| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
8. ஸம்மப்பதா⁴னவிப⁴ங்கோ³
8. Sammappadhānavibhaṅgo
1. ஸுத்தந்தபா⁴ஜனீயவண்ணனா
1. Suttantabhājanīyavaṇṇanā
390. இதா³னி தத³னந்தரே ஸம்மப்பதா⁴னவிப⁴ங்கே³ சத்தாரோதி க³ணனபரிச்சே²தோ³. தேன ந ததோ ஹெட்டா² ந உத்³த⁴ந்தி ஸம்மப்பதா⁴னபரிச்சே²த³ங் தீ³பேதி. ஸம்மப்பதா⁴னாதி காரணப்பதா⁴னா உபாயப்பதா⁴னா யோனிஸோபதா⁴னா. இத⁴ பி⁴க்கூ²தி இமஸ்மிங் ஸாஸனே படிபன்னகோ பி⁴க்கு². அனுப்பன்னானந்தி அனிப்³ப³த்தானங். பாபகானந்தி லாமகானங். அகுஸலானங் த⁴ம்மானந்தி அகோஸல்லஸம்பூ⁴தானங் த⁴ம்மானங். அனுப்பாதா³யாதி ந உப்பாத³னத்தா²ய. ச²ந்த³ங் ஜனேதீதி கத்துகம்யதாஸங்கா²தங் குஸலச்ச²ந்த³ங் ஜனேதி உப்பாதே³தி. வாயமதீதி பயோக³ங் பரக்கமங் கரோதி. வீரியங் ஆரப⁴தீதி காயிகசேதஸிகங் வீரியங் கரோதி. சித்தங் பக்³க³ண்ஹாதீதி தேனேவ ஸஹஜாதவீரியேன சித்தங் உக்கி²பதி. பத³ஹதீதி பதா⁴னவீரியங் கரோதி. படிபாடியா பனேதானி சத்தாரிபி பதா³னி ஆஸேவனாபா⁴வனாப³ஹுலீகம்மஸாதச்சகிரியாஹி யோஜேதப்³பா³னி.
390. Idāni tadanantare sammappadhānavibhaṅge cattāroti gaṇanaparicchedo. Tena na tato heṭṭhā na uddhanti sammappadhānaparicchedaṃ dīpeti. Sammappadhānāti kāraṇappadhānā upāyappadhānā yonisopadhānā. Idha bhikkhūti imasmiṃ sāsane paṭipannako bhikkhu. Anuppannānanti anibbattānaṃ. Pāpakānanti lāmakānaṃ. Akusalānaṃ dhammānanti akosallasambhūtānaṃ dhammānaṃ. Anuppādāyāti na uppādanatthāya. Chandaṃ janetīti kattukamyatāsaṅkhātaṃ kusalacchandaṃ janeti uppādeti. Vāyamatīti payogaṃ parakkamaṃ karoti. Vīriyaṃ ārabhatīti kāyikacetasikaṃ vīriyaṃ karoti. Cittaṃ paggaṇhātīti teneva sahajātavīriyena cittaṃ ukkhipati. Padahatīti padhānavīriyaṃ karoti. Paṭipāṭiyā panetāni cattāripi padāni āsevanābhāvanābahulīkammasātaccakiriyāhi yojetabbāni.
உப்பன்னானங் பாபகானந்தி அனுப்பன்னந்தி அவத்தப்³ப³தங் ஆபன்னானங் பாபத⁴ம்மானங். பஹானாயாதி பஜஹனத்தா²ய. அனுப்பன்னானங் குஸலானங் த⁴ம்மானந்தி அனிப்³ப³த்தானங் கோஸல்லஸம்பூ⁴தானங் த⁴ம்மானங். உப்பாதா³யாதி உப்பாத³னத்தா²ய. உப்பன்னானந்தி நிப்³ப³த்தானங். டி²தியாதி டி²தத்தா²ய. அஸம்மோஸாயாதி அனஸ்ஸனத்த²ங். பி⁴ய்யோபா⁴வாயாதி புனப்புனங் பா⁴வாய. வேபுல்லாயாதி விபுலபா⁴வாய. பா⁴வனாயாதி வட்³டி⁴யா. பாரிபூரியாதி பரிபூரணத்தா²ய. அயங் தாவ சதுன்னங் ஸம்மப்பதா⁴னானங் உத்³தே³ஸவாரவஸேன ஏகபதி³கோ அத்து²த்³தா⁴ரோ.
Uppannānaṃ pāpakānanti anuppannanti avattabbataṃ āpannānaṃ pāpadhammānaṃ. Pahānāyāti pajahanatthāya. Anuppannānaṃ kusalānaṃ dhammānanti anibbattānaṃ kosallasambhūtānaṃ dhammānaṃ. Uppādāyāti uppādanatthāya. Uppannānanti nibbattānaṃ. Ṭhitiyāti ṭhitatthāya. Asammosāyāti anassanatthaṃ. Bhiyyobhāvāyāti punappunaṃ bhāvāya. Vepullāyāti vipulabhāvāya. Bhāvanāyāti vaḍḍhiyā. Pāripūriyāti paripūraṇatthāya. Ayaṃ tāva catunnaṃ sammappadhānānaṃ uddesavāravasena ekapadiko atthuddhāro.
391. இதா³னி படிபாடியா தானி பதா³னி பா⁴ஜெத்வா த³ஸ்ஸேதுங் கத²ஞ்ச பி⁴க்கு² அனுப்பன்னானந்திஆதி³னா நயேன நித்³தே³ஸவாரோ ஆரத்³தோ⁴. தத்த² யங் ஹெட்டா² த⁴ம்மஸங்க³ஹே ஆக³தஸதி³ஸங், தங் தஸ்ஸ வண்ணனாயங் வுத்தனயேனேவ வேதி³தப்³ப³ங். யங் பன தஸ்மிங் அனாக³தங், தத்த² ச²ந்த³னித்³தே³ஸே தாவ யோ ச²ந்தோ³தி யோ ச²ந்த³னியவஸேன ச²ந்தோ³. ச²ந்தி³கதாதி ச²ந்தி³கபா⁴வோ, ச²ந்த³கரணாகாரோ வா. கத்துகம்யதாதி கத்துகாமதா. குஸலோதி சே²கோ. த⁴ம்மச்ச²ந்தோ³தி ஸபா⁴வச்ச²ந்தோ³. அயஞ்ஹி ச²ந்தோ³ நாம தண்ஹாச²ந்தோ³, தி³ட்டி²ச²ந்தோ³, வீரியச²ந்தோ³, த⁴ம்மச்ச²ந்தோ³தி ப³ஹுவிதோ⁴ நானப்பகாரகோ. தேஸு த⁴ம்மச்ச²ந்தோ³தி இமஸ்மிங் டா²னே கத்துகம்யதாகுஸலத⁴ம்மச்ச²ந்தோ³ அதி⁴ப்பேதோ.
391. Idāni paṭipāṭiyā tāni padāni bhājetvā dassetuṃ kathañca bhikkhu anuppannānantiādinā nayena niddesavāro āraddho. Tattha yaṃ heṭṭhā dhammasaṅgahe āgatasadisaṃ, taṃ tassa vaṇṇanāyaṃ vuttanayeneva veditabbaṃ. Yaṃ pana tasmiṃ anāgataṃ, tattha chandaniddese tāva yo chandoti yo chandaniyavasena chando. Chandikatāti chandikabhāvo, chandakaraṇākāro vā. Kattukamyatāti kattukāmatā. Kusaloti cheko. Dhammacchandoti sabhāvacchando. Ayañhi chando nāma taṇhāchando, diṭṭhichando, vīriyachando, dhammacchandoti bahuvidho nānappakārako. Tesu dhammacchandoti imasmiṃ ṭhāne kattukamyatākusaladhammacchando adhippeto.
இமங் ச²ந்த³ங் ஜனேதீதி ச²ந்த³ங் குருமானோவ ச²ந்த³ங் ஜனேதி நாம. ஸஞ்ஜனேதீதி உபஸக்³கே³ன பத³ங் வட்³டி⁴தங். உட்ட²பேதீதி ச²ந்த³ங் குருமானோவ தங் உட்ட²பேதி நாம. ஸமுட்ட²பேதீதி உபஸக்³கே³ன பத³ங் வட்³டி⁴தங். நிப்³ப³த்தேதீதி ச²ந்த³ங் குருமானோவ தங் நிப்³ப³த்தேதி நாம. அபி⁴னிப்³ப³த்தேதீதி உபஸக்³கே³ன பத³ங் வட்³டி⁴தங். அபிச ச²ந்த³ங் கரொந்தோவ ச²ந்த³ங் ஜனேதி நாம. தமேவ ஸததங் கரொந்தோ ஸஞ்ஜனேதி நாம. கேனசிதே³வ அந்தராயேன பதிதங் புன உக்கி²பந்தோ உட்ட²பேதி நாம. பப³ந்த⁴ட்டி²திங் பாபெந்தோ ஸமுட்ட²பேதி நாம. தங் பாகடங் கரொந்தோ நிப்³ப³த்தேதி நாம. அனோஸக்கனதாய அலீனவுத்திதாய அனோலீனவுத்திதாய அபி⁴முக²பா⁴வேன நிப்³ப³த்தெந்தோ அபி⁴னிப்³ப³த்தேதி நாம.
Imaṃ chandaṃ janetīti chandaṃ kurumānova chandaṃ janeti nāma. Sañjanetīti upasaggena padaṃ vaḍḍhitaṃ. Uṭṭhapetīti chandaṃ kurumānova taṃ uṭṭhapeti nāma. Samuṭṭhapetīti upasaggena padaṃ vaḍḍhitaṃ. Nibbattetīti chandaṃ kurumānova taṃ nibbatteti nāma. Abhinibbattetīti upasaggena padaṃ vaḍḍhitaṃ. Apica chandaṃ karontova chandaṃ janeti nāma. Tameva satataṃ karonto sañjaneti nāma. Kenacideva antarāyena patitaṃ puna ukkhipanto uṭṭhapeti nāma. Pabandhaṭṭhitiṃ pāpento samuṭṭhapeti nāma. Taṃ pākaṭaṃ karonto nibbatteti nāma. Anosakkanatāya alīnavuttitāya anolīnavuttitāya abhimukhabhāvena nibbattento abhinibbatteti nāma.
394. வீரியனித்³தே³ஸே வீரியங் கரொந்தோவ வீரியங் ஆரப⁴தி நாம. து³தியபத³ங் உபஸக்³கே³ன வட்³டி⁴தங். வீரியங் கரொந்தோயேவ ச ஆஸேவதி பா⁴வேதி நாம. புனப்புனங் கரொந்தோ வஹுலீகரோதி. ஆதி³தோவ கரொந்தோ ஆரப⁴தி. புனப்புனங் கரொந்தோ ஸமாரப⁴தி. பா⁴வனாவஸேன ப⁴ஜந்தோ ஆஸேவதி. வட்³டெ⁴ந்தோ பா⁴வேதி. ஸப்³ப³கிச்சேஸு ததே³வ ப³ஹுலீகரொந்தோ ப³ஹுலீகரோதீதி வேதி³தப்³போ³.
394. Vīriyaniddese vīriyaṃ karontova vīriyaṃ ārabhati nāma. Dutiyapadaṃ upasaggena vaḍḍhitaṃ. Vīriyaṃ karontoyeva ca āsevati bhāveti nāma. Punappunaṃ karonto vahulīkaroti. Āditova karonto ārabhati. Punappunaṃ karonto samārabhati. Bhāvanāvasena bhajanto āsevati. Vaḍḍhento bhāveti. Sabbakiccesu tadeva bahulīkaronto bahulīkarotīti veditabbo.
395. சித்தபக்³க³ஹனித்³தே³ஸே வீரியபக்³க³ஹேன யோஜெந்தோ சித்தங் பக்³க³ண்ஹாதி, உக்கி²பதீதி அத்தோ². புனப்புனங் பக்³க³ண்ஹந்தோ ஸம்பக்³க³ண்ஹாதி. ஏவங் ஸம்பக்³க³ஹிதங் யதா² ந பததி ததா² நங் வீரியுபத்த²ம்பே⁴ன உபத்த²ம்பெ⁴ந்தோ உபத்த²ம்பே⁴தி. உபத்த²ம்பி⁴தம்பி தி²ரபா⁴வத்தா²ய புனப்புனங் உபத்த²ம்பெ⁴ந்தோ பச்சுபத்த²ம்பே⁴தி நாம.
395. Cittapaggahaniddese vīriyapaggahena yojento cittaṃ paggaṇhāti, ukkhipatīti attho. Punappunaṃ paggaṇhanto sampaggaṇhāti. Evaṃ sampaggahitaṃ yathā na patati tathā naṃ vīriyupatthambhena upatthambhento upatthambheti. Upatthambhitampi thirabhāvatthāya punappunaṃ upatthambhento paccupatthambheti nāma.
406. டி²தியாதிபத³ஸ்ஸ நித்³தே³ஸே ஸப்³பே³ஸம்பி அஸம்மோஸாதீ³னங் டி²திவேவசனபா⁴வங் த³ஸ்ஸேதுங் யா டி²தி ஸோ அஸம்மோஸோதிஆதி³ வுத்தங். எத்த² ஹி ஹெட்டி²மங் ஹெட்டி²மங் பத³ங் உபரிமஸ்ஸ உபரிமஸ்ஸ பத³ஸ்ஸ அத்தோ², உபரிமங் உபரிமங் பத³ங் ஹெட்டி²மஸ்ஸ ஹெட்டி²மஸ்ஸ அத்தோ²திபி வத்துங் வட்டதி. ஸேஸங் ஸப்³ப³த்த² உத்தானத்த²மேவாதி. அயங் தாவ பாளிவண்ணனா.
406. Ṭhitiyātipadassa niddese sabbesampi asammosādīnaṃ ṭhitivevacanabhāvaṃ dassetuṃ yā ṭhiti so asammosotiādi vuttaṃ. Ettha hi heṭṭhimaṃ heṭṭhimaṃ padaṃ uparimassa uparimassa padassa attho, uparimaṃ uparimaṃ padaṃ heṭṭhimassa heṭṭhimassa atthotipi vattuṃ vaṭṭati. Sesaṃ sabbattha uttānatthamevāti. Ayaṃ tāva pāḷivaṇṇanā.
அயங் பனெத்த² வினிச்ச²யகதா². அயஞ்ஹி ஸம்மப்பதா⁴னகதா² நாம து³விதா⁴ – லோகியா லோகுத்தரா ச. தத்த² லோகியா ஸப்³ப³புப்³ப³பா⁴கே³ ஹோதி. ஸா கஸ்ஸபஸங்யுத்தபரியாயேன லோகியமக்³க³க்க²ணே வேதி³தப்³பா³. வுத்தஞ்ஹி தத்த² –
Ayaṃ panettha vinicchayakathā. Ayañhi sammappadhānakathā nāma duvidhā – lokiyā lokuttarā ca. Tattha lokiyā sabbapubbabhāge hoti. Sā kassapasaṃyuttapariyāyena lokiyamaggakkhaṇe veditabbā. Vuttañhi tattha –
‘‘சத்தாரோ மே, ஆவுஸோ, ஸம்மப்பதா⁴னா. கதமே சத்தாரோ?
‘‘Cattāro me, āvuso, sammappadhānā. Katame cattāro?
இதா⁴வுஸோ, பி⁴க்கு² ‘அனுப்பன்னா மே பாபகா அகுஸலா த⁴ம்மா உப்பஜ்ஜமானா அனத்தா²ய ஸங்வத்தெய்யு’ந்தி ஆதப்பங் கரோதி; ‘உப்பன்னா மே பாபகா அகுஸலா த⁴ம்மா அப்பஹீயமானா அனத்தா²ய ஸங்வத்தெய்யு’ந்தி ஆதப்பங் கரோதி; ‘அனுப்பன்னா மே குஸலா த⁴ம்மா அனுப்பஜ்ஜமானா அனத்தா²ய ஸங்வத்தெய்யு’ந்தி ஆதப்பங் கரோதி. ‘உப்பன்னா மே குஸலா த⁴ம்மா நிருஜ்ஜ²மானா அனத்தா²ய ஸங்வத்தெய்யு’ந்தி ஆதப்பங் கரோதீ’’தி (ஸங்॰ நி॰ 2.145).
Idhāvuso, bhikkhu ‘anuppannā me pāpakā akusalā dhammā uppajjamānā anatthāya saṃvatteyyu’nti ātappaṃ karoti; ‘uppannā me pāpakā akusalā dhammā appahīyamānā anatthāya saṃvatteyyu’nti ātappaṃ karoti; ‘anuppannā me kusalā dhammā anuppajjamānā anatthāya saṃvatteyyu’nti ātappaṃ karoti. ‘Uppannā me kusalā dhammā nirujjhamānā anatthāya saṃvatteyyu’nti ātappaṃ karotī’’ti (saṃ. ni. 2.145).
எத்த² ச ‘அனுப்பன்னா மே குஸலா த⁴ம்மா’தி ஸமத²விபஸ்ஸனா சேவ மக்³கோ³ ச. உப்பன்னா குஸலா நாம ஸமத²விபஸ்ஸனாவ. மக்³கோ³ பன ஸகிங் உப்பஜ்ஜித்வா நிருஜ்ஜ²மானோ அனத்தா²ய ஸங்வத்தனகோ நாம நத்தி². ஸோ ஹி ப²லஸ்ஸ பச்சயங் த³த்வாவ நிருஜ்ஜ²தி. புரிமஸ்மிங் வா ஸமத²விபஸ்ஸனாவ க³ஹேதப்³பா³தி வுத்தங், தங் பன ந யுத்தங்.
Ettha ca ‘anuppannā me kusalā dhammā’ti samathavipassanā ceva maggo ca. Uppannākusalā nāma samathavipassanāva. Maggo pana sakiṃ uppajjitvā nirujjhamāno anatthāya saṃvattanako nāma natthi. So hi phalassa paccayaṃ datvāva nirujjhati. Purimasmiṃ vā samathavipassanāva gahetabbāti vuttaṃ, taṃ pana na yuttaṃ.
தத்த² ‘‘உப்பன்னா ஸமத²விபஸ்ஸனா நிருஜ்ஜ²மானா அனத்தா²ய ஸங்வத்தந்தீ’’தி அத்த²ஸ்ஸ ஆவிபா⁴வத்த²ங் இத³ங் வத்து² – ஏகோ கிர கீ²ணாஸவத்தே²ரோ ‘மஹாசேதியஞ்ச மஹாபோ³தி⁴ஞ்ச வந்தி³ஸ்ஸாமீ’தி ஸமாபத்திலாபி⁴னா ப⁴ண்ட³கா³ஹகஸாமணேரேன ஸத்³தி⁴ங் ஜனபத³தோ மஹாவிஹாரங் ஆக³ந்த்வா விஹாரபரிவேணங் பாவிஸி; ஸாயன்ஹஸமயே மஹாபி⁴க்கு²ஸங்கே⁴ சேதியங் வந்த³மானே சேதியங் வந்த³னத்தா²ய ந நிக்க²மி. கஸ்மா? கீ²ணாஸவானஞ்ஹி தீஸு ரதனேஸு மஹந்தங் கா³ரவங் ஹோதி. தஸ்மா பி⁴க்கு²ஸங்கே⁴ வந்தி³த்வா படிக்கந்தே மனுஸ்ஸானங் ஸாயமாஸபு⁴த்தவேலாய ஸாமணேரம்பி அஜானாபெத்வா ‘சேதியங் வந்தி³ஸ்ஸாமீ’தி ஏககோவ நிக்க²மி. ஸாமணேரோ ‘கிங் நு கோ² தே²ரோ அவேலாய ஏககோவ க³ச்ச²தி, ஜானிஸ்ஸாமீ’தி உபஜ்ஜா²யஸ்ஸ பதா³னுபதி³கோவ நிக்க²மி. தே²ரோ அனாவஜ்ஜனேன தஸ்ஸ ஆக³மனங் அஜானந்தோ த³க்கி²ணத்³வாரேன மஹாசேதியங்க³ணங் ஆருள்ஹோ. ஸாமணேரோபி அனுபத³ங்யேவ ஆருள்ஹோ.
Tattha ‘‘uppannā samathavipassanā nirujjhamānā anatthāya saṃvattantī’’ti atthassa āvibhāvatthaṃ idaṃ vatthu – eko kira khīṇāsavatthero ‘mahācetiyañca mahābodhiñca vandissāmī’ti samāpattilābhinā bhaṇḍagāhakasāmaṇerena saddhiṃ janapadato mahāvihāraṃ āgantvā vihārapariveṇaṃ pāvisi; sāyanhasamaye mahābhikkhusaṅghe cetiyaṃ vandamāne cetiyaṃ vandanatthāya na nikkhami. Kasmā? Khīṇāsavānañhi tīsu ratanesu mahantaṃ gāravaṃ hoti. Tasmā bhikkhusaṅghe vanditvā paṭikkante manussānaṃ sāyamāsabhuttavelāya sāmaṇerampi ajānāpetvā ‘cetiyaṃ vandissāmī’ti ekakova nikkhami. Sāmaṇero ‘kiṃ nu kho thero avelāya ekakova gacchati, jānissāmī’ti upajjhāyassa padānupadikova nikkhami. Thero anāvajjanena tassa āgamanaṃ ajānanto dakkhiṇadvārena mahācetiyaṅgaṇaṃ āruḷho. Sāmaṇeropi anupadaṃyeva āruḷho.
மஹாதே²ரோ மஹாசேதியங் உல்லோகெத்வா பு³த்³தா⁴ரம்மணங் பீதிங் க³ஹெத்வா ஸப்³ப³ங் சேதஸோ ஸமன்னாஹரித்வா ஹட்ட²பஹட்டோ² மஹாசேதியங் வந்த³தி. ஸாமணேரோ தே²ரஸ்ஸ வந்த³னாகாரங் தி³ஸ்வா ‘உபஜ்ஜா²யோ மே அதிவிய பஸன்னசித்தோ வந்த³தி; கிங் நு கோ² புப்பா²னி லபி⁴த்வா பூஜங் கரெய்யா’தி சிந்தேஸி. தே²ரே வந்தி³த்வா உட்டா²ய ஸிரஸி அஞ்ஜலிங் ட²பெத்வா மஹாசேதியங் உல்லோகெத்வா டி²தே ஸாமணேரோ உக்காஸித்வா அத்தனோ ஆக³தபா⁴வங் ஜானாபேஸி. தே²ரோ பரிவத்தெத்வா ஓலோகெந்தோ ‘‘கதா³ ஆக³தோஸீ’’தி புச்சி². ‘‘தும்ஹாகங் சேதியங் வந்த³னகாலே, ப⁴ந்தே; அதிவிய பஸன்னா சேதியங் வந்தி³த்த²; கின்னு கோ² புப்பா²னி லபி⁴த்வா பூஜெய்யாதா²’’தி? ‘‘ஆம, ஸாமணேர, இமஸ்மிங் சேதியே விய அஞ்ஞத்ர எத்தகங் தா⁴துனிதா⁴னங் நாம நத்தி². ஏவரூபங் அஸதி³ஸங் மஹாதூ²பங் புப்பா²னி லபி⁴த்வா கோ ந பூஜெய்யா’’தி? ‘‘தேன ஹி, ப⁴ந்தே, அதி⁴வாஸேத², ஆஹரிஸ்ஸாமீ’’தி தாவதே³வ ஜா²னங் ஸமாபஜ்ஜித்வா இத்³தி⁴யா ஹிமவந்தங் க³ந்த்வா வண்ணக³ந்த⁴ஸம்பன்னானி புப்பா²னி க³ஹெத்வா பரிஸ்ஸாவனங் பூரெத்வா மஹாதே²ரே த³க்கி²ணமுக²தோ பச்சி²மமுகே² அஸம்பத்தேயேவ ஆக³ந்த்வா புப்ப²பரிஸ்ஸாவனங் ஹத்தே² ட²பெத்வா ‘‘பூஜேத² ப⁴ந்தே’’தி ஆஹ. தே²ரோ ‘‘அதிமந்தா³னி நோ, ஸாமணேர, புப்பா²னீ’’தி ஆஹ. ‘‘க³ச்ச²த², ப⁴ந்தே, ப⁴க³வதோ கு³ணே ஆவஜ்ஜெத்வா பூஜேதா²’’தி.
Mahāthero mahācetiyaṃ ulloketvā buddhārammaṇaṃ pītiṃ gahetvā sabbaṃ cetaso samannāharitvā haṭṭhapahaṭṭho mahācetiyaṃ vandati. Sāmaṇero therassa vandanākāraṃ disvā ‘upajjhāyo me ativiya pasannacitto vandati; kiṃ nu kho pupphāni labhitvā pūjaṃ kareyyā’ti cintesi. There vanditvā uṭṭhāya sirasi añjaliṃ ṭhapetvā mahācetiyaṃ ulloketvā ṭhite sāmaṇero ukkāsitvā attano āgatabhāvaṃ jānāpesi. Thero parivattetvā olokento ‘‘kadā āgatosī’’ti pucchi. ‘‘Tumhākaṃ cetiyaṃ vandanakāle, bhante; ativiya pasannā cetiyaṃ vandittha; kinnu kho pupphāni labhitvā pūjeyyāthā’’ti? ‘‘Āma, sāmaṇera, imasmiṃ cetiye viya aññatra ettakaṃ dhātunidhānaṃ nāma natthi. Evarūpaṃ asadisaṃ mahāthūpaṃ pupphāni labhitvā ko na pūjeyyā’’ti? ‘‘Tena hi, bhante, adhivāsetha, āharissāmī’’ti tāvadeva jhānaṃ samāpajjitvā iddhiyā himavantaṃ gantvā vaṇṇagandhasampannāni pupphāni gahetvā parissāvanaṃ pūretvā mahāthere dakkhiṇamukhato pacchimamukhe asampatteyeva āgantvā pupphaparissāvanaṃ hatthe ṭhapetvā ‘‘pūjetha bhante’’ti āha. Thero ‘‘atimandāni no, sāmaṇera, pupphānī’’ti āha. ‘‘Gacchatha, bhante, bhagavato guṇe āvajjetvā pūjethā’’ti.
தே²ரோ பச்சி²மமுக²னிஸ்ஸிதேன ஸோபானேன ஆருய்ஹ குச்சி²வேதி³காபூ⁴மியங் புப்ப²பூஜங் காதுங் ஆரத்³தோ⁴. வேதி³காபூ⁴மி பரிபுண்ணா; புப்பா²னி பதித்வா து³தியபூ⁴மியங் ஜண்ணுப்பமாணேன ஓதி⁴னா பூரயிங்ஸு. ததோ ஓதரித்வா பாத³பிட்டி²கபந்திங் பூஜேஸி; ஸாபி பரிபூரி; பரிபுண்ணபா⁴வங் ஞத்வா ஹெட்டி²மதலே விகிரந்தோ அக³மாஸி; ஸப்³ப³ங் சேதியங்க³ணங் பரிபூரி; தஸ்மிங் பரிபுண்ணே ‘‘ஸாமணேர, புப்பா²னி ந கீ²யந்தீ’’தி ஆஹ. ‘‘பரிஸ்ஸாவனங், ப⁴ந்தே, அதோ⁴முக²ங் கரோதா²’’தி. அதோ⁴முக²ங் கத்வா சாலேஸி. ததா³ புப்பா²னி கீ²ணானி. தே²ரோ பரிஸ்ஸாவனங் ஸாமணேரஸ்ஸ த³த்வா ஸத்³தி⁴ங் ஹத்தி²பாகாரேன சேதியங் திக்க²த்துங் பத³க்கி²ணங் கத்வா சதூஸு டா²னேஸு வந்தி³த்வா பரிவேணங் க³ச்ச²ந்தோ சிந்தேஸி – ‘யாவ மஹித்³தி⁴கோ வதாயங் ஸாமணேரோ; ஸக்கி²ஸ்ஸதி நு கோ² இமங் இத்³தா⁴னுபா⁴வங் ரக்கி²துந்தி? ததோ ‘ந ஸக்கி²ஸ்ஸதீ’தி தி³ஸ்வா ஸாமணேரங் ஆஹ – ‘‘ஸாமணேர, த்வங் இதா³னி மஹித்³தி⁴கோ; ஏவரூபங் பன இத்³தி⁴ங் நாஸெத்வா பச்சி²மகாலே காணபேஸகாரியா ஹத்தே²ன மத்³தி³தங்கஞ்ஜியங் பிவிஸ்ஸஸீ’’தி. த³ஹரகபா⁴வஸ்ஸ நாமேஸ தோ³ஸோ யங் ஸோ உபஜ்ஜா²யஸ்ஸ கதா²ய ஸங்வேஜெத்வா ‘கம்மட்டா²னங் மே, ப⁴ந்தே, ஆசிக்க²தா²’தி ந யாசி; ‘அம்ஹாகங் உபஜ்ஜா²யோ கிங் வத³தீ’தி தங் பன அஸுணந்தோ விய அக³மாஸி.
Thero pacchimamukhanissitena sopānena āruyha kucchivedikābhūmiyaṃ pupphapūjaṃ kātuṃ āraddho. Vedikābhūmi paripuṇṇā; pupphāni patitvā dutiyabhūmiyaṃ jaṇṇuppamāṇena odhinā pūrayiṃsu. Tato otaritvā pādapiṭṭhikapantiṃ pūjesi; sāpi paripūri; paripuṇṇabhāvaṃ ñatvā heṭṭhimatale vikiranto agamāsi; sabbaṃ cetiyaṅgaṇaṃ paripūri; tasmiṃ paripuṇṇe ‘‘sāmaṇera, pupphāni na khīyantī’’ti āha. ‘‘Parissāvanaṃ, bhante, adhomukhaṃ karothā’’ti. Adhomukhaṃ katvā cālesi. Tadā pupphāni khīṇāni. Thero parissāvanaṃ sāmaṇerassa datvā saddhiṃ hatthipākārena cetiyaṃ tikkhattuṃ padakkhiṇaṃ katvā catūsu ṭhānesu vanditvā pariveṇaṃ gacchanto cintesi – ‘yāva mahiddhiko vatāyaṃ sāmaṇero; sakkhissati nu kho imaṃ iddhānubhāvaṃ rakkhitunti? Tato ‘na sakkhissatī’ti disvā sāmaṇeraṃ āha – ‘‘sāmaṇera, tvaṃ idāni mahiddhiko; evarūpaṃ pana iddhiṃ nāsetvā pacchimakāle kāṇapesakāriyā hatthena madditaṃkañjiyaṃ pivissasī’’ti. Daharakabhāvassa nāmesa doso yaṃ so upajjhāyassa kathāya saṃvejetvā ‘kammaṭṭhānaṃ me, bhante, ācikkhathā’ti na yāci; ‘amhākaṃ upajjhāyo kiṃ vadatī’ti taṃ pana asuṇanto viya agamāsi.
தே²ரோ மஹாசேதியஞ்ச மஹாபோ³தி⁴ஞ்ச வந்தி³த்வா ஸாமணேரங் பத்தசீவரங் கா³ஹாபெத்வா அனுபுப்³பே³ன குடேளிதிஸ்ஸமஹாவிஹாரங் அக³மாஸி. ஸாமணேரோ உபஜ்ஜா²யஸ்ஸ பதா³னுபதி³கோ ஹுத்வா பி⁴க்கா²சாரங் ந க³ச்ச²தி. ‘‘கதரங் கா³மங் பவிஸத², ப⁴ந்தே’’தி புச்சி²த்வா பன ‘இதா³னி மே உபஜ்ஜா²யோ கா³மத்³வாரங் ஸம்பத்தோ ப⁴விஸ்ஸதீ’தி ஞத்வா அத்தனோ ச உபஜ்ஜா²யஸ்ஸ ச பத்தசீவரங் க³ஹெத்வா ஆகாஸேனாக³ந்த்வா தே²ரஸ்ஸ பத்தசீவரங் த³த்வா பிண்டா³ய பவிஸதி. தே²ரோ ஸப்³ப³காலங் ஓவத³தி – ‘‘ஸாமணேர, மா ஏவமகாஸி; புது²ஜ்ஜனித்³தி⁴ நாம சலா அனிப³த்³தா⁴; அஸப்பாயங் ரூபாதி³ஆரம்மணங் லபி⁴த்வா அப்பமத்தகேனேவ பி⁴ஜ்ஜதி; ஸந்தாய ஸமாபத்தியா பரிஹீனா ப்³ரஹ்மசரியவாஸே ஸந்த²ம்பி⁴துங் ந ஸக்கொந்தீ’’தி. ஸாமணேரோ ‘கிங் கதே²தி மய்ஹங் உபஜ்ஜா²யோ’தி ஸோதுங் ந இச்ச²தி, ததே²வ கரோதி. தே²ரோ அனுபுப்³பே³ன சேதியவந்த³னங் கரொந்தோ கம்முபெந்த³விஹாரங் நாம க³தோ. தத்த² வஸந்தேபி தே²ரே ஸாமணேரோ ததே²வ கரோதி.
Thero mahācetiyañca mahābodhiñca vanditvā sāmaṇeraṃ pattacīvaraṃ gāhāpetvā anupubbena kuṭeḷitissamahāvihāraṃ agamāsi. Sāmaṇero upajjhāyassa padānupadiko hutvā bhikkhācāraṃ na gacchati. ‘‘Kataraṃ gāmaṃ pavisatha, bhante’’ti pucchitvā pana ‘idāni me upajjhāyo gāmadvāraṃ sampatto bhavissatī’ti ñatvā attano ca upajjhāyassa ca pattacīvaraṃ gahetvā ākāsenāgantvā therassa pattacīvaraṃ datvā piṇḍāya pavisati. Thero sabbakālaṃ ovadati – ‘‘sāmaṇera, mā evamakāsi; puthujjaniddhi nāma calā anibaddhā; asappāyaṃ rūpādiārammaṇaṃ labhitvā appamattakeneva bhijjati; santāya samāpattiyā parihīnā brahmacariyavāse santhambhituṃ na sakkontī’’ti. Sāmaṇero ‘kiṃ katheti mayhaṃ upajjhāyo’ti sotuṃ na icchati, tatheva karoti. Thero anupubbena cetiyavandanaṃ karonto kammupendavihāraṃ nāma gato. Tattha vasantepi there sāmaṇero tatheva karoti.
அதே²கதி³வஸங் ஏகா பேஸகாரதீ⁴தா அபி⁴ரூபா பட²மவயே டி²தா கம்முபெந்த³கா³மதோ நிக்க²மித்வா பது³மஸ்ஸரங் ஓருய்ஹ கா³யமானா புப்பா²னி ப⁴ஞ்ஜதி. தஸ்மிங் ஸமயே ஸாமணேரோ பது³மஸ்ஸரமத்த²கேன க³ச்ச²தி க³ச்ச²ந்தோ பன, ஸக்கரலஸிகாய காணமக்கி²கா விய, தஸ்ஸா கீ³தஸத்³தே³ ப³ஜ்ஜி²; தாவதே³வ இத்³தி⁴ அந்தரஹிதா, சி²ன்னபக்கோ² காகோ விய அஹோஸி. ஸந்தஸமாபத்திப³லேன பன தத்தே²வ உத³கபிட்டே² அபதித்வா ஸிம்ப³லிதூலங் விய பதமானங் அனுபுப்³பே³ன பது³மஸ்ஸரதீரே அட்டா²ஸி. ஸோ வேகே³ன க³ந்த்வா உபஜ்ஜா²யஸ்ஸ பத்தசீவரங் த³த்வா நிவத்தி. மஹாதே²ரோ ‘பகே³வேதங் மயா தி³ட்ட²ங், நிவாரியமானோபி ந நிவத்திஸ்ஸதீ’தி கிஞ்சி அவத்வா பிண்டா³ய பாவிஸி.
Athekadivasaṃ ekā pesakāradhītā abhirūpā paṭhamavaye ṭhitā kammupendagāmato nikkhamitvā padumassaraṃ oruyha gāyamānā pupphāni bhañjati. Tasmiṃ samaye sāmaṇero padumassaramatthakena gacchati gacchanto pana, sakkaralasikāya kāṇamakkhikā viya, tassā gītasadde bajjhi; tāvadeva iddhi antarahitā, chinnapakkho kāko viya ahosi. Santasamāpattibalena pana tattheva udakapiṭṭhe apatitvā simbalitūlaṃ viya patamānaṃ anupubbena padumassaratīre aṭṭhāsi. So vegena gantvā upajjhāyassa pattacīvaraṃ datvā nivatti. Mahāthero ‘pagevetaṃ mayā diṭṭhaṃ, nivāriyamānopi na nivattissatī’ti kiñci avatvā piṇḍāya pāvisi.
ஸாமணேரோ க³ந்த்வா பது³மஸ்ஸரதீரே அட்டா²ஸி தஸ்ஸா பச்சுத்தரணங் ஆக³மயமானோ. ஸாபி ஸாமணேரங் ஆகாஸேன க³ச்ச²ந்தஞ்ச புனாக³ந்த்வா டி²தஞ்ச தி³ஸ்வா ‘அத்³தா⁴ ஏஸ மங் நிஸ்ஸாய உக்கண்டி²தோ’தி ஞத்வா ‘படிக்கம ஸாமணேரா’தி ஆஹ. ஸோபி படிபக்கமி. இதரா பச்சுத்தரித்வா ஸாடகங் நிவாஸெத்வா தங் உபஸங்கமித்வா ‘கிங், ப⁴ந்தே’தி புச்சி². ஸோ தமத்த²ங் ஆரோசேஸி. ஸா ப³ஹூஹி காரணேஹி க⁴ராவாஸே ஆதீ³னவங் ப்³ரஹ்மசரியவாஸே ஆனிஸங்ஸஞ்ச த³ஸ்ஸெத்வா ஓவத³மானாபி தஸ்ஸ உக்கண்ட²ங் வினோதே³துங் அஸக்கொந்தீ ‘அயங் மம காரணா ஏவரூபாய இத்³தி⁴யா பரிஹீனோ; ந தா³னி யுத்தங் பரிச்சஜிது’ந்தி. ‘இதே⁴வ திட்டா²’தி வத்வா க⁴ரங் க³ந்த்வா மாதாபிதூனங் தங் பவத்திங் ஆரோசேஸி. தேபி ஆக³ந்த்வா நானப்பகாரங் ஓவத³மானா வசனங் அக்³க³ண்ஹந்தங் ஆஹங்ஸு – ‘‘த்வங் அம்ஹே உச்சாகுலாதி மா ஸல்லக்கே²ஸி. மயங் பேஸகாரா. ஸக்கி²ஸ்ஸஸி பேஸகாரகம்மங் காது’’ந்தி? ஸாமணேரோ ஆஹ – ‘‘உபாஸக, கி³ஹீபூ⁴தோ நாம பேஸகாரகம்மங் வா கரெய்ய நளகாரகம்மங் வா, கிங் இமினா, மா ஸாடகமத்தே லோப⁴ங் கரோதா²’’தி . பேஸகாரகோ உத³ரே ப³த்³த⁴ஸாடகங் த³த்வா க⁴ரங் நெத்வா தீ⁴தரங் அதா³ஸி.
Sāmaṇero gantvā padumassaratīre aṭṭhāsi tassā paccuttaraṇaṃ āgamayamāno. Sāpi sāmaṇeraṃ ākāsena gacchantañca punāgantvā ṭhitañca disvā ‘addhā esa maṃ nissāya ukkaṇṭhito’ti ñatvā ‘paṭikkama sāmaṇerā’ti āha. Sopi paṭipakkami. Itarā paccuttaritvā sāṭakaṃ nivāsetvā taṃ upasaṅkamitvā ‘kiṃ, bhante’ti pucchi. So tamatthaṃ ārocesi. Sā bahūhi kāraṇehi gharāvāse ādīnavaṃ brahmacariyavāse ānisaṃsañca dassetvā ovadamānāpi tassa ukkaṇṭhaṃ vinodetuṃ asakkontī ‘ayaṃ mama kāraṇā evarūpāya iddhiyā parihīno; na dāni yuttaṃ pariccajitu’nti. ‘Idheva tiṭṭhā’ti vatvā gharaṃ gantvā mātāpitūnaṃ taṃ pavattiṃ ārocesi. Tepi āgantvā nānappakāraṃ ovadamānā vacanaṃ aggaṇhantaṃ āhaṃsu – ‘‘tvaṃ amhe uccākulāti mā sallakkhesi. Mayaṃ pesakārā. Sakkhissasi pesakārakammaṃ kātu’’nti? Sāmaṇero āha – ‘‘upāsaka, gihībhūto nāma pesakārakammaṃ vā kareyya naḷakārakammaṃ vā, kiṃ iminā, mā sāṭakamatte lobhaṃ karothā’’ti . Pesakārako udare baddhasāṭakaṃ datvā gharaṃ netvā dhītaraṃ adāsi.
ஸோ பேஸகாரகம்மங் உக்³க³ண்ஹித்வா பேஸகாரேஹி ஸத்³தி⁴ங் ஸாலாய கம்மங் கரோதி. அஞ்ஞேஸங் இத்தி²யோ பாதோவ ப⁴த்தங் ஸம்பாதெ³த்வா ஆஹரிங்ஸு. தஸ்ஸ ப⁴ரியா ந தாவ ஆக³ச்ச²தி. ஸோ இதரேஸு கம்மங் விஸ்ஸஜ்ஜெத்வா பு⁴ஞ்ஜமானேஸு தஸரங் வட்டெந்தோ நிஸீதி³. ஸா பச்சா² ஆக³மாஸி. அத² நங் ஸோ ‘அதிசிரேன ஆக³தாஸீ’தி தஜ்ஜேஸி. மாதுகா³மோ ச நாம அபி சக்கவத்திராஜானங் அத்தனி படிப³த்³த⁴சித்தங் ஞத்வா தா³ஸங் விய ஸல்லக்கே²தி. தஸ்மா ஸா ஏவமாஹ – ‘‘அஞ்ஞேஸங் க⁴ரே தா³ருபண்ணலோணாதீ³னி ஸன்னிஹிதானி; பா³ஹிரதோ ஆஹரித்வா தா³யகா பேஸகாரகாபி அத்தி². அஹங் பன ஏகிகா; த்வம்பி ‘மய்ஹங் க⁴ரே இத³ங் அத்தி², இத³ங் நத்தீ²’தி ந ஜானாஸி. ஸசே இச்ச²ஸி பு⁴ஞ்ஜ, நோ சே இச்ச²ஸி மா பு⁴ஞ்ஜா’’தி. ஸோ ‘ந கேவலங் உஸ்ஸூரே ப⁴த்தங் ஆஹரஸி, வாசாயபி மங் க⁴ட்டேஸீ’தி குஜ்ஜி²த்வா அஞ்ஞங் பஹரணங் அபஸ்ஸந்தோ தமேவ தஸரத³ண்ட³கங் தஸரதோ லுஞ்சித்வா கி²பி. ஸா தங் ஆக³ச்ச²ந்தங் தி³ஸ்வா ஈஸகங் பரிவத்தி. தஸரத³ண்ட³கஸ்ஸ ச கோடி நாம திகி²ணா ஹோதி. ஸா தஸ்ஸா பரிவத்தமானாய அக்கி²கோடியங் பவிஸித்வா அட்டா²ஸி. ஸா உபோ⁴ஹி ஹத்தே²ஹி வேகே³ன அக்கி²ங் அக்³க³ஹேஸி. பி⁴ன்னட்டா²னதோ லோஹிதங் பக்³க⁴ரதி.
So pesakārakammaṃ uggaṇhitvā pesakārehi saddhiṃ sālāya kammaṃ karoti. Aññesaṃ itthiyo pātova bhattaṃ sampādetvā āhariṃsu. Tassa bhariyā na tāva āgacchati. So itaresu kammaṃ vissajjetvā bhuñjamānesu tasaraṃ vaṭṭento nisīdi. Sā pacchā āgamāsi. Atha naṃ so ‘aticirena āgatāsī’ti tajjesi. Mātugāmo ca nāma api cakkavattirājānaṃ attani paṭibaddhacittaṃ ñatvā dāsaṃ viya sallakkheti. Tasmā sā evamāha – ‘‘aññesaṃ ghare dārupaṇṇaloṇādīni sannihitāni; bāhirato āharitvā dāyakā pesakārakāpi atthi. Ahaṃ pana ekikā; tvampi ‘mayhaṃ ghare idaṃ atthi, idaṃ natthī’ti na jānāsi. Sace icchasi bhuñja, no ce icchasi mā bhuñjā’’ti. So ‘na kevalaṃ ussūre bhattaṃ āharasi, vācāyapi maṃ ghaṭṭesī’ti kujjhitvā aññaṃ paharaṇaṃ apassanto tameva tasaradaṇḍakaṃ tasarato luñcitvā khipi. Sā taṃ āgacchantaṃ disvā īsakaṃ parivatti. Tasaradaṇḍakassa ca koṭi nāma tikhiṇā hoti. Sā tassā parivattamānāya akkhikoṭiyaṃ pavisitvā aṭṭhāsi. Sā ubhohi hatthehi vegena akkhiṃ aggahesi. Bhinnaṭṭhānato lohitaṃ paggharati.
ஸோ தஸ்மிங் காலே உபஜ்ஜா²யஸ்ஸ வசனங் அனுஸ்ஸரி ‘இத³ங் ஸந்தா⁴ய மங் உபஜ்ஜா²யோ ‘‘அனாக³தே காலே காணபேஸகாரியா ஹத்தே²ன மத்³தி³தங் கஞ்ஜியங் பிவிஸ்ஸஸீ’’தி ஆஹ. இத³ங் தே²ரேன தி³ட்ட²ங் ப⁴விஸ்ஸதி. அஹோ தீ³க⁴த³ஸ்ஸீ அய்யோ’தி மஹாஸத்³தே³ன ரோதி³துங் ஆரபி⁴. தமேனங் அஞ்ஞே ‘‘அலங், ஆவுஸோ, மா ரோதி³; அக்கி² நாம பி⁴ன்னங் ந ஸக்கா ரோத³னேன படிபாகதிகங் காது’’ந்தி ஆஹங்ஸு. ஸோ ‘‘நாஹங் ஏதமத்த²ங் ரோதா³மி; அபிச கோ² இத³ங் ஸந்தா⁴ய ரோதா³மீ’’தி ஸப்³ப³ங் பவத்திங் படிபாடியா கதே²ஸி. ஏவங் உப்பன்னா ஸமத²விபஸ்ஸனா நிருஜ்ஜ²மானா அனத்தா²ய ஸங்வத்தந்தி.
So tasmiṃ kāle upajjhāyassa vacanaṃ anussari ‘idaṃ sandhāya maṃ upajjhāyo ‘‘anāgate kāle kāṇapesakāriyā hatthena madditaṃ kañjiyaṃ pivissasī’’ti āha. Idaṃ therena diṭṭhaṃ bhavissati. Aho dīghadassī ayyo’ti mahāsaddena rodituṃ ārabhi. Tamenaṃ aññe ‘‘alaṃ, āvuso, mā rodi; akkhi nāma bhinnaṃ na sakkā rodanena paṭipākatikaṃ kātu’’nti āhaṃsu. So ‘‘nāhaṃ etamatthaṃ rodāmi; apica kho idaṃ sandhāya rodāmī’’ti sabbaṃ pavattiṃ paṭipāṭiyā kathesi. Evaṃ uppannā samathavipassanā nirujjhamānā anatthāya saṃvattanti.
அபரம்பி வத்து² – திங்ஸமத்தா பி⁴க்கூ² கல்யாணியங் மஹாசேதியங் வந்தி³த்வா அடவிமக்³கே³ன மஹாமக்³க³ங் ஓதரமானா அந்தராமக்³கே³ ஜா²மக்கெ²த்தே கம்மங் கத்வா ஆக³ச்ச²ந்தங் ஏகங் மனுஸ்ஸங் அத்³த³ஸங்ஸு. தஸ்ஸ ஸரீரங் மஸிமக்கி²தங் ஹோதி, மஸிமக்கி²தமேவ ச ஏகங் காஸாவங் கச்ச²ங் பீளெத்வா நிவத்த²ங். ஓலோகியமானோ ஜா²மகா²ணுகோ விய கா²யதி. ஸோ தி³வஸபா⁴கே³ கம்மங் கத்வா உபட்³ட⁴ஜா²யமானானங் தா³ரூனங் கலாபங் உக்கி²பித்வா பிட்டி²யங் விப்பகிண்ணேஹி கேஸேஹி கும்மக்³கே³ன ஆக³ந்த்வா பி⁴க்கூ²னங் ஸம்முகே² அட்டா²ஸி. ஸாமணேரா தி³ஸ்வா அஞ்ஞமஞ்ஞங் ஓலோகயமானா ‘‘ஆவுஸோ, துய்ஹங் பிதா, துய்ஹங் மஹாபிதா, துய்ஹங் மாதுலோ’’தி ஹஸமானா க³ந்த்வா ‘‘கோ நாமோஸி த்வங், உபாஸகா’’தி நாமங் புச்சி²ங்ஸு. ஸோ நாமங் புச்சி²தோ விப்படிஸாரீ ஹுத்வா தா³ருகலாபங் ச²ட்³டெ³த்வா வத்த²ங் ஸங்விதா⁴ய நிவாஸெத்வா மஹாதே²ரே வந்தி³த்வா ‘‘திட்ட²த² தாவ, ப⁴ந்தே’’தி ஆஹ. மஹாதே²ரா அட்ட²ங்ஸு.
Aparampi vatthu – tiṃsamattā bhikkhū kalyāṇiyaṃ mahācetiyaṃ vanditvā aṭavimaggena mahāmaggaṃ otaramānā antarāmagge jhāmakkhette kammaṃ katvā āgacchantaṃ ekaṃ manussaṃ addasaṃsu. Tassa sarīraṃ masimakkhitaṃ hoti, masimakkhitameva ca ekaṃ kāsāvaṃ kacchaṃ pīḷetvā nivatthaṃ. Olokiyamāno jhāmakhāṇuko viya khāyati. So divasabhāge kammaṃ katvā upaḍḍhajhāyamānānaṃ dārūnaṃ kalāpaṃ ukkhipitvā piṭṭhiyaṃ vippakiṇṇehi kesehi kummaggena āgantvā bhikkhūnaṃ sammukhe aṭṭhāsi. Sāmaṇerā disvā aññamaññaṃ olokayamānā ‘‘āvuso, tuyhaṃ pitā, tuyhaṃ mahāpitā, tuyhaṃ mātulo’’ti hasamānā gantvā ‘‘ko nāmosi tvaṃ, upāsakā’’ti nāmaṃ pucchiṃsu. So nāmaṃ pucchito vippaṭisārī hutvā dārukalāpaṃ chaḍḍetvā vatthaṃ saṃvidhāya nivāsetvā mahāthere vanditvā ‘‘tiṭṭhatha tāva, bhante’’ti āha. Mahātherā aṭṭhaṃsu.
த³ஹரஸாமணேரா ஆக³ந்த்வா மஹாதே²ரானங் ஸம்முகா²பி பரிஹாஸங் கரொந்தி. உபாஸகோ ஆஹ – ‘‘ப⁴ந்தே, தும்ஹே மங் பஸ்ஸித்வா பரிஹஸத²; எத்தகேனேவ மத்த²கங் பத்தம்ஹாதி ஸல்லக்கே²த². அஹம்பி புப்³பே³ தும்ஹாதி³ஸோவ ஸமணோ அஹோஸிங். தும்ஹாகங் பன சித்தேகக்³க³தாமத்தம்பி நத்தி². அஹங் இமஸ்மிங் ஸாஸனே மஹித்³தி⁴கோ மஹானுபா⁴வோ அஹோஸிங்; ஆகாஸங் க³ஹெத்வா பத²விங் கரோமி, பத²விங் ஆகாஸங்; தூ³ரங் க³ண்ஹித்வா ஸந்திகங் கரோமி, ஸந்திகங் தூ³ரங்; சக்கவாளஸஹஸ்ஸங் க²ணேன வினிவிஜ்ஜா²மி. ஹத்தே² மே பஸ்ஸத²; இதா³னி பன மக்கடஹத்த²ஸதி³ஸா. அஹங் இமேஹேவ ஹத்தே²ஹி இத⁴ நிஸின்னோவ சந்தி³மஸூரியே பராமஸிங். இமேஸங்யேவ பாதா³னங் சந்தி³மஸூரியே பாத³கத²லிகங் கத்வா நிஸீதி³ங். ஏவரூபா மே இத்³தி⁴ பமாதே³ன அந்தரஹிதா. தும்ஹே மா பமஜ்ஜித்த². பமாதே³ன ஹி ஏவரூபங் ப்³யஸனங் பாபுணந்தி. அப்பமத்தா விஹரந்தா ஜாதிஜராமரணஸ்ஸ அந்தங் கரொந்தி. தஸ்மா தும்ஹே மஞ்ஞேவ ஆரம்மணங் கரித்வா அப்பமத்தா ஹோத², ப⁴ந்தே’’தி தஜ்ஜெத்வா ஓவாத³மதா³ஸி. தே தஸ்ஸ கதெ²ந்தஸ்ஸேவ ஸங்வேக³ங் ஆபஜ்ஜித்வா விபஸ்ஸமானா திங்ஸ ஜனா தத்தே²வ அரஹத்தங் பாபுணிங்ஸூதி. ஏவம்பி உப்பன்னா ஸமத²விபஸ்ஸனா நிருஜ்ஜ²மானா அனத்தா²ய ஸங்வத்தந்தீதி வேதி³தப்³பா³. அயங் தாவ லோகியஸம்மப்பதா⁴னகதா²ய வினிச்ச²யோ.
Daharasāmaṇerā āgantvā mahātherānaṃ sammukhāpi parihāsaṃ karonti. Upāsako āha – ‘‘bhante, tumhe maṃ passitvā parihasatha; ettakeneva matthakaṃ pattamhāti sallakkhetha. Ahampi pubbe tumhādisova samaṇo ahosiṃ. Tumhākaṃ pana cittekaggatāmattampi natthi. Ahaṃ imasmiṃ sāsane mahiddhiko mahānubhāvo ahosiṃ; ākāsaṃ gahetvā pathaviṃ karomi, pathaviṃ ākāsaṃ; dūraṃ gaṇhitvā santikaṃ karomi, santikaṃ dūraṃ; cakkavāḷasahassaṃ khaṇena vinivijjhāmi. Hatthe me passatha; idāni pana makkaṭahatthasadisā. Ahaṃ imeheva hatthehi idha nisinnova candimasūriye parāmasiṃ. Imesaṃyeva pādānaṃ candimasūriye pādakathalikaṃ katvā nisīdiṃ. Evarūpā me iddhi pamādena antarahitā. Tumhe mā pamajjittha. Pamādena hi evarūpaṃ byasanaṃ pāpuṇanti. Appamattā viharantā jātijarāmaraṇassa antaṃ karonti. Tasmā tumhe maññeva ārammaṇaṃ karitvā appamattā hotha, bhante’’ti tajjetvā ovādamadāsi. Te tassa kathentasseva saṃvegaṃ āpajjitvā vipassamānā tiṃsa janā tattheva arahattaṃ pāpuṇiṃsūti. Evampi uppannā samathavipassanā nirujjhamānā anatthāya saṃvattantīti veditabbā. Ayaṃ tāva lokiyasammappadhānakathāya vinicchayo.
லோகுத்தரமக்³க³க்க²ணே பனேதங் ஏகமேவ வீரியங் சதுகிச்சஸாத⁴னவஸேன சத்தாரி நாமானி லப⁴தி. தத்த² அனுப்பன்னானந்தி அஸமுதா³சாரவஸேன வா அனநுபூ⁴தாரம்மணவஸேன வா அனுப்பன்னானங்; அஞ்ஞதா² ஹி அனமதக்³கே³ ஸங்ஸாரே அனுப்பன்னா பாபகா அகுஸலா த⁴ம்மா நாம நத்தி². அனுப்பன்னா பன உப்பஜ்ஜமானாபி ஏதேயேவ உப்பஜ்ஜந்தி , பஹீயமானாபி ஏதேயேவ பஹீயந்தி.
Lokuttaramaggakkhaṇe panetaṃ ekameva vīriyaṃ catukiccasādhanavasena cattāri nāmāni labhati. Tattha anuppannānanti asamudācāravasena vā ananubhūtārammaṇavasena vā anuppannānaṃ; aññathā hi anamatagge saṃsāre anuppannā pāpakā akusalā dhammā nāma natthi. Anuppannā pana uppajjamānāpi eteyeva uppajjanti , pahīyamānāpi eteyeva pahīyanti.
தத்த² ஏகச்சஸ்ஸ வத்தவஸேன கிலேஸா ந ஸமுதா³சரந்தி. ஏகச்சஸ்ஸ க³ந்த²து⁴தங்க³ஸமாதி⁴விபஸ்ஸனா நவகம்மிகானங் அஞ்ஞதரவஸேன. கத²ங்? ஏகச்சோ ஹி வத்தஸம்பன்னோ ஹோதி. தஸ்ஸ த்³வாஸீதிகு²த்³த³கவத்தானி (சூளவ॰ 243 ஆத³யோ), சுத்³த³ஸ மஹாவத்தானி (சூளவ॰ 356 ஆத³யோ), சேதியங்க³ணபோ³தி⁴யங்க³ணபானீயமாளஉபோஸதா²கா³ரஆக³ந்துகக³மிகவத்தானி ச கரொந்தஸ்ஸேவ கிலேஸா ஓகாஸங் ந லப⁴ந்தி; அபரபா⁴கே³ பனஸ்ஸ வத்தங் விஸ்ஸஜ்ஜெத்வா பி⁴ன்னவத்தஸ்ஸ விசரதோ அயோனிஸோமனஸிகாரஞ்சேவ ஸதிவொஸ்ஸக்³க³ஞ்ச ஆக³ம்ம உப்பஜ்ஜந்தி. ஏவங் அஸமுதா³சாரவஸேன அனுப்பன்னா உப்பஜ்ஜந்தி நாம.
Tattha ekaccassa vattavasena kilesā na samudācaranti. Ekaccassa ganthadhutaṅgasamādhivipassanā navakammikānaṃ aññataravasena. Kathaṃ? Ekacco hi vattasampanno hoti. Tassa dvāsītikhuddakavattāni (cūḷava. 243 ādayo), cuddasa mahāvattāni (cūḷava. 356 ādayo), cetiyaṅgaṇabodhiyaṅgaṇapānīyamāḷauposathāgāraāgantukagamikavattāni ca karontasseva kilesā okāsaṃ na labhanti; aparabhāge panassa vattaṃ vissajjetvā bhinnavattassa vicarato ayonisomanasikārañceva sativossaggañca āgamma uppajjanti. Evaṃ asamudācāravasena anuppannā uppajjanti nāma.
ஏகச்சோ க³ந்த²யுத்தோ ஹோதி; ஏகம்பி நிகாயங் க³ண்ஹாதி, த்³வேபி, தயோபி, சத்தாரோபி, பஞ்சபி. தஸ்ஸேவ தேபிடகங் பு³த்³த⁴வசனங் அத்த²வஸேன பாளிவஸேன அனுஸந்தி⁴வஸேன புப்³பா³பரவஸேன க³ண்ஹந்தஸ்ஸ ஸஜ்ஜா²யந்தஸ்ஸ சிந்தெந்தஸ்ஸ வாசெந்தஸ்ஸ தே³ஸெந்தஸ்ஸ பகாஸெந்தஸ்ஸ கிலேஸா ஓகாஸங் ந லப⁴ந்தி; அபரபா⁴கே³ பனஸ்ஸ க³ந்த²கம்மங் பஹாய குஸீதஸ்ஸ விசரதோ அயோனிஸோமனஸிகாரஸதிவொஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா உப்பஜ்ஜந்தி நாம.
Ekacco ganthayutto hoti; ekampi nikāyaṃ gaṇhāti, dvepi, tayopi, cattāropi, pañcapi. Tasseva tepiṭakaṃ buddhavacanaṃ atthavasena pāḷivasena anusandhivasena pubbāparavasena gaṇhantassa sajjhāyantassa cintentassa vācentassa desentassa pakāsentassa kilesā okāsaṃ na labhanti; aparabhāge panassa ganthakammaṃ pahāya kusītassa vicarato ayonisomanasikārasativossagge āgamma uppajjanti. Evampi asamudācāravasena anuppannā uppajjanti nāma.
ஏகச்சோ பன து⁴தங்க³த⁴ரோ ஹோதி, தேரஸ து⁴தங்க³கு³ணே ஸமாதா³ய வத்ததி. தஸ்ஸ து⁴தங்க³கு³ணே பரிஹரந்தஸ்ஸ கிலேஸா ஓகாஸங் ந லப⁴ந்தி; அபரபா⁴கே³ பனஸ்ஸ து⁴தங்கா³னி விஸ்ஸஜ்ஜெத்வா பா³ஹுல்லாய ஆவட்டஸ்ஸ விசரதோ அயோனிஸோமனஸிகாரஸதிவொஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா உப்பஜ்ஜந்தி நாம.
Ekacco pana dhutaṅgadharo hoti, terasa dhutaṅgaguṇe samādāya vattati. Tassa dhutaṅgaguṇe pariharantassa kilesā okāsaṃ na labhanti; aparabhāge panassa dhutaṅgāni vissajjetvā bāhullāya āvaṭṭassa vicarato ayonisomanasikārasativossagge āgamma uppajjanti. Evampi asamudācāravasena anuppannā uppajjanti nāma.
ஏகச்சோ பன அட்ட²ஸு ஸமாபத்தீஸு சிண்ணவஸீ ஹோதி. தஸ்ஸ பட²மஜ்ஜா²னாதீ³ஸு ஆவஜ்ஜனவஸீஆதீ³னங் வஸேன விஹரந்தஸ்ஸ கிலேஸா ஓகாஸங் ந லப⁴ந்தி; அபரபா⁴கே³ பனஸ்ஸ பரிஹீனஜ்ஜா²னஸ்ஸ வா விஸ்ஸட்ட²ஜ்ஜா²னஸ்ஸ வா ப⁴ஸ்ஸாதீ³ஸு அனுயுத்தஸ்ஸ விஹரதோ அயோனிஸோமனஸிகாரஸதிவொஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா கிலேஸா உப்பஜ்ஜந்தி நாம.
Ekacco pana aṭṭhasu samāpattīsu ciṇṇavasī hoti. Tassa paṭhamajjhānādīsu āvajjanavasīādīnaṃ vasena viharantassa kilesā okāsaṃ na labhanti; aparabhāge panassa parihīnajjhānassa vā vissaṭṭhajjhānassa vā bhassādīsu anuyuttassa viharato ayonisomanasikārasativossagge āgamma uppajjanti. Evampi asamudācāravasena anuppannā kilesā uppajjanti nāma.
ஏகச்சோ பன விபஸ்ஸகோ ஹோதி; ஸத்தஸு வா விபஸ்ஸனாஸு அட்டா²ரஸஸு வா மஹாவிபஸ்ஸனாஸு கம்மங் கரொந்தோ விஹரதி. தஸ்ஸேவங் விஹரதோ கிலேஸா ஓகாஸங் ந லப⁴ந்தி; அபரபா⁴கே³ பனஸ்ஸ விபஸ்ஸனாகம்மங் பஹாய காயத³ள்ஹீப³ஹுலஸ்ஸ விஹரதோ அயோனிஸோமனஸிகாரஸதிவொஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா கிலேஸா உப்பஜ்ஜந்தி நாம.
Ekacco pana vipassako hoti; sattasu vā vipassanāsu aṭṭhārasasu vā mahāvipassanāsu kammaṃ karonto viharati. Tassevaṃ viharato kilesā okāsaṃ na labhanti; aparabhāge panassa vipassanākammaṃ pahāya kāyadaḷhībahulassa viharato ayonisomanasikārasativossagge āgamma uppajjanti. Evampi asamudācāravasena anuppannā kilesā uppajjanti nāma.
ஏகச்சோ பன நவகம்மிகோ ஹோதி, உபோஸதா²கா³ரபோ⁴ஜனஸாலாதீ³னி கரோதி. தஸ்ஸ தேஸங் உபகரணானி சிந்தெந்தஸ்ஸ கிலேஸா ஓகாஸங் ந லப⁴ந்தி; அபரபா⁴கே³ பனஸ்ஸ நவகம்மே நிட்டி²தே வா விஸ்ஸட்டே² வா அயோனிஸோமனஸிகாரஸதிவொஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா கிலேஸா உப்பஜ்ஜந்தி நாம.
Ekacco pana navakammiko hoti, uposathāgārabhojanasālādīni karoti. Tassa tesaṃ upakaraṇāni cintentassa kilesā okāsaṃ na labhanti; aparabhāge panassa navakamme niṭṭhite vā vissaṭṭhe vā ayonisomanasikārasativossagge āgamma uppajjanti. Evampi asamudācāravasena anuppannā kilesā uppajjanti nāma.
ஏகச்சோ பன ப்³ரஹ்மலோகா ஆக³தோ ஸுத்³த⁴ஸத்தோ ஹோதி. தஸ்ஸ அனாஸேவனாய கிலேஸா ஓகாஸங் ந லப⁴ந்தி; அபரபா⁴கே³ பனஸ்ஸ லத்³தா⁴ஸேவனஸ்ஸ அயோனிஸோமனஸிகாரஸதிவொஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா கிலேஸா உப்பஜ்ஜந்தி நாம. ஏவங் தாவ அஸமுசாரவஸேன அனுப்பன்னதா வேதி³தப்³பா³.
Ekacco pana brahmalokā āgato suddhasatto hoti. Tassa anāsevanāya kilesā okāsaṃ na labhanti; aparabhāge panassa laddhāsevanassa ayonisomanasikārasativossagge āgamma uppajjanti. Evampi asamudācāravasena anuppannā kilesā uppajjanti nāma. Evaṃ tāva asamucāravasena anuppannatā veditabbā.
கத²ங் அனநுபூ⁴தாரம்மணவஸேன? இதே⁴கச்சோ அனநுபூ⁴தபுப்³ப³ங் மனாபியாதி³பே⁴த³ங் ஆரம்மணங் லப⁴தி. தஸ்ஸ தத்த² அயோனிஸோமனஸிகாரஸதிவொஸ்ஸக்³கே³ ஆக³ம்ம ராகா³த³யோ கிலேஸா உப்பஜ்ஜந்தி. ஏவங் அனநுபூ⁴தாரம்மணவஸேன அனுப்பன்னா உப்பஜ்ஜந்தி நாம. லோகுத்தரமக்³க³க்க²ணே பன ஏகமேவ வீரியங்.
Kathaṃ ananubhūtārammaṇavasena? Idhekacco ananubhūtapubbaṃ manāpiyādibhedaṃ ārammaṇaṃ labhati. Tassa tattha ayonisomanasikārasativossagge āgamma rāgādayo kilesā uppajjanti. Evaṃ ananubhūtārammaṇavasena anuppannā uppajjanti nāma. Lokuttaramaggakkhaṇe pana ekameva vīriyaṃ.
யே ச ஏவங் அனுப்பன்னா உப்பஜ்ஜெய்யுங், தே யதா² நேவ உப்பஜ்ஜந்தி, ஏவங் நேஸங் அனுப்பாத³கிச்சங் உப்பன்னானஞ்ச பஹானகிச்சங் ஸாதே⁴தி. தஸ்மா உப்பன்னானங் பாபகானந்தி எத்த² பன சதுப்³பி³த⁴ங் உப்பன்னங் – வத்தமானுப்பன்னங், பு⁴த்வா விக³துப்பன்னங், ஓகாஸகதுப்பன்னங், பூ⁴மிலத்³து⁴ப்பன்னந்தி. தத்த² யே கிலேஸா விஜ்ஜமானா உப்பாதா³தி³ஸமங்கி³னோ – இத³ங் வத்தமானுப்பன்னங் நாம. கம்மே பன ஜவிதே ஆரம்மணரஸங் அனுப⁴வித்வா நிருத்³த⁴விபாகோ பு⁴த்வா விக³தங் நாம. கம்மங் உப்பஜ்ஜித்வா நிருத்³த⁴ங் பு⁴த்வா விக³தங் நாம. தது³ப⁴யம்பி பு⁴த்வா விக³துப்பன்னந்தி ஸங்க²ங் க³ச்ச²தி. குஸலாகுஸலகம்மங் அஞ்ஞஸ்ஸ கம்மஸ்ஸ விபாகங் படிபா³ஹித்வா அத்தனோ விபாகஸ்ஸ ஓகாஸங் கரோதி. ஏவங் கதே ஓகாஸே விபாகோ உப்பஜ்ஜமானோ ஓகாஸகரணதோ பட்டா²ய உப்பன்னோதி வுச்சதி. இத³ங் ஓகாஸகதுப்பன்னங் நாம.
Ye ca evaṃ anuppannā uppajjeyyuṃ, te yathā neva uppajjanti, evaṃ nesaṃ anuppādakiccaṃ uppannānañca pahānakiccaṃ sādheti. Tasmā uppannānaṃ pāpakānanti ettha pana catubbidhaṃ uppannaṃ – vattamānuppannaṃ, bhutvā vigatuppannaṃ, okāsakatuppannaṃ, bhūmiladdhuppannanti. Tattha ye kilesā vijjamānā uppādādisamaṅgino – idaṃ vattamānuppannaṃ nāma. Kamme pana javite ārammaṇarasaṃ anubhavitvā niruddhavipāko bhutvā vigataṃ nāma. Kammaṃ uppajjitvā niruddhaṃ bhutvā vigataṃ nāma. Tadubhayampi bhutvā vigatuppannanti saṅkhaṃ gacchati. Kusalākusalakammaṃ aññassa kammassa vipākaṃ paṭibāhitvā attano vipākassa okāsaṃ karoti. Evaṃ kate okāse vipāko uppajjamāno okāsakaraṇato paṭṭhāya uppannoti vuccati. Idaṃ okāsakatuppannaṃ nāma.
பஞ்சக்க²ந்தா⁴ பன விபஸ்ஸனாய பூ⁴மி நாம. தே அதீதாதி³பே⁴தா³ ஹொந்தி. தேஸு அனுஸயிதகிலேஸா பன அதீதா வா அனாக³தா வா பச்சுப்பன்னா வாதி ந வத்தப்³பா³. அதீதக்க²ந்தே⁴ஸு அனுஸயிதாபி ஹி அப்பஹீனாவ ஹொந்தி. அனாக³தக்க²ந்தே⁴ஸு, பச்சுப்பன்னக்க²ந்தே⁴ஸு அனுஸயிதாபி அப்பஹீனாவ ஹொந்தி. இத³ங் பூ⁴மிலத்³து⁴ப்பன்னங் நாம. தேனாஹு போராணா – ‘‘தாஸு தாஸு பூ⁴மீஸு அஸமுக்³கா⁴திதா கிலேஸா பூ⁴மிலத்³து⁴ப்பன்னாதி ஸங்க²ங் க³ச்ச²ந்தீ’’தி.
Pañcakkhandhā pana vipassanāya bhūmi nāma. Te atītādibhedā honti. Tesu anusayitakilesā pana atītā vā anāgatā vā paccuppannā vāti na vattabbā. Atītakkhandhesu anusayitāpi hi appahīnāva honti. Anāgatakkhandhesu, paccuppannakkhandhesu anusayitāpi appahīnāva honti. Idaṃ bhūmiladdhuppannaṃ nāma. Tenāhu porāṇā – ‘‘tāsu tāsu bhūmīsu asamugghātitā kilesā bhūmiladdhuppannāti saṅkhaṃ gacchantī’’ti.
அபரம்பி சதுப்³பி³த⁴ங் உப்பன்னங் – ஸமுதா³சாருப்பன்னங், ஆரம்மணாதி⁴க³ஹிதுப்பன்னங், அவிக்க²ம்பி⁴துப்பன்னங், அஸமுக்³தா⁴திதுப்பன்னந்தி. தத்த² ஸம்பதி வத்தமானங்யேவ ‘ஸமுதா³சாருப்பன்னங்’ நாம. ஸகிங் சக்கூ²னி உம்மீலெத்வா ஆரம்மணே நிமித்தே க³ஹிதே அனுஸ்ஸரிதானுஸ்ஸரிதக்க²ணே கிலேஸா நுப்பஜ்ஜிஸ்ஸந்தீதி ந வத்தப்³பா³. கஸ்மா? ஆரம்மணஸ்ஸ அதி⁴க³ஹிதத்தா. யதா² கிங்? யதா² கீ²ரருக்க²ஸ்ஸ குடா²ரியா ஆஹதாஹதட்டா²னே கீ²ரங் ந நிக்க²மிஸ்ஸதீதி ந வத்தப்³ப³ங், ஏவங். இத³ங் ‘ஆரம்மணாதி⁴க³ஹிதுப்பன்னங்’ நாம. ஸமாபத்தியா அவிக்க²ம்பி⁴தகிலேஸா பன இமஸ்மிங் நாம டா²னே நுப்பஜ்ஜிஸ்ஸந்தீதி ந வத்தப்³பா³. கஸ்மா? அவிக்க²ம்பி⁴தத்தா. யதா² கிங்? யதா² ஸசே கீ²ரருக்க²ங் குடா²ரியா ஆஹனெய்யுங், ‘இமஸ்மிங் நாம டா²னே கீ²ரங் ந நிக்க²மெய்யா’தி ந வத்தப்³ப³ங், ஏவங். இத³ங் ‘அவிக்க²ம்பி⁴துப்பன்னங்’ நாம. மக்³கே³ன அஸமுக்³கா⁴திதகிலேஸா பன ப⁴வக்³கே³ நிப்³ப³த்தஸ்ஸாபி நுப்பஜ்ஜிஸ்ஸந்தீதி புரிமனயேனேவ வித்தா²ரேதப்³ப³ங். இத³ங் ‘அஸமுக்³கா⁴திதுப்பன்னங்’ நாம.
Aparampi catubbidhaṃ uppannaṃ – samudācāruppannaṃ, ārammaṇādhigahituppannaṃ, avikkhambhituppannaṃ, asamugdhātituppannanti. Tattha sampati vattamānaṃyeva ‘samudācāruppannaṃ’ nāma. Sakiṃ cakkhūni ummīletvā ārammaṇe nimitte gahite anussaritānussaritakkhaṇe kilesā nuppajjissantīti na vattabbā. Kasmā? Ārammaṇassa adhigahitattā. Yathā kiṃ? Yathā khīrarukkhassa kuṭhāriyā āhatāhataṭṭhāne khīraṃ na nikkhamissatīti na vattabbaṃ, evaṃ. Idaṃ ‘ārammaṇādhigahituppannaṃ’ nāma. Samāpattiyā avikkhambhitakilesā pana imasmiṃ nāma ṭhāne nuppajjissantīti na vattabbā. Kasmā? Avikkhambhitattā. Yathā kiṃ? Yathā sace khīrarukkhaṃ kuṭhāriyā āhaneyyuṃ, ‘imasmiṃ nāma ṭhāne khīraṃ na nikkhameyyā’ti na vattabbaṃ, evaṃ. Idaṃ ‘avikkhambhituppannaṃ’ nāma. Maggena asamugghātitakilesā pana bhavagge nibbattassāpi nuppajjissantīti purimanayeneva vitthāretabbaṃ. Idaṃ ‘asamugghātituppannaṃ’ nāma.
இமேஸு உப்பன்னேஸு வத்தமானுப்பன்னங், பு⁴த்வாவிக³துப்பன்னங், ஓகாஸகதுப்பன்னங், ஸமுதா³சாருப்பன்னந்தி சதுப்³பி³த⁴ங் உப்பன்னங் ந மக்³க³வஜ்ஜ²ங்; பூ⁴மிலத்³து⁴ப்பன்னங், ஆரம்மணாதி⁴க்³க³ஹிதுப்பன்னங், அவிக்க²ம்பி⁴துப்பன்னங், அஸமுக்³கா⁴திதுப்பன்னந்தி சதுப்³பி³த⁴ங் மக்³க³வஜ்ஜ²ங். மக்³கோ³ ஹி உப்பஜ்ஜமானோ ஏதே கிலேஸே பஜஹதி. ஸோ யே கிலேஸே பஜஹதி, தே அதீதா வா அனாக³தா வா பச்சுப்பன்னா வாதி ந வத்தப்³பா³. வுத்தம்பி சேதங் –
Imesu uppannesu vattamānuppannaṃ, bhutvāvigatuppannaṃ, okāsakatuppannaṃ, samudācāruppannanti catubbidhaṃ uppannaṃ na maggavajjhaṃ; bhūmiladdhuppannaṃ, ārammaṇādhiggahituppannaṃ, avikkhambhituppannaṃ, asamugghātituppannanti catubbidhaṃ maggavajjhaṃ. Maggo hi uppajjamāno ete kilese pajahati. So ye kilese pajahati, te atītā vā anāgatā vā paccuppannā vāti na vattabbā. Vuttampi cetaṃ –
‘‘ஹஞ்சி அதீதே கிலேஸே பஜஹதி, தேன ஹி கீ²ணங் கே²பேதி, நிருத்³த⁴ங் நிரோதே⁴தி, விக³தங் விக³மேதி, அத்த²ங்க³தங் அத்த²ங் க³மேதி, அதீதங் யங் நத்தி² தங் பஜஹதி. ஹஞ்சி அனாக³தே கிலேஸே பஜஹதி, தேன ஹி அஜாதங் பஜஹதி, அனிப்³ப³த்தங் அனுப்பன்னங் அபாதுபூ⁴தங் பஜஹதி, அனாக³தங் யங் நத்தி² தங் பஜஹதி. ஹஞ்சி பச்சுப்பன்னே கிலேஸே பஜஹதி, தேன ஹி ரத்தோ ராக³ங் பஜஹதி, து³ட்டோ² தோ³ஸங், மூள்ஹோ மோஹங், வினிப³த்³தோ⁴ மானங், பராமட்டோ² தி³ட்டி²ங், விக்கே²பக³தோ உத்³த⁴ச்சங், அனிட்ட²ங்க³தோ விசிகிச்ச²ங், தா²மக³தோ அனுஸயங் பஜஹதி; கண்ஹஸுக்கத⁴ம்மா யுக³னத்³தா⁴ ஸமமேவ வத்தந்தி; ஸங்கிலேஸிகா மக்³க³பா⁴வனா ஹோதி…பே॰… தேன ஹி நத்தி² மக்³க³பா⁴வனா, நத்தி² ப²லஸச்சி²கிரியா, நத்தி² கிலேஸப்பஹானங், நத்தி² த⁴ம்மாபி⁴ஸமயோ’தி. ‘அத்தி² மக்³க³பா⁴வனா…பே॰… அத்தி² த⁴ம்மாபி⁴ஸமயோ’தி. யதா² கத²ங் விய? ஸெய்யதா²பி தருணோ ருக்கோ²…பே॰… அபாதுபூ⁴தானேவ ந பாதுப⁴வந்தி’’தி (படி॰ ம॰ 3.21).
‘‘Hañci atīte kilese pajahati, tena hi khīṇaṃ khepeti, niruddhaṃ nirodheti, vigataṃ vigameti, atthaṅgataṃ atthaṃ gameti, atītaṃ yaṃ natthi taṃ pajahati. Hañci anāgate kilese pajahati, tena hi ajātaṃ pajahati, anibbattaṃ anuppannaṃ apātubhūtaṃ pajahati, anāgataṃ yaṃ natthi taṃ pajahati. Hañci paccuppanne kilese pajahati, tena hi ratto rāgaṃ pajahati, duṭṭho dosaṃ, mūḷho mohaṃ, vinibaddho mānaṃ, parāmaṭṭho diṭṭhiṃ, vikkhepagato uddhaccaṃ, aniṭṭhaṅgato vicikicchaṃ, thāmagato anusayaṃ pajahati; kaṇhasukkadhammā yuganaddhā samameva vattanti; saṃkilesikā maggabhāvanā hoti…pe… tena hi natthi maggabhāvanā, natthi phalasacchikiriyā, natthi kilesappahānaṃ, natthi dhammābhisamayo’ti. ‘Atthi maggabhāvanā…pe… atthi dhammābhisamayo’ti. Yathā kathaṃ viya? Seyyathāpi taruṇo rukkho…pe… apātubhūtāneva na pātubhavanti’’ti (paṭi. ma. 3.21).
இதி பாளியங் அஜாதப²லருக்கோ² ஆக³தோ; ஜாதப²லருக்கே²ன பன தீ³பேதப்³ப³ங். யதா² ஹி ஸப²லோ தருணஅம்ப³ருக்கோ². தஸ்ஸ ப²லானி மனுஸ்ஸா பரிபு⁴ஞ்ஜெய்யுங், ஸேஸானி பாதெத்வா பச்சி²யோ பூரெய்யுங். அத²ஞ்ஞோ புரிஸோ தங் ப²ரஸுனா சி²ந்தெ³ய்ய. தேனஸ்ஸ நேவ அதீதானி ப²லானி நாஸிதானி ஹொந்தி, ந அனாக³தபச்சுப்பன்னானி ச நாஸிதானி; அதீதானி ஹி மனுஸ்ஸேஹி பரிபு⁴த்தானி, அனாக³தானி அனிப்³ப³த்தானி ந ஸக்கா நாஸேதுங் . யஸ்மிங் பன ஸமயே ஸோ சி²ன்னோ ததா³ ப²லானியேவ நத்தீ²தி பச்சுப்பன்னானிபி அனாஸிதானி. ஸசே பன ருக்கோ² அச்சி²ன்னோ அஸ்ஸ, அத²ஸ்ஸ பத²வீரஸஞ்ச ஆபோரஸஞ்ச ஆக³ம்ம யானி ப²லானி நிப்³ப³த்தெய்யுங், தானி நாஸிதானி ஹொந்தி. தானி ஹி அஜாதானேவ ந ஜாயந்தி, அனிப்³ப³த்தானேவ ந நிப்³ப³த்தந்தி, அபாதுபூ⁴தானேவ ந பாதுப⁴வந்தி. ஏவமேவ மக்³கோ³ நாபி அதீதாதி³பே⁴தே³ கிலேஸே பஜஹதி, நாபி ந பஜஹதி. யேஸஞ்ஹி கிலேஸானங் மக்³கே³ன க²ந்தே⁴ஸு அபரிஞ்ஞாதேஸு உப்பத்தி ஸியா, மக்³கே³ன உப்பஜ்ஜித்வா க²ந்தா⁴னங் பரிஞ்ஞாதத்தா தே கிலேஸா அஜாதாவ ந ஜாயந்தி, அனிப்³ப³த்தாவ ந நிப்³ப³த்தந்தி, அபாதுபூ⁴தாவ ந பாதுப⁴வந்தி. தருணபுத்தாய இத்தி²யா புன அவிஜாயனத்த²ங் ப்³யாதி⁴தானங் ரோக³வூபஸமத்த²ங் பீதபே⁴ஸஜ்ஜேஹி சாபி அயமத்தோ² விபா⁴வேதப்³போ³. ஏவங் மக்³கோ³ யே கிலேஸே பஜஹதி, தே அதீதா வா அனாக³தா வா பச்சுப்பன்னா வாதி ந வத்தப்³பா³. ந ச மக்³கோ³ கிலேஸே ந பஜஹதி. யே பன மக்³கோ³ கிலேஸே பஜஹதி, தே ஸந்தா⁴ய ‘உப்பன்னானங் பாபகான’ந்திஆதி³ வுத்தங்.
Iti pāḷiyaṃ ajātaphalarukkho āgato; jātaphalarukkhena pana dīpetabbaṃ. Yathā hi saphalo taruṇaambarukkho. Tassa phalāni manussā paribhuñjeyyuṃ, sesāni pātetvā pacchiyo pūreyyuṃ. Athañño puriso taṃ pharasunā chindeyya. Tenassa neva atītāni phalāni nāsitāni honti, na anāgatapaccuppannāni ca nāsitāni; atītāni hi manussehi paribhuttāni, anāgatāni anibbattāni na sakkā nāsetuṃ . Yasmiṃ pana samaye so chinno tadā phalāniyeva natthīti paccuppannānipi anāsitāni. Sace pana rukkho acchinno assa, athassa pathavīrasañca āporasañca āgamma yāni phalāni nibbatteyyuṃ, tāni nāsitāni honti. Tāni hi ajātāneva na jāyanti, anibbattāneva na nibbattanti, apātubhūtāneva na pātubhavanti. Evameva maggo nāpi atītādibhede kilese pajahati, nāpi na pajahati. Yesañhi kilesānaṃ maggena khandhesu apariññātesu uppatti siyā, maggena uppajjitvā khandhānaṃ pariññātattā te kilesā ajātāva na jāyanti, anibbattāva na nibbattanti, apātubhūtāva na pātubhavanti. Taruṇaputtāya itthiyā puna avijāyanatthaṃ byādhitānaṃ rogavūpasamatthaṃ pītabhesajjehi cāpi ayamattho vibhāvetabbo. Evaṃ maggo ye kilese pajahati, te atītā vā anāgatā vā paccuppannā vāti na vattabbā. Na ca maggo kilese na pajahati. Ye pana maggo kilese pajahati, te sandhāya ‘uppannānaṃ pāpakāna’ntiādi vuttaṃ.
ந கேவலஞ்ச மக்³கோ³ கிலேஸேயேவ பஜஹதி, கிலேஸானங் பன அப்பஹீனத்தா யே உப்பஜ்ஜெய்யுங் உபாதி³ன்னக்க²ந்தா⁴, தேபி பஜஹதியேவ. வுத்தம்பி சேதங் ‘‘ஸோதாபத்திமக்³க³ஞாணேன அபி⁴ஸங்கா²ரவிஞ்ஞாணஸ்ஸ நிரோதே⁴ன ஸத்த ப⁴வே ட²பெத்வா அனமதக்³கே³ ஸங்ஸாரே யே உப்பஜ்ஜெய்யுங் நாமஞ்ச ரூபஞ்ச எத்தே²தே நிருஜ்ஜ²ந்தீ’’தி (சூளனி॰ அஜிதமாணவபுச்சா²னித்³தே³ஸ 6) வித்தா²ரோ. இதி மக்³கோ³ உபாதி³ன்னதோ அனுபாதி³ன்னதோ ச வுட்டா²தி. ப⁴வவஸேன பன ஸோதாபத்திமக்³கோ³ அபாயப⁴வதோ வுட்டா²தி . ஸகதா³கா³மிமக்³கோ³ ஸுக³திப⁴வேகதே³ஸதோ; அனாகா³மிமக்³கோ³ ஸுக³திகாமப⁴வதோ; வுட்டா²தி அரஹத்தமக்³கோ³ ரூபாரூபப⁴வதோ வுட்டா²தி, ஸப்³ப³ப⁴வேஹி வுட்டா²தியேவாதிபி வத³ந்தி.
Na kevalañca maggo kileseyeva pajahati, kilesānaṃ pana appahīnattā ye uppajjeyyuṃ upādinnakkhandhā, tepi pajahatiyeva. Vuttampi cetaṃ ‘‘sotāpattimaggañāṇena abhisaṅkhāraviññāṇassa nirodhena satta bhave ṭhapetvā anamatagge saṃsāre ye uppajjeyyuṃ nāmañca rūpañca etthete nirujjhantī’’ti (cūḷani. ajitamāṇavapucchāniddesa 6) vitthāro. Iti maggo upādinnato anupādinnato ca vuṭṭhāti. Bhavavasena pana sotāpattimaggo apāyabhavato vuṭṭhāti . Sakadāgāmimaggo sugatibhavekadesato; anāgāmimaggo sugatikāmabhavato; vuṭṭhāti arahattamaggo rūpārūpabhavato vuṭṭhāti, sabbabhavehi vuṭṭhātiyevātipi vadanti.
அத² மக்³க³க்க²ணே கத²ங் அனுப்பன்னானங் உப்பாதா³ய பா⁴வனா ஹோதி? கத²ங் வா உப்பன்னானங் டி²தியாதி? மக்³க³ப்பவத்தியா ஏவ. மக்³கோ³ ஹி பவத்தமானோ புப்³பே³ அனுப்பன்னபுப்³ப³த்தா அனுப்பன்னோ நாம வுச்சதி. அனாக³தபுப்³ப³ஞ்ஹி டா²னங் க³ந்த்வா அனநுபூ⁴தபுப்³ப³ங் வா ஆரம்மணங் அனுப⁴வித்வா வத்தாரோ ப⁴வந்தி – ‘அனாக³தட்டா²னங் ஆக³தம்ஹ, அனநுபூ⁴தங் ஆரம்மணங் அனுப⁴வாமா’தி. யா சஸ்ஸ பவத்தி, அயமேவ டி²தி நாமாதி டி²தியா பா⁴வேதீதி வத்துங் வட்டதி. ஏவமேதஸ்ஸ பி⁴க்கு²னோ இத³ங் லோகுத்தரமக்³க³க்க²ணே வீரியங் ‘‘அனுப்பன்னானங் பாபகானங் அகுஸலானங் த⁴ம்மானங் அனுப்பாதா³யா’’திஆதீ³னி சத்தாரி நாமானி லப⁴தி. அயங் லோகுத்தரமக்³க³க்க²ணே ஸம்மப்பதா⁴னகதா². ஏவமெத்த² லோகியலோகுத்தரமிஸ்ஸகா ஸம்மப்பதா⁴னா நித்³தி³ட்டா²தி.
Atha maggakkhaṇe kathaṃ anuppannānaṃ uppādāya bhāvanā hoti? Kathaṃ vā uppannānaṃ ṭhitiyāti? Maggappavattiyā eva. Maggo hi pavattamāno pubbe anuppannapubbattā anuppanno nāma vuccati. Anāgatapubbañhi ṭhānaṃ gantvā ananubhūtapubbaṃ vā ārammaṇaṃ anubhavitvā vattāro bhavanti – ‘anāgataṭṭhānaṃ āgatamha, ananubhūtaṃ ārammaṇaṃ anubhavāmā’ti. Yā cassa pavatti, ayameva ṭhiti nāmāti ṭhitiyā bhāvetīti vattuṃ vaṭṭati. Evametassa bhikkhuno idaṃ lokuttaramaggakkhaṇe vīriyaṃ ‘‘anuppannānaṃ pāpakānaṃ akusalānaṃ dhammānaṃ anuppādāyā’’tiādīni cattāri nāmāni labhati. Ayaṃ lokuttaramaggakkhaṇe sammappadhānakathā. Evamettha lokiyalokuttaramissakā sammappadhānā niddiṭṭhāti.
ஸுத்தந்தபா⁴ஜனீயவண்ணனா.
Suttantabhājanīyavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 8. ஸம்மப்பதா⁴னவிப⁴ங்கோ³ • 8. Sammappadhānavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 8. ஸம்மப்பதா⁴னவிப⁴ங்கோ³ • 8. Sammappadhānavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 8. ஸம்மப்பதா⁴னவிப⁴ங்கோ³ • 8. Sammappadhānavibhaṅgo
