| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৬. সুরুসুরুৰগ্গৰণ্ণনা
6. Surusuruvaggavaṇṇanā
৬২৭. সুরুসুরুকারকন্তি সুরুসুরূতি এৰং সদ্দং কত্ৰা কত্ৰা। দৰোতি পরিহাসৰচনং; তং যেন কেনচি পরিযাযেন ‘‘কিং বুদ্ধো , সিলকবুদ্ধো, পটিবুদ্ধো; কিং ধম্মো, গোধম্মো, অজধম্মো; কিং সঙ্ঘো, মিগসঙ্ঘো, পসুসঙ্ঘো’’তিআদিনা নযেন তীণি রতনানি আরব্ভ ন কাতব্বন্তি অত্থো।
627.Surusurukārakanti surusurūti evaṃ saddaṃ katvā katvā. Davoti parihāsavacanaṃ; taṃ yena kenaci pariyāyena ‘‘kiṃ buddho , silakabuddho, paṭibuddho; kiṃ dhammo, godhammo, ajadhammo; kiṃ saṅgho, migasaṅgho, pasusaṅgho’’tiādinā nayena tīṇi ratanāni ārabbha na kātabbanti attho.
৬২৮. হত্থনিল্লেহকন্তি হত্থং নিল্লেহিত্ৰা নিল্লেহিত্ৰা। ভুঞ্জন্তেন হি অঙ্গুলিমত্তম্পি নিল্লেহিতুং ন ৰট্টতি। ঘনযাগুফাণিতপাযাসাদিকে পন অঙ্গুলীহি গহেত্ৰা অঙ্গুলিযো মুখে পৰেসেত্ৰা ভুঞ্জিতুং ৰট্টতি। পত্তনিল্লেহকওট্ঠনিল্লেহকেসুপি এসেৰ নযো। তস্মা একঙ্গুলিযাপি পত্তো ন নিল্লেহিতব্বো, একওট্ঠোপি জিৰ্হায ন নিল্লেহিতব্বো, ওট্ঠমংসেহি এৰ পন গহেত্ৰা অন্তো পৰেসেতুং ৰট্টতি।
628.Hatthanillehakanti hatthaṃ nillehitvā nillehitvā. Bhuñjantena hi aṅgulimattampi nillehituṃ na vaṭṭati. Ghanayāguphāṇitapāyāsādike pana aṅgulīhi gahetvā aṅguliyo mukhe pavesetvā bhuñjituṃ vaṭṭati. Pattanillehakaoṭṭhanillehakesupi eseva nayo. Tasmā ekaṅguliyāpi patto na nillehitabbo, ekaoṭṭhopi jivhāya na nillehitabbo, oṭṭhamaṃsehi eva pana gahetvā anto pavesetuṃ vaṭṭati.
৬৩১. কোকনদেতি এৰংনামকে। কোকনদন্তি পদুমং ৰুচ্চতি, সো চ পাসাদো পদুমসণ্ঠানো, তেনস্স কোকনদোত্ৰেৰ নামং অকংসু। ন সামিসেন হত্থেন পানীযথালকন্তি এতং পটিক্কূলৰসেন পটিক্খিত্তং, তস্মা সঙ্ঘিকম্পি পুগ্গলিকম্পি গিহিসন্তকম্পি অত্তনো সন্তকম্পি সঙ্খম্পি সরাৰম্পি থালকম্পি ন গহেতব্বমেৰ, গণ্হন্তস্স দুক্কটং। সচে পন হত্থস্স একদেসো আমিসমক্খিতো ন হোতি, তেন পদেসেন গহেতুং ৰট্টতি।
631.Kokanadeti evaṃnāmake. Kokanadanti padumaṃ vuccati, so ca pāsādo padumasaṇṭhāno, tenassa kokanadotveva nāmaṃ akaṃsu. Na sāmisena hatthena pānīyathālakanti etaṃ paṭikkūlavasena paṭikkhittaṃ, tasmā saṅghikampi puggalikampi gihisantakampi attano santakampi saṅkhampi sarāvampi thālakampi na gahetabbameva, gaṇhantassa dukkaṭaṃ. Sace pana hatthassa ekadeso āmisamakkhito na hoti, tena padesena gahetuṃ vaṭṭati.
৬৩২. উদ্ধরিত্ৰা ৰাতি সিত্থানি উদকতো উদ্ধরিত্ৰা একস্মিং ঠানে রাসিং কত্ৰা উদকং ছড্ডেতি। ভিন্দিত্ৰা ৰাতি সিত্থানি ভিন্দিত্ৰা উদকগতিকানি কত্ৰা ছড্ডেতি। পটিগ্গহে ৰাতি পটিগ্গহেন পটিচ্ছন্তো নং পটিগ্গহে ছড্ডেতি। নীহরিত্ৰাতি বহি নীহরিত্ৰা ছড্ডেতি; এৰং ছড্ডেন্তস্স অনাপত্তি।
632.Uddharitvā vāti sitthāni udakato uddharitvā ekasmiṃ ṭhāne rāsiṃ katvā udakaṃ chaḍḍeti. Bhinditvā vāti sitthāni bhinditvā udakagatikāni katvā chaḍḍeti. Paṭiggahe vāti paṭiggahena paṭicchanto naṃ paṭiggahe chaḍḍeti. Nīharitvāti bahi nīharitvā chaḍḍeti; evaṃ chaḍḍentassa anāpatti.
৬৩৪. সেতচ্ছত্তন্তি ৰত্থপলিগুণ্ঠিতং পণ্ডরচ্ছত্তং। কিলঞ্জচ্ছত্তন্তি ৰিলীৰচ্ছত্তং। পণ্ণচ্ছত্তন্তি তালপণ্ণাদীহি যেহি কেহিচি কতং। মণ্ডলবদ্ধং সলাকবদ্ধন্তি ইদং পন তিণ্ণম্পি ছত্তানং পঞ্জরদস্সনত্থং ৰুত্তং। তানি হি মণ্ডলবদ্ধানি চেৰ হোন্তি সলাকবদ্ধানি চ। যম্পি তত্থজাতকদণ্ডকেন কতং একপণ্ণচ্ছত্তং হোতি, তম্পি ছত্তমেৰ। এতেসু যংকিঞ্চি ছত্তং পাণিম্হি অস্সাতি ছত্তপাণি। সো তং ছত্তং ধারযমানো ৰা অংসে ৰা কত্ৰা ঊরুম্হি ৰা ঠপেত্ৰা যাৰ হত্থেন ন মুচ্চতি, তাৰস্স ধম্মং দেসেতুং ন ৰট্টতি, দেসেন্তস্স ৰুত্তনযেন দুক্কটং। সচে পনস্স অঞ্ঞো ছত্তং ধারেতি, ছত্তপাদুকায ৰা ঠিতং হোতি, হত্থতো অপগতমত্তে ছত্তপাণি নাম ন হোতি। তস্স ধম্মং দেসেতুং ৰট্টতি। ধম্মপরিচ্ছেদো পনেত্থ পদসোধম্মে ৰুত্তনযেনেৰ ৰেদিতব্বো।
634.Setacchattanti vatthapaliguṇṭhitaṃ paṇḍaracchattaṃ. Kilañjacchattanti vilīvacchattaṃ. Paṇṇacchattanti tālapaṇṇādīhi yehi kehici kataṃ. Maṇḍalabaddhaṃ salākabaddhanti idaṃ pana tiṇṇampi chattānaṃ pañjaradassanatthaṃ vuttaṃ. Tāni hi maṇḍalabaddhāni ceva honti salākabaddhāni ca. Yampi tatthajātakadaṇḍakena kataṃ ekapaṇṇacchattaṃ hoti, tampi chattameva. Etesu yaṃkiñci chattaṃ pāṇimhi assāti chattapāṇi. So taṃ chattaṃ dhārayamāno vā aṃse vā katvā ūrumhi vā ṭhapetvā yāva hatthena na muccati, tāvassa dhammaṃ desetuṃ na vaṭṭati, desentassa vuttanayena dukkaṭaṃ. Sace panassa añño chattaṃ dhāreti, chattapādukāya vā ṭhitaṃ hoti, hatthato apagatamatte chattapāṇi nāma na hoti. Tassa dhammaṃ desetuṃ vaṭṭati. Dhammaparicchedo panettha padasodhamme vuttanayeneva veditabbo.
