| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
६. सुरुसुरुवग्गवण्णना
6. Surusuruvaggavaṇṇanā
६२७. पाळियं सीतीकतोति सीतपीळितो। सिलकबुद्धोति परिहासवचनमेतं। सिलकञ्हि किञ्चि दिस्वा ‘‘बुद्धो अय’’न्ति वोहरन्ति।
627. Pāḷiyaṃ sītīkatoti sītapīḷito. Silakabuddhoti parihāsavacanametaṃ. Silakañhi kiñci disvā ‘‘buddho aya’’nti voharanti.
६२८. ‘‘अङ्गुलियो मुखे पवेसेत्वा भुञ्जितुं वट्टती’’ति इमिना सब्बं हत्थं अन्तोमुखे पक्खिपनसिक्खापदस्सपि पविट्ठङ्गुलिनिल्लेहनेन इमस्सपि सिक्खापदस्स अनापत्तिं दस्सेति। एसेव नयोति घनयागुआदीसु पत्तं हत्थेन, ओट्ठञ्च जिव्हाय निल्लेहितुं वट्टतीति अतिदिसति। तस्माति यस्मा घनयागुआदिविरहितं निल्लेहितुं न वट्टति।
628.‘‘Aṅguliyo mukhe pavesetvā bhuñjituṃ vaṭṭatī’’ti iminā sabbaṃ hatthaṃ antomukhe pakkhipanasikkhāpadassapi paviṭṭhaṅgulinillehanena imassapi sikkhāpadassa anāpattiṃ dasseti. Eseva nayoti ghanayāguādīsu pattaṃ hatthena, oṭṭhañca jivhāya nillehituṃ vaṭṭatīti atidisati. Tasmāti yasmā ghanayāguādivirahitaṃ nillehituṃ na vaṭṭati.
६३४. विलीवच्छत्तन्ति वेणुपेसिकाहि कतं। मण्डलबद्धानीति दीघसलाकासु तिरियं वलयाकारेन सलाकं ठपेत्वा सुत्तेहि बद्धानि दीघञ्च तिरियञ्च उजुकमेव सलाकायो ठपेत्वा दळ्हबद्धानि चेव तिरियं ठपेत्वा दीघदण्डकेहेव सङ्कोचारहं कत्वा सुत्तेहेव तिरियं बद्धानि। तत्थजातकदण्डकेन कतन्ति सह दण्डकेन छिन्नतालपण्णादीहि कतं। छत्तपादुकायाति यस्मिं छत्तदण्डकोटिं पवेसेत्वा छत्तं उजुकं ठपेत्वा हेट्ठा छायाय निसीदन्ति, तिट्ठन्ति वा, तादिसे छत्ताधारे।
634.Vilīvacchattanti veṇupesikāhi kataṃ. Maṇḍalabaddhānīti dīghasalākāsu tiriyaṃ valayākārena salākaṃ ṭhapetvā suttehi baddhāni dīghañca tiriyañca ujukameva salākāyo ṭhapetvā daḷhabaddhāni ceva tiriyaṃ ṭhapetvā dīghadaṇḍakeheva saṅkocārahaṃ katvā sutteheva tiriyaṃ baddhāni. Tatthajātakadaṇḍakena katanti saha daṇḍakena chinnatālapaṇṇādīhi kataṃ. Chattapādukāyāti yasmiṃ chattadaṇḍakoṭiṃ pavesetvā chattaṃ ujukaṃ ṭhapetvā heṭṭhā chāyāya nisīdanti, tiṭṭhanti vā, tādise chattādhāre.
६३७. चापोति मज्झे वङ्ककाजदण्डसदिसा धनुविकति। कोदण्डोति विद्धदण्डा धनुविकति।
637.Cāpoti majjhe vaṅkakājadaṇḍasadisā dhanuvikati. Kodaṇḍoti viddhadaṇḍā dhanuvikati.
सुरुसुरुवग्गवण्णना निट्ठिता।
Surusuruvaggavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ६. सुरुसुरुवग्गो • 6. Surusuruvaggo
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महाविभङ्ग-अट्ठकथा • Mahāvibhaṅga-aṭṭhakathā / ६. सुरुसुरुवग्गवण्णना • 6. Surusuruvaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / ६. सुरुसुरुवग्गवण्णना • 6. Surusuruvaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / ६. सुरुसुरुवग्गवण्णना • 6. Surusuruvaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ६. सुरुसुरुवग्ग-अत्थयोजना • 6. Surusuruvagga-atthayojanā
