| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. ஸுதனுஸுத்தங்
3. Sutanusuttaṃ
901. ஏகங் ஸமயங் ஆயஸ்மா அனுருத்³தோ⁴ ஸாவத்தி²யங் விஹரதி ஸுதனுதீரே. அத² கோ² ஸம்ப³ஹுலா பி⁴க்கூ² யேனாயஸ்மா அனுருத்³தோ⁴ தேனுபஸங்கமிங்ஸு; உபஸங்கமித்வா ஆயஸ்மதா அனுருத்³தே⁴ன ஸத்³தி⁴ங் ஸம்மோதி³ங்ஸு. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ஆயஸ்மந்தங் அனுருத்³த⁴ங் ஏதத³வோசுங் – ‘‘கதமேஸங் ஆயஸ்மா அனுருத்³தோ⁴ த⁴ம்மானங் பா⁴விதத்தா ப³ஹுலீகதத்தா மஹாபி⁴ஞ்ஞதங் பத்தோ’’தி?
901. Ekaṃ samayaṃ āyasmā anuruddho sāvatthiyaṃ viharati sutanutīre. Atha kho sambahulā bhikkhū yenāyasmā anuruddho tenupasaṅkamiṃsu; upasaṅkamitvā āyasmatā anuruddhena saddhiṃ sammodiṃsu. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu. Ekamantaṃ nisinnā kho te bhikkhū āyasmantaṃ anuruddhaṃ etadavocuṃ – ‘‘katamesaṃ āyasmā anuruddho dhammānaṃ bhāvitattā bahulīkatattā mahābhiññataṃ patto’’ti?
‘‘சதுன்னங் க்²வாஹங், ஆவுஸோ, ஸதிபட்டா²னானங் பா⁴விதத்தா ப³ஹுலீகதத்தா மஹாபி⁴ஞ்ஞதங் பத்தோ. கதமேஸங் சதுன்னங்? இதா⁴ஹங், ஆவுஸோ, காயே காயானுபஸ்ஸீ விஹராமி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹராமி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங் – இமேஸங் க்²வாஹங், ஆவுஸோ, சதுன்னங் ஸதிபட்டா²னானங் பா⁴விதத்தா ப³ஹுலீகதத்தா மஹாபி⁴ஞ்ஞதங் பத்தோ. இமேஸஞ்ச பனாஹங், ஆவுஸோ, சதுன்னங் ஸதிபட்டா²னானங் பா⁴விதத்தா ப³ஹுலீகதத்தா ஹீனங் த⁴ம்மங் ஹீனதோ அப்³ப⁴ஞ்ஞாஸிங், மஜ்ஜி²மங் த⁴ம்மங் மஜ்ஜி²மதோ அப்³ப⁴ஞ்ஞாஸிங், பணீதங் த⁴ம்மங் பணீததோ அப்³ப⁴ஞ்ஞாஸி’’ந்தி. ததியங்.
‘‘Catunnaṃ khvāhaṃ, āvuso, satipaṭṭhānānaṃ bhāvitattā bahulīkatattā mahābhiññataṃ patto. Katamesaṃ catunnaṃ? Idhāhaṃ, āvuso, kāye kāyānupassī viharāmi ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharāmi ātāpī sampajāno satimā, vineyya loke abhijjhādomanassaṃ – imesaṃ khvāhaṃ, āvuso, catunnaṃ satipaṭṭhānānaṃ bhāvitattā bahulīkatattā mahābhiññataṃ patto. Imesañca panāhaṃ, āvuso, catunnaṃ satipaṭṭhānānaṃ bhāvitattā bahulīkatattā hīnaṃ dhammaṃ hīnato abbhaññāsiṃ, majjhimaṃ dhammaṃ majjhimato abbhaññāsiṃ, paṇītaṃ dhammaṃ paṇītato abbhaññāsi’’nti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. ஸுதனுஸுத்தவண்ணனா • 3. Sutanusuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஸுதனுஸுத்தவண்ணனா • 3. Sutanusuttavaṇṇanā
