| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༨. སཱུརིཡངྒཔཉྷོ
8. Sūriyaṅgapañho
༨. ‘‘བྷནྟེ ནཱགསེན, ‘སཱུརིཡསྶ 1 སཏྟ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི སཏྟ ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, སཱུརིཡོ སབྦཾ ཨུདཀཾ པརིསོསེཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སབྦཀིལེསཱ ཨནཝསེསཾ པརིསོསེཏབྦཱ། ཨིདཾ, མཧཱརཱཛ, སཱུརིཡསྶ པཋམཾ ཨངྒཾ གཧེཏབྦཾ།
8. ‘‘Bhante nāgasena, ‘sūriyassa 2 satta aṅgāni gahetabbānī’ti yaṃ vadesi, katamāni tāni satta aṅgāni gahetabbānī’’ti? ‘‘Yathā, mahārāja, sūriyo sabbaṃ udakaṃ parisoseti, evameva kho, mahārāja, yoginā yogāvacarena sabbakilesā anavasesaṃ parisosetabbā. Idaṃ, mahārāja, sūriyassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱུརིཡོ ཏམནྡྷཀཱརཾ ཝིདྷམཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སབྦཾ རཱགཏམཾ དོསཏམཾ མོཧཏམཾ མཱནཏམཾ དིཊྛིཏམཾ ཀིལེསཏམཾ སབྦཾ དུཙྩརིཏཏམཾ ཝིདྷམཡིཏབྦཾ། ཨིདཾ, མཧཱརཱཛ, སཱུརིཡསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, sūriyo tamandhakāraṃ vidhamati, evameva kho, mahārāja, yoginā yogāvacarena sabbaṃ rāgatamaṃ dosatamaṃ mohatamaṃ mānatamaṃ diṭṭhitamaṃ kilesatamaṃ sabbaṃ duccaritatamaṃ vidhamayitabbaṃ. Idaṃ, mahārāja, sūriyassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱུརིཡོ ཨབྷིཀྑཎཾ ཙརཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨབྷིཀྑཎཾ ཡོནིསོ མནསིཀཱརོ ཀཱཏབྦོ། ཨིདཾ, མཧཱརཱཛ, སཱུརིཡསྶ ཏཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, sūriyo abhikkhaṇaṃ carati, evameva kho, mahārāja, yoginā yogāvacarena abhikkhaṇaṃ yoniso manasikāro kātabbo. Idaṃ, mahārāja, sūriyassa tatiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱུརིཡོ རཾསིམཱལཱི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཱརམྨཎམཱལིནཱ བྷཝིཏབྦཾ། ཨིདཾ, མཧཱརཱཛ, སཱུརིཡསྶ ཙཏུཏྠཾ ཨངྒཾ གཧེཏབྦཾ།
‘‘Puna caparaṃ, mahārāja, sūriyo raṃsimālī, evameva kho, mahārāja, yoginā yogāvacarena ārammaṇamālinā bhavitabbaṃ. Idaṃ, mahārāja, sūriyassa catutthaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱུརིཡོ མཧཱཛནཀཱཡཾ སནྟཱཔེནྟོ ཙརཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཱཙཱརསཱིལགུཎཝཏྟཔྤཊིཔཏྟིཡཱ ཛྷཱནཝིམོཀྑསམཱདྷིསམཱཔཏྟིཨིནྡྲིཡབལབོཛ྄ཛྷངྒསཏིཔཊྛཱནསམྨཔྤདྷཱནཨིདྡྷིཔཱདེཧི སདེཝཀོ ལོཀོ སནྟཱཔཡིཏབྦོ། ཨིདཾ, མཧཱརཱཛ, སཱུརིཡསྶ པཉྩམཾ ཨངྒཾ གཧེཏབྦཾ།
‘‘Puna caparaṃ, mahārāja, sūriyo mahājanakāyaṃ santāpento carati, evameva kho, mahārāja, yoginā yogāvacarena ācārasīlaguṇavattappaṭipattiyā jhānavimokkhasamādhisamāpattiindriyabalabojjhaṅgasatipaṭṭhānasammappadhānaiddhipādehi sadevako loko santāpayitabbo. Idaṃ, mahārāja, sūriyassa pañcamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱུརིཡོ རཱཧུབྷཡཱ བྷཱིཏོ ཙརཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན དུཙྩརིཏདུགྒཏིཝིསམཀནྟཱརཝིཔཱཀཝིནིཔཱཏཀིལེསཛཱལཛཊིཏེ དིཊྛིསངྒྷཱཊཔཊིམུཀྐེ ཀུཔཐཔཀྑནྡེ ཀུམྨགྒཔཊིཔནྣེ 3 སཏྟེ དིསྭཱ མཧཏཱ སཾཝེགབྷཡེན མཱནསཾ སཾཝེཛེཏབྦཾ། ཨིདཾ, མཧཱརཱཛ, སཱུརིཡསྶ ཚཊྛཾ ཨངྒཾ གཧེཏབྦཾ།
‘‘Puna caparaṃ, mahārāja, sūriyo rāhubhayā bhīto carati, evameva kho, mahārāja, yoginā yogāvacarena duccaritaduggativisamakantāravipākavinipātakilesajālajaṭite diṭṭhisaṅghāṭapaṭimukke kupathapakkhande kummaggapaṭipanne 4 satte disvā mahatā saṃvegabhayena mānasaṃ saṃvejetabbaṃ. Idaṃ, mahārāja, sūriyassa chaṭṭhaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱུརིཡོ ཀལྱཱཎཔཱཔཀེ དསྶེཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨིནྡྲིཡབལབོཛ྄ཛྷངྒསཏིཔཊྛཱནསམྨཔྤདྷཱནཨིདྡྷིཔཱདལོཀིཡལོཀུཏྟརདྷམྨཱ དསྶེཏབྦཱ། ཨིདཾ, མཧཱརཱཛ, སཱུརིཡསྶ སཏྟམཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, ཐེརེན ཝངྒཱིསེན –
‘‘Puna caparaṃ, mahārāja, sūriyo kalyāṇapāpake dasseti, evameva kho, mahārāja, yoginā yogāvacarena indriyabalabojjhaṅgasatipaṭṭhānasammappadhānaiddhipādalokiyalokuttaradhammā dassetabbā. Idaṃ, mahārāja, sūriyassa sattamaṃ aṅgaṃ gahetabbaṃ. Bhāsitampetaṃ, mahārāja, therena vaṅgīsena –
‘‘‘ཡཐཱཔི སཱུརིཡོ ཨུདཡནྟོ, རཱུཔཾ དསྶེཏི པཱཎིནཾ།
‘‘‘Yathāpi sūriyo udayanto, rūpaṃ dasseti pāṇinaṃ;
སུཙིཉྩ ཨསུཙིཉྩཱཔི, ཀལྱཱཎཉྩཱཔི པཱཔཀཾ༎
Suciñca asuciñcāpi, kalyāṇañcāpi pāpakaṃ.
‘‘‘ཏཐཱ བྷིཀྑུ དྷམྨདྷརོ, ཨཝིཛྫཱཔིཧིཏཾ ཛནཾ།
‘‘‘Tathā bhikkhu dhammadharo, avijjāpihitaṃ janaṃ;
པཐཾ དསྶེཏི ཝིཝིདྷཾ, ཨཱདིཙྩོཝུདཡཾ ཡཐཱ’’’ཏི༎
Pathaṃ dasseti vividhaṃ, ādiccovudayaṃ yathā’’’ti.
སཱུརིཡངྒཔཉྷོ ཨཊྛམོ།
Sūriyaṅgapañho aṭṭhamo.
Footnotes:
