১. সুত্তন্তভাজনীযৰণ্ণনা

1. Suttantabhājanīyavaṇṇanā

৪৩১. ইদানি তদনন্তরে ইদ্ধিপাদৰিভঙ্গে চত্তারোতি গণনপরিচ্ছেদো। ইদ্ধিপাদাতি এত্থ ইজ্ঝতীতি ইদ্ধি, সমিজ্ঝতি নিপ্ফজ্জতীতি অত্থো। ইজ্ঝন্তি ৰা এতায সত্তা ইদ্ধা ৰুদ্ধা উক্কংসগতা হোন্তীতিপি ইদ্ধি। পঠমেনত্থেন ইদ্ধি এৰ পাদো ইদ্ধিপাদো, ইদ্ধিকোট্ঠাসোতি অত্থো। দুতিযেনত্থেন ইদ্ধিযা পাদোতি ইদ্ধিপাদো; পাদোতি পতিট্ঠা, অধিগমুপাযোতি অত্থো। তেন হি যস্মা উপরূপরিৰিসেসসঙ্খাতং ইদ্ধিং পজ্জন্তি পাপুণন্তি, তস্মা পাদোতি ৰুচ্চতি। এৰং তাৰ ‘‘চত্তারো ইদ্ধিপাদা’’তি এত্থ অত্থো ৰেদিতব্বো।

431. Idāni tadanantare iddhipādavibhaṅge cattāroti gaṇanaparicchedo. Iddhipādāti ettha ijjhatīti iddhi, samijjhati nipphajjatīti attho. Ijjhanti vā etāya sattā iddhā vuddhā ukkaṃsagatā hontītipi iddhi. Paṭhamenatthena iddhi eva pādo iddhipādo, iddhikoṭṭhāsoti attho. Dutiyenatthena iddhiyā pādoti iddhipādo; pādoti patiṭṭhā, adhigamupāyoti attho. Tena hi yasmā uparūparivisesasaṅkhātaṃ iddhiṃ pajjanti pāpuṇanti, tasmā pādoti vuccati. Evaṃ tāva ‘‘cattāro iddhipādā’’ti ettha attho veditabbo.

ইদানি তে ভাজেত্ৰা দস্সেতুং ইধ ভিক্খূতিআদি আরদ্ধং। তত্থ ইধ ভিক্খূতি ইমস্মিং সাসনে ভিক্খু। ছন্দসমাধিপধানসঙ্খারসমন্নাগতন্তি এত্থ ছন্দহেতুকো ছন্দাধিকো ৰা সমাধি ছন্দসমাধি। কত্তুকম্যতাছন্দং অধিপতিং করিত্ৰা পটিলদ্ধসমাধিস্সেতং অধিৰচনং। পধানভূতা সঙ্খারা পধানসঙ্খারা। চতুকিচ্চসাধকস্স সম্মপ্পধানৰীরিযস্সেতং অধিৰচনং। সমন্নাগতন্তি ছন্দসমাধিনা চ পধানসঙ্খারেহি চ উপেতং। ইদ্ধিপাদন্তি নিপ্ফত্তিপরিযাযেন ৰা ইজ্ঝনকট্ঠেন ইজ্ঝন্তি এতায সত্তা ইদ্ধা ৰুদ্ধা উক্কংসগতা হোন্তীতি ইমিনা ৰা পরিযাযেন ইদ্ধীতি সঙ্খং গতানং উপচারজ্ঝানাদিকুসলচিত্তসম্পযুত্তানং ছন্দসমাধিপধানসঙ্খারানং অধিট্ঠানট্ঠেন পাদভূতং সেসচিত্তচেতসিকরাসিন্তি অত্থো। যঞ্হি পরতো ‘‘ইদ্ধিপাদোতি তথাভূতস্স ৰেদনাক্খন্ধো…পে॰… ৰিঞ্ঞাণক্খন্ধো’’তি ৰুত্তং, তং ইমিনা অত্থেন যুজ্জতি। ইমিনা নযেন সেসেসুপি অত্থো ৰেদিতব্বো। যথেৰ হি ছন্দং অধিপতিং করিত্ৰা পটিলদ্ধসমাধি ছন্দসমাধীতি ৰুত্তো, এৰং ৰীরিযং…পে॰… চিত্তং। ৰীমংসং অধিপতিং করিত্ৰা পটিলদ্ধসমাধি ৰীমংসসমাধীতি ৰুচ্চতি।

