| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੧੦. ਸੁਸਿਮਸੁਤ੍ਤવਣ੍ਣਨਾ
10. Susimasuttavaṇṇanā
੭੦. ਦਸਮੇ ਗਰੁਕਤੋਤਿ ਸਬ੍ਬੇਹਿ ਦੇવਮਨੁਸ੍ਸੇਹਿ ਪਾਸਾਣਚ੍ਛਤ੍ਤਂ વਿਯ ਚਿਤ੍ਤੇਨ ਗਰੁਕਤੋ। ਮਾਨਿਤੋਤਿ ਮਨੇਨ ਪਿਯਾਯਿਤੋ। ਪੂਜਿਤੋਤਿ ਚਤੁਪਚ੍ਚਯਪੂਜਾਯ ਪੂਜਿਤੋ। ਅਪਚਿਤੋਤਿ ਨੀਚવੁਤ੍ਤਿਕਰਣੇਨ ਅਪਚਿਤੋ। ਸਤ੍ਥਾਰਞ੍ਹਿ ਦਿਸ੍વਾ ਮਨੁਸ੍ਸਾ ਹਤ੍ਥਿਕ੍ਖਨ੍ਧਾਦੀਹਿ ਓਤਰਨ੍ਤਿ ਮਗ੍ਗਂ ਦੇਨ੍ਤਿ, ਅਂਸਕੂਟਤੋ ਸਾਟਕਂ ਅਪਨੇਨ੍ਤਿ, ਆਸਨਤੋ વੁਟ੍ਠਹਨ੍ਤਿ વਨ੍ਦਨ੍ਤਿ। ਏવਂ ਸੋ ਤੇਹਿ ਅਪਚਿਤੋ ਨਾਮ ਹੋਤਿ। ਸੁਸਿਮੋਤਿ ਏવਂਨਾਮਕੋ વੇਦਙ੍ਗੇਸੁ ਕੁਸਲੋ ਪਣ੍ਡਿਤਪਰਿਬ੍ਬਾਜਕੋ। ਏਹਿ ਤ੍વਨ੍ਤਿ ਤੇਸਂ ਕਿਰ ਏਤਦਹੋਸਿ – ‘‘ਸਮਣੋ ਗੋਤਮੋ ਨ ਜਾਤਿਗੋਤ੍ਤਾਦੀਨਿ ਆਗਮ੍ਮ ਲਾਭਗ੍ਗਪ੍ਪਤ੍ਤੋ ਜਾਤੋ, ਕવਿਸੇਟ੍ਠੋ ਪਨੇਸ ਉਤ੍ਤਮਕવਿਤਾਯ ਸਾવਕਾਨਂ ਗਨ੍ਥਂ ਬਨ੍ਧਿਤ੍વਾ ਦੇਤਿ, ਤਂ ਤੇ ਉਗ੍ਗਣ੍ਹਿਤ੍વਾ ਉਪਟ੍ਠਾਕਾਨਂ ਉਪਨਿਸਿਨ੍ਨਕਥਮ੍ਪਿ ਅਨੁਮੋਦਨਮ੍ਪਿ ਸਰਭਞ੍ਞਮ੍ਪੀਤਿ ਏવਮਾਦੀਨਿ ਕਥੇਨ੍ਤਿ, ਤੇ ਤੇਸਂ ਪਸਨ੍ਨਾ ਲਾਭਂ ਉਪਸਂਹਰਨ੍ਤਿ। ਸਚੇ ਮਯਂ ਯਂ ਸਮਣੋ ਗੋਤਮੋ ਜਾਨਾਤਿ, ਤਤੋ ਥੋਕਂ ਜਾਨੇਯ੍ਯਾਮ, ਅਤ੍ਤਨੋ ਸਮਯਂ ਤਤ੍ਥ ਪਕ੍ਖਿਪਿਤ੍વਾ ਮਯਮ੍ਪਿ ਉਪਟ੍ਠਾਕਾਨਂ ਕਥੇਯ੍ਯਾਮ, ਤਤੋ ਏਤੇਹਿ ਲਾਭਿਤਰਾ ਭવੇਯ੍ਯਾਮ। ਕੋ ਨੁ ਖੋ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕੇ ਪਬ੍ਬਜਿਤ੍વਾ ਖਿਪ੍ਪਮੇવ ਉਗ੍ਗਣ੍ਹਿਤੁਂ ਸਕ੍ਖਿਸ੍ਸਤੀ’’ਤਿ। ਤੇ ਏવਂ ਚਿਨ੍ਤੇਤ੍વਾ ‘‘ਸੁਸਿਮੋ ਪਟਿਬਲੋ’’ਤਿ ਦਿਸ੍વਾ ਤਂ ਉਪਸਙ੍ਕਮਿਤ੍વਾ ਏવਮਾਹਂਸੁ।
70. Dasame garukatoti sabbehi devamanussehi pāsāṇacchattaṃ viya cittena garukato. Mānitoti manena piyāyito. Pūjitoti catupaccayapūjāya pūjito. Apacitoti nīcavuttikaraṇena apacito. Satthārañhi disvā manussā hatthikkhandhādīhi otaranti maggaṃ denti, aṃsakūṭato sāṭakaṃ apanenti, āsanato vuṭṭhahanti vandanti. Evaṃ so tehi apacito nāma hoti. Susimoti evaṃnāmako vedaṅgesu kusalo paṇḍitaparibbājako. Ehi tvanti tesaṃ kira etadahosi – ‘‘samaṇo gotamo na jātigottādīni āgamma lābhaggappatto jāto, kaviseṭṭho panesa uttamakavitāya sāvakānaṃ ganthaṃ bandhitvā deti, taṃ te uggaṇhitvā upaṭṭhākānaṃ upanisinnakathampi anumodanampi sarabhaññampīti evamādīni kathenti, te tesaṃ pasannā lābhaṃ upasaṃharanti. Sace mayaṃ yaṃ samaṇo gotamo jānāti, tato thokaṃ jāneyyāma, attano samayaṃ tattha pakkhipitvā mayampi upaṭṭhākānaṃ katheyyāma, tato etehi lābhitarā bhaveyyāma. Ko nu kho samaṇassa gotamassa santike pabbajitvā khippameva uggaṇhituṃ sakkhissatī’’ti. Te evaṃ cintetvā ‘‘susimo paṭibalo’’ti disvā taṃ upasaṅkamitvā evamāhaṃsu.
ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਏવਂ ਕਿਰਸ੍ਸ ਅਹੋਸਿ, ‘‘ਕਸ੍ਸ ਨੁ ਖੋ ਸਨ੍ਤਿਕਂ ਗਨ੍ਤ੍વਾ ਅਹਂ ਇਮਂ ਧਮ੍ਮਂ ਖਿਪ੍ਪਂ ਲਦ੍ਧੁਂ ਸਕ੍ਖਿਸ੍ਸਾਮੀ’’ਤਿ? ਤਤੋ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਗਰੁ ਤੇਜੁਸ੍ਸਦੋ ਨਿਯਮਮਨੁਯੁਤ੍ਤੋ, ਨ ਸਕ੍ਕਾ ਅਕਾਲੇ ਉਪਸਙ੍ਕਮਿਤੁਂ, ਅਞ੍ਞੇਪਿ ਬਹੂ ਖਤ੍ਤਿਯਾਦਯੋ ਸਮਣਂ ਗੋਤਮਂ ਉਪਸਙ੍ਕਮਨ੍ਤਿ, ਤਸ੍ਮਿਮ੍ਪਿ ਸਮਯੇ ਨ ਸਕ੍ਕਾ ਉਪਸਙ੍ਕਮਿਤੁਂ। ਸਾવਕੇਸੁਪਿਸ੍ਸ ਸਾਰਿਪੁਤ੍ਤੋ ਮਹਾਪਞ੍ਞੋ વਿਪਸ੍ਸਨਾਲਕ੍ਖਣਮ੍ਹਿ ਏਤਦਗ੍ਗੇ ਠਪਿਤੋ, ਮਹਾਮੋਗ੍ਗਲ੍ਲਾਨੋ ਸਮਾਧਿਲਕ੍ਖਣਸ੍ਮਿਂ ਏਤਦਗ੍ਗੇ ਠਪਿਤੋ, ਮਹਾਕਸ੍ਸਪੋ ਧੁਤਙ੍ਗਧਰੇਸੁ ਅਨੁਰੁਦ੍ਧੋ ਦਿਬ੍ਬਚਕ੍ਖੁਕੇਸੁ, ਪੁਣ੍ਣੋ ਮਨ੍ਤਾਣਿਪੁਤ੍ਤੋ ਧਮ੍ਮਕਥਿਕੇਸੁ, ਉਪਾਲਿਤ੍ਥੇਰੋ વਿਨਯਧਰੇਸੁ ਏਤਦਗ੍ਗੇ ਠਪਿਤੋ, ਅਯਂ ਪਨ ਆਨਨ੍ਦੋ ਬਹੁਸ੍ਸੁਤੋ ਤਿਪਿਟਕਧਰੋ, ਸਤ੍ਥਾਪਿਸ੍ਸ ਤਤ੍ਥ ਤਤ੍ਥ ਕਥਿਤਂ ਧਮ੍ਮਂ ਆਹਰਿਤ੍વਾ ਕਥੇਤਿ, ਪਞ੍ਚਸੁ ਠਾਨੇਸੁ ਏਤਦਗ੍ਗੇ ਠਪਿਤੋ, ਅਟ੍ਠਨ੍ਨਂ વਰਾਨਂ ਲਾਭੀ, ਚਤੂਹਿ ਅਚ੍ਛਰਿਯਬ੍ਭੁਤਧਮ੍ਮੇਹਿ ਸਮਨ੍ਨਾਗਤੋ, ਤਸ੍ਸ ਸਮੀਪਂ ਗਤੋ ਖਿਪ੍ਪਂ ਧਮ੍ਮਂ ਲਦ੍ਧੁਂ ਸਕ੍ਖਿਸ੍ਸਾਮੀ’’ਤਿ। ਤਸ੍ਮਾ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ।
Yenāyasmā ānando tenupasaṅkamīti kasmā upasaṅkami? Evaṃ kirassa ahosi, ‘‘kassa nu kho santikaṃ gantvā ahaṃ imaṃ dhammaṃ khippaṃ laddhuṃ sakkhissāmī’’ti? Tato cintesi – ‘‘samaṇo gotamo garu tejussado niyamamanuyutto, na sakkā akāle upasaṅkamituṃ, aññepi bahū khattiyādayo samaṇaṃ gotamaṃ upasaṅkamanti, tasmimpi samaye na sakkā upasaṅkamituṃ. Sāvakesupissa sāriputto mahāpañño vipassanālakkhaṇamhi etadagge ṭhapito, mahāmoggallāno samādhilakkhaṇasmiṃ etadagge ṭhapito, mahākassapo dhutaṅgadharesu anuruddho dibbacakkhukesu, puṇṇo mantāṇiputto dhammakathikesu, upālitthero vinayadharesu etadagge ṭhapito, ayaṃ pana ānando bahussuto tipiṭakadharo, satthāpissa tattha tattha kathitaṃ dhammaṃ āharitvā katheti, pañcasu ṭhānesu etadagge ṭhapito, aṭṭhannaṃ varānaṃ lābhī, catūhi acchariyabbhutadhammehi samannāgato, tassa samīpaṃ gato khippaṃ dhammaṃ laddhuṃ sakkhissāmī’’ti. Tasmā yenāyasmā ānando tenupasaṅkami.
ਯੇਨ ਭਗવਾ ਤੇਨੁਪਸਙ੍ਕਮੀਤਿ ਕਸ੍ਮਾ ਸਯਂ ਅਪਬ੍ਬਾਜੇਤ੍વਾ ਉਪਸਙ੍ਕਮਿ? ਏવਂ ਕਿਰਸ੍ਸ ਅਹੋਸਿ – ‘‘ਅਯਂ ਤਿਤ੍ਥਿਯਸਮਯੇ ਪਾਟਿਯੇਕ੍ਕੋ ‘ਅਹਂ ਸਤ੍ਥਾ’ਤਿ ਪਟਿਜਾਨਨ੍ਤੋ ਚਰਤਿ, ਪਬ੍ਬਜਿਤ੍વਾ ਸਾਸਨਸ੍ਸ ਅਲਾਭਾਯਪਿ ਪਰਿਸਕ੍ਕੇਯ੍ਯ। ਨ ਖੋ ਪਨਸ੍ਸਾਹਂ ਅਜ੍ਝਾਸਯਂ ਆਜਾਨਾਮਿ, ਸਤ੍ਥਾ ਜਾਨਿਸ੍ਸਤੀ’’ਤਿ। ਤਸ੍ਮਾ ਤਂ ਆਦਾਯ ਯੇਨ ਭਗવਾ ਤੇਨੁਪਸਙ੍ਕਮਿ। ਤੇਨਹਾਨਨ੍ਦ, ਸੁਸਿਮਂ ਪਬ੍ਬਾਜੇਥਾਤਿ ਸਤ੍ਥਾ ਕਿਰ ਚਿਨ੍ਤੇਸਿ – ‘‘ਅਯਂ ਪਰਿਬ੍ਬਾਜਕੋ ਤਿਤ੍ਥਿਯਸਮਯੇ ‘ਅਹਂ ਪਾਟਿਯੇਕ੍ਕੋ ਸਤ੍ਥਾ’ਤਿ ਪਟਿਜਾਨਮਾਨੋ ਚਰਤਿ, ‘ਇਧ ਮਗ੍ਗਬ੍ਰਹ੍ਮਚਰਿਯਂ ਚਰਿਤੁਂ ਇਚ੍ਛਾਮੀ’ਤਿ ਕਿਰ વਦਤਿ। ਕਿਂ ਨੁ ਖੋ ਮਯਿ ਪਸਨ੍ਨੋ, ਉਦਾਹੁ ਮਯ੍ਹਂ ਸਾવਕੇਸੁ, ਉਦਾਹੁ ਮਯ੍ਹਂ વਾ ਮਮ ਸਾવਕਾਨਂ વਾ ਧਮ੍ਮਕਥਾਯ ਪਸਨ੍ਨੋ’’ਤਿ? ਅਥਸ੍ਸ ਏਕਟ੍ਠਾਨੇਪਿ ਪਸਾਦਾਭਾવਂ ਞਤ੍વਾ, ‘‘ਅਯਂ ਮਮ ਸਾਸਨੇ ਧਮ੍ਮਂ ਥੇਨੇਸ੍ਸਾਮੀਤਿ ਪਬ੍ਬਜਤਿ। ਇਤਿਸ੍ਸ ਆਗਮਨਂ ਅਪਰਿਸੁਦ੍ਧਂ; ਨਿਪ੍ਫਤ੍ਤਿ ਨੁ ਖੋ ਕੀਦਿਸਾ’’ਤਿ? ਓਲੋਕੇਨ੍ਤੋ ‘‘ਕਿਞ੍ਚਾਪਿ ‘ਧਮ੍ਮਂ ਥੇਨੇਸ੍ਸਾਮੀ’ਤਿ ਪਬ੍ਬਜਤਿ, ਕਤਿਪਾਹੇਨੇવ ਪਨ ਘਟੇਤ੍વਾ ਅਰਹਤ੍ਤਂ ਗਣ੍ਹਿਸ੍ਸਤੀ’’ਤਿ ਞਤ੍વਾ ‘‘ਤੇਨਹਾਨਨ੍ਦ, ਸੁਸਿਮਂ ਪਬ੍ਬਾਜੇਥਾ’’ਤਿ ਆਹ।
Yenabhagavā tenupasaṅkamīti kasmā sayaṃ apabbājetvā upasaṅkami? Evaṃ kirassa ahosi – ‘‘ayaṃ titthiyasamaye pāṭiyekko ‘ahaṃ satthā’ti paṭijānanto carati, pabbajitvā sāsanassa alābhāyapi parisakkeyya. Na kho panassāhaṃ ajjhāsayaṃ ājānāmi, satthā jānissatī’’ti. Tasmā taṃ ādāya yena bhagavā tenupasaṅkami. Tenahānanda, susimaṃ pabbājethāti satthā kira cintesi – ‘‘ayaṃ paribbājako titthiyasamaye ‘ahaṃ pāṭiyekko satthā’ti paṭijānamāno carati, ‘idha maggabrahmacariyaṃ carituṃ icchāmī’ti kira vadati. Kiṃ nu kho mayi pasanno, udāhu mayhaṃ sāvakesu, udāhu mayhaṃ vā mama sāvakānaṃ vā dhammakathāya pasanno’’ti? Athassa ekaṭṭhānepi pasādābhāvaṃ ñatvā, ‘‘ayaṃ mama sāsane dhammaṃ thenessāmīti pabbajati. Itissa āgamanaṃ aparisuddhaṃ; nipphatti nu kho kīdisā’’ti? Olokento ‘‘kiñcāpi ‘dhammaṃ thenessāmī’ti pabbajati, katipāheneva pana ghaṭetvā arahattaṃ gaṇhissatī’’ti ñatvā ‘‘tenahānanda, susimaṃ pabbājethā’’ti āha.
ਅਞ੍ਞਾ ਬ੍ਯਾਕਤਾ ਹੋਤੀਤਿ ਤੇ ਕਿਰ ਭਿਕ੍ਖੂ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍વਾ ਤੇਮਾਸਂ વਸ੍ਸਂ વਸਨ੍ਤਾ ਤਸ੍ਮਿਂਯੇવ ਅਨ੍ਤੋਤੇਮਾਸੇ ਘਟੇਨ੍ਤਾ વਾਯਮਨ੍ਤਾ ਅਰਹਤ੍ਤਂ ਪਟਿਲਭਿਂਸੁ। ਤੇ ‘‘ਪਟਿਲਦ੍ਧਗੁਣਂ ਸਤ੍ਥੁ ਆਰੋਚੇਸ੍ਸਾਮਾ’’ਤਿ ਪવਾਰਿਤਪવਾਰਣਾ ਸੇਨਾਸਨਂ ਸਂਸਾਮੇਤ੍વਾ ਸਤ੍ਥੁ ਸਨ੍ਤਿਕਂ ਆਗਨ੍ਤ੍વਾ ਅਤ੍ਤਨੋ ਪਟਿਲਦ੍ਧਗੁਣਂ ਆਰੋਚੇਸੁਂ। ਤਂ ਸਨ੍ਧਾਯੇਤਂ વੁਤ੍ਤਂ। ਅਞ੍ਞਾਤਿ ਅਰਹਤ੍ਤਸ੍ਸ ਨਾਮਂ। ਬ੍ਯਾਕਤਾਤਿ ਆਰੋਚਿਤਾ। ਅਸ੍ਸੋਸੀਤਿ ਸੋ ਕਿਰ ਓਹਿਤਸੋਤੋ ਹੁਤ੍વਾ ਤੇਸਂ ਤੇਸਂ ਭਿਕ੍ਖੂਨਂ ਠਿਤਟ੍ਠਾਨਂ ਗਚ੍ਛਤਿ ਤਂ ਤਂ ਕਥਂ ਸੁਣਿਤੁਕਾਮੋ। ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਤਂ ਕਿਰਸ੍ਸ ਪવਤ੍ਤਿਂ ਸੁਤ੍વਾ ਏਤਦਹੋਸਿ – ‘‘ਅਞ੍ਞਾ ਨਾਮ ਇਮਸ੍ਮਿਂ ਸਾਸਨੇ ਪਰਮਪ੍ਪਮਾਣਂ ਸਾਰਭੂਤਾ ਆਚਰਿਯਮੁਟ੍ਠਿ ਮਞ੍ਞੇ ਭવਿਸ੍ਸਤਿ, ਪੁਚ੍ਛਿਤ੍વਾ ਨਂ ਜਾਨਿਸ੍ਸਾਮੀ’’ਤਿ। ਤਸ੍ਮਾ ਉਪਸਙ੍ਕਮਿ।
Aññā byākatā hotīti te kira bhikkhū satthu santike kammaṭṭhānaṃ gahetvā temāsaṃ vassaṃ vasantā tasmiṃyeva antotemāse ghaṭentā vāyamantā arahattaṃ paṭilabhiṃsu. Te ‘‘paṭiladdhaguṇaṃ satthu ārocessāmā’’ti pavāritapavāraṇā senāsanaṃ saṃsāmetvā satthu santikaṃ āgantvā attano paṭiladdhaguṇaṃ ārocesuṃ. Taṃ sandhāyetaṃ vuttaṃ. Aññāti arahattassa nāmaṃ. Byākatāti ārocitā. Assosīti so kira ohitasoto hutvā tesaṃ tesaṃ bhikkhūnaṃ ṭhitaṭṭhānaṃ gacchati taṃ taṃ kathaṃ suṇitukāmo. Yena te bhikkhū tenupasaṅkamīti kasmā upasaṅkami? Taṃ kirassa pavattiṃ sutvā etadahosi – ‘‘aññā nāma imasmiṃ sāsane paramappamāṇaṃ sārabhūtā ācariyamuṭṭhi maññe bhavissati, pucchitvā naṃ jānissāmī’’ti. Tasmā upasaṅkami.
