| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7-10. ஸுதவாஸுத்தாதி³வண்ணனா
7-10. Sutavāsuttādivaṇṇanā
7-10. ஸத்தமே அப⁴ப்³போ³ கீ²ணாஸவோ பி⁴க்கு² ஸஞ்சிச்ச பாணந்திஆதி³ தே³ஸனாஸீஸமேவ, ஸோதாபன்னாத³யோபி பன அப⁴ப்³பா³வ, புது²ஜ்ஜனகீ²ணாஸவானங் நிந்தா³பஸங்ஸத்த²ம்பி ஏவங் வுத்தங். புது²ஜ்ஜனோ நாம கா³ரய்ஹோ மாதுகா⁴தாதீ³னி கரோதி, கீ²ணாஸவோ பன பாஸங்ஸோ குந்த²கிபில்லிககா⁴தாதீ³னிபி ந கரோதீதி. ஸன்னிதி⁴காரகங் காமே பரிபு⁴ஞ்ஜிதுந்தி யதா² கி³ஹிபூ⁴தோ ஸன்னிதி⁴ங் கத்வா வத்து²காமே பரிபு⁴ஞ்ஜதி, ஏவங் திலதண்டு³லஸப்பினவனீதாதீ³னி ஸன்னிதி⁴ங் கத்வா இதா³னி பரிபு⁴ஞ்ஜிதுங் அப⁴ப்³போ³தி அத்தோ². வத்து²காமே பன நித³ஹித்வா பரிபு⁴ஞ்ஜந்தா தன்னிஸ்ஸிதங் கிலேஸகாமம்பி நித³ஹித்வா பரிபு⁴ஞ்ஜந்தி நாமாதி ஆஹ ‘‘வத்து²காமகிலேஸகாமே’’தி. நனு ச கீ²ணாஸவஸ்ஸேவ வஸனட்டா²னே திலதண்டு³லாத³யோ பஞ்ஞாயந்தீதி? ந பன தே அத்தனோ அத்தா²ய நிதெ⁴ந்தி, அபா²ஸுகபப்³ப³ஜிதாதீ³னங் அத்தா²ய நிதெ⁴ந்தி. அனாகா³மிஸ்ஸ கத²ந்தி? தஸ்ஸபி பஞ்ச காமகு³ணா ஸப்³ப³ஸோவ பஹீனா, த⁴ம்மேன பன லத்³த⁴ங் விசாரெத்வா பரிபு⁴ஞ்ஜதி. அகப்பியகாமகு³ணே ஸந்தா⁴யேதங் வுத்தங், ந மஞ்சபீட²அத்த²ரணபாவுரணாதி³ஸன்னிஸ்ஸிதங். ஸெய்யாதா²பி புப்³பே³ அகா³ரியபூ⁴தோதி யதா² புப்³பே³ கி³ஹிபூ⁴தோ பரிபு⁴ஞ்ஜதி, ஏவங் பரிபு⁴ஞ்ஜிதுங் அப⁴ப்³போ³. அகா³ரமஜ்ஜே² வஸந்தா ஹி ஸோதாபன்னாத³யோ யாவஜீவங் கி³ஹிப்³யஞ்ஜனேன திட்ட²ந்தி. கீ²ணாஸவோ பன அரஹத்தங் பத்வாவ மனுஸ்ஸபூ⁴தோ பரினிப்³பா³தி வா பப்³ப³ஜதி வா. சாதுமஹாராஜிகாதீ³ஸு காமாவசரதே³வேஸு முஹுத்தம்பி ந திட்ட²தி. கஸ்மா? விவேகட்டா²னஸ்ஸ அபா⁴வா. பு⁴ம்மதே³வத்தபா⁴வே பன டி²தோ அரஹத்தங் பத்வாபி திட்ட²தி விவேகட்டா²னஸம்ப⁴வா. அட்ட²மாதீ³னி உத்தானத்தா²னேவ.
7-10. Sattame abhabbo khīṇāsavo bhikkhu sañcicca pāṇantiādi desanāsīsameva, sotāpannādayopi pana abhabbāva, puthujjanakhīṇāsavānaṃ nindāpasaṃsatthampi evaṃ vuttaṃ. Puthujjano nāma gārayho mātughātādīni karoti, khīṇāsavo pana pāsaṃso kunthakipillikaghātādīnipi na karotīti. Sannidhikārakaṃ kāme paribhuñjitunti yathā gihibhūto sannidhiṃ katvā vatthukāme paribhuñjati, evaṃ tilataṇḍulasappinavanītādīni sannidhiṃ katvā idāni paribhuñjituṃ abhabboti attho. Vatthukāme pana nidahitvā paribhuñjantā tannissitaṃ kilesakāmampi nidahitvā paribhuñjanti nāmāti āha ‘‘vatthukāmakilesakāme’’ti. Nanu ca khīṇāsavasseva vasanaṭṭhāne tilataṇḍulādayo paññāyantīti? Na pana te attano atthāya nidhenti, aphāsukapabbajitādīnaṃ atthāya nidhenti. Anāgāmissa kathanti? Tassapi pañca kāmaguṇā sabbasova pahīnā, dhammena pana laddhaṃ vicāretvā paribhuñjati. Akappiyakāmaguṇe sandhāyetaṃ vuttaṃ, na mañcapīṭhaattharaṇapāvuraṇādisannissitaṃ. Seyyāthāpi pubbe agāriyabhūtoti yathā pubbe gihibhūto paribhuñjati, evaṃ paribhuñjituṃ abhabbo. Agāramajjhe vasantā hi sotāpannādayo yāvajīvaṃ gihibyañjanena tiṭṭhanti. Khīṇāsavo pana arahattaṃ patvāva manussabhūto parinibbāti vā pabbajati vā. Cātumahārājikādīsu kāmāvacaradevesu muhuttampi na tiṭṭhati. Kasmā? Vivekaṭṭhānassa abhāvā. Bhummadevattabhāve pana ṭhito arahattaṃ patvāpi tiṭṭhati vivekaṭṭhānasambhavā. Aṭṭhamādīni uttānatthāneva.
ஸுதவாஸுத்தாதி³வண்ணனா நிட்டி²தா.
Sutavāsuttādivaṇṇanā niṭṭhitā.
ஸம்போ³தி⁴வக்³க³வண்ணனா நிட்டி²தா.
Sambodhivaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
7. ஸுதவாஸுத்தங் • 7. Sutavāsuttaṃ
8. ஸஜ்ஜ²ஸுத்தங் • 8. Sajjhasuttaṃ
9. புக்³க³லஸுத்தங் • 9. Puggalasuttaṃ
10. ஆஹுனெய்யஸுத்தங் • 10. Āhuneyyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
7. ஸுதவாஸுத்தவண்ணனா • 7. Sutavāsuttavaṇṇanā
8-10. ஸஜ்ஜ²ஸுத்தாதி³வண்ணனா • 8-10. Sajjhasuttādivaṇṇanā
