| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
6. ஸுருஸுருவக்³க³வண்ணனா
6. Surusuruvaggavaṇṇanā
627. ஸுருஸுருகாரகந்தி ஸுருஸுரூதி ஏவங் ஸத்³த³ங் கத்வா கத்வா. த³வோதி பரிஹாஸவசனங்; தங் யேன கேனசி பரியாயேன ‘‘கிங் பு³த்³தோ⁴ , ஸிலகபு³த்³தோ⁴, படிபு³த்³தோ⁴; கிங் த⁴ம்மோ, கோ³த⁴ம்மோ, அஜத⁴ம்மோ; கிங் ஸங்கோ⁴, மிக³ஸங்கோ⁴, பஸுஸங்கோ⁴’’திஆதி³னா நயேன தீணி ரதனானி ஆரப்³ப⁴ ந காதப்³ப³ந்தி அத்தோ².
627.Surusurukārakanti surusurūti evaṃ saddaṃ katvā katvā. Davoti parihāsavacanaṃ; taṃ yena kenaci pariyāyena ‘‘kiṃ buddho , silakabuddho, paṭibuddho; kiṃ dhammo, godhammo, ajadhammo; kiṃ saṅgho, migasaṅgho, pasusaṅgho’’tiādinā nayena tīṇi ratanāni ārabbha na kātabbanti attho.
628. ஹத்த²னில்லேஹகந்தி ஹத்த²ங் நில்லேஹித்வா நில்லேஹித்வா. பு⁴ஞ்ஜந்தேன ஹி அங்கு³லிமத்தம்பி நில்லேஹிதுங் ந வட்டதி. க⁴னயாகு³பா²ணிதபாயாஸாதி³கே பன அங்கு³லீஹி க³ஹெத்வா அங்கு³லியோ முகே² பவேஸெத்வா பு⁴ஞ்ஜிதுங் வட்டதி. பத்தனில்லேஹகஒட்ட²னில்லேஹகேஸுபி ஏஸேவ நயோ. தஸ்மா ஏகங்கு³லியாபி பத்தோ ந நில்லேஹிதப்³போ³, ஏகஒட்டோ²பி ஜிவ்ஹாய ந நில்லேஹிதப்³போ³, ஒட்ட²மங்ஸேஹி ஏவ பன க³ஹெத்வா அந்தோ பவேஸேதுங் வட்டதி.
628.Hatthanillehakanti hatthaṃ nillehitvā nillehitvā. Bhuñjantena hi aṅgulimattampi nillehituṃ na vaṭṭati. Ghanayāguphāṇitapāyāsādike pana aṅgulīhi gahetvā aṅguliyo mukhe pavesetvā bhuñjituṃ vaṭṭati. Pattanillehakaoṭṭhanillehakesupi eseva nayo. Tasmā ekaṅguliyāpi patto na nillehitabbo, ekaoṭṭhopi jivhāya na nillehitabbo, oṭṭhamaṃsehi eva pana gahetvā anto pavesetuṃ vaṭṭati.
631. கோகனதே³தி ஏவங்னாமகே. கோகனத³ந்தி பது³மங் வுச்சதி, ஸோ ச பாஸாதோ³ பது³மஸண்டா²னோ, தேனஸ்ஸ கோகனதொ³த்வேவ நாமங் அகங்ஸு. ந ஸாமிஸேன ஹத்தே²ன பானீயதா²லகந்தி ஏதங் படிக்கூலவஸேன படிக்கி²த்தங், தஸ்மா ஸங்கி⁴கம்பி புக்³க³லிகம்பி கி³ஹிஸந்தகம்பி அத்தனோ ஸந்தகம்பி ஸங்க²ம்பி ஸராவம்பி தா²லகம்பி ந க³ஹேதப்³ப³மேவ, க³ண்ஹந்தஸ்ஸ து³க்கடங். ஸசே பன ஹத்த²ஸ்ஸ ஏகதே³ஸோ ஆமிஸமக்கி²தோ ந ஹோதி, தேன பதே³ஸேன க³ஹேதுங் வட்டதி.
