| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
3. தா⁴துவிப⁴ங்கோ³
3. Dhātuvibhaṅgo
1. ஸுத்தந்தபா⁴ஜனீயவண்ணனா
1. Suttantabhājanīyavaṇṇanā
172. இதா³னி தத³னந்தரே தா⁴துவிப⁴ங்கே³ ஸப்³பா³ தா⁴துயோ ச²ஹி ச²ஹி தா⁴தூஹி ஸங்கி²பித்வா தீஹி ச²க்கேஹி ஸுத்தந்தபா⁴ஜனீயங் த³ஸ்ஸெந்தோ ச² தா⁴துயோதிஆதி³மாஹ. தத்த² சா²தி க³ணனபரிச்சே²தோ³. தா⁴துயோதி பரிச்சி²ன்னத⁴ம்மனித³ஸ்ஸனங். பத²வீதா⁴தூதிஆதீ³ஸு தா⁴த்வட்டோ² நாம ஸபா⁴வட்டோ², ஸபா⁴வட்டோ² நாம ஸுஞ்ஞதட்டோ², ஸுஞ்ஞதட்டோ² நாம நிஸ்ஸத்தட்டோ²தி ஏவங் ஸபா⁴வஸுஞ்ஞதனிஸ்ஸத்தட்டே²ன பத²வீயேவ தா⁴து பத²வீதா⁴து. ஆபோதா⁴துஆதீ³ஸுபி ஏஸேவ நயோ. ஏவமெத்த² பத³ஸமாஸங் விதி³த்வா ஏவமத்தோ² வேதி³தப்³போ³ – பத²வீதா⁴தூதி பதிட்டா²னதா⁴து. ஆபோதா⁴தூதி ஆப³ந்த⁴னதா⁴து. தேஜோதா⁴தூதி பரிபாசனதா⁴து. வாயோதா⁴தூதி வித்த²ம்ப⁴னதா⁴து. ஆகாஸதா⁴தூதி அஸம்பு²ட்ட²தா⁴து. விஞ்ஞாணதா⁴தூதி விஜானநதா⁴து.
172. Idāni tadanantare dhātuvibhaṅge sabbā dhātuyo chahi chahi dhātūhi saṅkhipitvā tīhi chakkehi suttantabhājanīyaṃ dassento cha dhātuyotiādimāha. Tattha chāti gaṇanaparicchedo. Dhātuyoti paricchinnadhammanidassanaṃ. Pathavīdhātūtiādīsu dhātvaṭṭho nāma sabhāvaṭṭho, sabhāvaṭṭho nāma suññataṭṭho, suññataṭṭho nāma nissattaṭṭhoti evaṃ sabhāvasuññatanissattaṭṭhena pathavīyeva dhātu pathavīdhātu. Āpodhātuādīsupi eseva nayo. Evamettha padasamāsaṃ viditvā evamattho veditabbo – pathavīdhātūti patiṭṭhānadhātu. Āpodhātūti ābandhanadhātu. Tejodhātūti paripācanadhātu. Vāyodhātūti vitthambhanadhātu. Ākāsadhātūti asamphuṭṭhadhātu. Viññāṇadhātūti vijānanadhātu.
173. பத²வீதா⁴துத்³வயந்தி பத²வீதா⁴து த்³வே அயங். அயங் பத²வீதா⁴து நாம ந ஏகா ஏவ அஜ்ஜ²த்திகபா³ஹிரபே⁴தே³ன பன த்³வே தா⁴துயோ ஏவாதி அத்தோ². தேனேவாஹ – ‘‘அத்தி² அஜ்ஜ²த்திகா அத்தி² பா³ஹிரா’’தி. தத்த² அஜ்ஜ²த்திகாதி ஸத்தஸந்தானபரியாபன்னா நியகஜ்ஜ²த்தா. பா³ஹிராதி ஸங்கா²ரஸந்தானபரியாபன்னா அனிந்த்³ரியப³த்³தா⁴. அஜ்ஜ²த்தங் பச்சத்தந்தி உப⁴யம்பேதங் நியகஜ்ஜ²த்தாதி⁴வசனமேவ. இதா³னி தங் ஸபா⁴வாகாரதோ த³ஸ்ஸேதுங் கக்க²ளந்திஆதி³ வுத்தங். தத்த² கக்க²ளந்தி த²த்³த⁴ங். க²ரிக³தந்தி ப²ருஸங். கக்க²ளத்தந்தி கக்க²ளபா⁴வோ. கக்க²ளபா⁴வோதி கக்க²ளஸபா⁴வோ. அஜ்ஜ²த்தங் உபாதி³ன்னந்தி நியகஜ்ஜ²த்தஸங்கா²தங் உபாதி³ன்னங். உபாதி³ன்னங் நாம ஸரீரட்ட²கங். ஸரீரட்ட²கஞ்ஹி கம்மஸமுட்டா²னங் வா ஹோது மா வா, தங் ஸந்தா⁴ய உபாதி³ன்னம்பி அத்தி² அனுபாதி³ன்னம்பி; ஆதி³ன்னக்³க³ஹிதபராமட்ட²வஸேன பன ஸப்³ப³ம்பேதங் உபாதி³ன்னமேவாதி த³ஸ்ஸேதுங் ‘‘அஜ்ஜ²த்தங் உபாதி³ன்ன’’ந்தி ஆஹ.
173. Pathavīdhātudvayanti pathavīdhātu dve ayaṃ. Ayaṃ pathavīdhātu nāma na ekā eva ajjhattikabāhirabhedena pana dve dhātuyo evāti attho. Tenevāha – ‘‘atthi ajjhattikā atthi bāhirā’’ti. Tattha ajjhattikāti sattasantānapariyāpannā niyakajjhattā. Bāhirāti saṅkhārasantānapariyāpannā anindriyabaddhā. Ajjhattaṃ paccattanti ubhayampetaṃ niyakajjhattādhivacanameva. Idāni taṃ sabhāvākārato dassetuṃ kakkhaḷantiādi vuttaṃ. Tattha kakkhaḷanti thaddhaṃ. Kharigatanti pharusaṃ. Kakkhaḷattanti kakkhaḷabhāvo. Kakkhaḷabhāvoti kakkhaḷasabhāvo. Ajjhattaṃ upādinnanti niyakajjhattasaṅkhātaṃ upādinnaṃ. Upādinnaṃ nāma sarīraṭṭhakaṃ. Sarīraṭṭhakañhi kammasamuṭṭhānaṃ vā hotu mā vā, taṃ sandhāya upādinnampi atthi anupādinnampi; ādinnaggahitaparāmaṭṭhavasena pana sabbampetaṃ upādinnamevāti dassetuṃ ‘‘ajjhattaṃ upādinna’’nti āha.
இதா³னி தமேவ பத²வீதா⁴துங் வத்து²வஸேன த³ஸ்ஸேதுங் ஸெய்யதி²த³ங் கேஸா லோமாதிஆதி³ வுத்தங். தத்த² ஸெய்யதி²த³ந்தி நிபாதோ. தஸ்ஸத்தோ² – யா ஸா அஜ்ஜ²த்திகா பத²வீதா⁴து ஸா கதமா? யங் வா அஜ்ஜ²த்தங் பச்சத்தங் கக்க²ளங் நாம தங் கதமந்தி? கேஸா லோமாதிஆதி³ தஸ்ஸா அஜ்ஜ²த்திகாய பத²வீதா⁴துயா வத்து²வஸேன பபே⁴த³த³ஸ்ஸனங். இத³ங் வுத்தங் ஹோதி – கேஸா நாம அஜ்ஜ²த்தா உபாதி³ன்னா ஸரீரட்ட²கா கக்க²ளத்தலக்க²ணா இமஸ்மிங் ஸரீரே பாடியேக்கோ கொட்டா²ஸோ. லோமா நாம…பே॰… கரீஸங் நாம. இத⁴ பன அவுத்தம்பி படிஸம்பி⁴தா³மக்³கே³ (படி॰ ம॰ 1.4) பாளிஆருள்ஹங் மத்த²லுங்க³ங் ஆஹரித்வா மத்த²லுங்க³ங் நாம அஜ்ஜ²த்தங் உபாதி³ன்னங் ஸரீரட்ட²கங் கக்க²ளத்தலக்க²ணங் இமஸ்மிங் ஸரீரே பாடியேக்கோ கொட்டா²ஸோ. பரதோ ஆபோதா⁴துஆதீ³னங் நித்³தே³ஸே பித்தாதீ³ஸுபி ஏஸேவ நயோ.
Idāni tameva pathavīdhātuṃ vatthuvasena dassetuṃ seyyathidaṃ kesā lomātiādi vuttaṃ. Tattha seyyathidanti nipāto. Tassattho – yā sā ajjhattikā pathavīdhātu sā katamā? Yaṃ vā ajjhattaṃ paccattaṃ kakkhaḷaṃ nāma taṃ katamanti? Kesā lomātiādi tassā ajjhattikāya pathavīdhātuyā vatthuvasena pabhedadassanaṃ. Idaṃ vuttaṃ hoti – kesā nāma ajjhattā upādinnā sarīraṭṭhakā kakkhaḷattalakkhaṇā imasmiṃ sarīre pāṭiyekko koṭṭhāso. Lomā nāma…pe… karīsaṃ nāma. Idha pana avuttampi paṭisambhidāmagge (paṭi. ma. 1.4) pāḷiāruḷhaṃ matthaluṅgaṃ āharitvā matthaluṅgaṃ nāma ajjhattaṃ upādinnaṃ sarīraṭṭhakaṃ kakkhaḷattalakkhaṇaṃ imasmiṃ sarīre pāṭiyekko koṭṭhāso. Parato āpodhātuādīnaṃ niddese pittādīsupi eseva nayo.
இமினா கிங் த³ஸ்ஸிதங் ஹோதி? தா⁴துமனஸிகாரோ. இமஸ்மிங் பன தா⁴துமனஸிகாரே கம்மங் கத்வா விபஸ்ஸனங் பட்ட²பெத்வா உத்தமத்த²ங் அரஹத்தங் பாபுணிதுகாமேன கிங் கத்தப்³ப³ங்? சதுபாரிஸுத்³தி⁴ஸீலங் ஸோதே⁴தப்³ப³ங். ஸீலவதோ ஹி கம்மட்டா²னபா⁴வனா இஜ்ஜ²தி. தஸ்ஸ ஸோத⁴னவிதா⁴னங் விஸுத்³தி⁴மக்³கே³ வுத்தனயேனேவ வேதி³தப்³ப³ங். விஸுத்³த⁴ஸீலேன பன ஸீலே பதிட்டா²ய த³ஸ புப்³ப³பலிபோ³தா⁴ சி²ந்தி³தப்³பா³. தேஸம்பி சி²ந்த³னவிதா⁴னங் விஸுத்³தி⁴மக்³கே³ வுத்தனயேனேவ வேதி³தப்³ப³ங். சி²ன்னபலிபோ³தே⁴ன தா⁴துமனஸிகாரகம்மட்டா²னங் உக்³க³ண்ஹிதப்³ப³ங். ஆசரியேனாபி தா⁴துமனஸிகாரகம்மட்டா²னங் உக்³க³ண்ஹாபெந்தேன ஸத்தவித⁴ங் உக்³க³ஹகோஸல்லங் த³ஸவித⁴ஞ்ச மனஸிகாரகோஸல்லங் ஆசிக்கி²தப்³ப³ங். அந்தேவாஸிகேனாபி ஆசரியஸ்ஸ ஸந்திகே ப³ஹுவாரே ஸஜ்ஜா²யங் கத்வா நிஜ்ஜடங் பகு³ணங் கம்மட்டா²னங் காதப்³ப³ங். வுத்தஞ்ஹேதங் அட்ட²கதா²யங் – ‘‘ஆதி³கம்மிகேன பி⁴க்கு²னா ஜராமரணா முச்சிதுகாமேன ஸத்தஹாகாரேஹி உக்³க³ஹகோஸல்லங் இச்சி²தப்³ப³ங், த³ஸஹாகாரேஹி மனஸிகாரகோஸல்லங் இச்சி²தப்³ப³’’ந்தி.
Iminā kiṃ dassitaṃ hoti? Dhātumanasikāro. Imasmiṃ pana dhātumanasikāre kammaṃ katvā vipassanaṃ paṭṭhapetvā uttamatthaṃ arahattaṃ pāpuṇitukāmena kiṃ kattabbaṃ? Catupārisuddhisīlaṃ sodhetabbaṃ. Sīlavato hi kammaṭṭhānabhāvanā ijjhati. Tassa sodhanavidhānaṃ visuddhimagge vuttanayeneva veditabbaṃ. Visuddhasīlena pana sīle patiṭṭhāya dasa pubbapalibodhā chinditabbā. Tesampi chindanavidhānaṃ visuddhimagge vuttanayeneva veditabbaṃ. Chinnapalibodhena dhātumanasikārakammaṭṭhānaṃ uggaṇhitabbaṃ. Ācariyenāpi dhātumanasikārakammaṭṭhānaṃ uggaṇhāpentena sattavidhaṃ uggahakosallaṃ dasavidhañca manasikārakosallaṃ ācikkhitabbaṃ. Antevāsikenāpi ācariyassa santike bahuvāre sajjhāyaṃ katvā nijjaṭaṃ paguṇaṃ kammaṭṭhānaṃ kātabbaṃ. Vuttañhetaṃ aṭṭhakathāyaṃ – ‘‘ādikammikena bhikkhunā jarāmaraṇā muccitukāmena sattahākārehi uggahakosallaṃ icchitabbaṃ, dasahākārehi manasikārakosallaṃ icchitabba’’nti.
தத்த² வசஸா, மனஸா, வண்ணதோ, ஸண்டா²னதோ, தி³ஸதோ, ஓகாஸதோ, பரிச்சே²த³தோதி இமேஹி ஸத்தஹாகாரேஹி இமஸ்மிங் தா⁴துமனஸிகாரகம்மட்டா²னே ‘உக்³க³ஹகோஸல்லங்’ இச்சி²தப்³ப³ங். அனுபுப்³ப³தோ, நாதிஸீக⁴தோ, நாதிஸணிகதோ, விக்கே²பபடிபா³ஹனதோ , பண்ணத்திஸமதிக்கமதோ, அனுபுப்³ப³முஞ்சனதோ, லக்க²ணதோ, தயோ ச ஸுத்தந்தாதி இமேஹி த³ஸஹாகாரேஹி ‘மனஸிகாரகோஸல்லங்’ இச்சி²தப்³ப³ங். தது³ப⁴யம்பி பரதோ ஸதிபட்டா²னவிப⁴ங்கே³ ஆவி ப⁴விஸ்ஸதி.
Tattha vacasā, manasā, vaṇṇato, saṇṭhānato, disato, okāsato, paricchedatoti imehi sattahākārehi imasmiṃ dhātumanasikārakammaṭṭhāne ‘uggahakosallaṃ’ icchitabbaṃ. Anupubbato, nātisīghato, nātisaṇikato, vikkhepapaṭibāhanato , paṇṇattisamatikkamato, anupubbamuñcanato, lakkhaṇato, tayo ca suttantāti imehi dasahākārehi ‘manasikārakosallaṃ’ icchitabbaṃ. Tadubhayampi parato satipaṭṭhānavibhaṅge āvi bhavissati.
