| Library / Tipiṭaka / తిపిటక • Tipiṭaka / మిలిన్దపఞ్హపాళి • Milindapañhapāḷi |
౮. సూరియఙ్గపఞ్హో
8. Sūriyaṅgapañho
౮. ‘‘భన్తే నాగసేన, ‘సూరియస్స 1 సత్త అఙ్గాని గహేతబ్బానీ’తి యం వదేసి, కతమాని తాని సత్త అఙ్గాని గహేతబ్బానీ’’తి? ‘‘యథా, మహారాజ, సూరియో సబ్బం ఉదకం పరిసోసేతి, ఏవమేవ ఖో, మహారాజ, యోగినా యోగావచరేన సబ్బకిలేసా అనవసేసం పరిసోసేతబ్బా. ఇదం, మహారాజ, సూరియస్స పఠమం అఙ్గం గహేతబ్బం.
8. ‘‘Bhante nāgasena, ‘sūriyassa 2 satta aṅgāni gahetabbānī’ti yaṃ vadesi, katamāni tāni satta aṅgāni gahetabbānī’’ti? ‘‘Yathā, mahārāja, sūriyo sabbaṃ udakaṃ parisoseti, evameva kho, mahārāja, yoginā yogāvacarena sabbakilesā anavasesaṃ parisosetabbā. Idaṃ, mahārāja, sūriyassa paṭhamaṃ aṅgaṃ gahetabbaṃ.
‘‘పున చపరం, మహారాజ, సూరియో తమన్ధకారం విధమతి, ఏవమేవ ఖో, మహారాజ, యోగినా యోగావచరేన సబ్బం రాగతమం దోసతమం మోహతమం మానతమం దిట్ఠితమం కిలేసతమం సబ్బం దుచ్చరితతమం విధమయితబ్బం. ఇదం, మహారాజ, సూరియస్స దుతియం అఙ్గం గహేతబ్బం.
‘‘Puna caparaṃ, mahārāja, sūriyo tamandhakāraṃ vidhamati, evameva kho, mahārāja, yoginā yogāvacarena sabbaṃ rāgatamaṃ dosatamaṃ mohatamaṃ mānatamaṃ diṭṭhitamaṃ kilesatamaṃ sabbaṃ duccaritatamaṃ vidhamayitabbaṃ. Idaṃ, mahārāja, sūriyassa dutiyaṃ aṅgaṃ gahetabbaṃ.
‘‘పున చపరం, మహారాజ, సూరియో అభిక్ఖణం చరతి, ఏవమేవ ఖో, మహారాజ, యోగినా యోగావచరేన అభిక్ఖణం యోనిసో మనసికారో కాతబ్బో. ఇదం, మహారాజ, సూరియస్స తతియం అఙ్గం గహేతబ్బం.
‘‘Puna caparaṃ, mahārāja, sūriyo abhikkhaṇaṃ carati, evameva kho, mahārāja, yoginā yogāvacarena abhikkhaṇaṃ yoniso manasikāro kātabbo. Idaṃ, mahārāja, sūriyassa tatiyaṃ aṅgaṃ gahetabbaṃ.
‘‘పున చపరం, మహారాజ, సూరియో రంసిమాలీ, ఏవమేవ ఖో, మహారాజ, యోగినా యోగావచరేన ఆరమ్మణమాలినా భవితబ్బం. ఇదం, మహారాజ, సూరియస్స చతుత్థం అఙ్గం గహేతబ్బం.
‘‘Puna caparaṃ, mahārāja, sūriyo raṃsimālī, evameva kho, mahārāja, yoginā yogāvacarena ārammaṇamālinā bhavitabbaṃ. Idaṃ, mahārāja, sūriyassa catutthaṃ aṅgaṃ gahetabbaṃ.
‘‘పున చపరం, మహారాజ, సూరియో మహాజనకాయం సన్తాపేన్తో చరతి, ఏవమేవ ఖో, మహారాజ, యోగినా యోగావచరేన ఆచారసీలగుణవత్తప్పటిపత్తియా ఝానవిమోక్ఖసమాధిసమాపత్తిఇన్ద్రియబలబోజ్ఝఙ్గసతిపట్ఠానసమ్మప్పధానఇద్ధిపాదేహి సదేవకో లోకో సన్తాపయితబ్బో. ఇదం, మహారాజ, సూరియస్స పఞ్చమం అఙ్గం గహేతబ్బం.
‘‘Puna caparaṃ, mahārāja, sūriyo mahājanakāyaṃ santāpento carati, evameva kho, mahārāja, yoginā yogāvacarena ācārasīlaguṇavattappaṭipattiyā jhānavimokkhasamādhisamāpattiindriyabalabojjhaṅgasatipaṭṭhānasammappadhānaiddhipādehi sadevako loko santāpayitabbo. Idaṃ, mahārāja, sūriyassa pañcamaṃ aṅgaṃ gahetabbaṃ.
‘‘పున చపరం, మహారాజ, సూరియో రాహుభయా భీతో చరతి, ఏవమేవ ఖో, మహారాజ, యోగినా యోగావచరేన దుచ్చరితదుగ్గతివిసమకన్తారవిపాకవినిపాతకిలేసజాలజటితే దిట్ఠిసఙ్ఘాటపటిముక్కే కుపథపక్ఖన్దే కుమ్మగ్గపటిపన్నే 3 సత్తే దిస్వా మహతా సంవేగభయేన మానసం సంవేజేతబ్బం. ఇదం, మహారాజ, సూరియస్స ఛట్ఠం అఙ్గం గహేతబ్బం.
‘‘Puna caparaṃ, mahārāja, sūriyo rāhubhayā bhīto carati, evameva kho, mahārāja, yoginā yogāvacarena duccaritaduggativisamakantāravipākavinipātakilesajālajaṭite diṭṭhisaṅghāṭapaṭimukke kupathapakkhande kummaggapaṭipanne 4 satte disvā mahatā saṃvegabhayena mānasaṃ saṃvejetabbaṃ. Idaṃ, mahārāja, sūriyassa chaṭṭhaṃ aṅgaṃ gahetabbaṃ.
‘‘పున చపరం, మహారాజ, సూరియో కల్యాణపాపకే దస్సేతి, ఏవమేవ ఖో, మహారాజ, యోగినా యోగావచరేన ఇన్ద్రియబలబోజ్ఝఙ్గసతిపట్ఠానసమ్మప్పధానఇద్ధిపాదలోకియలోకుత్తరధమ్మా దస్సేతబ్బా. ఇదం, మహారాజ, సూరియస్స సత్తమం అఙ్గం గహేతబ్బం. భాసితమ్పేతం, మహారాజ, థేరేన వఙ్గీసేన –
‘‘Puna caparaṃ, mahārāja, sūriyo kalyāṇapāpake dasseti, evameva kho, mahārāja, yoginā yogāvacarena indriyabalabojjhaṅgasatipaṭṭhānasammappadhānaiddhipādalokiyalokuttaradhammā dassetabbā. Idaṃ, mahārāja, sūriyassa sattamaṃ aṅgaṃ gahetabbaṃ. Bhāsitampetaṃ, mahārāja, therena vaṅgīsena –
‘‘‘యథాపి సూరియో ఉదయన్తో, రూపం దస్సేతి పాణినం;
‘‘‘Yathāpi sūriyo udayanto, rūpaṃ dasseti pāṇinaṃ;
సుచిఞ్చ అసుచిఞ్చాపి, కల్యాణఞ్చాపి పాపకం.
Suciñca asuciñcāpi, kalyāṇañcāpi pāpakaṃ.
‘‘‘తథా భిక్ఖు ధమ్మధరో, అవిజ్జాపిహితం జనం;
‘‘‘Tathā bhikkhu dhammadharo, avijjāpihitaṃ janaṃ;
పథం దస్సేతి వివిధం, ఆదిచ్చోవుదయం యథా’’’తి.
Pathaṃ dasseti vividhaṃ, ādiccovudayaṃ yathā’’’ti.
సూరియఙ్గపఞ్హో అట్ఠమో.
Sūriyaṅgapañho aṭṭhamo.
Footnotes:
