| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
9. ஸூரியதபனபஞ்ஹோ
9. Sūriyatapanapañho
9. ‘‘ப⁴ந்தே நாக³ஸேன, அயங் ஸூரியோ ஸப்³ப³காலங் கடி²னங் தபதி, உதா³ஹு கிஞ்சிகாலங் மந்த³ங் தபதீ’’தி? ‘‘ஸப்³ப³காலங், மஹாராஜ, ஸூரியோ கடி²னங் தபதி , ந கிஞ்சிகாலங் மந்த³ங் தபதீ’’தி. ‘‘யதி³, ப⁴ந்தே நாக³ஸேன, ஸூரியோ ஸப்³ப³காலங் கடி²னங் தபதி, கிஸ்ஸ பன அப்பேகதா³ ஸூரியோ கடி²னங் தபதி, அப்பேகதா³ மந்த³ங் தபதீ’’தி? ‘‘சத்தாரோமே, மஹாராஜ, ஸூரியஸ்ஸ ரோகா³, யேஸங் அஞ்ஞதரேன ரோகே³ன படிபீளிதோ ஸூரியோ மந்த³ங் தபதி. கதமே சத்தாரோ? அப்³ப⁴ங், மஹாராஜ, ஸூரியஸ்ஸ ரோகோ³, தேன ரோகே³ன படிபீளிதோ ஸூரியோ மந்த³ங் தபதி. மஹிகா, மஹாராஜ, ஸூரியஸ்ஸ ரோகோ³, தேன ரோகே³ன படிபீளிதோ ஸூரியோ மந்த³ங் தபதி. மேகோ⁴, மஹாராஜ, ஸூரியஸ்ஸ ரோகோ³, தேன ரோகே³ன படிபீளிதோ ஸூரியோ மந்த³ங் தபதி. ராஹு, மஹாராஜ, ஸூரியஸ்ஸ ரோகோ³, தேன ரோகே³ன படிபீளிதோ ஸூரியோ மந்த³ங் தபதி. இமே கோ², மஹாராஜ, சத்தாரோ ஸூரியஸ்ஸ ரோகா³, யேஸங் அஞ்ஞதரேன ரோகே³ன படிபீளிதோ ஸூரியோ மந்த³ங் தபதீ’’தி. ‘‘அச்ச²ரியங், ப⁴ந்தே நாக³ஸேன, அப்³பு⁴தங், ப⁴ந்தே நாக³ஸேன, ஸூரியஸ்ஸபி தாவ தேஜோஸம்பன்னஸ்ஸ ரோகோ³ உப்பஜ்ஜிஸ்ஸதி, கிமங்க³ங் பன அஞ்ஞேஸங் ஸத்தானங், நத்தி², ப⁴ந்தே, ஏஸா விப⁴த்தி அஞ்ஞஸ்ஸ அஞ்ஞத்ர தவாதி³ஸேன பு³த்³தி⁴மதா’’தி.
9. ‘‘Bhante nāgasena, ayaṃ sūriyo sabbakālaṃ kaṭhinaṃ tapati, udāhu kiñcikālaṃ mandaṃ tapatī’’ti? ‘‘Sabbakālaṃ, mahārāja, sūriyo kaṭhinaṃ tapati , na kiñcikālaṃ mandaṃ tapatī’’ti. ‘‘Yadi, bhante nāgasena, sūriyo sabbakālaṃ kaṭhinaṃ tapati, kissa pana appekadā sūriyo kaṭhinaṃ tapati, appekadā mandaṃ tapatī’’ti? ‘‘Cattārome, mahārāja, sūriyassa rogā, yesaṃ aññatarena rogena paṭipīḷito sūriyo mandaṃ tapati. Katame cattāro? Abbhaṃ, mahārāja, sūriyassa rogo, tena rogena paṭipīḷito sūriyo mandaṃ tapati. Mahikā, mahārāja, sūriyassa rogo, tena rogena paṭipīḷito sūriyo mandaṃ tapati. Megho, mahārāja, sūriyassa rogo, tena rogena paṭipīḷito sūriyo mandaṃ tapati. Rāhu, mahārāja, sūriyassa rogo, tena rogena paṭipīḷito sūriyo mandaṃ tapati. Ime kho, mahārāja, cattāro sūriyassa rogā, yesaṃ aññatarena rogena paṭipīḷito sūriyo mandaṃ tapatī’’ti. ‘‘Acchariyaṃ, bhante nāgasena, abbhutaṃ, bhante nāgasena, sūriyassapi tāva tejosampannassa rogo uppajjissati, kimaṅgaṃ pana aññesaṃ sattānaṃ, natthi, bhante, esā vibhatti aññassa aññatra tavādisena buddhimatā’’ti.
ஸூரியதபனபஞ்ஹோ நவமோ.
Sūriyatapanapañho navamo.
