Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya

    ༩. སུསིམསུཏྟཾ

    9. Susimasuttaṃ

    ༡༡༠. སཱཝཏྠིནིདཱནཾ ། ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ ཨཱནནྡཾ བྷགཝཱ ཨེཏདཝོཙ – ‘‘ཏུཡ྄ཧམྤི ནོ, ཨཱནནྡ, སཱརིཔུཏྟོ རུཙྩཏཱི’’ཏི?

    110. Sāvatthinidānaṃ . Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘tuyhampi no, ānanda, sāriputto ruccatī’’ti?

    ‘‘ཀསྶ ཧི ནཱམ, བྷནྟེ, ཨབཱལསྶ ཨདུཊྛསྶ ཨམཱུལ༹ྷསྶ ཨཝིཔལླཏྠཙིཏྟསྶ ཨཱཡསྨཱ སཱརིཔུཏྟོ ན རུཙྩེཡྻ? པཎྜིཏོ, བྷནྟེ, ཨཱཡསྨཱ སཱརིཔུཏྟོ ། མཧཱཔཉྙོ, བྷནྟེ, ཨཱཡསྨཱ སཱརིཔུཏྟོ། པུཐུཔཉྙོ, བྷནྟེ, ཨཱཡསྨཱ སཱརིཔུཏྟོ། ཧཱསཔཉྙོ 1, བྷནྟེ, ཨཱཡསྨཱ སཱརིཔུཏྟོ། ཛཝནཔཉྙོ, བྷནྟེ, ཨཱཡསྨཱ སཱརིཔུཏྟོ། ཏིཀྑཔཉྙོ, བྷནྟེ, ཨཱཡསྨཱ སཱརིཔུཏྟོ། ནིབྦེདྷིཀཔཉྙོ, བྷནྟེ, ཨཱཡསྨཱ སཱརིཔུཏྟོ། ཨཔྤིཙྪོ, བྷནྟེ, ཨཱཡསྨཱ སཱརིཔུཏྟོ། སནྟུཊྛོ, བྷནྟེ, ཨཱཡསྨཱ སཱརིཔུཏྟོ། པཝིཝིཏྟོ, བྷནྟེ, ཨཱཡསྨཱ སཱརིཔུཏྟོ། ཨསཾསཊྛོ, བྷནྟེ, ཨཱཡསྨཱ སཱརིཔུཏྟོ། ཨཱརདྡྷཝཱིརིཡོ, བྷནྟེ, ཨཱཡསྨཱ སཱརིཔུཏྟོ། ཝཏྟཱ, བྷནྟེ, ཨཱཡསྨཱ སཱརིཔུཏྟོ། ཝཙནཀྑམོ, བྷནྟེ, ཨཱཡསྨཱ སཱརིཔུཏྟོ། ཙོདཀོ, བྷནྟེ, ཨཱཡསྨཱ སཱརིཔུཏྟོ། པཱཔགརཧཱི, བྷནྟེ, ཨཱཡསྨཱ སཱརིཔུཏྟོ། ཀསྶ ཧི ནཱམ, བྷནྟེ, ཨབཱལསྶ ཨདུཊྛསྶ ཨམཱུལ༹ྷསྶ ཨཝིཔལླཏྠཙིཏྟསྶ ཨཱཡསྨཱ སཱརིཔུཏྟོ ན རུཙྩེཡྻཱ’’ཏི?

    ‘‘Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyya? Paṇḍito, bhante, āyasmā sāriputto . Mahāpañño, bhante, āyasmā sāriputto. Puthupañño, bhante, āyasmā sāriputto. Hāsapañño 2, bhante, āyasmā sāriputto. Javanapañño, bhante, āyasmā sāriputto. Tikkhapañño, bhante, āyasmā sāriputto. Nibbedhikapañño, bhante, āyasmā sāriputto. Appiccho, bhante, āyasmā sāriputto. Santuṭṭho, bhante, āyasmā sāriputto. Pavivitto, bhante, āyasmā sāriputto. Asaṃsaṭṭho, bhante, āyasmā sāriputto. Āraddhavīriyo, bhante, āyasmā sāriputto. Vattā, bhante, āyasmā sāriputto. Vacanakkhamo, bhante, āyasmā sāriputto. Codako, bhante, āyasmā sāriputto. Pāpagarahī, bhante, āyasmā sāriputto. Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyyā’’ti?

    ‘‘ཨེཝམེཏཾ , ཨཱནནྡ, ཨེཝམེཏཾ, ཨཱནནྡ! ཀསྶ ཧི ནཱམ, ཨཱནནྡ, ཨབཱལསྶ ཨདུཊྛསྶ ཨམཱུལ༹ྷསྶ ཨཝིཔལླཏྠཙིཏྟསྶ སཱརིཔུཏྟོ ན རུཙྩེཡྻ? པཎྜིཏོ, ཨཱནནྡ, སཱརིཔུཏྟོ། མཧཱཔཉྙོ, ཨཱནནྡ, སཱརིཔུཏྟོ། པུཐུཔཉྙོ, ཨཱནནྡ, སཱརིཔུཏྟོ། ཧཱསཔཉྙོ, ཨཱནནྡ, སཱརིཔུཏྟོ། ཛཝནཔཉྙོ, ཨཱནནྡ, སཱརིཔུཏྟོ། ཏིཀྑཔཉྙོ, ཨཱནནྡ, སཱརིཔུཏྟོ། ནིབྦེདྷིཀཔཉྙོ, ཨཱནནྡ, སཱརིཔུཏྟོ། ཨཔྤིཙྪོ, ཨཱནནྡ, སཱརིཔུཏྟོ། སནྟུཊྛོ, ཨཱནནྡ, སཱརིཔུཏྟོ། པཝིཝིཏྟོ, ཨཱནནྡ, སཱརིཔུཏྟོ། ཨསཾསཊྛོ, ཨཱནནྡ, སཱརིཔུཏྟོ། ཨཱརདྡྷཝཱིརིཡོ, ཨཱནནྡ, སཱརིཔུཏྟོ། ཝཏྟཱ, ཨཱནནྡ, སཱརིཔུཏྟོ། ཝཙནཀྑམོ, ཨཱནནྡ, སཱརིཔུཏྟོ ། ཙོདཀོ, ཨཱནནྡ, སཱརིཔུཏྟོ། པཱཔགརཧཱི, ཨཱནནྡ, སཱརིཔུཏྟོ། ཀསྶ ཧི ནཱམ, ཨཱནནྡ, ཨབཱལསྶ ཨདུཊྛསྶ ཨམཱུལ༹ྷསྶ ཨཝིཔལླཏྠཙིཏྟསྶ སཱརིཔུཏྟོ ན རུཙྩེཡྻཱ’’ཏི?

    ‘‘Evametaṃ , ānanda, evametaṃ, ānanda! Kassa hi nāma, ānanda, abālassa aduṭṭhassa amūḷhassa avipallatthacittassa sāriputto na rucceyya? Paṇḍito, ānanda, sāriputto. Mahāpañño, ānanda, sāriputto. Puthupañño, ānanda, sāriputto. Hāsapañño, ānanda, sāriputto. Javanapañño, ānanda, sāriputto. Tikkhapañño, ānanda, sāriputto. Nibbedhikapañño, ānanda, sāriputto. Appiccho, ānanda, sāriputto. Santuṭṭho, ānanda, sāriputto. Pavivitto, ānanda, sāriputto. Asaṃsaṭṭho, ānanda, sāriputto. Āraddhavīriyo, ānanda, sāriputto. Vattā, ānanda, sāriputto. Vacanakkhamo, ānanda, sāriputto . Codako, ānanda, sāriputto. Pāpagarahī, ānanda, sāriputto. Kassa hi nāma, ānanda, abālassa aduṭṭhassa amūḷhassa avipallatthacittassa sāriputto na rucceyyā’’ti?

    ཨཐ ཁོ སུསིམོ 3 དེཝཔུཏྟོ ཨཱཡསྨཏོ སཱརིཔུཏྟསྶ ཝཎྞེ བྷཉྙམཱནེ མཧཏིཡཱ དེཝཔུཏྟཔརིསཱཡ པརིཝུཏོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏོ ཁོ སུསིམོ དེཝཔུཏྟོ བྷགཝནྟཾ ཨེཏདཝོཙ –

    Atha kho susimo 4 devaputto āyasmato sāriputtassa vaṇṇe bhaññamāne mahatiyā devaputtaparisāya parivuto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho susimo devaputto bhagavantaṃ etadavoca –

    ‘‘ཨེཝམེཏཾ , བྷགཝཱ, ཨེཝམེཏཾ, སུགཏ། ཀསྶ ཧི ནཱམ, བྷནྟེ, ཨབཱལསྶ ཨདུཊྛསྶ ཨམཱུལ༹ྷསྶ ཨཝིཔལླཏྠཙིཏྟསྶ ཨཱཡསྨཱ སཱརིཔུཏྟོ ན རུཙྩེཡྻ? པཎྜིཏོ, བྷནྟེ, ཨཱཡསྨཱ སཱརིཔུཏྟོ། མཧཱཔཉྙོ, བྷནྟེ, པུཐུཔཉྙོ, བྷནྟེ, ཧཱསཔཉྙོ, བྷནྟེ, ཛཝནཔཉྙོ, བྷནྟེ, ཏིཀྑཔཉྙོ, བྷནྟེ, ནིབྦེདྷིཀཔཉྙོ, བྷནྟེ, ཨཔྤིཙྪོ, བྷནྟེ, སནྟུཊྛོ, བྷནྟེ, པཝིཝིཏྟོ, བྷནྟེ, ཨསཾསཊྛོ, བྷནྟེ, ཨཱརདྡྷཝཱིརིཡོ, བྷནྟེ, ཝཏྟཱ, བྷནྟེ, ཝཙནཀྑམོ, བྷནྟེ, ཙོདཀོ, བྷནྟེ, པཱཔགརཧཱི, བྷནྟེ, ཨཱཡསྨཱ སཱརིཔུཏྟོ། ཀསྶ ཧི ནཱམ, བྷནྟེ, ཨབཱལསྶ ཨདུཊྛསྶ ཨམཱུལ༹ྷསྶ ཨཝིཔལླཏྠཙིཏྟསྶ ཨཱཡསྨཱ སཱརིཔུཏྟོ ན རུཙྩེཡྻ?

    ‘‘Evametaṃ , bhagavā, evametaṃ, sugata. Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyya? Paṇḍito, bhante, āyasmā sāriputto. Mahāpañño, bhante, puthupañño, bhante, hāsapañño, bhante, javanapañño, bhante, tikkhapañño, bhante, nibbedhikapañño, bhante, appiccho, bhante, santuṭṭho, bhante, pavivitto, bhante, asaṃsaṭṭho, bhante, āraddhavīriyo, bhante, vattā, bhante, vacanakkhamo, bhante, codako, bhante, pāpagarahī, bhante, āyasmā sāriputto. Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyya?

    ‘‘ཨཧམྤི ཧི, བྷནྟེ, ཡཉྙདེཝ དེཝཔུཏྟཔརིསཾ ཨུཔསངྐམིཾ, ཨེཏདེཝ བཧུལཾ སདྡཾ སུཎཱམི – ‘པཎྜིཏོ ཨཱཡསྨཱ སཱརིཔུཏྟོ; མཧཱཔཉྙོ ཨཱཡསྨཱ, པུཐུཔཉྙོ ཨཱཡསྨཱ, ཧཱསཔཉྙོ ཨཱཡསྨཱ, ཛཝནཔཉྙོ ཨཱཡསྨཱ, ཏིཀྑཔཉྙོ ཨཱཡསྨཱ, ནིབྦེདྷིཀཔཉྙོ ཨཱཡསྨཱ, ཨཔྤིཙྪོ ཨཱཡསྨཱ, སནྟུཊྛོ ཨཱཡསྨཱ, པཝིཝིཏྟོ ཨཱཡསྨཱ, ཨསཾསཊྛོ ཨཱཡསྨཱ, ཨཱརདྡྷཝཱིརིཡོ ཨཱཡསྨཱ, ཝཏྟཱ ཨཱཡསྨཱ, ཝཙནཀྑམོ ཨཱཡསྨཱ, ཙོདཀོ ཨཱཡསྨཱ, པཱཔགརཧཱི ཨཱཡསྨཱ སཱརིཔུཏྟོ’ཏི ། ཀསྶ ཧི ནཱམ, བྷནྟེ, ཨབཱལསྶ ཨདུཊྛསྶ ཨམཱུལ༹ྷསྶ ཨཝིཔལླཏྠཙིཏྟསྶ ཨཱཡསྨཱ སཱརིཔུཏྟོ ན རུཙྩེཡྻཱ’’ཏི?

    ‘‘Ahampi hi, bhante, yaññadeva devaputtaparisaṃ upasaṅkamiṃ, etadeva bahulaṃ saddaṃ suṇāmi – ‘paṇḍito āyasmā sāriputto; mahāpañño āyasmā, puthupañño āyasmā, hāsapañño āyasmā, javanapañño āyasmā, tikkhapañño āyasmā, nibbedhikapañño āyasmā, appiccho āyasmā, santuṭṭho āyasmā, pavivitto āyasmā, asaṃsaṭṭho āyasmā, āraddhavīriyo āyasmā, vattā āyasmā, vacanakkhamo āyasmā, codako āyasmā, pāpagarahī āyasmā sāriputto’ti . Kassa hi nāma, bhante, abālassa aduṭṭhassa amūḷhassa avipallatthacittassa āyasmā sāriputto na rucceyyā’’ti?

    ཨཐ ཁོ སུསིམསྶ དེཝཔུཏྟསྶ དེཝཔུཏྟཔརིསཱ ཨཱཡསྨཏོ སཱརིཔུཏྟསྶ ཝཎྞེ བྷཉྙམཱནེ ཨཏྟམནཱ པམུདིཏཱ པཱིཏིསོམནསྶཛཱཏཱ ཨུཙྩཱཝཙཱ ཝཎྞནིབྷཱ ཨུཔདཾསེཏི།

    Atha kho susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.

    ‘‘སེཡྻཐཱཔི ནཱམ མཎི ཝེལུ༹རིཡོ སུབྷོ ཛཱཏིམཱ ཨཊྛཾསོ སུཔརིཀམྨཀཏོ པཎྜུཀམྦལེ ནིཀྑིཏྟོ བྷཱསཏེ ཙ ཏཔཏེ ཙ ཝིརོཙཏི ཙ; ཨེཝམེཝཾ སུསིམསྶ དེཝཔུཏྟསྶ དེཝཔུཏྟཔརིསཱ ཨཱཡསྨཏོ སཱརིཔུཏྟསྶ ཝཎྞེ བྷཉྙམཱནེ ཨཏྟམནཱ པམུདིཏཱ པཱིཏིསོམནསྶཛཱཏཱ ཨུཙྩཱཝཙཱ ཝཎྞནིབྷཱ ཨུཔདཾསེཏི།

    ‘‘Seyyathāpi nāma maṇi veḷuriyo subho jātimā aṭṭhaṃso suparikammakato paṇḍukambale nikkhitto bhāsate ca tapate ca virocati ca; evamevaṃ susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.

    ‘‘སེཡྻཐཱཔི ནཱམ ནིཀྑཾ ཛམྦོནདཾ དཀྑཀམྨཱརཔུཏྟཨུཀྐཱམུཁསུཀུསལསམྤཧཊྛཾ པཎྜུཀམྦལེ ནིཀྑིཏྟཾ བྷཱསཏེ ཙ ཏཔཏེ ཙ ཝིརོཙཏི ཙ; ཨེཝམེཝཾ སུསིམསྶ དེཝཔུཏྟསྶ དེཝཔུཏྟཔརིསཱ ཨཱཡསྨཏོ སཱརིཔུཏྟསྶ ཝཎྞེ བྷཉྙམཱནེ ཨཏྟམནཱ པམུདིཏཱ པཱིཏིསོམནསྶཛཱཏཱ ཨུཙྩཱཝཙཱ ཝཎྞནིབྷཱ ཨུཔདཾསེཏི།

    ‘‘Seyyathāpi nāma nikkhaṃ jambonadaṃ dakkhakammāraputtaukkāmukhasukusalasampahaṭṭhaṃ paṇḍukambale nikkhittaṃ bhāsate ca tapate ca virocati ca; evamevaṃ susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.

    ‘‘སེཡྻཐཱཔི ནཱམ སརདསམཡེ ཝིདྡྷེ ཝིགཏཝལཱཧཀེ དེཝེ རཏྟིཡཱ པཙྩཱུསསམཡཾ ཨོསདྷིཏཱརཀཱ བྷཱསཏེ ཙ ཏཔཏེ ཙ ཝིརོཙཏི ཙ; ཨེཝམེཝཾ སུསིམསྶ དེཝཔུཏྟསྶ དེཝཔུཏྟཔརིསཱ ཨཱཡསྨཏོ སཱརིཔུཏྟསྶ ཝཎྞེ བྷཉྙམཱནེ ཨཏྟམནཱ པམུདིཏཱ པཱིཏིསོམནསྶཛཱཏཱ ཨུཙྩཱཝཙཱ ཝཎྞནིབྷཱ ཨུཔདཾསེཏི།

    ‘‘Seyyathāpi nāma saradasamaye viddhe vigatavalāhake deve rattiyā paccūsasamayaṃ osadhitārakā bhāsate ca tapate ca virocati ca; evamevaṃ susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.

    ‘‘སེཡྻཐཱཔི ནཱམ སརདསམཡེ ཝིདྡྷེ ཝིགཏཝལཱཧཀེ དེཝེ ཨཱདིཙྩོ ནབྷཾ ཨབྦྷུསྶཀྐམཱནོ 5 སབྦཾ ཨཱཀཱསགཏཾ ཏམགཏཾ ཨབྷིཝིཧཙྩ བྷཱསཏེ ཙ ཏཔཏེ ཙ ཝིརོཙཏི ཙ; ཨེཝམེཝཾ སུསིམསྶ དེཝཔུཏྟསྶ དེཝཔུཏྟཔརིསཱ ཨཱཡསྨཏོ སཱརིཔུཏྟསྶ ཝཎྞེ བྷཉྙམཱནེ ཨཏྟམནཱ པམུདིཏཱ པཱིཏིསོམནསྶཛཱཏཱ ཨུཙྩཱཝཙཱ ཝཎྞནིབྷཱ ཨུཔདཾསེཏི།

    ‘‘Seyyathāpi nāma saradasamaye viddhe vigatavalāhake deve ādicco nabhaṃ abbhussakkamāno 6 sabbaṃ ākāsagataṃ tamagataṃ abhivihacca bhāsate ca tapate ca virocati ca; evamevaṃ susimassa devaputtassa devaputtaparisā āyasmato sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaṃseti.

    ཨཐ ཁོ སུསིམོ དེཝཔུཏྟོ ཨཱཡསྨནྟཾ སཱརིཔུཏྟཾ ཨཱརབྦྷ བྷགཝཏོ སནྟིཀེ ཨིམཾ གཱཐཾ ཨབྷཱསི –

    Atha kho susimo devaputto āyasmantaṃ sāriputtaṃ ārabbha bhagavato santike imaṃ gāthaṃ abhāsi –

    ‘‘པཎྜིཏོཏི སམཉྙཱཏོ, སཱརིཔུཏྟོ ཨཀོདྷནོ།

    ‘‘Paṇḍitoti samaññāto, sāriputto akodhano;

    ཨཔྤིཙྪོ སོརཏོ དནྟོ, སཏྠུཝཎྞཱབྷཏོ ཨིསཱི’’ཏི༎

    Appiccho sorato danto, satthuvaṇṇābhato isī’’ti.

    ཨཐ ཁོ བྷགཝཱ ཨཱཡསྨནྟཾ སཱརིཔུཏྟཾ ཨཱརབྦྷ སུསིམཾ དེཝཔུཏྟཾ གཱཐཱཡ པཙྩབྷཱསི –

    Atha kho bhagavā āyasmantaṃ sāriputtaṃ ārabbha susimaṃ devaputtaṃ gāthāya paccabhāsi –

    ‘‘པཎྜིཏོཏི སམཉྙཱཏོ, སཱརིཔུཏྟོ ཨཀོདྷནོ།

    ‘‘Paṇḍitoti samaññāto, sāriputto akodhano;

    ཨཔྤིཙྪོ སོརཏོ དནྟོ, ཀཱལཾ ཀངྑཏི སུདནྟོ’’ 7 ཏི༎

    Appiccho sorato danto, kālaṃ kaṅkhati sudanto’’ 8 ti.




    Next: ༡༠. ནཱནཱཏིཏྠིཡསཱཝཀསུཏྟཾ • 10. Nānātitthiyasāvakasuttaṃ




    Footnotes:
    1. ཧཱསུཔཉྙོ (སཱི॰)
    2. hāsupañño (sī.)
    3. སུསཱིམོ (སཱི॰)
    4. susīmo (sī.)
    5. ཨབྦྷུསྶུཀྐམཱནོ (སཱི॰ སྱཱ॰ ཀཾ॰ པཱི॰), ཨབྦྷུགྒམམཱནོ (དཱི॰ ནི॰ ༢.༢༥༨)
    6. abbhussukkamāno (sī. syā. kaṃ. pī.), abbhuggamamāno (dī. ni. 2.258)
    7. ཀཱལཾ ཀངྑཏི བྷཏཀོ སུདནྟོ (སཱི॰), ཀཱལཾ ཀངྑཏི བྷཱཝིཏོ སུདནྟོ (སྱཱ॰ ཀཾ॰), ཀཱལཾ ཀངྑཏི བྷཏིཀོ སུདནྟོ (པཱི॰)
    8. kālaṃ kaṅkhati bhatako sudanto (sī.), kālaṃ kaṅkhati bhāvito sudanto (syā. kaṃ.), kālaṃ kaṅkhati bhatiko sudanto (pī.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༩. སུསིམསུཏྟཝཎྞནཱ • 9. Susimasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༩. སུསིམསུཏྟཝཎྞནཱ • 9. Susimasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact