| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. ஸுஸிமஸுத்தவண்ணனா
10. Susimasuttavaṇṇanā
70. த³ஸமே க³ருகதோதி ஸப்³பே³ஹி தே³வமனுஸ்ஸேஹி பாஸாணச்ச²த்தங் விய சித்தேன க³ருகதோ. மானிதோதி மனேன பியாயிதோ. பூஜிதோதி சதுபச்சயபூஜாய பூஜிதோ. அபசிதோதி நீசவுத்திகரணேன அபசிதோ. ஸத்தா²ரஞ்ஹி தி³ஸ்வா மனுஸ்ஸா ஹத்தி²க்க²ந்தா⁴தீ³ஹி ஓதரந்தி மக்³க³ங் தெ³ந்தி, அங்ஸகூடதோ ஸாடகங் அபனெந்தி, ஆஸனதோ வுட்ட²ஹந்தி வந்த³ந்தி. ஏவங் ஸோ தேஹி அபசிதோ நாம ஹோதி. ஸுஸிமோதி ஏவங்னாமகோ வேத³ங்கே³ஸு குஸலோ பண்டி³தபரிப்³பா³ஜகோ. ஏஹி த்வந்தி தேஸங் கிர ஏதத³ஹோஸி – ‘‘ஸமணோ கோ³தமோ ந ஜாதிகொ³த்தாதீ³னி ஆக³ம்ம லாப⁴க்³க³ப்பத்தோ ஜாதோ, கவிஸெட்டோ² பனேஸ உத்தமகவிதாய ஸாவகானங் க³ந்த²ங் ப³ந்தி⁴த்வா தே³தி, தங் தே உக்³க³ண்ஹித்வா உபட்டா²கானங் உபனிஸின்னகத²ம்பி அனுமோத³னம்பி ஸரப⁴ஞ்ஞம்பீதி ஏவமாதீ³னி கதெ²ந்தி, தே தேஸங் பஸன்னா லாப⁴ங் உபஸங்ஹரந்தி. ஸசே மயங் யங் ஸமணோ கோ³தமோ ஜானாதி, ததோ தோ²கங் ஜானெய்யாம, அத்தனோ ஸமயங் தத்த² பக்கி²பித்வா மயம்பி உபட்டா²கானங் கதெ²ய்யாம, ததோ ஏதேஹி லாபி⁴தரா ப⁴வெய்யாம. கோ நு கோ² ஸமணஸ்ஸ கோ³தமஸ்ஸ ஸந்திகே பப்³ப³ஜித்வா கி²ப்பமேவ உக்³க³ண்ஹிதுங் ஸக்கி²ஸ்ஸதீ’’தி. தே ஏவங் சிந்தெத்வா ‘‘ஸுஸிமோ படிப³லோ’’தி தி³ஸ்வா தங் உபஸங்கமித்வா ஏவமாஹங்ஸு.
70. Dasame garukatoti sabbehi devamanussehi pāsāṇacchattaṃ viya cittena garukato. Mānitoti manena piyāyito. Pūjitoti catupaccayapūjāya pūjito. Apacitoti nīcavuttikaraṇena apacito. Satthārañhi disvā manussā hatthikkhandhādīhi otaranti maggaṃ denti, aṃsakūṭato sāṭakaṃ apanenti, āsanato vuṭṭhahanti vandanti. Evaṃ so tehi apacito nāma hoti. Susimoti evaṃnāmako vedaṅgesu kusalo paṇḍitaparibbājako. Ehi tvanti tesaṃ kira etadahosi – ‘‘samaṇo gotamo na jātigottādīni āgamma lābhaggappatto jāto, kaviseṭṭho panesa uttamakavitāya sāvakānaṃ ganthaṃ bandhitvā deti, taṃ te uggaṇhitvā upaṭṭhākānaṃ upanisinnakathampi anumodanampi sarabhaññampīti evamādīni kathenti, te tesaṃ pasannā lābhaṃ upasaṃharanti. Sace mayaṃ yaṃ samaṇo gotamo jānāti, tato thokaṃ jāneyyāma, attano samayaṃ tattha pakkhipitvā mayampi upaṭṭhākānaṃ katheyyāma, tato etehi lābhitarā bhaveyyāma. Ko nu kho samaṇassa gotamassa santike pabbajitvā khippameva uggaṇhituṃ sakkhissatī’’ti. Te evaṃ cintetvā ‘‘susimo paṭibalo’’ti disvā taṃ upasaṅkamitvā evamāhaṃsu.
