| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. সুসিমসুত্তং
9. Susimasuttaṃ
১১০. সাৰত্থিনিদানং । অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো আযস্মন্তং আনন্দং ভগৰা এতদৰোচ – ‘‘তুয্হম্পি নো, আনন্দ, সারিপুত্তো রুচ্চতী’’তি?
110. Sāvatthinidānaṃ . Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘tuyhampi no, ānanda, sāriputto ruccatī’’ti?
‘‘কস্স হি নাম, ভন্তে, অবালস্স অদুট্ঠস্স অমূল়্হস্স অৰিপল্লত্থচিত্তস্স আযস্মা সারিপুত্তো ন রুচ্চেয্য? পণ্ডিতো, ভন্তে, আযস্মা সারিপুত্তো । মহাপঞ্ঞো, ভন্তে, আযস্মা সারিপুত্তো। পুথুপঞ্ঞো, ভন্তে, আযস্মা সারিপুত্তো। হাসপঞ্ঞো 1, ভন্তে, আযস্মা সারিপুত্তো। জৰনপঞ্ঞো, ভন্তে, আযস্মা সারিপুত্তো। তিক্খপঞ্ঞো, ভন্তে, আযস্মা সারিপুত্তো। নিব্বেধিকপঞ্ঞো, ভন্তে, আযস্মা সারিপুত্তো। অপ্পিচ্ছো, ভন্তে, আযস্মা সারিপুত্তো। সন্তুট্ঠো, ভন্তে, আযস্মা সারিপুত্তো। পৰিৰিত্তো, ভন্তে, আযস্মা সারিপুত্তো। অসংসট্ঠো, ভন্তে, আযস্মা সারিপুত্তো। আরদ্ধৰীরিযো, ভন্তে, আযস্মা সারিপুত্তো। ৰত্তা, ভন্তে, আযস্মা সারিপুত্তো। ৰচনক্খমো, ভন্তে, আযস্মা সারিপুত্তো। চোদকো, ভন্তে, আযস্মা সারিপুত্তো। পাপগরহী, ভন্তে, আযস্মা সারিপুত্তো। কস্স হি নাম, ভন্তে, অবালস্স অদুট্ঠস্স অমূল়্হস্স অৰিপল্লত্থচিত্তস্স আযস্মা সারিপুত্তো ন রুচ্চেয্যা’’তি?
‘‘Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyya? Paṇḍito, bhante, āyasmā sāriputto . Mahāpañño, bhante, āyasmā sāriputto. Puthupañño, bhante, āyasmā sāriputto. Hāsapañño 2, bhante, āyasmā sāriputto. Javanapañño, bhante, āyasmā sāriputto. Tikkhapañño, bhante, āyasmā sāriputto. Nibbedhikapañño, bhante, āyasmā sāriputto. Appiccho, bhante, āyasmā sāriputto. Santuṭṭho, bhante, āyasmā sāriputto. Pavivitto, bhante, āyasmā sāriputto. Asaṃsaṭṭho, bhante, āyasmā sāriputto. Āraddhavīriyo, bhante, āyasmā sāriputto. Vattā, bhante, āyasmā sāriputto. Vacanakkhamo, bhante, āyasmā sāriputto. Codako, bhante, āyasmā sāriputto. Pāpagarahī, bhante, āyasmā sāriputto. Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyyā’’ti?
