| Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā |
১৩. অপ্পমঞ্ঞাৰিভঙ্গো
13. Appamaññāvibhaṅgo
১. সুত্তন্তভাজনীযৰণ্ণনা
1. Suttantabhājanīyavaṇṇanā
৬৪২. ইদানি তদনন্তরে অপ্পমঞ্ঞাৰিভঙ্গে চতস্সোতি গণনপরিচ্ছেদো। অপ্পমঞ্ঞাযোতি ফরণঅপ্পমাণৰসেন অপ্পমঞ্ঞাযো। এতা হি আরম্মণৰসেন অপ্পমাণে ৰা সত্তে ফরন্তি, একসত্তম্পি ৰা অনৰসেসফরণৰসেন ফরন্তীতি ফরণঅপ্পমাণৰসেন অপ্পমঞ্ঞাযোতি ৰুচ্চন্তি। ইধ ভিক্খূতি ইমস্মিং সাসনে ভিক্খু। মেত্তাসহগতেনাতি মেত্তায সমন্নাগতেন। চেতসাতি চিত্তেন। একং দিসন্তি একিস্সা দিসায। পঠমপরিগ্গহিতং সত্তং উপাদায একদিসাপরিযাপন্নসত্তফরণৰসেন ৰুত্তং। ফরিত্ৰাতি ফুসিত্ৰা আরম্মণং কত্ৰা। ৰিহরতীতি ব্রহ্মৰিহারাধিট্ঠিতং ইরিযাপথৰিহারং পৰত্তেতি। তথা দুতিযন্তি যথা পুরত্থিমাদীসু দিসাসু যং কিঞ্চি একং দিসং ফরিত্ৰা ৰিহরতি, তথেৰ তদনন্তরং দুতিযং ততিযং চতুত্থঞ্চাতি অত্থো।
642. Idāni tadanantare appamaññāvibhaṅge catassoti gaṇanaparicchedo. Appamaññāyoti pharaṇaappamāṇavasena appamaññāyo. Etā hi ārammaṇavasena appamāṇe vā satte pharanti, ekasattampi vā anavasesapharaṇavasena pharantīti pharaṇaappamāṇavasena appamaññāyoti vuccanti. Idha bhikkhūti imasmiṃ sāsane bhikkhu. Mettāsahagatenāti mettāya samannāgatena. Cetasāti cittena. Ekaṃ disanti ekissā disāya. Paṭhamapariggahitaṃ sattaṃ upādāya ekadisāpariyāpannasattapharaṇavasena vuttaṃ. Pharitvāti phusitvā ārammaṇaṃ katvā. Viharatīti brahmavihārādhiṭṭhitaṃ iriyāpathavihāraṃ pavatteti. Tathā dutiyanti yathā puratthimādīsu disāsu yaṃ kiñci ekaṃ disaṃ pharitvā viharati, tatheva tadanantaraṃ dutiyaṃ tatiyaṃ catutthañcāti attho.
ইতি উদ্ধন্তি তেনেৰ চ নযেন উপরিমং দিসন্তি ৰুত্তং হোতি। অধো তিরিযন্তি অধোদিসম্পি তিরিযংদিসম্পি এৰমেৰ। এত্থ চ অধোতি হেট্ঠা, তিরিযন্তি অনুদিসা। এৰং সব্বদিসাসু অস্সমণ্ডলে অস্সমিৰ মেত্তাসহগতং চিত্তং সারেতিপি পচ্চাসারেতিপীতি এত্তাৰতা একমেকং দিসং পরিগ্গহেত্ৰা ওধিসো মেত্তাফরণং দস্সিতং। সব্বধীতিআদি পন অনোধিসো দস্সনত্থং ৰুত্তং। তত্থ সব্বধীতি সব্বত্থ। সব্বত্ততাযাতি সব্বেসু হীনমজ্ঝিমুক্কট্ঠমিত্তসপত্তমজ্ঝত্তাদিপ্পভেদেসু অত্ততায ‘অযং পরসত্তো’তি ৰিভাগং অকত্ৰা অত্তসমতাযাতি ৰুত্তং হোতি; অথ ৰা সব্বত্ততাযাতি সব্বেন চিত্তভাৰেন ঈসকম্পি বহি অৰিক্খিপমানোতি ৰুত্তং হোতি। সব্বাৰন্তন্তি সব্বসত্তৰন্তং, সব্বসত্তযুত্তন্তি অত্থো। লোকন্তি সত্তলোকং।
Iti uddhanti teneva ca nayena uparimaṃ disanti vuttaṃ hoti. Adho tiriyanti adhodisampi tiriyaṃdisampi evameva. Ettha ca adhoti heṭṭhā, tiriyanti anudisā. Evaṃ sabbadisāsu assamaṇḍale assamiva mettāsahagataṃ cittaṃ sāretipi paccāsāretipīti ettāvatā ekamekaṃ disaṃ pariggahetvā odhiso mettāpharaṇaṃ dassitaṃ. Sabbadhītiādi pana anodhiso dassanatthaṃ vuttaṃ. Tattha sabbadhīti sabbattha. Sabbattatāyāti sabbesu hīnamajjhimukkaṭṭhamittasapattamajjhattādippabhedesu attatāya ‘ayaṃ parasatto’ti vibhāgaṃ akatvā attasamatāyāti vuttaṃ hoti; atha vā sabbattatāyāti sabbena cittabhāvena īsakampi bahi avikkhipamānoti vuttaṃ hoti. Sabbāvantanti sabbasattavantaṃ, sabbasattayuttanti attho. Lokanti sattalokaṃ.
ৰিপুলেনাতিএৰমাদিপরিযাযদস্সনতো পনেত্থ পুন ‘‘মেত্তাসহগতেনা’’তি ৰুত্তং। যস্মা ৰা এত্থ ওধিসো ফরণে ৰিয পুন ‘তথা’সদ্দো ‘ইতি’সদ্দো ৰা ন ৰুত্তো, তস্মা পুন ‘‘মেত্তাসহগতেন চেতসা’’তি ৰুত্তং; নিগমনৰসেন ৰা এতং ৰুত্তং। ৰিপুলেনাতি এত্থ চ ফরণৰসেন ৰিপুলতা দট্ঠব্বা। ভূমিৰসেন পন তং মহগ্গতং, পগুণৰসেন অপ্পমাণং , সত্তারম্মণৰসেন চ অপ্পমাণং, ব্যাপাদপচ্চত্থিকপ্পহানেন অৰেরং, দোমনস্সপ্পহানতো অব্যাপজ্ঝং, নিদ্দুক্খন্তি ৰুত্তং হোতি। অযং তাৰ ‘‘মেত্তাসহগতেন চেতসা’’তিআদিনা নযেন ঠপিতায মাতিকায অত্থো।
Vipulenātievamādipariyāyadassanato panettha puna ‘‘mettāsahagatenā’’ti vuttaṃ. Yasmā vā ettha odhiso pharaṇe viya puna ‘tathā’saddo ‘iti’saddo vā na vutto, tasmā puna ‘‘mettāsahagatena cetasā’’ti vuttaṃ; nigamanavasena vā etaṃ vuttaṃ. Vipulenāti ettha ca pharaṇavasena vipulatā daṭṭhabbā. Bhūmivasena pana taṃ mahaggataṃ, paguṇavasena appamāṇaṃ, sattārammaṇavasena ca appamāṇaṃ, byāpādapaccatthikappahānena averaṃ, domanassappahānato abyāpajjhaṃ, niddukkhanti vuttaṃ hoti. Ayaṃ tāva ‘‘mettāsahagatena cetasā’’tiādinā nayena ṭhapitāya mātikāya attho.
৬৪৩. ইদানি যদেতং ‘‘কথঞ্চ, ভিক্খৰে, মেত্তাসহগতেন চেতসা’’তিআদিনা নযেন ৰুত্তং পদভাজনীযং, তত্থ যস্মা ইদং কম্মট্ঠানং দোসচরিতস্স সপ্পাযং, তস্মা যথারূপে পুগ্গলে অযং মেত্তা অপ্পনং পাপুণাতি, তং মেত্তায ৰত্থুভূতং পুগ্গলং তাৰ দস্সেতুং সেয্যথাপি নাম একং পুগ্গলন্তিআদি ৰুত্তং। তত্থ সেয্যথাপি নামাতি ওপম্মত্থে নিপাতো, যথা একং পুগ্গলন্তি অত্থো। পিযন্তি পেমনীযং। মনাপন্তি হদযৰুড্ঢিকরং। তত্থ পুব্বেৰ সন্নিৰাসেন পচ্চুপ্পন্নহিতেন ৰা পিযো নাম হোতি, সীলাদিগুণসমাযোগেন মনাপো নাম; দানসমানত্ততাহি ৰা পিযতা, পিযৰচনঅত্থচরিযতাহি মনাপতা ৰেদিতব্বা। যস্মা চেত্থ পিযতায ইমস্স ব্যাপাদস্স পহানং হোতি, ততো মেত্তা সুখং ফরতি, মনাপতায উদাসীনতা ন সণ্ঠাতি, হিরোত্তপ্পঞ্চ পচ্চুপট্ঠাতি, ততো হিরোত্তপ্পানুপালিতা মেত্তা ন পরিহাযতি, তস্মা তং উপমং কত্ৰা ইদং ৰুত্তং – পিযং মনাপন্তি। মেত্তাযেয্যাতি মেত্তায ফরেয্য; তস্মিং পুগ্গলে মেত্তং করেয্য পৰত্তেয্যাতি অত্থো। এৰমেৰ সব্বে সত্তেতি যথা পিযং পুগ্গলং মেত্তাযেয্য, এৰং তস্মিং পুগ্গলে অপ্পনাপ্পত্তায ৰসীভাৰং উপগতায মেত্তায মজ্ঝত্তৰেরিসঙ্খাতেপি সব্বে সত্তে অনুক্কমেন ফরতীতি অত্থো। মেত্তি মেত্তাযনাতিআদীনি ৰুত্তত্থানেৰ।
643. Idāni yadetaṃ ‘‘kathañca, bhikkhave, mettāsahagatena cetasā’’tiādinā nayena vuttaṃ padabhājanīyaṃ, tattha yasmā idaṃ kammaṭṭhānaṃ dosacaritassa sappāyaṃ, tasmā yathārūpe puggale ayaṃ mettā appanaṃ pāpuṇāti, taṃ mettāya vatthubhūtaṃ puggalaṃ tāva dassetuṃ seyyathāpi nāma ekaṃ puggalantiādi vuttaṃ. Tattha seyyathāpi nāmāti opammatthe nipāto, yathā ekaṃ puggalanti attho. Piyanti pemanīyaṃ. Manāpanti hadayavuḍḍhikaraṃ. Tattha pubbeva sannivāsena paccuppannahitena vā piyo nāma hoti, sīlādiguṇasamāyogena manāpo nāma; dānasamānattatāhi vā piyatā, piyavacanaatthacariyatāhi manāpatā veditabbā. Yasmā cettha piyatāya imassa byāpādassa pahānaṃ hoti, tato mettā sukhaṃ pharati, manāpatāya udāsīnatā na saṇṭhāti, hirottappañca paccupaṭṭhāti, tato hirottappānupālitā mettā na parihāyati, tasmā taṃ upamaṃ katvā idaṃ vuttaṃ – piyaṃ manāpanti. Mettāyeyyāti mettāya phareyya; tasmiṃ puggale mettaṃ kareyya pavatteyyāti attho. Evamevasabbe satteti yathā piyaṃ puggalaṃ mettāyeyya, evaṃ tasmiṃ puggale appanāppattāya vasībhāvaṃ upagatāya mettāya majjhattaverisaṅkhātepi sabbe satte anukkamena pharatīti attho. Metti mettāyanātiādīni vuttatthāneva.
৬৪৪. ৰিদিসং ৰাতি পদং তিরিযং ৰাতি এতস্স অত্থৰিভাৰনত্থং ৰুত্তং।
644. Vidisaṃ vāti padaṃ tiriyaṃ vāti etassa atthavibhāvanatthaṃ vuttaṃ.
৬৪৫. ফরিত্ৰাতি আরম্মণকরণৰসেন ফুসিত্ৰা। অধিমুঞ্চিত্ৰাতি অধিকভাৰেন মুঞ্চিত্ৰা, যথা মুত্তং সুমুত্তং হোতি সুপ্পসারিতং সুৰিত্থতং তথা মুঞ্চিত্ৰাতি অত্থো।
645. Pharitvāti ārammaṇakaraṇavasena phusitvā. Adhimuñcitvāti adhikabhāvena muñcitvā, yathā muttaṃ sumuttaṃ hoti suppasāritaṃ suvitthataṃ tathā muñcitvāti attho.
৬৪৮. সব্বধিআদিনিদ্দেসে যস্মা তীণিপি এতানি পদানি সব্বসঙ্গাহিকানি, তস্মা নেসং একতোৰ অত্থং দস্সেতুং সব্বেন সব্বন্তিআদি ৰুত্তং। তস্সত্থো হেট্ঠা ৰুত্তোযেৰ।
648. Sabbadhiādiniddese yasmā tīṇipi etāni padāni sabbasaṅgāhikāni, tasmā nesaṃ ekatova atthaṃ dassetuṃ sabbena sabbantiādi vuttaṃ. Tassattho heṭṭhā vuttoyeva.
৬৫০. ৰিপুলাদিনিদ্দেসে যস্মা যং অপ্পনাপ্পত্তং হুত্ৰা অনন্তসত্তফরণৰসেন ৰিপুলং, তং নিযমতো ভূমিৰসেন মহগ্গতং হোতি। যঞ্চ মহগ্গতং তং অপ্পমাণগোচরৰসেন অপ্পমাণং। যং অপ্পমাণং তং পচ্চত্থিকৰিঘাতৰসেন অৰেরং। যঞ্চ অৰেরং তং ৰিহতব্যাপজ্জতায অব্যাপজ্জং। তস্মা ‘‘যং ৰিপুলং তং মহগ্গত’’ন্তিআদি ৰুত্তং। অৰেরো অব্যাপজ্জোতি চেত্থ লিঙ্গৰিপরিযাযেন ৰুত্তং। মনেন ৰা সদ্ধিং যোজনা কাতব্বা – যং অপ্পমাণং চিত্তং, সো অৰেরো মনো; যো অৰেরো সো অব্যাপজ্জোতি। অপিচেত্থ হেট্ঠিমং হেট্ঠিমং পদং উপরিমস্স উপরিমস্স, উপরিমং ৰা উপরিমং হেট্ঠিমস্স হেট্ঠিমস্স অত্থোতিপি ৰেদিতব্বো।
650. Vipulādiniddese yasmā yaṃ appanāppattaṃ hutvā anantasattapharaṇavasena vipulaṃ, taṃ niyamato bhūmivasena mahaggataṃ hoti. Yañca mahaggataṃ taṃ appamāṇagocaravasena appamāṇaṃ. Yaṃ appamāṇaṃ taṃ paccatthikavighātavasena averaṃ. Yañca averaṃ taṃ vihatabyāpajjatāya abyāpajjaṃ. Tasmā ‘‘yaṃ vipulaṃ taṃ mahaggata’’ntiādi vuttaṃ. Avero abyāpajjoti cettha liṅgavipariyāyena vuttaṃ. Manena vā saddhiṃ yojanā kātabbā – yaṃ appamāṇaṃ cittaṃ, so avero mano; yo avero so abyāpajjoti. Apicettha heṭṭhimaṃ heṭṭhimaṃ padaṃ uparimassa uparimassa, uparimaṃ vā uparimaṃ heṭṭhimassa heṭṭhimassa atthotipi veditabbo.
৬৫৩. সেয্যথাপি নাম একং পুগ্গলং দুগ্গতং দুরুপেতন্তি ইদম্পি করুণায ৰত্থুভূতং পুগ্গলং দস্সেতুং ৰুত্তং। এৰরূপস্মিঞ্হি পুগ্গলে বলৰকারুঞ্ঞং উপ্পজ্জতি। তত্থ দুগ্গতন্তি দুক্খেন সমঙ্গীভাৰং গতং। দুরুপেতন্তি কাযদুচ্চরিতাদীহি উপেতং। গতিকুলভোগাদিৰসেন ৰা তমভাৰে ঠিতো পুগ্গলো দুগ্গতো, কাযদুচ্চরিতাদীহি উপেতত্তা তমপরাযণভাৰে ঠিতো দুরুপেতোতি এৰমেত্থ অত্থো ৰেদিতব্বো।
653. Seyyathāpi nāma ekaṃ puggalaṃ duggataṃ durupetanti idampi karuṇāya vatthubhūtaṃ puggalaṃ dassetuṃ vuttaṃ. Evarūpasmiñhi puggale balavakāruññaṃ uppajjati. Tattha duggatanti dukkhena samaṅgībhāvaṃ gataṃ. Durupetanti kāyaduccaritādīhi upetaṃ. Gatikulabhogādivasena vā tamabhāve ṭhito puggalo duggato, kāyaduccaritādīhi upetattā tamaparāyaṇabhāve ṭhito durupetoti evamettha attho veditabbo.
৬৬৩. একং পুগ্গলং পিযং মনাপন্তি ইদম্পি মুদিতায ৰত্থুভূতং পুগ্গলং দস্সেতুং ৰুত্তং। তত্থ গতিকুলভোগাদিৰসেন জোতিভাৰে ঠিতো পিযো, কাযসুচরিতাদীহি উপেতত্তা জোতিপরাযণভাৰে ঠিতো মনাপোতি ৰেদিতব্বো।
663. Ekaṃ puggalaṃ piyaṃ manāpanti idampi muditāya vatthubhūtaṃ puggalaṃ dassetuṃ vuttaṃ. Tattha gatikulabhogādivasena jotibhāve ṭhito piyo, kāyasucaritādīhi upetattā jotiparāyaṇabhāve ṭhito manāpoti veditabbo.
৬৭৩. নেৰ মনাপং ন অমনাপন্তি ইদম্পি উপেক্খায ৰত্থুভূতং পুগ্গলং দস্সেতুং ৰুত্তং। তত্থ মিত্তভাৰং অসম্পত্ততায নেৰ মনাপো, অমিত্তভাৰং অসম্পত্ততায ন অমনাপোতি ৰেদিতব্বো। সেসমেত্থ যং ৰত্তব্বং সিযা, তং সব্বং হেট্ঠা চিত্তুপ্পাদকণ্ডে ৰুত্তমেৰ। ভাৰনাৰিধানম্পি এতেসং কম্মট্ঠানানং ৰিসুদ্ধিমগ্গে ৰিত্থারতো কথিতমেৰাতি।
673. Neva manāpaṃ na amanāpanti idampi upekkhāya vatthubhūtaṃ puggalaṃ dassetuṃ vuttaṃ. Tattha mittabhāvaṃ asampattatāya neva manāpo, amittabhāvaṃ asampattatāya na amanāpoti veditabbo. Sesamettha yaṃ vattabbaṃ siyā, taṃ sabbaṃ heṭṭhā cittuppādakaṇḍe vuttameva. Bhāvanāvidhānampi etesaṃ kammaṭṭhānānaṃ visuddhimagge vitthārato kathitamevāti.
সুত্তন্তভাজনীযৰণ্ণনা।
Suttantabhājanīyavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৩. অপ্পমঞ্ঞাৰিভঙ্গো • 13. Appamaññāvibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৩. অপ্পমঞ্ঞাৰিভঙ্গো • 13. Appamaññāvibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৩. অপ্পমঞ্ঞাৰিভঙ্গো • 13. Appamaññāvibhaṅgo
