| Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā |
১৫. পটিসম্ভিদাৰিভঙ্গো
15. Paṭisambhidāvibhaṅgo
১. সুত্তন্তভাজনীযং
1. Suttantabhājanīyaṃ
১. সঙ্গহৰারৰণ্ণনা
1. Saṅgahavāravaṇṇanā
৭১৮. ইদানি তদনন্তরে পটিসম্ভিদাৰিভঙ্গে চতস্সোতি গণনপরিচ্ছেদো। পটিসম্ভিদাতি পভেদা। যস্মা পন পরতো অত্থে ঞাণং অত্থপটিসম্ভিদাতিআদিমাহ, তস্মা ন অঞ্ঞস্স কস্সচি পভেদা, ঞাণস্সেৰ পভেদাতি ৰেদিতব্বা। ইতি ‘‘চতস্সো পটিসম্ভিদা’’তি পদেন চত্তারো ঞাণপ্পভেদাতি অযমত্থো সঙ্গহিতো। অত্থপটিসম্ভিদাতি অত্থে পটিসম্ভিদা; অত্থপ্পভেদস্স সল্লক্খণৰিভাৰনাৰৰত্থানকরণসমত্থং অত্থে পভেদগতং ঞাণন্তি অত্থো। সেসপদেসুপি এসেৰ নযো। ধম্মপ্পভেদস্স হি সল্লক্খণৰিভাৰনাৰৰত্থানকরণসমত্থং ধম্মে পভেদগতং ঞাণং ধম্মপটিসম্ভিদা নাম। নিরুত্তিপ্পভেদস্স সল্লক্খণৰিভাৰনাৰৰত্থানকরণসমত্থং নিরুত্তাভিলাপে পভেদগতং ঞাণং নিরুত্তিপটিসম্ভিদা নাম। পটিভানপ্পভেদস্স সল্লক্খণৰিভাৰনাৰৰত্থানকরণসমত্থং পটিভানে পভেদগতং ঞাণং পটিভানপটিসম্ভিদা নাম।
718. Idāni tadanantare paṭisambhidāvibhaṅge catassoti gaṇanaparicchedo. Paṭisambhidāti pabhedā. Yasmā pana parato atthe ñāṇaṃ atthapaṭisambhidātiādimāha, tasmā na aññassa kassaci pabhedā, ñāṇasseva pabhedāti veditabbā. Iti ‘‘catasso paṭisambhidā’’ti padena cattāro ñāṇappabhedāti ayamattho saṅgahito. Atthapaṭisambhidāti atthe paṭisambhidā; atthappabhedassa sallakkhaṇavibhāvanāvavatthānakaraṇasamatthaṃ atthe pabhedagataṃ ñāṇanti attho. Sesapadesupi eseva nayo. Dhammappabhedassa hi sallakkhaṇavibhāvanāvavatthānakaraṇasamatthaṃ dhamme pabhedagataṃ ñāṇaṃ dhammapaṭisambhidā nāma. Niruttippabhedassa sallakkhaṇavibhāvanāvavatthānakaraṇasamatthaṃ niruttābhilāpe pabhedagataṃ ñāṇaṃ niruttipaṭisambhidā nāma. Paṭibhānappabhedassa sallakkhaṇavibhāvanāvavatthānakaraṇasamatthaṃ paṭibhāne pabhedagataṃ ñāṇaṃ paṭibhānapaṭisambhidā nāma.
ইদানি যথানিক্খিত্তা পটিসম্ভিদা ভাজেত্ৰা দস্সেন্তো অত্থে ঞাণং অত্থপটিসম্ভিদাতিআদিমাহ। তত্থ অত্থোতি সঙ্খেপতো হেতুফলং। তঞ্হি হেতুৰসেন অরণীযং গন্তব্বং পত্তব্বং, তস্মা অত্থোতি ৰুচ্চতি। পভেদতো পন যংকিঞ্চি পচ্চযসমুপ্পন্নং, নিব্বানং, ভাসিতত্থো, ৰিপাকো, কিরিযাতি ইমে পঞ্চ ধম্মা অত্থোতি ৰেদিতব্বা। তং অত্থং পচ্চৰেক্খন্তস্স তস্মিং অত্থে পভেদগতং ঞাণং অত্থপটিসম্ভিদা।
Idāni yathānikkhittā paṭisambhidā bhājetvā dassento atthe ñāṇaṃ atthapaṭisambhidātiādimāha. Tattha atthoti saṅkhepato hetuphalaṃ. Tañhi hetuvasena araṇīyaṃ gantabbaṃ pattabbaṃ, tasmā atthoti vuccati. Pabhedato pana yaṃkiñci paccayasamuppannaṃ, nibbānaṃ, bhāsitattho, vipāko, kiriyāti ime pañca dhammā atthoti veditabbā. Taṃ atthaṃ paccavekkhantassa tasmiṃ atthe pabhedagataṃ ñāṇaṃ atthapaṭisambhidā.