ஏவங் உக்³க³ஹிதகம்மட்டா²னேன பன விஸுத்³தி⁴மக்³கே³ வுத்தே அட்டா²ரஸ ஸேனாஸனதோ³ஸே வஜ்ஜெத்வா பஞ்சங்க³ஸமன்னாக³தே ஸேனாஸனே வஸந்தேன அத்தனாபி பஞ்சஹி பதா⁴னியங்கே³ஹி ஸமன்னாக³தேன பச்சா²ப⁴த்தங் பிண்ட³பாதபடிக்கந்தேன விவித்தோகாஸக³தேன கம்மட்டா²னங் மனஸிகாதப்³ப³ங். மனஸிகரொந்தேன ச வண்ணஸண்டா²னதி³ஸோகாஸபரிச்சே²த³வஸேன கேஸாதீ³ஸு ஏகேககொட்டா²ஸங் மனஸிகரித்வா அவஸானே ஏவங் மனஸிகாரோ பவத்தேதப்³போ³ – இமே கேஸா நாம ஸீஸகடாஹபலிவேட²னசம்மே ஜாதா. தத்த² யதா² வம்மிகமத்த²கே ஜாதேஸு குண்ட²திணேஸு ந வம்மிகமத்த²கோ ஜானாதி ‘மயி குண்ட²திணானி ஜாதானீ’தி, நாபி குண்ட²திணானி ஜானந்தி ‘மயங் வம்மிகமத்த²கே ஜாதானீ’தி, ஏவமேவ ந ஸீஸகடாஹபலிவேட²னசம்மங் ஜானாதி ‘மயி கேஸா ஜாதா’தி, நாபி கேஸா ஜானந்தி ‘மயங் ஸீஸகடாஹபலிவேட²னசம்மே ஜாதா’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி கேஸா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Evaṃ uggahitakammaṭṭhānena pana visuddhimagge vutte aṭṭhārasa senāsanadose vajjetvā pañcaṅgasamannāgate senāsane vasantena attanāpi pañcahi padhāniyaṅgehi samannāgatena pacchābhattaṃ piṇḍapātapaṭikkantena vivittokāsagatena kammaṭṭhānaṃ manasikātabbaṃ. Manasikarontena ca vaṇṇasaṇṭhānadisokāsaparicchedavasena kesādīsu ekekakoṭṭhāsaṃ manasikaritvā avasāne evaṃ manasikāro pavattetabbo – ime kesā nāma sīsakaṭāhapaliveṭhanacamme jātā. Tattha yathā vammikamatthake jātesu kuṇṭhatiṇesu na vammikamatthako jānāti ‘mayi kuṇṭhatiṇāni jātānī’ti, nāpi kuṇṭhatiṇāni jānanti ‘mayaṃ vammikamatthake jātānī’ti, evameva na sīsakaṭāhapaliveṭhanacammaṃ jānāti ‘mayi kesā jātā’ti, nāpi kesā jānanti ‘mayaṃ sīsakaṭāhapaliveṭhanacamme jātā’ti. Aññamaññaṃ ābhogapaccavekkhaṇarahitā ete dhammā. Iti kesā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
லோமா ஸரீரவேட²னசம்மே ஜாதா. தத்த² யதா² ஸுஞ்ஞகா³மட்டா²னே ஜாதேஸு த³ப்³ப³திணேஸு ந ஸுஞ்ஞகா³மட்டா²னங் ஜானாதி ‘மயி த³ப்³ப³திணானி ஜாதானீ’தி, நாபி த³ப்³ப³திணானி ஜானந்தி ‘மயங் ஸுஞ்ஞகா³மட்டா²னே ஜாதானீ’தி, ஏவமேவ ந ஸரீரவேட²னசம்மங் ஜானாதி ‘மயி லோமா ஜாதா’தி, நாபி லோமா ஜானந்தி ‘மயங் ஸரீரவேட²னசம்மே ஜாதா’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி லோமா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Lomā sarīraveṭhanacamme jātā. Tattha yathā suññagāmaṭṭhāne jātesu dabbatiṇesu na suññagāmaṭṭhānaṃ jānāti ‘mayi dabbatiṇāni jātānī’ti, nāpi dabbatiṇāni jānanti ‘mayaṃ suññagāmaṭṭhāne jātānī’ti, evameva na sarīraveṭhanacammaṃ jānāti ‘mayi lomā jātā’ti, nāpi lomā jānanti ‘mayaṃ sarīraveṭhanacamme jātā’ti. Aññamaññaṃ ābhogapaccavekkhaṇarahitā ete dhammā. Iti lomā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
நகா² அங்கு³லீனங் அக்³கே³ஸு ஜாதா. தத்த² யதா² குமாரகேஸு த³ண்ட³கேஹி மது⁴கட்டி²கே விஜ்ஜி²த்வா கீளந்தேஸு ந த³ண்ட³கா ஜானந்தி ‘அம்ஹேஸு மது⁴கட்டி²கா ட²பிதா’தி, நாபி மது⁴கட்டி²கா ஜானந்தி ‘மயங் த³ண்ட³கேஸு ட²பிதா’தி, ஏவமேவ ந அங்கு³லியோ ஜானந்தி ‘அம்ஹாகங் அக்³கே³ஸு நகா² ஜாதா’தி, நாபி நகா² ஜானந்தி ‘மயங் அங்கு³லீனங் அக்³கே³ஸு ஜாதா’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி நகா² நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Nakhā aṅgulīnaṃ aggesu jātā. Tattha yathā kumārakesu daṇḍakehi madhukaṭṭhike vijjhitvā kīḷantesu na daṇḍakā jānanti ‘amhesu madhukaṭṭhikā ṭhapitā’ti, nāpi madhukaṭṭhikā jānanti ‘mayaṃ daṇḍakesu ṭhapitā’ti, evameva na aṅguliyo jānanti ‘amhākaṃ aggesu nakhā jātā’ti, nāpi nakhā jānanti ‘mayaṃ aṅgulīnaṃ aggesu jātā’ti. Aññamaññaṃ ābhogapaccavekkhaṇarahitā ete dhammā. Iti nakhā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
த³ந்தா ஹனுகட்டி²கேஸு ஜாதா. தத்த² யதா² வட்³ட⁴கீஹி பாஸாணஉது³க்க²லேஸு கேனசிதே³வ ஸிலேஸஜாதேன ப³ந்தி⁴த்வா ட²பிதத²ம்பே⁴ஸு ந உது³க்க²லானி ஜானந்தி ‘அம்ஹேஸு த²ம்பா⁴ டி²தா’தி, நாபி த²ம்பா⁴ ஜானந்தி ‘மயங் உது³க்க²லேஸு டி²தா’தி, ஏவமேவ ந ஹனுகட்டி²கா ஜானந்தி ‘அம்ஹேஸு த³ந்தா ஜாதா’தி , நாபி த³ந்தா ஜானந்தி ‘மயங் ஹனுகட்டி²கேஸு ஜாதா’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி த³ந்தா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Dantā hanukaṭṭhikesu jātā. Tattha yathā vaḍḍhakīhi pāsāṇaudukkhalesu kenacideva silesajātena bandhitvā ṭhapitathambhesu na udukkhalāni jānanti ‘amhesu thambhā ṭhitā’ti, nāpi thambhā jānanti ‘mayaṃ udukkhalesu ṭhitā’ti, evameva na hanukaṭṭhikā jānanti ‘amhesu dantā jātā’ti , nāpi dantā jānanti ‘mayaṃ hanukaṭṭhikesu jātā’ti. Aññamaññaṃ ābhogapaccavekkhaṇarahitā ete dhammā. Iti dantā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
தசோ ஸகலஸரீரங் பரியோனந்தி⁴த்வா டி²தோ. தத்த² யதா² அல்லகோ³சம்மபரியோனத்³தா⁴ய மஹாவீணாய ந மஹாவீணா ஜானாதி ‘அஹங் அல்லகோ³சம்மேன பரியோனத்³தா⁴’தி, நாபி அல்லகோ³சம்மங் ஜானாதி ‘மயா மஹாவீணா பரியொத்³தா⁴’தி, ஏவமேவ ந ஸரீரங் ஜானாதி ‘அஹங் தசேன பரியோனத்³த⁴’ந்தி, நாபி தசோ ஜானாதி ‘மயா ஸரீரங் பரியோனத்³த⁴ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி தசோ நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Taco sakalasarīraṃ pariyonandhitvā ṭhito. Tattha yathā allagocammapariyonaddhāya mahāvīṇāya na mahāvīṇā jānāti ‘ahaṃ allagocammena pariyonaddhā’ti, nāpi allagocammaṃ jānāti ‘mayā mahāvīṇā pariyoddhā’ti, evameva na sarīraṃ jānāti ‘ahaṃ tacena pariyonaddha’nti, nāpi taco jānāti ‘mayā sarīraṃ pariyonaddhanti. Aññamaññaṃ ābhogapaccavekkhaṇarahitā ete dhammā. Iti taco nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
மங்ஸங் அட்டி²ஸங்கா⁴டங் அனுலிம்பித்வா டி²தங். தத்த² யதா² மஹாமத்திகாய லித்தாய பி⁴த்தியா ந பி⁴த்தி ஜானாதி ‘அஹங் மஹாமத்திகாய லித்தா’தி, நாபி மஹாமத்திகா ஜானாதி ‘மயா மஹாபி⁴த்தி லித்தா’தி, ஏவமேவ ந அட்டி²ஸங்கா⁴டோ ஜானாதி ‘அஹங் நவமங்ஸபேஸிஸதப்பபே⁴தே³ன மங்ஸேன லித்தோ’தி, நாபி மங்ஸங் ஜானாதி ‘மயா அட்டி²ஸங்கா⁴டோ லித்தோ’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி மங்ஸங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Maṃsaṃ aṭṭhisaṅghāṭaṃ anulimpitvā ṭhitaṃ. Tattha yathā mahāmattikāya littāya bhittiyā na bhitti jānāti ‘ahaṃ mahāmattikāya littā’ti, nāpi mahāmattikā jānāti ‘mayā mahābhitti littā’ti, evameva na aṭṭhisaṅghāṭo jānāti ‘ahaṃ navamaṃsapesisatappabhedena maṃsena litto’ti, nāpi maṃsaṃ jānāti ‘mayā aṭṭhisaṅghāṭo litto’ti. Aññamaññaṃ ābhogapaccavekkhaṇarahitā ete dhammā. Iti maṃsaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
ந்ஹாரு ஸரீரப்³ப⁴ந்தரே அட்டீ²னி ஆப³ந்த⁴மானா டி²தா. தத்த² யதா² வல்லீஹி வினத்³தே⁴ஸு குட்டதா³ரூஸு ந குட்டதா³ரூனி ஜானந்தி ‘மயங் வல்லீஹி வினத்³தா⁴னீ’தி, நாபி வல்லியோ ஜானந்தி ‘அம்ஹேஹி குட்டதா³ரூனி வினத்³தா⁴னீ’தி, ஏவமேவ ந அட்டீ²னி ஜானந்தி ‘மயங் ந்ஹாரூஹி ஆப³த்³தா⁴னீ’தி, நாபி ந்ஹாரூ ஜானந்தி ‘அம்ஹேஹி அட்டீ²னி ஆப³த்³தா⁴னீ’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி ந்ஹாரு நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Nhāru sarīrabbhantare aṭṭhīni ābandhamānā ṭhitā. Tattha yathā vallīhi vinaddhesu kuṭṭadārūsu na kuṭṭadārūni jānanti ‘mayaṃ vallīhi vinaddhānī’ti, nāpi valliyo jānanti ‘amhehi kuṭṭadārūni vinaddhānī’ti, evameva na aṭṭhīni jānanti ‘mayaṃ nhārūhi ābaddhānī’ti, nāpi nhārū jānanti ‘amhehi aṭṭhīni ābaddhānī’ti. Aññamaññaṃ ābhogapaccavekkhaṇarahitā ete dhammā. Iti nhāru nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
அட்டீ²ஸு பண்ஹிகட்டி² கொ³ப்ப²கட்டி²ங் உக்கி²பித்வா டி²தங். கொ³ப்ப²கட்டி² ஜங்க⁴ட்டி²ங் உக்கி²பித்வா டி²தங். ஜங்க⁴ட்டி² ஊருட்டி²ங் உக்கி²பித்வா டி²தங். ஊருட்டி² கடிட்டி²ங் உக்கி²பித்வா டி²தங் . கடிட்டி² பிட்டி²கண்டகங் உக்கி²பித்வா டி²தங். பிட்டி²கண்டகோ கீ³வட்டி²ங் உக்கி²பித்வா டி²தோ. கீ³வட்டி² ஸீஸட்டி²ங் உக்கி²பித்வா டி²தங். ஸீஸட்டி² கீ³வட்டி²கே பதிட்டி²தங். கீ³வட்டி² பிட்டி²கண்டகே பதிட்டி²தங். பிட்டி²கண்டகோ கடிட்டி²ம்ஹி பதிட்டி²தோ. கடிட்டி² ஊருட்டி²கே பதிட்டி²தங். ஊருட்டி² ஜங்க⁴ட்டி²கே பதிட்டி²தங். ஜங்க⁴ட்டி² கொ³ப்ப²கட்டி²கே பதிட்டி²தங். கொ³ப்ப²கட்டி² பண்ஹிகட்டி²கே பதிட்டி²தங்.
Aṭṭhīsu paṇhikaṭṭhi gopphakaṭṭhiṃ ukkhipitvā ṭhitaṃ. Gopphakaṭṭhi jaṅghaṭṭhiṃ ukkhipitvā ṭhitaṃ. Jaṅghaṭṭhi ūruṭṭhiṃ ukkhipitvā ṭhitaṃ. Ūruṭṭhi kaṭiṭṭhiṃ ukkhipitvā ṭhitaṃ . Kaṭiṭṭhi piṭṭhikaṇṭakaṃ ukkhipitvā ṭhitaṃ. Piṭṭhikaṇṭako gīvaṭṭhiṃ ukkhipitvā ṭhito. Gīvaṭṭhi sīsaṭṭhiṃ ukkhipitvā ṭhitaṃ. Sīsaṭṭhi gīvaṭṭhike patiṭṭhitaṃ. Gīvaṭṭhi piṭṭhikaṇṭake patiṭṭhitaṃ. Piṭṭhikaṇṭako kaṭiṭṭhimhi patiṭṭhito. Kaṭiṭṭhi ūruṭṭhike patiṭṭhitaṃ. Ūruṭṭhi jaṅghaṭṭhike patiṭṭhitaṃ. Jaṅghaṭṭhi gopphakaṭṭhike patiṭṭhitaṃ. Gopphakaṭṭhi paṇhikaṭṭhike patiṭṭhitaṃ.
