| Library / Tipiṭaka / തിപിടക • Tipiṭaka / വിമതിവിനോദനീ-ടീകാ • Vimativinodanī-ṭīkā |
൬. സുരുസുരുവഗ്ഗവണ്ണനാ
6. Surusuruvaggavaṇṇanā
൬൨൭. പാളിയം സീതീകതോതി സീതപീളിതോ. സിലകബുദ്ധോതി പരിഹാസവചനമേതം. സിലകഞ്ഹി കിഞ്ചി ദിസ്വാ ‘‘ബുദ്ധോ അയ’’ന്തി വോഹരന്തി.
627. Pāḷiyaṃ sītīkatoti sītapīḷito. Silakabuddhoti parihāsavacanametaṃ. Silakañhi kiñci disvā ‘‘buddho aya’’nti voharanti.
൬൨൮. ‘‘അങ്ഗുലിയോ മുഖേ പവേസേത്വാ ഭുഞ്ജിതും വട്ടതീ’’തി ഇമിനാ സബ്ബം ഹത്ഥം അന്തോമുഖേ പക്ഖിപനസിക്ഖാപദസ്സപി പവിട്ഠങ്ഗുലിനില്ലേഹനേന ഇമസ്സപി സിക്ഖാപദസ്സ അനാപത്തിം ദസ്സേതി. ഏസേവ നയോതി ഘനയാഗുആദീസു പത്തം ഹത്ഥേന, ഓട്ഠഞ്ച ജിവ്ഹായ നില്ലേഹിതും വട്ടതീതി അതിദിസതി. തസ്മാതി യസ്മാ ഘനയാഗുആദിവിരഹിതം നില്ലേഹിതും ന വട്ടതി.
628.‘‘Aṅguliyo mukhe pavesetvā bhuñjituṃ vaṭṭatī’’ti iminā sabbaṃ hatthaṃ antomukhe pakkhipanasikkhāpadassapi paviṭṭhaṅgulinillehanena imassapi sikkhāpadassa anāpattiṃ dasseti. Eseva nayoti ghanayāguādīsu pattaṃ hatthena, oṭṭhañca jivhāya nillehituṃ vaṭṭatīti atidisati. Tasmāti yasmā ghanayāguādivirahitaṃ nillehituṃ na vaṭṭati.
൬൩൪. വിലീവച്ഛത്തന്തി വേണുപേസികാഹി കതം. മണ്ഡലബദ്ധാനീതി ദീഘസലാകാസു തിരിയം വലയാകാരേന സലാകം ഠപേത്വാ സുത്തേഹി ബദ്ധാനി ദീഘഞ്ച തിരിയഞ്ച ഉജുകമേവ സലാകായോ ഠപേത്വാ ദള്ഹബദ്ധാനി ചേവ തിരിയം ഠപേത്വാ ദീഘദണ്ഡകേഹേവ സങ്കോചാരഹം കത്വാ സുത്തേഹേവ തിരിയം ബദ്ധാനി. തത്ഥജാതകദണ്ഡകേന കതന്തി സഹ ദണ്ഡകേന ഛിന്നതാലപണ്ണാദീഹി കതം. ഛത്തപാദുകായാതി യസ്മിം ഛത്തദണ്ഡകോടിം പവേസേത്വാ ഛത്തം ഉജുകം ഠപേത്വാ ഹേട്ഠാ ഛായായ നിസീദന്തി, തിട്ഠന്തി വാ, താദിസേ ഛത്താധാരേ.
634.Vilīvacchattanti veṇupesikāhi kataṃ. Maṇḍalabaddhānīti dīghasalākāsu tiriyaṃ valayākārena salākaṃ ṭhapetvā suttehi baddhāni dīghañca tiriyañca ujukameva salākāyo ṭhapetvā daḷhabaddhāni ceva tiriyaṃ ṭhapetvā dīghadaṇḍakeheva saṅkocārahaṃ katvā sutteheva tiriyaṃ baddhāni. Tatthajātakadaṇḍakena katanti saha daṇḍakena chinnatālapaṇṇādīhi kataṃ. Chattapādukāyāti yasmiṃ chattadaṇḍakoṭiṃ pavesetvā chattaṃ ujukaṃ ṭhapetvā heṭṭhā chāyāya nisīdanti, tiṭṭhanti vā, tādise chattādhāre.
൬൩൭. ചാപോതി മജ്ഝേ വങ്കകാജദണ്ഡസദിസാ ധനുവികതി. കോദണ്ഡോതി വിദ്ധദണ്ഡാ ധനുവികതി.
637.Cāpoti majjhe vaṅkakājadaṇḍasadisā dhanuvikati. Kodaṇḍoti viddhadaṇḍā dhanuvikati.
സുരുസുരുവഗ്ഗവണ്ണനാ നിട്ഠിതാ.
Surusuruvaggavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / വിനയപിടക • Vinayapiṭaka / മഹാവിഭങ്ഗ • Mahāvibhaṅga / ൬. സുരുസുരുവഗ്ഗോ • 6. Surusuruvaggo
അട്ഠകഥാ • Aṭṭhakathā / വിനയപിടക (അട്ഠകഥാ) • Vinayapiṭaka (aṭṭhakathā) / മഹാവിഭങ്ഗ-അട്ഠകഥാ • Mahāvibhaṅga-aṭṭhakathā / ൬. സുരുസുരുവഗ്ഗവണ്ണനാ • 6. Surusuruvaggavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / സാരത്ഥദീപനീ-ടീകാ • Sāratthadīpanī-ṭīkā / ൬. സുരുസുരുവഗ്ഗവണ്ണനാ • 6. Surusuruvaggavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വജിരബുദ്ധി-ടീകാ • Vajirabuddhi-ṭīkā / ൬. സുരുസുരുവഗ്ഗവണ്ണനാ • 6. Surusuruvaggavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / ൬. സുരുസുരുവഗ്ഗ-അത്ഥയോജനാ • 6. Surusuruvagga-atthayojanā
