| Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā |
১০. বোজ্ঝঙ্গৰিভঙ্গো
10. Bojjhaṅgavibhaṅgo
১. সুত্তন্তভাজনীযৰণ্ণনা
1. Suttantabhājanīyavaṇṇanā
৪৬৬. ইদানি তদনন্তরে বোজ্ঝঙ্গৰিভঙ্গে সত্তাতি গণনপরিচ্ছেদো। বোজ্ঝঙ্গাতি বোধিযা বোধিস্স ৰা অঙ্গাতি বোজ্ঝঙ্গা। ইদং ৰুত্তং হোতি – যা এসা ধম্মসামগ্গী যায লোকুত্তরমগ্গক্খণে উপ্পজ্জমানায লীনুদ্ধচ্চপতিট্ঠানাযূহনকামসুখত্তকিলমথানুযোগউচ্ছেদসস্সতাভিনিৰেসাদীনং অনেকেসং উপদ্দৰানং পটিপক্খভূতায সতিধম্মৰিচযৰীরিযপীতিপস্সদ্ধিসমাধিউপেক্খাসঙ্খাতায ধম্মসামগ্গিযা অরিযসাৰকো বুজ্ঝতীতি কত্ৰা বোধীতি ৰুচ্চতি, বুজ্ঝতি কিলেসসন্তাননিদ্দায উট্ঠহতি, চত্তারি ৰা অরিযসচ্চানি পটিৰিজ্ঝতি, নিব্বানমেৰ ৰা সচ্ছিকরোতি, তস্সা ধম্মসামগ্গীসঙ্খাতায বোধিযা অঙ্গাতিপি বোজ্ঝঙ্গা, ঝানঙ্গমগ্গঙ্গাদীনি ৰিয। যো পনেস যথাৰুত্তপ্পকারায এতায ধম্মসামগ্গিযা বুজ্ঝতীতি কত্ৰা অরিযসাৰকো বোধীতি ৰুচ্চতি, তস্স বোধিস্স অঙ্গাতিপি বোজ্ঝঙ্গা, সেনঙ্গরথঙ্গাদযো ৰিয। তেনাহু অট্ঠকথাচরিযা – ‘‘বুজ্ঝনকস্স পুগ্গলস্স অঙ্গাতি ৰা বোজ্ঝঙ্গা’’তি।
466. Idāni tadanantare bojjhaṅgavibhaṅge sattāti gaṇanaparicchedo. Bojjhaṅgāti bodhiyā bodhissa vā aṅgāti bojjhaṅgā. Idaṃ vuttaṃ hoti – yā esā dhammasāmaggī yāya lokuttaramaggakkhaṇe uppajjamānāya līnuddhaccapatiṭṭhānāyūhanakāmasukhattakilamathānuyogaucchedasassatābhinivesādīnaṃ anekesaṃ upaddavānaṃ paṭipakkhabhūtāya satidhammavicayavīriyapītipassaddhisamādhiupekkhāsaṅkhātāya dhammasāmaggiyā ariyasāvako bujjhatīti katvā bodhīti vuccati, bujjhati kilesasantānaniddāya uṭṭhahati, cattāri vā ariyasaccāni paṭivijjhati, nibbānameva vā sacchikaroti, tassā dhammasāmaggīsaṅkhātāya bodhiyā aṅgātipi bojjhaṅgā, jhānaṅgamaggaṅgādīni viya. Yo panesa yathāvuttappakārāya etāya dhammasāmaggiyā bujjhatīti katvā ariyasāvako bodhīti vuccati, tassa bodhissa aṅgātipi bojjhaṅgā, senaṅgarathaṅgādayo viya. Tenāhu aṭṭhakathācariyā – ‘‘bujjhanakassa puggalassa aṅgāti vā bojjhaṅgā’’ti.
অপিচ ‘‘বোজ্ঝঙ্গাতি কেনট্ঠেন বোজ্ঝঙ্গা? বোধায সংৰত্তন্তীতি বোজ্ঝঙ্গা, বুজ্ঝন্তীতি বোজ্ঝঙ্গা, অনুবুজ্ঝন্তীতি বোজ্ঝঙ্গা, পটিবুজ্ঝন্তীতি বোজ্ঝঙ্গা, সম্বুজ্ঝন্তীতি বোজ্ঝঙ্গা’’তি ইমিনা পটিসম্ভিদানযেনাপি বোজ্ঝঙ্গত্থো ৰেদিতব্বো।
Apica ‘‘bojjhaṅgāti kenaṭṭhena bojjhaṅgā? Bodhāya saṃvattantīti bojjhaṅgā, bujjhantīti bojjhaṅgā, anubujjhantīti bojjhaṅgā, paṭibujjhantīti bojjhaṅgā, sambujjhantīti bojjhaṅgā’’ti iminā paṭisambhidānayenāpi bojjhaṅgattho veditabbo.
সতিসম্বোজ্ঝঙ্গোতিআদীসু পসত্থো সুন্দরো চ বোজ্ঝঙ্গো সম্বোজ্ঝঙ্গো, সতিযেৰ সম্বোজ্ঝঙ্গো সতিসম্বোজ্ঝঙ্গো। তত্থ উপট্ঠানলক্খণো সতিসম্বোজ্ঝঙ্গো, পৰিচযলক্খণো ধম্মৰিচযসম্বোজ্ঝঙ্গো, পগ্গহলক্খণো ৰীরিযসম্বোজ্ঝঙ্গো, ফরণলক্খণো পীতিসম্বোজ্ঝঙ্গো, উপসমলক্খণো পস্সদ্ধিসম্বোজ্ঝঙ্গো, অৰিক্খেপলক্খণো সমাধিসম্বোজ্ঝঙ্গো, পটিসঙ্খানলক্খণো উপেক্খাসম্বোজ্ঝঙ্গো। তেসু ‘‘সতিঞ্চ খ্ৰাহং, ভিক্খৰে, সব্বত্থিকং ৰদামী’’তি (সং॰ নি॰ ৫.২৩৪) ৰচনতো সব্বেসং বোজ্ঝঙ্গানং উপকারকত্তা সতিসম্বোজ্ঝঙ্গো পঠমং ৰুত্তো। ততো পরং ‘‘সো তথা সতো ৰিহরন্তো তং ধম্মং পঞ্ঞায পৰিচিনতী’’তিআদিনা (ম॰ নি॰ ১৫০) নযেন এৰং অনুক্কমেনেৰ নিক্খেপপযোজনং পাল়িযং আগতমেৰ।
Satisambojjhaṅgotiādīsu pasattho sundaro ca bojjhaṅgo sambojjhaṅgo, satiyeva sambojjhaṅgo satisambojjhaṅgo. Tattha upaṭṭhānalakkhaṇo satisambojjhaṅgo, pavicayalakkhaṇo dhammavicayasambojjhaṅgo, paggahalakkhaṇo vīriyasambojjhaṅgo, pharaṇalakkhaṇo pītisambojjhaṅgo, upasamalakkhaṇo passaddhisambojjhaṅgo, avikkhepalakkhaṇo samādhisambojjhaṅgo, paṭisaṅkhānalakkhaṇo upekkhāsambojjhaṅgo. Tesu ‘‘satiñca khvāhaṃ, bhikkhave, sabbatthikaṃ vadāmī’’ti (saṃ. ni. 5.234) vacanato sabbesaṃ bojjhaṅgānaṃ upakārakattā satisambojjhaṅgo paṭhamaṃ vutto. Tato paraṃ ‘‘so tathā sato viharanto taṃ dhammaṃ paññāya pavicinatī’’tiādinā (ma. ni. 150) nayena evaṃ anukkameneva nikkhepapayojanaṃ pāḷiyaṃ āgatameva.
কস্মা পনেতে সত্তেৰ ৰুত্তা, অনূনা অনধিকাতি? লীনুদ্ধচ্চপটিপক্খতো সব্বত্থিকতো চ। এত্থ হি তযো বোজ্ঝঙ্গা লীনস্স পটিপক্খা, যথাহ – ‘‘যস্মিঞ্চ খো, ভিক্খৰে, সমযে লীনং চিত্তং হোতি, কালো তস্মিং সমযে ধম্মৰিচযসম্বোজ্ঝঙ্গস্স ভাৰনায, কালো ৰীরিযসম্বোজ্ঝঙ্গস্স ভাৰনায, কালো পীতিসম্বোজ্ঝঙ্গস্স ভাৰনাযা’’তি (সং॰ নি॰ ৫.২৩৪)। তযো উদ্ধচ্চস্স পটিপক্খা, যথাহ – ‘‘যস্মিঞ্চ খো, ভিক্খৰে, সমযে উদ্ধতং চিত্তং হোতি, কালো তস্মিং সমযে পস্সদ্ধিসম্বোজ্ঝঙ্গস্স ভাৰনায, কালো সমাধিসম্বোজ্ঝঙ্গস্স ভাৰনায, কালো উপেক্খাসম্বোজ্ঝঙ্গস্স ভাৰনাযা’’তি (সং॰ নি॰ ৫.২৩৪)। একো পনেত্থ লোণধূপনং ৰিয সব্বব্যঞ্জনেসু, সব্বকম্মিকঅমচ্চো ৰিয চ সব্বেসু রাজকিচ্চেসু, সব্ববোজ্ঝঙ্গেসু ইচ্ছিতব্বতো সব্বত্থিকো, যথাহ – ‘‘সতিঞ্চ খ্ৰাহং, ভিক্খৰে, সব্বত্থিকং ৰদামী’’তি। ‘‘সব্বত্থক’’ন্তিপি পাল়ি। দ্ৰিন্নম্পি সব্বত্থ ইচ্ছিতব্বন্তি অত্থো। এৰং লীনুদ্ধচ্চপটিপক্খতো সব্বত্থিকতো চ সত্তেৰ ৰুত্তাতি ৰেদিতব্বা।
Kasmā panete satteva vuttā, anūnā anadhikāti? Līnuddhaccapaṭipakkhato sabbatthikato ca. Ettha hi tayo bojjhaṅgā līnassa paṭipakkhā, yathāha – ‘‘yasmiñca kho, bhikkhave, samaye līnaṃ cittaṃ hoti, kālo tasmiṃ samaye dhammavicayasambojjhaṅgassa bhāvanāya, kālo vīriyasambojjhaṅgassa bhāvanāya, kālo pītisambojjhaṅgassa bhāvanāyā’’ti (saṃ. ni. 5.234). Tayo uddhaccassa paṭipakkhā, yathāha – ‘‘yasmiñca kho, bhikkhave, samaye uddhataṃ cittaṃ hoti, kālo tasmiṃ samaye passaddhisambojjhaṅgassa bhāvanāya, kālo samādhisambojjhaṅgassa bhāvanāya, kālo upekkhāsambojjhaṅgassa bhāvanāyā’’ti (saṃ. ni. 5.234). Eko panettha loṇadhūpanaṃ viya sabbabyañjanesu, sabbakammikaamacco viya ca sabbesu rājakiccesu, sabbabojjhaṅgesu icchitabbato sabbatthiko, yathāha – ‘‘satiñca khvāhaṃ, bhikkhave, sabbatthikaṃ vadāmī’’ti. ‘‘Sabbatthaka’’ntipi pāḷi. Dvinnampi sabbattha icchitabbanti attho. Evaṃ līnuddhaccapaṭipakkhato sabbatthikato ca satteva vuttāti veditabbā.
