| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
༦. སུརུསུརུཝགྒཝཎྞནཱ
6. Surusuruvaggavaṇṇanā
༦༢༧. པཱལི༹ཡཾ སཱིཏཱིཀཏོཏི སཱིཏཔཱིལི༹ཏོ། སིལཀབུདྡྷོཏི པརིཧཱསཝཙནམེཏཾ། སིལཀཉྷི ཀིཉྩི དིསྭཱ ‘‘བུདྡྷོ ཨཡ’’ནྟི ཝོཧརནྟི།
627. Pāḷiyaṃ sītīkatoti sītapīḷito. Silakabuddhoti parihāsavacanametaṃ. Silakañhi kiñci disvā ‘‘buddho aya’’nti voharanti.
༦༢༨. ‘‘ཨངྒུལིཡོ མུཁེ པཝེསེཏྭཱ བྷུཉྫིཏུཾ ཝཊྚཏཱི’’ཏི ཨིམིནཱ སབྦཾ ཧཏྠཾ ཨནྟོམུཁེ པཀྑིཔནསིཀྑཱཔདསྶཔི པཝིཊྛངྒུལིནིལླེཧནེན ཨིམསྶཔི སིཀྑཱཔདསྶ ཨནཱཔཏྟིཾ དསྶེཏི། ཨེསེཝ ནཡོཏི གྷནཡཱགུཨཱདཱིསུ པཏྟཾ ཧཏྠེན, ཨོཊྛཉྩ ཛིཝ྄ཧཱཡ ནིལླེཧིཏུཾ ཝཊྚཏཱིཏི ཨཏིདིསཏི། ཏསྨཱཏི ཡསྨཱ གྷནཡཱགུཨཱདིཝིརཧིཏཾ ནིལླེཧིཏུཾ ན ཝཊྚཏི།
628.‘‘Aṅguliyo mukhe pavesetvā bhuñjituṃ vaṭṭatī’’ti iminā sabbaṃ hatthaṃ antomukhe pakkhipanasikkhāpadassapi paviṭṭhaṅgulinillehanena imassapi sikkhāpadassa anāpattiṃ dasseti. Eseva nayoti ghanayāguādīsu pattaṃ hatthena, oṭṭhañca jivhāya nillehituṃ vaṭṭatīti atidisati. Tasmāti yasmā ghanayāguādivirahitaṃ nillehituṃ na vaṭṭati.
༦༣༤. ཝིལཱིཝཙྪཏྟནྟི ཝེཎུཔེསིཀཱཧི ཀཏཾ། མཎྜལབདྡྷཱནཱིཏི དཱིགྷསལཱཀཱསུ ཏིརིཡཾ ཝལཡཱཀཱརེན སལཱཀཾ ཋཔེཏྭཱ སུཏྟེཧི བདྡྷཱནི དཱིགྷཉྩ ཏིརིཡཉྩ ཨུཛུཀམེཝ སལཱཀཱཡོ ཋཔེཏྭཱ དལ༹ྷབདྡྷཱནི ཙེཝ ཏིརིཡཾ ཋཔེཏྭཱ དཱིགྷདཎྜཀེཧེཝ སངྐོཙཱརཧཾ ཀཏྭཱ སུཏྟེཧེཝ ཏིརིཡཾ བདྡྷཱནི། ཏཏྠཛཱཏཀདཎྜཀེན ཀཏནྟི སཧ དཎྜཀེན ཚིནྣཏཱལཔཎྞཱདཱིཧི ཀཏཾ། ཚཏྟཔཱདུཀཱཡཱཏི ཡསྨིཾ ཚཏྟདཎྜཀོཊིཾ པཝེསེཏྭཱ ཚཏྟཾ ཨུཛུཀཾ ཋཔེཏྭཱ ཧེཊྛཱ ཚཱཡཱཡ ནིསཱིདནྟི, ཏིཊྛནྟི ཝཱ, ཏཱདིསེ ཚཏྟཱདྷཱརེ།
634.Vilīvacchattanti veṇupesikāhi kataṃ. Maṇḍalabaddhānīti dīghasalākāsu tiriyaṃ valayākārena salākaṃ ṭhapetvā suttehi baddhāni dīghañca tiriyañca ujukameva salākāyo ṭhapetvā daḷhabaddhāni ceva tiriyaṃ ṭhapetvā dīghadaṇḍakeheva saṅkocārahaṃ katvā sutteheva tiriyaṃ baddhāni. Tatthajātakadaṇḍakena katanti saha daṇḍakena chinnatālapaṇṇādīhi kataṃ. Chattapādukāyāti yasmiṃ chattadaṇḍakoṭiṃ pavesetvā chattaṃ ujukaṃ ṭhapetvā heṭṭhā chāyāya nisīdanti, tiṭṭhanti vā, tādise chattādhāre.
༦༣༧. ཙཱཔོཏི མཛ྄ཛྷེ ཝངྐཀཱཛདཎྜསདིསཱ དྷནུཝིཀཏི། ཀོདཎྜོཏི ཝིདྡྷདཎྜཱ དྷནུཝིཀཏི།
637.Cāpoti majjhe vaṅkakājadaṇḍasadisā dhanuvikati. Kodaṇḍoti viddhadaṇḍā dhanuvikati.
སུརུསུརུཝགྒཝཎྞནཱ ནིཊྛིཏཱ།
Surusuruvaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༦. སུརུསུརུཝགྒོ • 6. Surusuruvaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༦. སུརུསུརུཝགྒཝཎྞནཱ • 6. Surusuruvaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༦. སུརུསུརུཝགྒཝཎྞནཱ • 6. Surusuruvaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༦. སུརུསུརུཝགྒཝཎྞནཱ • 6. Surusuruvaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༦. སུརུསུརུཝགྒ-ཨཏྠཡོཛནཱ • 6. Surusuruvagga-atthayojanā
