস্স পাচিত্তিযং।
Kathaṃ parammukhāvikappanā hoti? Cīvarānaṃ tatheva ekabahubhāvaṃ sannihitāsannihitabhāvañca ñatvā ‘imaṃ cīvara’nti vā ‘imāni cīvarānī’ti vā ‘etaṃ cīvara’nti vā ‘etāni cīvarānī’ti vā vatvā ‘‘tuyhaṃ vikappanatthāya dammī’’ti vattabbaṃ. Tena vattabbo ‘‘ko te mitto vā sandiṭṭho vā’’ti. Tato itarena purimanayeneva ‘tisso bhikkhū’ti vā…pe… ‘tissā sāmaṇerī’ti vā vattabbaṃ. Puna tena bhikkhunā ‘‘ahaṃ tissassa bhikkhuno dammī’’ti vā…pe… ‘‘tissāya sāmaṇeriyā dammī’’ti vā vattabbaṃ , ayaṃ parammukhāvikappanā. Ettāvatā nidhetuṃ vaṭṭati, paribhogādīsu ekampi na vaṭṭati. Tena pana bhikkhunā dutiyasammukhāvikappanāyaṃ vuttanayeneva ‘‘itthannāmassa santakaṃ paribhuñja vā vissajjehi vā yathāpaccayaṃ karohī’’ti vutte paccuddhāro nāma hoti, tato pabhuti paribhogādayopi vaṭṭantīti. Pattavikappanāyampi eseva nayo. Iti imāsu dvīsu vikappanāsu yāya kāyaci vikappanāya pañcasu sahadhammikesu yassa kassaci cīvaraṃ vikappetvā vuttanayena akatappaccuddhāraṃ vā yena vinayakammaṃ kataṃ, tassa vā vissāsena aggahetvā paribhuñjantassa pācittiyaṃ.
সাৰত্থিযং উপনন্দং আরব্ভ অপ্পচ্চুদ্ধারণং পরিভুঞ্জনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, তিকপাচিত্তিযং, তং পন অধিট্ঠহন্তস্স ৰা ৰিস্সজ্জেন্তস্স ৰা দুক্কটং, তথা পচ্চুদ্ধারণে অপ্পচ্চুদ্ধারণসঞ্ঞিস্স ৰেমতিকস্স ৰা। পচ্চুদ্ধারণসঞ্ঞিস্স পন ৰিস্সাসেন পরিভুঞ্জন্তস্স, উম্মত্তকাদীনঞ্চ অনাপত্তি। সামং ৰিকপ্পিতস্স অপ্পচ্চুদ্ধারো, ৰিকপ্পনুপগচীৰরতা, পরিভোগোতি ইমানেত্থ তীণি অঙ্গানি। সমুট্ঠানাদীনি পঠমকথিনসদিসানেৰ, ইদং পন কিরিযাকিরিযন্তি।
Sāvatthiyaṃ upanandaṃ ārabbha appaccuddhāraṇaṃ paribhuñjanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, taṃ pana adhiṭṭhahantassa vā vissajjentassa vā dukkaṭaṃ, tathā paccuddhāraṇe appaccuddhāraṇasaññissa vematikassa vā. Paccuddhāraṇasaññissa pana vissāsena paribhuñjantassa, ummattakādīnañca anāpatti. Sāmaṃ vikappitassa appaccuddhāro, vikappanupagacīvaratā, paribhogoti imānettha tīṇi aṅgāni. Samuṭṭhānādīni paṭhamakathinasadisāneva, idaṃ pana kiriyākiriyanti.
ৰিকপ্পনসিক্খাপদৰণ্ণনা নিট্ঠিতা।
Vikappanasikkhāpadavaṇṇanā niṭṭhitā.
১০. অপনিধানসিক্খাপদৰণ্ণনা
10. Apanidhānasikkhāpadavaṇṇanā
দসমে পত্তন্তি অধিট্ঠানুপগং। চীৰরন্তি ৰিকপ্পনুপগং। নিসীদনং নাম সদসং ৰুচ্চতি। সূচিঘরং নাম সসূচিকং ৰা অসূচিকং ৰা। কাযবন্ধনং নাম পট্টিকা ৰা সূকরন্তকং ৰা। অপনিধেয্যাতি অপনেত্ৰা নিদহেয্য। হসাপেক্খোতি হসাধিপ্পাযো। পাচিত্তিযন্তি সযং অপনিধেন্তস্স পাচিত্তিযং, অঞ্ঞং আণাপেন্তস্স আণত্তিযা দুক্কটং, তেন অপনিহিতে ইতরস্স পাচিত্তিযং।
Dasame pattanti adhiṭṭhānupagaṃ. Cīvaranti vikappanupagaṃ. Nisīdanaṃ nāma sadasaṃ vuccati. Sūcigharaṃ nāma sasūcikaṃ vā asūcikaṃ vā. Kāyabandhanaṃ nāma paṭṭikā vā sūkarantakaṃ vā. Apanidheyyāti apanetvā nidaheyya. Hasāpekkhoti hasādhippāyo. Pācittiyanti sayaṃ apanidhentassa pācittiyaṃ, aññaṃ āṇāpentassa āṇattiyā dukkaṭaṃ, tena apanihite itarassa pācittiyaṃ.
সাৰত্থিযং ছব্বগ্গিযে আরব্ভ অপনিধানৰত্থুস্মিং পঞ্ঞত্তং, সাধারণপঞ্ঞত্তি, সাণত্তিকং, তিকপাচিত্তিযং, অনুপসম্পন্নে তিকদুক্কটং, ৰুত্তপ্পকারানি পন পত্তাদীনি ঠপেত্ৰা অঞ্ঞং পরিক্খারং উপসম্পন্নস্স ৰা অনুপসম্পন্নস্স ৰা সন্তকং অপনিধেন্তস্স দুক্কটমেৰ। দুন্নিক্খিত্তং পটিসামেন্তস্স, ‘‘ধম্মকথং কত্ৰা দস্সামী’’তি পটিসামেন্তস্স, উম্মত্তকাদীনঞ্চ অনাপত্তি। উপসম্পন্নস্স সন্তকানং পত্তাদীনং অপনিধানং, ৰিহেসেতুকামতা ৰা হসাধিপ্পাযতা ৰাতি ইমানেত্থ দ্ৰে অঙ্গানি। সমুট্ঠানাদীনি অদিন্নাদানসদিসানীতি।
Sāvatthiyaṃ chabbaggiye ārabbha apanidhānavatthusmiṃ paññattaṃ, sādhāraṇapaññatti, sāṇattikaṃ, tikapācittiyaṃ, anupasampanne tikadukkaṭaṃ, vuttappakārāni pana pattādīni ṭhapetvā aññaṃ parikkhāraṃ upasampannassa vā anupasampannassa vā santakaṃ apanidhentassa dukkaṭameva. Dunnikkhittaṃ paṭisāmentassa, ‘‘dhammakathaṃ katvā dassāmī’’ti paṭisāmentassa, ummattakādīnañca anāpatti. Upasampannassa santakānaṃ pattādīnaṃ apanidhānaṃ, vihesetukāmatā vā hasādhippāyatā vāti imānettha dve aṅgāni. Samuṭṭhānādīni adinnādānasadisānīti.
অপনিধানসিক্খাপদৰণ্ণনা নিট্ঠিতা।
Apanidhānasikkhāpadavaṇṇanā niṭṭhitā.
সুরাপানৰগ্গো ছট্ঠো।
Surāpānavaggo chaṭṭho.
