| Library / Tipiṭaka / д̇ибидага • Tipiṭaka / д̣̇взмаад̇игаабаал̣и • Dvemātikāpāḷi |
6. сураабаанаваг̇г̇о
6. Surāpānavaggo
1. сураабаанасигкаабад̣̇аван̣н̣анаа
1. Surāpānasikkhāpadavaṇṇanā
сураабаанаваг̇г̇асса батамз сураамзраяабаанзд̇и зд̇т̇а бидтаад̣̇ийхи гад̇ам̣ маж̇ж̇ам̣ сураа, бубпаад̣̇ийхи гад̇о аасаво мзраяам̣, д̇ад̣̇убхаяамби б̣ийж̇ад̇о бадтааяа гусаг̇г̇знааби бивад̇о баяог̇з баяог̇з баажид̇д̇ияам̣.
Surāpānavaggassa paṭhame surāmerayapāneti ettha piṭṭhādīhi kataṃ majjaṃ surā, pupphādīhi kato āsavo merayaṃ, tadubhayampi bījato paṭṭhāya kusaggenāpi pivato payoge payoge pācittiyaṃ.
госамб̣ияам̣ сааг̇ад̇ад̇т̇зрам̣ аараб̣бха маж̇ж̇абиванавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, амаж̇ж̇з маж̇ж̇асан̃н̃исса, взмад̇игасса ваа д̣̇уггадам̣. амаж̇ж̇асан̃н̃исса, амаж̇ж̇ам̣ маж̇ж̇аван̣н̣аг̇анд̇харасам̣ лон̣асовийрагам̣ ваа суд̇д̇ам̣ ваа бивад̇о, ваасаг̇г̇аахаабанад̇т̇ам̣ ийсагам̣ маж̇ж̇ам̣ багкибид̇ваа суубаад̣̇ийни бажанд̇и, д̇зсу суубасамбаагаад̣̇ийсу , аамалагарасаад̣̇ийхи амаж̇ж̇ам̣ маж̇ж̇асад̣̇исам̣ аридтам̣ гаронд̇и, д̇ам̣ бивад̇о, уммад̇д̇агаад̣̇ийнан̃жа анаабад̇д̇и. маж̇ж̇абхааво, д̇асса баанан̃жаад̇и имаанзд̇т̇а д̣̇вз ан̇г̇аани. самудтаанаад̣̇ийни зл̣агаломасад̣̇исаани, ид̣̇ам̣ бана логаваж̇ж̇ам̣, агусалажид̇д̇ам̣, д̇ивзд̣̇ананд̇и.
Kosambiyaṃ sāgatattheraṃ ārabbha majjapivanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, amajje majjasaññissa, vematikassa vā dukkaṭaṃ. Amajjasaññissa, amajjaṃ majjavaṇṇagandharasaṃ loṇasovīrakaṃ vā suttaṃ vā pivato, vāsaggāhāpanatthaṃ īsakaṃ majjaṃ pakkhipitvā sūpādīni pacanti, tesu sūpasampākādīsu , āmalakarasādīhi amajjaṃ majjasadisaṃ ariṭṭhaṃ karonti, taṃ pivato, ummattakādīnañca anāpatti. Majjabhāvo, tassa pānañcāti imānettha dve aṅgāni. Samuṭṭhānādīni eḷakalomasadisāni, idaṃ pana lokavajjaṃ, akusalacittaṃ, tivedananti.
сураабаанасигкаабад̣̇аван̣н̣анаа нидтид̇аа.
Surāpānasikkhāpadavaṇṇanā niṭṭhitā.
2. ан̇г̇улибад̇од̣̇агасигкаабад̣̇аван̣н̣анаа
2. Aṅgulipatodakasikkhāpadavaṇṇanā
д̣̇уд̇ияз ан̇г̇улибад̇од̣̇агзд̇и ан̇г̇улийхи убагажчагаад̣̇игхадданам̣ вужжад̇и, абижа язна гзнажи сарийрааваяавзна хасаад̇хиббааяасса убасамбаннам̣ пусад̇о баажид̇д̇ияам̣.
Dutiye aṅgulipatodaketi aṅgulīhi upakacchakādighaṭṭanaṃ vuccati, apica yena kenaci sarīrāvayavena hasādhippāyassa upasampannaṃ phusato pācittiyaṃ.
саавад̇т̇ияам̣ чаб̣б̣аг̇г̇ияз аараб̣бха ан̇г̇улибад̇од̣̇агзна хасанавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, анубасамбаннз д̇игад̣̇уггадам̣, ид̇ха бана бхигкунийби бхигкусса, бхигку жа бхигкунияаа анубасамбанно зва, гааяаббадиб̣ад̣̇д̇хаад̣̇ийсу саб̣б̣ад̇т̇а д̣̇уггадамзва. на хасанаад̇хиббааяасса, сад̇и гаран̣ийяз аамасад̇о, уммад̇д̇агаад̣̇ийнан̃жа анаабад̇д̇и. хасаад̇хиббааяад̇аа, убасамбаннасса гааязна гааяаамасананд̇и имаанзд̇т̇а д̣̇вз ан̇г̇аани. самудтаанаад̣̇ийни батамабаарааж̇игасад̣̇исаанзваад̇и.
Sāvatthiyaṃ chabbaggiye ārabbha aṅgulipatodakena hasanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, anupasampanne tikadukkaṭaṃ, idha pana bhikkhunīpi bhikkhussa, bhikkhu ca bhikkhuniyā anupasampanno eva, kāyappaṭibaddhādīsu sabbattha dukkaṭameva. Na hasanādhippāyassa, sati karaṇīye āmasato, ummattakādīnañca anāpatti. Hasādhippāyatā, upasampannassa kāyena kāyāmasananti imānettha dve aṅgāni. Samuṭṭhānādīni paṭhamapārājikasadisānevāti.
ан̇г̇улибад̇од̣̇агасигкаабад̣̇аван̣н̣анаа нидтид̇аа.
Aṅgulipatodakasikkhāpadavaṇṇanā niṭṭhitā.
3. хасад̇хаммасигкаабад̣̇аван̣н̣анаа
3. Hasadhammasikkhāpadavaṇṇanā
д̇ад̇ияз уд̣̇агз хасад̇хаммзд̇и уд̣̇агагийл̣аа вужжад̇и. д̇асмаа яо бхигку убариг̇обпагз уд̣̇агзязва г̇ажчанд̇о хасаад̇хиббааяо нимуж̇ж̇ад̇и ваа уммуж̇ж̇ад̇и ваа, д̇асса нимуж̇ж̇анаад̣̇ийнам̣ ад̇т̇ааяа од̇аранд̇асса хад̇т̇аваарз бад̣̇аваарз д̣̇уггадам̣, нимуж̇ж̇ануммуж̇ж̇анзсу баяог̇з баяог̇з баажид̇д̇ияам̣, нимуж̇ж̇ид̇ваа анд̇оуд̣̇агзязва г̇ажчанд̇асса хад̇т̇аваарабад̣̇аваарзсу, д̇аранд̇асса ваа язна язна ан̇г̇зна д̇арад̇и, д̇асса д̇асса баяог̇з баяог̇з баажид̇д̇ияам̣.
Tatiye udake hasadhammeti udakakīḷā vuccati. Tasmā yo bhikkhu uparigopphake udakeyeva gacchanto hasādhippāyo nimujjati vā ummujjati vā, tassa nimujjanādīnaṃ atthāya otarantassa hatthavāre padavāre dukkaṭaṃ, nimujjanummujjanesu payoge payoge pācittiyaṃ, nimujjitvā antoudakeyeva gacchantassa hatthavārapadavāresu, tarantassa vā yena yena aṅgena tarati, tassa tassa payoge payoge pācittiyaṃ.
саавад̇т̇ияам̣ сад̇д̇арасаваг̇г̇ияз бхигкуу аараб̣бха уд̣̇агз гийл̣анавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, уд̣̇агз ахасад̇хаммз хасад̇хаммасан̃н̃ино, взмад̇игасса ваа д̣̇уггадам̣, д̇ат̇аа наавааяа гийл̣ад̇о хад̇т̇зна ваа баад̣̇зна ваа гадтзна ваа гат̇алааяа ваа уд̣̇агам̣ бахарад̇о, бхааж̇анаг̇ад̇ам̣ уд̣̇агам̣ ваа ган̃ж̇игаад̣̇ийни ваа жигкаллам̣ ваа кибанагийл̣ааяа гийл̣ад̇о д̣̇уггадам̣. ад̇т̇аж̇од̇агам̣ бана агкарам̣ чинд̣̇ид̇ум̣ ваддад̇и. на хасаад̇хиббааяасса, сад̇и гаран̣ийяз од̇арид̇ваа нимуж̇ж̇анаад̣̇ийни гаронд̇асса, баарам̣ г̇ажчад̇о, аабад̣̇аасу, уммад̇д̇агаад̣̇ийнан̃жа анаабад̇д̇и. убариг̇обпагад̇аа, хасаад̇хиббааязна гийл̣ананд̇и имаанзд̇т̇а д̣̇вз ан̇г̇аани. самудтаанаад̣̇ийни батамабаарааж̇игасад̣̇исаанийд̇и.
Sāvatthiyaṃ sattarasavaggiye bhikkhū ārabbha udake kīḷanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, udake ahasadhamme hasadhammasaññino, vematikassa vā dukkaṭaṃ, tathā nāvāya kīḷato hatthena vā pādena vā kaṭṭhena vā kathalāya vā udakaṃ paharato, bhājanagataṃ udakaṃ vā kañjikādīni vā cikkhallaṃ vā khipanakīḷāya kīḷato dukkaṭaṃ. Atthajotakaṃ pana akkharaṃ chindituṃ vaṭṭati. Na hasādhippāyassa, sati karaṇīye otaritvā nimujjanādīni karontassa, pāraṃ gacchato, āpadāsu, ummattakādīnañca anāpatti. Uparigopphakatā, hasādhippāyena kīḷananti imānettha dve aṅgāni. Samuṭṭhānādīni paṭhamapārājikasadisānīti.
хасад̇хаммасигкаабад̣̇аван̣н̣анаа нидтид̇аа.
Hasadhammasikkhāpadavaṇṇanā niṭṭhitā.
4. анаад̣̇арияасигкаабад̣̇аван̣н̣анаа
4. Anādariyasikkhāpadavaṇṇanā
жад̇уд̇т̇з анаад̣̇ариязд̇и буг̇г̇аласса ваа д̇хаммасса ваа анаад̣̇арагаран̣з. д̇асмаа яо бхигку убасамбаннзна бан̃н̃ад̇д̇зна вужжамаано д̇асса ваа важанам̣ агад̇д̇угаамад̇ааяа, д̇ам̣ ваа д̇хаммам̣ асигкид̇угаамад̇ааяа анаад̣̇арияам̣ гарод̇и, д̇асса д̇асмим̣ анаад̣̇арияз баажид̇д̇ияам̣.
Catutthe anādariyeti puggalassa vā dhammassa vā anādarakaraṇe. Tasmā yo bhikkhu upasampannena paññattena vuccamāno tassa vā vacanaṃ akattukāmatāya, taṃ vā dhammaṃ asikkhitukāmatāya anādariyaṃ karoti, tassa tasmiṃ anādariye pācittiyaṃ.
госамб̣ияам̣ чаннад̇т̇зрам̣ аараб̣бха анаад̣̇арияагаран̣авад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, анубасамбаннз д̇игад̣̇уггадам̣, убасамбаннзна ваа анубасамбаннзна ваа ‘‘ид̣̇ам̣ на саллзкааяа сам̣вад̇д̇ад̇ий’’д̇иаад̣̇инаа наязна абан̃н̃ад̇д̇зна вужжамаанасса анаад̣̇ариязби д̣̇уггадамзва. бавзн̣иааг̇ад̇ам̣ бана уг̇г̇ахам̣ г̇ахзд̇ваа ‘‘звам̣ амхаагам̣ аажарияаанам̣ уг̇г̇ахо барибужчаа’’д̇и (баажи. 344) бхан̣анд̇асса, уммад̇д̇агаад̣̇ийнан̃жа анаабад̇д̇и. убасамбаннасса бан̃н̃ад̇д̇зна важанам̣, анаад̣̇арияагаран̣анд̇и имаанзд̇т̇а д̣̇вз ан̇г̇аани. самудтаанаад̣̇ийни ад̣̇иннаад̣̇аанасад̣̇исаани, ид̣̇ам̣ бана д̣̇угкавзд̣̇ананд̇и.
Kosambiyaṃ channattheraṃ ārabbha anādariyakaraṇavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, anupasampanne tikadukkaṭaṃ, upasampannena vā anupasampannena vā ‘‘idaṃ na sallekhāya saṃvattatī’’tiādinā nayena apaññattena vuccamānassa anādariyepi dukkaṭameva. Paveṇiāgataṃ pana uggahaṃ gahetvā ‘‘evaṃ amhākaṃ ācariyānaṃ uggaho paripucchā’’ti (pāci. 344) bhaṇantassa, ummattakādīnañca anāpatti. Upasampannassa paññattena vacanaṃ, anādariyakaraṇanti imānettha dve aṅgāni. Samuṭṭhānādīni adinnādānasadisāni, idaṃ pana dukkhavedananti.
анаад̣̇арияасигкаабад̣̇аван̣н̣анаа нидтид̇аа.
Anādariyasikkhāpadavaṇṇanā niṭṭhitā.
5. бхим̣саабанасигкаабад̣̇аван̣н̣анаа
5. Bhiṃsāpanasikkhāpadavaṇṇanā
бан̃жамз бхим̣саабзяяаад̇и бхим̣саабанад̇т̇ам̣ руубаад̣̇ийни убасам̣харзяяа, бхаяаанагагат̇ам̣ ваа гат̇зяяа. со бана бхааяад̇у ваа, маа ваа, ид̇арасса баажид̇д̇ияам̣.
Pañcame bhiṃsāpeyyāti bhiṃsāpanatthaṃ rūpādīni upasaṃhareyya, bhayānakakathaṃ vā katheyya. So pana bhāyatu vā, mā vā, itarassa pācittiyaṃ.
саавад̇т̇ияам̣ чаб̣б̣аг̇г̇ияз бхигкуу аараб̣бха бхим̣саабанавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣. анубасамбаннз д̇игад̣̇уггадам̣, на бхим̣саабзд̇угаамасса д̇ат̇аа гарод̇о, уммад̇д̇агаад̣̇ийнан̃жа анаабад̇д̇и. убасамбаннад̇аа, д̇асса д̣̇ассанасаванависаяз бхим̣саабзд̇угаамад̇ааяа вааяаамананд̇и имаанзд̇т̇а д̣̇вз ан̇г̇аани. самудтаанаад̣̇ийни ананд̇арасигкаабад̣̇асад̣̇исаанзваад̇и.
Sāvatthiyaṃ chabbaggiye bhikkhū ārabbha bhiṃsāpanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ. Anupasampanne tikadukkaṭaṃ, na bhiṃsāpetukāmassa tathā karoto, ummattakādīnañca anāpatti. Upasampannatā, tassa dassanasavanavisaye bhiṃsāpetukāmatāya vāyāmananti imānettha dve aṅgāni. Samuṭṭhānādīni anantarasikkhāpadasadisānevāti.
бхим̣саабанасигкаабад̣̇аван̣н̣анаа нидтид̇аа.
Bhiṃsāpanasikkhāpadavaṇṇanā niṭṭhitā.
6. ж̇од̇исигкаабад̣̇аван̣н̣анаа
6. Jotisikkhāpadavaṇṇanā
чадтз висиб̣б̣анаабзгкод̇и д̇аббид̇угаамо. самаад̣̇ахзяяаад̇и ж̇аалзяяа, ан̃н̃ад̇ра д̇ат̇ааруубаббажжаяаад̇и бад̣̇ийбуж̇ж̇ааланам̣ ваа бад̇д̇абажанаад̣̇ийсу ж̇од̇игаран̣ам̣ ваад̇и зваруубам̣ бажжаяам̣ винаа. д̇ад̇рааяам̣ винижчаяо – саяам̣ самаад̣̇аханд̇асса аран̣исан̣таабанад̇о бадтааяа яаава ж̇аалаа на удтахад̇и, д̇аава саб̣б̣аббаяог̇зсу д̣̇уггадам̣, ж̇аалудтаанз баажид̇д̇ияам̣. самаад̣̇ахаабзнд̇асса аан̣ад̇д̇ияаа д̣̇уггадам̣, сагим̣ аан̣ад̇д̇зна б̣ахумби самаад̣̇ахид̇з згамзва баажид̇д̇ияам̣.
Chaṭṭhe visibbanāpekkhoti tappitukāmo. Samādaheyyāti jāleyya, aññatra tathārūpappaccayāti padīpujjālanaṃ vā pattapacanādīsu jotikaraṇaṃ vāti evarūpaṃ paccayaṃ vinā. Tatrāyaṃ vinicchayo – sayaṃ samādahantassa araṇisaṇṭhāpanato paṭṭhāya yāva jālā na uṭṭhahati, tāva sabbappayogesu dukkaṭaṃ, jāluṭṭhāne pācittiyaṃ. Samādahāpentassa āṇattiyā dukkaṭaṃ, sakiṃ āṇattena bahumpi samādahite ekameva pācittiyaṃ.