Idāni te bhājetvā dassetuṃ idha bhikkhūtiādi āraddhaṃ. Tattha idha bhikkhūti imasmiṃ sāsane bhikkhu. Chandasamādhipadhānasaṅkhārasamannāgatanti ettha chandahetuko chandādhiko vā samādhi chandasamādhi. Kattukamyatāchandaṃ adhipatiṃ karitvā paṭiladdhasamādhissetaṃ adhivacanaṃ. Padhānabhūtā saṅkhārā padhānasaṅkhārā. Catukiccasādhakassa sammappadhānavīriyassetaṃ adhivacanaṃ. Samannāgatanti chandasamādhinā ca padhānasaṅkhārehi ca upetaṃ. Iddhipādanti nipphattipariyāyena vā ijjhanakaṭṭhena ijjhanti etāya sattā iddhā vuddhā ukkaṃsagatā hontīti iminā vā pariyāyena iddhīti saṅkhaṃ gatānaṃ upacārajjhānādikusalacittasampayuttānaṃ chandasamādhipadhānasaṅkhārānaṃ adhiṭṭhānaṭṭhena pādabhūtaṃ sesacittacetasikarāsinti attho. Yañhi parato ‘‘iddhipādoti tathābhūtassa vedanākkhandho…pe… viññāṇakkhandho’’ti vuttaṃ, taṃ iminā atthena yujjati. Iminā nayena sesesupi attho veditabbo. Yatheva hi chandaṃ adhipatiṃ karitvā paṭiladdhasamādhi chandasamādhīti vutto, evaṃ vīriyaṃ…pe… cittaṃ. Vīmaṃsaṃ adhipatiṃ karitvā paṭiladdhasamādhi vīmaṃsasamādhīti vuccati.

ইদানি ছন্দসমাধিআদীনি পদানি ভাজেত্ৰা দস্সেতুং কথঞ্চ ভিক্খূতিআদি আরদ্ধং। তত্থ ছন্দঞ্চে ভিক্খু অধিপতিং করিত্ৰাতি যদি ভিক্খু ছন্দং অধিপতিং ছন্দং জেট্ঠকং ছন্দং ধুরং ছন্দং পুব্বঙ্গমং কত্ৰা সমাধিং পটিলভতি নিব্বত্তেতি, এৰং নিব্বত্তিতো অযং সমাধি ছন্দসমাধি নাম ৰুচ্চতীতি অত্থো। ৰীরিযঞ্চেতিআদীসুপি এসেৰ নযো। ইমে ৰুচ্চন্তি পধানসঙ্খারাতি এত্তাৰতা ছন্দিদ্ধিপাদং ভাৰযমানস্স ভিক্খুনো পধানাভিসঙ্খারসঙ্খাতচতুকিচ্চসাধকং ৰীরিযং কথিতং। তদেকজ্ঝং অভিসঞ্ঞূহিত্ৰাতি তং সব্বং একতো রাসিং কত্ৰাতি অত্থো। সঙ্খ্যং গচ্ছতীতি এতং ৰোহারং গচ্ছতীতি ৰেদিতব্বন্তি অত্থো।

Idāni chandasamādhiādīni padāni bhājetvā dassetuṃ kathañca bhikkhūtiādi āraddhaṃ. Tattha chandañce bhikkhu adhipatiṃ karitvāti yadi bhikkhu chandaṃ adhipatiṃ chandaṃ jeṭṭhakaṃ chandaṃ dhuraṃ chandaṃ pubbaṅgamaṃ katvā samādhiṃ paṭilabhati nibbatteti, evaṃ nibbattito ayaṃ samādhi chandasamādhi nāma vuccatīti attho. Vīriyañcetiādīsupi eseva nayo. Ime vuccanti padhānasaṅkhārāti ettāvatā chandiddhipādaṃ bhāvayamānassa bhikkhuno padhānābhisaṅkhārasaṅkhātacatukiccasādhakaṃ vīriyaṃ kathitaṃ. Tadekajjhaṃ abhisaññūhitvāti taṃ sabbaṃ ekato rāsiṃ katvāti attho. Saṅkhyaṃ gacchatīti etaṃ vohāraṃ gacchatīti veditabbanti attho.