ਅਨੇਕવਿਹਿਤਨ੍ਤਿ ਅਨੇਕવਿਧਂ। ਇਦ੍ਧਿવਿਧਨ੍ਤਿ ਇਦ੍ਧਿਕੋਟ੍ਠਾਸਂ। ਆવਿਭਾવਂ ਤਿਰੋਭਾવਨ੍ਤਿ ਆવਿਭਾવਂ ਗਹੇਤ੍વਾ ਤਿਰੋਭਾવਂ, ਤਿਰੋਭਾવਂ ਗਹੇਤ੍વਾ ਆવਿਭਾવਂ ਕਾਤੁਂ ਸਕ੍ਕੋਥਾਤਿ ਪੁਚ੍ਛਤਿ। ਤਿਰੋਕੁਟ੍ਟਨ੍ਤਿ ਪਰਕੁਟ੍ਟਂ। ਇਤਰਪਦਦ੍વਯੇਪਿ ਏਸੇવ ਨਯੋ। ਉਮ੍ਮੁਜ੍ਜਨਿਮੁਜ੍ਜਨ੍ਤਿ ਉਮ੍ਮੁਜ੍ਜਨਞ੍ਚ ਨਿਮੁਜ੍ਜਨਞ੍ਚ। ਪਲ੍ਲਙ੍ਕੇਨਾਤਿ ਪਲ੍ਲਙ੍ਕਬਨ੍ਧਨੇਨ। ਕਮਥਾਤਿ ਨਿਸੀਦਿਤੁਂ વਾ ਗਨ੍ਤੁਂ વਾ ਸਕ੍ਕੋਥਾਤਿ ਪੁਚ੍ਛਤਿ? ਪਕ੍ਖੀ ਸਕੁਣੋਤਿ ਪਕ੍ਖਯੁਤ੍ਤੋ ਸਕੁਣੋ। ਅਯਮੇਤ੍ਥ ਸਙ੍ਖੇਪੋ, વਿਤ੍ਥਾਰਤੋ ਪਨ ਇਮਸ੍ਸ ਇਦ੍ਧਿવਿਧਸ੍ਸ, ਇਤੋ ਪਰੇਸਂ ਦਿਬ੍ਬਸੋਤਾਦੀਨਞ੍ਚ વਣ੍ਣਨਾਨਯੋ વਿਸੁਦ੍ਧਿਮਗ੍ਗੇ વੁਤ੍ਤਨਯੇਨ વੇਦਿਤਬ੍ਬੋਤਿ।
Anekavihitanti anekavidhaṃ. Iddhividhanti iddhikoṭṭhāsaṃ. Āvibhāvaṃ tirobhāvanti āvibhāvaṃ gahetvā tirobhāvaṃ, tirobhāvaṃ gahetvā āvibhāvaṃ kātuṃ sakkothāti pucchati. Tirokuṭṭanti parakuṭṭaṃ. Itarapadadvayepi eseva nayo. Ummujjanimujjanti ummujjanañca nimujjanañca. Pallaṅkenāti pallaṅkabandhanena. Kamathāti nisīdituṃ vā gantuṃ vā sakkothāti pucchati? Pakkhī sakuṇoti pakkhayutto sakuṇo. Ayamettha saṅkhepo, vitthārato pana imassa iddhividhassa, ito paresaṃ dibbasotādīnañca vaṇṇanānayo visuddhimagge vuttanayena veditabboti.