தத்த² யதா² இட்ட²கதா³ருகோ³மயாதி³ஸஞ்சயேஸு ந ஹெட்டி²மா ஹெட்டி²மா ஜானந்தி ‘மயங் உபரிமே உபரிமே உக்கி²பித்வா டி²தா’தி, நாபி உபரிமா உபரிமா ஜானந்தி ‘மயங் ஹெட்டி²மேஸு ஹெட்டி²மேஸு பதிட்டி²தா’தி, ஏவமேவ ந பண்ஹிகட்டி² ஜானாதி ‘அஹங் கொ³ப்ப²கட்டி²ங் உக்கி²பித்வா டி²த’ந்தி, ந கொ³ப்ப²கட்டி² ஜானாதி ‘அஹங் ஜங்க⁴ட்டி²ங் உக்கி²பித்வா டி²த’ந்தி, ந ஜங்க⁴ட்டி² ஜானாதி ‘அஹங் ஊருட்டி²ங் உக்கி²பித்வா டி²த’ந்தி, ந ஊருட்டி² ஜானாதி ‘அஹங் கடிட்டி²ங் உக்கி²பித்வா டி²த’ந்தி, ந கடிட்டி² ஜானாதி ‘அஹங் பிட்டி²கண்டகங் உக்கி²பித்வா டி²த’ந்தி, ந பிட்டி²கண்டகோ ஜானாதி ‘அஹங் கீ³வட்டி²ங் உக்கி²பித்வா டி²தோ’தி, ந கீ³வட்டி² ஜானாதி ‘அஹங் ஸீஸட்டி²ங் உக்கி²பித்வா டி²த’ந்தி, ந ஸீஸட்டி² ஜானாதி ‘அஹங் கீ³வட்டி²ம்ஹி பதிட்டி²த’ந்தி, ந கீ³வட்டி² ஜானாதி ‘அஹங் பிட்டி²கண்டகே பதிட்டி²த’ந்தி, ந பிட்டி²கண்டகோ ஜானாதி ‘அஹங் கடிட்டி²ம்ஹி பதிட்டி²தோ’தி, ந கடிட்டி² ஜானாதி ‘அஹங் ஊருட்டி²ம்ஹி பதிட்டி²த’ந்தி, ந ஊருட்டி² ஜானாதி ‘அஹங் ஜங்க⁴ட்டி²ம்ஹி பதிட்டி²த’ந்தி, ந ஜங்க⁴ட்டி² ஜானாதி ‘அஹங் கொ³ப்ப²கட்டி²ம்ஹி பதிட்டி²த’ந்தி, ந கொ³ப்ப²கட்டி² ஜானாதி ‘அஹங் பண்ஹிகட்டி²ம்ஹி பதிட்டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி அட்டி² நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Tattha yathā iṭṭhakadārugomayādisañcayesu na heṭṭhimā heṭṭhimā jānanti ‘mayaṃ uparime uparime ukkhipitvā ṭhitā’ti, nāpi uparimā uparimā jānanti ‘mayaṃ heṭṭhimesu heṭṭhimesu patiṭṭhitā’ti, evameva na paṇhikaṭṭhi jānāti ‘ahaṃ gopphakaṭṭhiṃ ukkhipitvā ṭhita’nti, na gopphakaṭṭhi jānāti ‘ahaṃ jaṅghaṭṭhiṃ ukkhipitvā ṭhita’nti, na jaṅghaṭṭhi jānāti ‘ahaṃ ūruṭṭhiṃ ukkhipitvā ṭhita’nti, na ūruṭṭhi jānāti ‘ahaṃ kaṭiṭṭhiṃ ukkhipitvā ṭhita’nti, na kaṭiṭṭhi jānāti ‘ahaṃ piṭṭhikaṇṭakaṃ ukkhipitvā ṭhita’nti, na piṭṭhikaṇṭako jānāti ‘ahaṃ gīvaṭṭhiṃ ukkhipitvā ṭhito’ti, na gīvaṭṭhi jānāti ‘ahaṃ sīsaṭṭhiṃ ukkhipitvā ṭhita’nti, na sīsaṭṭhi jānāti ‘ahaṃ gīvaṭṭhimhi patiṭṭhita’nti, na gīvaṭṭhi jānāti ‘ahaṃ piṭṭhikaṇṭake patiṭṭhita’nti, na piṭṭhikaṇṭako jānāti ‘ahaṃ kaṭiṭṭhimhi patiṭṭhito’ti, na kaṭiṭṭhi jānāti ‘ahaṃ ūruṭṭhimhi patiṭṭhita’nti, na ūruṭṭhi jānāti ‘ahaṃ jaṅghaṭṭhimhi patiṭṭhita’nti, na jaṅghaṭṭhi jānāti ‘ahaṃ gopphakaṭṭhimhi patiṭṭhita’nti, na gopphakaṭṭhi jānāti ‘ahaṃ paṇhikaṭṭhimhi patiṭṭhita’nti. Aññamaññaṃ ābhogapaccavekkhaṇarahitā ete dhammā. Iti aṭṭhi nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
அட்டி²மிஞ்ஜங் தேஸங் தேஸங் அட்டீ²னங் அப்³ப⁴ந்தரே டி²தங். தத்த² யதா² வேளுபப்³பா³தீ³னங் அந்தோ பக்கி²த்தேஸு ஸின்னவெத்தக்³கா³தீ³ஸு ந வேளுபப்³பா³தீ³னி ஜானந்தி ‘அம்ஹேஸு வெத்தக்³கா³தீ³னி பக்கி²த்தானீ’தி, நாபி வெத்தக்³கா³தீ³னி ஜானந்தி ‘மயங் வேளுபப்³பா³தீ³ஸு டி²தானீதி, ஏவமேவ ந அட்டீ²னி ஜானந்தி ‘அம்ஹாகங் அந்தோ அட்டி²மிஞ்ஜங் டி²த’ந்தி, நாபி அட்டி²மிஞ்ஜங் ஜானாதி ‘அஹங் அட்டீ²னங் அந்தோ டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி அட்டி²மிஞ்ஜங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Aṭṭhimiñjaṃ tesaṃ tesaṃ aṭṭhīnaṃ abbhantare ṭhitaṃ. Tattha yathā veḷupabbādīnaṃ anto pakkhittesu sinnavettaggādīsu na veḷupabbādīni jānanti ‘amhesu vettaggādīni pakkhittānī’ti, nāpi vettaggādīni jānanti ‘mayaṃ veḷupabbādīsu ṭhitānīti, evameva na aṭṭhīni jānanti ‘amhākaṃ anto aṭṭhimiñjaṃ ṭhita’nti, nāpi aṭṭhimiñjaṃ jānāti ‘ahaṃ aṭṭhīnaṃ anto ṭhita’nti. Aññamaññaṃ ābhogapaccavekkhaṇarahitā ete dhammā. Iti aṭṭhimiñjaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
வக்கங் க³லவாடகதோ நிக்க²ந்தேன ஏகமூலேன தோ²கங் க³ந்த்வா த்³விதா⁴ பி⁴ன்னேன தூ²லன்ஹாருனா வினிப³த்³த⁴ங் ஹுத்வா ஹத³யமங்ஸங் பரிக்கி²பித்வா டி²தங். தத்த² யதா² வண்டுபனிப³த்³தே⁴ அம்ப³ப²லத்³வயே ந வண்டங் ஜானாதி ‘மயா அம்ப³ப²லத்³வயங் உபனிப³த்³த⁴’ந்தி, நாபி அம்ப³ப²லத்³வயங் ஜானாதி ‘அஹங் வண்டேன உபனிப³த்³த⁴’ந்தி, ஏவமேவ ந தூ²லன்ஹாரு ஜானாதி ‘மயா வக்கங் உபனிப³த்³த⁴’ந்தி, நாபி வக்கங் ஜானாதி ‘அஹங் தூ²லன்ஹாருனா உபனிப³த்³த⁴’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி வக்கங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Vakkaṃ galavāṭakato nikkhantena ekamūlena thokaṃ gantvā dvidhā bhinnena thūlanhārunā vinibaddhaṃ hutvā hadayamaṃsaṃ parikkhipitvā ṭhitaṃ. Tattha yathā vaṇṭupanibaddhe ambaphaladvaye na vaṇṭaṃ jānāti ‘mayā ambaphaladvayaṃ upanibaddha’nti, nāpi ambaphaladvayaṃ jānāti ‘ahaṃ vaṇṭena upanibaddha’nti, evameva na thūlanhāru jānāti ‘mayā vakkaṃ upanibaddha’nti, nāpi vakkaṃ jānāti ‘ahaṃ thūlanhārunā upanibaddha’nti. Aññamaññaṃ ābhogapaccavekkhaṇarahitā ete dhammā. Iti vakkaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
ஹத³யங் ஸரீரப்³ப⁴ந்தரே உரட்டி²பஞ்ஜரமஜ்ஜ²ங் நிஸ்ஸாய டி²தங். தத்த² யதா² ஜிண்ணஸந்த³மானிகபஞ்ஜரப்³ப⁴ந்தரங் நிஸ்ஸாய ட²பிதாய மங்ஸபேஸியா ந ஜிண்ணஸந்த³மானிகபஞ்ஜரப்³ப⁴ந்தரங் ஜானாதி ‘மங் நிஸ்ஸாய மங்ஸபேஸி ட²பிதா’தி, நாபி மங்ஸபேஸி ஜானாதி ‘அஹங் ஜிண்ணஸந்த³மானிகபஞ்ஜரப்³ப⁴ந்தரங் நிஸ்ஸாய டி²தா’தி, ஏவமேவ ந உரட்டி²பஞ்ஜரப்³ப⁴ந்தரங் ஜானாதி ‘மங் நிஸ்ஸாய ஹத³யங் டி²த’ந்தி, நாபி ஹத³யங் ஜானாதி ‘அஹங் உரட்டி²பஞ்ஜரப்³ப⁴ந்தரங் நிஸ்ஸாய டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி ஹத³யங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Hadayaṃ sarīrabbhantare uraṭṭhipañjaramajjhaṃ nissāya ṭhitaṃ. Tattha yathā jiṇṇasandamānikapañjarabbhantaraṃ nissāya ṭhapitāya maṃsapesiyā na jiṇṇasandamānikapañjarabbhantaraṃ jānāti ‘maṃ nissāya maṃsapesi ṭhapitā’ti, nāpi maṃsapesi jānāti ‘ahaṃ jiṇṇasandamānikapañjarabbhantaraṃ nissāya ṭhitā’ti, evameva na uraṭṭhipañjarabbhantaraṃ jānāti ‘maṃ nissāya hadayaṃ ṭhita’nti, nāpi hadayaṃ jānāti ‘ahaṃ uraṭṭhipañjarabbhantaraṃ nissāya ṭhita’nti. Aññamaññaṃ ābhogapaccavekkhaṇarahitā ete dhammā. Iti hadayaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
யகனங் அந்தோஸரீரே த்³வின்னங் த²னானங் அப்³ப⁴ந்தரே த³க்கி²ணபஸ்ஸங் நிஸ்ஸாய டி²தங். தத்த² யதா² உக்க²லிகபாலபஸ்ஸம்ஹி லக்³கே³ யமகமங்ஸபிண்டே³ ந உக்க²லிகபாலபஸ்ஸங் ஜானாதி ‘மயி யமகமங்ஸபிண்டோ³ லக்³கோ³’தி, நாபி யமகமங்ஸபிண்டோ³ ஜானாதி ‘அஹங் உக்க²லிகபாலபஸ்ஸே லக்³கோ³’தி, ஏவமேவ ந த²னானங் அப்³ப⁴ந்தரே த³க்கி²ணபஸ்ஸங் ஜானாதி ‘மங் நிஸ்ஸாய யகனங் டி²த’ந்தி, நாபி யகனங் ஜானாதி ‘அஹங் த²னானங் அப்³ப⁴ந்தரே த³க்கி²ணபஸ்ஸங் நிஸ்ஸாய டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி யகனங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Yakanaṃ antosarīre dvinnaṃ thanānaṃ abbhantare dakkhiṇapassaṃ nissāya ṭhitaṃ. Tattha yathā ukkhalikapālapassamhi lagge yamakamaṃsapiṇḍe na ukkhalikapālapassaṃ jānāti ‘mayi yamakamaṃsapiṇḍo laggo’ti, nāpi yamakamaṃsapiṇḍo jānāti ‘ahaṃ ukkhalikapālapasse laggo’ti, evameva na thanānaṃ abbhantare dakkhiṇapassaṃ jānāti ‘maṃ nissāya yakanaṃ ṭhita’nti, nāpi yakanaṃ jānāti ‘ahaṃ thanānaṃ abbhantare dakkhiṇapassaṃ nissāya ṭhita’nti. Aññamaññaṃ ābhogapaccavekkhaṇarahitā ete dhammā. Iti yakanaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
கிலோமகேஸு படிச்ச²ன்னகிலோமகங் ஹத³யஞ்ச வக்கஞ்ச பரிவாரெத்வா டி²தங், அபடிச்ச²ன்னகிலோமகங் ஸகலஸரீரே சம்மஸ்ஸ ஹெட்ட²தோ மங்ஸங் பரியோனந்தி⁴த்வா டி²தங். தத்த² யதா² பிலோதிகபலிவேடி²தே மங்ஸே ந மங்ஸங் ஜானாதி ‘அஹங் பிலோதிகாய பலிவேடி²த’ந்தி, நாபி பிலோதிகா ஜானாதி ‘மயா மங்ஸங் பலிவேடி²த’ந்தி, ஏவமேவ ந வக்கஹத³யானி ஸகலஸரீரே மங்ஸஞ்ச ஜானாதி ‘அஹங் கிலோமகேன படிச்ச²ன்ன’ந்தி, நாபி கிலோமகங் ஜானாதி ‘மயா வக்கஹத³யானி ஸகலஸரீரே மங்ஸஞ்ச படிச்ச²ன்ன’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி கிலோமகங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Kilomakesu paṭicchannakilomakaṃ hadayañca vakkañca parivāretvā ṭhitaṃ, apaṭicchannakilomakaṃ sakalasarīre cammassa heṭṭhato maṃsaṃ pariyonandhitvā ṭhitaṃ. Tattha yathā pilotikapaliveṭhite maṃse na maṃsaṃ jānāti ‘ahaṃ pilotikāya paliveṭhita’nti, nāpi pilotikā jānāti ‘mayā maṃsaṃ paliveṭhita’nti, evameva na vakkahadayāni sakalasarīre maṃsañca jānāti ‘ahaṃ kilomakena paṭicchanna’nti, nāpi kilomakaṃ jānāti ‘mayā vakkahadayāni sakalasarīre maṃsañca paṭicchanna’nti. Aññamaññaṃ ābhogapaccavekkhaṇarahitā ete dhammā. Iti kilomakaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
பிஹகங் ஹத³யஸ்ஸ வாமபஸ்ஸே உத³ரபடலஸ்ஸ மத்த²கபஸ்ஸங் நிஸ்ஸாய டி²தங். தத்த² யதா² கொட்ட²கமத்த²கபஸ்ஸங் நிஸ்ஸாய டி²தாய கோ³மயபிண்டி³யா ந கொட்ட²கமத்த²கபஸ்ஸங் ஜானாதி ‘கோ³மயபிண்டி³ மங் நிஸ்ஸாய டி²தா’தி, நாபி கோ³மயபிண்டி³ ஜானாதி ‘அஹங் கொட்ட²கமத்த²கபஸ்ஸங் நிஸ்ஸாய டி²தா’தி, ஏவமேவ ந உத³ரபடலஸ்ஸ மத்த²கபஸ்ஸங் ஜானாதி ‘பிஹகங் மங் நிஸ்ஸாய டி²த’ந்தி, நாபி பிஹகங் ஜானாதி ‘அஹங் உத³ரபடலஸ்ஸ மத்த²கபஸ்ஸங் நிஸ்ஸாய டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி பிஹகங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Pihakaṃ hadayassa vāmapasse udarapaṭalassa matthakapassaṃ nissāya ṭhitaṃ. Tattha yathā koṭṭhakamatthakapassaṃ nissāya ṭhitāya gomayapiṇḍiyā na koṭṭhakamatthakapassaṃ jānāti ‘gomayapiṇḍi maṃ nissāya ṭhitā’ti, nāpi gomayapiṇḍi jānāti ‘ahaṃ koṭṭhakamatthakapassaṃ nissāya ṭhitā’ti, evameva na udarapaṭalassa matthakapassaṃ jānāti ‘pihakaṃ maṃ nissāya ṭhita’nti, nāpi pihakaṃ jānāti ‘ahaṃ udarapaṭalassa matthakapassaṃ nissāya ṭhita’nti. Aññamaññaṃ ābhogapaccavekkhaṇarahitā ete dhammā. Iti pihakaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
பப்பா²ஸங் ஸரீரப்³ப⁴ந்தரே த்³வின்னங் த²னானங் அப்³ப⁴ந்தரே ஹத³யஞ்ச யகனஞ்ச உபரிசா²தெ³த்வா ஓலம்ப³ந்தங் டி²தங். தத்த² யதா² ஜிண்ணகொட்ட²ப்³ப⁴ந்தரே ஓலம்ப³மானே ஸகுணகுலாவகே ந ஜிண்ணகொட்ட²ப்³ப⁴ந்தரங் ஜானாதி ‘மயி ஸகுணகுலாவகோ ஓலம்ப³மானோ டி²தோ’தி, நாபி ஸகுணகுலாவகோ ஜானாதி ‘அஹங் ஜிண்ணகொட்ட²ப்³ப⁴ந்தரே ஓலம்ப³மானோ டி²தோ’தி , ஏவமேவ ந ஸரீரப்³ப⁴ந்தரங் ஜானாதி ‘மயி பப்பா²ஸங் ஓலம்ப³மானங் டி²த’ந்தி, நாபி பப்பா²ஸங் ஜானாதி ‘அஹங் ஏவரூபே ஸரீரப்³ப⁴ந்தரே ஓலம்ப³மானங் டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி பப்பா²ஸங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Papphāsaṃ sarīrabbhantare dvinnaṃ thanānaṃ abbhantare hadayañca yakanañca uparichādetvā olambantaṃ ṭhitaṃ. Tattha yathā jiṇṇakoṭṭhabbhantare olambamāne sakuṇakulāvake na jiṇṇakoṭṭhabbhantaraṃ jānāti ‘mayi sakuṇakulāvako olambamāno ṭhito’ti, nāpi sakuṇakulāvako jānāti ‘ahaṃ jiṇṇakoṭṭhabbhantare olambamāno ṭhito’ti , evameva na sarīrabbhantaraṃ jānāti ‘mayi papphāsaṃ olambamānaṃ ṭhita’nti, nāpi papphāsaṃ jānāti ‘ahaṃ evarūpe sarīrabbhantare olambamānaṃ ṭhita’nti. Aññamaññaṃ ābhogapaccavekkhaṇarahitā ete dhammā. Iti papphāsaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
அந்தங் க³லவாடகதோ கரீஸமக்³க³பரியந்தே ஸரீரப்³ப⁴ந்தரே டி²தங். தத்த² யதா² லோஹிததோ³ணிகாய ஓபு⁴ஜித்வா ட²பிதே சி²ன்னஸீஸத⁴மனிகளேவரே ந லோஹிததோ³ணி ஜானாதி ‘மயி த⁴மனிகளேவரங் டி²த’ந்தி, நாபி த⁴மனிகளேவரங் ஜானாதி ‘அஹங் லோஹிததோ³ணிகாயங் டி²த’ந்தி, ஏவமேவ ந ஸரீரப்³ப⁴ந்தரங் ஜானாதி ‘மயி அந்தங் டி²த’ந்தி, நாபி அந்தங் ஜானாதி ‘அஹங் ஸரீரப்³ப⁴ந்தரே டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி அந்தங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Antaṃ galavāṭakato karīsamaggapariyante sarīrabbhantare ṭhitaṃ. Tattha yathā lohitadoṇikāya obhujitvā ṭhapite chinnasīsadhamanikaḷevare na lohitadoṇi jānāti ‘mayi dhamanikaḷevaraṃ ṭhita’nti, nāpi dhamanikaḷevaraṃ jānāti ‘ahaṃ lohitadoṇikāyaṃ ṭhita’nti, evameva na sarīrabbhantaraṃ jānāti ‘mayi antaṃ ṭhita’nti, nāpi antaṃ jānāti ‘ahaṃ sarīrabbhantare ṭhita’nti. Aññamaññaṃ ābhogapaccavekkhaṇarahitā ete dhammā. Iti antaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
அந்தகு³ணங் அந்தந்தரே ஏகவீஸதி அந்தபோ⁴கே³ ப³ந்தி⁴த்வா டி²தங். தத்த² யதா² பாத³புஞ்ச²னரஜ்ஜுமண்ட³லகங் ஸிப்³பெ³த்வா டி²தேஸு ரஜ்ஜுகேஸு ந பாத³புஞ்ச²னரஜ்ஜுமண்ட³லகங் ஜானாதி ‘ரஜ்ஜுகா மங் ஸிப்³பெ³த்வா டி²தா’தி, நாபி ரஜ்ஜுகா ஜானந்தி ‘மயங் பாத³புஞ்ச²னரஜ்ஜுமண்ட³லகங் ஸிப்³பெ³த்வா டி²தா’தி, ஏவமேவ ந அந்தங் ஜானாதி ‘அந்தகு³ணங் மங் ஆப³ந்தி⁴த்வா டி²த’ந்தி, நாபி அந்தகு³ணங் ஜானாதி ‘அஹங் அந்தங் ப³ந்தி⁴த்வா டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி அந்தகு³ணங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Antaguṇaṃ antantare ekavīsati antabhoge bandhitvā ṭhitaṃ. Tattha yathā pādapuñchanarajjumaṇḍalakaṃ sibbetvā ṭhitesu rajjukesu na pādapuñchanarajjumaṇḍalakaṃ jānāti ‘rajjukā maṃ sibbetvā ṭhitā’ti, nāpi rajjukā jānanti ‘mayaṃ pādapuñchanarajjumaṇḍalakaṃ sibbetvā ṭhitā’ti, evameva na antaṃ jānāti ‘antaguṇaṃ maṃ ābandhitvā ṭhita’nti, nāpi antaguṇaṃ jānāti ‘ahaṃ antaṃ bandhitvā ṭhita’nti. Aññamaññaṃ ābhogapaccavekkhaṇarahitā ete dhammā. Iti antaguṇaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
உத³ரியங் உத³ரே டி²தங் அஸிதபீதகா²யிதஸாயிதங். தத்த² யதா² ஸுவானதோ³ணியங் டி²தே ஸுவானவமது²ம்ஹி ந ஸுவானதோ³ணி ஜானாதி ‘மயி ஸுவானவமது² டி²தோ’தி, நாபி ஸுவானவமது² ஜானாதி ‘அஹங் ஸுவானதோ³ணியங் டி²தோ’தி, ஏவமேவ ந உத³ரங் ஜானாதி ‘மயி உத³ரியங் டி²த’ந்தி, நாபி உத³ரியங் ஜானாதி ‘அஹங் உத³ரே டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி உத³ரியங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Udariyaṃ udare ṭhitaṃ asitapītakhāyitasāyitaṃ. Tattha yathā suvānadoṇiyaṃ ṭhite suvānavamathumhi na suvānadoṇi jānāti ‘mayi suvānavamathu ṭhito’ti, nāpi suvānavamathu jānāti ‘ahaṃ suvānadoṇiyaṃ ṭhito’ti, evameva na udaraṃ jānāti ‘mayi udariyaṃ ṭhita’nti, nāpi udariyaṃ jānāti ‘ahaṃ udare ṭhita’nti. Aññamaññaṃ ābhogapaccavekkhaṇarahitā ete dhammā. Iti udariyaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
கரீஸங் பக்காஸயஸங்கா²தே அட்ட²ங்கு³லவேளுபப்³ப³ஸதி³ஸே அந்தபரியோஸானே டி²தங். தத்த² யதா² வேளுபப்³பே³ ஓமத்³தி³த்வா பக்கி²த்தாய ஸண்ஹபண்டு³மத்திகாய ந வேளுபப்³ப³ங் ஜானாதி ‘மயி பண்டு³மத்திகா டி²தா’தி, நாபி பண்டு³மத்திகா ஜானாதி ‘அஹங் வேளுபப்³பே³ டி²தா’தி, ஏவமேவ ந பக்காஸயோ ஜானாதி ‘மயி கரீஸங் டி²த’ந்தி, நாபி கரீஸங் ஜானாதி ‘அஹங் பக்காஸயே டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி கரீஸங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Karīsaṃ pakkāsayasaṅkhāte aṭṭhaṅgulaveḷupabbasadise antapariyosāne ṭhitaṃ. Tattha yathā veḷupabbe omadditvā pakkhittāya saṇhapaṇḍumattikāya na veḷupabbaṃ jānāti ‘mayi paṇḍumattikā ṭhitā’ti, nāpi paṇḍumattikā jānāti ‘ahaṃ veḷupabbe ṭhitā’ti, evameva na pakkāsayo jānāti ‘mayi karīsaṃ ṭhita’nti, nāpi karīsaṃ jānāti ‘ahaṃ pakkāsaye ṭhita’nti. Aññamaññaṃ ābhogapaccavekkhaṇarahitā ete dhammā. Iti karīsaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
மத்த²லுங்க³ங் ஸீஸகடாஹப்³ப⁴ந்தரே டி²தங். தத்த² யதா² புராணலாபு³கடாஹே பக்கி²த்தாய பிட்ட²பிண்டி³யா ந லாபு³கடாஹங் ஜானாதி ‘மயி பிட்ட²பிண்டி³ டி²தா’தி, நாபி பிட்ட²பிண்டி³ ஜானாதி ‘அஹங் லாபு³கடாஹே டி²தா’தி, ஏவமேவ ந ஸீஸகடாஹப்³ப⁴ந்தரங் ஜானாதி ‘மயி மத்த²லுங்க³ங் டி²த’ந்தி, நாபி மத்த²லுங்க³ங் ஜானாதி ‘அஹங் ஸீஸகடாஹப்³ப⁴ந்தரே டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி மத்த²லுங்க³ங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதி.