৪৩৩. ইদানি ‘‘ছন্দসমাধিপধানসঙ্খারো’’তি এতস্মিং পদসমূহে ছন্দাদিধম্মে ভাজেত্ৰা দস্সেতুং তত্থ কতমো ছন্দোতিআদি আরদ্ধং। তং উত্তানত্থমেৰ।

433. Idāni ‘‘chandasamādhipadhānasaṅkhāro’’ti etasmiṃ padasamūhe chandādidhamme bhājetvā dassetuṃ tattha katamo chandotiādi āraddhaṃ. Taṃ uttānatthameva.

উপেতো হোতীতি ইদ্ধিপাদসঙ্খাতো ধম্মরাসি উপেতো হোতি। তেসং ধম্মানন্তি তেসং সম্পযুত্তানং ছন্দাদিধম্মানং। ইদ্ধি সমিদ্ধীতিআদীনি সব্বানি নিপ্ফত্তিৰেৰচনানেৰ। এৰং সন্তেপি ইজ্ঝনকট্ঠেন ইদ্ধি। সম্পুণ্ণা ইদ্ধি সমিদ্ধি; উপসগ্গেন ৰা পদং ৰড্ঢিতং। ইজ্ঝনাকারো ইজ্ঝনা। সমিজ্ঝনাতি উপসগ্গেন পদং ৰড্ঢিতং। অত্তনো সন্তানে পাতুভাৰৰসেন লভনং লাভো। পরিহীনানম্পি ৰীরিযারম্ভৰসেন পুন লাভো পটিলাভো; উপসগ্গেন ৰা পদং ৰড্ঢিতং। পত্তীতি অধিগমো। অপরিহানৰসেন সম্মা পত্তীতি সম্পত্তি। ফুসনাতি পটিলাভফুসনা। সচ্ছিকিরিযাতি পটিলাভসচ্ছিকিরিযাৰ। উপসম্পদাতি পটিলাভউপসম্পদা এৰাতি ৰেদিতব্বা।

Upeto hotīti iddhipādasaṅkhāto dhammarāsi upeto hoti. Tesaṃ dhammānanti tesaṃ sampayuttānaṃ chandādidhammānaṃ. Iddhi samiddhītiādīni sabbāni nipphattivevacanāneva. Evaṃ santepi ijjhanakaṭṭhena iddhi. Sampuṇṇā iddhi samiddhi; upasaggena vā padaṃ vaḍḍhitaṃ. Ijjhanākāro ijjhanā. Samijjhanāti upasaggena padaṃ vaḍḍhitaṃ. Attano santāne pātubhāvavasena labhanaṃ lābho. Parihīnānampi vīriyārambhavasena puna lābho paṭilābho; upasaggena vā padaṃ vaḍḍhitaṃ. Pattīti adhigamo. Aparihānavasena sammā pattīti sampatti. Phusanāti paṭilābhaphusanā. Sacchikiriyāti paṭilābhasacchikiriyāva. Upasampadāti paṭilābhaupasampadā evāti veditabbā.

তযাভূতস্সাতি তেন আকারেন ভূতস্স; তে ছন্দাদিধম্মে পটিলভিত্ৰা ঠিতস্সাতি অত্থো। ৰেদনাক্খন্ধোতিআদীহি ছন্দাদযো অন্তো কত্ৰা চত্তারোপি খন্ধা কথিতা। তে ধম্মেতি তে চত্তারো অরূপক্খন্ধে; ছন্দাদযো ৰা তযো ধম্মেতিপি ৰুত্তং। আসেৰতীতিআদীনি ৰুত্তত্থানেৰ। সেসইদ্ধিপাদনিদ্দেসেসুপি ইমিনাৰ নযেন অত্থো ৰেদিতব্বো।

Tayābhūtassāti tena ākārena bhūtassa; te chandādidhamme paṭilabhitvā ṭhitassāti attho. Vedanākkhandhotiādīhi chandādayo anto katvā cattāropi khandhā kathitā. Te dhammeti te cattāro arūpakkhandhe; chandādayo vā tayo dhammetipi vuttaṃ. Āsevatītiādīni vuttatthāneva. Sesaiddhipādaniddesesupi imināva nayena attho veditabbo.