யேனாயஸ்மா ஆனந்தோ³ தேனுபஸங்கமீதி கஸ்மா உபஸங்கமி? ஏவங் கிரஸ்ஸ அஹோஸி, ‘‘கஸ்ஸ நு கோ² ஸந்திகங் க³ந்த்வா அஹங் இமங் த⁴ம்மங் கி²ப்பங் லத்³து⁴ங் ஸக்கி²ஸ்ஸாமீ’’தி? ததோ சிந்தேஸி – ‘‘ஸமணோ கோ³தமோ க³ரு தேஜுஸ்ஸதோ³ நியமமனுயுத்தோ, ந ஸக்கா அகாலே உபஸங்கமிதுங், அஞ்ஞேபி ப³ஹூ க²த்தியாத³யோ ஸமணங் கோ³தமங் உபஸங்கமந்தி, தஸ்மிம்பி ஸமயே ந ஸக்கா உபஸங்கமிதுங். ஸாவகேஸுபிஸ்ஸ ஸாரிபுத்தோ மஹாபஞ்ஞோ விபஸ்ஸனாலக்க²ணம்ஹி ஏதத³க்³கே³ ட²பிதோ, மஹாமொக்³க³ல்லானோ ஸமாதி⁴லக்க²ணஸ்மிங் ஏதத³க்³கே³ ட²பிதோ, மஹாகஸ்ஸபோ து⁴தங்க³த⁴ரேஸு அனுருத்³தோ⁴ தி³ப்³ப³சக்கு²கேஸு, புண்ணோ மந்தாணிபுத்தோ த⁴ம்மகதி²கேஸு, உபாலித்தே²ரோ வினயத⁴ரேஸு ஏதத³க்³கே³ ட²பிதோ, அயங் பன ஆனந்தோ³ ப³ஹுஸ்ஸுதோ திபிடகத⁴ரோ, ஸத்தா²பிஸ்ஸ தத்த² தத்த² கதி²தங் த⁴ம்மங் ஆஹரித்வா கதே²தி, பஞ்சஸு டா²னேஸு ஏதத³க்³கே³ ட²பிதோ, அட்ட²ன்னங் வரானங் லாபீ⁴, சதூஹி அச்ச²ரியப்³பு⁴தத⁴ம்மேஹி ஸமன்னாக³தோ, தஸ்ஸ ஸமீபங் க³தோ கி²ப்பங் த⁴ம்மங் லத்³து⁴ங் ஸக்கி²ஸ்ஸாமீ’’தி. தஸ்மா யேனாயஸ்மா ஆனந்தோ³ தேனுபஸங்கமி.
Yenāyasmā ānando tenupasaṅkamīti kasmā upasaṅkami? Evaṃ kirassa ahosi, ‘‘kassa nu kho santikaṃ gantvā ahaṃ imaṃ dhammaṃ khippaṃ laddhuṃ sakkhissāmī’’ti? Tato cintesi – ‘‘samaṇo gotamo garu tejussado niyamamanuyutto, na sakkā akāle upasaṅkamituṃ, aññepi bahū khattiyādayo samaṇaṃ gotamaṃ upasaṅkamanti, tasmimpi samaye na sakkā upasaṅkamituṃ. Sāvakesupissa sāriputto mahāpañño vipassanālakkhaṇamhi etadagge ṭhapito, mahāmoggallāno samādhilakkhaṇasmiṃ etadagge ṭhapito, mahākassapo dhutaṅgadharesu anuruddho dibbacakkhukesu, puṇṇo mantāṇiputto dhammakathikesu, upālitthero vinayadharesu etadagge ṭhapito, ayaṃ pana ānando bahussuto tipiṭakadharo, satthāpissa tattha tattha kathitaṃ dhammaṃ āharitvā katheti, pañcasu ṭhānesu etadagge ṭhapito, aṭṭhannaṃ varānaṃ lābhī, catūhi acchariyabbhutadhammehi samannāgato, tassa samīpaṃ gato khippaṃ dhammaṃ laddhuṃ sakkhissāmī’’ti. Tasmā yenāyasmā ānando tenupasaṅkami.