бхаг̇г̇зсу самб̣ахулз бхигкуу аараб̣бха ж̇од̇им̣ самаад̣̇ахид̇ваа висиб̣б̣анавад̇т̇усмим̣ бан̃н̃ад̇д̇ам̣, ‘‘аг̇илаано, ан̃н̃ад̇ра д̇ат̇ааруубаббажжаяаа’’д̇и имаанзд̇т̇а д̣̇вз анубан̃н̃ад̇д̇ияо, саад̇хааран̣абан̃н̃ад̇д̇и, саан̣ад̇д̇игам̣, д̇игабаажид̇д̇ияам̣, г̇илаанасса аг̇илаанасан̃н̃ино, взмад̇игасса ваа д̣̇уггадам̣, д̇ат̇аа бадилаад̇ам̣ угкибанд̇асса, д̇ан̃жа авиж̇жхаад̇ам̣ угкибид̇ваа яат̇аатаанз табзнд̇асса. виж̇жхаад̇ам̣ бана ж̇аалаяад̇о баажид̇д̇ияамзва. г̇илаанасса г̇илаанасан̃н̃исса , ан̃н̃зна гад̇ам̣ ваа вийд̇ажжид̇ан̇г̇аарам̣ ваа висиб̣б̣знд̇асса, бад̣̇ийбаж̇од̇игаж̇анд̇аагхараад̣̇игз д̇ат̇ааруубаббажжаяз, аабад̣̇аасу, уммад̇д̇агаад̣̇ийнан̃жа анаабад̇д̇и. аг̇илаанад̇аа, анун̃н̃аад̇агааран̣аабхааво, висиб̣б̣зд̇угаамад̇аа, самаад̣̇ахананд̇и имаанзд̇т̇а жад̇д̇аари ан̇г̇аани. самудтаанаад̣̇ийни сан̃жарид̇д̇з вуд̇д̇анаязнзва взд̣̇ид̇аб̣б̣аанийд̇и.
Bhaggesu sambahule bhikkhū ārabbha jotiṃ samādahitvā visibbanavatthusmiṃ paññattaṃ, ‘‘agilāno, aññatra tathārūpappaccayā’’ti imānettha dve anupaññattiyo, sādhāraṇapaññatti, sāṇattikaṃ, tikapācittiyaṃ, gilānassa agilānasaññino, vematikassa vā dukkaṭaṃ, tathā paṭilātaṃ ukkhipantassa, tañca avijjhātaṃ ukkhipitvā yathāṭhāne ṭhapentassa. Vijjhātaṃ pana jālayato pācittiyameva. Gilānassa gilānasaññissa , aññena kataṃ vā vītaccitaṅgāraṃ vā visibbentassa, padīpajotikajantāgharādike tathārūpappaccaye, āpadāsu, ummattakādīnañca anāpatti. Agilānatā, anuññātakāraṇābhāvo, visibbetukāmatā, samādahananti imānettha cattāri aṅgāni. Samuṭṭhānādīni sañcaritte vuttanayeneva veditabbānīti.
ж̇од̇исигкаабад̣̇аван̣н̣анаа нидтид̇аа.
Jotisikkhāpadavaṇṇanā niṭṭhitā.
7. нахаанасигкаабад̣̇аван̣н̣анаа
7. Nahānasikkhāpadavaṇṇanā
сад̇д̇амз нахааязяяаад̇и яо бхигку маж̇жхимад̣̇зсз нахаанад̣̇ивасад̇о бадтааяа ад̣̇д̇хамаасз абун̣н̣з ан̃н̃ад̇ра самаяаа ‘‘нахааяиссаамий’’д̇и жун̣н̣ам̣ ваа мад̇д̇игам̣ ваа абхисан̇карод̇и, д̇асса д̇ад̇о бадтааяа саб̣б̣аббаяог̇зсу д̣̇уггадам̣, нахаанабарияосаанз баажид̇д̇ияам̣. самаязсу баривзн̣асаммаж̇ж̇анамад̇д̇амби гаммасамаяо, ад̣̇д̇хаяож̇анам̣ г̇анд̇угаамасса, г̇ажчад̇о, г̇ад̇асса ваа ад̣̇д̇хаанаг̇аманасамаяо, сараж̇зна ваад̇зна огин̣н̣асса д̣̇вийсу ваа д̇ийсу ваа уд̣̇агапусид̇зсу гааяз бад̇ид̇зсу ваад̇авудтисамаяод̇и взд̣̇ид̇аб̣б̣о. сзсам̣ уд̇д̇аанамзва.
Sattame nahāyeyyāti yo bhikkhu majjhimadese nahānadivasato paṭṭhāya addhamāse apuṇṇe aññatra samayā ‘‘nahāyissāmī’’ti cuṇṇaṃ vā mattikaṃ vā abhisaṅkharoti, tassa tato paṭṭhāya sabbappayogesu dukkaṭaṃ, nahānapariyosāne pācittiyaṃ. Samayesu pariveṇasammajjanamattampi kammasamayo, addhayojanaṃ gantukāmassa, gacchato, gatassa vā addhānagamanasamayo, sarajena vātena okiṇṇassa dvīsu vā tīsu vā udakaphusitesu kāye patitesu vātavuṭṭhisamayoti veditabbo. Sesaṃ uttānameva.