‘‘এৰমেতং , আনন্দ, এৰমেতং, আনন্দ! কস্স হি নাম, আনন্দ, অবালস্স অদুট্ঠস্স অমূল়্হস্স অৰিপল্লত্থচিত্তস্স সারিপুত্তো ন রুচ্চেয্য? পণ্ডিতো, আনন্দ, সারিপুত্তো। মহাপঞ্ঞো, আনন্দ, সারিপুত্তো। পুথুপঞ্ঞো, আনন্দ, সারিপুত্তো। হাসপঞ্ঞো, আনন্দ, সারিপুত্তো। জৰনপঞ্ঞো, আনন্দ, সারিপুত্তো। তিক্খপঞ্ঞো, আনন্দ, সারিপুত্তো। নিব্বেধিকপঞ্ঞো, আনন্দ, সারিপুত্তো। অপ্পিচ্ছো, আনন্দ, সারিপুত্তো। সন্তুট্ঠো, আনন্দ, সারিপুত্তো। পৰিৰিত্তো, আনন্দ, সারিপুত্তো। অসংসট্ঠো, আনন্দ, সারিপুত্তো। আরদ্ধৰীরিযো, আনন্দ, সারিপুত্তো। ৰত্তা, আনন্দ, সারিপুত্তো। ৰচনক্খমো, আনন্দ, সারিপুত্তো । চোদকো, আনন্দ, সারিপুত্তো। পাপগরহী, আনন্দ, সারিপুত্তো। কস্স হি নাম, আনন্দ, অবালস্স অদুট্ঠস্স অমূল়্হস্স অৰিপল্লত্থচিত্তস্স সারিপুত্তো ন রুচ্চেয্যা’’তি?
‘‘Evametaṃ , ānanda, evametaṃ, ānanda! Kassa hi nāma, ānanda, abālassa aduṭṭhassa amūḷhassa avipallatthacittassa sāriputto na rucceyya? Paṇḍito, ānanda, sāriputto. Mahāpañño, ānanda, sāriputto. Puthupañño, ānanda, sāriputto. Hāsapañño, ānanda, sāriputto. Javanapañño, ānanda, sāriputto. Tikkhapañño, ānanda, sāriputto. Nibbedhikapañño, ānanda, sāriputto. Appiccho, ānanda, sāriputto. Santuṭṭho, ānanda, sāriputto. Pavivitto, ānanda, sāriputto. Asaṃsaṭṭho, ānanda, sāriputto. Āraddhavīriyo, ānanda, sāriputto. Vattā, ānanda, sāriputto. Vacanakkhamo, ānanda, sāriputto . Codako, ānanda, sāriputto. Pāpagarahī, ānanda, sāriputto. Kassa hi nāma, ānanda, abālassa aduṭṭhassa amūḷhassa avipallatthacittassa sāriputto na rucceyyā’’ti?
অথ খো সুসিমো 3 দেৰপুত্তো আযস্মতো সারিপুত্তস্স ৰণ্ণে ভঞ্ঞমানে মহতিযা দেৰপুত্তপরিসায পরিৰুতো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতো খো সুসিমো দেৰপুত্তো ভগৰন্তং এতদৰোচ –
Atha kho susimo 4 devaputto āyasmato sāriputtassa vaṇṇe bhaññamāne mahatiyā devaputtaparisāya parivuto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho susimo devaputto bhagavantaṃ etadavoca –
‘‘এৰমেতং , ভগৰা, এৰমেতং, সুগত। কস্স হি নাম, ভন্তে, অবালস্স অদুট্ঠস্স অমূল়্হস্স অৰিপল্লত্থচিত্তস্স আযস্মা সারিপুত্তো ন রুচ্চেয্য? পণ্ডিতো, ভন্তে, আযস্মা সারিপুত্তো। মহাপঞ্ঞো, ভন্তে, পুথুপঞ্ঞো, ভন্তে, হাসপঞ্ঞো, ভন্তে, জৰনপঞ্ঞো, ভন্তে, তিক্খপঞ্ঞো, ভন্তে, নিব্বেধিকপঞ্ঞো, ভন্তে, অপ্পিচ্ছো, ভন্তে, সন্তুট্ঠো, ভন্তে, পৰিৰিত্তো, ভন্তে, অসংসট্ঠো, ভন্তে, আরদ্ধৰীরিযো, ভন্তে, ৰত্তা, ভন্তে, ৰচনক্খমো, ভন্তে, চোদকো, ভন্তে, পাপগরহী, ভন্তে, আযস্মা সারিপুত্তো। কস্স হি নাম, ভন্তে, অবালস্স অদুট্ঠস্স অমূল়্হস্স অৰিপল্লত্থচিত্তস্স আযস্মা সারিপুত্তো ন রুচ্চেয্য?
