| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༦. སུརཱཔཱནཝགྒོ
6. Surāpānavaggo
༡༠༤. སུརཱམེརཡཔཱནེ པཱཙིཏྟིཡཾ ཀཏྠ པཉྙཏྟནྟི? ཀོསམྦིཡཾ པཉྙཏྟཾ། ཀཾ ཨཱརབྦྷཱཏི? ཨཱཡསྨནྟཾ སཱགཏཾ ཨཱརབྦྷ། ཀིསྨིཾ ཝཏྠུསྨིནྟི? ཨཱཡསྨཱ སཱགཏོ མཛྫཾ པིཝི, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ དྭཱིཧི སམུཊྛཱནེཧི སམུཊྛཱཏི – སིཡཱ ཀཱཡཏོ སམུཊྛཱཏི, ན ཝཱཙཏོ ན ཙིཏྟཏོ; སིཡཱ ཀཱཡཏོ ཙ ཙིཏྟཏོ ཙ སམུཊྛཱཏི, ན ཝཱཙཏོ…པེ॰…།
104. Surāmerayapāne pācittiyaṃ kattha paññattanti? Kosambiyaṃ paññattaṃ. Kaṃ ārabbhāti? Āyasmantaṃ sāgataṃ ārabbha. Kismiṃ vatthusminti? Āyasmā sāgato majjaṃ pivi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca cittato ca samuṭṭhāti, na vācato…pe….
༡༠༥. ཨངྒུལིཔཏོདཀེ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཚབྦགྒིཡེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? ཚབྦགྒིཡཱ བྷིཀྑཱུ བྷིཀྑུཾ ཨངྒུལིཔཏོདཀེན ཧཱསེསུཾ, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛཱཏི – ཀཱཡཏོ ཙ ཙིཏྟཏོ ཙ སམུཊྛཱཏི, ན ཝཱཙཏོ…པེ॰…།
105. Aṅgulipatodake pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhuṃ aṅgulipatodakena hāsesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
༡༠༦. ཨུདཀེ ཧསདྷམྨེ 1 པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? སཏྟརསཝགྒིཡེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? སཏྟརསཝགྒིཡཱ བྷིཀྑཱུ ཨཙིརཝཏིཡཱ ནདིཡཱ ཨུདཀེ ཀཱིལི༹ཾསུ, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛཱཏི – ཀཱཡཏོ ཙ ཙིཏྟཏོ ཙ སམུཊྛཱཏི, ན ཝཱཙཏོ…པེ॰…།
106. Udake hasadhamme 2 pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sattarasavaggiye bhikkhū ārabbha. Kismiṃ vatthusminti? Sattarasavaggiyā bhikkhū aciravatiyā nadiyā udake kīḷiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
༡༠༧. ཨནཱདརིཡེ པཱཙིཏྟིཡཾ ཀཏྠ པཉྙཏྟནྟི? ཀོསམྦིཡཾ པཉྙཏྟཾ། ཀཾ ཨཱརབྦྷཱཏི? ཨཱཡསྨནྟཾ ཚནྣཾ ཨཱརབྦྷ། ཀིསྨིཾ ཝཏྠུསྨིནྟི? ཨཱཡསྨཱ ཚནྣོ ཨནཱདརིཡཾ ཨཀཱསི, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ ཏཱིཧི སམུཊྛཱནེཧི སམུཊྛཱཏི…པེ॰…།
107. Anādariye pācittiyaṃ kattha paññattanti? Kosambiyaṃ paññattaṃ. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo anādariyaṃ akāsi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
༡༠༨. བྷིཀྑུཾ བྷིཾསཱཔེནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཚབྦགྒིཡེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? ཚབྦགྒིཡཱ བྷིཀྑཱུ བྷིཀྑུཾ བྷིཾསཱཔེསུཾ , ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ ཏཱིཧི སམུཊྛཱནེཧི སམུཊྛཱཏི…པེ॰…།
108. Bhikkhuṃ bhiṃsāpentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhuṃ bhiṃsāpesuṃ , tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
༡༠༩. ཛོཏིཾ སམཱདཧིཏྭཱ ཝིསིབྦེནྟསྶ པཱཙིཏྟིཡཾ ཀཏྠ པཉྙཏྟནྟི? བྷགྒེསུ པཉྙཏྟཾ། ཀཾ ཨཱརབྦྷཱཏི? སམྦཧུལེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? སམྦཧུལཱ བྷིཀྑཱུ ཛོཏིཾ སམཱདཧིཏྭཱ ཝིསིབྦེསུཾ, ཏསྨིཾ ཝཏྠུསྨིཾ། ཨེཀཱ པཉྙཏྟི, དྭེ ཨནུཔཉྙཏྟིཡོ། ཚནྣཾ ཨཱཔཏྟིསམུཊྛཱནཱནཾ ཚཧི སམུཊྛཱནེཧི སམུཊྛཱཏི…པེ॰…།
109. Jotiṃ samādahitvā visibbentassa pācittiyaṃ kattha paññattanti? Bhaggesu paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū jotiṃ samādahitvā visibbesuṃ, tasmiṃ vatthusmiṃ. Ekā paññatti, dve anupaññattiyo. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
༡༡༠. ཨོརེནདྡྷམཱསཾ ནཧཱཡནྟསྶ པཱཙིཏྟིཡཾ ཀཏྠ པཉྙཏྟནྟི? རཱཛགཧེ པཉྙཏྟཾ། ཀཾ ཨཱརབྦྷཱཏི? སམྦཧུལེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? སམྦཧུལཱ བྷིཀྑཱུ རཱཛཱནམྤི པསྶིཏྭཱ ན མཏྟཾ ཛཱནིཏྭཱ ནཧཱཡིཾསུ, ཏསྨིཾ ཝཏྠུསྨིཾ། ཨེཀཱ པཉྙཏྟི, ཚ ཨནུཔཉྙཏྟིཡོ། སབྦཏྠཔཉྙཏྟི, པདེསཔཉྙཏྟཱིཏི? པདེསཔཉྙཏྟི། ཚནྣཾ ཨཱཔཏྟིསམུཊྛཱནཱནཾ དྭཱིཧི སམུཊྛཱནེཧི སམུཊྛཱཏི ཨེལ༹ཀལོམཀེ…པེ॰…།
110. Orenaddhamāsaṃ nahāyantassa pācittiyaṃ kattha paññattanti? Rājagahe paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū rājānampi passitvā na mattaṃ jānitvā nahāyiṃsu, tasmiṃ vatthusmiṃ. Ekā paññatti, cha anupaññattiyo. Sabbatthapaññatti, padesapaññattīti? Padesapaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
༡༡༡. ཨནཱདིཡིཏྭཱ ཏིཎྞཾ དུབྦཎྞཀརཎཱནཾ ཨཉྙཏརཾ དུབྦཎྞཀརཎཾ ནཝཾ ཙཱིཝརཾ པརིབྷུཉྫནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? སམྦཧུལེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? སམྦཧུལཱ བྷིཀྑཱུ ཨཏྟནོ ཙཱིཝརཾ ན སཉྫཱནིཾསུ, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ དྭཱིཧི སམུཊྛཱནེཧི སམུཊྛཱཏི ཨེལ༹ཀལོམཀེ…པེ॰…།
111. Anādiyitvā tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ navaṃ cīvaraṃ paribhuñjantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū attano cīvaraṃ na sañjāniṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti eḷakalomake…pe….
༡༡༢. བྷིཀྑུསྶ ཝཱ བྷིཀྑུནིཡཱ ཝཱ སིཀྑམཱནཱཡ ཝཱ སཱམཎེརསྶ ཝཱ སཱམཎེརིཡཱ ཝཱ སཱམཾ ཙཱིཝརཾ ཝིཀཔྤེཏྭཱ ཨཔྤཙྩུདྡྷཱརཎཾ པརིབྷུཉྫནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཨཱཡསྨནྟཾ ཨུཔནནྡཾ སཀྱཔུཏྟཾ ཨཱརབྦྷ། ཀིསྨིཾ ཝཏྠུསྨིནྟི? ཨཱཡསྨཱ ཨུཔནནྡོ སཀྱཔུཏྟོ བྷིཀྑུསྶ སཱམཾ ཙཱིཝརཾ ཝིཀཔྤེཏྭཱ ཨཔྤཙྩུདྡྷཱརཎཾ པརིབྷུཉྫི, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ དྭཱིཧི སམུཊྛཱནེཧི སམུཊྛཱཏི ཀཐིནཀེ…པེ॰…།
112. Bhikkhussa vā bhikkhuniyā vā sikkhamānāya vā sāmaṇerassa vā sāmaṇeriyā vā sāmaṃ cīvaraṃ vikappetvā appaccuddhāraṇaṃ paribhuñjantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto bhikkhussa sāmaṃ cīvaraṃ vikappetvā appaccuddhāraṇaṃ paribhuñji, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
༡༡༣. བྷིཀྑུསྶ པཏྟཾ ཝཱ ཙཱིཝརཾ ཝཱ ནིསཱིདནཾ ཝཱ སཱུཙིགྷརཾ ཝཱ ཀཱཡབནྡྷནཾ ཝཱ ཨཔནིདྷེནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཚབྦགྒིཡེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? ཚབྦགྒིཡཱ བྷིཀྑཱུ བྷིཀྑཱུནཾ པཏྟམྤི ཙཱིཝརམྤི ཨཔནིདྷེསུཾ , ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ ཏཱིཧི སམུཊྛཱནེཧི སམུཊྛཱཏི…པེ॰…།
113. Bhikkhussa pattaṃ vā cīvaraṃ vā nisīdanaṃ vā sūcigharaṃ vā kāyabandhanaṃ vā apanidhentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhūnaṃ pattampi cīvarampi apanidhesuṃ , tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
སུརཱམེརཡཝགྒོ ཚཊྛོ།
Surāmerayavaggo chaṭṭho.
Footnotes:
