| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. ஸூரியஸுத்தவண்ணனா
10. Sūriyasuttavaṇṇanā
91. த³ஸமே ஸூரியோதி ஸூரியவிமானவாஸீ தே³வபுத்தோ. அந்த⁴காரேதி சக்கு²விஞ்ஞாணுப்பத்தினிவாரணேன அந்த⁴பா⁴வகரணே. விரோசதீதி வேரோசனோ. மண்ட³லீதி மண்ட³லஸண்டா²னோ. மா, ராஹு, கி³லீ சரமந்தலிக்கே²தி அந்தலிக்கே² சரங் ஸூரியங், ராஹு, மா கி³லீதி வத³தி. கிங் பனேஸ தங் கி³லதீதி ? ஆம, கி³லதி. ராஹுஸ்ஸ ஹி அத்தபா⁴வோ மஹா, உச்சத்தனேன அட்ட²யோஜனஸதாதி⁴கானி சத்தாரி யோஜனஸஹஸ்ஸானி, பா³ஹந்தரமஸ்ஸ த்³வாத³ஸயோஜனஸதானி, ப³ஹலத்தேன ச² யோஜனஸதானி, ஸீஸங் நவ யோஜனஸதங், நலாடங் தியோஜனஸதங், ப⁴முகந்தரங் பண்ணாஸயோஜனங், முக²ங் த்³வியோஜனஸதங், கா⁴னங் தியோஜனஸதங், முகா²தா⁴னங் தியோஜனஸதக³ம்பீ⁴ரங் ஹத்த²தலபாத³தலானி புது²லதோ த்³வியோஜனஸதானி . அங்கு³லிபப்³பா³னி பண்ணாஸ யோஜனானி. ஸோ சந்தி³மஸூரியே விரோசமானே தி³ஸ்வா இஸ்ஸாபகதோ தேஸங் க³மனவீதி²ங் ஓதரித்வா முக²ங் விவரித்வா திட்ட²தி. சந்த³விமானங் ஸூரியவிமானங் வா தியோஜனஸதிகே மஹானரகே பக்கி²த்தங் விய ஹோதி. விமானே அதி⁴வத்தா² தே³வதா மரணப⁴யதஜ்ஜிதா ஏகப்பஹாரேனேவ விரவந்தி. ஸோ பன விமானங் கதா³சி ஹத்தே²ன சா²தே³தி, கதா³சி ஹனுகஸ்ஸ ஹெட்டா² பக்கி²பதி, கதா³சி ஜிவ்ஹாய பரிமஜ்ஜதி, கதா³சி அவக³ண்ட³காரகங் பு⁴ஞ்ஜந்தோ விய கபோலந்தரே ட²பேதி. வேக³ங் பன வாரேதுங் ந ஸக்கோதி. ஸசே வாரெஸ்ஸாமீதி க³ண்ட³கங் கத்வா திட்டெ²ய்ய, மத்த²கங் தஸ்ஸ பி⁴ந்தி³த்வா நிக்க²மெய்ய, ஆகட்³டி⁴த்வா வா நங் ஓனமெய்ய. தஸ்மா விமானேன ஸஹேவ க³ச்ச²தி. பஜங் மமந்தி சந்தி³மஸூரியா கிர த்³வேபி தே³வபுத்தா மஹாஸமயஸுத்தகத²னதி³வஸே ஸோதாபத்திப²லங் பத்தா. தேன ப⁴க³வா ‘‘பஜங் மம’’ந்தி ஆஹ, புத்தோ மம ஏஸோதி அத்தோ². த³ஸமங்.
91. Dasame sūriyoti sūriyavimānavāsī devaputto. Andhakāreti cakkhuviññāṇuppattinivāraṇena andhabhāvakaraṇe. Virocatīti verocano. Maṇḍalīti maṇḍalasaṇṭhāno. Mā, rāhu, gilī caramantalikkheti antalikkhe caraṃ sūriyaṃ, rāhu, mā gilīti vadati. Kiṃ panesa taṃ gilatīti ? Āma, gilati. Rāhussa hi attabhāvo mahā, uccattanena aṭṭhayojanasatādhikāni cattāri yojanasahassāni, bāhantaramassa dvādasayojanasatāni, bahalattena cha yojanasatāni, sīsaṃ nava yojanasataṃ, nalāṭaṃ tiyojanasataṃ, bhamukantaraṃ paṇṇāsayojanaṃ, mukhaṃ dviyojanasataṃ, ghānaṃ tiyojanasataṃ, mukhādhānaṃ tiyojanasatagambhīraṃ hatthatalapādatalāni puthulato dviyojanasatāni . Aṅgulipabbāni paṇṇāsa yojanāni. So candimasūriye virocamāne disvā issāpakato tesaṃ gamanavīthiṃ otaritvā mukhaṃ vivaritvā tiṭṭhati. Candavimānaṃ sūriyavimānaṃ vā tiyojanasatike mahānarake pakkhittaṃ viya hoti. Vimāne adhivatthā devatā maraṇabhayatajjitā ekappahāreneva viravanti. So pana vimānaṃ kadāci hatthena chādeti, kadāci hanukassa heṭṭhā pakkhipati, kadāci jivhāya parimajjati, kadāci avagaṇḍakārakaṃ bhuñjanto viya kapolantare ṭhapeti. Vegaṃ pana vāretuṃ na sakkoti. Sace vāressāmīti gaṇḍakaṃ katvā tiṭṭheyya, matthakaṃ tassa bhinditvā nikkhameyya, ākaḍḍhitvā vā naṃ onameyya. Tasmā vimānena saheva gacchati. Pajaṃ mamanti candimasūriyā kira dvepi devaputtā mahāsamayasuttakathanadivase sotāpattiphalaṃ pattā. Tena bhagavā ‘‘pajaṃ mama’’nti āha, putto mama esoti attho. Dasamaṃ.
பட²மோ வக்³கோ³.
Paṭhamo vaggo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ஸூரியஸுத்தங் • 10. Sūriyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ஸூரியஸுத்தவண்ணனா • 10. Sūriyasuttavaṇṇanā