‘‘Evametaṃ , bhagavā, evametaṃ, sugata. Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyya? Paṇḍito, bhante, āyasmā sāriputto. Mahāpañño, bhante, puthupañño, bhante, hāsapañño, bhante, javanapañño, bhante, tikkhapañño, bhante, nibbedhikapañño, bhante, appiccho, bhante, santuṭṭho, bhante, pavivitto, bhante, asaṃsaṭṭho, bhante, āraddhavīriyo, bhante, vattā, bhante, vacanakkhamo, bhante, codako, bhante, pāpagarahī, bhante, āyasmā sāriputto. Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyya?
‘‘অহম্পি হি, ভন্তে, যঞ্ঞদেৰ দেৰপুত্তপরিসং উপসঙ্কমিং, এতদেৰ বহুলং সদ্দং সুণামি – ‘পণ্ডিতো আযস্মা সারিপুত্তো; মহাপঞ্ঞো আযস্মা, পুথুপঞ্ঞো আযস্মা, হাসপঞ্ঞো আযস্মা, জৰনপঞ্ঞো আযস্মা, তিক্খপঞ্ঞো আযস্মা, নিব্বেধিকপঞ্ঞো আযস্মা, অপ্পিচ্ছো আযস্মা, সন্তুট্ঠো আযস্মা, পৰিৰিত্তো আযস্মা, অসংসট্ঠো আযস্মা, আরদ্ধৰীরিযো আযস্মা, ৰত্তা আযস্মা, ৰচনক্খমো আযস্মা, চোদকো আযস্মা, পাপগরহী আযস্মা সারিপুত্তো’তি । কস্স হি নাম, ভন্তে, অবালস্স অদুট্ঠস্স অমূল়্হস্স অৰিপল্লত্থচিত্তস্স আযস্মা সারিপুত্তো ন রুচ্চেয্যা’’তি?
‘‘Ahampi hi, bhante, yaññadeva devaputtaparisaṃ upasaṅkamiṃ, etadeva bahulaṃ saddaṃ suṇāmi – ‘paṇḍito āyasmā sāriputto; mahāpañño āyasmā, puthupañño āyasmā, hāsapañño āyasmā, javanapañño āyasmā, tikkhapañño āyasmā, nibbedhikapañño āyasmā, appiccho āyasmā, santuṭṭho āyasmā, pavivitto āyasmā, asaṃsaṭṭho āyasmā, āraddhavīriyo āyasmā, vattā āyasmā, vacanakkhamo āyasmā, codako āyasmā, pāpagarahī āyasmā sāriputto’ti . Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyyā’’ti?
অথ খো সুসিমস্স দেৰপুত্তস্স দেৰপুত্তপরিসা আযস্মতো সারিপুত্তস্স ৰণ্ণে ভঞ্ঞমানে অত্তমনা পমুদিতা পীতিসোমনস্সজাতা উচ্চাৰচা ৰণ্ণনিভা উপদংসেতি।
Atha kho susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.
‘‘সেয্যথাপি নাম মণি ৰেল়ুরিযো সুভো জাতিমা অট্ঠংসো সুপরিকম্মকতো পণ্ডুকম্বলে নিক্খিত্তো ভাসতে চ তপতে চ ৰিরোচতি চ; এৰমেৰং সুসিমস্স দেৰপুত্তস্স দেৰপুত্তপরিসা আযস্মতো সারিপুত্তস্স ৰণ্ণে ভঞ্ঞমানে অত্তমনা পমুদিতা পীতিসোমনস্সজাতা উচ্চাৰচা ৰণ্ণনিভা উপদংসেতি।
‘‘Seyyathāpi nāma maṇi veḷuriyo subho jātimā aṭṭhaṃso suparikammakato paṇḍukambale nikkhitto bhāsate ca tapate ca virocati ca; evamevaṃ susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.
‘‘সেয্যথাপি নাম নিক্খং জম্বোনদং দক্খকম্মারপুত্তউক্কামুখসুকুসলসম্পহট্ঠং পণ্ডুকম্বলে নিক্খিত্তং ভাসতে চ তপতে চ ৰিরোচতি চ; এৰমেৰং সুসিমস্স দেৰপুত্তস্স দেৰপুত্তপরিসা আযস্মতো সারিপুত্তস্স ৰণ্ণে ভঞ্ঞমানে অত্তমনা পমুদিতা পীতিসোমনস্সজাতা উচ্চাৰচা ৰণ্ণনিভা উপদংসেতি।
‘‘Seyyathāpi nāma nikkhaṃ jambonadaṃ dakkhakammāraputtaukkāmukhasukusalasampahaṭṭhaṃ paṇḍukambale nikkhittaṃ bhāsate ca tapate ca virocati ca; evamevaṃ susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.
‘‘সেয্যথাপি নাম সরদসমযে ৰিদ্ধে ৰিগতৰলাহকে দেৰে রত্তিযা পচ্চূসসমযং ওসধিতারকা ভাসতে চ তপতে চ ৰিরোচতি চ; এৰমেৰং সুসিমস্স দেৰপুত্তস্স দেৰপুত্তপরিসা আযস্মতো সারিপুত্তস্স ৰণ্ণে ভঞ্ঞমানে অত্তমনা পমুদিতা পীতিসোমনস্সজাতা উচ্চাৰচা ৰণ্ণনিভা উপদংসেতি।
‘‘Seyyathāpi nāma saradasamaye viddhe vigatavalāhake deve rattiyā paccūsasamayaṃ osadhitārakā bhāsate ca tapate ca virocati ca; evamevaṃ susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.
‘‘সেয্যথাপি নাম সরদসমযে ৰিদ্ধে ৰিগতৰলাহকে দেৰে আদিচ্চো নভং অব্ভুস্সক্কমানো 5 সব্বং আকাসগতং তমগতং অভিৰিহচ্চ ভাসতে চ তপতে চ ৰিরোচতি চ; এৰমেৰং সুসিমস্স দেৰপুত্তস্স দেৰপুত্তপরিসা আযস্মতো সারিপুত্তস্স ৰণ্ণে ভঞ্ঞমানে অত্তমনা পমুদিতা পীতিসোমনস্সজাতা উচ্চাৰচা ৰণ্ণনিভা উপদংসেতি।
‘‘Seyyathāpi nāma saradasamaye viddhe vigatavalāhake deve ādicco nabhaṃ abbhussakkamāno 6 sabbaṃ ākāsagataṃ tamagataṃ abhivihacca bhāsate ca tapate ca virocati ca; evamevaṃ susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.
অথ খো সুসিমো দেৰপুত্তো আযস্মন্তং সারিপুত্তং আরব্ভ ভগৰতো সন্তিকে ইমং গাথং অভাসি –
Atha kho susimo devaputto āyasmantaṃ sāriputtaṃ ārabbha bhagavato santike imaṃ gāthaṃ abhāsi –
‘‘পণ্ডিতোতি সমঞ্ঞাতো, সারিপুত্তো অকোধনো।
‘‘Paṇḍitoti samaññāto, sāriputto akodhano;
অপ্পিচ্ছো সোরতো দন্তো, সত্থুৰণ্ণাভতো ইসী’’তি॥
Appiccho sorato danto, satthuvaṇṇābhato isī’’ti.
অথ খো ভগৰা আযস্মন্তং সারিপুত্তং আরব্ভ সুসিমং দেৰপুত্তং গাথায পচ্চভাসি –
Atha kho bhagavā āyasmantaṃ sāriputtaṃ ārabbha susimaṃ devaputtaṃ gāthāya paccabhāsi –
‘‘পণ্ডিতোতি সমঞ্ঞাতো, সারিপুত্তো অকোধনো।
‘‘Paṇḍitoti samaññāto, sāriputto akodhano;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. সুসিমসুত্তৰণ্ণনা • 9. Susimasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. সুসিমসুত্তৰণ্ণনা • 9. Susimasuttavaṇṇanā