৬৩৫. দণ্ডপাণিস্সাতি এত্থ দণ্ডো নাম মজ্ঝিমস্স পুরিসস্স চতুহত্থপ্পমাণো দণ্ডপাণিভাৰো পনস্স ছত্তপাণিম্হি ৰুত্তনযেনেৰ ৰেদিতব্বো।
635.Daṇḍapāṇissāti ettha daṇḍo nāma majjhimassa purisassa catuhatthappamāṇo daṇḍapāṇibhāvo panassa chattapāṇimhi vuttanayeneva veditabbo.
৬৩৬. সত্থপাণিম্হিপি এসেৰ নযো। অসিং সন্নহিত্ৰা ঠিতোপি হি সত্থপাণিসঙ্খ্যং ন গচ্ছতি।
636.Satthapāṇimhipi eseva nayo. Asiṃ sannahitvā ṭhitopi hi satthapāṇisaṅkhyaṃ na gacchati.
৬৩৭. আৰুধপাণিস্সাতি এত্থ কিঞ্চাপি ৰুত্তং – ‘‘আৰুধং নাম চাপো কোদণ্ডো’’তি, অথ খো সব্বাপি ধনুৰিকতি সদ্ধিং সরৰিকতিযা আৰুধন্তি ৰেদিতব্বং। তস্মা সদ্ধিং ৰা সরেন ধনুং গহেত্ৰা সুদ্ধধনুং ৰা সুদ্ধসরং ৰা সজিযধনুং ৰা নিজ্জিযধনুং ৰা গহেত্ৰা ঠিতস্স ৰা নিসিন্নস্স ৰা ধম্মো দেসেতুং ন ৰট্টতি। সচে পনস্স ধনুং কণ্ঠেপি পটিমুক্কং হোতি, যাৰ হত্থেন ন গণ্হাতি, তাৰ ধম্মং দেসেতুং ৰট্টতিযেৰাতি।
637.Āvudhapāṇissāti ettha kiñcāpi vuttaṃ – ‘‘āvudhaṃ nāma cāpo kodaṇḍo’’ti, atha kho sabbāpi dhanuvikati saddhiṃ saravikatiyā āvudhanti veditabbaṃ. Tasmā saddhiṃ vā sarena dhanuṃ gahetvā suddhadhanuṃ vā suddhasaraṃ vā sajiyadhanuṃ vā nijjiyadhanuṃ vā gahetvā ṭhitassa vā nisinnassa vā dhammo desetuṃ na vaṭṭati. Sace panassa dhanuṃ kaṇṭhepi paṭimukkaṃ hoti, yāva hatthena na gaṇhāti, tāva dhammaṃ desetuṃ vaṭṭatiyevāti.
ছট্ঠো ৰগ্গো।
Chaṭṭho vaggo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৬. সুরুসুরুৰগ্গো • 6. Surusuruvaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৬. সুরুসুরুৰগ্গৰণ্ণনা • 6. Surusuruvaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৬. সুরুসুরুৰগ্গৰণ্ণনা • 6. Surusuruvaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৬. সুরুসুরুৰগ্গৰণ্ণনা • 6. Surusuruvaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৬. সুরুসুরুৰগ্গ-অত্থযোজনা • 6. Surusuruvagga-atthayojanā
