| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. සුතසුත්‌තං
3. Sutasuttaṃ
183. එකං සමයං භගවා රාජගහෙ විහරති වෙළුවනෙ කලන්‌දකනිවාපෙ. අථ ඛො වස්‌සකාරො බ්‍රාහ්‌මණො මගධමහාමත්‌තො යෙන භගවා තෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො වස්‌සකාරො බ්‍රාහ්‌මණො මගධමහාමත්‌තො භගවන්‌තං එතදවොච –
183. Ekaṃ samayaṃ bhagavā rājagahe viharati veḷuvane kalandakanivāpe. Atha kho vassakāro brāhmaṇo magadhamahāmatto yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vassakāro brāhmaṇo magadhamahāmatto bhagavantaṃ etadavoca –
‘‘අහඤ්‌හි, භො ගොතම, එවංවාදී එවංදිට්‌ඨි 1 – ‘යො කොචි දිට්‌ඨං භාසති – එවං මෙ දිට්‌ඨන්‌ති, නත්‌ථි තතො දොසො; යො කොචි සුතං භාසති – එවං මෙ සුතන්‌ති, නත්‌ථි තතො දොසො; යො කොචි මුතං භාසති – එවං මෙ මුතන්‌ති, නත්‌ථි තතො දොසො; යො කොචි විඤ්‌ඤාතං භාසති – එවං මෙ විඤ්‌ඤාතන්‌ති, නත්‌ථි තතො දොසො’’’ති.
‘‘Ahañhi, bho gotama, evaṃvādī evaṃdiṭṭhi 2 – ‘yo koci diṭṭhaṃ bhāsati – evaṃ me diṭṭhanti, natthi tato doso; yo koci sutaṃ bhāsati – evaṃ me sutanti, natthi tato doso; yo koci mutaṃ bhāsati – evaṃ me mutanti, natthi tato doso; yo koci viññātaṃ bhāsati – evaṃ me viññātanti, natthi tato doso’’’ti.
‘‘නාහං, බ්‍රාහ්‌මණ, සබ්‌බං දිට්‌ඨං භාසිතබ්‌බන්‌ති වදාමි; න පනාහං, බ්‍රාහ්‌මණ, සබ්‌බං දිට්‌ඨං න භාසිතබ්‌බන්‌ති වදාමි; නාහං, බ්‍රාහ්‌මණ, සබ්‌බං සුතං භාසිතබ්‌බන්‌ති වදාමි; න පනාහං, බ්‍රාහ්‌මණ, සබ්‌බං සුතං න භාසිතබ්‌බන්‌ති වදාමි; නාහං, බ්‍රාහ්‌මණ, සබ්‌බං මුතං භාසිතබ්‌බන්‌ති වදාමි; න පනාහං, බ්‍රාහ්‌මණ, සබ්‌බං මුතං න භාසිතබ්‌බන්‌ති වදාමි; නාහං, බ්‍රාහ්‌මණ, සබ්‌බං විඤ්‌ඤාතං භාසිතබ්‌බන්‌ති වදාමි; න පනාහං, බ්‍රාහ්‌මණ, සබ්‌බං විඤ්‌ඤාතං න භාසිතබ්‌බන්‌ති වදාමි.
‘‘Nāhaṃ, brāhmaṇa, sabbaṃ diṭṭhaṃ bhāsitabbanti vadāmi; na panāhaṃ, brāhmaṇa, sabbaṃ diṭṭhaṃ na bhāsitabbanti vadāmi; nāhaṃ, brāhmaṇa, sabbaṃ sutaṃ bhāsitabbanti vadāmi; na panāhaṃ, brāhmaṇa, sabbaṃ sutaṃ na bhāsitabbanti vadāmi; nāhaṃ, brāhmaṇa, sabbaṃ mutaṃ bhāsitabbanti vadāmi; na panāhaṃ, brāhmaṇa, sabbaṃ mutaṃ na bhāsitabbanti vadāmi; nāhaṃ, brāhmaṇa, sabbaṃ viññātaṃ bhāsitabbanti vadāmi; na panāhaṃ, brāhmaṇa, sabbaṃ viññātaṃ na bhāsitabbanti vadāmi.
‘‘යඤ්‌හි, බ්‍රාහ්‌මණ, දිට්‌ඨං භාසතො අකුසලා ධම්‌මා අභිවඩ්‌ඪන්‌ති, කුසලා ධම්‌මා පරිහායන්‌ති, එවරූපං දිට්‌ඨං න භාසිතබ්‌බන්‌ති වදාමි. යඤ්‌ච ඛ්‌වස්‌ස, බ්‍රාහ්‌මණ, දිට්‌ඨං අභාසතො කුසලා ධම්‌මා පරිහායන්‌ති, අකුසලා ධම්‌මා අභිවඩ්‌ඪන්‌ති, එවරූපං දිට්‌ඨං භාසිතබ්‌බන්‌ති වදාමි.
‘‘Yañhi, brāhmaṇa, diṭṭhaṃ bhāsato akusalā dhammā abhivaḍḍhanti, kusalā dhammā parihāyanti, evarūpaṃ diṭṭhaṃ na bhāsitabbanti vadāmi. Yañca khvassa, brāhmaṇa, diṭṭhaṃ abhāsato kusalā dhammā parihāyanti, akusalā dhammā abhivaḍḍhanti, evarūpaṃ diṭṭhaṃ bhāsitabbanti vadāmi.
‘‘යඤ්‌හි, බ්‍රාහ්‌මණ, සුතං භාසතො අකුසලා ධම්‌මා අභිවඩ්‌ඪන්‌ති, කුසලා ධම්‌මා පරිහායන්‌ති , එවරූපං සුතං න භාසිතබ්‌බන්‌ති වදාමි. යඤ්‌ච ඛ්‌වස්‌ස, බ්‍රාහ්‌මණ, සුතං අභාසතො කුසලා ධම්‌මා පරිහායන්‌ති, අකුසලා ධම්‌මා අභිවඩ්‌ඪන්‌ති, එවරූපං සුතං භාසිතබ්‌බන්‌ති වදාමි.
‘‘Yañhi, brāhmaṇa, sutaṃ bhāsato akusalā dhammā abhivaḍḍhanti, kusalā dhammā parihāyanti , evarūpaṃ sutaṃ na bhāsitabbanti vadāmi. Yañca khvassa, brāhmaṇa, sutaṃ abhāsato kusalā dhammā parihāyanti, akusalā dhammā abhivaḍḍhanti, evarūpaṃ sutaṃ bhāsitabbanti vadāmi.
‘‘යඤ්‌හි, බ්‍රාහ්‌මණ, මුතං භාසතො අකුසලා ධම්‌මා අභිවඩ්‌ඪන්‌ති, කුසලා ධම්‌මා පරිහායන්‌ති, එවරූපං මුතං න භාසිතබ්‌බන්‌ති වදාමි. යඤ්‌ච ඛ්‌වස්‌ස, බ්‍රාහ්‌මණ, මුතං අභාසතො කුසලා ධම්‌මා පරිහායන්‌ති, අකුසලා ධම්‌මා අභිවඩ්‌ඪන්‌ති, එවරූපං මුතං භාසිතබ්‌බන්‌ති වදාමි .
‘‘Yañhi, brāhmaṇa, mutaṃ bhāsato akusalā dhammā abhivaḍḍhanti, kusalā dhammā parihāyanti, evarūpaṃ mutaṃ na bhāsitabbanti vadāmi. Yañca khvassa, brāhmaṇa, mutaṃ abhāsato kusalā dhammā parihāyanti, akusalā dhammā abhivaḍḍhanti, evarūpaṃ mutaṃ bhāsitabbanti vadāmi .
‘‘යඤ්‌හි , බ්‍රාහ්‌මණ, විඤ්‌ඤාතං භාසතො අකුසලා ධම්‌මා අභිවඩ්‌ඪන්‌ති, කුසලා ධම්‌මා පරිහායන්‌ති, එවරූපං විඤ්‌ඤාතං න භාසිතබ්‌බන්‌ති වදාමි. යඤ්‌ච ඛ්‌වස්‌ස, බ්‍රාහ්‌මණ, විඤ්‌ඤාතං අභාසතො කුසලා ධම්‌මා පරිහායන්‌ති, අකුසලා ධම්‌මා අභිවඩ්‌ඪන්‌ති, එවරූපං විඤ්‌ඤාතං භාසිතබ්‌බන්‌ති වදාමී’’ති.
‘‘Yañhi , brāhmaṇa, viññātaṃ bhāsato akusalā dhammā abhivaḍḍhanti, kusalā dhammā parihāyanti, evarūpaṃ viññātaṃ na bhāsitabbanti vadāmi. Yañca khvassa, brāhmaṇa, viññātaṃ abhāsato kusalā dhammā parihāyanti, akusalā dhammā abhivaḍḍhanti, evarūpaṃ viññātaṃ bhāsitabbanti vadāmī’’ti.
අථ ඛො වස්‌සකාරො බ්‍රාහ්‌මණො මගධමහාමත්‌තො භගවතො භාසිතං අභිනන්‌දිත්‌වා අනුමොදිත්‌වා උට්‌ඨායාසනා පක්‌කාමීති. තතියං.
Atha kho vassakāro brāhmaṇo magadhamahāmatto bhagavato bhāsitaṃ abhinanditvā anumoditvā uṭṭhāyāsanā pakkāmīti. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. සුතසුත්‌තවණ්‌ණනා • 3. Sutasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-3. යොධාජීවසුත්‌තාදිවණ්‌ණනා • 1-3. Yodhājīvasuttādivaṇṇanā
