| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༡༠. སུསིམསུཏྟཝཎྞནཱ
10. Susimasuttavaṇṇanā
༧༠. དསམེ གརུཀཏོཏི སབྦེཧི དེཝམནུསྶེཧི པཱསཱཎཙྪཏྟཾ ཝིཡ ཙིཏྟེན གརུཀཏོ། མཱནིཏོཏི མནེན པིཡཱཡིཏོ། པཱུཛིཏོཏི ཙཏུཔཙྩཡཔཱུཛཱཡ པཱུཛིཏོ། ཨཔཙིཏོཏི ནཱིཙཝུཏྟིཀརཎེན ཨཔཙིཏོ། སཏྠཱརཉྷི དིསྭཱ མནུསྶཱ ཧཏྠིཀྑནྡྷཱདཱིཧི ཨོཏརནྟི མགྒཾ དེནྟི, ཨཾསཀཱུཊཏོ སཱཊཀཾ ཨཔནེནྟི, ཨཱསནཏོ ཝུཊྛཧནྟི ཝནྡནྟི། ཨེཝཾ སོ ཏེཧི ཨཔཙིཏོ ནཱམ ཧོཏི། སུསིམོཏི ཨེཝཾནཱམཀོ ཝེདངྒེསུ ཀུསལོ པཎྜིཏཔརིབྦཱཛཀོ། ཨེཧི ཏྭནྟི ཏེསཾ ཀིར ཨེཏདཧོསི – ‘‘སམཎོ གོཏམོ ན ཛཱཏིགོཏྟཱདཱིནི ཨཱགམྨ ལཱབྷགྒཔྤཏྟོ ཛཱཏོ, ཀཝིསེཊྛོ པནེས ཨུཏྟམཀཝིཏཱཡ སཱཝཀཱནཾ གནྠཾ བནྡྷིཏྭཱ དེཏི, ཏཾ ཏེ ཨུགྒཎྷིཏྭཱ ཨུཔཊྛཱཀཱནཾ ཨུཔནིསིནྣཀཐམྤི ཨནུམོདནམྤི སརབྷཉྙམྤཱིཏི ཨེཝམཱདཱིནི ཀཐེནྟི, ཏེ ཏེསཾ པསནྣཱ ལཱབྷཾ ཨུཔསཾཧརནྟི། སཙེ མཡཾ ཡཾ སམཎོ གོཏམོ ཛཱནཱཏི, ཏཏོ ཐོཀཾ ཛཱནེཡྻཱམ, ཨཏྟནོ སམཡཾ ཏཏྠ པཀྑིཔིཏྭཱ མཡམྤི ཨུཔཊྛཱཀཱནཾ ཀཐེཡྻཱམ, ཏཏོ ཨེཏེཧི ལཱབྷིཏརཱ བྷཝེཡྻཱམ། ཀོ ནུ ཁོ སམཎསྶ གོཏམསྶ སནྟིཀེ པབྦཛིཏྭཱ ཁིཔྤམེཝ ཨུགྒཎྷིཏུཾ སཀྑིསྶཏཱི’’ཏི། ཏེ ཨེཝཾ ཙིནྟེཏྭཱ ‘‘སུསིམོ པཊིབལོ’’ཏི དིསྭཱ ཏཾ ཨུཔསངྐམིཏྭཱ ཨེཝམཱཧཾསུ།
70. Dasame garukatoti sabbehi devamanussehi pāsāṇacchattaṃ viya cittena garukato. Mānitoti manena piyāyito. Pūjitoti catupaccayapūjāya pūjito. Apacitoti nīcavuttikaraṇena apacito. Satthārañhi disvā manussā hatthikkhandhādīhi otaranti maggaṃ denti, aṃsakūṭato sāṭakaṃ apanenti, āsanato vuṭṭhahanti vandanti. Evaṃ so tehi apacito nāma hoti. Susimoti evaṃnāmako vedaṅgesu kusalo paṇḍitaparibbājako. Ehi tvanti tesaṃ kira etadahosi – ‘‘samaṇo gotamo na jātigottādīni āgamma lābhaggappatto jāto, kaviseṭṭho panesa uttamakavitāya sāvakānaṃ ganthaṃ bandhitvā deti, taṃ te uggaṇhitvā upaṭṭhākānaṃ upanisinnakathampi anumodanampi sarabhaññampīti evamādīni kathenti, te tesaṃ pasannā lābhaṃ upasaṃharanti. Sace mayaṃ yaṃ samaṇo gotamo jānāti, tato thokaṃ jāneyyāma, attano samayaṃ tattha pakkhipitvā mayampi upaṭṭhākānaṃ katheyyāma, tato etehi lābhitarā bhaveyyāma. Ko nu kho samaṇassa gotamassa santike pabbajitvā khippameva uggaṇhituṃ sakkhissatī’’ti. Te evaṃ cintetvā ‘‘susimo paṭibalo’’ti disvā taṃ upasaṅkamitvā evamāhaṃsu.