рааж̇аг̇ахз самб̣ахулз бхигкуу аараб̣бха на мад̇д̇ам̣ ж̇аанид̇ваа нахааяанавад̇т̇усмим̣ бан̃н̃ад̇д̇ам̣, ‘‘ан̃н̃ад̇ра самаяаа’’д̇и аяамзд̇т̇а чаб̣б̣ид̇хаа анубан̃н̃ад̇д̇и, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, ад̇ирзгад̣̇д̇хамаасз уунагасан̃н̃ино, взмад̇игасса ваа д̣̇уггадам̣. ад̇ирзгасан̃н̃исса, самаяз ваа нахааяанд̇асса, яо ваа над̣̇ийбаарам̣ г̇ажчанд̇о ваалугам̣ уггирид̇ваа гад̇аааваадзсуби нахааяад̇и, д̇асса, бажжанд̇имз ж̇анабад̣̇з саб̣б̣зсам̣, аабад̣̇аасу, уммад̇д̇агаад̣̇ийнан̃жа анаабад̇д̇и. маж̇жхимад̣̇зсо, уунагад̣̇д̇хамаасз нахаанам̣, самаяаанам̣ ваа над̣̇ийбаараг̇аманасса ваа аабад̣̇аанам̣ ваа абхаавод̇и имаанзд̇т̇а д̇ийн̣и ан̇г̇аани. самудтаанаад̣̇ийни зл̣агаломасад̣̇исаанзваад̇и.
Rājagahe sambahule bhikkhū ārabbha na mattaṃ jānitvā nahāyanavatthusmiṃ paññattaṃ, ‘‘aññatra samayā’’ti ayamettha chabbidhā anupaññatti, sādhāraṇapaññatti, anāṇattikaṃ, tikapācittiyaṃ, atirekaddhamāse ūnakasaññino, vematikassa vā dukkaṭaṃ. Atirekasaññissa, samaye vā nahāyantassa, yo vā nadīpāraṃ gacchanto vālukaṃ ukkiritvā kataāvāṭesupi nahāyati, tassa, paccantime janapade sabbesaṃ, āpadāsu, ummattakādīnañca anāpatti. Majjhimadeso, ūnakaddhamāse nahānaṃ, samayānaṃ vā nadīpāragamanassa vā āpadānaṃ vā abhāvoti imānettha tīṇi aṅgāni. Samuṭṭhānādīni eḷakalomasadisānevāti.
нахаанасигкаабад̣̇аван̣н̣анаа нидтид̇аа.
Nahānasikkhāpadavaṇṇanā niṭṭhitā.
8. д̣̇уб̣б̣ан̣н̣агаран̣асигкаабад̣̇аван̣н̣анаа
8. Dubbaṇṇakaraṇasikkhāpadavaṇṇanā
адтамз алабхийд̇и лабхо, лабхо зва лаабхо, гим̣ алабхи? жийварам̣, гийд̣̇исам̣? навам̣, ид̇и ‘‘наважийваралаабхзнаа’’д̇и вад̇д̇аб̣б̣з анунаасигалобам̣ агад̇ваа навам̣жийваралаабхзнаад̇и вуд̇д̇ам̣, бадилад̣̇д̇ханаважийварзнаад̇и ад̇т̇о. маж̇жхз тид̇абад̣̇ад̣̇ваяз банаад̇и нибаад̇амад̇д̇ам̣. бхигкунаад̇и язна лад̣̇д̇хам̣, д̇асса нид̣̇ассанам̣, сзсам̣ бад̣̇ад̇т̇ад̇о уд̇д̇аанамзва. аяам̣ банзд̇т̇а винижчаяо – ниваасанабаарубанубаг̇ам̣ жийварам̣ лабхид̇ваа д̇асса нидтид̇араж̇анасса яасмим̣ ваа д̇асмим̣ ваа бад̣̇зсз гам̣санийлзна ваа бад̇д̇анийлзна ваа гад̣̇д̣̇амзна ваа язна гзнажи гаал̣агзна ваа морагкиман̣д̣аламан̇г̇улабидтийнам̣ ан̃н̃ад̇араббамаан̣ам̣ габбаб̣инд̣̇ум̣ аад̣̇ияид̇ваа д̇ам̣ жийварам̣ барибхун̃ж̇ид̇аб̣б̣ам̣, анаад̣̇ияид̇ваа барибхун̃ж̇анд̇асса баажид̇д̇ияам̣.
Aṭṭhame alabhīti labho, labho eva lābho, kiṃ alabhi? Cīvaraṃ, kīdisaṃ? Navaṃ, iti ‘‘navacīvaralābhenā’’ti vattabbe anunāsikalopaṃ akatvā navaṃcīvaralābhenāti vuttaṃ, paṭiladdhanavacīvarenāti attho. Majjhe ṭhitapadadvaye panāti nipātamattaṃ. Bhikkhunāti yena laddhaṃ, tassa nidassanaṃ, sesaṃ padatthato uttānameva. Ayaṃ panettha vinicchayo – nivāsanapārupanupagaṃ cīvaraṃ labhitvā tassa niṭṭhitarajanassa yasmiṃ vā tasmiṃ vā padese kaṃsanīlena vā pattanīlena vā kaddamena vā yena kenaci kāḷakena vā morakkhimaṇḍalamaṅgulapiṭṭhīnaṃ aññatarappamāṇaṃ kappabinduṃ ādiyitvā taṃ cīvaraṃ paribhuñjitabbaṃ, anādiyitvā paribhuñjantassa pācittiyaṃ.
саавад̇т̇ияам̣ самб̣ахулз бхигкуу аараб̣бха ад̇д̇ано жийварааж̇аананавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, аад̣̇иннз анаад̣̇иннасан̃н̃ино, взмад̇игасса ваа д̣̇уггадам̣. аад̣̇иннасан̃н̃исса , габбз надтз, габбагад̇огаасз ж̇ин̣н̣з, габбагад̇зна агаббагад̇з сам̣сиб̣б̣ид̇з, бажчаа ааробид̇зсу аг̇г̇ал̣аануваад̇абарибхан̣д̣зсу д̇ам̣ барибхун̃ж̇анд̇асса, уммад̇д̇агаад̣̇ийнан̃жа анаабад̇д̇и. вуд̇д̇аббагаарасса жийварасса агад̇агаббагад̇аа, на надтажийвараад̣̇ид̇аа, ниваасанам̣ ваа баарубанам̣ ваад̇и имаанзд̇т̇а д̇ийн̣и ан̇г̇аани. самудтаанаад̣̇ийни зл̣агаломасад̣̇исаани, ид̣̇ам̣ бана гирияаагирияанд̇и.
Sāvatthiyaṃ sambahule bhikkhū ārabbha attano cīvaraajānanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, ādinne anādinnasaññino, vematikassa vā dukkaṭaṃ. Ādinnasaññissa , kappe naṭṭhe, kappakatokāse jiṇṇe, kappakatena akappakate saṃsibbite, pacchā āropitesu aggaḷaanuvātaparibhaṇḍesu taṃ paribhuñjantassa, ummattakādīnañca anāpatti. Vuttappakārassa cīvarassa akatakappakatā, na naṭṭhacīvarāditā, nivāsanaṃ vā pārupanaṃ vāti imānettha tīṇi aṅgāni. Samuṭṭhānādīni eḷakalomasadisāni, idaṃ pana kiriyākiriyanti.
д̣̇уб̣б̣ан̣н̣агаран̣асигкаабад̣̇аван̣н̣анаа нидтид̇аа.
Dubbaṇṇakaraṇasikkhāpadavaṇṇanā niṭṭhitā.
9. вигаббанасигкаабад̣̇аван̣н̣анаа
9. Vikappanasikkhāpadavaṇṇanā
навамз вигаббзд̇ваад̇и зд̇т̇а д̣̇вз вигаббанаа саммукаавигаббанаа бараммукаавигаббанаа жа. гат̇ам̣ саммукаавигаббанаа ход̇и? жийвараанам̣ згаб̣ахубхаавам̣ саннихид̇аасаннихид̇абхааван̃жа н̃ад̇ваа ‘имам̣ жийвара’нд̇и ваа ‘имаани жийварааний’д̇и ваа ‘зд̇ам̣ жийвара’нд̇и ваа ‘зд̇аани жийварааний’д̇и ваа вад̇ваа ‘д̇уяхам̣ вигаббзмий’д̇и вад̇д̇аб̣б̣ам̣, аяамзгаа саммукаавигаббанаа. зд̇д̇аавад̇аа нид̇хзд̇ум̣ ваддад̇и, барибхун̃ж̇ид̇ум̣ бана виссаж̇ж̇зд̇ум̣ ваа ад̇хидтаад̇ум̣ ваа на ваддад̇и. ‘‘маяхам̣ санд̇агам̣, маяхам̣ санд̇агаани барибхун̃ж̇а ваа виссаж̇ж̇зхи ваа яат̇аабажжаяам̣ гарохий’’д̇и (баажи. 374) звам̣ бана вуд̇д̇з бажжуд̣̇д̇хааро наама ход̇и, д̇ад̇о бабхуд̇и барибхог̇аад̣̇аяоби вадданд̇и. абаро наяо, д̇ат̇зва жийвараанам̣ згаб̣ахубхаавам̣ саннихид̇аасаннихид̇абхааван̃жа н̃ад̇ваа д̇ассзва бхигкуно санд̇игз ‘имам̣ жийвара’нд̇и ваа ‘имаани жийварааний’д̇и ваа ‘зд̇ам̣ жийвара’нд̇и ваа ‘зд̇аани жийварааний’д̇и ваа вад̇ваа бан̃жасу сахад̇хаммигзсу ан̃н̃ад̇арасса ад̇д̇анаа абхиружид̇асса яасса гассажи наамам̣ г̇ахзд̇ваа ‘‘д̇иссасса бхигкуно вигаббзмий’’д̇и ваа ‘‘д̇иссааяа бхигкунияаа, сигкамаанааяа, сааман̣зрасса, д̇иссааяа сааман̣зрияаа вигаббзмий’’д̇и ваа вад̇д̇аб̣б̣ам̣, аяам̣ абарааби саммукаавигаббанаа. зд̇д̇аавад̇аа нид̇хзд̇ум̣ ваддад̇и, барибхог̇аад̣̇ийсу згамби на ваддад̇и. д̇зна бана бхигкунаа ‘‘д̇иссасса бхигкуно санд̇агам̣…бз… д̇иссааяа сааман̣зрияаа санд̇агам̣ барибхун̃ж̇а ваа виссаж̇ж̇зхи ваа яат̇аабажжаяам̣ гарохий’’д̇и вуд̇д̇з бажжуд̣̇д̇хааро наама ход̇и, д̇ад̇о бабхуд̇и барибхог̇аад̣̇аяоби вадданд̇и.