৪৬৭. ইদানি নেসং একস্মিংযেৰারম্মণে অত্তনো অত্তনো কিচ্চৰসেন নানাকরণং দস্সেতুং তত্থ কতমো সতিসম্বোজ্ঝঙ্গোতিআদি আরদ্ধং। তত্থ ইধ ভিক্খূতি ইমস্মিং সাসনে ভিক্খু। সতিমা হোতীতি পঞ্ঞায পঞ্ঞৰা, যসেন যসৰা, ধনেন ধনৰা ৰিয সতিযা সতিমা হোতি, সতিসম্পন্নোতি অত্থো। পরমেনাতি উত্তমেন; তঞ্হি পরমত্থসচ্চস্স নিব্বানস্স চেৰ মগ্গস্স চ অনুলোমতো পরমং নাম হোতি উত্তমং সেট্ঠং। সতিনেপক্কেনাতি নেপক্কং ৰুচ্চতি পঞ্ঞা; সতিযা চেৰ নেপক্কেন চাতি অত্থো।
467. Idāni nesaṃ ekasmiṃyevārammaṇe attano attano kiccavasena nānākaraṇaṃ dassetuṃ tattha katamo satisambojjhaṅgotiādi āraddhaṃ. Tattha idha bhikkhūti imasmiṃ sāsane bhikkhu. Satimā hotīti paññāya paññavā, yasena yasavā, dhanena dhanavā viya satiyā satimā hoti, satisampannoti attho. Paramenāti uttamena; tañhi paramatthasaccassa nibbānassa ceva maggassa ca anulomato paramaṃ nāma hoti uttamaṃ seṭṭhaṃ. Satinepakkenāti nepakkaṃ vuccati paññā; satiyā ceva nepakkena cāti attho.
কস্মা পন ইমস্মিং সতিভাজনীযে পঞ্ঞা সঙ্গহিতাতি? সতিযা বলৰভাৰদীপনত্থং। সতি হি পঞ্ঞায সদ্ধিম্পি উপ্পজ্জতি ৰিনাপি, পঞ্ঞায সদ্ধিং উপ্পজ্জমানা বলৰতী হোতি, ৰিনা উপ্পজ্জমানা দুব্বলা। তেনস্সা বলৰভাৰদীপনত্থং পঞ্ঞা সঙ্গহিতা। যথা হি দ্ৰীসু দিসাসু দ্ৰে রাজমহামত্তা তিট্ঠেয্যুং; তেসু একো রাজপুত্তং গহেত্ৰা তিট্ঠেয্য, একো অত্তনো ধম্মতায এককোৰ তেসু রাজপুত্তং গহেত্ৰা ঠিতো অত্তনোপি তেজেন রাজপুত্তস্সপি তেজেন তেজৰা হোতি; অত্তনো ধম্মতায ঠিতো ন তেন সমতেজো হোতি; এৰমেৰ রাজপুত্তং গহেত্ৰা ঠিতমহামত্তো ৰিয পঞ্ঞায সদ্ধিং উপ্পন্না সতি, অত্তনো ধম্মতায ঠিতো ৰিয ৰিনা পঞ্ঞায উপ্পন্না। তত্থ যথা রাজপুত্তং গহেত্ৰা ঠিতো অত্তনোপি তেজেন রাজপুত্তস্সপি তেজেন তেজৰা হোতি, এৰং পঞ্ঞায সদ্ধিং উপ্পন্না সতি বলৰতী হোতি; যথা অত্তনো ধম্মতায ঠিতো ন তেন সমতেজো হোতি, এৰং ৰিনা পঞ্ঞায উপ্পন্না দুব্বলা হোতীতি বলৰভাৰদীপনত্থং পঞ্ঞা গহিতাতি।
Kasmā pana imasmiṃ satibhājanīye paññā saṅgahitāti? Satiyā balavabhāvadīpanatthaṃ. Sati hi paññāya saddhimpi uppajjati vināpi, paññāya saddhiṃ uppajjamānā balavatī hoti, vinā uppajjamānā dubbalā. Tenassā balavabhāvadīpanatthaṃ paññā saṅgahitā. Yathā hi dvīsu disāsu dve rājamahāmattā tiṭṭheyyuṃ; tesu eko rājaputtaṃ gahetvā tiṭṭheyya, eko attano dhammatāya ekakova tesu rājaputtaṃ gahetvā ṭhito attanopi tejena rājaputtassapi tejena tejavā hoti; attano dhammatāya ṭhito na tena samatejo hoti; evameva rājaputtaṃ gahetvā ṭhitamahāmatto viya paññāya saddhiṃ uppannā sati, attano dhammatāya ṭhito viya vinā paññāya uppannā. Tattha yathā rājaputtaṃ gahetvā ṭhito attanopi tejena rājaputtassapi tejena tejavā hoti, evaṃ paññāya saddhiṃ uppannā sati balavatī hoti; yathā attano dhammatāya ṭhito na tena samatejo hoti, evaṃ vinā paññāya uppannā dubbalā hotīti balavabhāvadīpanatthaṃ paññā gahitāti.
চিরকতম্পীতি অত্তনো ৰা পরস্স ৰা কাযেন চিরকতং ৰত্তং ৰা কসিণমণ্ডলং ৰা কসিণপরিকম্মং ৰা। চিরভাসিতম্পীতি অত্তনা ৰা পরেন ৰা ৰাচায চিরভাসিতং বহুকম্পি, ৰত্তসীসে ঠত্ৰা ধম্মকথং ৰা কম্মট্ঠানৰিনিচ্ছযং ৰা, ৰিমুত্তাযতনসীসে ৰা ঠত্ৰা ধম্মকথমেৰ। সরিতা হোতীতি তং কাযৰিঞ্ঞত্তিং ৰচীৰিঞ্ঞত্তিঞ্চ সমুট্ঠাপেত্ৰা পৰত্তং অরূপধম্মকোট্ঠাসং ‘এৰং উপ্পজ্জিত্ৰা এৰং নিরুদ্ধো’তি সরিতা হোতি। অনুস্সরিতাতি পুনপ্পুনং সরিতা। অযং ৰুচ্চতি সতিসম্বোজ্ঝঙ্গোতি অযং এৰং উপ্পন্না সেসবোজ্ঝঙ্গসমুট্ঠাপিকা ৰিপস্সনাসম্পযুত্তা সতি সতিসম্বোজ্ঝঙ্গো নাম কথীযতি।
Cirakatampīti attano vā parassa vā kāyena cirakataṃ vattaṃ vā kasiṇamaṇḍalaṃ vā kasiṇaparikammaṃ vā. Cirabhāsitampīti attanā vā parena vā vācāya cirabhāsitaṃ bahukampi, vattasīse ṭhatvā dhammakathaṃ vā kammaṭṭhānavinicchayaṃ vā, vimuttāyatanasīse vā ṭhatvā dhammakathameva. Saritā hotīti taṃ kāyaviññattiṃ vacīviññattiñca samuṭṭhāpetvā pavattaṃ arūpadhammakoṭṭhāsaṃ ‘evaṃ uppajjitvā evaṃ niruddho’ti saritā hoti. Anussaritāti punappunaṃ saritā. Ayaṃ vuccati satisambojjhaṅgoti ayaṃ evaṃ uppannā sesabojjhaṅgasamuṭṭhāpikā vipassanāsampayuttā sati satisambojjhaṅgo nāma kathīyati.
সো তথা সতো ৰিহরন্তোতি সো ভিক্খু তেনাকারেন উপ্পন্নায সতিযা সতো হুত্ৰা ৰিহরন্তো। তং ধম্মন্তি তং চিরকতং চিরভাসিতং হেট্ঠা ৰুত্তপ্পকারং ধম্মং। পঞ্ঞায পৰিচিনতীতি পঞ্ঞায ‘অনিচ্চং দুক্খং অনত্তা’তি পৰিচিনতি। পৰিচরতীতি ‘অনিচ্চং দুক্খং অনত্তা’তি তত্থ পঞ্ঞং চরাপেন্তো পৰিচরতি। পরিৰীমংসং আপজ্জতীতি ওলোকনং গৰেসনং আপজ্জতি। অযং ৰুচ্চতীতি ইদং ৰুত্তপ্পকারং বোজ্ঝঙ্গসমুট্ঠাপকং ৰিপস্সনাঞাণং ধম্মৰিচযসম্বোজ্ঝঙ্গো নাম ৰুচ্চতি।
So tathā sato viharantoti so bhikkhu tenākārena uppannāya satiyā sato hutvā viharanto. Taṃ dhammanti taṃ cirakataṃ cirabhāsitaṃ heṭṭhā vuttappakāraṃ dhammaṃ. Paññāya pavicinatīti paññāya ‘aniccaṃ dukkhaṃ anattā’ti pavicinati. Pavicaratīti ‘aniccaṃ dukkhaṃ anattā’ti tattha paññaṃ carāpento pavicarati. Parivīmaṃsaṃ āpajjatīti olokanaṃ gavesanaṃ āpajjati. Ayaṃ vuccatīti idaṃ vuttappakāraṃ bojjhaṅgasamuṭṭhāpakaṃ vipassanāñāṇaṃ dhammavicayasambojjhaṅgo nāma vuccati.
তস্স তং ধম্মন্তি তস্স ভিক্খুনো তং হেট্ঠা ৰুত্তপ্পকারং ধম্মং। আরদ্ধং হোতীতি পরিপুণ্ণং হোতি পগ্গহিতং। অসল্লীনন্তি আরদ্ধত্তাযেৰ অসল্লীনং। অযং ৰুচ্চতীতি ইদং বোজ্ঝঙ্গসমুট্ঠাপকং ৰিপস্সনাসম্পযুত্তং ৰীরিযং ৰীরিযসম্বোজ্ঝঙ্গো নাম ৰুচ্চতি।
Tassa taṃ dhammanti tassa bhikkhuno taṃ heṭṭhā vuttappakāraṃ dhammaṃ. Āraddhaṃ hotīti paripuṇṇaṃ hoti paggahitaṃ. Asallīnanti āraddhattāyeva asallīnaṃ. Ayaṃ vuccatīti idaṃ bojjhaṅgasamuṭṭhāpakaṃ vipassanāsampayuttaṃ vīriyaṃ vīriyasambojjhaṅgo nāma vuccati.
নিরামিসাতি কামামিসলোকামিসৰট্টামিসানং অভাৰেন নিরামিসা পরিসুদ্ধা। অযং ৰুচ্চতীতি অযং বোজ্ঝঙ্গসমুট্ঠাপিকা ৰিপস্সনাসম্পযুত্তা পীতি পীতিসম্বোজ্ঝঙ্গো নাম ৰুচ্চতি।
Nirāmisāti kāmāmisalokāmisavaṭṭāmisānaṃ abhāvena nirāmisā parisuddhā. Ayaṃ vuccatīti ayaṃ bojjhaṅgasamuṭṭhāpikā vipassanāsampayuttā pīti pītisambojjhaṅgo nāma vuccati.
পীতিমনস্সাতি পীতিসম্পযুত্তচিত্তস্স। কাযোপি পস্সম্ভতীতি খন্ধত্তযসঙ্খাতো নামকাযো কিলেসদরথপটিপ্পস্সদ্ধিযা পস্সম্ভতি। চিত্তম্পীতি ৰিঞ্ঞাণক্খন্ধোপি তথেৰ পস্সম্ভতি। অযং ৰুচ্চতীতি অযং বোজ্ঝঙ্গসমুট্ঠাপিকা ৰিপস্সনাসম্পযুত্তা পস্সদ্ধি পস্সদ্ধিসম্বোজ্ঝঙ্গো নাম ৰুচ্চতি।
Pītimanassāti pītisampayuttacittassa. Kāyopi passambhatīti khandhattayasaṅkhāto nāmakāyo kilesadarathapaṭippassaddhiyā passambhati. Cittampīti viññāṇakkhandhopi tatheva passambhati. Ayaṃ vuccatīti ayaṃ bojjhaṅgasamuṭṭhāpikā vipassanāsampayuttā passaddhi passaddhisambojjhaṅgo nāma vuccati.
পস্সদ্ধকাযস্স সুখিনোতি পস্সদ্ধকাযতায উপ্পন্নসুখেন সুখিতস্স। সমাধিযতীতি সম্মা আধিযতি, নিচ্চলং হুত্ৰা আরম্মণে ঠপীযতি, অপ্পনাপ্পত্তং ৰিয হোতি। অযং ৰুচ্চতীতি অযং বোজ্ঝঙ্গসমুট্ঠাপিকা ৰিপস্সনাসম্পযুত্তা চিত্তেকগ্গতা সমাধিসম্বোজ্ঝঙ্গো নাম ৰুচ্চতি।
Passaddhakāyassa sukhinoti passaddhakāyatāya uppannasukhena sukhitassa. Samādhiyatīti sammā ādhiyati, niccalaṃ hutvā ārammaṇe ṭhapīyati, appanāppattaṃ viya hoti. Ayaṃ vuccatīti ayaṃ bojjhaṅgasamuṭṭhāpikā vipassanāsampayuttā cittekaggatā samādhisambojjhaṅgo nāma vuccati.
তথা সমাহিতন্তি তেন অপ্পনাপ্পত্তেন ৰিয সমাধিনা সমাহিতং। সাধুকং অজ্ঝুপেক্খিতা হোতীতি সুট্ঠু অজ্ঝুপেক্খিতা হোতি; তেসং ধম্মানং পহানৰড্ঢনে অব্যাৰটো হুত্ৰা অজ্ঝুপেক্খতি। অযং ৰুচ্চতীতি অযং ছন্নং বোজ্ঝঙ্গানং অনোসক্কনঅনতিৰত্তনভাৰসাধকো মজ্ঝত্তাকারো উপেক্খাসম্বোজ্ঝঙ্গো নাম ৰুচ্চতি।
Tathā samāhitanti tena appanāppattena viya samādhinā samāhitaṃ. Sādhukaṃ ajjhupekkhitā hotīti suṭṭhu ajjhupekkhitā hoti; tesaṃ dhammānaṃ pahānavaḍḍhane abyāvaṭo hutvā ajjhupekkhati. Ayaṃvuccatīti ayaṃ channaṃ bojjhaṅgānaṃ anosakkanaanativattanabhāvasādhako majjhattākāro upekkhāsambojjhaṅgo nāma vuccati.
এত্তাৰতা কিং কথিতং নাম হোতি? অপুব্বং অচরিমং একচিত্তক্খণে নানারসলক্খণা পুব্বভাগৰিপস্সনা বোজ্ঝঙ্গা কথিতা হোন্তীতি।
Ettāvatā kiṃ kathitaṃ nāma hoti? Apubbaṃ acarimaṃ ekacittakkhaṇe nānārasalakkhaṇā pubbabhāgavipassanā bojjhaṅgā kathitā hontīti.
পঠমো নযো।
Paṭhamo nayo.
৪৬৮-৪৬৯. ইদানি যেন পরিযাযেন সত্ত বোজ্ঝঙ্গা চুদ্দস হোন্তি, তস্স পকাসনত্থং দুতিযনযং দস্সেন্তো পুন সত্ত বোজ্ঝঙ্গাতিআদিমাহ। তত্রাযং অনুপুব্বপদৰণ্ণনা – অজ্ঝত্তং ধম্মেসু সতীতি অজ্ঝত্তিকসঙ্খারে পরিগ্গণ্হন্তস্স উপ্পন্না সতি। বহিদ্ধা ধম্মেসু সতীতি বহিদ্ধাসঙ্খারে পরিগ্গণ্হন্তস্স উপ্পন্না সতি। যদপীতি যাপি। তদপীতি সাপি। অভিঞ্ঞাযাতি অভিঞ্ঞেয্যধম্মে অভিজাননত্থায। সম্বোধাযাতি সম্বোধি ৰুচ্চতি মগ্গো, মগ্গত্থাযাতি অত্থো। নিব্বানাযাতি ৰানং ৰুচ্চতি তণ্হা; সা তত্থ নত্থীতি নিব্বানং, তদত্থায, অসঙ্খতায অমতধাতুযা সচ্ছিকিরিযত্থায সংৰত্ততীতি অত্থো। ধম্মৰিচযসম্বোজ্ঝঙ্গেপি এসেৰ নযো।
468-469. Idāni yena pariyāyena satta bojjhaṅgā cuddasa honti, tassa pakāsanatthaṃ dutiyanayaṃ dassento puna satta bojjhaṅgātiādimāha. Tatrāyaṃ anupubbapadavaṇṇanā – ajjhattaṃ dhammesu satīti ajjhattikasaṅkhāre pariggaṇhantassa uppannā sati. Bahiddhā dhammesu satīti bahiddhāsaṅkhāre pariggaṇhantassa uppannā sati. Yadapīti yāpi. Tadapīti sāpi. Abhiññāyāti abhiññeyyadhamme abhijānanatthāya. Sambodhāyāti sambodhi vuccati maggo, maggatthāyāti attho. Nibbānāyāti vānaṃ vuccati taṇhā; sā tattha natthīti nibbānaṃ, tadatthāya, asaṅkhatāya amatadhātuyā sacchikiriyatthāya saṃvattatīti attho. Dhammavicayasambojjhaṅgepi eseva nayo.
কাযিকং ৰীরিযন্তি চঙ্কমং অধিট্ঠহন্তস্স উপ্পন্নৰীরিযং। চেতসিকং ৰীরিযন্তি ‘‘ন তাৰাহং ইমং পল্লঙ্কং ভিন্দিস্সামি যাৰ মে ন অনুপাদায আসৰেহি চিত্তং ৰিমুচ্চিস্সতী’’তি এৰং কাযপযোগং ৰিনা উপ্পন্নৰীরিযং। কাযপস্সদ্ধীতি তিণ্ণং খন্ধানং দরথপস্সদ্ধি। চিত্তপস্সদ্ধীতি ৰিঞ্ঞাণক্খন্ধস্স দরথপস্সদ্ধি। উপেক্খাসম্বোজ্ঝঙ্গে সতিসম্বোজ্ঝঙ্গসদিসোৰ ৰিনিচ্ছযো। ইমস্মিং নযে সত্ত বোজ্ঝঙ্গা লোকিযলোকুত্তরমিস্সকা কথিতা।
Kāyikaṃ vīriyanti caṅkamaṃ adhiṭṭhahantassa uppannavīriyaṃ. Cetasikaṃ vīriyanti ‘‘na tāvāhaṃ imaṃ pallaṅkaṃ bhindissāmi yāva me na anupādāya āsavehi cittaṃ vimuccissatī’’ti evaṃ kāyapayogaṃ vinā uppannavīriyaṃ. Kāyapassaddhīti tiṇṇaṃ khandhānaṃ darathapassaddhi. Cittapassaddhīti viññāṇakkhandhassa darathapassaddhi. Upekkhāsambojjhaṅge satisambojjhaṅgasadisova vinicchayo. Imasmiṃ naye satta bojjhaṅgā lokiyalokuttaramissakā kathitā.
পোরাণকত্থেরা পন ‘এত্তকেন পাকটং ন হোতী’তি ৰিভজিত্ৰা দস্সেসুং। এতেসু হি অজ্ঝত্তধম্মেসু সতি পৰিচযো উপেক্খাতি ইমে তযো অত্তনো খন্ধারম্মণত্তা লোকিযাৰ হোন্তি। তথা মগ্গং অপ্পত্তং কাযিকৰীরিযং। অৰিতক্কঅৰিচারা পন পীতিসমাধিযো লোকুত্তরা হোন্তি। সেসা লোকিযলোকুত্তরমিস্সকাতি।
Porāṇakattherā pana ‘ettakena pākaṭaṃ na hotī’ti vibhajitvā dassesuṃ. Etesu hi ajjhattadhammesu sati pavicayo upekkhāti ime tayo attano khandhārammaṇattā lokiyāva honti. Tathā maggaṃ appattaṃ kāyikavīriyaṃ. Avitakkaavicārā pana pītisamādhiyo lokuttarā honti. Sesā lokiyalokuttaramissakāti.
তত্থ অজ্ঝত্তং তাৰ ধম্মেসু সতিপৰিচযউপেক্খা অজ্ঝত্তারম্মণা, লোকুত্তরা পন বহিদ্ধারম্মণাতি তেসং লোকুত্তরভাৰো মা যুজ্জিত্থ। চঙ্কমপ্পযোগেন নিব্বত্তৰীরিযম্পি লোকিযন্তি ৰদন্তো ন কিলমতি। অৰিতক্কঅৰিচারা পন পীতিসমাধিযো কদা লোকুত্তরা হোন্তীতি? কামাৰচরে তাৰ পীতিসম্বোজ্ঝঙ্গো লব্ভতি, অৰিতক্কঅৰিচারা পীতি ন লব্ভতি। রূপাৰচরে অৰিতক্কঅৰিচারা পীতি লব্ভতি, পীতিসম্বোজ্ঝঙ্গো পন ন লব্ভতি। অরূপাৰচরে সব্বেন সব্বং ন লব্ভতি। এত্থ পন অলব্ভমানকং উপাদায লব্ভমানকাপি পটিক্খিত্তা। এৰমযং অৰিতক্কঅৰিচারো পীতিসম্বোজ্ঝঙ্গো কামাৰচরতোপি নিক্খন্তো রূপাৰচরতোপি অরূপাৰচরতোপীতি নিব্বত্তিতলোকুত্তরো যেৰাতি কথিতো।
Tattha ajjhattaṃ tāva dhammesu satipavicayaupekkhā ajjhattārammaṇā, lokuttarā pana bahiddhārammaṇāti tesaṃ lokuttarabhāvo mā yujjittha. Caṅkamappayogena nibbattavīriyampi lokiyanti vadanto na kilamati. Avitakkaavicārā pana pītisamādhiyo kadā lokuttarā hontīti? Kāmāvacare tāva pītisambojjhaṅgo labbhati, avitakkaavicārā pīti na labbhati. Rūpāvacare avitakkaavicārā pīti labbhati, pītisambojjhaṅgo pana na labbhati. Arūpāvacare sabbena sabbaṃ na labbhati. Ettha pana alabbhamānakaṃ upādāya labbhamānakāpi paṭikkhittā. Evamayaṃ avitakkaavicāro pītisambojjhaṅgo kāmāvacaratopi nikkhanto rūpāvacaratopi arūpāvacaratopīti nibbattitalokuttaro yevāti kathito.
তথা কামাৰচরে সমাধিসম্বোজ্ঝঙ্গো লব্ভতি, অৰিতক্কঅৰিচারো পন সমাধি ন লব্ভতি। রূপাৰচরঅরূপাৰচরেসু অৰিতক্কঅৰিচারো সমাধি লব্ভতি, সমাধিসম্বোজ্ঝঙ্গো পন ন লব্ভতি। এত্থ পন অলব্ভমানকং উপাদায লব্ভমানকোপি পটিক্খিত্তো। এৰমযং অৰিতক্কঅৰিচারো সমাধি কামাৰচরতোপি নিক্খন্তো রূপাৰচরতোপি অরূপাৰচরতোপীতি নিব্বত্তিতলোকুত্তরো যেৰাতি কথিতো।
Tathā kāmāvacare samādhisambojjhaṅgo labbhati, avitakkaavicāro pana samādhi na labbhati. Rūpāvacaraarūpāvacaresu avitakkaavicāro samādhi labbhati, samādhisambojjhaṅgo pana na labbhati. Ettha pana alabbhamānakaṃ upādāya labbhamānakopi paṭikkhitto. Evamayaṃ avitakkaavicāro samādhi kāmāvacaratopi nikkhanto rūpāvacaratopi arūpāvacaratopīti nibbattitalokuttaro yevāti kathito.
অপিচ লোকিযং গহেত্ৰা লোকুত্তরো কাতব্বো; লোকুত্তরং গহেত্ৰা লোকিযো কাতব্বো। অজ্ঝত্তধম্মেসু হি সতিপৰিচযউপেক্খানং লোকুত্তরভাৰনাকালোপি অত্থি। তত্রিদং সুত্তং – ‘‘অজ্ঝত্তৰিমোক্খং খ্ৰাহং, আৰুসো, সব্বুপাদানক্খযং ৰদামি; এৰমস্সিমে আসৰা নানুসেন্তী’’তি (সং॰ নি॰ ২.৩২ থোকং ৰিসদিসং) ইমিনা সুত্তেন লোকুত্তরা হোন্তি। যদা পন চঙ্কমপযোগেন নিব্বত্তে কাযিকৰীরিযে অনুপসন্তেযেৰ ৰিপস্সনা মগ্গেন ঘটীযতি, তদা তং লোকুত্তরং হোতি। যে পন থেরা ‘‘কসিণজ্ঝানে, আনাপানজ্ঝানে, ব্রহ্মৰিহারজ্ঝানে চ বোজ্ঝঙ্গো উদ্ধরন্তো ন ৰারেতব্বো’’তি ৰদন্তি, তেসং ৰাদে অৰিতক্কঅৰিচারা পীতিসমাধিসম্বোজ্ঝঙ্গা লোকিযা হোন্তীতি।
Apica lokiyaṃ gahetvā lokuttaro kātabbo; lokuttaraṃ gahetvā lokiyo kātabbo. Ajjhattadhammesu hi satipavicayaupekkhānaṃ lokuttarabhāvanākālopi atthi. Tatridaṃ suttaṃ – ‘‘ajjhattavimokkhaṃ khvāhaṃ, āvuso, sabbupādānakkhayaṃ vadāmi; evamassime āsavā nānusentī’’ti (saṃ. ni. 2.32 thokaṃ visadisaṃ) iminā suttena lokuttarā honti. Yadā pana caṅkamapayogena nibbatte kāyikavīriye anupasanteyeva vipassanā maggena ghaṭīyati, tadā taṃ lokuttaraṃ hoti. Ye pana therā ‘‘kasiṇajjhāne, ānāpānajjhāne, brahmavihārajjhāne ca bojjhaṅgo uddharanto na vāretabbo’’ti vadanti, tesaṃ vāde avitakkaavicārā pītisamādhisambojjhaṅgā lokiyā hontīti.
দুতিযো নযো।
Dutiyo nayo.
৪৭০-৪৭১. ইদানি বোজ্ঝঙ্গানং ভাৰনাৰসেন পৰত্তং ততিযনযং দস্সেন্তো পুন সত্ত বোজ্ঝঙ্গাতিআদিমাহ। তত্থাপি অযং অনুপুব্বপদৰণ্ণনা – ভাৰেতীতি ৰড্ঢেতি; অত্তনো সন্তানে পুনপ্পুনং জনেতি অভিনিব্বত্তেতি। ৰিৰেকনিস্সিতন্তি ৰিৰেকে নিস্সিতং। ৰিৰেকোতি ৰিৰিত্ততা। সো চাযং তদঙ্গৰিৰেকো, ৰিক্খম্ভনসমুচ্ছেদপটিপ্পস্সদ্ধিনিস্সরণৰিৰেকোতি পঞ্চৰিধো। তত্থ তদঙ্গৰিৰেকো নাম ৰিপস্সনা। ৰিক্খম্ভনৰিৰেকো নাম অট্ঠ সমাপত্তিযো। সমুচ্ছেদৰিৰেকো নাম মগ্গো। পটিপ্পস্সদ্ধিৰিৰেকো নাম ফলং। নিস্সরণৰিৰেকো নাম সব্বনিমিত্তনিস্সটং নিব্বানং। এৰমেতস্মিং পঞ্চৰিধে ৰিৰেকে নিস্সিতং ৰিৰেকনিস্সিতন্তি তদঙ্গৰিৰেকনিস্সিতং সমুচ্ছেদৰিৰেকনিস্সিতং নিস্সরণৰিৰেকনিস্সিতঞ্চ সতিসম্বোজ্ঝঙ্গং ভাৰেতীতি অযমত্থো ৰেদিতব্বো।
470-471. Idāni bojjhaṅgānaṃ bhāvanāvasena pavattaṃ tatiyanayaṃ dassento puna satta bojjhaṅgātiādimāha. Tatthāpi ayaṃ anupubbapadavaṇṇanā – bhāvetīti vaḍḍheti; attano santāne punappunaṃ janeti abhinibbatteti. Vivekanissitanti viveke nissitaṃ. Vivekoti vivittatā. So cāyaṃ tadaṅgaviveko, vikkhambhanasamucchedapaṭippassaddhinissaraṇavivekoti pañcavidho. Tattha tadaṅgaviveko nāma vipassanā. Vikkhambhanaviveko nāma aṭṭha samāpattiyo. Samucchedaviveko nāma maggo. Paṭippassaddhiviveko nāma phalaṃ. Nissaraṇaviveko nāma sabbanimittanissaṭaṃ nibbānaṃ. Evametasmiṃ pañcavidhe viveke nissitaṃ vivekanissitanti tadaṅgavivekanissitaṃ samucchedavivekanissitaṃ nissaraṇavivekanissitañca satisambojjhaṅgaṃ bhāvetīti ayamattho veditabbo.