ཡེནཱཡསྨཱ ཨཱནནྡོ ཏེནུཔསངྐམཱིཏི ཀསྨཱ ཨུཔསངྐམི? ཨེཝཾ ཀིརསྶ ཨཧོསི, ‘‘ཀསྶ ནུ ཁོ སནྟིཀཾ གནྟྭཱ ཨཧཾ ཨིམཾ དྷམྨཾ ཁིཔྤཾ ལདྡྷུཾ སཀྑིསྶཱམཱི’’ཏི? ཏཏོ ཙིནྟེསི – ‘‘སམཎོ གོཏམོ གརུ ཏེཛུསྶདོ ནིཡམམནུཡུཏྟོ, ན སཀྐཱ ཨཀཱལེ ཨུཔསངྐམིཏུཾ, ཨཉྙེཔི བཧཱུ ཁཏྟིཡཱདཡོ སམཎཾ གོཏམཾ ཨུཔསངྐམནྟི, ཏསྨིམྤི སམཡེ ན སཀྐཱ ཨུཔསངྐམིཏུཾ། སཱཝཀེསུཔིསྶ སཱརིཔུཏྟོ མཧཱཔཉྙོ ཝིཔསྶནཱལཀྑཎམྷི ཨེཏདགྒེ ཋཔིཏོ, མཧཱམོགྒལླཱནོ སམཱདྷིལཀྑཎསྨིཾ ཨེཏདགྒེ ཋཔིཏོ, མཧཱཀསྶཔོ དྷུཏངྒདྷརེསུ ཨནུརུདྡྷོ དིབྦཙཀྑུཀེསུ, པུཎྞོ མནྟཱཎིཔུཏྟོ དྷམྨཀཐིཀེསུ, ཨུཔཱལིཏྠེརོ ཝིནཡདྷརེསུ ཨེཏདགྒེ ཋཔིཏོ, ཨཡཾ པན ཨཱནནྡོ བཧུསྶུཏོ ཏིཔིཊཀདྷརོ, སཏྠཱཔིསྶ ཏཏྠ ཏཏྠ ཀཐིཏཾ དྷམྨཾ ཨཱཧརིཏྭཱ ཀཐེཏི, པཉྩསུ ཋཱནེསུ ཨེཏདགྒེ ཋཔིཏོ, ཨཊྛནྣཾ ཝརཱནཾ ལཱབྷཱི, ཙཏཱུཧི ཨཙྪརིཡབྦྷུཏདྷམྨེཧི སམནྣཱགཏོ, ཏསྶ སམཱིཔཾ གཏོ ཁིཔྤཾ དྷམྨཾ ལདྡྷུཾ སཀྑིསྶཱམཱི’’ཏི། ཏསྨཱ ཡེནཱཡསྨཱ ཨཱནནྡོ ཏེནུཔསངྐམི།
Yenāyasmā ānando tenupasaṅkamīti kasmā upasaṅkami? Evaṃ kirassa ahosi, ‘‘kassa nu kho santikaṃ gantvā ahaṃ imaṃ dhammaṃ khippaṃ laddhuṃ sakkhissāmī’’ti? Tato cintesi – ‘‘samaṇo gotamo garu tejussado niyamamanuyutto, na sakkā akāle upasaṅkamituṃ, aññepi bahū khattiyādayo samaṇaṃ gotamaṃ upasaṅkamanti, tasmimpi samaye na sakkā upasaṅkamituṃ. Sāvakesupissa sāriputto mahāpañño vipassanālakkhaṇamhi etadagge ṭhapito, mahāmoggallāno samādhilakkhaṇasmiṃ etadagge ṭhapito, mahākassapo dhutaṅgadharesu anuruddho dibbacakkhukesu, puṇṇo mantāṇiputto dhammakathikesu, upālitthero vinayadharesu etadagge ṭhapito, ayaṃ pana ānando bahussuto tipiṭakadharo, satthāpissa