Matthaluṅgaṃ sīsakaṭāhabbhantare ṭhitaṃ. Tattha yathā purāṇalābukaṭāhe pakkhittāya piṭṭhapiṇḍiyā na lābukaṭāhaṃ jānāti ‘mayi piṭṭhapiṇḍi ṭhitā’ti, nāpi piṭṭhapiṇḍi jānāti ‘ahaṃ lābukaṭāhe ṭhitā’ti, evameva na sīsakaṭāhabbhantaraṃ jānāti ‘mayi matthaluṅgaṃ ṭhita’nti, nāpi matthaluṅgaṃ jānāti ‘ahaṃ sīsakaṭāhabbhantare ṭhita’nti. Aññamaññaṃ ābhogapaccavekkhaṇarahitā ete dhammā. Iti matthaluṅgaṃ nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūti.
யங் வா பனஞ்ஞம்பீதி இமினா ஆபோகொட்டா²ஸாதீ³ஸு தீஸு அனுக³தங் பத²வீதா⁴துங் லக்க²ணவஸேன யேவாபனகங் பத²விங் கத்வா த³ஸ்ஸேதி.
Yaṃvā panaññampīti iminā āpokoṭṭhāsādīsu tīsu anugataṃ pathavīdhātuṃ lakkhaṇavasena yevāpanakaṃ pathaviṃ katvā dasseti.
பா³ஹிரபத²வீதா⁴துனித்³தே³ஸே அயோதி காளலோஹங். லோஹந்தி ஜாதிலோஹங், விஜாதிலோஹங், கித்திமலோஹங், பிஸாசலோஹந்தி சதுப்³பி³த⁴ங். தத்த² அயோ, ஸஜ்ஜு², ஸுவண்ணங், திபு, ஸீஸங், தம்ப³லோஹங், வேகந்தகந்தி இமானி ஸத்த ஜாதிலோஹானி நாம. நாக³னாஸிகலோஹங் விஜாதிலோஹங் நாம. கங்ஸலோஹங், வட்டலோஹங், ஆரகூடந்தி தீணி கித்திமலோஹானி நாம. மோரக்க²கங், புது²கங், மலினகங், சபலகங், ஸேலகங், ஆடகங், ப⁴ல்லகங், தூ³ஸிலோஹந்தி அட்ட² பிஸாசலோஹானி நாம. தேஸு பஞ்ச ஜாதிலோஹானி பாளியங் விஸுங் வுத்தானேவ. தம்ப³லோஹங், வேகந்தகலோஹந்தி இமேஹி பன த்³வீஹி ஜாதிலோஹேஹி ஸத்³தி⁴ங் ஸேஸங் ஸப்³ப³ம்பி இத⁴ லோஹந்தி வேதி³தப்³ப³ங்.
Bāhirapathavīdhātuniddese ayoti kāḷalohaṃ. Lohanti jātilohaṃ, vijātilohaṃ, kittimalohaṃ, pisācalohanti catubbidhaṃ. Tattha ayo, sajjhu, suvaṇṇaṃ, tipu, sīsaṃ, tambalohaṃ, vekantakanti imāni satta jātilohāni nāma. Nāganāsikalohaṃ vijātilohaṃ nāma. Kaṃsalohaṃ, vaṭṭalohaṃ, ārakūṭanti tīṇi kittimalohāni nāma. Morakkhakaṃ, puthukaṃ, malinakaṃ, capalakaṃ, selakaṃ, āṭakaṃ, bhallakaṃ, dūsilohanti aṭṭha pisācalohāni nāma. Tesu pañca jātilohāni pāḷiyaṃ visuṃ vuttāneva. Tambalohaṃ, vekantakalohanti imehi pana dvīhi jātilohehi saddhiṃ sesaṃ sabbampi idha lohanti veditabbaṃ.
திபூதி ஸேததிபு. ஸீஸந்தி காளதிபு. ஸஜ்ஜூ²தி ரஜதங். முத்தாதி ஸாமுத்³தி³கமுத்தா. மணீதி ட²பெத்வா பாளிஆக³தே வேளுரியாத³யோ ஸேஸோ ஜோதிரஸாதி³பே⁴தோ³ ஸப்³போ³பி மணி. வேளுரியோதி வங்ஸவண்ணமணி. ஸங்கோ²தி ஸாமுத்³தி³கஸங்கோ². ஸிலாதி காளஸிலா, பண்டு³ஸிலா, ஸேதஸிலாதிஆதி³பே⁴தா³ ஸப்³பா³பி ஸிலா. பவாளந்தி பவாளமேவ. ரஜதந்தி கஹாபணோ. ஜாதரூபந்தி ஸுவண்ணங். லோஹிதங்கோதி ரத்தமணி. மஸாரக³ல்லந்தி கப³ரமணி. திணாதீ³ஸு ப³ஹிஸாரா அந்தமஸோ நாளிகேராத³யோபி திணங் நாம. அந்தோஸாரங் அந்தமஸோ தா³ருக²ண்ட³ம்பி கட்ட²ங் நாம. ஸக்க²ராதி முக்³க³மத்ததோ யாவ முட்டி²ப்பமாணா மரும்பா³ ஸக்க²ரா நாம. முக்³க³மத்ததோ பன ஹெட்டா² வாலிகாதி வுச்சதி. கட²லந்தி யங் கிஞ்சி கபாலங். பூ⁴மீதி பத²வீ. பாஸாணோதி அந்தோமுட்டி²யங் அஸண்ட²ஹனதோ பட்டா²ய ஹத்தி²ப்பமாணங் அஸம்பத்தோ பாஸாணோ நாம. ஹத்தி²ப்பமாணதோ பட்டா²ய பன உபரி பப்³ப³தோ நாம. யங் வா பனாதி இமினா தாலட்டி²-நாளிகேர-ப²லாதி³பே⁴த³ங் ஸேஸபத²விங் க³ண்ஹாதி. யா ச அஜ்ஜ²த்திகா பத²வீதா⁴து யா ச பா³ஹிராதி இமினா த்³வேபி பத²வீதா⁴துயோ கக்க²ளட்டே²ன லக்க²ணதோ ஏகா பத²வீதா⁴து ஏவாதி த³ஸ்ஸேதி.
Tipūti setatipu. Sīsanti kāḷatipu. Sajjhūti rajataṃ. Muttāti sāmuddikamuttā. Maṇīti ṭhapetvā pāḷiāgate veḷuriyādayo seso jotirasādibhedo sabbopi maṇi. Veḷuriyoti vaṃsavaṇṇamaṇi. Saṅkhoti sāmuddikasaṅkho. Silāti kāḷasilā, paṇḍusilā, setasilātiādibhedā sabbāpi silā. Pavāḷanti pavāḷameva. Rajatanti kahāpaṇo. Jātarūpanti suvaṇṇaṃ. Lohitaṅkoti rattamaṇi. Masāragallanti kabaramaṇi. Tiṇādīsu bahisārā antamaso nāḷikerādayopi tiṇaṃ nāma. Antosāraṃ antamaso dārukhaṇḍampi kaṭṭhaṃ nāma. Sakkharāti muggamattato yāva muṭṭhippamāṇā marumbā sakkharā nāma. Muggamattato pana heṭṭhā vālikāti vuccati. Kaṭhalanti yaṃ kiñci kapālaṃ. Bhūmīti pathavī. Pāsāṇoti antomuṭṭhiyaṃ asaṇṭhahanato paṭṭhāya hatthippamāṇaṃ asampatto pāsāṇo nāma. Hatthippamāṇato paṭṭhāya pana upari pabbato nāma. Yaṃ vā panāti iminā tālaṭṭhi-nāḷikera-phalādibhedaṃ sesapathaviṃ gaṇhāti. Yā ca ajjhattikā pathavīdhātu yā ca bāhirāti iminā dvepi pathavīdhātuyo kakkhaḷaṭṭhena lakkhaṇato ekā pathavīdhātu evāti dasseti.
174. ஆபோதா⁴துநித்³தே³ஸாதீ³ஸு ஹெட்டா² வுத்தனயேனேவ வேதி³தப்³ப³ங். ஆபோ ஆபோக³தந்திஆதீ³ஸு ஆப³ந்த⁴னவஸேன ஆபோ. ததே³வ ஆபோஸபா⁴வங் க³தத்தா ஆபோக³தங் நாம. ஸ்னேஹவஸேன ஸ்னேஹோ. ஸோயேவ ஸ்னேஹஸபா⁴வங் க³தத்தா ஸ்னேஹக³தங் நாம. ப³ந்த⁴னத்தங் ரூபஸ்ஸாதி அவினிப்³போ⁴க³ரூபஸ்ஸ ப³ந்த⁴னபா⁴வோ. பித்தங் ஸெம்ஹந்திஆதீ³னிபி வண்ணஸண்டா²னதி³ஸோகாஸபரிச்சே²த³வஸேன பரிக்³க³ஹெத்வா தா⁴துவஸேனேவ மனஸிகாதப்³பா³னி.
174. Āpodhātuniddesādīsu heṭṭhā vuttanayeneva veditabbaṃ. Āpo āpogatantiādīsu ābandhanavasena āpo. Tadeva āposabhāvaṃ gatattā āpogataṃ nāma. Snehavasena sneho. Soyeva snehasabhāvaṃ gatattā snehagataṃ nāma. Bandhanattaṃ rūpassāti avinibbhogarūpassa bandhanabhāvo. Pittaṃ semhantiādīnipi vaṇṇasaṇṭhānadisokāsaparicchedavasena pariggahetvā dhātuvaseneva manasikātabbāni.
தத்ராயங் நயோ – பித்தேஸு ஹி அப³த்³த⁴பித்தங் ஜீவிதிந்த்³ரியபடிப³த்³த⁴ங் ஸகலஸரீரங் ப்³யாபெத்வா டி²தங், ப³த்³த⁴பித்தங் பித்தகோஸகே டி²தங். தத்த² யதா² பூவங் ப்³யாபெத்வா டி²தே தேலே ந பூவங் ஜானாதி ‘தேலங் மங் ப்³யாபெத்வா டி²த’ந்தி, நாபி தேலங் ஜானாதி ‘அஹங் பூவங் ப்³யாபெத்வா டி²த’ந்தி, ஏவமேவ ந ஸரீரங் ஜானாதி ‘அப³த்³த⁴பித்தங் மங் ப்³யாபெத்வா டி²த’ந்தி, நாபி அப³த்³த⁴பித்தங் ஜானாதி ‘அஹங் ஸரீரங் ப்³யாபெத்வா டி²த’ந்தி. யதா² ச வஸ்ஸோத³கேன புண்ணே கோஸாதகீகோஸகே ந கோஸாதகீகோஸகோ ஜானாதி ‘மயி வஸ்ஸோத³கங் டி²த’ந்தி, நாபி வஸ்ஸோத³கங் ஜானாதி ‘அஹங் கோஸாதகீகோஸகே டி²த’ந்தி, ஏவமேவ ந பித்தகோஸகோ ஜானாதி மயி ப³த்³த⁴பித்தங் டி²தந்தி, நாபி ப³த்³த⁴பித்தங் ஜானாதி ‘அஹங் பித்தகோஸகே டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி பித்தங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Tatrāyaṃ nayo – pittesu hi abaddhapittaṃ jīvitindriyapaṭibaddhaṃ sakalasarīraṃ byāpetvā ṭhitaṃ, baddhapittaṃ pittakosake ṭhitaṃ. Tattha yathā pūvaṃ byāpetvā ṭhite tele na pūvaṃ jānāti ‘telaṃ maṃ byāpetvā ṭhita’nti, nāpi telaṃ jānāti ‘ahaṃ pūvaṃ byāpetvā ṭhita’nti, evameva na sarīraṃ jānāti ‘abaddhapittaṃ maṃ byāpetvā ṭhita’nti, nāpi abaddhapittaṃ jānāti ‘ahaṃ sarīraṃ byāpetvā ṭhita’nti. Yathā ca vassodakena puṇṇe kosātakīkosake na kosātakīkosako jānāti ‘mayi vassodakaṃ ṭhita’nti, nāpi vassodakaṃ jānāti ‘ahaṃ kosātakīkosake ṭhita’nti, evameva na pittakosako jānāti mayi baddhapittaṃ ṭhitanti, nāpi baddhapittaṃ jānāti ‘ahaṃ pittakosake ṭhita’nti. Aññamaññaṃ ābhogapaccavekkhaṇarahitā ete dhammā. Iti pittaṃ nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
ஸெம்ஹங் ஏகபத்த²பூரப்பமாணங் உத³ரபடலே டி²தங். தத்த² யதா² உபரி ஸஞ்ஜாதபே²ணபடலாய சந்த³னிகாய ந சந்த³னிகா ஜானாதி ‘மயி பே²ணபடலங் டி²த’ந்தி, நாபி பே²ணபடலங் ஜானாதி ‘அஹங் சந்த³னிகாய டி²த’ந்தி, ஏவமேவ ந உத³ரபடலங் ஜானாதி ‘மயி ஸெம்ஹங் டி²த’ந்தி, நாபி ஸெம்ஹங் ஜானாதி ‘அஹங் உத³ரபடலே டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி ஸெம்ஹங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Semhaṃ ekapatthapūrappamāṇaṃ udarapaṭale ṭhitaṃ. Tattha yathā upari sañjātapheṇapaṭalāya candanikāya na candanikā jānāti ‘mayi pheṇapaṭalaṃ ṭhita’nti, nāpi pheṇapaṭalaṃ jānāti ‘ahaṃ candanikāya ṭhita’nti, evameva na udarapaṭalaṃ jānāti ‘mayi semhaṃ ṭhita’nti, nāpi semhaṃ jānāti ‘ahaṃ udarapaṭale ṭhita’nti. Aññamaññaṃ ābhogapaccavekkhaṇarahitā ete dhammā. Iti semhaṃ nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
புப்³போ³ அனிப³த்³தோ⁴காஸோ, யத்த² யத்தே²வ கா²ணுகண்டகப்பஹரணஅக்³கி³ஜாலாதீ³ஹி அபி⁴ஹடே ஸரீரப்பதே³ஸே லோஹிதங் ஸண்ட²ஹித்வா பச்சதி, க³ண்ட³பீளகாத³யோ வா உப்பஜ்ஜந்தி, தத்த² தத்தே²வ திட்ட²தி. தத்த² யதா² ப²ரஸுப்பஹாராதி³வஸேன பக்³க⁴ரிதனியாஸே ருக்கே² ந ருக்க²ஸ்ஸ ப²ரஸுப்பஹாராதி³ப்பதே³ஸா ஜானந்தி ‘அம்ஹேஸு நிய்யாஸோ டி²தோ’தி, நாபி நிய்யாஸோ ஜானாதி ‘அஹங் ருக்க²ஸ்ஸ ப²ரஸுப்பஹாராதி³ப்பதே³ஸேஸு டி²தோ’தி, ஏவமேவ ந ஸரீரஸ்ஸ கா²ணுகண்டகாதீ³ஹி அபி⁴ஹடப்பதே³ஸா ஜானந்தி ‘அம்ஹேஸு புப்³போ³ டி²தோ’தி, நாபி புப்³போ³ ஜானாதி ‘அஹங் தேஸு பதே³ஸேஸு டி²தோ’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி புப்³போ³ நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Pubbo anibaddhokāso, yattha yattheva khāṇukaṇṭakappaharaṇaaggijālādīhi abhihaṭe sarīrappadese lohitaṃ saṇṭhahitvā paccati, gaṇḍapīḷakādayo vā uppajjanti, tattha tattheva tiṭṭhati. Tattha yathā pharasuppahārādivasena paggharitaniyāse rukkhe na rukkhassa pharasuppahārādippadesā jānanti ‘amhesu niyyāso ṭhito’ti, nāpi niyyāso jānāti ‘ahaṃ rukkhassa pharasuppahārādippadesesu ṭhito’ti, evameva na sarīrassa khāṇukaṇṭakādīhi abhihaṭappadesā jānanti ‘amhesu pubbo ṭhito’ti, nāpi pubbo jānāti ‘ahaṃ tesu padesesu ṭhito’ti. Aññamaññaṃ ābhogapaccavekkhaṇarahitā ete dhammā. Iti pubbo nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
லோஹிதேஸு ஸங்ஸரணலோஹிதங் அப³த்³த⁴பித்தங் விய ஸகலஸரீரங் ப்³யாபெத்வா டி²தங். ஸன்னிசிதலோஹிதங் யகனட்டா²னஸ்ஸ ஹெட்டா²பா⁴க³ங் பூரெத்வா ஏகபத்தபூரணப்பமாணங் வக்கஹத³யயகனபப்பா²ஸானி தேமெந்தங் டி²தங். தத்த² ஸங்ஸரணலோஹிதே அப³த்³த⁴பித்தஸதி³ஸோவ வினிச்ச²யோ. இதரங் பன யதா² ஜஜ்ஜரகபாலட்டே² உத³கே ஹெட்டா² லெட்³டு³க²ண்டா³னி தேமயமானே ந லெட்³டு³க²ண்டா³னி ஜானந்தி ‘மயங் உத³கேன தேமியமானா டி²தா’தி, நாபி உத³கங் ஜானாதி ‘அஹங் லெட்³டு³க²ண்டா³னி தேமேமீ’தி, ஏவமேவ ந யகனஸ்ஸ ஹெட்டா²பா⁴க³ட்டா²னங் வக்காதீ³னி வா ஜானந்தி ‘மயி லோஹிதங் டி²தங், அம்ஹே வா தேமயமானங் டி²த’ந்தி, நாபி லோஹிதங் ஜானாதி ‘அஹங் யகனஸ்ஸ ஹெட்டா²பா⁴க³ங் பூரெத்வா வக்காதீ³னி தேமயமானங் டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி லோஹிதங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Lohitesu saṃsaraṇalohitaṃ abaddhapittaṃ viya sakalasarīraṃ byāpetvā ṭhitaṃ. Sannicitalohitaṃ yakanaṭṭhānassa heṭṭhābhāgaṃ pūretvā ekapattapūraṇappamāṇaṃ vakkahadayayakanapapphāsāni tementaṃ ṭhitaṃ. Tattha saṃsaraṇalohite abaddhapittasadisova vinicchayo. Itaraṃ pana yathā jajjarakapālaṭṭhe udake heṭṭhā leḍḍukhaṇḍāni temayamāne na leḍḍukhaṇḍāni jānanti ‘mayaṃ udakena temiyamānā ṭhitā’ti, nāpi udakaṃ jānāti ‘ahaṃ leḍḍukhaṇḍāni tememī’ti, evameva na yakanassa heṭṭhābhāgaṭṭhānaṃ vakkādīni vā jānanti ‘mayi lohitaṃ ṭhitaṃ, amhe vā temayamānaṃ ṭhita’nti, nāpi lohitaṃ jānāti ‘ahaṃ yakanassa heṭṭhābhāgaṃ pūretvā vakkādīni temayamānaṃ ṭhita’nti. Aññamaññaṃ ābhogapaccavekkhaṇarahitā ete dhammā. Iti lohitaṃ nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
ஸேதோ³ அக்³கி³ஸந்தாபாதி³காலேஸு கேஸலோமகூபவிவரானி பூரெத்வா திட்ட²தி சேவ பக்³க⁴ரதி ச. தத்த² யதா² உத³கா அப்³பூ³ள்ஹமத்தேஸு பி⁴ஸமுளாலகுமுத³னாளகலாபேஸு ந பி⁴ஸாதி³கலாபவிவரானி ஜானந்தி ‘அம்ஹேஹி உத³கங் பக்³க⁴ரதீ’தி, நாபி பி⁴ஸாதி³கலாபவிவரேஹி பக்³க⁴ரந்தங் உத³கங் ஜானாதி ‘அஹங் பி⁴ஸாதி³கலாபவிவரேஹி பக்³க⁴ராமீ’தி, ஏவமேவ ந கேஸலோமகூபவிவரானி ஜானந்தி ‘அம்ஹேஹி ஸேதோ³ பக்³க⁴ரதீ’தி, நாபி ஸேதோ³ ஜானாதி ‘அஹங் கேஸலோமகூபவிவரேஹி பக்³க⁴ராமீ’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி ஸேதோ³ நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Sedo aggisantāpādikālesu kesalomakūpavivarāni pūretvā tiṭṭhati ceva paggharati ca. Tattha yathā udakā abbūḷhamattesu bhisamuḷālakumudanāḷakalāpesu na bhisādikalāpavivarāni jānanti ‘amhehi udakaṃ paggharatī’ti, nāpi bhisādikalāpavivarehi paggharantaṃ udakaṃ jānāti ‘ahaṃ bhisādikalāpavivarehi paggharāmī’ti, evameva na kesalomakūpavivarāni jānanti ‘amhehi sedo paggharatī’ti, nāpi sedo jānāti ‘ahaṃ kesalomakūpavivarehi paggharāmī’ti. Aññamaññaṃ ābhogapaccavekkhaṇarahitā ete dhammā. Iti sedo nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
மேதோ³ தூ²லஸ்ஸ ஸகலஸரீரங் ப²ரித்வா கிஸஸ்ஸ ஜங்க⁴மங்ஸாதீ³னி நிஸ்ஸாய டி²தோ பத்தி²ன்னஸ்னேஹோ. தத்த² யதா² ஹலித்³தி³பிலோதிகபடிச்ச²ன்னே மங்ஸபுஞ்ஜே ந மங்ஸபுஞ்ஜோ ஜானாதி ‘மங் நிஸ்ஸாய ஹலித்³தி³பிலோதிகா டி²தா’தி, நாபி ஹலித்³தி³பிலோதிகா ஜானாதி ‘அஹங் மங்ஸபுஞ்ஜங் நிஸ்ஸாய டி²தா’தி, ஏவமேவ ந ஸகலஸரீரே ஜங்கா⁴தீ³ஸு வா மங்ஸங் ஜானாதி ‘மங் நிஸ்ஸாய மேதோ³ டி²தோ’தி, நாபி மேதோ³ ஜானாதி ‘அஹங் ஸகலஸரீரே ஜங்கா⁴தீ³ஸு வா மங்ஸங் நிஸ்ஸாய டி²தோ’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி மேதோ³ நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ பத்தி²ன்னஸ்னேஹோ பத்தி²ன்னயூஸபூ⁴தோ ஆப³ந்த⁴னாகாரோ ஆபோதா⁴தூதி.
Medo thūlassa sakalasarīraṃ pharitvā kisassa jaṅghamaṃsādīni nissāya ṭhito patthinnasneho. Tattha yathā haliddipilotikapaṭicchanne maṃsapuñje na maṃsapuñjo jānāti ‘maṃ nissāya haliddipilotikā ṭhitā’ti, nāpi haliddipilotikā jānāti ‘ahaṃ maṃsapuñjaṃ nissāya ṭhitā’ti, evameva na sakalasarīre jaṅghādīsu vā maṃsaṃ jānāti ‘maṃ nissāya medo ṭhito’ti, nāpi medo jānāti ‘ahaṃ sakalasarīre jaṅghādīsu vā maṃsaṃ nissāya ṭhito’ti. Aññamaññaṃ ābhogapaccavekkhaṇarahitā ete dhammā. Iti medo nāma imasmiṃ sarīre pāṭiyekko koṭṭhāso acetano abyākato suñño nissatto patthinnasneho patthinnayūsabhūto ābandhanākāro āpodhātūti.
அஸ்ஸு யதா³ ஸஞ்ஜாயதி ததா³ அக்கி²கூபகே பூரெத்வா திட்ட²தி வா பக்³க⁴ரதி வா. தத்த² யதா² உத³கபுண்ணேஸு தருணதாலட்டி²கூபகேஸு ந தருணதாலட்டி²கூபகா ஜானந்தி ‘அம்ஹேஸு உத³கங் டி²த’ந்தி, நாபி உத³கங் ஜானாதி ‘அஹங் தருணதாலட்டி²கூபகேஸு டி²த’ந்தி, ஏவமேவ ந அக்கி²கூபகா ஜானந்தி ‘அம்ஹேஸு அஸ்ஸு டி²த’ந்தி, நாபி அஸ்ஸு ஜானாதி ‘அஹங் அக்கி²கூபகேஸு டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி அஸ்ஸு நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Assu yadā sañjāyati tadā akkhikūpake pūretvā tiṭṭhati vā paggharati vā. Tattha yathā udakapuṇṇesu taruṇatālaṭṭhikūpakesu na taruṇatālaṭṭhikūpakā jānanti ‘amhesu udakaṃ ṭhita’nti, nāpi udakaṃ jānāti ‘ahaṃ taruṇatālaṭṭhikūpakesu ṭhita’nti, evameva na akkhikūpakā jānanti ‘amhesu assu ṭhita’nti, nāpi assu jānāti ‘ahaṃ akkhikūpakesu ṭhita’nti. Aññamaññaṃ ābhogapaccavekkhaṇarahitā ete dhammā. Iti assu nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
வஸா அக்³கி³ஸந்தாபாதி³காலே ஹத்த²தலஹத்த²பிட்டி²பாத³தலபாத³பிட்டி²னாஸபுடனலாடஅங்ஸகூடேஸு டி²தவிலீனஸ்னேஹோ. தத்த² யதா² பக்கி²த்ததேலே ஆசாமே ந ஆசாமோ ஜானாதி ‘மங் தேலங் அஜ்ஜொ²த்த²ரித்வா டி²த’ந்தி, நாபி தேலங் ஜானாதி ‘அஹங் ஆசாமங் அஜ்ஜொ²த்த²ரித்வா டி²த’ந்தி, ஏவமேவ ந ஹத்த²தலாதி³ப்பதே³ஸோ ஜானாதி ‘மங் வஸா அஜ்ஜொ²த்த²ரித்வா டி²தா’தி, நாபி வஸா ஜானாதி ‘அஹங் ஹத்த²தலாதி³ப்பதே³ஸே அஜ்ஜொ²த்த²ரித்வா டி²தா’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி வஸா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Vasā aggisantāpādikāle hatthatalahatthapiṭṭhipādatalapādapiṭṭhināsapuṭanalāṭaaṃsakūṭesu ṭhitavilīnasneho. Tattha yathā pakkhittatele ācāme na ācāmo jānāti ‘maṃ telaṃ ajjhottharitvā ṭhita’nti, nāpi telaṃ jānāti ‘ahaṃ ācāmaṃ ajjhottharitvā ṭhita’nti, evameva na hatthatalādippadeso jānāti ‘maṃ vasā ajjhottharitvā ṭhitā’ti, nāpi vasā jānāti ‘ahaṃ hatthatalādippadese ajjhottharitvā ṭhitā’ti. Aññamaññaṃ ābhogapaccavekkhaṇarahitā ete dhammā. Iti vasā nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
கே²ளோ ததா²ரூபே கே²ளுப்பத்திபச்சயே ஸதி உபோ⁴ஹி கபோலபஸ்ஸேஹி ஓரோஹித்வா ஜிவ்ஹாய திட்ட²தி. தத்த² யதா² அப்³பொ³ச்சி²ன்னஉத³கனிஸ்ஸந்தே³ நதீ³தீரகூபகே ந கூபதலங் ஜானாதி ‘மயி உத³கங் ஸந்திட்ட²தீ’தி, நாபி உத³கங் ஜானாதி ‘அஹங் கூபதலே ஸந்திட்டா²மீ’தி , ஏவமேவ ந ஜிவ்ஹாதலங் ஜானாதி ‘மயி உபோ⁴ஹி கபோலபஸ்ஸேஹி ஓரோஹித்வா கே²ளோ டி²தோ’தி, நாபி கே²ளோ ஜானாதி ‘அஹங் உபோ⁴ஹி கபோலபஸ்ஸேஹி ஓரோஹித்வா ஜிவ்ஹாதலே டி²தோ’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி கே²ளோ நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Kheḷo tathārūpe kheḷuppattipaccaye sati ubhohi kapolapassehi orohitvā jivhāya tiṭṭhati. Tattha yathā abbocchinnaudakanissande nadītīrakūpake na kūpatalaṃ jānāti ‘mayi udakaṃ santiṭṭhatī’ti, nāpi udakaṃ jānāti ‘ahaṃ kūpatale santiṭṭhāmī’ti , evameva na jivhātalaṃ jānāti ‘mayi ubhohi kapolapassehi orohitvā kheḷo ṭhito’ti, nāpi kheḷo jānāti ‘ahaṃ ubhohi kapolapassehi orohitvā jivhātale ṭhito’ti. Aññamaññaṃ ābhogapaccavekkhaṇarahitā ete dhammā. Iti kheḷo nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
ஸிங்கா⁴ணிகா யதா³ ஸஞ்ஜாயதி ததா³ நாஸாபுடே பூரெத்வா திட்ட²தி வா பக்³க⁴ரதி வா. தத்த² யதா² பூதித³தி⁴ப⁴ரிதாய ஸிப்பிகாய ந ஸிப்பிகா ஜானாதி ‘மயி பூதித³தி⁴ டி²த’ந்தி, நாபி பூதித³தி⁴ ஜானாதி ‘அஹங் ஸிப்பிகாய டி²த’ந்தி, ஏவமேவ ந நாஸாபுடா ஜானந்தி ‘அம்ஹேஸு ஸிங்கா⁴ணிகா டி²தா’தி, நாபி ஸிங்கா⁴ணிகா ஜானாதி ‘அஹங் நாஸாபுடேஸு டி²தா’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி ஸிங்கா⁴ணிகா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Siṅghāṇikā yadā sañjāyati tadā nāsāpuṭe pūretvā tiṭṭhati vā paggharati vā. Tattha yathā pūtidadhibharitāya sippikāya na sippikā jānāti ‘mayi pūtidadhi ṭhita’nti, nāpi pūtidadhi jānāti ‘ahaṃ sippikāya ṭhita’nti, evameva na nāsāpuṭā jānanti ‘amhesu siṅghāṇikā ṭhitā’ti, nāpi siṅghāṇikā jānāti ‘ahaṃ nāsāpuṭesu ṭhitā’ti. Aññamaññaṃ ābhogapaccavekkhaṇarahitā ete dhammā. Iti siṅghāṇikā nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
லஸிகா அட்டி²கஸந்தீ⁴னங் அப்³ப⁴ஞ்ஜனகிச்சங் ஸாத⁴யமானா அஸீதிஸதஸந்தீ⁴ஸு டி²தா. தத்த² யதா² தேலப்³ப⁴ஞ்ஜிதே அக்கே² ந அக்கோ² ஜானாதி ‘மங் தேலங் அப்³ப⁴ஞ்ஜித்வா டி²த’ந்தி, நாபி தேலங் ஜானாதி ‘அஹங் அக்க²ங் அப்³ப⁴ஞ்ஜித்வா டி²த’ந்தி, ஏவமேவ ந அஸீதிஸதஸந்த⁴யோ ஜானந்தி ‘லஸிகா அம்ஹே அப்³ப⁴ஞ்ஜித்வா டி²தா’தி, நாபி லஸிகா ஜானாதி ‘அஹங் அஸீதிஸதஸந்த⁴யோ அப்³ப⁴ஞ்ஜித்வா டி²தா’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி லஸிகா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி.
Lasikā aṭṭhikasandhīnaṃ abbhañjanakiccaṃ sādhayamānā asītisatasandhīsu ṭhitā. Tattha yathā telabbhañjite akkhe na akkho jānāti ‘maṃ telaṃ abbhañjitvā ṭhita’nti, nāpi telaṃ jānāti ‘ahaṃ akkhaṃ abbhañjitvā ṭhita’nti, evameva na asītisatasandhayo jānanti ‘lasikā amhe abbhañjitvā ṭhitā’ti, nāpi lasikā jānāti ‘ahaṃ asītisatasandhayo abbhañjitvā ṭhitā’ti. Aññamaññaṃ ābhogapaccavekkhaṇarahitā ete dhammā. Iti lasikā nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti.
முத்தங் வத்தி²ஸ்ஸ அப்³ப⁴ந்தரே டி²தங். தத்த² யதா² சந்த³னிகாய பக்கி²த்தே அதோ⁴முகே² ரவணக⁴டே ந ரவணக⁴டோ ஜானாதி ‘மயி சந்த³னிகாரஸோ டி²தோ’தி, நாபி சந்த³னிகாரஸோ ஜானாதி ‘அஹங் ரவணக⁴டே டி²தோ’தி, ஏவமேவ ந வத்தி² ஜானாதி ‘மயி முத்தங் டி²த’ந்தி, நாபி முத்தங் ஜானாதி ‘அஹங் வத்தி²ம்ஹி டி²த’ந்தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி முத்தங் நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ யூஸபூ⁴தோ ஆப³ந்த⁴னாகாரோ ஆபோதா⁴தூதி. யங் வா பனாதி அவஸேஸேஸு தீஸு கொட்டா²ஸேஸு ஆபோதா⁴துங் ஸந்தா⁴ய வுத்தங்.
Muttaṃ vatthissa abbhantare ṭhitaṃ. Tattha yathā candanikāya pakkhitte adhomukhe ravaṇaghaṭe na ravaṇaghaṭo jānāti ‘mayi candanikāraso ṭhito’ti, nāpi candanikāraso jānāti ‘ahaṃ ravaṇaghaṭe ṭhito’ti, evameva na vatthi jānāti ‘mayi muttaṃ ṭhita’nti, nāpi muttaṃ jānāti ‘ahaṃ vatthimhi ṭhita’nti. Aññamaññaṃ ābhogapaccavekkhaṇarahitā ete dhammā. Iti muttaṃ nāma imasmiṃ sarīre pāṭiyekko koṭṭhāso acetano abyākato suñño nissatto yūsabhūto ābandhanākāro āpodhātūti. Yaṃ vā panāti avasesesu tīsu koṭṭhāsesu āpodhātuṃ sandhāya vuttaṃ.
பா³ஹிரஆபோதா⁴துநித்³தே³ஸே மூலங் படிச்ச நிப்³ப³த்தோ ரஸோ மூலரஸோ நாம. க²ந்த⁴ரஸாதீ³ஸுபி ஏஸேவ நயோ. கீ²ராதீ³னி பாகடானேவ. யதா² பன பே⁴ஸஜ்ஜஸிக்கா²பதே³ ஏவமித⁴ நியமோ நத்தி². யங் கிஞ்சி கீ²ரங் கீ²ரமேவ. ஸேஸேஸுபி ஏஸேவ நயோ. பு⁴ம்மானீதி ஆவாடாதீ³ஸு டி²தஉத³கானி. அந்தலிக்கா²னீதி பத²விங் அப்பத்தானி வஸ்ஸோத³கானி. யங் வா பனாதி ஹிமோத³ககப்பவினாஸகஉத³கபத²வீஸந்தா⁴ரகஉத³காதீ³னி இத⁴ யேவாபனகட்டா²னங் பவிட்டா²னி.
Bāhiraāpodhātuniddese mūlaṃ paṭicca nibbatto raso mūlaraso nāma. Khandharasādīsupi eseva nayo. Khīrādīni pākaṭāneva. Yathā pana bhesajjasikkhāpade evamidha niyamo natthi. Yaṃ kiñci khīraṃ khīrameva. Sesesupi eseva nayo. Bhummānīti āvāṭādīsu ṭhitaudakāni. Antalikkhānīti pathaviṃ appattāni vassodakāni. Yaṃ vā panāti himodakakappavināsakaudakapathavīsandhārakaudakādīni idha yevāpanakaṭṭhānaṃ paviṭṭhāni.
175. தேஜோதா⁴துநித்³தே³ஸே தேஜனவஸேன தேஜோ. தேஜோவ தேஜோபா⁴வங் க³தத்தா தேஜோக³தங். உஸ்மாதி உண்ஹாகாரோ. உஸ்மாவ உஸ்மாபா⁴வங் க³தத்தா உஸ்மாக³தங். உஸுமந்தி சண்ட³உஸுமங். ததே³வ உஸுமபா⁴வங் க³தத்தா உஸுமக³தங். யேன சாதி யேன தேஜோக³தேன குப்பிதேன. ஸந்தப்பதீதி அயங் காயோ ஸந்தப்பதி, ஏகாஹிகஜராதி³பா⁴வேன உஸுமஜாதோ ஹோதி. யேன ச ஜீரீயதீதி யேன அயங் காயோ ஜீரீயதி, இந்த்³ரியவேகல்லதங் ப³லபரிக்க²யங் வலிபலிதாதி³பா⁴வஞ்ச பாபுணாதி. யேன ச பரிட³ய்ஹதீதி யேன குப்பிதேன அயங் காயோ ட³ய்ஹதி, ஸோ ச புக்³க³லோ ‘ட³ய்ஹாமி ட³ய்ஹாமீ’தி கந்த³ந்தோ ஸததோ⁴தஸப்பிகோ³ஸீதசந்த³னாதி³லேபனஞ்சேவ தாலவண்டவாதஞ்ச பச்சாஸீஸதி. யேன ச அஸிதபீதகா²யிதஸாயிதங் ஸம்மா பரிணாமங் க³ச்ச²தீதி யேனேதங் அஸிதங் வா ஓத³னாதி³, பீதங் வா பானகாதி³, கா²யிதங் வா பிட்ட²க²ஜ்ஜகாதி³, ஸாயிதங் வா அம்ப³பக்கமது⁴பா²ணிதாதி³ ஸம்மா பரிபாகங் க³ச்ச²தி, ரஸாதி³பா⁴வேன விவேகங் க³ச்ச²தீதி அத்தோ². எத்த² ச புரிமா தயோ தேஜோதா⁴தூ சதுஸமுட்டா²னா, பச்சி²மோ கம்மஸமுட்டா²னோவ. அயங் தாவெத்த² பத³ஸங்வண்ணனா.
175. Tejodhātuniddese tejanavasena tejo. Tejova tejobhāvaṃ gatattā tejogataṃ. Usmāti uṇhākāro. Usmāva usmābhāvaṃ gatattā usmāgataṃ. Usumanti caṇḍausumaṃ. Tadeva usumabhāvaṃ gatattā usumagataṃ. Yena cāti yena tejogatena kuppitena. Santappatīti ayaṃ kāyo santappati, ekāhikajarādibhāvena usumajāto hoti. Yena ca jīrīyatīti yena ayaṃ kāyo jīrīyati, indriyavekallataṃ balaparikkhayaṃ valipalitādibhāvañca pāpuṇāti. Yena ca pariḍayhatīti yena kuppitena ayaṃ kāyo ḍayhati, so ca puggalo ‘ḍayhāmi ḍayhāmī’ti kandanto satadhotasappigosītacandanādilepanañceva tālavaṇṭavātañca paccāsīsati. Yena ca asitapītakhāyitasāyitaṃ sammā pariṇāmaṃ gacchatīti yenetaṃ asitaṃ vā odanādi, pītaṃ vā pānakādi, khāyitaṃ vā piṭṭhakhajjakādi, sāyitaṃ vā ambapakkamadhuphāṇitādi sammā paripākaṃ gacchati, rasādibhāvena vivekaṃ gacchatīti attho. Ettha ca purimā tayo tejodhātū catusamuṭṭhānā, pacchimo kammasamuṭṭhānova. Ayaṃ tāvettha padasaṃvaṇṇanā.
இத³ங் பன மனஸிகாரவிதா⁴னங் – இத⁴ பி⁴க்கு² ‘யேன ஸந்தப்பதி, அயங் இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ பரிபாசனாகாரோ தேஜோதா⁴தூ’தி மனஸி கரோதி; ‘யேன ஜீரீயதி, யேன பரிட³ய்ஹதி, யேன அஸிதபீதகா²யிதஸாயிதங் ஸம்மா பரிணாமங் க³ச்ச²தி, அயங் இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ பரிபாசனாகாரோ தேஜோதா⁴தூ’தி மனஸி கரோதி. யங் வா பனாதி இமஸ்மிங் ஸரீரே பாகதிகோ ஏகோ உது அத்தி², ஸோ யேவாபனகட்டா²னங் பவிட்டோ².
Idaṃ pana manasikāravidhānaṃ – idha bhikkhu ‘yena santappati, ayaṃ imasmiṃ sarīre pāṭiyekko koṭṭhāso acetano abyākato suñño nissatto paripācanākāro tejodhātū’ti manasi karoti; ‘yena jīrīyati, yena pariḍayhati, yena asitapītakhāyitasāyitaṃ sammā pariṇāmaṃ gacchati, ayaṃ imasmiṃ sarīre pāṭiyekko koṭṭhāso acetano abyākato suñño nissatto paripācanākāro tejodhātū’ti manasi karoti. Yaṃ vā panāti imasmiṃ sarīre pākatiko eko utu atthi, so yevāpanakaṭṭhānaṃ paviṭṭho.
பா³ஹிரதேஜோதா⁴துநித்³தே³ஸே கட்ட²ங் படிச்ச பஜ்ஜலிதோ கட்டு²பாதா³னோ அக்³கி³ கட்ட²க்³கி³ நாம. ஸகலிகக்³கி³ஆதீ³ஸுபி ஏஸேவ நயோ. ஸங்காரக்³கீ³தி கசவரங் ஸங்கட்³டி⁴த்வா ஜாலாபிதோ கசவரக்³கி³. இந்த³க்³கீ³தி அஸனிஅக்³கி³. அக்³கி³ஸந்தாபோதி ஜாலாய வா வீதச்சிகங்கா³ரானங் வா ஸந்தாபோ. ஸூரியஸந்தாபோதி ஆதபோ. கட்ட²ஸன்னிசயஸந்தாபோதி கட்ட²ராஸிட்டா²னே ஸந்தாபோ. ஸேஸேஸுபி ஏஸேவ நயோ. யங் வா பனாதி பேதக்³கி³ கப்பவினாஸக்³கி³ நிரயக்³கி³ஆத³யோ இத⁴ யேவாபனகட்டா²னங் பவிட்டா².
Bāhiratejodhātuniddese kaṭṭhaṃ paṭicca pajjalito kaṭṭhupādāno aggi kaṭṭhaggi nāma. Sakalikaggiādīsupi eseva nayo. Saṅkāraggīti kacavaraṃ saṃkaḍḍhitvā jālāpito kacavaraggi. Indaggīti asaniaggi. Aggisantāpoti jālāya vā vītaccikaṅgārānaṃ vā santāpo. Sūriyasantāpoti ātapo. Kaṭṭhasannicayasantāpoti kaṭṭharāsiṭṭhāne santāpo. Sesesupi eseva nayo. Yaṃ vā panāti petaggi kappavināsaggi nirayaggiādayo idha yevāpanakaṭṭhānaṃ paviṭṭhā.
176. வாயோதா⁴துநித்³தே³ஸே வாயனவஸேன வாயோ. வாயோவ வாயோபா⁴வங் க³தத்தா வாயோக³தங். த²ம்பி⁴தத்தங் ரூபஸ்ஸாதி அவினிப்³போ⁴க³ரூபஸ்ஸ த²ம்பி⁴தபா⁴வோ. உத்³த⁴ங்க³மா வாதாதி உக்³கா³ரஹிக்காதி³ பவத்தகா உத்³த⁴ங் ஆரோஹனவாதா . அதோ⁴க³மா வாதாதி உச்சாரபஸ்ஸாவாதி³னீஹரணகா அதோ⁴ ஓரோஹனவாதா. குச்சி²ஸயா வாதாதி அந்தானங் ப³ஹிவாதா. கொட்டா²ஸயா வாதாதி அந்தானங் அந்தோவாதா. அங்க³மங்கா³னுஸாரினோ வாதாதி த⁴மனிஜாலானுஸாரேன ஸகலஸரீரே அங்க³மங்கா³னி அனுஸடா ஸமிஞ்ஜனபஸாரணாதி³னிப்³ப³த்தகா வாதா. ஸத்த²கவாதாதி ஸந்தி⁴ப³ந்த⁴னானி கத்தரியா சி²ந்த³ந்தா விய பவத்தவாதா. கு²ரகவாதாதி கு²ரேன விய ஹத³யங் பா²லனவாதா. உப்பலகவாதாதி ஹத³யமங்ஸமேவ உப்பாடனகவாதா. அஸ்ஸாஸோதி அந்தோபவிஸனநாஸிகாவதோ. பஸ்ஸாஸோதி ப³ஹினிக்க²மனநாஸிகாவதோ. எத்த² ச புரிமா ஸப்³பே³ சதுஸமுட்டா²னா, அஸ்ஸாஸபஸ்ஸாஸா சித்தஸமுட்டா²னாவ. அயமெத்த² பத³வண்ணனா.
176. Vāyodhātuniddese vāyanavasena vāyo. Vāyova vāyobhāvaṃ gatattā vāyogataṃ. Thambhitattaṃ rūpassāti avinibbhogarūpassa thambhitabhāvo. Uddhaṅgamā vātāti uggārahikkādi pavattakā uddhaṃ ārohanavātā . Adhogamā vātāti uccārapassāvādinīharaṇakā adho orohanavātā. Kucchisayā vātāti antānaṃ bahivātā. Koṭṭhāsayā vātāti antānaṃ antovātā. Aṅgamaṅgānusārino vātāti dhamanijālānusārena sakalasarīre aṅgamaṅgāni anusaṭā samiñjanapasāraṇādinibbattakā vātā. Satthakavātāti sandhibandhanāni kattariyā chindantā viya pavattavātā. Khurakavātāti khurena viya hadayaṃ phālanavātā. Uppalakavātāti hadayamaṃsameva uppāṭanakavātā. Assāsoti antopavisananāsikāvato. Passāsoti bahinikkhamananāsikāvato. Ettha ca purimā sabbe catusamuṭṭhānā, assāsapassāsā cittasamuṭṭhānāva. Ayamettha padavaṇṇanā.
இத³ங் பன மனஸிகாரவிதா⁴னங் – இத⁴ பி⁴க்கு² உத்³த⁴ங்க³மாதி³பே⁴தே³ வாதே உத்³த⁴ங்க³மாதி³வஸேன பரிக்³க³ஹெத்வா ‘உத்³த⁴ங்க³மா வாதா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ வித்த²ம்ப⁴னாகாரோ வாயோதா⁴தூ’தி மனஸி கரோதி. ஸேஸேஸுபி ஏஸேவ நயோ. யங் வா பனாதி ஸேஸே வாயோகொட்டா²ஸே அனுக³தா வாதா இத⁴ யேவாபனகட்டா²னங் பவிட்டா².
Idaṃ pana manasikāravidhānaṃ – idha bhikkhu uddhaṅgamādibhede vāte uddhaṅgamādivasena pariggahetvā ‘uddhaṅgamā vātā nāma imasmiṃ sarīre pāṭiyekko koṭṭhāso acetano abyākato suñño nissatto vitthambhanākāro vāyodhātū’ti manasi karoti. Sesesupi eseva nayo. Yaṃ vā panāti sese vāyokoṭṭhāse anugatā vātā idha yevāpanakaṭṭhānaṃ paviṭṭhā.
பா³ஹிரவாயோதா⁴துநித்³தே³ஸே புரத்தி²மா வாதாதி புரத்தி²மதி³ஸதோ ஆக³தா வாதா. பச்சி²முத்தரத³க்கி²ணேஸுபி ஏஸேவ நயோ. ஸரஜா வாதாதி ஸஹ ரஜேன ஸரஜா. அரஜா வாதாதி ரஜவிரஹிதா ஸுத்³தா⁴ அரஜா நாம. ஸீதாதி ஸீதஉதுஸமுட்டா²னா ஸீதவலாஹகந்தரே ஸமுட்டி²தா. உண்ஹாதி உண்ஹஉதுஸமுட்டா²னா உண்ஹவலாஹகந்தரே ஸமுட்டி²தா. பரித்தாதி மந்தா³ தனுகவாதா. அதி⁴மத்தாதி ப³லவவாதா. காளாதி காளவலாஹகந்தரே ஸமுட்டி²தா, யேஹி அப்³பா⁴ஹதோ ச²விவண்ணோ காளகோ ஹோதி. தேஸங் ஏதங் அதி⁴வசனந்திபி ஏகே. வேரம்ப⁴வாதாதி யோஜனதோ உபரி வாயனவாதா. பக்க²வாதாதி அந்தமஸோ மக்கி²காயபி பக்கா²யூஹனஸமுட்டி²தா வாதா. ஸுபண்ணவாதாதி க³ருளவாதா. காமஞ்ச இமேபி பக்க²வாதாவ உஸ்ஸத³வஸேன பன விஸுங் க³ஹிதா. தாலவண்டவாதாதி தாலபண்ணேஹி வா அஞ்ஞேன வா கேனசி மண்ட³லஸண்டா²னேன ஸமுட்டா²பிதா வாதா. விதூ⁴பனவாதாதி பீ³ஜனபத்தகேன ஸமுட்டா²பிதா வாதா. இமானி ச தாலவண்டவிதூ⁴பனானி அனுப்பன்னம்பி வாதங் உப்பாதெ³ந்தி, உப்பன்னம்பி பரிவத்தெந்தி. யங் வா பனாதி இத⁴ பாளிஆக³தே ட²பெத்வா ஸேஸவாதா யேவாபனகட்டா²னங் பவிட்டா².
Bāhiravāyodhātuniddese puratthimā vātāti puratthimadisato āgatā vātā. Pacchimuttaradakkhiṇesupi eseva nayo. Sarajā vātāti saha rajena sarajā. Arajā vātāti rajavirahitā suddhā arajā nāma. Sītāti sītautusamuṭṭhānā sītavalāhakantare samuṭṭhitā. Uṇhāti uṇhautusamuṭṭhānā uṇhavalāhakantare samuṭṭhitā. Parittāti mandā tanukavātā. Adhimattāti balavavātā. Kāḷāti kāḷavalāhakantare samuṭṭhitā, yehi abbhāhato chavivaṇṇo kāḷako hoti. Tesaṃ etaṃ adhivacanantipi eke. Verambhavātāti yojanato upari vāyanavātā. Pakkhavātāti antamaso makkhikāyapi pakkhāyūhanasamuṭṭhitā vātā. Supaṇṇavātāti garuḷavātā. Kāmañca imepi pakkhavātāva ussadavasena pana visuṃ gahitā. Tālavaṇṭavātāti tālapaṇṇehi vā aññena vā kenaci maṇḍalasaṇṭhānena samuṭṭhāpitā vātā. Vidhūpanavātāti bījanapattakena samuṭṭhāpitā vātā. Imāni ca tālavaṇṭavidhūpanāni anuppannampi vātaṃ uppādenti, uppannampi parivattenti. Yaṃ vā panāti idha pāḷiāgate ṭhapetvā sesavātā yevāpanakaṭṭhānaṃ paviṭṭhā.
177. ஆகாஸதா⁴துநித்³தே³ஸே அப்படிக⁴ட்டனட்டே²ன ந கஸ்ஸதீதி ஆகாஸோ. ஆகாஸோவ ஆகாஸபா⁴வங் க³தத்தா ஆகாஸக³தங். அக⁴ட்டனீயதாய அக⁴ங். அக⁴மேவ அக⁴பா⁴வங் க³தத்தா அக⁴க³தங் . விவரோதி அந்தரங். ததே³வ விவரபா⁴வங் க³தத்தா விவரக³தங். அஸம்பு²ட்ட²ங் மங்ஸலோஹிதேஹீதி மங்ஸலோஹிதேஹி நிஸ்ஸடங். கண்ணச்சி²த்³த³ந்திஆதி³ பன தஸ்ஸேவ பபே⁴த³த³ஸ்ஸனங். தத்த² கண்ணச்சி²த்³த³ந்தி கண்ணஸ்மிங் சி²த்³த³ங் விவரங் மங்ஸலோஹிதேஹி அஸம்பு²ட்டோ²காஸோ. ஸேஸேஸுபி ஏஸேவ நயோ. யேனாதி யேன விவரேன ஏதங் அஸிதாதி³பே⁴த³ங் அஜ்ஜோ²ஹரணீயங் அஜ்ஜோ²ஹரதி, அந்தோ பவேஸேதி. யத்தா²தி யஸ்மிங் அந்தோஉத³ரபடலஸங்கா²தே ஓகாஸே ஏததே³வ சதுப்³பி³த⁴ங் அஜ்ஜோ²ஹரணீயங் திட்ட²தி. யேனாதி யேன விவரேன ஸப்³ப³ம்பேதங் விபக்கங் கஸடபா⁴வங் ஆபன்னங் நிக்க²மதி, தங் உத³ரபடலதோ யாவ கரீஸமக்³கா³ வித³த்தி²சதுரங்கு³லமத்தங் சி²த்³த³ங் மங்ஸலோஹிதேஹி அஸம்பு²ட்ட²ங் நிஸ்ஸடங் ஆகாஸதா⁴தூதி வேதி³தப்³ப³ங். யங் வா பனாதி எத்த² சம்மந்தரங் மங்ஸந்தரங் ந்ஹாருந்தரங் அட்டி²ந்தரங் லோமந்தரந்தி இத³ங் ஸப்³ப³ங் யேவாபனகட்டா²னங் பவிட்ட²ங்.
177. Ākāsadhātuniddese appaṭighaṭṭanaṭṭhena na kassatīti ākāso. Ākāsova ākāsabhāvaṃ gatattā ākāsagataṃ. Aghaṭṭanīyatāya aghaṃ. Aghameva aghabhāvaṃ gatattā aghagataṃ. Vivaroti antaraṃ. Tadeva vivarabhāvaṃ gatattā vivaragataṃ. Asamphuṭṭhaṃ maṃsalohitehīti maṃsalohitehi nissaṭaṃ. Kaṇṇacchiddantiādi pana tasseva pabhedadassanaṃ. Tattha kaṇṇacchiddanti kaṇṇasmiṃ chiddaṃ vivaraṃ maṃsalohitehi asamphuṭṭhokāso. Sesesupi eseva nayo. Yenāti yena vivarena etaṃ asitādibhedaṃ ajjhoharaṇīyaṃ ajjhoharati, anto paveseti. Yatthāti yasmiṃ antoudarapaṭalasaṅkhāte okāse etadeva catubbidhaṃ ajjhoharaṇīyaṃ tiṭṭhati. Yenāti yena vivarena sabbampetaṃ vipakkaṃ kasaṭabhāvaṃ āpannaṃ nikkhamati, taṃ udarapaṭalato yāva karīsamaggā vidatthicaturaṅgulamattaṃ chiddaṃ maṃsalohitehi asamphuṭṭhaṃ nissaṭaṃ ākāsadhātūti veditabbaṃ. Yaṃ vā panāti ettha cammantaraṃ maṃsantaraṃ nhāruntaraṃ aṭṭhintaraṃ lomantaranti idaṃ sabbaṃ yevāpanakaṭṭhānaṃ paviṭṭhaṃ.
பா³ஹிரகஆகாஸதா⁴துநித்³தே³ஸே அஸம்பு²ட்ட²ங் சதூஹி மஹாபூ⁴தேஹீதி சதூஹி மஹாபூ⁴தேஹி நிஸ்ஸடங் பி⁴த்திசி²த்³த³கவாடசி²த்³தா³தி³கங் வேதி³தப்³ப³ங். இமினா யஸ்மிங் ஆகாஸே பரிகம்மங் கரொந்தஸ்ஸ சதுக்கபஞ்சகஜ்ஜா²னானி உப்பஜ்ஜந்தி தங் கதி²தங்.
Bāhirakaākāsadhātuniddese asamphuṭṭhaṃ catūhi mahābhūtehīti catūhi mahābhūtehi nissaṭaṃ bhittichiddakavāṭachiddādikaṃ veditabbaṃ. Iminā yasmiṃ ākāse parikammaṃ karontassa catukkapañcakajjhānāni uppajjanti taṃ kathitaṃ.
178. விஞ்ஞாணதா⁴துநித்³தே³ஸே சக்கு²விஞ்ஞாணஸங்கா²தா தா⁴து சக்கு²விஞ்ஞாணதா⁴து. ஸேஸாஸுபி ஏஸேவ நயோ. இதி இமாஸு ச²ஸு தா⁴தூஸு பரிக்³க³ஹிதாஸு அட்டா²ரஸ தா⁴துயோ பரிக்³க³ஹிதாவ ஹொந்தி. கத²ங்? பத²வீதேஜோவாயோதா⁴துக்³க³ஹணேன தாவ பொ²ட்ட²ப்³ப³தா⁴து க³ஹிதாவ ஹோதி, ஆபோதா⁴துஆகாஸதா⁴துக்³க³ஹணேன த⁴ம்மதா⁴து, விஞ்ஞாணதா⁴துக்³க³ஹணேன தஸ்ஸா புரேசாரிகபச்சா²சாரிகத்தா மனோதா⁴து க³ஹிதாவ ஹோதி. சக்கு²விஞ்ஞாணதா⁴துஆத³யோ ஸுத்தே ஆக³தா ஏவ. ஸேஸா நவ ஆஹரித்வா த³ஸ்ஸேதப்³பா³ . சக்கு²விஞ்ஞாணதா⁴துக்³க³ஹணேன ஹி தஸ்ஸா நிஸ்ஸயபூ⁴தா சக்கு²தா⁴து, ஆரம்மணபூ⁴தா ரூபதா⁴து ச க³ஹிதாவ ஹொந்தி. ஏவங் ஸோதவிஞ்ஞாணதா⁴துஆதி³க்³க³ஹணேன ஸோததா⁴துஆத³யோதி அட்டா²ரஸாபி க³ஹிதாவ ஹொந்தி. தாஸு த³ஸஹி தா⁴தூஹி ரூபபரிக்³க³ஹோ கதி²தோ ஹோதி. ஸத்தஹி அரூபபரிக்³க³ஹோ. த⁴ம்மதா⁴துயா ஸியா ரூபபரிக்³க³ஹோ, ஸியா அரூபபரிக்³க³ஹோ. இதி அட்³டே⁴காத³ஸஹி தா⁴தூஹி ரூபபரிக்³க³ஹோ, அட்³ட⁴ட்ட²தா⁴தூஹி அரூபபரிக்³க³ஹோதி ரூபாரூபபரிக்³க³ஹோ கதி²தோ ஹோதி. ரூபாரூபங் பஞ்சக்க²ந்தா⁴. தங் ஹோதி து³க்க²ஸச்சங். தங்ஸமுட்டா²பிகா புரிமதண்ஹா ஸமுத³யஸச்சங் . உபி⁴ன்னங் அப்பவத்தி நிரோத⁴ஸச்சங். தங்பஜானநோ மக்³கோ³ மக்³க³ஸச்சந்தி இத³ங் சதுஸச்சகம்மட்டா²னங் அட்டா²ரஸதா⁴துவஸேன அபி⁴னிவிட்ட²ஸ்ஸ பி⁴க்கு²னோ யாவ அரஹத்தா மத்த²கங் பாபெத்வா நிக³மனங் கதி²தந்தி வேதி³தப்³ப³ங்.
178. Viññāṇadhātuniddese cakkhuviññāṇasaṅkhātā dhātu cakkhuviññāṇadhātu. Sesāsupi eseva nayo. Iti imāsu chasu dhātūsu pariggahitāsu aṭṭhārasa dhātuyo pariggahitāva honti. Kathaṃ? Pathavītejovāyodhātuggahaṇena tāva phoṭṭhabbadhātu gahitāva hoti, āpodhātuākāsadhātuggahaṇena dhammadhātu, viññāṇadhātuggahaṇena tassā purecārikapacchācārikattā manodhātu gahitāva hoti. Cakkhuviññāṇadhātuādayo sutte āgatā eva. Sesā nava āharitvā dassetabbā . Cakkhuviññāṇadhātuggahaṇena hi tassā nissayabhūtā cakkhudhātu, ārammaṇabhūtā rūpadhātu ca gahitāva honti. Evaṃ sotaviññāṇadhātuādiggahaṇena sotadhātuādayoti aṭṭhārasāpi gahitāva honti. Tāsu dasahi dhātūhi rūpapariggaho kathito hoti. Sattahi arūpapariggaho. Dhammadhātuyā siyā rūpapariggaho, siyā arūpapariggaho. Iti aḍḍhekādasahi dhātūhi rūpapariggaho, aḍḍhaṭṭhadhātūhi arūpapariggahoti rūpārūpapariggaho kathito hoti. Rūpārūpaṃ pañcakkhandhā. Taṃ hoti dukkhasaccaṃ. Taṃsamuṭṭhāpikā purimataṇhā samudayasaccaṃ . Ubhinnaṃ appavatti nirodhasaccaṃ. Taṃpajānano maggo maggasaccanti idaṃ catusaccakammaṭṭhānaṃ aṭṭhārasadhātuvasena abhiniviṭṭhassa bhikkhuno yāva arahattā matthakaṃ pāpetvā nigamanaṃ kathitanti veditabbaṃ.
179. இதா³னி து³தியச²க்கங் த³ஸ்ஸெந்தோ அபராபி ச² தா⁴துயோதிஆதி³மாஹ. தத்த² ஸுக²தா⁴து து³க்க²தா⁴தூதி காயப்பஸாத³வத்து²கானி ஸுக²து³க்கா²னி ஸப்படிபக்க²வஸேன யுக³ளகதோ த³ஸ்ஸிதானி. ஸுக²ஞ்ஹி து³க்க²ஸ்ஸ படிபக்கோ², து³க்க²ங் ஸுக²ஸ்ஸ. யத்தகங் ஸுகே²ன ப²ரிதட்டா²னங் தத்தகங் து³க்க²ங் ப²ரதி. யத்தகங் து³க்கே²ன ப²ரிதட்டா²னங் தத்தகங் ஸுக²ங் ப²ரதி. ஸோமனஸ்ஸதா⁴து தோ³மனஸ்ஸதா⁴தூதி இத³ம்பி ததே²வ யுக³ளகங் கதங். ஸோமனஸ்ஸஞ்ஹி தோ³மனஸ்ஸஸ்ஸ படிபக்கோ², தோ³மனஸ்ஸங் ஸோமனஸ்ஸஸ்ஸ. யத்தகங் ஸோமனஸ்ஸேன ப²ரிதட்டா²னங் தத்தகங் தோ³மனஸ்ஸங் ப²ரதி. யத்தகங் தோ³மனஸ்ஸேன ப²ரிதட்டா²னங் தத்தகங் ஸோமனஸ்ஸங் ப²ரதி.
179. Idāni dutiyachakkaṃ dassento aparāpi cha dhātuyotiādimāha. Tattha sukhadhātu dukkhadhātūti kāyappasādavatthukāni sukhadukkhāni sappaṭipakkhavasena yugaḷakato dassitāni. Sukhañhi dukkhassa paṭipakkho, dukkhaṃ sukhassa. Yattakaṃ sukhena pharitaṭṭhānaṃ tattakaṃ dukkhaṃ pharati. Yattakaṃ dukkhena pharitaṭṭhānaṃ tattakaṃ sukhaṃ pharati. Somanassadhātu domanassadhātūti idampi tatheva yugaḷakaṃ kataṃ. Somanassañhi domanassassa paṭipakkho, domanassaṃ somanassassa. Yattakaṃ somanassena pharitaṭṭhānaṃ tattakaṃ domanassaṃ pharati. Yattakaṃ domanassena pharitaṭṭhānaṃ tattakaṃ somanassaṃ pharati.
உபெக்கா²தா⁴து அவிஜ்ஜாதா⁴தூதி இத³ங் பன த்³வயங் ஸரிக்க²கவஸேன யுக³ளகங் கதங். உப⁴யம்பி ஹேதங் அவிபூ⁴தத்தா ஸரிக்க²கங் ஹோதி. தத்த² ஸுக²து³க்க²தா⁴துக்³க³ஹணேன தங் ஸம்பயுத்தா காயவிஞ்ஞாணதா⁴து, வத்து²பூ⁴தா காயதா⁴து, ஆரம்மணபூ⁴தா பொ²ட்ட²ப்³ப³தா⁴து ச க³ஹிதாவ ஹொந்தி. ஸோமனஸ்ஸதோ³மனஸ்ஸதா⁴துக்³க³ஹணேன தங் ஸம்பயுத்தா மனோவிஞ்ஞாணதா⁴து க³ஹிதா ஹோதி. அவிஜ்ஜாதா⁴துக்³க³ஹணேன த⁴ம்மதா⁴து க³ஹிதா. உபெக்கா²தா⁴துக்³க³ஹணேன சக்கு²ஸோதகா⁴னஜிவ்ஹாவிஞ்ஞாணதா⁴துமனோதா⁴துயோ , தாஸங்யேவ வத்தா²ரம்மணபூ⁴தா சக்கு²தா⁴துரூபதா⁴துஆத³யோ ச க³ஹிதாதி ஏவங் அட்டா²ரஸபி தா⁴துயோ க³ஹிதாவ ஹொந்தி. இதா³னி தாஸு த³ஸஹி தா⁴தூஹி ரூபபரிக்³க³ஹோதிஆதி³ ஸப்³ப³ங் ஹெட்டா² வுத்தனயேனேவ வேதி³தப்³ப³ங். ஏவம்பி ஏகஸ்ஸ பி⁴க்கு²னோ யாவ அரஹத்தா மத்த²கங் பாபெத்வா நிக³மனங் கதி²தங் ஹோதீதி வேதி³தப்³ப³ங். தத்த² கதமா ஸுக²தா⁴து யங் காயிகங் ஸாதந்தி ஆதீ³னி ஹெட்டா² வுத்தனயானேவ.
Upekkhādhātu avijjādhātūti idaṃ pana dvayaṃ sarikkhakavasena yugaḷakaṃ kataṃ. Ubhayampi hetaṃ avibhūtattā sarikkhakaṃ hoti. Tattha sukhadukkhadhātuggahaṇena taṃ sampayuttā kāyaviññāṇadhātu, vatthubhūtā kāyadhātu, ārammaṇabhūtā phoṭṭhabbadhātu ca gahitāva honti. Somanassadomanassadhātuggahaṇena taṃ sampayuttā manoviññāṇadhātu gahitā hoti. Avijjādhātuggahaṇena dhammadhātu gahitā. Upekkhādhātuggahaṇena cakkhusotaghānajivhāviññāṇadhātumanodhātuyo , tāsaṃyeva vatthārammaṇabhūtā cakkhudhāturūpadhātuādayo ca gahitāti evaṃ aṭṭhārasapi dhātuyo gahitāva honti. Idāni tāsu dasahi dhātūhi rūpapariggahotiādi sabbaṃ heṭṭhā vuttanayeneva veditabbaṃ. Evampi ekassa bhikkhuno yāva arahattā matthakaṃ pāpetvā nigamanaṃ kathitaṃ hotīti veditabbaṃ. Tattha katamā sukhadhātu yaṃ kāyikaṃ sātanti ādīni heṭṭhā vuttanayāneva.
181. ததியச²க்கே காமோதி த்³வே காமா – வத்து²காமோ ச கிலேஸகாமோ ச. தத்த² கிலேஸகாமங் ஸந்தா⁴ய காமபடிஸங்யுத்தா தா⁴து காமதா⁴து, காமவிதக்கஸ்ஸேதங் நாமங். வத்து²காமங் ஸந்தா⁴ய காமோயேவ தா⁴து காமதா⁴து, காமாவசரத⁴ம்மானமேதங் நாமங். ப்³யாபாத³படிஸங்யுத்தா தா⁴து ப்³யாபாத³தா⁴து, ப்³யாபாத³விதக்கஸ்ஸேதங் நாமங். ப்³யாபாதோ³வ தா⁴து ப்³யாபாத³தா⁴து, த³ஸஆகா⁴தவத்து²கஸ்ஸ படிக⁴ஸ்ஸேதங் நாமங். விஹிங்ஸா படிஸங்யுத்தா தா⁴து விஹிங்ஸாதா⁴து, விஹிங்ஸாவிதக்கஸ்ஸேதங் நாமங். விஹிங்ஸாயேவ தா⁴து விஹிங்ஸாதா⁴து, பரஸத்தவிஹேஸனஸ்ஸேதங் நாமங். அயங் பன ஹெட்டா² அனாக³தத்தா ஏவங் அத்தா²தி³விபா⁴க³தோ வேதி³தப்³பா³ – விஹிங்ஸந்தி ஏதாய ஸத்தே, விஹிங்ஸனங் வா ஏதங் ஸத்தானந்தி விஹிங்ஸா. ஸா விஹேட²னலக்க²ணா, கருணாபடிபக்க²லக்க²ணா வா; பரஸந்தானே உப்³பே³க³ஜனநரஸா, ஸகஸந்தானே கருணாவித்³த⁴ங்ஸனரஸா வா; து³க்கா²யதனபச்சுபட்டா²னா; படிக⁴பத³ட்டா²னாதி வேதி³தப்³பா³. நெக்க²ம்மங் வுச்சதி லோபா⁴ நிக்க²ந்தத்தா அலோபோ⁴, நீவரணேஹி நிக்க²ந்தத்தா பட²மஜ்ஜா²னங், ஸப்³பா³குஸலேஹி நிக்க²ந்தத்தா ஸப்³ப³குஸலங். நெக்க²ம்மபடிஸங்யுத்தா தா⁴து நெக்க²ம்மதா⁴து, நெக்க²ம்மவிதக்கஸ்ஸேதங் நாமங். நெக்க²ம்மமேவ தா⁴து நெக்க²ம்மதா⁴து, ஸப்³ப³ஸ்ஸாபி குஸலஸ்ஸேதங் நாமங். அப்³யாபாத³படிஸங்யுத்தா தா⁴து அப்³யாபாத³தா⁴து, அப்³யாபாத³விதக்கஸ்ஸேதங் நாமங். அப்³யாபாதோ³வ தா⁴து அப்³யாபாத³தா⁴து, மெத்தாயேதங் நாமங். அவிஹிங்ஸாபடிஸங்யுத்தா தா⁴து அவிஹிங்ஸாதா⁴து, அவிஹிங்ஸா விதக்கஸ்ஸேதங் நாமங். அவிஹிங்ஸாவ தா⁴து அவிஹிங்ஸாதா⁴து, கருணாயேதங் நாமங்.
181. Tatiyachakke kāmoti dve kāmā – vatthukāmo ca kilesakāmo ca. Tattha kilesakāmaṃ sandhāya kāmapaṭisaṃyuttā dhātu kāmadhātu, kāmavitakkassetaṃ nāmaṃ. Vatthukāmaṃ sandhāya kāmoyeva dhātu kāmadhātu, kāmāvacaradhammānametaṃ nāmaṃ. Byāpādapaṭisaṃyuttā dhātu byāpādadhātu, byāpādavitakkassetaṃ nāmaṃ. Byāpādova dhātu byāpādadhātu, dasaāghātavatthukassa paṭighassetaṃ nāmaṃ. Vihiṃsā paṭisaṃyuttā dhātu vihiṃsādhātu, vihiṃsāvitakkassetaṃ nāmaṃ. Vihiṃsāyeva dhātu vihiṃsādhātu, parasattavihesanassetaṃ nāmaṃ. Ayaṃ pana heṭṭhā anāgatattā evaṃ atthādivibhāgato veditabbā – vihiṃsanti etāya satte, vihiṃsanaṃ vā etaṃ sattānanti vihiṃsā. Sā viheṭhanalakkhaṇā, karuṇāpaṭipakkhalakkhaṇā vā; parasantāne ubbegajananarasā, sakasantāne karuṇāviddhaṃsanarasā vā; dukkhāyatanapaccupaṭṭhānā; paṭighapadaṭṭhānāti veditabbā. Nekkhammaṃ vuccati lobhā nikkhantattā alobho, nīvaraṇehi nikkhantattā paṭhamajjhānaṃ, sabbākusalehi nikkhantattā sabbakusalaṃ. Nekkhammapaṭisaṃyuttā dhātu nekkhammadhātu, nekkhammavitakkassetaṃ nāmaṃ. Nekkhammameva dhātu nekkhammadhātu, sabbassāpi kusalassetaṃ nāmaṃ. Abyāpādapaṭisaṃyuttā dhātu abyāpādadhātu, abyāpādavitakkassetaṃ nāmaṃ. Abyāpādova dhātu abyāpādadhātu, mettāyetaṃ nāmaṃ. Avihiṃsāpaṭisaṃyuttā dhātu avihiṃsādhātu, avihiṃsā vitakkassetaṃ nāmaṃ. Avihiṃsāva dhātu avihiṃsādhātu, karuṇāyetaṃ nāmaṃ.
182. இதா³னி தமேவத்த²ங் த³ஸ்ஸேதுங் தத்த² கதமா காமதா⁴தூதி பத³பா⁴ஜனங் ஆரத்³த⁴ங். தத்த² படிஸங்யுத்தோதி ஸங்பயோக³வஸேன படிஸங்யுத்தோ. தக்கோ விதக்கோதிஆதீ³னி வுத்தத்தா²னேவ. விஹேடே²தீதி பா³தே⁴தி, து³க்கா²பேதி. ஹேட²னாதி பாணிப்பஹாராதீ³ஹி பா³த⁴னா, து³க்கு²ப்பாத³னா. ப³லவஹேட²னா விஹேட²னா. ஹிங்ஸந்தி ஏதாயாதி ஹிங்ஸனா. ப³லவஹிங்ஸனா விஹிங்ஸனா. ரோஸனாதி க⁴ட்டனா. விரோஸனாதி ப³லவக⁴ட்டனா. ஸப்³ப³த்த² வா ‘வி’ உபஸக்³கே³ன பத³ங் வட்³டி⁴தங். உபஹனந்தி ஏதேனாதி உபகா⁴தோ, பரேஸங் உபகா⁴தோ பரூபகா⁴தோ.
182. Idāni tamevatthaṃ dassetuṃ tattha katamā kāmadhātūti padabhājanaṃ āraddhaṃ. Tattha paṭisaṃyuttoti saṃpayogavasena paṭisaṃyutto. Takko vitakkotiādīni vuttatthāneva. Viheṭhetīti bādheti, dukkhāpeti. Heṭhanāti pāṇippahārādīhi bādhanā, dukkhuppādanā. Balavaheṭhanā viheṭhanā. Hiṃsanti etāyāti hiṃsanā. Balavahiṃsanā vihiṃsanā. Rosanāti ghaṭṭanā. Virosanāti balavaghaṭṭanā. Sabbattha vā ‘vi’ upasaggena padaṃ vaḍḍhitaṃ. Upahananti etenāti upaghāto, paresaṃ upaghāto parūpaghāto.
மெத்தாயந்தி ஏதாயாதி மெத்தி. மெத்தாயனாகாரோ மெத்தாயனா. மெத்தாய அயிதஸ்ஸ மெத்தாஸமங்கி³னோ பா⁴வோ மெத்தாயிதத்தங். ப்³யாபாதே³ன விமுத்தஸ்ஸ சேதஸோ விமுத்தி சேதோவிமுத்தி. எத்த² ச புரிமேஹி தீஹி உபசாரப்பத்தாபி அப்பனாபதாபி மெத்தா கதி²தா, பச்சி²மேன அப்பனாபத்தாவ.
Mettāyanti etāyāti metti. Mettāyanākāro mettāyanā. Mettāya ayitassa mettāsamaṅgino bhāvo mettāyitattaṃ. Byāpādena vimuttassa cetaso vimutti cetovimutti. Ettha ca purimehi tīhi upacārappattāpi appanāpatāpi mettā kathitā, pacchimena appanāpattāva.
கருணாயந்தி ஏதாயாதி கருணா. கருணாயனாகாரோ கருணாயனா. கருணாய அயிதஸ்ஸ கருணாஸமங்கி³னோ பா⁴வோ கருணாயிதத்தங். விஹிங்ஸாய விமுத்தஸ்ஸ சேதஸோ விமுத்தி சேதோவிமுத்தி. இதா⁴பி புரிமனயேனேவ உபசாரப்பனாபே⁴தோ³ வேதி³தப்³போ³. உப⁴யத்தா²பி ச பரியோஸானபதே³ மெத்தாகருணாதி சேதோவிமுத்திவிஸேஸனத்த²ங் வுத்தங்.
Karuṇāyanti etāyāti karuṇā. Karuṇāyanākāro karuṇāyanā. Karuṇāya ayitassa karuṇāsamaṅgino bhāvo karuṇāyitattaṃ. Vihiṃsāya vimuttassa cetaso vimutti cetovimutti. Idhāpi purimanayeneva upacārappanābhedo veditabbo. Ubhayatthāpi ca pariyosānapade mettākaruṇāti cetovimuttivisesanatthaṃ vuttaṃ.
எத்த² ச காமவிதக்கோ ஸத்தேஸுபி உப்பஜ்ஜதி ஸங்கா²ரேஸுபி. உப⁴யத்த² உப்பன்னோபி கம்மபத²பே⁴தோ³வ. ப்³யாபாதோ³ பன ஸத்தேஸு உப்பன்னோயேவ கம்மபத²ங் பி⁴ந்த³தி, ந இதரோ. விஹிங்ஸாயபி ஏஸேவ நயோ. எத்த² ச து³விதா⁴ கதா² – ஸப்³ப³ஸங்கா³ஹிகா சேவ அஸம்பி⁴ன்னா ச. காமதா⁴துக்³க³ஹணேன ஹி ப்³யாபாத³விஹிங்ஸாதா⁴துயோபி க³ஹிதா. காமதா⁴துயாயேவ பன நீஹரித்வா நீஹரித்வா த்³வேபி ஏதா த³ஸ்ஸிதாதி. அயங் தாவெத்த² ஸப்³ப³ஸங்கா³ஹிககதா² . ட²பெத்வா பன ப்³யாபாத³விஹிங்ஸாதா⁴துயோ ஸேஸா ஸப்³பா³பி காமதா⁴து ஏவாதி. அயங் அஸம்பி⁴ன்னகதா² நாம. நெக்க²ம்மதா⁴துக்³க³ஹணேனாபி அப்³யாபாத³அவிஹிங்ஸாதா⁴துயோ க³ஹிதாயேவ. நெக்க²ம்மதா⁴துதோ பன நீஹரித்வா நீஹரித்வா தது³ப⁴யம்பி த³ஸ்ஸிதந்தி அயமெத்தா²பி ஸப்³ப³ஸங்கா³ஹிககதா². ட²பெத்வா அப்³யாபாத³அவிஹிங்ஸாதா⁴துயோ அவஸேஸா நெக்க²ம்மதா⁴தூதி அயங் அஸம்பி⁴ன்னகதா² நாம.
Ettha ca kāmavitakko sattesupi uppajjati saṅkhāresupi. Ubhayattha uppannopi kammapathabhedova. Byāpādo pana sattesu uppannoyeva kammapathaṃ bhindati, na itaro. Vihiṃsāyapi eseva nayo. Ettha ca duvidhā kathā – sabbasaṅgāhikā ceva asambhinnā ca. Kāmadhātuggahaṇena hi byāpādavihiṃsādhātuyopi gahitā. Kāmadhātuyāyeva pana nīharitvā nīharitvā dvepi etā dassitāti. Ayaṃ tāvettha sabbasaṅgāhikakathā . Ṭhapetvā pana byāpādavihiṃsādhātuyo sesā sabbāpi kāmadhātu evāti. Ayaṃ asambhinnakathā nāma. Nekkhammadhātuggahaṇenāpi abyāpādaavihiṃsādhātuyo gahitāyeva. Nekkhammadhātuto pana nīharitvā nīharitvā tadubhayampi dassitanti ayametthāpi sabbasaṅgāhikakathā. Ṭhapetvā abyāpādaavihiṃsādhātuyo avasesā nekkhammadhātūti ayaṃ asambhinnakathā nāma.
இமாஹி ச ச²ஹி தா⁴தூஹி பரிக்³க³ஹிதா ஹி அட்டா²ரஸ தா⁴துயோ பரிக்³க³ஹிதாவ ஹொந்தி. ஸப்³பா³பி ஹி தா காமதா⁴துதோவ நீஹரித்வா நீஹரித்வா லபா⁴பேதப்³பா³ அட்டா²ரஸ தா⁴துயோவ ஹொந்தீதி திண்ணங் ச²க்கானங் வஸேன அட்டா²ரஸ ஹொந்தி. ஏவங் பன அக்³க³ஹெத்வா ஏகேகஸ்மிங் ச²க்கே வுத்தனயேன அட்டா²ரஸ அட்டா²ரஸ கத்வா ஸப்³பா³னிபி தானி அட்டா²ரஸகானி ஏகஜ்ஜ²ங் அபி⁴ஸங்கி²பித்வா அட்டா²ரஸேவ ஹொந்தீதி வேதி³தப்³பா³. இதி இமஸ்மிங் ஸுத்தந்தபா⁴ஜனீயே ஸோளஸ தா⁴துயோ காமாவசரா, த்³வே தேபூ⁴மிகாதி ஏவமெத்த² ஸம்மஸனசாரோவ கதி²தோதி வேதி³தப்³போ³.
Imāhi ca chahi dhātūhi pariggahitā hi aṭṭhārasa dhātuyo pariggahitāva honti. Sabbāpi hi tā kāmadhātutova nīharitvā nīharitvā labhāpetabbā aṭṭhārasa dhātuyova hontīti tiṇṇaṃ chakkānaṃ vasena aṭṭhārasa honti. Evaṃ pana aggahetvā ekekasmiṃ chakke vuttanayena aṭṭhārasa aṭṭhārasa katvā sabbānipi tāni aṭṭhārasakāni ekajjhaṃ abhisaṅkhipitvā aṭṭhāraseva hontīti veditabbā. Iti imasmiṃ suttantabhājanīye soḷasa dhātuyo kāmāvacarā, dve tebhūmikāti evamettha sammasanacārova kathitoti veditabbo.
ஸுத்தந்தபா⁴ஜனீயவண்ணனா.
Suttantabhājanīyavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 3. தா⁴துவிப⁴ங்கோ³ • 3. Dhātuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 3. தா⁴துவிப⁴ங்கோ³ • 3. Dhātuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 3. தா⁴துவிப⁴ங்கோ³ • 3. Dhātuvibhaṅgo