ধম্মোতি সঙ্খেপতো পচ্চযো। সো হি যস্মা তং তং ৰিদহতি পৰত্তেতি চেৰ পাপেতি চ, তস্মা ধম্মোতি ৰুচ্চতি। পভেদতো পন যো কোচি ফলনিব্বত্তকো হেতু, অরিযমগ্গো, ভাসিতং , কুসলং, অকুসলন্তি ইমে পঞ্চ ধম্মা ধম্মোতি ৰেদিতব্বা। তং ধম্মং পচ্চৰেক্খন্তস্স তস্মিং ধম্মে পভেদগতং ঞাণং ধম্মপটিসম্ভিদা।
Dhammoti saṅkhepato paccayo. So hi yasmā taṃ taṃ vidahati pavatteti ceva pāpeti ca, tasmā dhammoti vuccati. Pabhedato pana yo koci phalanibbattako hetu, ariyamaggo, bhāsitaṃ , kusalaṃ, akusalanti ime pañca dhammā dhammoti veditabbā. Taṃ dhammaṃ paccavekkhantassa tasmiṃ dhamme pabhedagataṃ ñāṇaṃ dhammapaṭisambhidā.
তত্র ধম্মনিরুত্তাভিলাপে ঞাণন্তি তস্মিং অত্থে চ ধম্মে চ যা সভাৰনিরুত্তি, তস্সা অভিলাপে তং সভাৰনিরুত্তিং সদ্দং আরম্মণং কত্ৰা পচ্চৰেক্খন্তস্স তস্মিং সভাৰনিরুত্তাভিলাপে পভেদগতং ঞাণং নিরুত্তিপটিসম্ভিদা। এৰমযং নিরুত্তিপটিসম্ভিদা সদ্দারম্মণা নাম জাতা, ন পঞ্ঞত্তিআরম্মণা। কস্মা? যস্মা সদ্দং সুত্ৰা ‘‘অযং সভাৰনিরুত্তি, অযং ন সভাৰনিরুত্তী’’তি জানন্তি। পটিসম্ভিদাপ্পত্তো হি ‘‘ফস্সো’’তি ৰুত্তে ‘‘অযং সভাৰনিরুত্তী’’তি জানাতি, ‘‘ফস্সা’’তি ৰা ‘‘ফস্স’’ন্তি ৰা ৰুত্তে পন ‘‘অযং ন সভাৰনিরুত্তী’’তি জানাতি। ৰেদনাদীসুপি এসেৰ নযো। অঞ্ঞং পনেস নামআখ্যাতউপসগ্গব্যঞ্জনসদ্দং জানাতি ন জানাতীতি? যদগ্গেন সদ্দং সুত্ৰা ‘‘অযং সভাৰনিরুত্তি, অযং ন সভাৰনিরুত্তী’’তি জানাতি, তদগ্গেন তম্পি জানিস্সতীতি। তং পন নযিদং পটিসম্ভিদাকিচ্চন্তি পটিক্খিপিত্ৰা ইদং ৰত্থু কথিতং –
Tatra dhammaniruttābhilāpe ñāṇanti tasmiṃ atthe ca dhamme ca yā sabhāvanirutti, tassā abhilāpe taṃ sabhāvaniruttiṃ saddaṃ ārammaṇaṃ katvā paccavekkhantassa tasmiṃ sabhāvaniruttābhilāpe pabhedagataṃ ñāṇaṃ niruttipaṭisambhidā. Evamayaṃ niruttipaṭisambhidā saddārammaṇā nāma jātā, na paññattiārammaṇā. Kasmā? Yasmā saddaṃ sutvā ‘‘ayaṃ sabhāvanirutti, ayaṃ na sabhāvaniruttī’’ti jānanti. Paṭisambhidāppatto hi ‘‘phasso’’ti vutte ‘‘ayaṃ sabhāvaniruttī’’ti jānāti, ‘‘phassā’’ti vā ‘‘phassa’’nti vā vutte pana ‘‘ayaṃ na sabhāvaniruttī’’ti jānāti. Vedanādīsupi eseva nayo. Aññaṃ panesa nāmaākhyātaupasaggabyañjanasaddaṃ jānāti na jānātīti? Yadaggena saddaṃ sutvā ‘‘ayaṃ sabhāvanirutti, ayaṃ na sabhāvaniruttī’’ti jānāti, tadaggena tampi jānissatīti. Taṃ pana nayidaṃ paṭisambhidākiccanti paṭikkhipitvā idaṃ vatthu kathitaṃ –
তিস্সদত্তত্থেরো কির বোধিমণ্ডে সুৰণ্ণসলাকং গহেত্ৰা অট্ঠারসসু ভাসাসু ‘কতরভাসায কথেমী’তি পৰারেসি। তং পন তেন অত্তনো উগ্গহে ঠত্ৰা পৰারিতং, ন পটিসম্ভিদায ঠিতেন। সো হি মহাপঞ্ঞতায তং তং ভাসং কথাপেত্ৰা কথাপেত্ৰা উগ্গণ্হি; ততো উগ্গহে ঠত্ৰা এৰং পৰারেসি।
Tissadattatthero kira bodhimaṇḍe suvaṇṇasalākaṃ gahetvā aṭṭhārasasu bhāsāsu ‘katarabhāsāya kathemī’ti pavāresi. Taṃ pana tena attano uggahe ṭhatvā pavāritaṃ, na paṭisambhidāya ṭhitena. So hi mahāpaññatāya taṃ taṃ bhāsaṃ kathāpetvā kathāpetvā uggaṇhi; tato uggahe ṭhatvā evaṃ pavāresi.
ভাসং নাম সত্তা উগ্গণ্হন্তীতি ৰত্ৰা চ পনেত্থ ইদং কথিতং। মাতাপিতরো হি দহরকালে কুমারকে মঞ্চে ৰা পীঠে ৰা নিপজ্জাপেত্ৰা তং তং কথযমানা তানি তানি কিচ্চানি করোন্তি। দারকা তেসং তং তং ভাসং ৰৰত্থাপেন্তি – ইমিনা ইদং ৰুত্তং, ইমিনা ইদং ৰুত্তন্তি। গচ্ছন্তে গচ্ছন্তে কালে সব্বম্পি ভাসং জানন্তি। মাতা দমিল়ী, পিতা অন্ধকো। তেসং জাতো দারকো সচে মাতুকথং পঠমং সুণাতি, দমিল়ভাসং ভাসিস্সতি; সচে পিতুকথং পঠমং সুণাতি, অন্ধকভাসং ভাসিস্সতি। উভিন্নম্পি পন কথং অস্সুণন্তো মাগধভাসং ভাসিস্সতি।
Bhāsaṃ nāma sattā uggaṇhantīti vatvā ca panettha idaṃ kathitaṃ. Mātāpitaro hi daharakāle kumārake mañce vā pīṭhe vā nipajjāpetvā taṃ taṃ kathayamānā tāni tāni kiccāni karonti. Dārakā tesaṃ taṃ taṃ bhāsaṃ vavatthāpenti – iminā idaṃ vuttaṃ, iminā idaṃ vuttanti. Gacchante gacchante kāle sabbampi bhāsaṃ jānanti. Mātā damiḷī, pitā andhako. Tesaṃ jāto dārako sace mātukathaṃ paṭhamaṃ suṇāti, damiḷabhāsaṃ bhāsissati; sace pitukathaṃ paṭhamaṃ suṇāti, andhakabhāsaṃ bhāsissati. Ubhinnampi pana kathaṃ assuṇanto māgadhabhāsaṃ bhāsissati.
যোপি অগামকে মহারঞ্ঞে নিব্বত্তো, তত্থ অঞ্ঞো কথেন্তো নাম নত্থি, সোপি অত্তনো ধম্মতায ৰচনং সমুট্ঠাপেন্তো মাগধভাসমেৰ ভাসিস্সতি। নিরযে, তিরচ্ছানযোনিযং, পেত্তিৰিসযে, মনুস্সলোকে, দেৰলোকেতি সব্বত্থ মাগধভাসাৰ উস্সন্না। তত্থ সেসা ওট্টকিরাতঅন্ধকযোনকদমিল়ভাসাদিকা অট্ঠারস ভাসা পরিৰত্তন্তি । অযমেৰেকা যথাভুচ্চব্রহ্মৰোহারঅরিযৰোহারসঙ্খাতা মাগধভাসা ন পরিৰত্ততি। সম্মাসবুদ্ধোপি তেপিটকং বুদ্ধৰচনং তন্তিং আরোপেন্তো মাগধভাসায এৰ আরোপেসি। কস্মা? এৰঞ্হি অত্থং আহরিতুং সুখং হোতি। মাগধভাসায হি তন্তিং আরুল়্হস্স বুদ্ধৰচনস্স পটিসম্ভিদাপ্পত্তানং সোতপথাগমনমেৰ পপঞ্চো; সোতে পন সঙ্ঘট্টিতমত্তেযেৰ নযসতেন নযসহস্সেন অত্থো উপট্ঠাতি। অঞ্ঞায পন ভাসায তন্তিং আরুল়্হং পোথেত্ৰা পোথেত্ৰা উগ্গহেতব্বং হোতি। বহুম্পি উগ্গহেত্ৰা পন পুথুজ্জনস্স পটিসম্ভিদাপ্পত্তি নাম নত্থি। অরিযসাৰকো নো পটিসম্ভিদাপ্পতো নাম নত্থি।
Yopi agāmake mahāraññe nibbatto, tattha añño kathento nāma natthi, sopi attano dhammatāya vacanaṃ samuṭṭhāpento māgadhabhāsameva bhāsissati. Niraye, tiracchānayoniyaṃ, pettivisaye, manussaloke, devaloketi sabbattha māgadhabhāsāva ussannā. Tattha sesā oṭṭakirātaandhakayonakadamiḷabhāsādikā aṭṭhārasa bhāsā parivattanti . Ayamevekā yathābhuccabrahmavohāraariyavohārasaṅkhātā māgadhabhāsā na parivattati. Sammāsabuddhopi tepiṭakaṃ buddhavacanaṃ tantiṃ āropento māgadhabhāsāya eva āropesi. Kasmā? Evañhi atthaṃ āharituṃ sukhaṃ hoti. Māgadhabhāsāya hi tantiṃ āruḷhassa buddhavacanassa paṭisambhidāppattānaṃ sotapathāgamanameva papañco; sote pana saṅghaṭṭitamatteyeva nayasatena nayasahassena attho upaṭṭhāti. Aññāya pana bhāsāya tantiṃ āruḷhaṃ pothetvā pothetvā uggahetabbaṃ hoti. Bahumpi uggahetvā pana puthujjanassa paṭisambhidāppatti nāma natthi. Ariyasāvako no paṭisambhidāppato nāma natthi.
ঞাণেসু ঞাণন্তি সব্বত্থকঞাণং আরম্মণং কত্ৰা ঞাণং পচ্চৰেক্খন্তস্স পভেদগতং ঞাণং পটিভানপটিসম্ভিদাতি। ইমা পন চতস্সোপি পটিসম্ভিদা দ্ৰীসু ঠানেসু পভেদং গচ্ছন্তি, পঞ্চহি কারণেহি ৰিসদা হোন্তীতি ৰেদিতব্বা। কতমেসু দ্ৰীসু? সেক্খভূমিযঞ্চ অসেক্খভূমিযঞ্চ। তত্থ সারিপুত্তত্থেরস্স মহামোগ্গল্লানত্থেরস্স মহাকস্সপত্থেরস্স মহাকচ্চাযনত্থেরস্স মহাকোট্ঠিতত্থেরস্সাতি অসীতিযাপি মহাথেরানং পটিসম্ভিদা অসেক্খভূমিযং পভেদং গতা। আনন্দত্থেরস্স চিত্তস্স গহপতিনো ধম্মিকস্স উপাসকস্স উপালিস্স গহপতিনো খুজ্জুত্তরায উপাসিকাযাতি এৰমাদীনং পটিসম্ভিদা সেক্খভূমিযং পভেদং গতাতি ইমাসু দ্ৰীসু ভূমীসু পভেদং গচ্ছন্তি।
Ñāṇesu ñāṇanti sabbatthakañāṇaṃ ārammaṇaṃ katvā ñāṇaṃ paccavekkhantassa pabhedagataṃ ñāṇaṃ paṭibhānapaṭisambhidāti. Imā pana catassopi paṭisambhidā dvīsu ṭhānesu pabhedaṃ gacchanti, pañcahi kāraṇehi visadā hontīti veditabbā. Katamesu dvīsu? Sekkhabhūmiyañca asekkhabhūmiyañca. Tattha sāriputtattherassa mahāmoggallānattherassa mahākassapattherassa mahākaccāyanattherassa mahākoṭṭhitattherassāti asītiyāpi mahātherānaṃ paṭisambhidā asekkhabhūmiyaṃ pabhedaṃ gatā. Ānandattherassa cittassa gahapatino dhammikassa upāsakassa upālissa gahapatino khujjuttarāya upāsikāyāti evamādīnaṃ paṭisambhidā sekkhabhūmiyaṃ pabhedaṃ gatāti imāsu dvīsu bhūmīsu pabhedaṃ gacchanti.
