| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৭-১০. সুতৰাসুত্তাদিৰণ্ণনা
7-10. Sutavāsuttādivaṇṇanā
৭-১০. সত্তমে অভব্বো খীণাসৰো ভিক্খু সঞ্চিচ্চ পাণন্তিআদি দেসনাসীসমেৰ, সোতাপন্নাদযোপি পন অভব্বাৰ, পুথুজ্জনখীণাসৰানং নিন্দাপসংসত্থম্পি এৰং ৰুত্তং। পুথুজ্জনো নাম গারয্হো মাতুঘাতাদীনি করোতি, খীণাসৰো পন পাসংসো কুন্থকিপিল্লিকঘাতাদীনিপি ন করোতীতি। সন্নিধিকারকং কামে পরিভুঞ্জিতুন্তি যথা গিহিভূতো সন্নিধিং কত্ৰা ৰত্থুকামে পরিভুঞ্জতি, এৰং তিলতণ্ডুলসপ্পিনৰনীতাদীনি সন্নিধিং কত্ৰা ইদানি পরিভুঞ্জিতুং অভব্বোতি অত্থো। ৰত্থুকামে পন নিদহিত্ৰা পরিভুঞ্জন্তা তন্নিস্সিতং কিলেসকামম্পি নিদহিত্ৰা পরিভুঞ্জন্তি নামাতি আহ ‘‘ৰত্থুকামকিলেসকামে’’তি। ননু চ খীণাসৰস্সেৰ ৰসনট্ঠানে তিলতণ্ডুলাদযো পঞ্ঞাযন্তীতি? ন পন তে অত্তনো অত্থায নিধেন্তি, অফাসুকপব্বজিতাদীনং অত্থায নিধেন্তি। অনাগামিস্স কথন্তি? তস্সপি পঞ্চ কামগুণা সব্বসোৰ পহীনা, ধম্মেন পন লদ্ধং ৰিচারেত্ৰা পরিভুঞ্জতি। অকপ্পিযকামগুণে সন্ধাযেতং ৰুত্তং, ন মঞ্চপীঠঅত্থরণপাৰুরণাদিসন্নিস্সিতং। সেয্যাথাপি পুব্বে অগারিযভূতোতি যথা পুব্বে গিহিভূতো পরিভুঞ্জতি, এৰং পরিভুঞ্জিতুং অভব্বো। অগারমজ্ঝে ৰসন্তা হি সোতাপন্নাদযো যাৰজীৰং গিহিব্যঞ্জনেন তিট্ঠন্তি। খীণাসৰো পন অরহত্তং পত্ৰাৰ মনুস্সভূতো পরিনিব্বাতি ৰা পব্বজতি ৰা। চাতুমহারাজিকাদীসু কামাৰচরদেৰেসু মুহুত্তম্পি ন তিট্ঠতি। কস্মা? ৰিৰেকট্ঠানস্স অভাৰা। ভুম্মদেৰত্তভাৰে পন ঠিতো অরহত্তং পত্ৰাপি তিট্ঠতি ৰিৰেকট্ঠানসম্ভৰা। অট্ঠমাদীনি উত্তানত্থানেৰ।
7-10. Sattame abhabbo khīṇāsavo bhikkhu sañcicca pāṇantiādi desanāsīsameva, sotāpannādayopi pana abhabbāva, puthujjanakhīṇāsavānaṃ nindāpasaṃsatthampi evaṃ vuttaṃ. Puthujjano nāma gārayho mātughātādīni karoti, khīṇāsavo pana pāsaṃso kunthakipillikaghātādīnipi na karotīti. Sannidhikārakaṃ kāme paribhuñjitunti yathā gihibhūto sannidhiṃ katvā vatthukāme paribhuñjati, evaṃ tilataṇḍulasappinavanītādīni sannidhiṃ katvā idāni paribhuñjituṃ abhabboti attho. Vatthukāme pana nidahitvā paribhuñjantā tannissitaṃ kilesakāmampi nidahitvā paribhuñjanti nāmāti āha ‘‘vatthukāmakilesakāme’’ti. Nanu ca khīṇāsavasseva vasanaṭṭhāne tilataṇḍulādayo paññāyantīti? Na pana te attano atthāya nidhenti, aphāsukapabbajitādīnaṃ atthāya nidhenti. Anāgāmissa kathanti? Tassapi pañca kāmaguṇā sabbasova pahīnā, dhammena pana laddhaṃ vicāretvā paribhuñjati. Akappiyakāmaguṇe sandhāyetaṃ vuttaṃ, na mañcapīṭhaattharaṇapāvuraṇādisannissitaṃ. Seyyāthāpi pubbe agāriyabhūtoti yathā pubbe gihibhūto paribhuñjati, evaṃ paribhuñjituṃ abhabbo. Agāramajjhe vasantā hi sotāpannādayo yāvajīvaṃ gihibyañjanena tiṭṭhanti. Khīṇāsavo pana arahattaṃ patvāva manussabhūto parinibbāti vā pabbajati vā. Cātumahārājikādīsu kāmāvacaradevesu muhuttampi na tiṭṭhati. Kasmā? Vivekaṭṭhānassa abhāvā. Bhummadevattabhāve pana ṭhito arahattaṃ patvāpi tiṭṭhati vivekaṭṭhānasambhavā. Aṭṭhamādīni uttānatthāneva.
সুতৰাসুত্তাদিৰণ্ণনা নিট্ঠিতা।
Sutavāsuttādivaṇṇanā niṭṭhitā.
সম্বোধিৰগ্গৰণ্ণনা নিট্ঠিতা।
Sambodhivaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৭. সুতৰাসুত্তং • 7. Sutavāsuttaṃ
৮. সজ্ঝসুত্তং • 8. Sajjhasuttaṃ
৯. পুগ্গলসুত্তং • 9. Puggalasuttaṃ
১০. আহুনেয্যসুত্তং • 10. Āhuneyyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
৭. সুতৰাসুত্তৰণ্ণনা • 7. Sutavāsuttavaṇṇanā
৮-১০. সজ্ঝসুত্তাদিৰণ্ণনা • 8-10. Sajjhasuttādivaṇṇanā