631.Kokanadeti evaṃnāmake. Kokanadanti padumaṃ vuccati, so ca pāsādo padumasaṇṭhāno, tenassa kokanadotveva nāmaṃ akaṃsu. Na sāmisena hatthena pānīyathālakanti etaṃ paṭikkūlavasena paṭikkhittaṃ, tasmā saṅghikampi puggalikampi gihisantakampi attano santakampi saṅkhampi sarāvampi thālakampi na gahetabbameva, gaṇhantassa dukkaṭaṃ. Sace pana hatthassa ekadeso āmisamakkhito na hoti, tena padesena gahetuṃ vaṭṭati.
632. உத்³த⁴ரித்வா வாதி ஸித்தா²னி உத³கதோ உத்³த⁴ரித்வா ஏகஸ்மிங் டா²னே ராஸிங் கத்வா உத³கங் ச²ட்³டே³தி. பி⁴ந்தி³த்வா வாதி ஸித்தா²னி பி⁴ந்தி³த்வா உத³கக³திகானி கத்வா ச²ட்³டே³தி. படிக்³க³ஹே வாதி படிக்³க³ஹேன படிச்ச²ந்தோ நங் படிக்³க³ஹே ச²ட்³டே³தி. நீஹரித்வாதி ப³ஹி நீஹரித்வா ச²ட்³டே³தி; ஏவங் ச²ட்³டெ³ந்தஸ்ஸ அனாபத்தி.
632.Uddharitvā vāti sitthāni udakato uddharitvā ekasmiṃ ṭhāne rāsiṃ katvā udakaṃ chaḍḍeti. Bhinditvā vāti sitthāni bhinditvā udakagatikāni katvā chaḍḍeti. Paṭiggahe vāti paṭiggahena paṭicchanto naṃ paṭiggahe chaḍḍeti. Nīharitvāti bahi nīharitvā chaḍḍeti; evaṃ chaḍḍentassa anāpatti.
634. ஸேதச்ச²த்தந்தி வத்த²பலிகு³ண்டி²தங் பண்ட³ரச்ச²த்தங். கிலஞ்ஜச்ச²த்தந்தி விலீவச்ச²த்தங். பண்ணச்ச²த்தந்தி தாலபண்ணாதீ³ஹி யேஹி கேஹிசி கதங். மண்ட³லப³த்³த⁴ங் ஸலாகப³த்³த⁴ந்தி இத³ங் பன திண்ணம்பி ச²த்தானங் பஞ்ஜரத³ஸ்ஸனத்த²ங் வுத்தங். தானி ஹி மண்ட³லப³த்³தா⁴னி சேவ ஹொந்தி ஸலாகப³த்³தா⁴னி ச. யம்பி தத்த²ஜாதகத³ண்ட³கேன கதங் ஏகபண்ணச்ச²த்தங் ஹோதி, தம்பி ச²த்தமேவ. ஏதேஸு யங்கிஞ்சி ச²த்தங் பாணிம்ஹி அஸ்ஸாதி ச²த்தபாணி. ஸோ தங் ச²த்தங் தா⁴ரயமானோ வா அங்ஸே வா கத்வா ஊரும்ஹி வா ட²பெத்வா யாவ ஹத்தே²ன ந முச்சதி, தாவஸ்ஸ த⁴ம்மங் தே³ஸேதுங் ந வட்டதி, தே³ஸெந்தஸ்ஸ வுத்தனயேன து³க்கடங். ஸசே பனஸ்ஸ அஞ்ஞோ ச²த்தங் தா⁴ரேதி, ச²த்தபாது³காய வா டி²தங் ஹோதி, ஹத்த²தோ அபக³தமத்தே ச²த்தபாணி நாம ந ஹோதி. தஸ்ஸ த⁴ம்மங் தே³ஸேதுங் வட்டதி. த⁴ம்மபரிச்சே²தோ³ பனெத்த² பத³ஸோத⁴ம்மே வுத்தனயேனேவ வேதி³தப்³போ³.
634.Setacchattanti vatthapaliguṇṭhitaṃ paṇḍaracchattaṃ. Kilañjacchattanti vilīvacchattaṃ. Paṇṇacchattanti tālapaṇṇādīhi yehi kehici kataṃ. Maṇḍalabaddhaṃ salākabaddhanti idaṃ pana tiṇṇampi chattānaṃ pañjaradassanatthaṃ vuttaṃ. Tāni hi maṇḍalabaddhāni ceva honti salākabaddhāni ca. Yampi tatthajātakadaṇḍakena kataṃ ekapaṇṇacchattaṃ hoti, tampi chattameva. Etesu yaṃkiñci chattaṃ pāṇimhi assāti chattapāṇi. So taṃ chattaṃ dhārayamāno vā aṃse vā katvā ūrumhi vā ṭhapetvā yāva hatthena na muccati, tāvassa dhammaṃ desetuṃ na vaṭṭati, desentassa vuttanayena dukkaṭaṃ. Sace panassa añño chattaṃ dhāreti, chattapādukāya vā ṭhitaṃ hoti, hatthato apagatamatte chattapāṇi nāma na hoti. Tassa dhammaṃ desetuṃ vaṭṭati. Dhammaparicchedo panettha padasodhamme vuttanayeneva veditabbo.
635. த³ண்ட³பாணிஸ்ஸாதி எத்த² த³ண்டோ³ நாம மஜ்ஜி²மஸ்ஸ புரிஸஸ்ஸ சதுஹத்த²ப்பமாணோ த³ண்ட³பாணிபா⁴வோ பனஸ்ஸ ச²த்தபாணிம்ஹி வுத்தனயேனேவ வேதி³தப்³போ³.
635.Daṇḍapāṇissāti ettha daṇḍo nāma majjhimassa purisassa catuhatthappamāṇo daṇḍapāṇibhāvo panassa chattapāṇimhi vuttanayeneva veditabbo.
636. ஸத்த²பாணிம்ஹிபி ஏஸேவ நயோ. அஸிங் ஸன்னஹித்வா டி²தோபி ஹி ஸத்த²பாணிஸங்க்²யங் ந க³ச்ச²தி.
636.Satthapāṇimhipi eseva nayo. Asiṃ sannahitvā ṭhitopi hi satthapāṇisaṅkhyaṃ na gacchati.
637. ஆவுத⁴பாணிஸ்ஸாதி எத்த² கிஞ்சாபி வுத்தங் – ‘‘ஆவுத⁴ங் நாம சாபோ கோத³ண்டோ³’’தி, அத² கோ² ஸப்³பா³பி த⁴னுவிகதி ஸத்³தி⁴ங் ஸரவிகதியா ஆவுத⁴ந்தி வேதி³தப்³ப³ங். தஸ்மா ஸத்³தி⁴ங் வா ஸரேன த⁴னுங் க³ஹெத்வா ஸுத்³த⁴த⁴னுங் வா ஸுத்³த⁴ஸரங் வா ஸஜியத⁴னுங் வா நிஜ்ஜியத⁴னுங் வா க³ஹெத்வா டி²தஸ்ஸ வா நிஸின்னஸ்ஸ வா த⁴ம்மோ தே³ஸேதுங் ந வட்டதி. ஸசே பனஸ்ஸ த⁴னுங் கண்டே²பி படிமுக்கங் ஹோதி, யாவ ஹத்தே²ன ந க³ண்ஹாதி, தாவ த⁴ம்மங் தே³ஸேதுங் வட்டதியேவாதி.
637.Āvudhapāṇissāti ettha kiñcāpi vuttaṃ – ‘‘āvudhaṃ nāma cāpo kodaṇḍo’’ti, atha kho sabbāpi dhanuvikati saddhiṃ saravikatiyā āvudhanti veditabbaṃ. Tasmā saddhiṃ vā sarena dhanuṃ gahetvā suddhadhanuṃ vā suddhasaraṃ vā sajiyadhanuṃ vā nijjiyadhanuṃ vā gahetvā ṭhitassa vā nisinnassa vā dhammo desetuṃ na vaṭṭati. Sace panassa dhanuṃ kaṇṭhepi paṭimukkaṃ hoti, yāva hatthena na gaṇhāti, tāva dhammaṃ desetuṃ vaṭṭatiyevāti.
ச²ட்டோ² வக்³கோ³.
Chaṭṭho vaggo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. ஸுருஸுருவக்³கோ³ • 6. Surusuruvaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. ஸுருஸுருவக்³க³வண்ணனா • 6. Surusuruvaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. ஸுருஸுருவக்³க³வண்ணனா • 6. Surusuruvaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. ஸுருஸுருவக்³க³வண்ணனா • 6. Surusuruvaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. ஸுருஸுருவக்³க³-அத்த²யோஜனா • 6. Surusuruvagga-atthayojanā