யேன ப⁴க³வா தேனுபஸங்கமீதி கஸ்மா ஸயங் அபப்³பா³ஜெத்வா உபஸங்கமி? ஏவங் கிரஸ்ஸ அஹோஸி – ‘‘அயங் தித்தி²யஸமயே பாடியேக்கோ ‘அஹங் ஸத்தா²’தி படிஜானந்தோ சரதி, பப்³ப³ஜித்வா ஸாஸனஸ்ஸ அலாபா⁴யபி பரிஸக்கெய்ய. ந கோ² பனஸ்ஸாஹங் அஜ்ஜா²ஸயங் ஆஜானாமி, ஸத்தா² ஜானிஸ்ஸதீ’’தி. தஸ்மா தங் ஆதா³ய யேன ப⁴க³வா தேனுபஸங்கமி. தேனஹானந்த³, ஸுஸிமங் பப்³பா³ஜேதா²தி ஸத்தா² கிர சிந்தேஸி – ‘‘அயங் பரிப்³பா³ஜகோ தித்தி²யஸமயே ‘அஹங் பாடியேக்கோ ஸத்தா²’தி படிஜானமானோ சரதி, ‘இத⁴ மக்³க³ப்³ரஹ்மசரியங் சரிதுங் இச்சா²மீ’தி கிர வத³தி. கிங் நு கோ² மயி பஸன்னோ, உதா³ஹு மய்ஹங் ஸாவகேஸு, உதா³ஹு மய்ஹங் வா மம ஸாவகானங் வா த⁴ம்மகதா²ய பஸன்னோ’’தி? அத²ஸ்ஸ ஏகட்டா²னேபி பஸாதா³பா⁴வங் ஞத்வா, ‘‘அயங் மம ஸாஸனே த⁴ம்மங் தே²னெஸ்ஸாமீதி பப்³ப³ஜதி. இதிஸ்ஸ ஆக³மனங் அபரிஸுத்³த⁴ங்; நிப்ப²த்தி நு கோ² கீதி³ஸா’’தி? ஓலோகெந்தோ ‘‘கிஞ்சாபி ‘த⁴ம்மங் தே²னெஸ்ஸாமீ’தி பப்³ப³ஜதி, கதிபாஹேனேவ பன க⁴டெத்வா அரஹத்தங் க³ண்ஹிஸ்ஸதீ’’தி ஞத்வா ‘‘தேனஹானந்த³, ஸுஸிமங் பப்³பா³ஜேதா²’’தி ஆஹ.
Yenabhagavā tenupasaṅkamīti kasmā sayaṃ apabbājetvā upasaṅkami? Evaṃ kirassa ahosi – ‘‘ayaṃ titthiyasamaye pāṭiyekko ‘ahaṃ satthā’ti paṭijānanto carati, pabbajitvā sāsanassa alābhāyapi parisakkeyya. Na kho panassāhaṃ ajjhāsayaṃ ājānāmi, satthā jānissatī’’ti. Tasmā taṃ ādāya yena bhagavā tenupasaṅkami. Tenahānanda, susimaṃ pabbājethāti satthā kira cintesi – ‘‘ayaṃ paribbājako titthiyasamaye ‘ahaṃ pāṭiyekko satthā’ti paṭijānamāno carati, ‘idha maggabrahmacariyaṃ carituṃ icchāmī’ti kira vadati. Kiṃ nu kho mayi pasanno, udāhu mayhaṃ sāvakesu, udāhu mayhaṃ vā mama sāvakānaṃ vā dhammakathāya pasanno’’ti? Athassa ekaṭṭhānepi pasādābhāvaṃ ñatvā, ‘‘ayaṃ mama sāsane dhammaṃ thenessāmīti pabbajati. Itissa āgamanaṃ aparisuddhaṃ; nipphatti nu kho kīdisā’’ti? Olokento ‘‘kiñcāpi ‘dhammaṃ thenessāmī’ti pabbajati, katipāheneva pana ghaṭetvā arahattaṃ gaṇhissatī’’ti ñatvā ‘‘tenahānanda, susimaṃ pabbājethā’’ti āha.
அஞ்ஞா ப்³யாகதா ஹோதீதி தே கிர பி⁴க்கூ² ஸத்து² ஸந்திகே கம்மட்டா²னங் க³ஹெத்வா தேமாஸங் வஸ்ஸங் வஸந்தா தஸ்மிங்யேவ அந்தோதேமாஸே க⁴டெந்தா வாயமந்தா அரஹத்தங் படிலபி⁴ங்ஸு. தே ‘‘படிலத்³த⁴கு³ணங் ஸத்து² ஆரோசெஸ்ஸாமா’’தி பவாரிதபவாரணா ஸேனாஸனங் ஸங்ஸாமெத்வா ஸத்து² ஸந்திகங் ஆக³ந்த்வா அத்தனோ படிலத்³த⁴கு³ணங் ஆரோசேஸுங். தங் ஸந்தா⁴யேதங் வுத்தங். அஞ்ஞாதி அரஹத்தஸ்ஸ நாமங். ப்³யாகதாதி ஆரோசிதா. அஸ்ஸோஸீதி ஸோ கிர ஓஹிதஸோதோ ஹுத்வா தேஸங் தேஸங் பி⁴க்கூ²னங் டி²தட்டா²னங் க³ச்ச²தி தங் தங் கத²ங் ஸுணிதுகாமோ. யேன தே பி⁴க்கூ² தேனுபஸங்கமீதி கஸ்மா உபஸங்கமி? தங் கிரஸ்ஸ பவத்திங் ஸுத்வா ஏதத³ஹோஸி – ‘‘அஞ்ஞா நாம இமஸ்மிங் ஸாஸனே பரமப்பமாணங் ஸாரபூ⁴தா ஆசரியமுட்டி² மஞ்ஞே ப⁴விஸ்ஸதி, புச்சி²த்வா நங் ஜானிஸ்ஸாமீ’’தி. தஸ்மா உபஸங்கமி.
Aññā byākatā hotīti te kira bhikkhū satthu santike kammaṭṭhānaṃ gahetvā temāsaṃ vassaṃ vasantā tasmiṃyeva antotemāse ghaṭentā vāyamantā arahattaṃ paṭilabhiṃsu. Te ‘‘paṭiladdhaguṇaṃ satthu ārocessāmā’’ti pavāritapavāraṇā senāsanaṃ saṃsāmetvā satthu santikaṃ āgantvā attano paṭiladdhaguṇaṃ ārocesuṃ. Taṃ sandhāyetaṃ vuttaṃ. Aññāti arahattassa nāmaṃ. Byākatāti ārocitā. Assosīti so kira ohitasoto hutvā tesaṃ tesaṃ bhikkhūnaṃ ṭhitaṭṭhānaṃ gacchati taṃ taṃ kathaṃ suṇitukāmo. Yena te bhikkhū tenupasaṅkamīti kasmā upasaṅkami? Taṃ kirassa pavattiṃ sutvā etadahosi – ‘‘aññā nāma imasmiṃ sāsane paramappamāṇaṃ sārabhūtā ācariyamuṭṭhi maññe bhavissati, pucchitvā naṃ jānissāmī’’ti. Tasmā upasaṅkami.
அனேகவிஹிதந்தி அனேகவித⁴ங். இத்³தி⁴வித⁴ந்தி இத்³தி⁴கொட்டா²ஸங். ஆவிபா⁴வங் திரோபா⁴வந்தி ஆவிபா⁴வங் க³ஹெத்வா திரோபா⁴வங், திரோபா⁴வங் க³ஹெத்வா ஆவிபா⁴வங் காதுங் ஸக்கோதா²தி புச்ச²தி. திரோகுட்டந்தி பரகுட்டங். இதரபத³த்³வயேபி ஏஸேவ நயோ. உம்முஜ்ஜனிமுஜ்ஜந்தி உம்முஜ்ஜனஞ்ச நிமுஜ்ஜனஞ்ச. பல்லங்கேனாதி பல்லங்கப³ந்த⁴னேன. கமதா²தி நிஸீதி³துங் வா க³ந்துங் வா ஸக்கோதா²தி புச்ச²தி? பக்கீ² ஸகுணோதி பக்க²யுத்தோ ஸகுணோ. அயமெத்த² ஸங்கே²போ, வித்தா²ரதோ பன இமஸ்ஸ இத்³தி⁴வித⁴ஸ்ஸ, இதோ பரேஸங் தி³ப்³ப³ஸோதாதீ³னஞ்ச வண்ணனானயோ விஸுத்³தி⁴மக்³கே³ வுத்தனயேன வேதி³தப்³போ³தி.
Anekavihitanti anekavidhaṃ. Iddhividhanti iddhikoṭṭhāsaṃ. Āvibhāvaṃ tirobhāvanti āvibhāvaṃ gahetvā tirobhāvaṃ, tirobhāvaṃ gahetvā āvibhāvaṃ kātuṃ sakkothāti pucchati. Tirokuṭṭanti parakuṭṭaṃ. Itarapadadvayepi eseva nayo. Ummujjanimujjanti ummujjanañca nimujjanañca. Pallaṅkenāti pallaṅkabandhanena. Kamathāti nisīdituṃ vā gantuṃ vā sakkothāti pucchati? Pakkhī sakuṇoti pakkhayutto sakuṇo. Ayamettha saṅkhepo, vitthārato pana imassa iddhividhassa, ito paresaṃ dibbasotādīnañca vaṇṇanānayo visuddhimagge vuttanayena veditabboti.
ஸந்தா விமொக்கா²தி அங்க³ஸந்ததாய சேவ ஆரம்மணஸந்ததாய ச ஸந்தா ஆருப்பவிமொக்கா². காயேன பு²ஸித்வாதி நாமகாயேன பு²ஸித்வா படிலபி⁴த்வா. பஞ்ஞாவிமுத்தா கோ² மயங், ஆவுஸோதி, ஆவுஸோ, மயங் நிஜ்ஜா²னகா ஸுக்க²விபஸ்ஸகா பஞ்ஞாமத்தேனேவ விமுத்தாதி த³ஸ்ஸேதி. ஆஜானெய்யாஸி வா த்வங், ஆவுஸோ ஸுஸிம, ந வா த்வங் ஆஜானெய்யாஸீதி கஸ்மா ஏவமாஹங்ஸு? ஏவங் கிர நேஸங் அஹோஸி – ‘‘மயங் இமஸ்ஸ அஜ்ஜா²ஸயங் க³ஹெத்வா கதே²துங் ந ஸக்கி²ஸ்ஸாம, த³ஸப³லங் பன புச்சி²த்வா நிக்கங்கோ² ப⁴விஸ்ஸதீ’’தி. த⁴ம்மட்டி²திஞாணந்தி விபஸ்ஸனாஞாணங், தங் பட²மதரங் உப்பஜ்ஜதி. நிப்³பா³னே ஞாணந்தி விபஸ்ஸனாய சிண்ணந்தே பவத்தமக்³க³ஞாணங், தங் பச்சா² உப்பஜ்ஜதி. தஸ்மா ப⁴க³வா ஏவமாஹ.
Santā vimokkhāti aṅgasantatāya ceva ārammaṇasantatāya ca santā āruppavimokkhā. Kāyena phusitvāti nāmakāyena phusitvā paṭilabhitvā. Paññāvimuttā kho mayaṃ, āvusoti, āvuso, mayaṃ nijjhānakā sukkhavipassakā paññāmatteneva vimuttāti dasseti. Ājāneyyāsi vā tvaṃ, āvuso susima, na vā tvaṃ ājāneyyāsīti kasmā evamāhaṃsu? Evaṃ kira nesaṃ ahosi – ‘‘mayaṃ imassa ajjhāsayaṃ gahetvā kathetuṃ na sakkhissāma, dasabalaṃ pana pucchitvā nikkaṅkho bhavissatī’’ti. Dhammaṭṭhitiñāṇanti vipassanāñāṇaṃ, taṃ paṭhamataraṃ uppajjati. Nibbāne ñāṇanti vipassanāya ciṇṇante pavattamaggañāṇaṃ, taṃ pacchā uppajjati. Tasmā bhagavā evamāha.
ஆஜானெய்யாஸி வாதிஆதி³ கஸ்மா வுத்தங்? வினாபி ஸமாதி⁴ங் ஏவங் ஞாணுப்பத்தித³ஸ்ஸனத்த²ங். இத³ஞ்ஹி வுத்தங் ஹோதி – ஸுஸிம, மக்³கோ³ வா ப²லங் வா ந ஸமாதி⁴னிஸ்ஸந்தோ³, ந ஸமாதி⁴ஆனிஸங்ஸோ, ந ஸமாதி⁴ஸ்ஸ நிப்ப²த்தி, விபஸ்ஸனாய பனேஸோ நிஸ்ஸந்தோ³, விபஸ்ஸனாய ஆனிஸங்ஸோ, விபஸ்ஸனாய நிப்ப²த்தி, தஸ்மா ஜானெய்யாஸி வா த்வங், ந வா த்வங் ஜானெய்யாஸி, அத² கோ² த⁴ம்மட்டி²திஞாணங் புப்³பே³, பச்சா² நிப்³பா³னே ஞாணந்தி.
Ājāneyyāsi vātiādi kasmā vuttaṃ? Vināpi samādhiṃ evaṃ ñāṇuppattidassanatthaṃ. Idañhi vuttaṃ hoti – susima, maggo vā phalaṃ vā na samādhinissando, na samādhiānisaṃso, na samādhissa nipphatti, vipassanāya paneso nissando, vipassanāya ānisaṃso, vipassanāya nipphatti, tasmā jāneyyāsi vā tvaṃ, na vā tvaṃ jāneyyāsi, atha kho dhammaṭṭhitiñāṇaṃ pubbe, pacchā nibbāne ñāṇanti.
இதா³னிஸ்ஸ படிவேத⁴ப⁴ப்³ப³தங் ஞத்வா தேபரிவட்டங் த⁴ம்மதே³ஸனங் தே³ஸெந்தோ தங் கிங் மஞ்ஞஸி, ஸுஸிம? ரூபங் நிச்சங் வா அனிச்சங் வாதிஆதி³மாஹ? தே பரிவட்டதே³ஸனாவஸானே பன தே²ரோ அரஹத்தங் பத்தோ. இதா³னிஸ்ஸ அனுயோக³ங் ஆரோபெந்தோ ஜாதிபச்சயா ஜராமரணந்தி, ஸுஸிம, பஸ்ஸஸீதிஆதி³மாஹ. அபி பன த்வங், ஸுஸிமாதி இத³ங் கஸ்மா ஆரபி⁴? நிஜ்ஜா²னகானங் ஸுக்க²விபஸ்ஸகபி⁴க்கூ²னங் பாகடகரணத்த²ங். அயஞ்ஹெத்த² அதி⁴ப்பாயோ – ந கேவலங் த்வமேவ நிஜ்ஜா²னகோ ஸுக்க²விபஸ்ஸகோ, ஏதேபி பி⁴க்கூ² ஏவரூபாயேவாதி. ஸேஸங் ஸப்³ப³த்த² பாகடமேவாதி. த³ஸமங்.
Idānissa paṭivedhabhabbataṃ ñatvā teparivaṭṭaṃ dhammadesanaṃ desento taṃ kiṃ maññasi, susima? Rūpaṃ niccaṃ vā aniccaṃ vātiādimāha? Te parivaṭṭadesanāvasāne pana thero arahattaṃ patto. Idānissa anuyogaṃ āropento jātipaccayā jarāmaraṇanti, susima, passasītiādimāha. Api pana tvaṃ, susimāti idaṃ kasmā ārabhi? Nijjhānakānaṃ sukkhavipassakabhikkhūnaṃ pākaṭakaraṇatthaṃ. Ayañhettha adhippāyo – na kevalaṃ tvameva nijjhānako sukkhavipassako, etepi bhikkhū evarūpāyevāti. Sesaṃ sabbattha pākaṭamevāti. Dasamaṃ.
மஹாவக்³கோ³ ஸத்தமோ.
Mahāvaggo sattamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ஸுஸிமஸுத்தங் • 10. Susimasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ஸுஸிமஸுத்தவண்ணனா • 10. Susimasuttavaṇṇanā
