| Library / Tipiṭaka / तिपिटक • Tipiṭaka / जातकपाळि • Jātakapāḷi |
४११. सुसीमजातकं (७-२-६)
411. Susīmajātakaṃ (7-2-6)
११४.
114.
काळानि केसानि पुरे अहेसुं, जातानि सीसम्हि यथापदेसे।
Kāḷāni kesāni pure ahesuṃ, jātāni sīsamhi yathāpadese;
तानज्ज सेतानि सुसीम 1 दिस्वा, धम्मं चर ब्रह्मचरियस्स कालो॥
Tānajja setāni susīma 2 disvā, dhammaṃ cara brahmacariyassa kālo.
११५.
115.
ममेव देव पलितं न तुय्हं, ममेव सीसं मम उत्तमङ्गं।
Mameva deva palitaṃ na tuyhaṃ, mameva sīsaṃ mama uttamaṅgaṃ;
‘‘अत्थं करिस्स’’न्ति मुसा अभाणिं 3, एकापराधं खम राजसेट्ठ॥
‘‘Atthaṃ karissa’’nti musā abhāṇiṃ 4, ekāparādhaṃ khama rājaseṭṭha.
११६.
116.
दहरो तुवं दस्सनियोसि राज, पठमुग्गतो होसि 5 यथा कळीरो।
Daharo tuvaṃ dassaniyosi rāja, paṭhamuggato hosi 6 yathā kaḷīro;
रज्जञ्च कारेहि ममञ्च पस्स, मा कालिकं अनुधावी जनिन्द॥
Rajjañca kārehi mamañca passa, mā kālikaṃ anudhāvī janinda.
११७.
117.
पस्सामि वोहं दहरिं कुमारिं, सामट्ठपस्सं सुतनुं सुमज्झं।
Passāmi vohaṃ dahariṃ kumāriṃ, sāmaṭṭhapassaṃ sutanuṃ sumajjhaṃ;
काळप्पवाळाव पवेल्लमाना, पलोभयन्तीव 7 नरेसु गच्छति॥
Kāḷappavāḷāva pavellamānā, palobhayantīva 8 naresu gacchati.
११८.
118.
तमेन पस्सामिपरेन नारिं, आसीतिकं नावुतिकं व जच्चा।
Tamena passāmiparena nāriṃ, āsītikaṃ nāvutikaṃ va jaccā;
दण्डं गहेत्वान पवेधमानं, गोपानसीभोग्गसमं चरन्तिं॥
Daṇḍaṃ gahetvāna pavedhamānaṃ, gopānasībhoggasamaṃ carantiṃ.
११९.
119.
सोहं तमेवानुविचिन्तयन्तो, एको सयामि 9 सयनस्स मज्झे।
Sohaṃ tamevānuvicintayanto, eko sayāmi 10 sayanassa majjhe;
‘‘अहम्पि एवं’’ इति पेक्खमानो, न गहे रमे 11 ब्रह्मचरियस्स कालो॥
‘‘Ahampi evaṃ’’ iti pekkhamāno, na gahe rame 12 brahmacariyassa kālo.
१२०.
120.
रज्जुवालम्बनी चेसा, या गेहे वसतो रति।
Rajjuvālambanī cesā, yā gehe vasato rati;
एवम्पि छेत्वान वजन्ति धीरा, अनपेक्खिनो कामसुखं पहायाति॥
Evampi chetvāna vajanti dhīrā, anapekkhino kāmasukhaṃ pahāyāti.
सुसीमजातकं छट्ठं।
Susīmajātakaṃ chaṭṭhaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४११] ६. सुसीमजातकवण्णना • [411] 6. Susīmajātakavaṇṇanā