Navame vikappetvāti ettha dve vikappanā sammukhāvikappanā parammukhāvikappanā ca. Kathaṃ sammukhāvikappanā hoti? Cīvarānaṃ ekabahubhāvaṃ sannihitāsannihitabhāvañca ñatvā ‘imaṃ cīvara’nti vā ‘imāni cīvarānī’ti vā ‘etaṃ cīvara’nti vā ‘etāni cīvarānī’ti vā vatvā ‘tuyhaṃ vikappemī’ti vattabbaṃ, ayamekā sammukhāvikappanā. Ettāvatā nidhetuṃ vaṭṭati, paribhuñjituṃ pana vissajjetuṃ vā adhiṭṭhātuṃ vā na vaṭṭati. ‘‘Mayhaṃ santakaṃ, mayhaṃ santakāni paribhuñja vā vissajjehi vā yathāpaccayaṃ karohī’’ti (pāci. 374) evaṃ pana vutte paccuddhāro nāma hoti, tato pabhuti paribhogādayopi vaṭṭanti. Aparo nayo, tatheva cīvarānaṃ ekabahubhāvaṃ sannihitāsannihitabhāvañca ñatvā tasseva bhikkhuno santike ‘imaṃ cīvara’nti vā ‘imāni cīvarānī’ti vā ‘etaṃ cīvara’nti vā ‘etāni cīvarānī’ti vā vatvā pañcasu sahadhammikesu aññatarassa attanā abhirucitassa yassa kassaci nāmaṃ gahetvā ‘‘tissassa bhikkhuno vikappemī’’ti vā ‘‘tissāya bhikkhuniyā, sikkhamānāya, sāmaṇerassa, tissāya sāmaṇeriyā vikappemī’’ti vā vattabbaṃ, ayaṃ aparāpi sammukhāvikappanā. Ettāvatā nidhetuṃ vaṭṭati, paribhogādīsu ekampi na vaṭṭati. Tena pana bhikkhunā ‘‘tissassa bhikkhuno santakaṃ…pe… tissāya sāmaṇeriyā santakaṃ paribhuñja vā vissajjehi vā yathāpaccayaṃ karohī’’ti vutte paccuddhāro nāma hoti, tato pabhuti paribhogādayopi vaṭṭanti.
гат̇ам̣ бараммукаавигаббанаа ход̇и? жийвараанам̣ д̇ат̇зва згаб̣ахубхаавам̣ саннихид̇аасаннихид̇абхааван̃жа н̃ад̇ваа ‘имам̣ жийвара’нд̇и ваа ‘имаани жийварааний’д̇и ваа ‘зд̇ам̣ жийвара’нд̇и ваа ‘зд̇аани жийварааний’д̇и ваа вад̇ваа ‘‘д̇уяхам̣ вигаббанад̇т̇ааяа д̣̇аммий’’д̇и вад̇д̇аб̣б̣ам̣. д̇зна вад̇д̇аб̣б̣о ‘‘го д̇з мид̇д̇о ваа санд̣̇идто ваа’’д̇и. д̇ад̇о ид̇арзна буриманаязнзва ‘д̇иссо бхигкуу’д̇и ваа…бз… ‘д̇иссаа сааман̣зрий’д̇и ваа вад̇д̇аб̣б̣ам̣. буна д̇зна бхигкунаа ‘‘ахам̣ д̇иссасса бхигкуно д̣̇аммий’’д̇и ваа…бз… ‘‘д̇иссааяа сааман̣зрияаа д̣̇аммий’’д̇и ваа вад̇д̇аб̣б̣ам̣ , аяам̣ бараммукаавигаббанаа. зд̇д̇аавад̇аа нид̇хзд̇ум̣ ваддад̇и, барибхог̇аад̣̇ийсу згамби на ваддад̇и. д̇зна бана бхигкунаа д̣̇уд̇ияасаммукаавигаббанааяам̣ вуд̇д̇анаязнзва ‘‘ид̇т̇аннаамасса санд̇агам̣ барибхун̃ж̇а ваа виссаж̇ж̇зхи ваа яат̇аабажжаяам̣ гарохий’’д̇и вуд̇д̇з бажжуд̣̇д̇хааро наама ход̇и, д̇ад̇о бабхуд̇и барибхог̇аад̣̇аяоби вадданд̇ийд̇и. бад̇д̇авигаббанааяамби зсзва наяо. ид̇и имаасу д̣̇вийсу вигаббанаасу яааяа гааяажи вигаббанааяа бан̃жасу сахад̇хаммигзсу яасса гассажи жийварам̣ вигаббзд̇ваа вуд̇д̇анаязна агад̇аббажжуд̣̇д̇хаарам̣ ваа язна винаяагаммам̣ гад̇ам̣, д̇асса ваа виссаасзна аг̇г̇ахзд̇ваа барибхун̃ж̇анд̇асса баажид̇д̇ияам̣.
Kathaṃ parammukhāvikappanā hoti? Cīvarānaṃ tatheva ekabahubhāvaṃ sannihitāsannihitabhāvañca ñatvā ‘imaṃ cīvara’nti vā ‘imāni cīvarānī’ti vā ‘etaṃ cīvara’nti vā ‘etāni cīvarānī’ti vā vatvā ‘‘tuyhaṃ vikappanatthāya dammī’’ti vattabbaṃ. Tena vattabbo ‘‘ko te mitto vā sandiṭṭho vā’’ti. Tato itarena purimanayeneva ‘tisso bhikkhū’ti vā…pe… ‘tissā sāmaṇerī’ti vā vattabbaṃ. Puna tena bhikkhunā ‘‘ahaṃ tissassa bhikkhuno dammī’’ti vā…pe… ‘‘tissāya sāmaṇeriyā dammī’’ti vā vattabbaṃ , ayaṃ parammukhāvikappanā. Ettāvatā nidhetuṃ vaṭṭati, paribhogādīsu ekampi na vaṭṭati. Tena pana bhikkhunā dutiyasammukhāvikappanāyaṃ vuttanayeneva ‘‘itthannāmassa santakaṃ paribhuñja vā vissajjehi vā yathāpaccayaṃ karohī’’ti vutte paccuddhāro nāma hoti, tato pabhuti paribhogādayopi vaṭṭantīti. Pattavikappanāyampi eseva nayo. Iti imāsu dvīsu vikappanāsu yāya kāyaci vikappanāya pañcasu sahadhammikesu yassa kassaci cīvaraṃ vikappetvā vuttanayena akatappaccuddhāraṃ vā yena vinayakammaṃ kataṃ, tassa vā vissāsena aggahetvā paribhuñjantassa pācittiyaṃ.
саавад̇т̇ияам̣ убананд̣̇ам̣ аараб̣бха аббажжуд̣̇д̇хааран̣ам̣ барибхун̃ж̇анавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, д̇ам̣ бана ад̇хидтаханд̇асса ваа виссаж̇ж̇знд̇асса ваа д̣̇уггадам̣, д̇ат̇аа бажжуд̣̇д̇хааран̣з аббажжуд̣̇д̇хааран̣асан̃н̃исса взмад̇игасса ваа. бажжуд̣̇д̇хааран̣асан̃н̃исса бана виссаасзна барибхун̃ж̇анд̇асса, уммад̇д̇агаад̣̇ийнан̃жа анаабад̇д̇и. саамам̣ вигаббид̇асса аббажжуд̣̇д̇хааро, вигаббанубаг̇ажийварад̇аа, барибхог̇од̇и имаанзд̇т̇а д̇ийн̣и ан̇г̇аани. самудтаанаад̣̇ийни батамагат̇инасад̣̇исаанзва, ид̣̇ам̣ бана гирияаагирияанд̇и.
Sāvatthiyaṃ upanandaṃ ārabbha appaccuddhāraṇaṃ paribhuñjanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, taṃ pana adhiṭṭhahantassa vā vissajjentassa vā dukkaṭaṃ, tathā paccuddhāraṇe appaccuddhāraṇasaññissa vematikassa vā. Paccuddhāraṇasaññissa pana vissāsena paribhuñjantassa, ummattakādīnañca anāpatti. Sāmaṃ vikappitassa appaccuddhāro, vikappanupagacīvaratā, paribhogoti imānettha tīṇi aṅgāni. Samuṭṭhānādīni paṭhamakathinasadisāneva, idaṃ pana kiriyākiriyanti.
вигаббанасигкаабад̣̇аван̣н̣анаа нидтид̇аа.
Vikappanasikkhāpadavaṇṇanā niṭṭhitā.
10. абанид̇хаанасигкаабад̣̇аван̣н̣анаа
10. Apanidhānasikkhāpadavaṇṇanā
д̣̇асамз бад̇д̇анд̇и ад̇хидтаанубаг̇ам̣. жийваранд̇и вигаббанубаг̇ам̣. нисийд̣̇анам̣ наама сад̣̇асам̣ вужжад̇и. суужигхарам̣ наама сасуужигам̣ ваа асуужигам̣ ваа. гааяаб̣анд̇ханам̣ наама баддигаа ваа суугаранд̇агам̣ ваа. абанид̇хзяяаад̇и абанзд̇ваа нид̣̇ахзяяа. хасаабзгкод̇и хасаад̇хиббааяо. баажид̇д̇ияанд̇и саяам̣ абанид̇хзнд̇асса баажид̇д̇ияам̣, ан̃н̃ам̣ аан̣аабзнд̇асса аан̣ад̇д̇ияаа д̣̇уггадам̣, д̇зна абанихид̇з ид̇арасса баажид̇д̇ияам̣.
Dasame pattanti adhiṭṭhānupagaṃ. Cīvaranti vikappanupagaṃ. Nisīdanaṃ nāma sadasaṃ vuccati. Sūcigharaṃ nāma sasūcikaṃ vā asūcikaṃ vā. Kāyabandhanaṃ nāma paṭṭikā vā sūkarantakaṃ vā. Apanidheyyāti apanetvā nidaheyya. Hasāpekkhoti hasādhippāyo. Pācittiyanti sayaṃ apanidhentassa pācittiyaṃ, aññaṃ āṇāpentassa āṇattiyā dukkaṭaṃ, tena apanihite itarassa pācittiyaṃ.
саавад̇т̇ияам̣ чаб̣б̣аг̇г̇ияз аараб̣бха абанид̇хаанавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, саан̣ад̇д̇игам̣, д̇игабаажид̇д̇ияам̣, анубасамбаннз д̇игад̣̇уггадам̣, вуд̇д̇аббагаараани бана бад̇д̇аад̣̇ийни табзд̇ваа ан̃н̃ам̣ баригкаарам̣ убасамбаннасса ваа анубасамбаннасса ваа санд̇агам̣ абанид̇хзнд̇асса д̣̇уггадамзва. д̣̇уннигкид̇д̇ам̣ бадисаамзнд̇асса, ‘‘д̇хаммагат̇ам̣ гад̇ваа д̣̇ассаамий’’д̇и бадисаамзнд̇асса, уммад̇д̇агаад̣̇ийнан̃жа анаабад̇д̇и. убасамбаннасса санд̇агаанам̣ бад̇д̇аад̣̇ийнам̣ абанид̇хаанам̣, вихзсзд̇угаамад̇аа ваа хасаад̇хиббааяад̇аа ваад̇и имаанзд̇т̇а д̣̇вз ан̇г̇аани. самудтаанаад̣̇ийни ад̣̇иннаад̣̇аанасад̣̇исаанийд̇и.
Sāvatthiyaṃ chabbaggiye ārabbha apanidhānavatthusmiṃ paññattaṃ, sādhāraṇapaññatti, sāṇattikaṃ, tikapācittiyaṃ, anupasampanne tikadukkaṭaṃ, vuttappakārāni pana pattādīni ṭhapetvā aññaṃ parikkhāraṃ upasampannassa vā anupasampannassa vā santakaṃ apanidhentassa dukkaṭameva. Dunnikkhittaṃ paṭisāmentassa, ‘‘dhammakathaṃ katvā dassāmī’’ti paṭisāmentassa, ummattakādīnañca anāpatti. Upasampannassa santakānaṃ pattādīnaṃ apanidhānaṃ, vihesetukāmatā vā hasādhippāyatā vāti imānettha dve aṅgāni. Samuṭṭhānādīni adinnādānasadisānīti.
абанид̇хаанасигкаабад̣̇аван̣н̣анаа нидтид̇аа.
Apanidhānasikkhāpadavaṇṇanā niṭṭhitā.
сураабаанаваг̇г̇о чадто.
Surāpānavaggo chaṭṭho.