কতমেহি পঞ্চহি কারণেহি পটিসম্ভিদা ৰিসদা হোন্তীতি? অধিগমেন, পরিযত্তিযা, সৰনেন, পরিপুচ্ছায, পুব্বযোগেনাতি। তত্থ ‘অধিগমো’ নাম অরহত্তং। তঞ্হি পত্তস্স পটিসম্ভিদা ৰিসদা হোন্তি। ‘পরিযত্তি’ নাম বুদ্ধৰচনং। তঞ্হি উগ্গণ্হন্তস্স পটিসম্ভিদা ৰিসদা হোন্তি। ‘সৰনং’ নাম ধম্মস্সৰনং। সক্কচ্চঞ্হি ধম্মং সুণন্তস্স পটিসম্ভিদা ৰিসদা হোন্তি। ‘পরিপুচ্ছা’ নাম অট্ঠকথা। উগ্গহিতপাল়িযা অত্থং কথেন্তস্স হি পটিসম্ভিদা ৰিসদা হোন্তি। ‘পুব্বযোগো’ নাম পুব্বযোগাৰচরতা, অতীতভৰে হরণপচ্চাহরণনযেন পরিগ্গহিতকম্মট্ঠানতা; পুব্বযোগাৰচরস্স হি পটিসম্ভিদা ৰিসদা হোন্তি । তত্থ অরহত্তপ্পত্তিযা পুনব্বসুকুটুম্বিকপুত্তস্স তিস্সত্থেরস্স পটিসম্ভিদা ৰিসদা অহেসুং। সো কির তম্বপণ্ণিদীপে বুদ্ধৰচনং উগ্গণ্হিত্ৰা পরতীরং গন্ত্ৰা যোনকধম্মরক্খিতত্থেরস্স সন্তিকে বুদ্ধৰচনং উগ্গণ্হিত্ৰা আগচ্ছন্তো নাৰং অভিরুহনতিত্থে একস্মিং পদে উপ্পন্নকঙ্খো যোজনসতমগ্গং নিৰত্তিত্ৰা আচরিযস্স সন্তিকং গচ্ছন্তো অন্তরামগ্গে একস্স কুটুম্বিকস্স পঞ্হং কথেসি। সো পসীদিত্ৰা সতসহস্সগ্ঘনিকং কম্বলং অদাসি। সোপি তং আহরিত্ৰা আচরিযস্স অদাসি। থেরো ৰাসিযা কোট্টেত্ৰা নিসীদনট্ঠানে পরিভণ্ডং কারেসি। কিমত্থাযাতি? পচ্ছিমায জনতায অনুগ্গহত্থাযাতি। এৰং কিরস্স অহোসি – ‘‘অম্হাকং গতমগ্গং আৰজ্জেত্ৰা অনাগতে সব্রহ্মচারিনো পটিপত্তিং পূরেতব্বং মঞ্ঞিস্সন্তী’’তি। তিস্সত্থেরোপি আচরিযস্স সন্তিকে কঙ্খং ছিন্দিত্ৰা জম্বুকোলপট্টনে ওরুয্হ চেতিযঙ্গণং সম্মজ্জনৰেলায ৰালিকৰিহারং পত্ৰা সম্মজ্জি। তস্স সম্মজ্জিতট্ঠানং দিস্ৰা ‘ইদং ৰীতরাগস্স ভিক্খুনো সম্মট্ঠট্ঠান’ন্তি থেরস্স ৰীমংসনত্থায পঞ্হং পুচ্ছিংসু। থেরো পটিসম্ভিদাপ্পত্ততায পুচ্ছিতপুচ্ছিতে পঞ্হে কথেসীতি।
Katamehi pañcahi kāraṇehi paṭisambhidā visadā hontīti? Adhigamena, pariyattiyā, savanena, paripucchāya, pubbayogenāti. Tattha ‘adhigamo’ nāma arahattaṃ. Tañhi pattassa paṭisambhidā visadā honti. ‘Pariyatti’ nāma buddhavacanaṃ. Tañhi uggaṇhantassa paṭisambhidā visadā honti. ‘Savanaṃ’ nāma dhammassavanaṃ. Sakkaccañhi dhammaṃ suṇantassa paṭisambhidā visadā honti. ‘Paripucchā’ nāma aṭṭhakathā. Uggahitapāḷiyā atthaṃ kathentassa hi paṭisambhidā visadā honti. ‘Pubbayogo’ nāma pubbayogāvacaratā, atītabhave haraṇapaccāharaṇanayena pariggahitakammaṭṭhānatā; pubbayogāvacarassa hi paṭisambhidā visadā honti . Tattha arahattappattiyā punabbasukuṭumbikaputtassa tissattherassa paṭisambhidā visadā ahesuṃ. So kira tambapaṇṇidīpe buddhavacanaṃ uggaṇhitvā paratīraṃ gantvā yonakadhammarakkhitattherassa santike buddhavacanaṃ uggaṇhitvā āgacchanto nāvaṃ abhiruhanatitthe ekasmiṃ pade uppannakaṅkho yojanasatamaggaṃ nivattitvā ācariyassa santikaṃ gacchanto antarāmagge ekassa kuṭumbikassa pañhaṃ kathesi. So pasīditvā satasahassagghanikaṃ kambalaṃ adāsi. Sopi taṃ āharitvā ācariyassa adāsi. Thero vāsiyā koṭṭetvā nisīdanaṭṭhāne paribhaṇḍaṃ kāresi. Kimatthāyāti? Pacchimāya janatāya anuggahatthāyāti. Evaṃ kirassa ahosi – ‘‘amhākaṃ gatamaggaṃ āvajjetvā anāgate sabrahmacārino paṭipattiṃ pūretabbaṃ maññissantī’’ti. Tissattheropi ācariyassa santike kaṅkhaṃ chinditvā jambukolapaṭṭane oruyha cetiyaṅgaṇaṃ sammajjanavelāya vālikavihāraṃ patvā sammajji. Tassa sammajjitaṭṭhānaṃ disvā ‘idaṃ vītarāgassa bhikkhuno sammaṭṭhaṭṭhāna’nti therassa vīmaṃsanatthāya pañhaṃ pucchiṃsu. Thero paṭisambhidāppattatāya pucchitapucchite pañhe kathesīti.
পরিযত্তিযা পন তিস্সদত্তত্থেরস্স চেৰ নাগসেনত্থেরস্স চ পটিসম্ভিদা ৰিসদা অহেসুং। সক্কচ্চধম্মসৰনেন সুধম্মসামণেরস্স পটিসম্ভিদা ৰিসদা অহেসুং। সো কির তলঙ্গরৰাসী ধম্মদিন্নত্থেরস্স ভাগিনেয্যো খুরগ্গেযেৰ অরহত্তং পত্তো মাতুলত্থেরস্স ধম্মৰিনিচ্ছযট্ঠানে নিসীদিত্ৰা সুণন্তোযেৰ তীণি পিটকানি পগুণানি অকাসি। উগ্গহিতপাল়িযা অত্থং কথেন্তস্স পন তিস্সদত্তত্থেরস্স এৰ পটিসম্ভিদা ৰিসদা অহেসুং। গতপচ্চাগতৰত্তং পন পূরেত্ৰা যাৰ অনুলোমং কম্মট্ঠানং উস্সুক্কাপেত্ৰা আগতানং ৰিসদভাৰপ্পত্তপটিসম্ভিদানং পুব্বযোগাৰচরানং অন্তো নত্থি।
Pariyattiyā pana tissadattattherassa ceva nāgasenattherassa ca paṭisambhidā visadā ahesuṃ. Sakkaccadhammasavanena sudhammasāmaṇerassa paṭisambhidā visadā ahesuṃ. So kira talaṅgaravāsī dhammadinnattherassa bhāgineyyo khuraggeyeva arahattaṃ patto mātulattherassa dhammavinicchayaṭṭhāne nisīditvā suṇantoyeva tīṇi piṭakāni paguṇāni akāsi. Uggahitapāḷiyā atthaṃ kathentassa pana tissadattattherassa eva paṭisambhidā visadā ahesuṃ. Gatapaccāgatavattaṃ pana pūretvā yāva anulomaṃ kammaṭṭhānaṃ ussukkāpetvā āgatānaṃ visadabhāvappattapaṭisambhidānaṃ pubbayogāvacarānaṃ anto natthi.
এতেসু পন কারণেসু পরিযত্তি, সৰনং, পরিপুচ্ছাতি ইমানি তীণি পভেদস্সেৰ বলৰকারণানি। পুব্বযোগো অধিগমস্স বলৰপচ্চযো, পভেদস্স হোতি ন হোতীতি? হোতি, ন পন তথা। পরিযত্তিসৰনপরিপুচ্ছা হি পুব্বে হোন্তু ৰা মা ৰা, পুব্বযোগেন পুব্বে চেৰ এতরহি চ সঙ্খারসম্মসনং ৰিনা পটিসম্ভিদা নাম নত্থি। ইমে পন দ্ৰেপি একতো হুত্ৰা পটিসম্ভিদা উপত্থম্ভেত্ৰা ৰিসদা করোন্তীতি।
Etesu pana kāraṇesu pariyatti, savanaṃ, paripucchāti imāni tīṇi pabhedasseva balavakāraṇāni. Pubbayogo adhigamassa balavapaccayo, pabhedassa hoti na hotīti? Hoti, na pana tathā. Pariyattisavanaparipucchā hi pubbe hontu vā mā vā, pubbayogena pubbe ceva etarahi ca saṅkhārasammasanaṃ vinā paṭisambhidā nāma natthi. Ime pana dvepi ekato hutvā paṭisambhidā upatthambhetvā visadā karontīti.
সঙ্গহৰারৰণ্ণনা।
Saṅgahavāravaṇṇanā.
২. সচ্চৰারাদিৰণ্ণনা
2. Saccavārādivaṇṇanā
৭১৯. ইদানি যে সঙ্গহৰারে পঞ্চ অত্থা চ ধম্মা চ সঙ্গহিতা, তেসং পভেদদস্সননযেন পটিসম্ভিদা ৰিভজিতুং পুন চতস্সোতিআদিনা নযেন পভেদৰারো আরদ্ধো। সো সচ্চৰারহেতুৰারধম্মৰারপচ্চযাকারৰারপরিযত্তিৰারৰসেন পঞ্চৰিধো। তত্থ পচ্চযসমুপ্পন্নস্স দুক্খসচ্চস্স পচ্চযেন পত্তব্বস্স নিব্বানস্স চ অত্থভাৰং, ফলনিব্বত্তকস্স সমুদযস্স নিব্বানসম্পাপকস্স অরিযমগ্গস্স চ ধম্মভাৰঞ্চ দস্সেতুং ‘সচ্চৰারো’ ৰুত্তো। যস্স কস্সচি পন হেতুফলনিব্বত্তকস্স হেতুনো ধম্মভাৰং, হেতুফলস্স চ অত্থভাৰং দস্সেতুং ‘হেতুৰারো’ ৰুত্তো। তত্থ চ হেতুফলক্কমৰসেন উপ্পটিপাটিযা পঠমং ধম্মপটিসম্ভিদা নিদ্দিট্ঠা। যে পন ধম্মা তম্হা তম্হা রূপারূপপ্পভেদা হেতুতো জাতা, তেসং অত্থভাৰং, তস্স তস্স চ রূপারূপধম্মপ্পভেদস্স হেতুনো ধম্মভাৰং দস্সেতুং ‘ধম্মৰারো’ ৰুত্তো। জরামরণাদীনং পন অত্থভাৰং, জরামরণাদিসমুদযসঙ্খাতানং জাতিআদীনঞ্চ ধম্মভাৰং দস্সেতুং ‘পচ্চযাকারৰারো’ ৰুত্তো। ততো পরিযত্তিসঙ্খাতস্স তস্স তস্স ভাসিতস্স ধম্মভাৰং, ভাসিতসঙ্খাতেন পচ্চযেন পত্তব্বস্স ভাসিতত্থস্স চ অত্থভাৰং দস্সেতুং ‘পরিযত্তিৰারো’ ৰুত্তো।