এত্তাৰতা কিং কথিতন্তি? চতুন্নং ভিক্খূনং মত্থকপ্পত্তং কম্মট্ঠানং কথিতং। একো হি ভিক্খু ছন্দং অৰস্সযতি; কত্তুকম্যতাকুসলধম্মচ্ছন্দেন অত্থনিপ্ফত্তিযং সতি ‘অহং লোকুত্তরধম্মং নিব্বত্তেস্সামি, নত্থি ময্হং এতস্স নিব্বত্তনে ভারো’তি ছন্দং জেট্ঠকং ছন্দং ধুরং ছন্দং পুব্বঙ্গমং কত্ৰা লোকুত্তরধম্মং নিব্বত্তেতি। একো ৰীরিযং অৰস্সযতি। একো চিত্তং, একো পঞ্ঞং অৰস্সযতি। পঞ্ঞায অত্থনিপ্ফত্তিযং সতি ‘অহং লোকুত্তরধম্মং নিব্বত্তেস্সামি , নত্থি ময্হং এতস্স নিব্বত্তনে ভারো’তি পঞ্ঞং জেট্ঠকং পঞ্ঞং ধুরং পঞ্ঞং পুব্বঙ্গমং কত্ৰা লোকুত্তরধম্মং নিব্বত্তেতি।

Ettāvatā kiṃ kathitanti? Catunnaṃ bhikkhūnaṃ matthakappattaṃ kammaṭṭhānaṃ kathitaṃ. Eko hi bhikkhu chandaṃ avassayati; kattukamyatākusaladhammacchandena atthanipphattiyaṃ sati ‘ahaṃ lokuttaradhammaṃ nibbattessāmi, natthi mayhaṃ etassa nibbattane bhāro’ti chandaṃ jeṭṭhakaṃ chandaṃ dhuraṃ chandaṃ pubbaṅgamaṃ katvā lokuttaradhammaṃ nibbatteti. Eko vīriyaṃ avassayati. Eko cittaṃ, eko paññaṃ avassayati. Paññāya atthanipphattiyaṃ sati ‘ahaṃ lokuttaradhammaṃ nibbattessāmi , natthi mayhaṃ etassa nibbattane bhāro’ti paññaṃ jeṭṭhakaṃ paññaṃ dhuraṃ paññaṃ pubbaṅgamaṃ katvā lokuttaradhammaṃ nibbatteti.

কথং? যথা হি চতূসু অমচ্চপুত্তেসু ঠানন্তরং পত্থেত্ৰা ৰিচরন্তেসু একো উপট্ঠানং অৰস্সযি, একো সূরভাৰং, একো জাতিং, একো মন্তং। কথং? তেসু হি পঠমো ‘উপট্ঠানে অপ্পমাদকারিতায অত্থনিপ্ফত্তিযা সতি লব্ভমানং লচ্ছামেতং ঠানন্তর’ন্তি উপট্ঠানং অৰস্সযি। দুতিযো ‘উপট্ঠানে অপ্পমত্তোপি একচ্চো সঙ্গামে পচ্চুপট্ঠিতে সণ্ঠাতুং ন সক্কোতি; অৰস্সং খো পন রঞ্ঞো পচ্চন্তো কুপ্পিস্সতি; তস্মিং কুপ্পিতে রথধুরে কম্মং কত্ৰা রাজানং আরাধেত্ৰা আহরাপেস্সামেতং ঠানন্তর’ন্তি সূরভাৰং অৰস্সযি। ততিযো ‘সূরভাৰেপি সতি একচ্চো হীনজাতিকো হোতি; জাতিং সোধেত্ৰা ঠানন্তরং দদন্তা ময্হং দস্সন্তী’তি জাতিং অৰস্সযি। চতুত্থো ‘জাতিমাপি একো অমন্তনীযো হোতি; মন্তেন কত্তব্বকিচ্চে উপ্পন্নে আহরাপেস্সামেতং ঠানন্তর’ন্তি মন্তং অৰস্সযি। তে সব্বেপি অত্তনো অত্তনো অৰস্সযবলেন ঠানন্তরানি পাপুণিংসু।

Kathaṃ? Yathā hi catūsu amaccaputtesu ṭhānantaraṃ patthetvā vicarantesu eko upaṭṭhānaṃ avassayi, eko sūrabhāvaṃ, eko jātiṃ, eko mantaṃ. Kathaṃ? Tesu hi paṭhamo ‘upaṭṭhāne appamādakāritāya atthanipphattiyā sati labbhamānaṃ lacchāmetaṃ ṭhānantara’nti upaṭṭhānaṃ avassayi. Dutiyo ‘upaṭṭhāne appamattopi ekacco saṅgāme paccupaṭṭhite saṇṭhātuṃ na sakkoti; avassaṃ kho pana rañño paccanto kuppissati; tasmiṃ kuppite rathadhure kammaṃ katvā rājānaṃ ārādhetvā āharāpessāmetaṃ ṭhānantara’nti sūrabhāvaṃ avassayi. Tatiyo ‘sūrabhāvepi sati ekacco hīnajātiko hoti; jātiṃ sodhetvā ṭhānantaraṃ dadantā mayhaṃ dassantī’ti jātiṃ avassayi. Catuttho ‘jātimāpi eko amantanīyo hoti; mantena kattabbakicce uppanne āharāpessāmetaṃ ṭhānantara’nti mantaṃ avassayi. Te sabbepi attano attano avassayabalena ṭhānantarāni pāpuṇiṃsu.