তথা হি অযং সতিসম্বোজ্ঝঙ্গভাৰনানুযোগমনুযুত্তো যোগী ৰিপস্সনাক্খণে কিচ্চতো তদঙ্গৰিৰেকনিস্সিতং, অজ্ঝাসযতো নিস্সরণৰিৰেকনিস্সিতং, মগ্গকালে পন কিচ্চতো সমুচ্ছেদৰিৰেকনিস্সিতং, আরম্মণতো নিস্সরণৰিৰেকনিস্সিতং, সতিসম্বোজ্ঝঙ্গং ভাৰেতি। পঞ্চৰিৰেকনিস্সিতম্পীতি একে। তে হি ন কেৰলং বলৰৰিপস্সনামগ্গফলক্খণেসু এৰ বোজ্ঝঙ্গং উদ্ধরন্তি, ৰিপস্সনাপাদককসিণজ্ঝানআনাপানাসুভব্রহ্মৰিহারজ্ঝানেসুপি উদ্ধরন্তি, ন চ পটিসিদ্ধা অট্ঠকথাচরিযেহি । তস্মা তেসং মতেন এতেসং ঝানানং পৰত্তিক্খণে কিচ্চতো এৰ ৰিক্খম্ভনৰিৰেকনিস্সিতং। যথা চ ৰিপস্সনাক্খণে ‘‘অজ্ঝাসযতো নিস্সরণৰিৰেকনিস্সিত’’ন্তি ৰুত্তং, এৰং ‘‘পটিপ্পস্সদ্ধিৰিৰেকনিস্সিতম্পি ভাৰেতী’’তি ৰত্তুং ৰট্টতি। এস নযো ৰিরাগনিস্সিতাদীসু। ৰিৰেকত্থা এৰ হি ৰিরাগাদযো।
Tathā hi ayaṃ satisambojjhaṅgabhāvanānuyogamanuyutto yogī vipassanākkhaṇe kiccato tadaṅgavivekanissitaṃ, ajjhāsayato nissaraṇavivekanissitaṃ, maggakāle pana kiccato samucchedavivekanissitaṃ, ārammaṇato nissaraṇavivekanissitaṃ, satisambojjhaṅgaṃ bhāveti. Pañcavivekanissitampīti eke. Te hi na kevalaṃ balavavipassanāmaggaphalakkhaṇesu eva bojjhaṅgaṃ uddharanti, vipassanāpādakakasiṇajjhānaānāpānāsubhabrahmavihārajjhānesupi uddharanti, na ca paṭisiddhā aṭṭhakathācariyehi . Tasmā tesaṃ matena etesaṃ jhānānaṃ pavattikkhaṇe kiccato eva vikkhambhanavivekanissitaṃ. Yathā ca vipassanākkhaṇe ‘‘ajjhāsayato nissaraṇavivekanissita’’nti vuttaṃ, evaṃ ‘‘paṭippassaddhivivekanissitampi bhāvetī’’ti vattuṃ vaṭṭati. Esa nayo virāganissitādīsu. Vivekatthā eva hi virāgādayo.
কেৰলঞ্চেত্থ ৰোস্সগ্গো দুৰিধো – পরিচ্চাগৰোস্সগ্গো চ পক্খন্দনৰোস্সগ্গো চাতি। তত্থ ‘পরিচ্চাগৰোস্সগ্গো’তি ৰিপস্সনাক্খণে চ তদঙ্গৰসেন মগ্গক্খণে চ সমুচ্ছেদৰসেন কিলেসপ্পহানং। ‘পক্খন্দনৰোস্সগ্গো’তি ৰিপস্সনাক্খণে তন্নিন্নভাৰেন, মগ্গক্খণে পন আরম্মণকরণেন নিব্বানপক্খন্দনং। তদুভযম্পি ইমস্মিং লোকিযলোকুত্তরমিস্সকে অত্থৰণ্ণনানযে ৰট্টতি। তথা হি অযং সতি সম্বোজ্ঝঙ্গো যথাৰুত্তেন পকারেন কিলেসে পরিচ্চজতি, নিব্বানঞ্চ পক্খন্দতি।
Kevalañcettha vossaggo duvidho – pariccāgavossaggo ca pakkhandanavossaggo cāti. Tattha ‘pariccāgavossaggo’ti vipassanākkhaṇe ca tadaṅgavasena maggakkhaṇe ca samucchedavasena kilesappahānaṃ. ‘Pakkhandanavossaggo’ti vipassanākkhaṇe tanninnabhāvena, maggakkhaṇe pana ārammaṇakaraṇena nibbānapakkhandanaṃ. Tadubhayampi imasmiṃ lokiyalokuttaramissake atthavaṇṇanānaye vaṭṭati. Tathā hi ayaṃ sati sambojjhaṅgo yathāvuttena pakārena kilese pariccajati, nibbānañca pakkhandati.
ৰোস্সগ্গপরিণামিন্তি ইমিনা পন সকলেন ৰচনেন ৰোস্সগ্গত্থং পরিণমন্তং পরিণতঞ্চ, পরিপচ্চন্তং পরিপক্কঞ্চাতি ইদং ৰুত্তং হোতি। অযঞ্হি বোজ্ঝঙ্গভাৰনমনুযুত্তো ভিক্খু যথা সতিসম্বোজ্ঝঙ্গো কিলেসপরিচ্চাগৰোস্সগ্গত্থং নিব্বানপক্খন্দনৰোস্সগ্গত্থঞ্চ পরিপচ্চতি, যথা চ পরিপক্কো হোতি, তথা নং ভাৰেতীতি। এস নযো সেসবোজ্ঝঙ্গেসুপি। ইমস্মিম্পি নযে লোকিযলোকুত্তরমিস্সকা বোজ্ঝঙ্গা কথিতাতি।
Vossaggapariṇāminti iminā pana sakalena vacanena vossaggatthaṃ pariṇamantaṃ pariṇatañca, paripaccantaṃ paripakkañcāti idaṃ vuttaṃ hoti. Ayañhi bojjhaṅgabhāvanamanuyutto bhikkhu yathā satisambojjhaṅgo kilesapariccāgavossaggatthaṃ nibbānapakkhandanavossaggatthañca paripaccati, yathā ca paripakko hoti, tathā naṃ bhāvetīti. Esa nayo sesabojjhaṅgesupi. Imasmimpi naye lokiyalokuttaramissakā bojjhaṅgā kathitāti.
সুত্তন্তভাজনীযৰণ্ণনা।
Suttantabhājanīyavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১০. বোজ্ঝঙ্গৰিভঙ্গো • 10. Bojjhaṅgavibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১০. বোজ্ঝঙ্গৰিভঙ্গো • 10. Bojjhaṅgavibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১০. বোজ্ঝঙ্গৰিভঙ্গো • 10. Bojjhaṅgavibhaṅgo