719. Idāni ye saṅgahavāre pañca atthā ca dhammā ca saṅgahitā, tesaṃ pabhedadassananayena paṭisambhidā vibhajituṃ puna catassotiādinā nayena pabhedavāro āraddho. So saccavārahetuvāradhammavārapaccayākāravārapariyattivāravasena pañcavidho. Tattha paccayasamuppannassa dukkhasaccassa paccayena pattabbassa nibbānassa ca atthabhāvaṃ, phalanibbattakassa samudayassa nibbānasampāpakassa ariyamaggassa ca dhammabhāvañca dassetuṃ ‘saccavāro’ vutto. Yassa kassaci pana hetuphalanibbattakassa hetuno dhammabhāvaṃ, hetuphalassa ca atthabhāvaṃ dassetuṃ ‘hetuvāro’ vutto. Tattha ca hetuphalakkamavasena uppaṭipāṭiyā paṭhamaṃ dhammapaṭisambhidā niddiṭṭhā. Ye pana dhammā tamhā tamhā rūpārūpappabhedā hetuto jātā, tesaṃ atthabhāvaṃ, tassa tassa ca rūpārūpadhammappabhedassa hetuno dhammabhāvaṃ dassetuṃ ‘dhammavāro’ vutto. Jarāmaraṇādīnaṃ pana atthabhāvaṃ, jarāmaraṇādisamudayasaṅkhātānaṃ jātiādīnañca dhammabhāvaṃ dassetuṃ ‘paccayākāravāro’ vutto. Tato pariyattisaṅkhātassa tassa tassa bhāsitassa dhammabhāvaṃ, bhāsitasaṅkhātena paccayena pattabbassa bhāsitatthassa ca atthabhāvaṃ dassetuṃ ‘pariyattivāro’ vutto.
তত্থ চ যস্মা ভাসিতং ঞত্ৰা তস্সত্থো ঞাযতি, তস্মা ভাসিতভাসিতত্থক্কমেন উপ্পটিপাটিযা পঠমং ধম্মপটিসম্ভিদা নিদ্দিট্ঠা। পরিযত্তিধম্মস্স চ পভেদদস্সনত্থং ‘‘তত্থ কতমা ধম্মপটিসম্ভিদা’’তি পুচ্ছাপুব্বঙ্গমো পটিনিদ্দেসৰারো ৰুত্তো। তত্থ সুত্তন্তিআদীহি নৰহি অঙ্গেহি নিপ্পদেসতো তন্তি গহিতা। অযং ইমস্স ভাসিতস্স অত্থো, অযং ইমস্স ভাসিতস্স অত্থোতি ইমস্মিম্পি ঠানে ভাসিতৰসেন নিপ্পদেসতো তন্তি এৰ গহিতাতি।
Tattha ca yasmā bhāsitaṃ ñatvā tassattho ñāyati, tasmā bhāsitabhāsitatthakkamena uppaṭipāṭiyā paṭhamaṃ dhammapaṭisambhidā niddiṭṭhā. Pariyattidhammassa ca pabhedadassanatthaṃ ‘‘tattha katamā dhammapaṭisambhidā’’ti pucchāpubbaṅgamo paṭiniddesavāro vutto. Tattha suttantiādīhi navahi aṅgehi nippadesato tanti gahitā. Ayaṃ imassa bhāsitassa attho, ayaṃ imassa bhāsitassa atthoti imasmimpi ṭhāne bhāsitavasena nippadesato tanti eva gahitāti.
সুত্তন্তভাজনীযৰণ্ণনা।
Suttantabhājanīyavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৫. পটিসম্ভিদাৰিভঙ্গো • 15. Paṭisambhidāvibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৫. পটিসম্ভিদাৰিভঙ্গো • 15. Paṭisambhidāvibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৫. পটিসম্ভিদাৰিভঙ্গো • 15. Paṭisambhidāvibhaṅgo