তত্থ উপট্ঠানে অপ্পমত্তো হুত্ৰা ঠানন্তরং পত্তো ৰিয ছন্দং অৰস্সায কত্তুকম্যতাকুসলধম্মচ্ছন্দেন অত্থনিব্বত্তিযং সতি ‘অহং লোকুত্তরধম্মং নিব্বত্তেস্সামি, নত্থি ময্হং এতস্স নিব্বত্তনে ভারো’তি ছন্দং জেট্ঠকং ছন্দং ধুরং ছন্দং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো, রট্ঠপালত্থেরো (ম॰ নি॰ ২.২৯৩ আদযো) ৰিয। সো হি আযস্মা ছন্দং ধুরং কত্ৰা লোকুত্তরধম্মং নিব্বত্তেসি। সূরভাৰেন রাজানং আরাধেত্ৰা ঠানন্তরং পত্তো ৰিয ৰীরিযং জেট্ঠকং ৰীরিযং ধুরং ৰীরিযং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো, সোণত্থেরো (মহাৰ॰ ২৪৩) ৰিয। সো হি আযস্মা ৰীরিযং ধুরং কত্ৰা লোকুত্তরধম্মং নিব্বত্তেসি।

Tattha upaṭṭhāne appamatto hutvā ṭhānantaraṃ patto viya chandaṃ avassāya kattukamyatākusaladhammacchandena atthanibbattiyaṃ sati ‘ahaṃ lokuttaradhammaṃ nibbattessāmi, natthi mayhaṃ etassa nibbattane bhāro’ti chandaṃ jeṭṭhakaṃ chandaṃ dhuraṃ chandaṃ pubbaṅgamaṃ katvā lokuttaradhammanibbattako daṭṭhabbo, raṭṭhapālatthero (ma. ni. 2.293 ādayo) viya. So hi āyasmā chandaṃ dhuraṃ katvā lokuttaradhammaṃ nibbattesi. Sūrabhāvena rājānaṃ ārādhetvā ṭhānantaraṃ patto viya vīriyaṃ jeṭṭhakaṃ vīriyaṃ dhuraṃ vīriyaṃ pubbaṅgamaṃ katvā lokuttaradhammanibbattako daṭṭhabbo, soṇatthero (mahāva. 243) viya. So hi āyasmā vīriyaṃ dhuraṃ katvā lokuttaradhammaṃ nibbattesi.

জাতিসম্পত্তিযা ঠানন্তরং পত্তো ৰিয চিত্তং জেট্ঠকং চিত্তং ধুরং চিত্তং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো, সম্ভূতত্থেরো ৰিয। সো হি আযস্মা চিত্তং ধুরং কত্ৰা লোকুত্তরধম্মং নিব্বত্তেসি। মন্তং অৰস্সায ঠানন্তরপ্পত্তো ৰিয ৰীমংসং জেট্ঠকং ৰীমংসং ধুরং ৰীমংসং পুব্বঙ্গমং কত্ৰা লোকুত্তরধম্মনিব্বত্তকো দট্ঠব্বো, থেরো মোঘরাজা ৰিয। সো হি আযস্মা ৰীমংসং ধুরং কত্ৰা লোকুত্তরধম্মং নিব্বত্তেসি।

Jātisampattiyā ṭhānantaraṃ patto viya cittaṃ jeṭṭhakaṃ cittaṃ dhuraṃ cittaṃ pubbaṅgamaṃ katvā lokuttaradhammanibbattako daṭṭhabbo, sambhūtatthero viya. So hi āyasmā cittaṃ dhuraṃ katvā lokuttaradhammaṃ nibbattesi. Mantaṃ avassāya ṭhānantarappatto viya vīmaṃsaṃ jeṭṭhakaṃ vīmaṃsaṃ dhuraṃ vīmaṃsaṃ pubbaṅgamaṃ katvā lokuttaradhammanibbattako daṭṭhabbo, thero mogharājā viya. So hi āyasmā vīmaṃsaṃ dhuraṃ katvā lokuttaradhammaṃ nibbattesi.

এত্থ চ তযো ছন্দসমাধিপধানসঙ্খারসঙ্খাতা ধম্মা ইদ্ধীপি হোন্তি ইদ্ধিপাদাপি। সেসা পন সম্পযুত্তকা চত্তারো খন্ধা ইদ্ধিপাদাযেৰ। ৰীরিযচিত্তৰীমংসসমাধিপধানসঙ্খারসঙ্খাতাপি তযো ধম্মা ইদ্ধীপি হোন্তি ইদ্ধিপাদাপি। সেসা পন সম্পযুত্তকা চত্তারো খন্ধা ইদ্ধিপাদাযেৰ। অযং তাৰ অভেদতো কথা।

Ettha ca tayo chandasamādhipadhānasaṅkhārasaṅkhātā dhammā iddhīpi honti iddhipādāpi. Sesā pana sampayuttakā cattāro khandhā iddhipādāyeva. Vīriyacittavīmaṃsasamādhipadhānasaṅkhārasaṅkhātāpi tayo dhammā iddhīpi honti iddhipādāpi. Sesā pana sampayuttakā cattāro khandhā iddhipādāyeva. Ayaṃ tāva abhedato kathā.

ভেদতো পন ‘ছন্দো’ ইদ্ধি নাম। ছন্দধুরেন ভাৰিতা চত্তারো খন্ধা ছন্দিদ্ধিপাদো নাম। সমাধি পধানসঙ্খারোতি দ্ৰে ধম্মা সঙ্খারক্খন্ধৰসেন ছন্দিদ্ধিপাদে পৰিসন্তি; পাদে পৰিট্ঠাতিপি ৰত্তুং ৰট্টতিযেৰ। তত্থেৰ ‘সমাধি’ ইদ্ধি নাম। সমাধিধুরেন ভাৰিতা চত্তারো খন্ধা সমাধিদ্ধিপাদো নাম। ছন্দো পধানসঙ্খারোতি দ্ৰে ধম্মা সঙ্খারক্খন্ধৰসেন সমাধিদ্ধিপাদে পৰিসন্তি; পাদে পৰিট্ঠাতিপি ৰত্তুং ৰট্টতি এৰ। তত্থেৰ ‘পধানসঙ্খারো’ ইদ্ধি নাম। পধানসঙ্খারভাৰিতা চত্তারো খন্ধা পধানসঙ্খারিদ্ধিপাদো নাম। ছন্দো সমাধীতি দ্ৰে ধম্মা সঙ্খারক্খন্ধৰসেন পধানসঙ্খারিদ্ধিপাদে পৰিসন্তি; পাদে পৰিট্ঠাতিপি ৰত্তুং ৰট্টতি এৰ। তত্থেৰ ‘ৰীরিযং’ ইদ্ধি নাম, ‘চিত্তং’ ইদ্ধি নাম, ‘ৰীমংসা’ ইদ্ধি নাম…পে॰… পাদে পৰিট্ঠাতিপি ৰত্তুং ৰট্টতি এৰ। অযং ভেদতো কথা নাম।

Bhedato pana ‘chando’ iddhi nāma. Chandadhurena bhāvitā cattāro khandhā chandiddhipādo nāma. Samādhi padhānasaṅkhāroti dve dhammā saṅkhārakkhandhavasena chandiddhipāde pavisanti; pāde paviṭṭhātipi vattuṃ vaṭṭatiyeva. Tattheva ‘samādhi’ iddhi nāma. Samādhidhurena bhāvitā cattāro khandhā samādhiddhipādo nāma. Chando padhānasaṅkhāroti dve dhammā saṅkhārakkhandhavasena samādhiddhipāde pavisanti; pāde paviṭṭhātipi vattuṃ vaṭṭati eva. Tattheva ‘padhānasaṅkhāro’ iddhi nāma. Padhānasaṅkhārabhāvitā cattāro khandhā padhānasaṅkhāriddhipādo nāma. Chando samādhīti dve dhammā saṅkhārakkhandhavasena padhānasaṅkhāriddhipāde pavisanti; pāde paviṭṭhātipi vattuṃ vaṭṭati eva. Tattheva ‘vīriyaṃ’ iddhi nāma, ‘cittaṃ’ iddhi nāma, ‘vīmaṃsā’ iddhi nāma…pe… pāde paviṭṭhātipi vattuṃ vaṭṭati eva. Ayaṃ bhedato kathā nāma.