ਸਨ੍ਤਾ વਿਮੋਕ੍ਖਾਤਿ ਅਙ੍ਗਸਨ੍ਤਤਾਯ ਚੇવ ਆਰਮ੍ਮਣਸਨ੍ਤਤਾਯ ਚ ਸਨ੍ਤਾ ਆਰੁਪ੍ਪવਿਮੋਕ੍ਖਾ। ਕਾਯੇਨ ਫੁਸਿਤ੍વਾਤਿ ਨਾਮਕਾਯੇਨ ਫੁਸਿਤ੍વਾ ਪਟਿਲਭਿਤ੍વਾ। ਪਞ੍ਞਾવਿਮੁਤ੍ਤਾ ਖੋ ਮਯਂ, ਆવੁਸੋਤਿ, ਆવੁਸੋ, ਮਯਂ ਨਿਜ੍ਝਾਨਕਾ ਸੁਕ੍ਖવਿਪਸ੍ਸਕਾ ਪਞ੍ਞਾਮਤ੍ਤੇਨੇવ વਿਮੁਤ੍ਤਾਤਿ ਦਸ੍ਸੇਤਿ। ਆਜਾਨੇਯ੍ਯਾਸਿ વਾ ਤ੍વਂ, ਆવੁਸੋ ਸੁਸਿਮ, ਨ વਾ ਤ੍વਂ ਆਜਾਨੇਯ੍ਯਾਸੀਤਿ ਕਸ੍ਮਾ ਏવਮਾਹਂਸੁ? ਏવਂ ਕਿਰ ਨੇਸਂ ਅਹੋਸਿ – ‘‘ਮਯਂ ਇਮਸ੍ਸ ਅਜ੍ਝਾਸਯਂ ਗਹੇਤ੍વਾ ਕਥੇਤੁਂ ਨ ਸਕ੍ਖਿਸ੍ਸਾਮ, ਦਸਬਲਂ ਪਨ ਪੁਚ੍ਛਿਤ੍વਾ ਨਿਕ੍ਕਙ੍ਖੋ ਭવਿਸ੍ਸਤੀ’’ਤਿ। ਧਮ੍ਮਟ੍ਠਿਤਿਞਾਣਨ੍ਤਿ વਿਪਸ੍ਸਨਾਞਾਣਂ, ਤਂ ਪਠਮਤਰਂ ਉਪ੍ਪਜ੍ਜਤਿ। ਨਿਬ੍ਬਾਨੇ ਞਾਣਨ੍ਤਿ વਿਪਸ੍ਸਨਾਯ ਚਿਣ੍ਣਨ੍ਤੇ ਪવਤ੍ਤਮਗ੍ਗਞਾਣਂ, ਤਂ ਪਚ੍ਛਾ ਉਪ੍ਪਜ੍ਜਤਿ। ਤਸ੍ਮਾ ਭਗવਾ ਏવਮਾਹ।
Santā vimokkhāti aṅgasantatāya ceva ārammaṇasantatāya ca santā āruppavimokkhā. Kāyena phusitvāti nāmakāyena phusitvā paṭilabhitvā. Paññāvimuttā kho mayaṃ, āvusoti, āvuso, mayaṃ nijjhānakā sukkhavipassakā paññāmatteneva vimuttāti dasseti. Ājāneyyāsi vā tvaṃ, āvuso susima, na vā tvaṃ ājāneyyāsīti kasmā evamāhaṃsu? Evaṃ kira nesaṃ ahosi – ‘‘mayaṃ imassa ajjhāsayaṃ gahetvā kathetuṃ na sakkhissāma, dasabalaṃ pana pucchitvā nikkaṅkho bhavissatī’’ti. Dhammaṭṭhitiñāṇanti vipassanāñāṇaṃ, taṃ paṭhamataraṃ uppajjati. Nibbāne ñāṇanti vipassanāya ciṇṇante pavattamaggañāṇaṃ, taṃ pacchā uppajjati. Tasmā bhagavā evamāha.
ਆਜਾਨੇਯ੍ਯਾਸਿ વਾਤਿਆਦਿ ਕਸ੍ਮਾ વੁਤ੍ਤਂ? વਿਨਾਪਿ ਸਮਾਧਿਂ ਏવਂ ਞਾਣੁਪ੍ਪਤ੍ਤਿਦਸ੍ਸਨਤ੍ਥਂ। ਇਦਞ੍ਹਿ વੁਤ੍ਤਂ ਹੋਤਿ – ਸੁਸਿਮ, ਮਗ੍ਗੋ વਾ ਫਲਂ વਾ ਨ ਸਮਾਧਿਨਿਸ੍ਸਨ੍ਦੋ, ਨ ਸਮਾਧਿਆਨਿਸਂਸੋ, ਨ ਸਮਾਧਿਸ੍ਸ ਨਿਪ੍ਫਤ੍ਤਿ, વਿਪਸ੍ਸਨਾਯ ਪਨੇਸੋ ਨਿਸ੍ਸਨ੍ਦੋ, વਿਪਸ੍ਸਨਾਯ ਆਨਿਸਂਸੋ, વਿਪਸ੍ਸਨਾਯ ਨਿਪ੍ਫਤ੍ਤਿ, ਤਸ੍ਮਾ ਜਾਨੇਯ੍ਯਾਸਿ વਾ ਤ੍વਂ, ਨ વਾ ਤ੍વਂ ਜਾਨੇਯ੍ਯਾਸਿ, ਅਥ ਖੋ ਧਮ੍ਮਟ੍ਠਿਤਿਞਾਣਂ ਪੁਬ੍ਬੇ, ਪਚ੍ਛਾ ਨਿਬ੍ਬਾਨੇ ਞਾਣਨ੍ਤਿ।
Ājāneyyāsi vātiādi kasmā vuttaṃ? Vināpi samādhiṃ evaṃ ñāṇuppattidassanatthaṃ. Idañhi vuttaṃ hoti – susima, maggo vā phalaṃ vā na samādhinissando, na samādhiānisaṃso, na samādhissa nipphatti, vipassanāya paneso nissando, vipassanāya ānisaṃso, vipassanāya nipphatti, tasmā jāneyyāsi vā tvaṃ, na vā tvaṃ jāneyyāsi, atha kho dhammaṭṭhitiñāṇaṃ pubbe, pacchā nibbāne ñāṇanti.
ਇਦਾਨਿਸ੍ਸ ਪਟਿવੇਧਭਬ੍ਬਤਂ ਞਤ੍વਾ ਤੇਪਰਿવਟ੍ਟਂ ਧਮ੍ਮਦੇਸਨਂ ਦੇਸੇਨ੍ਤੋ ਤਂ ਕਿਂ ਮਞ੍ਞਸਿ, ਸੁਸਿਮ? ਰੂਪਂ ਨਿਚ੍ਚਂ વਾ ਅਨਿਚ੍ਚਂ વਾਤਿਆਦਿਮਾਹ? ਤੇ ਪਰਿવਟ੍ਟਦੇਸਨਾવਸਾਨੇ ਪਨ ਥੇਰੋ ਅਰਹਤ੍ਤਂ ਪਤ੍ਤੋ। ਇਦਾਨਿਸ੍ਸ ਅਨੁਯੋਗਂ ਆਰੋਪੇਨ੍ਤੋ ਜਾਤਿਪਚ੍ਚਯਾ ਜਰਾਮਰਣਨ੍ਤਿ, ਸੁਸਿਮ, ਪਸ੍ਸਸੀਤਿਆਦਿਮਾਹ। ਅਪਿ ਪਨ ਤ੍વਂ, ਸੁਸਿਮਾਤਿ ਇਦਂ ਕਸ੍ਮਾ ਆਰਭਿ? ਨਿਜ੍ਝਾਨਕਾਨਂ ਸੁਕ੍ਖવਿਪਸ੍ਸਕਭਿਕ੍ਖੂਨਂ ਪਾਕਟਕਰਣਤ੍ਥਂ। ਅਯਞ੍ਹੇਤ੍ਥ ਅਧਿਪ੍ਪਾਯੋ – ਨ ਕੇવਲਂ ਤ੍વਮੇવ ਨਿਜ੍ਝਾਨਕੋ ਸੁਕ੍ਖવਿਪਸ੍ਸਕੋ, ਏਤੇਪਿ ਭਿਕ੍ਖੂ ਏવਰੂਪਾਯੇવਾਤਿ। ਸੇਸਂ ਸਬ੍ਬਤ੍ਥ ਪਾਕਟਮੇવਾਤਿ। ਦਸਮਂ।
Idānissa paṭivedhabhabbataṃ ñatvā teparivaṭṭaṃ dhammadesanaṃ desento taṃ kiṃ maññasi, susima? Rūpaṃ niccaṃ vā aniccaṃ vātiādimāha? Te parivaṭṭadesanāvasāne pana thero arahattaṃ patto. Idānissa anuyogaṃ āropento jātipaccayā jarāmaraṇanti, susima, passasītiādimāha. Api pana tvaṃ, susimāti idaṃ kasmā ārabhi? Nijjhānakānaṃ sukkhavipassakabhikkhūnaṃ pākaṭakaraṇatthaṃ. Ayañhettha adhippāyo – na kevalaṃ tvameva nijjhānako sukkhavipassako, etepi bhikkhū evarūpāyevāti. Sesaṃ sabbattha pākaṭamevāti. Dasamaṃ.
ਮਹਾવਗ੍ਗੋ ਸਤ੍ਤਮੋ।
Mahāvaggo sattamo.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੦. ਸੁਸਿਮਸੁਤ੍ਤਂ • 10. Susimasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧੦. ਸੁਸਿਮਸੁਤ੍ਤવਣ੍ਣਨਾ • 10. Susimasuttavaṇṇanā
