| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
२. सुसीमसुत्तं
2. Susīmasuttaṃ
२४८. सावत्थियं। तत्र खो भगवा भिक्खू आमन्तेसि – ‘‘भिक्खवो’’ति। ‘‘भदन्ते’’ति ते भिक्खू भगवतो पच्चस्सोसुं। भगवा एतदवोच –
248. Sāvatthiyaṃ. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘भूतपुब्बं, भिक्खवे, असुरा देवे अभियंसु। अथ खो, भिक्खवे, सक्को देवानमिन्दो सुसीमं 1 देवपुत्तं आमन्तेसि – ‘एते, तात सुसीम, असुरा देवे अभियन्ति। गच्छ, तात सुसीम, असुरे पच्चुय्याही’ति। ‘एवं भद्दन्तवा’ति खो, भिक्खवे, सुसीमो देवपुत्तो सक्कस्स देवानमिन्दस्स पटिस्सुत्वा पमादं आपादेसि। दुतियम्पि खो, भिक्खवे, सक्को देवानमिन्दो सुसीमं देवपुत्तं आमन्तेसि…पे॰… दुतियम्पि पमादं आपादेसि। ततियम्पि खो, भिक्खवे, सक्को देवानमिन्दो सुसीमं देवपुत्तं आमन्तेसि…पे॰… ततियम्पि पमादं आपादेसि। अथ खो, भिक्खवे, सक्को देवानमिन्दो सुसीमं देवपुत्तं गाथाय अज्झभासि –
‘‘Bhūtapubbaṃ, bhikkhave, asurā deve abhiyaṃsu. Atha kho, bhikkhave, sakko devānamindo susīmaṃ 2 devaputtaṃ āmantesi – ‘ete, tāta susīma, asurā deve abhiyanti. Gaccha, tāta susīma, asure paccuyyāhī’ti. ‘Evaṃ bhaddantavā’ti kho, bhikkhave, susīmo devaputto sakkassa devānamindassa paṭissutvā pamādaṃ āpādesi. Dutiyampi kho, bhikkhave, sakko devānamindo susīmaṃ devaputtaṃ āmantesi…pe… dutiyampi pamādaṃ āpādesi. Tatiyampi kho, bhikkhave, sakko devānamindo susīmaṃ devaputtaṃ āmantesi…pe… tatiyampi pamādaṃ āpādesi. Atha kho, bhikkhave, sakko devānamindo susīmaṃ devaputtaṃ gāthāya ajjhabhāsi –
‘‘अनुट्ठहं अवायामं, सुखं यत्राधिगच्छति।
‘‘Anuṭṭhahaṃ avāyāmaṃ, sukhaṃ yatrādhigacchati;
सुसीम तत्थ गच्छाहि, मञ्च तत्थेव पापया’’ति॥
Susīma tattha gacchāhi, mañca tattheva pāpayā’’ti.
‘‘अलस्वस्स अनुट्ठाता, न च किच्चानि कारये।
‘‘Alasvassa anuṭṭhātā, na ca kiccāni kāraye;
सब्बकामसमिद्धस्स, तं मे सक्क वरं दिसा’’ति॥
Sabbakāmasamiddhassa, taṃ me sakka varaṃ disā’’ti.
‘‘यत्थालसो अनुट्ठाता, अच्चन्तं सुखमेधति।
‘‘Yatthālaso anuṭṭhātā, accantaṃ sukhamedhati;
सुसीम तत्थ गच्छाहि, मञ्च तत्थेव पापया’’ति॥
Susīma tattha gacchāhi, mañca tattheva pāpayā’’ti.
‘‘अकम्मुना देवसेट्ठ, सक्क विन्देमु यं सुखं।
‘‘Akammunā devaseṭṭha, sakka vindemu yaṃ sukhaṃ;
असोकं अनुपायासं, तं मे सक्क वरं दिसा’’ति॥
Asokaṃ anupāyāsaṃ, taṃ me sakka varaṃ disā’’ti.
‘‘सचे अत्थि अकम्मेन, कोचि क्वचि न जीवति।
‘‘Sace atthi akammena, koci kvaci na jīvati;
निब्बानस्स हि सो मग्गो, सुसीम तत्थ गच्छाहि।
Nibbānassa hi so maggo, susīma tattha gacchāhi;
मञ्च तत्थेव पापया’’ति॥
Mañca tattheva pāpayā’’ti.
‘‘सो हि नाम, भिक्खवे, सक्को देवानमिन्दो सकं पुञ्ञफलं उपजीवमानो देवानं तावतिंसानं इस्सरियाधिपच्चं रज्जं कारेन्तो उट्ठानवीरियस्स वण्णवादी भविस्सति। इध खो तं, भिक्खवे, सोभेथ, यं तुम्हे एवं स्वाक्खाते धम्मविनये पब्बजिता समाना उट्ठहेय्याथ घटेय्याथ वायमेय्याथ अप्पत्तस्स पत्तिया, अनधिगतस्स अधिगमाय, असच्छिकतस्स सच्छिकिरियाया’’ति।
‘‘So hi nāma, bhikkhave, sakko devānamindo sakaṃ puññaphalaṃ upajīvamāno devānaṃ tāvatiṃsānaṃ issariyādhipaccaṃ rajjaṃ kārento uṭṭhānavīriyassa vaṇṇavādī bhavissati. Idha kho taṃ, bhikkhave, sobhetha, yaṃ tumhe evaṃ svākkhāte dhammavinaye pabbajitā samānā uṭṭhaheyyātha ghaṭeyyātha vāyameyyātha appattassa pattiyā, anadhigatassa adhigamāya, asacchikatassa sacchikiriyāyā’’ti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / २. सुसीमसुत्तवण्णना • 2. Susīmasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / २. सुसीमसुत्तवण्णना • 2. Susīmasuttavaṇṇanā