tattha tattha kathitaṃ dhammaṃ āharitvā katheti, pañcasu ṭhānesu etadagge ṭhapito, aṭṭhannaṃ varānaṃ lābhī, catūhi acchariyabbhutadhammehi samannāgato, tassa samīpaṃ gato khippaṃ dhammaṃ laddhuṃ sakkhissāmī’’ti. Tasmā yenāyasmā ānando tenupasaṅkami.
ཡེན བྷགཝཱ ཏེནུཔསངྐམཱིཏི ཀསྨཱ སཡཾ ཨཔབྦཱཛེཏྭཱ ཨུཔསངྐམི? ཨེཝཾ ཀིརསྶ ཨཧོསི – ‘‘ཨཡཾ ཏིཏྠིཡསམཡེ པཱཊིཡེཀྐོ ‘ཨཧཾ སཏྠཱ’ཏི པཊིཛཱནནྟོ ཙརཏི, པབྦཛིཏྭཱ སཱསནསྶ ཨལཱབྷཱཡཔི པརིསཀྐེཡྻ། ན ཁོ པནསྶཱཧཾ ཨཛ྄ཛྷཱསཡཾ ཨཱཛཱནཱམི, སཏྠཱ ཛཱནིསྶཏཱི’’ཏི། ཏསྨཱ ཏཾ ཨཱདཱཡ ཡེན བྷགཝཱ ཏེནུཔསངྐམི། ཏེནཧཱནནྡ, སུསིམཾ པབྦཱཛེཐཱཏི སཏྠཱ ཀིར ཙིནྟེསི – ‘‘ཨཡཾ པརིབྦཱཛཀོ ཏིཏྠིཡསམཡེ ‘ཨཧཾ པཱཊིཡེཀྐོ སཏྠཱ’ཏི པཊིཛཱནམཱནོ ཙརཏི, ‘ཨིདྷ མགྒབྲཧྨཙརིཡཾ ཙརིཏུཾ ཨིཙྪཱམཱི’ཏི ཀིར ཝདཏི། ཀིཾ ནུ ཁོ མཡི པསནྣོ, ཨུདཱཧུ མཡ྄ཧཾ སཱཝཀེསུ, ཨུདཱཧུ མཡ྄ཧཾ ཝཱ མམ སཱཝཀཱནཾ ཝཱ དྷམྨཀཐཱཡ པསནྣོ’’ཏི? ཨཐསྶ ཨེཀཊྛཱནེཔི པསཱདཱབྷཱཝཾ ཉཏྭཱ, ‘‘ཨཡཾ མམ སཱསནེ དྷམྨཾ ཐེནེསྶཱམཱིཏི པབྦཛཏི། ཨིཏིསྶ ཨཱགམནཾ ཨཔརིསུདྡྷཾ; ནིཔྥཏྟི ནུ ཁོ ཀཱིདིསཱ’’ཏི? ཨོལོཀེནྟོ ‘‘ཀིཉྩཱཔི ‘དྷམྨཾ ཐེནེསྶཱམཱི’ཏི པབྦཛཏི, ཀཏིཔཱཧེནེཝ པན གྷཊེཏྭཱ ཨརཧཏྟཾ གཎྷིསྶཏཱི’’ཏི ཉཏྭཱ ‘‘ཏེནཧཱནནྡ, སུསིམཾ པབྦཱཛེཐཱ’’ཏི ཨཱཧ།
Yenabhagavā tenupasaṅkamīti kasmā sayaṃ apabbājetvā upasaṅkami? Evaṃ kirassa ahosi – ‘‘ayaṃ titthiyasamaye pāṭiyekko ‘ahaṃ satthā’ti paṭijānanto carati, pabbajitvā sāsanassa alābhāyapi parisakkeyya. Na kho panassāhaṃ ajjhāsayaṃ ājānāmi, satthā jānissatī’’ti. Tasmā taṃ ādāya yena bhagavā tenupasaṅkami. Tenahānanda, susimaṃ pabbājethāti satthā kira cintesi – ‘‘ayaṃ paribbājako titthiyasamaye ‘ahaṃ pāṭiyekko satthā’ti paṭijānamāno carati, ‘idha maggabrahmacariyaṃ carituṃ icchāmī’ti kira vadati. Kiṃ nu kho mayi pasanno, udāhu mayhaṃ sāvakesu, udāhu mayhaṃ vā mama sāvakānaṃ vā dhammakathāya pasanno’’ti? Athassa ekaṭṭhānepi pasādābhāvaṃ ñatvā, ‘‘ayaṃ mama sāsane dhammaṃ thenessāmīti pabbajati. Itissa āgamanaṃ aparisuddhaṃ; nipphatti nu kho kīdisā’’ti? Olokento ‘‘kiñcāpi ‘dhammaṃ thenessāmī’ti pabbajati, katipāheneva pana ghaṭetvā arahattaṃ gaṇhissatī’’ti ñatvā ‘‘tenahānanda, susimaṃ pabbājethā’’ti āha.
ཨཉྙཱ བྱཱཀཏཱ ཧོཏཱིཏི ཏེ ཀིར བྷིཀྑཱུ སཏྠུ སནྟིཀེ ཀམྨཊྛཱནཾ གཧེཏྭཱ ཏེམཱསཾ ཝསྶཾ ཝསནྟཱ ཏསྨིཾཡེཝ ཨནྟོཏེམཱསེ གྷཊེནྟཱ ཝཱཡམནྟཱ ཨརཧཏྟཾ པཊིལབྷིཾསུ། ཏེ ‘‘པཊིལདྡྷགུཎཾ སཏྠུ ཨཱརོཙེསྶཱམཱ’’ཏི པཝཱརིཏཔཝཱརཎཱ སེནཱསནཾ སཾསཱམེཏྭཱ སཏྠུ སནྟིཀཾ ཨཱགནྟྭཱ ཨཏྟནོ པཊིལདྡྷགུཎཾ ཨཱརོཙེསུཾ། ཏཾ སནྡྷཱཡེཏཾ ཝུཏྟཾ། ཨཉྙཱཏི ཨརཧཏྟསྶ ནཱམཾ། བྱཱཀཏཱཏི ཨཱརོཙིཏཱ། ཨསྶོསཱིཏི སོ ཀིར ཨོཧིཏསོཏོ ཧུཏྭཱ ཏེསཾ ཏེསཾ བྷིཀྑཱུནཾ ཋིཏཊྛཱནཾ གཙྪཏི ཏཾ ཏཾ ཀཐཾ སུཎིཏུཀཱམོ། ཡེན ཏེ བྷིཀྑཱུ ཏེནུཔསངྐམཱིཏི ཀསྨཱ ཨུཔསངྐམི? ཏཾ ཀིརསྶ པཝཏྟིཾ སུཏྭཱ ཨེཏདཧོསི – ‘‘ཨཉྙཱ ནཱམ ཨིམསྨིཾ སཱསནེ པརམཔྤམཱཎཾ སཱརབྷཱུཏཱ ཨཱཙརིཡམུཊྛི མཉྙེ བྷཝིསྶཏི, པུཙྪིཏྭཱ ནཾ ཛཱནིསྶཱམཱི’’ཏི། ཏསྨཱ ཨུཔསངྐམི།
Aññā byākatā hotīti te kira bhikkhū satthu santike kammaṭṭhānaṃ gahetvā temāsaṃ vassaṃ vasantā tasmiṃyeva antotemāse ghaṭentā vāyamantā arahattaṃ paṭilabhiṃsu. Te ‘‘paṭiladdhaguṇaṃ satthu ārocessāmā’’ti pavāritapavāraṇā senāsanaṃ saṃsāmetvā satthu santikaṃ āgantvā attano paṭiladdhaguṇaṃ ārocesuṃ. Taṃ sandhāyetaṃ vuttaṃ. Aññāti arahattassa nāmaṃ. Byākatāti ārocitā. Assosīti so kira ohitasoto hutvā tesaṃ tesaṃ bhikkhūnaṃ ṭhitaṭṭhānaṃ gacchati taṃ taṃ kathaṃ suṇitukāmo. Yena te bhikkhū tenupasaṅkamīti kasmā upasaṅkami? Taṃ kirassa pavattiṃ sutvā etadahosi – ‘‘aññā nāma imasmiṃ sāsane paramappamāṇaṃ sārabhūtā ācariyamuṭṭhi maññe bhavissati, pucchitvā naṃ jānissāmī’’ti. Tasmā upasaṅkami.
ཨནེཀཝིཧིཏནྟི ཨནེཀཝིདྷཾ། ཨིདྡྷིཝིདྷནྟི ཨིདྡྷིཀོཊྛཱསཾ། ཨཱཝིབྷཱཝཾ ཏིརོབྷཱཝནྟི ཨཱཝིབྷཱཝཾ གཧེཏྭཱ ཏིརོབྷཱཝཾ, ཏིརོབྷཱཝཾ གཧེཏྭཱ ཨཱཝིབྷཱཝཾ ཀཱཏུཾ སཀྐོཐཱཏི པུཙྪཏི། ཏིརོཀུཊྚནྟི པརཀུཊྚཾ། ཨིཏརཔདདྭཡེཔི ཨེསེཝ ནཡོ། ཨུམྨུཛྫནིམུཛྫནྟི ཨུམྨུཛྫནཉྩ ནིམུཛྫནཉྩ། པལླངྐེནཱཏི པལླངྐབནྡྷནེན། ཀམཐཱཏི ནིསཱིདིཏུཾ ཝཱ གནྟུཾ ཝཱ སཀྐོཐཱཏི པུཙྪཏི? པཀྑཱི སཀུཎོཏི པཀྑཡུཏྟོ སཀུཎོ། ཨཡམེཏྠ སངྑེཔོ, ཝིཏྠཱརཏོ པན ཨིམསྶ ཨིདྡྷིཝིདྷསྶ, ཨིཏོ པརེསཾ དིབྦསོཏཱདཱིནཉྩ ཝཎྞནཱནཡོ ཝིསུདྡྷིམགྒེ ཝུཏྟནཡེན ཝེདིཏབྦོཏི།
Anekavihitanti anekavidhaṃ. Iddhividhanti iddhikoṭṭhāsaṃ. Āvibhāvaṃ tirobhāvanti āvibhāvaṃ gahetvā tirobhāvaṃ, tirobhāvaṃ gahetvā āvibhāvaṃ kātuṃ sakkothāti pucchati. Tirokuṭṭanti parakuṭṭaṃ. Itarapadadvayepi eseva nayo. Ummujjanimujjanti ummujjanañca nimujjanañca. Pallaṅkenāti pallaṅkabandhanena. Kamathāti nisīdituṃ vā gantuṃ vā sakkothāti pucchati? Pakkhī sakuṇoti pakkhayutto sakuṇo. Ayamettha saṅkhepo, vitthārato pana imassa iddhividhassa, ito paresaṃ dibbasotādīnañca vaṇṇanānayo visuddhimagge vuttanayena veditabboti.
སནྟཱ ཝིམོཀྑཱཏི ཨངྒསནྟཏཱཡ ཙེཝ ཨཱརམྨཎསནྟཏཱཡ ཙ སནྟཱ ཨཱརུཔྤཝིམོཀྑཱ། ཀཱཡེན ཕུསིཏྭཱཏི ནཱམཀཱཡེན ཕུསིཏྭཱ པཊིལབྷིཏྭཱ། པཉྙཱཝིམུཏྟཱ ཁོ མཡཾ, ཨཱཝུསོཏི, ཨཱཝུསོ, མཡཾ ནིཛ྄ཛྷཱནཀཱ སུཀྑཝིཔསྶཀཱ པཉྙཱམཏྟེནེཝ ཝིམུཏྟཱཏི དསྶེཏི། ཨཱཛཱནེཡྻཱསི ཝཱ ཏྭཾ, ཨཱཝུསོ སུསིམ, ན ཝཱ ཏྭཾ ཨཱཛཱནེཡྻཱསཱིཏི ཀསྨཱ ཨེཝམཱཧཾསུ? ཨེཝཾ ཀིར ནེསཾ ཨཧོསི – ‘‘མཡཾ ཨིམསྶ ཨཛ྄ཛྷཱསཡཾ གཧེཏྭཱ ཀཐེཏུཾ ན སཀྑིསྶཱམ, དསབལཾ པན པུཙྪིཏྭཱ ནིཀྐངྑོ བྷཝིསྶཏཱི’’ཏི། དྷམྨཊྛིཏིཉཱཎནྟི ཝིཔསྶནཱཉཱཎཾ, ཏཾ པཋམཏརཾ ཨུཔྤཛྫཏི། ནིབྦཱནེ ཉཱཎནྟི ཝིཔསྶནཱཡ ཙིཎྞནྟེ པཝཏྟམགྒཉཱཎཾ, ཏཾ པཙྪཱ ཨུཔྤཛྫཏི། ཏསྨཱ བྷགཝཱ ཨེཝམཱཧ།
Santā vimokkhāti aṅgasantatāya ceva ārammaṇasantatāya ca santā āruppavimokkhā. Kāyena phusitvāti nāmakāyena phusitvā paṭilabhitvā. Paññāvimuttā kho mayaṃ, āvusoti, āvuso, mayaṃ nijjhānakā sukkhavipassakā paññāmatteneva vimuttāti dasseti. Ājāneyyāsi vā tvaṃ, āvuso susima, na vā tvaṃ ājāneyyāsīti kasmā evamāhaṃsu? Evaṃ kira nesaṃ ahosi – ‘‘mayaṃ imassa ajjhāsayaṃ gahetvā kathetuṃ na sakkhissāma, dasabalaṃ pana pucchitvā nikkaṅkho bhavissatī’’ti. Dhammaṭṭhitiñāṇanti vipassanāñāṇaṃ, taṃ paṭhamataraṃ uppajjati. Nibbāne ñāṇanti vipassanāya ciṇṇante pavattamaggañāṇaṃ, taṃ pacchā uppajjati. Tasmā bhagavā evamāha.
ཨཱཛཱནེཡྻཱསི ཝཱཏིཨཱདི ཀསྨཱ ཝུཏྟཾ? ཝིནཱཔི སམཱདྷིཾ ཨེཝཾ ཉཱཎུཔྤཏྟིདསྶནཏྠཾ། ཨིདཉྷི ཝུཏྟཾ ཧོཏི – སུསིམ, མགྒོ ཝཱ ཕལཾ ཝཱ ན སམཱདྷིནིསྶནྡོ, ན སམཱདྷིཨཱནིསཾསོ, ན སམཱདྷིསྶ ནིཔྥཏྟི, ཝིཔསྶནཱཡ པནེསོ ནིསྶནྡོ, ཝིཔསྶནཱཡ ཨཱནིསཾསོ, ཝིཔསྶནཱཡ ནིཔྥཏྟི, ཏསྨཱ ཛཱནེཡྻཱསི ཝཱ ཏྭཾ, ན ཝཱ ཏྭཾ ཛཱནེཡྻཱསི, ཨཐ ཁོ དྷམྨཊྛིཏིཉཱཎཾ པུབྦེ, པཙྪཱ ནིབྦཱནེ ཉཱཎནྟི།
Ājāneyyāsi vātiādi kasmā vuttaṃ? Vināpi samādhiṃ evaṃ ñāṇuppattidassanatthaṃ. Idañhi vuttaṃ hoti – susima, maggo vā phalaṃ vā na samādhinissando, na samādhiānisaṃso, na samādhissa nipphatti, vipassanāya paneso nissando, vipassanāya ānisaṃso, vipassanāya nipphatti, tasmā jāneyyāsi vā tvaṃ, na vā tvaṃ jāneyyāsi, atha kho dhammaṭṭhitiñāṇaṃ pubbe, pacchā nibbāne ñāṇanti.
ཨིདཱནིསྶ པཊིཝེདྷབྷབྦཏཾ ཉཏྭཱ ཏེཔརིཝཊྚཾ དྷམྨདེསནཾ དེསེནྟོ ཏཾ ཀིཾ མཉྙསི, སུསིམ? རཱུཔཾ ནིཙྩཾ ཝཱ ཨནིཙྩཾ ཝཱཏིཨཱདིམཱཧ? ཏེ པརིཝཊྚདེསནཱཝསཱནེ པན ཐེརོ ཨརཧཏྟཾ པཏྟོ། ཨིདཱནིསྶ ཨནུཡོགཾ ཨཱརོཔེནྟོ ཛཱཏིཔཙྩཡཱ ཛརཱམརཎནྟི, སུསིམ, པསྶསཱིཏིཨཱདིམཱཧ། ཨཔི པན ཏྭཾ, སུསིམཱཏི ཨིདཾ ཀསྨཱ ཨཱརབྷི? ནིཛ྄ཛྷཱནཀཱནཾ སུཀྑཝིཔསྶཀབྷིཀྑཱུནཾ པཱཀཊཀརཎཏྠཾ། ཨཡཉྷེཏྠ ཨདྷིཔྤཱཡོ – ན ཀེཝལཾ ཏྭམེཝ ནིཛ྄ཛྷཱནཀོ སུཀྑཝིཔསྶཀོ, ཨེཏེཔི བྷིཀྑཱུ ཨེཝརཱུཔཱཡེཝཱཏི། སེསཾ སབྦཏྠ པཱཀཊམེཝཱཏི། དསམཾ།
Idānissa paṭivedhabhabbataṃ ñatvā teparivaṭṭaṃ dhammadesanaṃ desento taṃ kiṃ maññasi, susima? Rūpaṃ niccaṃ vā aniccaṃ vātiādimāha? Te parivaṭṭadesanāvasāne pana thero arahattaṃ patto. Idānissa anuyogaṃ āropento jātipaccayā jarāmaraṇanti, susima, passasītiādimāha. Api pana tvaṃ, susimāti idaṃ kasmā ārabhi? Nijjhānakānaṃ sukkhavipassakabhikkhūnaṃ pākaṭakaraṇatthaṃ. Ayañhettha adhippāyo – na kevalaṃ tvameva nijjhānako sukkhavipassako, etepi bhikkhū evarūpāyevāti. Sesaṃ sabbattha pākaṭamevāti. Dasamaṃ.
མཧཱཝགྒོ སཏྟམོ།
Mahāvaggo sattamo.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡༠. སུསིམསུཏྟཾ • 10. Susimasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡༠. སུསིམསུཏྟཝཎྞནཱ • 10. Susimasuttavaṇṇanā