এত্থ পন অভিনৰং নত্থি; গহিতমেৰ ৰিভূতধাতুকং কতং। কথং? ছন্দো, সমাধি, পধানসঙ্খারোতি ইমে তযো ধম্মা ইদ্ধীপি হোন্তি ইদ্ধিপাদাপি। সেসা সম্পযুত্তকা চত্তারো খন্ধা ইদ্ধিপাদাযেৰ। ইমে হি তযো ধম্মা ইজ্ঝমানা সম্পযুত্তকেহি চতূহি খন্ধেহি সদ্ধিংযেৰ ইজ্ঝন্তি, ন ৰিনা। সম্পযুত্তকা পন চত্তারো খন্ধা ইজ্ঝনকট্ঠেন ইদ্ধি নাম হোন্তি, পতিট্ঠানট্ঠেন পাদো নাম। ‘ইদ্ধী’তি ৰা ‘ইদ্ধিপাদো’তি ৰা ন অঞ্ঞস্স কস্সচি অধিৰচনং, সম্পযুত্তকানং চতুন্নং খন্ধানংযেৰ অধিৰচনং। ৰীরিযং, চিত্তং, ৰীমংসাসমাধিপধানসঙ্খারোতি তযো ধম্মা…পে॰… চতুন্নং খন্ধানংযেৰ অধিৰচনং।

Ettha pana abhinavaṃ natthi; gahitameva vibhūtadhātukaṃ kataṃ. Kathaṃ? Chando, samādhi, padhānasaṅkhāroti ime tayo dhammā iddhīpi honti iddhipādāpi. Sesā sampayuttakā cattāro khandhā iddhipādāyeva. Ime hi tayo dhammā ijjhamānā sampayuttakehi catūhi khandhehi saddhiṃyeva ijjhanti, na vinā. Sampayuttakā pana cattāro khandhā ijjhanakaṭṭhena iddhi nāma honti, patiṭṭhānaṭṭhena pādo nāma. ‘Iddhī’ti vā ‘iddhipādo’ti vā na aññassa kassaci adhivacanaṃ, sampayuttakānaṃ catunnaṃ khandhānaṃyeva adhivacanaṃ. Vīriyaṃ, cittaṃ, vīmaṃsāsamādhipadhānasaṅkhāroti tayo dhammā…pe… catunnaṃ khandhānaṃyeva adhivacanaṃ.

অপিচ পুব্বভাগো পুব্বভাগো ইদ্ধিপাদো নাম; পটিলাভো পটিলাভো ইদ্ধি নামাতি ৰেদিতব্বো। অযমত্থো উপচারেন ৰা ৰিপস্সনায ৰা দীপেতব্বো। পঠমজ্ঝানপরিকম্মঞ্হি ইদ্ধিপাদো নাম, পঠমজ্ঝানং ইদ্ধি নাম। দুতিযততিযচতুত্থআকাসানঞ্চাযতন, ৰিঞ্ঞাণঞ্চাযতনআকিঞ্চঞ্ঞাযতননেৰসঞ্ঞানাসঞ্ঞাযতনপরিকম্মং ইদ্ধিপাদো নাম, নেৰসঞ্ঞানাসঞ্ঞাযতনং ইদ্ধি নাম। সোতাপত্তিমগ্গস্স ৰিপস্সনা ইদ্ধিপাদো নাম, সোতাপত্তিমগ্গো ইদ্ধি নাম। সকদাগামি, অনাগামি, অরহত্তমগ্গস্স ৰিপস্সনা ইদ্ধিপাদো নাম, অরহত্তমগ্গো ইদ্ধি নাম। পটিলাভেনাপি দীপেতুং ৰট্টতিযেৰ। পঠমজ্ঝানঞ্হি ইদ্ধিপাদো নাম, দুতিযজ্ঝানং ইদ্ধি নাম; দুতিযজ্ঝানং ইদ্ধিপাদো নাম, ততিযজ্ঝানং ইদ্ধি নাম…পে॰… অনাগামিমগ্গো ইদ্ধিপাদো নাম, অরহত্তমগ্গো ইদ্ধি নাম।

Apica pubbabhāgo pubbabhāgo iddhipādo nāma; paṭilābho paṭilābho iddhi nāmāti veditabbo. Ayamattho upacārena vā vipassanāya vā dīpetabbo. Paṭhamajjhānaparikammañhi iddhipādo nāma, paṭhamajjhānaṃ iddhi nāma. Dutiyatatiyacatutthaākāsānañcāyatana, viññāṇañcāyatanaākiñcaññāyatananevasaññānāsaññāyatanaparikammaṃ iddhipādo nāma, nevasaññānāsaññāyatanaṃ iddhi nāma. Sotāpattimaggassa vipassanā iddhipādo nāma, sotāpattimaggo iddhi nāma. Sakadāgāmi, anāgāmi, arahattamaggassa vipassanā iddhipādo nāma, arahattamaggo iddhi nāma. Paṭilābhenāpi dīpetuṃ vaṭṭatiyeva. Paṭhamajjhānañhi iddhipādo nāma, dutiyajjhānaṃ iddhi nāma; dutiyajjhānaṃ iddhipādo nāma, tatiyajjhānaṃ iddhi nāma…pe… anāgāmimaggo iddhipādo nāma, arahattamaggo iddhi nāma.

কেনট্ঠেন ইদ্ধি? কেনট্ঠেন পাদোতি? ইজ্ঝনকট্ঠেনেৰ ইদ্ধি। পতিট্ঠানট্ঠেনেৰ পাদো। এৰমিধাপি ইদ্ধীতি ৰা পাদোতি ৰা ন অঞ্ঞস্স কস্সচি অধিৰচনং, সম্পযুত্তকানং চতুন্নং খন্ধানংযেৰ অধিৰচনন্তি। এৰং ৰুত্তে পন ইদমাহংসু – চতুন্নং খন্ধানমেৰ অধিৰচনং ভৰেয্য, যদি সত্থা পরতো উত্তরচূল়ভাজনীযং নাম ন আহরেয্য। উত্তরচূল়ভাজনীযে পন ‘‘ছন্দোযেৰ ছন্দিদ্ধিপাদো, ৰীরিযমেৰ, চিত্তমেৰ, ৰীমংসাৰ ৰীমংসিদ্ধিপাদো’’তি কথিতং। কেচি পন ‘‘ইদ্ধি নাম অনিপ্ফন্না, ইদ্ধিপাদো নিপ্ফন্নো’’তি ৰদিংসু। তেসং ৰচনং পটিক্খিপিত্ৰা ইদ্ধীপি ইদ্ধিপাদোপি ‘নিপ্ফন্নো তিলক্খণব্ভাহতো’তি সন্নিট্ঠানং কতং। ইতি ইমস্মিং সুত্তন্তভাজনীযে লোকিযলোকুত্তরমিস্সকা ইদ্ধিপাদা কথিতাতি।

Kenaṭṭhena iddhi? Kenaṭṭhena pādoti? Ijjhanakaṭṭheneva iddhi. Patiṭṭhānaṭṭheneva pādo. Evamidhāpi iddhīti vā pādoti vā na aññassa kassaci adhivacanaṃ, sampayuttakānaṃ catunnaṃ khandhānaṃyeva adhivacananti. Evaṃ vutte pana idamāhaṃsu – catunnaṃ khandhānameva adhivacanaṃ bhaveyya, yadi satthā parato uttaracūḷabhājanīyaṃ nāma na āhareyya. Uttaracūḷabhājanīye pana ‘‘chandoyeva chandiddhipādo, vīriyameva, cittameva, vīmaṃsāva vīmaṃsiddhipādo’’ti kathitaṃ. Keci pana ‘‘iddhi nāma anipphannā, iddhipādo nipphanno’’ti vadiṃsu. Tesaṃ vacanaṃ paṭikkhipitvā iddhīpi iddhipādopi ‘nipphanno tilakkhaṇabbhāhato’ti sanniṭṭhānaṃ kataṃ. Iti imasmiṃ suttantabhājanīye lokiyalokuttaramissakā iddhipādā kathitāti.

সুত্তন্তভাজনীযৰণ্ণনা।

Suttantabhājanīyavaṇṇanā.

Next: ২. অভিধম্মভাজনীযৰণ্ণনা • 2. Abhidhammabhājanīyavaṇṇanā

Related texts:

তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ৯. ইদ্ধিপাদৰিভঙ্গো • 9. Iddhipādavibhaṅgo

টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ৯. ইদ্ধিপাদৰিভঙ্গো • 9. Iddhipādavibhaṅgo

টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ৯. ইদ্ধিপাদৰিভঙ্গো • 9. Iddhipādavibhaṅgo

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact