| Library / Tipiṭaka / д̇ибидага • Tipiṭaka / саммохавинод̣̇аний-адтагат̇аа • Sammohavinodanī-aṭṭhakathā |
8. саммаббад̇хаанавибхан̇г̇о
8. Sammappadhānavibhaṅgo
1. суд̇д̇анд̇абхааж̇анийяаван̣н̣анаа
1. Suttantabhājanīyavaṇṇanā
390. ид̣̇аани д̇ад̣̇ананд̇арз саммаббад̇хаанавибхан̇г̇з жад̇д̇аарод̇и г̇ан̣анабарижчзд̣̇о. д̇зна на д̇ад̇о хздтаа на уд̣̇д̇ханд̇и саммаббад̇хаанабарижчзд̣̇ам̣ д̣̇ийбзд̇и. саммаббад̇хаанаад̇и гааран̣аббад̇хаанаа убааяаббад̇хаанаа яонисобад̇хаанаа. ид̇ха бхигкууд̇и имасмим̣ саасанз бадибаннаго бхигку. ануббаннаананд̇и аниб̣б̣ад̇д̇аанам̣. баабагаананд̇и лаамагаанам̣. агусалаанам̣ д̇хаммаананд̇и агосалласамбхууд̇аанам̣ д̇хаммаанам̣. ануббаад̣̇ааяаад̇и на уббаад̣̇анад̇т̇ааяа. чанд̣̇ам̣ ж̇анзд̇ийд̇и гад̇д̇угамяад̇аасан̇каад̇ам̣ гусалажчанд̣̇ам̣ ж̇анзд̇и уббаад̣̇зд̇и. вааяамад̇ийд̇и баяог̇ам̣ бараггамам̣ гарод̇и. вийрияам̣ аарабхад̇ийд̇и гааяигажзд̇асигам̣ вийрияам̣ гарод̇и. жид̇д̇ам̣ баг̇г̇ан̣хаад̇ийд̇и д̇знзва сахаж̇аад̇авийриязна жид̇д̇ам̣ угкибад̇и. бад̣̇ахад̇ийд̇и бад̇хаанавийрияам̣ гарод̇и. бадибаадияаа банзд̇аани жад̇д̇аариби бад̣̇аани аасзванаабхааванааб̣ахулийгаммасаад̇ажжагирияаахи яож̇зд̇аб̣б̣аани.
390. Idāni tadanantare sammappadhānavibhaṅge cattāroti gaṇanaparicchedo. Tena na tato heṭṭhā na uddhanti sammappadhānaparicchedaṃ dīpeti. Sammappadhānāti kāraṇappadhānā upāyappadhānā yonisopadhānā. Idha bhikkhūti imasmiṃ sāsane paṭipannako bhikkhu. Anuppannānanti anibbattānaṃ. Pāpakānanti lāmakānaṃ. Akusalānaṃ dhammānanti akosallasambhūtānaṃ dhammānaṃ. Anuppādāyāti na uppādanatthāya. Chandaṃ janetīti kattukamyatāsaṅkhātaṃ kusalacchandaṃ janeti uppādeti. Vāyamatīti payogaṃ parakkamaṃ karoti. Vīriyaṃ ārabhatīti kāyikacetasikaṃ vīriyaṃ karoti. Cittaṃ paggaṇhātīti teneva sahajātavīriyena cittaṃ ukkhipati. Padahatīti padhānavīriyaṃ karoti. Paṭipāṭiyā panetāni cattāripi padāni āsevanābhāvanābahulīkammasātaccakiriyāhi yojetabbāni.
уббаннаанам̣ баабагаананд̇и ануббаннанд̇и авад̇д̇аб̣б̣ад̇ам̣ аабаннаанам̣ баабад̇хаммаанам̣. бахаанааяаад̇и баж̇аханад̇т̇ааяа. ануббаннаанам̣ гусалаанам̣ д̇хаммаананд̇и аниб̣б̣ад̇д̇аанам̣ госалласамбхууд̇аанам̣ д̇хаммаанам̣. уббаад̣̇ааяаад̇и уббаад̣̇анад̇т̇ааяа. уббаннаананд̇и ниб̣б̣ад̇д̇аанам̣. тид̇ияаад̇и тид̇ад̇т̇ааяа. асаммосааяаад̇и анассанад̇т̇ам̣. бхияяобхаавааяаад̇и бунаббунам̣ бхаавааяа. взбуллааяаад̇и вибулабхаавааяа. бхааванааяаад̇и вад̣дхияаа. баарибуурияаад̇и барибууран̣ад̇т̇ааяа. аяам̣ д̇аава жад̇уннам̣ саммаббад̇хаанаанам̣ уд̣̇д̣̇зсавааравасзна згабад̣̇иго ад̇т̇уд̣̇д̇хааро.
Uppannānaṃ pāpakānanti anuppannanti avattabbataṃ āpannānaṃ pāpadhammānaṃ. Pahānāyāti pajahanatthāya. Anuppannānaṃ kusalānaṃ dhammānanti anibbattānaṃ kosallasambhūtānaṃ dhammānaṃ. Uppādāyāti uppādanatthāya. Uppannānanti nibbattānaṃ. Ṭhitiyāti ṭhitatthāya. Asammosāyāti anassanatthaṃ. Bhiyyobhāvāyāti punappunaṃ bhāvāya. Vepullāyāti vipulabhāvāya. Bhāvanāyāti vaḍḍhiyā. Pāripūriyāti paripūraṇatthāya. Ayaṃ tāva catunnaṃ sammappadhānānaṃ uddesavāravasena ekapadiko atthuddhāro.
391. ид̣̇аани бадибаадияаа д̇аани бад̣̇аани бхааж̇зд̇ваа д̣̇ассзд̇ум̣ гат̇ан̃жа бхигку ануббаннаананд̇иаад̣̇инаа наязна нид̣̇д̣̇зсавааро аарад̣̇д̇хо. д̇ад̇т̇а яам̣ хздтаа д̇хаммасан̇г̇ахз ааг̇ад̇асад̣̇исам̣, д̇ам̣ д̇асса ван̣н̣анааяам̣ вуд̇д̇анаязнзва взд̣̇ид̇аб̣б̣ам̣. яам̣ бана д̇асмим̣ анааг̇ад̇ам̣, д̇ад̇т̇а чанд̣̇анид̣̇д̣̇зсз д̇аава яо чанд̣̇од̇и яо чанд̣̇анияавасзна чанд̣̇о. чанд̣̇игад̇аад̇и чанд̣̇игабхааво, чанд̣̇агаран̣аагааро ваа. гад̇д̇угамяад̇аад̇и гад̇д̇угаамад̇аа. гусалод̇и чзго. д̇хаммажчанд̣̇од̇и сабхааважчанд̣̇о. аяан̃хи чанд̣̇о наама д̇ан̣хаачанд̣̇о, д̣̇идтичанд̣̇о, вийрияачанд̣̇о, д̇хаммажчанд̣̇од̇и б̣ахувид̇хо наанаббагаараго. д̇зсу д̇хаммажчанд̣̇од̇и имасмим̣ таанз гад̇д̇угамяад̇аагусалад̇хаммажчанд̣̇о ад̇хиббзд̇о.
391. Idāni paṭipāṭiyā tāni padāni bhājetvā dassetuṃ kathañca bhikkhu anuppannānantiādinā nayena niddesavāro āraddho. Tattha yaṃ heṭṭhā dhammasaṅgahe āgatasadisaṃ, taṃ tassa vaṇṇanāyaṃ vuttanayeneva veditabbaṃ. Yaṃ pana tasmiṃ anāgataṃ, tattha chandaniddese tāva yo chandoti yo chandaniyavasena chando. Chandikatāti chandikabhāvo, chandakaraṇākāro vā. Kattukamyatāti kattukāmatā. Kusaloti cheko. Dhammacchandoti sabhāvacchando. Ayañhi chando nāma taṇhāchando, diṭṭhichando, vīriyachando, dhammacchandoti bahuvidho nānappakārako. Tesu dhammacchandoti imasmiṃ ṭhāne kattukamyatākusaladhammacchando adhippeto.
имам̣ чанд̣̇ам̣ ж̇анзд̇ийд̇и чанд̣̇ам̣ гурумаанова чанд̣̇ам̣ ж̇анзд̇и наама. сан̃ж̇анзд̇ийд̇и убасаг̇г̇зна бад̣̇ам̣ вад̣дхид̇ам̣. удтабзд̇ийд̇и чанд̣̇ам̣ гурумаанова д̇ам̣ удтабзд̇и наама. самудтабзд̇ийд̇и убасаг̇г̇зна бад̣̇ам̣ вад̣дхид̇ам̣. ниб̣б̣ад̇д̇зд̇ийд̇и чанд̣̇ам̣ гурумаанова д̇ам̣ ниб̣б̣ад̇д̇зд̇и наама. абхиниб̣б̣ад̇д̇зд̇ийд̇и убасаг̇г̇зна бад̣̇ам̣ вад̣дхид̇ам̣. абижа чанд̣̇ам̣ гаронд̇ова чанд̣̇ам̣ ж̇анзд̇и наама. д̇амзва сад̇ад̇ам̣ гаронд̇о сан̃ж̇анзд̇и наама. гзнажид̣̇зва анд̇арааязна бад̇ид̇ам̣ буна угкибанд̇о удтабзд̇и наама. баб̣анд̇хадтид̇им̣ баабзнд̇о самудтабзд̇и наама. д̇ам̣ баагадам̣ гаронд̇о ниб̣б̣ад̇д̇зд̇и наама. аносагганад̇ааяа алийнавуд̇д̇ид̇ааяа анолийнавуд̇д̇ид̇ааяа абхимукабхаавзна ниб̣б̣ад̇д̇знд̇о абхиниб̣б̣ад̇д̇зд̇и наама.
Imaṃ chandaṃ janetīti chandaṃ kurumānova chandaṃ janeti nāma. Sañjanetīti upasaggena padaṃ vaḍḍhitaṃ. Uṭṭhapetīti chandaṃ kurumānova taṃ uṭṭhapeti nāma. Samuṭṭhapetīti upasaggena padaṃ vaḍḍhitaṃ. Nibbattetīti chandaṃ kurumānova taṃ nibbatteti nāma. Abhinibbattetīti upasaggena padaṃ vaḍḍhitaṃ. Apica chandaṃ karontova chandaṃ janeti nāma. Tameva satataṃ karonto sañjaneti nāma. Kenacideva antarāyena patitaṃ puna ukkhipanto uṭṭhapeti nāma. Pabandhaṭṭhitiṃ pāpento samuṭṭhapeti nāma. Taṃ pākaṭaṃ karonto nibbatteti nāma. Anosakkanatāya alīnavuttitāya anolīnavuttitāya abhimukhabhāvena nibbattento abhinibbatteti nāma.
394. вийрияанид̣̇д̣̇зсз вийрияам̣ гаронд̇ова вийрияам̣ аарабхад̇и наама. д̣̇уд̇ияабад̣̇ам̣ убасаг̇г̇зна вад̣дхид̇ам̣. вийрияам̣ гаронд̇оязва жа аасзвад̇и бхаавзд̇и наама. бунаббунам̣ гаронд̇о вахулийгарод̇и. аад̣̇ид̇ова гаронд̇о аарабхад̇и. бунаббунам̣ гаронд̇о самаарабхад̇и. бхааванаавасзна бхаж̇анд̇о аасзвад̇и. вад̣дхзнд̇о бхаавзд̇и. саб̣б̣агижжзсу д̇ад̣̇зва б̣ахулийгаронд̇о б̣ахулийгарод̇ийд̇и взд̣̇ид̇аб̣б̣о.
394. Vīriyaniddese vīriyaṃ karontova vīriyaṃ ārabhati nāma. Dutiyapadaṃ upasaggena vaḍḍhitaṃ. Vīriyaṃ karontoyeva ca āsevati bhāveti nāma. Punappunaṃ karonto vahulīkaroti. Āditova karonto ārabhati. Punappunaṃ karonto samārabhati. Bhāvanāvasena bhajanto āsevati. Vaḍḍhento bhāveti. Sabbakiccesu tadeva bahulīkaronto bahulīkarotīti veditabbo.
395. жид̇д̇абаг̇г̇аханид̣̇д̣̇зсз вийрияабаг̇г̇ахзна яож̇знд̇о жид̇д̇ам̣ баг̇г̇ан̣хаад̇и, угкибад̇ийд̇и ад̇т̇о. бунаббунам̣ баг̇г̇ан̣ханд̇о самбаг̇г̇ан̣хаад̇и. звам̣ самбаг̇г̇ахид̇ам̣ яат̇аа на бад̇ад̇и д̇ат̇аа нам̣ вийрияубад̇т̇амбхзна убад̇т̇амбхзнд̇о убад̇т̇амбхзд̇и. убад̇т̇амбхид̇амби т̇ирабхаавад̇т̇ааяа бунаббунам̣ убад̇т̇амбхзнд̇о бажжубад̇т̇амбхзд̇и наама.
395. Cittapaggahaniddese vīriyapaggahena yojento cittaṃ paggaṇhāti, ukkhipatīti attho. Punappunaṃ paggaṇhanto sampaggaṇhāti. Evaṃ sampaggahitaṃ yathā na patati tathā naṃ vīriyupatthambhena upatthambhento upatthambheti. Upatthambhitampi thirabhāvatthāya punappunaṃ upatthambhento paccupatthambheti nāma.
406. тид̇ияаад̇ибад̣̇асса нид̣̇д̣̇зсз саб̣б̣зсамби асаммосаад̣̇ийнам̣ тид̇ивзважанабхаавам̣ д̣̇ассзд̇ум̣ яаа тид̇и со асаммосод̇иаад̣̇и вуд̇д̇ам̣. зд̇т̇а хи хздтимам̣ хздтимам̣ бад̣̇ам̣ убаримасса убаримасса бад̣̇асса ад̇т̇о, убаримам̣ убаримам̣ бад̣̇ам̣ хздтимасса хздтимасса ад̇т̇од̇иби вад̇д̇ум̣ ваддад̇и. сзсам̣ саб̣б̣ад̇т̇а уд̇д̇аанад̇т̇амзваад̇и. аяам̣ д̇аава баал̣иван̣н̣анаа.
406. Ṭhitiyātipadassa niddese sabbesampi asammosādīnaṃ ṭhitivevacanabhāvaṃ dassetuṃ yā ṭhiti so asammosotiādi vuttaṃ. Ettha hi heṭṭhimaṃ heṭṭhimaṃ padaṃ uparimassa uparimassa padassa attho, uparimaṃ uparimaṃ padaṃ heṭṭhimassa heṭṭhimassa atthotipi vattuṃ vaṭṭati. Sesaṃ sabbattha uttānatthamevāti. Ayaṃ tāva pāḷivaṇṇanā.
аяам̣ банзд̇т̇а винижчаяагат̇аа. аяан̃хи саммаббад̇хаанагат̇аа наама д̣̇увид̇хаа – логияаа логуд̇д̇араа жа. д̇ад̇т̇а логияаа саб̣б̣абуб̣б̣абхааг̇з ход̇и. саа гассабасам̣яуд̇д̇абарияааязна логияамаг̇г̇агкан̣з взд̣̇ид̇аб̣б̣аа. вуд̇д̇ан̃хи д̇ад̇т̇а –
Ayaṃ panettha vinicchayakathā. Ayañhi sammappadhānakathā nāma duvidhā – lokiyā lokuttarā ca. Tattha lokiyā sabbapubbabhāge hoti. Sā kassapasaṃyuttapariyāyena lokiyamaggakkhaṇe veditabbā. Vuttañhi tattha –
‘‘жад̇д̇ааро мз, аавусо, саммаббад̇хаанаа. гад̇амз жад̇д̇ааро?
‘‘Cattāro me, āvuso, sammappadhānā. Katame cattāro?
ид̇хаавусо, бхигку ‘ануббаннаа мз баабагаа агусалаа д̇хаммаа уббаж̇ж̇амаанаа анад̇т̇ааяа сам̣вад̇д̇зяяу’нд̇и аад̇аббам̣ гарод̇и; ‘уббаннаа мз баабагаа агусалаа д̇хаммаа аббахийяамаанаа анад̇т̇ааяа сам̣вад̇д̇зяяу’нд̇и аад̇аббам̣ гарод̇и; ‘ануббаннаа мз гусалаа д̇хаммаа ануббаж̇ж̇амаанаа анад̇т̇ааяа сам̣вад̇д̇зяяу’нд̇и аад̇аббам̣ гарод̇и. ‘уббаннаа мз гусалаа д̇хаммаа нируж̇жхамаанаа анад̇т̇ааяа сам̣вад̇д̇зяяу’нд̇и аад̇аббам̣ гарод̇ий’’д̇и (сам̣. ни. 2.145).
Idhāvuso, bhikkhu ‘anuppannā me pāpakā akusalā dhammā uppajjamānā anatthāya saṃvatteyyu’nti ātappaṃ karoti; ‘uppannā me pāpakā akusalā dhammā appahīyamānā anatthāya saṃvatteyyu’nti ātappaṃ karoti; ‘anuppannā me kusalā dhammā anuppajjamānā anatthāya saṃvatteyyu’nti ātappaṃ karoti. ‘Uppannā me kusalā dhammā nirujjhamānā anatthāya saṃvatteyyu’nti ātappaṃ karotī’’ti (saṃ. ni. 2.145).
зд̇т̇а жа ‘ануббаннаа мз гусалаа д̇хаммаа’д̇и самат̇авибассанаа жзва маг̇г̇о жа. уббаннаа гусалаа наама самат̇авибассанаава. маг̇г̇о бана сагим̣ уббаж̇ж̇ид̇ваа нируж̇жхамаано анад̇т̇ааяа сам̣вад̇д̇анаго наама над̇т̇и. со хи паласса бажжаяам̣ д̣̇ад̇ваава нируж̇жхад̇и. буримасмим̣ ваа самат̇авибассанаава г̇ахзд̇аб̣б̣аад̇и вуд̇д̇ам̣, д̇ам̣ бана на яуд̇д̇ам̣.
Ettha ca ‘anuppannā me kusalā dhammā’ti samathavipassanā ceva maggo ca. Uppannākusalā nāma samathavipassanāva. Maggo pana sakiṃ uppajjitvā nirujjhamāno anatthāya saṃvattanako nāma natthi. So hi phalassa paccayaṃ datvāva nirujjhati. Purimasmiṃ vā samathavipassanāva gahetabbāti vuttaṃ, taṃ pana na yuttaṃ.
д̇ад̇т̇а ‘‘уббаннаа самат̇авибассанаа нируж̇жхамаанаа анад̇т̇ааяа сам̣вад̇д̇анд̇ий’’д̇и ад̇т̇асса аавибхаавад̇т̇ам̣ ид̣̇ам̣ вад̇т̇у – зго гира кийн̣аасавад̇т̇зро ‘махаажзд̇ияан̃жа махааб̣од̇хин̃жа ванд̣̇иссаамий’д̇и самаабад̇д̇илаабхинаа бхан̣д̣аг̇аахагасааман̣зрзна сад̣̇д̇хим̣ ж̇анабад̣̇ад̇о махаавихаарам̣ ааг̇анд̇ваа вихаарабаривзн̣ам̣ баависи; сааяанхасамаяз махаабхигкусан̇гхз жзд̇ияам̣ ванд̣̇амаанз жзд̇ияам̣ ванд̣̇анад̇т̇ааяа на нигками. гасмаа? кийн̣аасаваанан̃хи д̇ийсу рад̇анзсу маханд̇ам̣ г̇ааравам̣ ход̇и. д̇асмаа бхигкусан̇гхз ванд̣̇ид̇ваа бадигганд̇з мануссаанам̣ сааяамаасабхуд̇д̇авзлааяа сааман̣зрамби аж̇аанаабзд̇ваа ‘жзд̇ияам̣ ванд̣̇иссаамий’д̇и згагова нигками. сааман̣зро ‘гим̣ ну ко т̇зро авзлааяа згагова г̇ажчад̇и, ж̇ааниссаамий’д̇и убаж̇жхааяасса бад̣̇аанубад̣̇игова нигками. т̇зро анааваж̇ж̇анзна д̇асса ааг̇аманам̣ аж̇аананд̇о д̣̇агкин̣ад̣̇ваарзна махаажзд̇ияан̇г̇ан̣ам̣ аарул̣хо. сааман̣зроби анубад̣̇ам̣язва аарул̣хо.
Tattha ‘‘uppannā samathavipassanā nirujjhamānā anatthāya saṃvattantī’’ti atthassa āvibhāvatthaṃ idaṃ vatthu – eko kira khīṇāsavatthero ‘mahācetiyañca mahābodhiñca vandissāmī’ti samāpattilābhinā bhaṇḍagāhakasāmaṇerena saddhiṃ janapadato mahāvihāraṃ āgantvā vihārapariveṇaṃ pāvisi; sāyanhasamaye mahābhikkhusaṅghe cetiyaṃ vandamāne cetiyaṃ vandanatthāya na nikkhami. Kasmā? Khīṇāsavānañhi tīsu ratanesu mahantaṃ gāravaṃ hoti. Tasmā bhikkhusaṅghe vanditvā paṭikkante manussānaṃ sāyamāsabhuttavelāya sāmaṇerampi ajānāpetvā ‘cetiyaṃ vandissāmī’ti ekakova nikkhami. Sāmaṇero ‘kiṃ nu kho thero avelāya ekakova gacchati, jānissāmī’ti upajjhāyassa padānupadikova nikkhami. Thero anāvajjanena tassa āgamanaṃ ajānanto dakkhiṇadvārena mahācetiyaṅgaṇaṃ āruḷho. Sāmaṇeropi anupadaṃyeva āruḷho.
махаат̇зро махаажзд̇ияам̣ уллогзд̇ваа б̣уд̣̇д̇хаарамман̣ам̣ бийд̇им̣ г̇ахзд̇ваа саб̣б̣ам̣ жзд̇асо саманнаахарид̇ваа хадтабахадто махаажзд̇ияам̣ ванд̣̇ад̇и. сааман̣зро т̇зрасса ванд̣̇анаагаарам̣ д̣̇исваа ‘убаж̇жхааяо мз ад̇ивияа басаннажид̇д̇о ванд̣̇ад̇и; гим̣ ну ко бубпаани лабхид̇ваа бууж̇ам̣ гарзяяаа’д̇и жинд̇зси. т̇зрз ванд̣̇ид̇ваа удтааяа сираси ан̃ж̇алим̣ табзд̇ваа махаажзд̇ияам̣ уллогзд̇ваа тид̇з сааман̣зро уггаасид̇ваа ад̇д̇ано ааг̇ад̇абхаавам̣ ж̇аанаабзси. т̇зро баривад̇д̇зд̇ваа ологзнд̇о ‘‘гад̣̇аа ааг̇ад̇осий’’д̇и бужчи. ‘‘д̇умхаагам̣ жзд̇ияам̣ ванд̣̇анагаалз, бханд̇з; ад̇ивияа басаннаа жзд̇ияам̣ ванд̣̇ид̇т̇а; гинну ко бубпаани лабхид̇ваа бууж̇зяяаат̇аа’’д̇и? ‘‘аама, сааман̣зра, имасмим̣ жзд̇ияз вияа ан̃н̃ад̇ра зд̇д̇агам̣ д̇хаад̇унид̇хаанам̣ наама над̇т̇и. зваруубам̣ асад̣̇исам̣ махаат̇уубам̣ бубпаани лабхид̇ваа го на бууж̇зяяаа’’д̇и? ‘‘д̇зна хи, бханд̇з, ад̇хиваасзт̇а, аахариссаамий’’д̇и д̇аавад̣̇зва жхаанам̣ самаабаж̇ж̇ид̇ваа ид̣̇д̇хияаа химаванд̇ам̣ г̇анд̇ваа ван̣н̣аг̇анд̇хасамбаннаани бубпаани г̇ахзд̇ваа бариссааванам̣ буурзд̇ваа махаат̇зрз д̣̇агкин̣амукад̇о бажчимамукз асамбад̇д̇зязва ааг̇анд̇ваа бубпабариссааванам̣ хад̇т̇з табзд̇ваа ‘‘бууж̇зт̇а бханд̇з’’д̇и ааха. т̇зро ‘‘ад̇иманд̣̇аани но, сааман̣зра, бубпааний’’д̇и ааха. ‘‘г̇ажчат̇а, бханд̇з, бхаг̇авад̇о г̇ун̣з ааваж̇ж̇зд̇ваа бууж̇зт̇аа’’д̇и.
Mahāthero mahācetiyaṃ ulloketvā buddhārammaṇaṃ pītiṃ gahetvā sabbaṃ cetaso samannāharitvā haṭṭhapahaṭṭho mahācetiyaṃ vandati. Sāmaṇero therassa vandanākāraṃ disvā ‘upajjhāyo me ativiya pasannacitto vandati; kiṃ nu kho pupphāni labhitvā pūjaṃ kareyyā’ti cintesi. There vanditvā uṭṭhāya sirasi añjaliṃ ṭhapetvā mahācetiyaṃ ulloketvā ṭhite sāmaṇero ukkāsitvā attano āgatabhāvaṃ jānāpesi. Thero parivattetvā olokento ‘‘kadā āgatosī’’ti pucchi. ‘‘Tumhākaṃ cetiyaṃ vandanakāle, bhante; ativiya pasannā cetiyaṃ vandittha; kinnu kho pupphāni labhitvā pūjeyyāthā’’ti? ‘‘Āma, sāmaṇera, imasmiṃ cetiye viya aññatra ettakaṃ dhātunidhānaṃ nāma natthi. Evarūpaṃ asadisaṃ mahāthūpaṃ pupphāni labhitvā ko na pūjeyyā’’ti? ‘‘Tena hi, bhante, adhivāsetha, āharissāmī’’ti tāvadeva jhānaṃ samāpajjitvā iddhiyā himavantaṃ gantvā vaṇṇagandhasampannāni pupphāni gahetvā parissāvanaṃ pūretvā mahāthere dakkhiṇamukhato pacchimamukhe asampatteyeva āgantvā pupphaparissāvanaṃ hatthe ṭhapetvā ‘‘pūjetha bhante’’ti āha. Thero ‘‘atimandāni no, sāmaṇera, pupphānī’’ti āha. ‘‘Gacchatha, bhante, bhagavato guṇe āvajjetvā pūjethā’’ti.
т̇зро бажчимамуканиссид̇зна собаанзна ааруяха гужчивзд̣̇игаабхуумияам̣ бубпабууж̇ам̣ гаад̇ум̣ аарад̣̇д̇хо. взд̣̇игаабхууми барибун̣н̣аа; бубпаани бад̇ид̇ваа д̣̇уд̇ияабхуумияам̣ ж̇ан̣н̣уббамаан̣зна од̇хинаа буураяим̣су. д̇ад̇о од̇арид̇ваа баад̣̇абидтигабанд̇им̣ бууж̇зси; сааби барибуури; барибун̣н̣абхаавам̣ н̃ад̇ваа хздтимад̇алз вигиранд̇о аг̇амааси; саб̣б̣ам̣ жзд̇ияан̇г̇ан̣ам̣ барибуури; д̇асмим̣ барибун̣н̣з ‘‘сааман̣зра, бубпаани на кийяанд̇ий’’д̇и ааха. ‘‘бариссааванам̣, бханд̇з, ад̇хомукам̣ гарот̇аа’’д̇и. ад̇хомукам̣ гад̇ваа жаалзси. д̇ад̣̇аа бубпаани кийн̣аани. т̇зро бариссааванам̣ сааман̣зрасса д̣̇ад̇ваа сад̣̇д̇хим̣ хад̇т̇ибаагаарзна жзд̇ияам̣ д̇игкад̇д̇ум̣ бад̣̇агкин̣ам̣ гад̇ваа жад̇уусу таанзсу ванд̣̇ид̇ваа баривзн̣ам̣ г̇ажчанд̇о жинд̇зси – ‘яаава махид̣̇д̇хиго вад̇ааяам̣ сааман̣зро; сагкиссад̇и ну ко имам̣ ид̣̇д̇хаанубхаавам̣ рагкид̇унд̇и? д̇ад̇о ‘на сагкиссад̇ий’д̇и д̣̇исваа сааман̣зрам̣ ааха – ‘‘сааман̣зра, д̇вам̣ ид̣̇аани махид̣̇д̇хиго; зваруубам̣ бана ид̣̇д̇хим̣ наасзд̇ваа бажчимагаалз гаан̣абзсагаарияаа хад̇т̇зна мад̣̇д̣̇ид̇ам̣ган̃ж̇ияам̣ бивиссасий’’д̇и. д̣̇ахарагабхаавасса наамзса д̣̇осо яам̣ со убаж̇жхааяасса гат̇ааяа сам̣взж̇зд̇ваа ‘гаммадтаанам̣ мз, бханд̇з, аажигкат̇аа’д̇и на яаажи; ‘амхаагам̣ убаж̇жхааяо гим̣ вад̣̇ад̇ий’д̇и д̇ам̣ бана асун̣анд̇о вияа аг̇амааси.
Thero pacchimamukhanissitena sopānena āruyha kucchivedikābhūmiyaṃ pupphapūjaṃ kātuṃ āraddho. Vedikābhūmi paripuṇṇā; pupphāni patitvā dutiyabhūmiyaṃ jaṇṇuppamāṇena odhinā pūrayiṃsu. Tato otaritvā pādapiṭṭhikapantiṃ pūjesi; sāpi paripūri; paripuṇṇabhāvaṃ ñatvā heṭṭhimatale vikiranto agamāsi; sabbaṃ cetiyaṅgaṇaṃ paripūri; tasmiṃ paripuṇṇe ‘‘sāmaṇera, pupphāni na khīyantī’’ti āha. ‘‘Parissāvanaṃ, bhante, adhomukhaṃ karothā’’ti. Adhomukhaṃ katvā cālesi. Tadā pupphāni khīṇāni. Thero parissāvanaṃ sāmaṇerassa datvā saddhiṃ hatthipākārena cetiyaṃ tikkhattuṃ padakkhiṇaṃ katvā catūsu ṭhānesu vanditvā pariveṇaṃ gacchanto cintesi – ‘yāva mahiddhiko vatāyaṃ sāmaṇero; sakkhissati nu kho imaṃ iddhānubhāvaṃ rakkhitunti? Tato ‘na sakkhissatī’ti disvā sāmaṇeraṃ āha – ‘‘sāmaṇera, tvaṃ idāni mahiddhiko; evarūpaṃ pana iddhiṃ nāsetvā pacchimakāle kāṇapesakāriyā hatthena madditaṃkañjiyaṃ pivissasī’’ti. Daharakabhāvassa nāmesa doso yaṃ so upajjhāyassa kathāya saṃvejetvā ‘kammaṭṭhānaṃ me, bhante, ācikkhathā’ti na yāci; ‘amhākaṃ upajjhāyo kiṃ vadatī’ti taṃ pana asuṇanto viya agamāsi.
т̇зро махаажзд̇ияан̃жа махааб̣од̇хин̃жа ванд̣̇ид̇ваа сааман̣зрам̣ бад̇д̇ажийварам̣ г̇аахаабзд̇ваа анубуб̣б̣зна гудзл̣ид̇иссамахаавихаарам̣ аг̇амааси. сааман̣зро убаж̇жхааяасса бад̣̇аанубад̣̇иго худ̇ваа бхигкаажаарам̣ на г̇ажчад̇и. ‘‘гад̇арам̣ г̇аамам̣ бависат̇а, бханд̇з’’д̇и бужчид̇ваа бана ‘ид̣̇аани мз убаж̇жхааяо г̇аамад̣̇ваарам̣ самбад̇д̇о бхависсад̇ий’д̇и н̃ад̇ваа ад̇д̇ано жа убаж̇жхааяасса жа бад̇д̇ажийварам̣ г̇ахзд̇ваа аагаасзнааг̇анд̇ваа т̇зрасса бад̇д̇ажийварам̣ д̣̇ад̇ваа бин̣д̣ааяа бависад̇и. т̇зро саб̣б̣агаалам̣ овад̣̇ад̇и – ‘‘сааман̣зра, маа звамагааси; бут̇уж̇ж̇анид̣̇д̇хи наама жалаа аниб̣ад̣̇д̇хаа; асаббааяам̣ руубаад̣̇иаарамман̣ам̣ лабхид̇ваа аббамад̇д̇агзнзва бхиж̇ж̇ад̇и; санд̇ааяа самаабад̇д̇ияаа барихийнаа б̣рахмажарияаваасз сант̇амбхид̇ум̣ на саггонд̇ий’’д̇и. сааман̣зро ‘гим̣ гат̇зд̇и маяхам̣ убаж̇жхааяо’д̇и сод̇ум̣ на ижчад̇и, д̇ат̇зва гарод̇и. т̇зро анубуб̣б̣зна жзд̇ияаванд̣̇анам̣ гаронд̇о гаммубзнд̣̇авихаарам̣ наама г̇ад̇о. д̇ад̇т̇а васанд̇зби т̇зрз сааман̣зро д̇ат̇зва гарод̇и.
Thero mahācetiyañca mahābodhiñca vanditvā sāmaṇeraṃ pattacīvaraṃ gāhāpetvā anupubbena kuṭeḷitissamahāvihāraṃ agamāsi. Sāmaṇero upajjhāyassa padānupadiko hutvā bhikkhācāraṃ na gacchati. ‘‘Kataraṃ gāmaṃ pavisatha, bhante’’ti pucchitvā pana ‘idāni me upajjhāyo gāmadvāraṃ sampatto bhavissatī’ti ñatvā attano ca upajjhāyassa ca pattacīvaraṃ gahetvā ākāsenāgantvā therassa pattacīvaraṃ datvā piṇḍāya pavisati. Thero sabbakālaṃ ovadati – ‘‘sāmaṇera, mā evamakāsi; puthujjaniddhi nāma calā anibaddhā; asappāyaṃ rūpādiārammaṇaṃ labhitvā appamattakeneva bhijjati; santāya samāpattiyā parihīnā brahmacariyavāse santhambhituṃ na sakkontī’’ti. Sāmaṇero ‘kiṃ katheti mayhaṃ upajjhāyo’ti sotuṃ na icchati, tatheva karoti. Thero anupubbena cetiyavandanaṃ karonto kammupendavihāraṃ nāma gato. Tattha vasantepi there sāmaṇero tatheva karoti.
ат̇згад̣̇ивасам̣ згаа бзсагаарад̇хийд̇аа абхируубаа батамаваяз тид̇аа гаммубзнд̣̇аг̇аамад̇о нигкамид̇ваа бад̣̇умассарам̣ оруяха г̇ааяамаанаа бубпаани бхан̃ж̇ад̇и. д̇асмим̣ самаяз сааман̣зро бад̣̇умассарамад̇т̇агзна г̇ажчад̇и г̇ажчанд̇о бана, саггараласигааяа гаан̣амагкигаа вияа, д̇ассаа г̇ийд̇асад̣̇д̣̇з б̣аж̇жхи; д̇аавад̣̇зва ид̣̇д̇хи анд̇арахид̇аа, чиннабагко гааго вияа ахоси. санд̇асамаабад̇д̇иб̣алзна бана д̇ад̇т̇зва уд̣̇агабидтз абад̇ид̇ваа симб̣алид̇уулам̣ вияа бад̇амаанам̣ анубуб̣б̣зна бад̣̇умассарад̇ийрз адтааси. со взг̇зна г̇анд̇ваа убаж̇жхааяасса бад̇д̇ажийварам̣ д̣̇ад̇ваа нивад̇д̇и. махаат̇зро ‘баг̇звзд̇ам̣ маяаа д̣̇идтам̣, ниваарияамааноби на нивад̇д̇иссад̇ий’д̇и гин̃жи авад̇ваа бин̣д̣ааяа баависи.
Athekadivasaṃ ekā pesakāradhītā abhirūpā paṭhamavaye ṭhitā kammupendagāmato nikkhamitvā padumassaraṃ oruyha gāyamānā pupphāni bhañjati. Tasmiṃ samaye sāmaṇero padumassaramatthakena gacchati gacchanto pana, sakkaralasikāya kāṇamakkhikā viya, tassā gītasadde bajjhi; tāvadeva iddhi antarahitā, chinnapakkho kāko viya ahosi. Santasamāpattibalena pana tattheva udakapiṭṭhe apatitvā simbalitūlaṃ viya patamānaṃ anupubbena padumassaratīre aṭṭhāsi. So vegena gantvā upajjhāyassa pattacīvaraṃ datvā nivatti. Mahāthero ‘pagevetaṃ mayā diṭṭhaṃ, nivāriyamānopi na nivattissatī’ti kiñci avatvā piṇḍāya pāvisi.
сааман̣зро г̇анд̇ваа бад̣̇умассарад̇ийрз адтааси д̇ассаа бажжуд̇д̇аран̣ам̣ ааг̇амаяамаано. сааби сааман̣зрам̣ аагаасзна г̇ажчанд̇ан̃жа бунааг̇анд̇ваа тид̇ан̃жа д̣̇исваа ‘ад̣̇д̇хаа зса мам̣ ниссааяа угган̣тид̇о’д̇и н̃ад̇ваа ‘бадиггама сааман̣зраа’д̇и ааха. соби бадибаггами. ид̇араа бажжуд̇д̇арид̇ваа саадагам̣ ниваасзд̇ваа д̇ам̣ убасан̇гамид̇ваа ‘гим̣, бханд̇з’д̇и бужчи. со д̇амад̇т̇ам̣ аарожзси. саа б̣ахуухи гааран̣зхи гхарааваасз аад̣̇ийнавам̣ б̣рахмажарияаваасз аанисам̣сан̃жа д̣̇ассзд̇ваа овад̣̇амаанааби д̇асса угган̣там̣ винод̣̇зд̇ум̣ асаггонд̇ий ‘аяам̣ мама гааран̣аа зваруубааяа ид̣̇д̇хияаа барихийно; на д̣̇аани яуд̇д̇ам̣ барижжаж̇ид̇у’нд̇и. ‘ид̇хзва д̇идтаа’д̇и вад̇ваа гхарам̣ г̇анд̇ваа маад̇аабид̇уунам̣ д̇ам̣ бавад̇д̇им̣ аарожзси. д̇зби ааг̇анд̇ваа наанаббагаарам̣ овад̣̇амаанаа важанам̣ аг̇г̇ан̣ханд̇ам̣ аахам̣су – ‘‘д̇вам̣ амхз ужжаагулаад̇и маа саллагкзси. маяам̣ бзсагаараа. сагкиссаси бзсагаарагаммам̣ гаад̇у’’нд̇и? сааман̣зро ааха – ‘‘убаасага, г̇ихийбхууд̇о наама бзсагаарагаммам̣ ваа гарзяяа нал̣агаарагаммам̣ ваа, гим̣ иминаа, маа саадагамад̇д̇з лобхам̣ гарот̇аа’’д̇и . бзсагаараго уд̣̇арз б̣ад̣̇д̇хасаадагам̣ д̣̇ад̇ваа гхарам̣ нзд̇ваа д̇хийд̇арам̣ ад̣̇ааси.
Sāmaṇero gantvā padumassaratīre aṭṭhāsi tassā paccuttaraṇaṃ āgamayamāno. Sāpi sāmaṇeraṃ ākāsena gacchantañca punāgantvā ṭhitañca disvā ‘addhā esa maṃ nissāya ukkaṇṭhito’ti ñatvā ‘paṭikkama sāmaṇerā’ti āha. Sopi paṭipakkami. Itarā paccuttaritvā sāṭakaṃ nivāsetvā taṃ upasaṅkamitvā ‘kiṃ, bhante’ti pucchi. So tamatthaṃ ārocesi. Sā bahūhi kāraṇehi gharāvāse ādīnavaṃ brahmacariyavāse ānisaṃsañca dassetvā ovadamānāpi tassa ukkaṇṭhaṃ vinodetuṃ asakkontī ‘ayaṃ mama kāraṇā evarūpāya iddhiyā parihīno; na dāni yuttaṃ pariccajitu’nti. ‘Idheva tiṭṭhā’ti vatvā gharaṃ gantvā mātāpitūnaṃ taṃ pavattiṃ ārocesi. Tepi āgantvā nānappakāraṃ ovadamānā vacanaṃ aggaṇhantaṃ āhaṃsu – ‘‘tvaṃ amhe uccākulāti mā sallakkhesi. Mayaṃ pesakārā. Sakkhissasi pesakārakammaṃ kātu’’nti? Sāmaṇero āha – ‘‘upāsaka, gihībhūto nāma pesakārakammaṃ vā kareyya naḷakārakammaṃ vā, kiṃ iminā, mā sāṭakamatte lobhaṃ karothā’’ti . Pesakārako udare baddhasāṭakaṃ datvā gharaṃ netvā dhītaraṃ adāsi.
со бзсагаарагаммам̣ уг̇г̇ан̣хид̇ваа бзсагаарзхи сад̣̇д̇хим̣ саалааяа гаммам̣ гарод̇и. ан̃н̃зсам̣ ид̇т̇ияо баад̇ова бхад̇д̇ам̣ самбаад̣̇зд̇ваа аахарим̣су. д̇асса бхарияаа на д̇аава ааг̇ажчад̇и. со ид̇арзсу гаммам̣ виссаж̇ж̇зд̇ваа бхун̃ж̇амаанзсу д̇асарам̣ ваддзнд̇о нисийд̣̇и. саа бажчаа ааг̇амааси. ат̇а нам̣ со ‘ад̇ижирзна ааг̇ад̇аасий’д̇и д̇аж̇ж̇зси. маад̇уг̇аамо жа наама аби жаггавад̇д̇ирааж̇аанам̣ ад̇д̇ани бадиб̣ад̣̇д̇хажид̇д̇ам̣ н̃ад̇ваа д̣̇аасам̣ вияа саллагкзд̇и. д̇асмаа саа звамааха – ‘‘ан̃н̃зсам̣ гхарз д̣̇аарубан̣н̣алон̣аад̣̇ийни саннихид̇аани; б̣аахирад̇о аахарид̇ваа д̣̇ааяагаа бзсагаарагааби ад̇т̇и. ахам̣ бана згигаа; д̇вамби ‘маяхам̣ гхарз ид̣̇ам̣ ад̇т̇и, ид̣̇ам̣ над̇т̇ий’д̇и на ж̇аанааси. сажз ижчаси бхун̃ж̇а, но жз ижчаси маа бхун̃ж̇аа’’д̇и. со ‘на гзвалам̣ уссуурз бхад̇д̇ам̣ аахараси, ваажааяаби мам̣ гхаддзсий’д̇и гуж̇жхид̇ваа ан̃н̃ам̣ бахаран̣ам̣ абассанд̇о д̇амзва д̇асарад̣̇ан̣д̣агам̣ д̇асарад̇о лун̃жид̇ваа киби. саа д̇ам̣ ааг̇ажчанд̇ам̣ д̣̇исваа ийсагам̣ баривад̇д̇и. д̇асарад̣̇ан̣д̣агасса жа годи наама д̇икин̣аа ход̇и. саа д̇ассаа баривад̇д̇амаанааяа агкигодияам̣ бависид̇ваа адтааси. саа убхохи хад̇т̇зхи взг̇зна агким̣ аг̇г̇ахзси. бхиннадтаанад̇о лохид̇ам̣ баг̇гхарад̇и.
So pesakārakammaṃ uggaṇhitvā pesakārehi saddhiṃ sālāya kammaṃ karoti. Aññesaṃ itthiyo pātova bhattaṃ sampādetvā āhariṃsu. Tassa bhariyā na tāva āgacchati. So itaresu kammaṃ vissajjetvā bhuñjamānesu tasaraṃ vaṭṭento nisīdi. Sā pacchā āgamāsi. Atha naṃ so ‘aticirena āgatāsī’ti tajjesi. Mātugāmo ca nāma api cakkavattirājānaṃ attani paṭibaddhacittaṃ ñatvā dāsaṃ viya sallakkheti. Tasmā sā evamāha – ‘‘aññesaṃ ghare dārupaṇṇaloṇādīni sannihitāni; bāhirato āharitvā dāyakā pesakārakāpi atthi. Ahaṃ pana ekikā; tvampi ‘mayhaṃ ghare idaṃ atthi, idaṃ natthī’ti na jānāsi. Sace icchasi bhuñja, no ce icchasi mā bhuñjā’’ti. So ‘na kevalaṃ ussūre bhattaṃ āharasi, vācāyapi maṃ ghaṭṭesī’ti kujjhitvā aññaṃ paharaṇaṃ apassanto tameva tasaradaṇḍakaṃ tasarato luñcitvā khipi. Sā taṃ āgacchantaṃ disvā īsakaṃ parivatti. Tasaradaṇḍakassa ca koṭi nāma tikhiṇā hoti. Sā tassā parivattamānāya akkhikoṭiyaṃ pavisitvā aṭṭhāsi. Sā ubhohi hatthehi vegena akkhiṃ aggahesi. Bhinnaṭṭhānato lohitaṃ paggharati.
со д̇асмим̣ гаалз убаж̇жхааяасса важанам̣ ануссари ‘ид̣̇ам̣ санд̇хааяа мам̣ убаж̇жхааяо ‘‘анааг̇ад̇з гаалз гаан̣абзсагаарияаа хад̇т̇зна мад̣̇д̣̇ид̇ам̣ ган̃ж̇ияам̣ бивиссасий’’д̇и ааха. ид̣̇ам̣ т̇зрзна д̣̇идтам̣ бхависсад̇и. ахо д̣̇ийгхад̣̇ассий аяяо’д̇и махаасад̣̇д̣̇зна род̣̇ид̇ум̣ аарабхи. д̇амзнам̣ ан̃н̃з ‘‘алам̣, аавусо, маа род̣̇и; агки наама бхиннам̣ на саггаа род̣̇анзна бадибаагад̇игам̣ гаад̇у’’нд̇и аахам̣су. со ‘‘наахам̣ зд̇амад̇т̇ам̣ род̣̇аами; абижа ко ид̣̇ам̣ санд̇хааяа род̣̇аамий’’д̇и саб̣б̣ам̣ бавад̇д̇им̣ бадибаадияаа гат̇зси. звам̣ уббаннаа самат̇авибассанаа нируж̇жхамаанаа анад̇т̇ааяа сам̣вад̇д̇анд̇и.
So tasmiṃ kāle upajjhāyassa vacanaṃ anussari ‘idaṃ sandhāya maṃ upajjhāyo ‘‘anāgate kāle kāṇapesakāriyā hatthena madditaṃ kañjiyaṃ pivissasī’’ti āha. Idaṃ therena diṭṭhaṃ bhavissati. Aho dīghadassī ayyo’ti mahāsaddena rodituṃ ārabhi. Tamenaṃ aññe ‘‘alaṃ, āvuso, mā rodi; akkhi nāma bhinnaṃ na sakkā rodanena paṭipākatikaṃ kātu’’nti āhaṃsu. So ‘‘nāhaṃ etamatthaṃ rodāmi; apica kho idaṃ sandhāya rodāmī’’ti sabbaṃ pavattiṃ paṭipāṭiyā kathesi. Evaṃ uppannā samathavipassanā nirujjhamānā anatthāya saṃvattanti.
абарамби вад̇т̇у – д̇им̣самад̇д̇аа бхигкуу галяаан̣ияам̣ махаажзд̇ияам̣ ванд̣̇ид̇ваа адавимаг̇г̇зна махаамаг̇г̇ам̣ од̇арамаанаа анд̇араамаг̇г̇з жхаамагкзд̇д̇з гаммам̣ гад̇ваа ааг̇ажчанд̇ам̣ згам̣ мануссам̣ ад̣̇д̣̇асам̣су. д̇асса сарийрам̣ масимагкид̇ам̣ ход̇и, масимагкид̇амзва жа згам̣ гаасаавам̣ гажчам̣ бийл̣зд̇ваа нивад̇т̇ам̣. ологияамаано жхаамакаан̣уго вияа кааяад̇и. со д̣̇ивасабхааг̇з гаммам̣ гад̇ваа убад̣дхажхааяамаанаанам̣ д̣̇ааруунам̣ галаабам̣ угкибид̇ваа бидтияам̣ виббагин̣н̣зхи гзсзхи гуммаг̇г̇зна ааг̇анд̇ваа бхигкуунам̣ саммукз адтааси. сааман̣зраа д̣̇исваа ан̃н̃аман̃н̃ам̣ ологаяамаанаа ‘‘аавусо, д̇уяхам̣ бид̇аа, д̇уяхам̣ махаабид̇аа, д̇уяхам̣ маад̇уло’’д̇и хасамаанаа г̇анд̇ваа ‘‘го наамоси д̇вам̣, убаасагаа’’д̇и наамам̣ бужчим̣су. со наамам̣ бужчид̇о виббадисаарий худ̇ваа д̣̇ааругалаабам̣ чад̣д̣зд̇ваа вад̇т̇ам̣ сам̣вид̇хааяа ниваасзд̇ваа махаат̇зрз ванд̣̇ид̇ваа ‘‘д̇идтат̇а д̇аава, бханд̇з’’д̇и ааха. махаат̇зраа адтам̣су.
Aparampi vatthu – tiṃsamattā bhikkhū kalyāṇiyaṃ mahācetiyaṃ vanditvā aṭavimaggena mahāmaggaṃ otaramānā antarāmagge jhāmakkhette kammaṃ katvā āgacchantaṃ ekaṃ manussaṃ addasaṃsu. Tassa sarīraṃ masimakkhitaṃ hoti, masimakkhitameva ca ekaṃ kāsāvaṃ kacchaṃ pīḷetvā nivatthaṃ. Olokiyamāno jhāmakhāṇuko viya khāyati. So divasabhāge kammaṃ katvā upaḍḍhajhāyamānānaṃ dārūnaṃ kalāpaṃ ukkhipitvā piṭṭhiyaṃ vippakiṇṇehi kesehi kummaggena āgantvā bhikkhūnaṃ sammukhe aṭṭhāsi. Sāmaṇerā disvā aññamaññaṃ olokayamānā ‘‘āvuso, tuyhaṃ pitā, tuyhaṃ mahāpitā, tuyhaṃ mātulo’’ti hasamānā gantvā ‘‘ko nāmosi tvaṃ, upāsakā’’ti nāmaṃ pucchiṃsu. So nāmaṃ pucchito vippaṭisārī hutvā dārukalāpaṃ chaḍḍetvā vatthaṃ saṃvidhāya nivāsetvā mahāthere vanditvā ‘‘tiṭṭhatha tāva, bhante’’ti āha. Mahātherā aṭṭhaṃsu.
д̣̇ахарасааман̣зраа ааг̇анд̇ваа махаат̇зраанам̣ саммукааби барихаасам̣ гаронд̇и. убаасаго ааха – ‘‘бханд̇з, д̇умхз мам̣ бассид̇ваа барихасат̇а; зд̇д̇агзнзва мад̇т̇агам̣ бад̇д̇амхаад̇и саллагкзт̇а. ахамби буб̣б̣з д̇умхаад̣̇исова саман̣о ахосим̣. д̇умхаагам̣ бана жид̇д̇згаг̇г̇ад̇аамад̇д̇амби над̇т̇и. ахам̣ имасмим̣ саасанз махид̣̇д̇хиго махаанубхааво ахосим̣; аагаасам̣ г̇ахзд̇ваа бат̇авим̣ гароми, бат̇авим̣ аагаасам̣; д̣̇уурам̣ г̇ан̣хид̇ваа санд̇игам̣ гароми, санд̇игам̣ д̣̇уурам̣; жаггаваал̣асахассам̣ кан̣зна винивиж̇жхаами. хад̇т̇з мз бассат̇а; ид̣̇аани бана маггадахад̇т̇асад̣̇исаа. ахам̣ имзхзва хад̇т̇зхи ид̇ха нисиннова жанд̣̇имасуурияз бараамасим̣. имзсам̣язва баад̣̇аанам̣ жанд̣̇имасуурияз баад̣̇агат̇алигам̣ гад̇ваа нисийд̣̇им̣. зваруубаа мз ид̣̇д̇хи бамаад̣̇зна анд̇арахид̇аа. д̇умхз маа бамаж̇ж̇ид̇т̇а. бамаад̣̇зна хи зваруубам̣ б̣яасанам̣ баабун̣анд̇и. аббамад̇д̇аа вихаранд̇аа ж̇аад̇иж̇араамаран̣асса анд̇ам̣ гаронд̇и. д̇асмаа д̇умхз ман̃н̃зва аарамман̣ам̣ гарид̇ваа аббамад̇д̇аа хот̇а, бханд̇з’’д̇и д̇аж̇ж̇зд̇ваа оваад̣̇амад̣̇ааси. д̇з д̇асса гат̇знд̇ассзва сам̣взг̇ам̣ аабаж̇ж̇ид̇ваа вибассамаанаа д̇им̣са ж̇анаа д̇ад̇т̇зва арахад̇д̇ам̣ баабун̣им̣сууд̇и. звамби уббаннаа самат̇авибассанаа нируж̇жхамаанаа анад̇т̇ааяа сам̣вад̇д̇анд̇ийд̇и взд̣̇ид̇аб̣б̣аа. аяам̣ д̇аава логияасаммаббад̇хаанагат̇ааяа винижчаяо.
Daharasāmaṇerā āgantvā mahātherānaṃ sammukhāpi parihāsaṃ karonti. Upāsako āha – ‘‘bhante, tumhe maṃ passitvā parihasatha; ettakeneva matthakaṃ pattamhāti sallakkhetha. Ahampi pubbe tumhādisova samaṇo ahosiṃ. Tumhākaṃ pana cittekaggatāmattampi natthi. Ahaṃ imasmiṃ sāsane mahiddhiko mahānubhāvo ahosiṃ; ākāsaṃ gahetvā pathaviṃ karomi, pathaviṃ ākāsaṃ; dūraṃ gaṇhitvā santikaṃ karomi, santikaṃ dūraṃ; cakkavāḷasahassaṃ khaṇena vinivijjhāmi. Hatthe me passatha; idāni pana makkaṭahatthasadisā. Ahaṃ imeheva hatthehi idha nisinnova candimasūriye parāmasiṃ. Imesaṃyeva pādānaṃ candimasūriye pādakathalikaṃ katvā nisīdiṃ. Evarūpā me iddhi pamādena antarahitā. Tumhe mā pamajjittha. Pamādena hi evarūpaṃ byasanaṃ pāpuṇanti. Appamattā viharantā jātijarāmaraṇassa antaṃ karonti. Tasmā tumhe maññeva ārammaṇaṃ karitvā appamattā hotha, bhante’’ti tajjetvā ovādamadāsi. Te tassa kathentasseva saṃvegaṃ āpajjitvā vipassamānā tiṃsa janā tattheva arahattaṃ pāpuṇiṃsūti. Evampi uppannā samathavipassanā nirujjhamānā anatthāya saṃvattantīti veditabbā. Ayaṃ tāva lokiyasammappadhānakathāya vinicchayo.
логуд̇д̇арамаг̇г̇агкан̣з банзд̇ам̣ згамзва вийрияам̣ жад̇угижжасаад̇ханавасзна жад̇д̇аари наамаани лабхад̇и. д̇ад̇т̇а ануббаннаананд̇и асамуд̣̇аажааравасзна ваа ананубхууд̇аарамман̣авасзна ваа ануббаннаанам̣; ан̃н̃ат̇аа хи анамад̇аг̇г̇з сам̣саарз ануббаннаа баабагаа агусалаа д̇хаммаа наама над̇т̇и. ануббаннаа бана уббаж̇ж̇амаанааби зд̇зязва уббаж̇ж̇анд̇и , бахийяамаанааби зд̇зязва бахийяанд̇и.
Lokuttaramaggakkhaṇe panetaṃ ekameva vīriyaṃ catukiccasādhanavasena cattāri nāmāni labhati. Tattha anuppannānanti asamudācāravasena vā ananubhūtārammaṇavasena vā anuppannānaṃ; aññathā hi anamatagge saṃsāre anuppannā pāpakā akusalā dhammā nāma natthi. Anuppannā pana uppajjamānāpi eteyeva uppajjanti , pahīyamānāpi eteyeva pahīyanti.
д̇ад̇т̇а згажжасса вад̇д̇авасзна гилзсаа на самуд̣̇аажаранд̇и. згажжасса г̇ант̇ад̇худ̇ан̇г̇асамаад̇хивибассанаа навагаммигаанам̣ ан̃н̃ад̇аравасзна. гат̇ам̣? згажжо хи вад̇д̇асамбанно ход̇и. д̇асса д̣̇ваасийд̇икуд̣̇д̣̇агавад̇д̇аани (жуул̣ава. 243 аад̣̇аяо), жуд̣̇д̣̇аса махаавад̇д̇аани (жуул̣ава. 356 аад̣̇аяо), жзд̇ияан̇г̇ан̣аб̣од̇хияан̇г̇ан̣абаанийяамаал̣аубосат̇ааг̇аараааг̇анд̇угаг̇амигавад̇д̇аани жа гаронд̇ассзва гилзсаа огаасам̣ на лабханд̇и; абарабхааг̇з банасса вад̇д̇ам̣ виссаж̇ж̇зд̇ваа бхиннавад̇д̇асса вижарад̇о аяонисоманасигааран̃жзва сад̇ивоссаг̇г̇ан̃жа ааг̇амма уббаж̇ж̇анд̇и. звам̣ асамуд̣̇аажааравасзна ануббаннаа уббаж̇ж̇анд̇и наама.
Tattha ekaccassa vattavasena kilesā na samudācaranti. Ekaccassa ganthadhutaṅgasamādhivipassanā navakammikānaṃ aññataravasena. Kathaṃ? Ekacco hi vattasampanno hoti. Tassa dvāsītikhuddakavattāni (cūḷava. 243 ādayo), cuddasa mahāvattāni (cūḷava. 356 ādayo), cetiyaṅgaṇabodhiyaṅgaṇapānīyamāḷauposathāgāraāgantukagamikavattāni ca karontasseva kilesā okāsaṃ na labhanti; aparabhāge panassa vattaṃ vissajjetvā bhinnavattassa vicarato ayonisomanasikārañceva sativossaggañca āgamma uppajjanti. Evaṃ asamudācāravasena anuppannā uppajjanti nāma.
згажжо г̇ант̇аяуд̇д̇о ход̇и; згамби нигааяам̣ г̇ан̣хаад̇и, д̣̇взби, д̇аяоби, жад̇д̇аароби, бан̃жаби. д̇ассзва д̇збидагам̣ б̣уд̣̇д̇хаважанам̣ ад̇т̇авасзна баал̣ивасзна анусанд̇хивасзна буб̣б̣аабаравасзна г̇ан̣ханд̇асса саж̇жхааяанд̇асса жинд̇знд̇асса ваажзнд̇асса д̣̇зсзнд̇асса багаасзнд̇асса гилзсаа огаасам̣ на лабханд̇и; абарабхааг̇з банасса г̇ант̇агаммам̣ бахааяа гусийд̇асса вижарад̇о аяонисоманасигаарасад̇ивоссаг̇г̇з ааг̇амма уббаж̇ж̇анд̇и. звамби асамуд̣̇аажааравасзна ануббаннаа уббаж̇ж̇анд̇и наама.
Ekacco ganthayutto hoti; ekampi nikāyaṃ gaṇhāti, dvepi, tayopi, cattāropi, pañcapi. Tasseva tepiṭakaṃ buddhavacanaṃ atthavasena pāḷivasena anusandhivasena pubbāparavasena gaṇhantassa sajjhāyantassa cintentassa vācentassa desentassa pakāsentassa kilesā okāsaṃ na labhanti; aparabhāge panassa ganthakammaṃ pahāya kusītassa vicarato ayonisomanasikārasativossagge āgamma uppajjanti. Evampi asamudācāravasena anuppannā uppajjanti nāma.
згажжо бана д̇худ̇ан̇г̇ад̇харо ход̇и, д̇зраса д̇худ̇ан̇г̇аг̇ун̣з самаад̣̇ааяа вад̇д̇ад̇и. д̇асса д̇худ̇ан̇г̇аг̇ун̣з барихаранд̇асса гилзсаа огаасам̣ на лабханд̇и; абарабхааг̇з банасса д̇худ̇ан̇г̇аани виссаж̇ж̇зд̇ваа б̣аахуллааяа ааваддасса вижарад̇о аяонисоманасигаарасад̇ивоссаг̇г̇з ааг̇амма уббаж̇ж̇анд̇и. звамби асамуд̣̇аажааравасзна ануббаннаа уббаж̇ж̇анд̇и наама.
Ekacco pana dhutaṅgadharo hoti, terasa dhutaṅgaguṇe samādāya vattati. Tassa dhutaṅgaguṇe pariharantassa kilesā okāsaṃ na labhanti; aparabhāge panassa dhutaṅgāni vissajjetvā bāhullāya āvaṭṭassa vicarato ayonisomanasikārasativossagge āgamma uppajjanti. Evampi asamudācāravasena anuppannā uppajjanti nāma.
згажжо бана адтасу самаабад̇д̇ийсу жин̣н̣авасий ход̇и. д̇асса батамаж̇жхаанаад̣̇ийсу ааваж̇ж̇анавасийаад̣̇ийнам̣ васзна вихаранд̇асса гилзсаа огаасам̣ на лабханд̇и; абарабхааг̇з банасса барихийнаж̇жхаанасса ваа виссадтаж̇жхаанасса ваа бхассаад̣̇ийсу ануяуд̇д̇асса вихарад̇о аяонисоманасигаарасад̇ивоссаг̇г̇з ааг̇амма уббаж̇ж̇анд̇и. звамби асамуд̣̇аажааравасзна ануббаннаа гилзсаа уббаж̇ж̇анд̇и наама.
Ekacco pana aṭṭhasu samāpattīsu ciṇṇavasī hoti. Tassa paṭhamajjhānādīsu āvajjanavasīādīnaṃ vasena viharantassa kilesā okāsaṃ na labhanti; aparabhāge panassa parihīnajjhānassa vā vissaṭṭhajjhānassa vā bhassādīsu anuyuttassa viharato ayonisomanasikārasativossagge āgamma uppajjanti. Evampi asamudācāravasena anuppannā kilesā uppajjanti nāma.
згажжо бана вибассаго ход̇и; сад̇д̇асу ваа вибассанаасу адтаарасасу ваа махаавибассанаасу гаммам̣ гаронд̇о вихарад̇и. д̇ассзвам̣ вихарад̇о гилзсаа огаасам̣ на лабханд̇и; абарабхааг̇з банасса вибассанаагаммам̣ бахааяа гааяад̣̇ал̣хийб̣ахуласса вихарад̇о аяонисоманасигаарасад̇ивоссаг̇г̇з ааг̇амма уббаж̇ж̇анд̇и. звамби асамуд̣̇аажааравасзна ануббаннаа гилзсаа уббаж̇ж̇анд̇и наама.
Ekacco pana vipassako hoti; sattasu vā vipassanāsu aṭṭhārasasu vā mahāvipassanāsu kammaṃ karonto viharati. Tassevaṃ viharato kilesā okāsaṃ na labhanti; aparabhāge panassa vipassanākammaṃ pahāya kāyadaḷhībahulassa viharato ayonisomanasikārasativossagge āgamma uppajjanti. Evampi asamudācāravasena anuppannā kilesā uppajjanti nāma.
згажжо бана навагаммиго ход̇и, убосат̇ааг̇аарабхож̇анасаалаад̣̇ийни гарод̇и. д̇асса д̇зсам̣ убагаран̣аани жинд̇знд̇асса гилзсаа огаасам̣ на лабханд̇и; абарабхааг̇з банасса навагаммз нидтид̇з ваа виссадтз ваа аяонисоманасигаарасад̇ивоссаг̇г̇з ааг̇амма уббаж̇ж̇анд̇и. звамби асамуд̣̇аажааравасзна ануббаннаа гилзсаа уббаж̇ж̇анд̇и наама.
Ekacco pana navakammiko hoti, uposathāgārabhojanasālādīni karoti. Tassa tesaṃ upakaraṇāni cintentassa kilesā okāsaṃ na labhanti; aparabhāge panassa navakamme niṭṭhite vā vissaṭṭhe vā ayonisomanasikārasativossagge āgamma uppajjanti. Evampi asamudācāravasena anuppannā kilesā uppajjanti nāma.
згажжо бана б̣рахмалогаа ааг̇ад̇о суд̣̇д̇хасад̇д̇о ход̇и. д̇асса анаасзванааяа гилзсаа огаасам̣ на лабханд̇и; абарабхааг̇з банасса лад̣̇д̇хаасзванасса аяонисоманасигаарасад̇ивоссаг̇г̇з ааг̇амма уббаж̇ж̇анд̇и. звамби асамуд̣̇аажааравасзна ануббаннаа гилзсаа уббаж̇ж̇анд̇и наама. звам̣ д̇аава асамужааравасзна ануббаннад̇аа взд̣̇ид̇аб̣б̣аа.
Ekacco pana brahmalokā āgato suddhasatto hoti. Tassa anāsevanāya kilesā okāsaṃ na labhanti; aparabhāge panassa laddhāsevanassa ayonisomanasikārasativossagge āgamma uppajjanti. Evampi asamudācāravasena anuppannā kilesā uppajjanti nāma. Evaṃ tāva asamucāravasena anuppannatā veditabbā.
гат̇ам̣ ананубхууд̇аарамман̣авасзна? ид̇хзгажжо ананубхууд̇абуб̣б̣ам̣ манаабияаад̣̇ибхзд̣̇ам̣ аарамман̣ам̣ лабхад̇и. д̇асса д̇ад̇т̇а аяонисоманасигаарасад̇ивоссаг̇г̇з ааг̇амма рааг̇аад̣̇аяо гилзсаа уббаж̇ж̇анд̇и. звам̣ ананубхууд̇аарамман̣авасзна ануббаннаа уббаж̇ж̇анд̇и наама. логуд̇д̇арамаг̇г̇агкан̣з бана згамзва вийрияам̣.
Kathaṃ ananubhūtārammaṇavasena? Idhekacco ananubhūtapubbaṃ manāpiyādibhedaṃ ārammaṇaṃ labhati. Tassa tattha ayonisomanasikārasativossagge āgamma rāgādayo kilesā uppajjanti. Evaṃ ananubhūtārammaṇavasena anuppannā uppajjanti nāma. Lokuttaramaggakkhaṇe pana ekameva vīriyaṃ.
яз жа звам̣ ануббаннаа уббаж̇ж̇зяяум̣, д̇з яат̇аа нзва уббаж̇ж̇анд̇и, звам̣ нзсам̣ ануббаад̣̇агижжам̣ уббаннаанан̃жа бахаанагижжам̣ саад̇хзд̇и. д̇асмаа уббаннаанам̣ баабагаананд̇и зд̇т̇а бана жад̇уб̣б̣ид̇хам̣ уббаннам̣ – вад̇д̇амаануббаннам̣, бхуд̇ваа виг̇ад̇уббаннам̣, огаасагад̇уббаннам̣, бхуумилад̣̇д̇хуббаннанд̇и. д̇ад̇т̇а яз гилзсаа виж̇ж̇амаанаа уббаад̣̇аад̣̇исаман̇г̇ино – ид̣̇ам̣ вад̇д̇амаануббаннам̣ наама. гаммз бана ж̇авид̇з аарамман̣арасам̣ анубхавид̇ваа нируд̣̇д̇хавибааго бхуд̇ваа виг̇ад̇ам̣ наама. гаммам̣ уббаж̇ж̇ид̇ваа нируд̣̇д̇хам̣ бхуд̇ваа виг̇ад̇ам̣ наама. д̇ад̣̇убхаяамби бхуд̇ваа виг̇ад̇уббаннанд̇и сан̇кам̣ г̇ажчад̇и. гусалаагусалагаммам̣ ан̃н̃асса гаммасса вибаагам̣ бадиб̣аахид̇ваа ад̇д̇ано вибаагасса огаасам̣ гарод̇и. звам̣ гад̇з огаасз вибааго уббаж̇ж̇амаано огаасагаран̣ад̇о бадтааяа уббаннод̇и вужжад̇и. ид̣̇ам̣ огаасагад̇уббаннам̣ наама.
Ye ca evaṃ anuppannā uppajjeyyuṃ, te yathā neva uppajjanti, evaṃ nesaṃ anuppādakiccaṃ uppannānañca pahānakiccaṃ sādheti. Tasmā uppannānaṃ pāpakānanti ettha pana catubbidhaṃ uppannaṃ – vattamānuppannaṃ, bhutvā vigatuppannaṃ, okāsakatuppannaṃ, bhūmiladdhuppannanti. Tattha ye kilesā vijjamānā uppādādisamaṅgino – idaṃ vattamānuppannaṃ nāma. Kamme pana javite ārammaṇarasaṃ anubhavitvā niruddhavipāko bhutvā vigataṃ nāma. Kammaṃ uppajjitvā niruddhaṃ bhutvā vigataṃ nāma. Tadubhayampi bhutvā vigatuppannanti saṅkhaṃ gacchati. Kusalākusalakammaṃ aññassa kammassa vipākaṃ paṭibāhitvā attano vipākassa okāsaṃ karoti. Evaṃ kate okāse vipāko uppajjamāno okāsakaraṇato paṭṭhāya uppannoti vuccati. Idaṃ okāsakatuppannaṃ nāma.
бан̃жагканд̇хаа бана вибассанааяа бхууми наама. д̇з ад̇ийд̇аад̣̇ибхзд̣̇аа хонд̇и. д̇зсу анусаяид̇агилзсаа бана ад̇ийд̇аа ваа анааг̇ад̇аа ваа бажжуббаннаа ваад̇и на вад̇д̇аб̣б̣аа. ад̇ийд̇агканд̇хзсу анусаяид̇ааби хи аббахийнаава хонд̇и. анааг̇ад̇агканд̇хзсу, бажжуббаннагканд̇хзсу анусаяид̇ааби аббахийнаава хонд̇и. ид̣̇ам̣ бхуумилад̣̇д̇хуббаннам̣ наама. д̇знааху бораан̣аа – ‘‘д̇аасу д̇аасу бхуумийсу асамуг̇гхаад̇ид̇аа гилзсаа бхуумилад̣̇д̇хуббаннаад̇и сан̇кам̣ г̇ажчанд̇ий’’д̇и.
Pañcakkhandhā pana vipassanāya bhūmi nāma. Te atītādibhedā honti. Tesu anusayitakilesā pana atītā vā anāgatā vā paccuppannā vāti na vattabbā. Atītakkhandhesu anusayitāpi hi appahīnāva honti. Anāgatakkhandhesu, paccuppannakkhandhesu anusayitāpi appahīnāva honti. Idaṃ bhūmiladdhuppannaṃ nāma. Tenāhu porāṇā – ‘‘tāsu tāsu bhūmīsu asamugghātitā kilesā bhūmiladdhuppannāti saṅkhaṃ gacchantī’’ti.
абарамби жад̇уб̣б̣ид̇хам̣ уббаннам̣ – самуд̣̇аажааруббаннам̣, аарамман̣аад̇хиг̇ахид̇уббаннам̣, авигкамбхид̇уббаннам̣, асамуг̇д̇хаад̇ид̇уббаннанд̇и. д̇ад̇т̇а самбад̇и вад̇д̇амаанам̣язва ‘самуд̣̇аажааруббаннам̣’ наама. сагим̣ жагкууни уммийлзд̇ваа аарамман̣з нимид̇д̇з г̇ахид̇з ануссарид̇аануссарид̇агкан̣з гилзсаа нуббаж̇ж̇иссанд̇ийд̇и на вад̇д̇аб̣б̣аа. гасмаа? аарамман̣асса ад̇хиг̇ахид̇ад̇д̇аа. яат̇аа гим̣? яат̇аа кийраругкасса гутаарияаа аахад̇аахад̇адтаанз кийрам̣ на нигкамиссад̇ийд̇и на вад̇д̇аб̣б̣ам̣, звам̣. ид̣̇ам̣ ‘аарамман̣аад̇хиг̇ахид̇уббаннам̣’ наама. самаабад̇д̇ияаа авигкамбхид̇агилзсаа бана имасмим̣ наама таанз нуббаж̇ж̇иссанд̇ийд̇и на вад̇д̇аб̣б̣аа. гасмаа? авигкамбхид̇ад̇д̇аа. яат̇аа гим̣? яат̇аа сажз кийраругкам̣ гутаарияаа ааханзяяум̣, ‘имасмим̣ наама таанз кийрам̣ на нигкамзяяаа’д̇и на вад̇д̇аб̣б̣ам̣, звам̣. ид̣̇ам̣ ‘авигкамбхид̇уббаннам̣’ наама. маг̇г̇зна асамуг̇гхаад̇ид̇агилзсаа бана бхаваг̇г̇з ниб̣б̣ад̇д̇ассааби нуббаж̇ж̇иссанд̇ийд̇и буриманаязнзва вид̇т̇аарзд̇аб̣б̣ам̣. ид̣̇ам̣ ‘асамуг̇гхаад̇ид̇уббаннам̣’ наама.
Aparampi catubbidhaṃ uppannaṃ – samudācāruppannaṃ, ārammaṇādhigahituppannaṃ, avikkhambhituppannaṃ, asamugdhātituppannanti. Tattha sampati vattamānaṃyeva ‘samudācāruppannaṃ’ nāma. Sakiṃ cakkhūni ummīletvā ārammaṇe nimitte gahite anussaritānussaritakkhaṇe kilesā nuppajjissantīti na vattabbā. Kasmā? Ārammaṇassa adhigahitattā. Yathā kiṃ? Yathā khīrarukkhassa kuṭhāriyā āhatāhataṭṭhāne khīraṃ na nikkhamissatīti na vattabbaṃ, evaṃ. Idaṃ ‘ārammaṇādhigahituppannaṃ’ nāma. Samāpattiyā avikkhambhitakilesā pana imasmiṃ nāma ṭhāne nuppajjissantīti na vattabbā. Kasmā? Avikkhambhitattā. Yathā kiṃ? Yathā sace khīrarukkhaṃ kuṭhāriyā āhaneyyuṃ, ‘imasmiṃ nāma ṭhāne khīraṃ na nikkhameyyā’ti na vattabbaṃ, evaṃ. Idaṃ ‘avikkhambhituppannaṃ’ nāma. Maggena asamugghātitakilesā pana bhavagge nibbattassāpi nuppajjissantīti purimanayeneva vitthāretabbaṃ. Idaṃ ‘asamugghātituppannaṃ’ nāma.
имзсу уббаннзсу вад̇д̇амаануббаннам̣, бхуд̇ваавиг̇ад̇уббаннам̣, огаасагад̇уббаннам̣, самуд̣̇аажааруббаннанд̇и жад̇уб̣б̣ид̇хам̣ уббаннам̣ на маг̇г̇аваж̇жхам̣; бхуумилад̣̇д̇хуббаннам̣, аарамман̣аад̇хиг̇г̇ахид̇уббаннам̣, авигкамбхид̇уббаннам̣, асамуг̇гхаад̇ид̇уббаннанд̇и жад̇уб̣б̣ид̇хам̣ маг̇г̇аваж̇жхам̣. маг̇г̇о хи уббаж̇ж̇амаано зд̇з гилзсз баж̇ахад̇и. со яз гилзсз баж̇ахад̇и, д̇з ад̇ийд̇аа ваа анааг̇ад̇аа ваа бажжуббаннаа ваад̇и на вад̇д̇аб̣б̣аа. вуд̇д̇амби жзд̇ам̣ –
Imesu uppannesu vattamānuppannaṃ, bhutvāvigatuppannaṃ, okāsakatuppannaṃ, samudācāruppannanti catubbidhaṃ uppannaṃ na maggavajjhaṃ; bhūmiladdhuppannaṃ, ārammaṇādhiggahituppannaṃ, avikkhambhituppannaṃ, asamugghātituppannanti catubbidhaṃ maggavajjhaṃ. Maggo hi uppajjamāno ete kilese pajahati. So ye kilese pajahati, te atītā vā anāgatā vā paccuppannā vāti na vattabbā. Vuttampi cetaṃ –
‘‘хан̃жи ад̇ийд̇з гилзсз баж̇ахад̇и, д̇зна хи кийн̣ам̣ кзбзд̇и, нируд̣̇д̇хам̣ нирод̇хзд̇и, виг̇ад̇ам̣ виг̇амзд̇и, ад̇т̇ан̇г̇ад̇ам̣ ад̇т̇ам̣ г̇амзд̇и, ад̇ийд̇ам̣ яам̣ над̇т̇и д̇ам̣ баж̇ахад̇и. хан̃жи анааг̇ад̇з гилзсз баж̇ахад̇и, д̇зна хи аж̇аад̇ам̣ баж̇ахад̇и, аниб̣б̣ад̇д̇ам̣ ануббаннам̣ абаад̇убхууд̇ам̣ баж̇ахад̇и, анааг̇ад̇ам̣ яам̣ над̇т̇и д̇ам̣ баж̇ахад̇и. хан̃жи бажжуббаннз гилзсз баж̇ахад̇и, д̇зна хи рад̇д̇о рааг̇ам̣ баж̇ахад̇и, д̣̇удто д̣̇осам̣, муул̣хо мохам̣, виниб̣ад̣̇д̇хо маанам̣, бараамадто д̣̇идтим̣, вигкзбаг̇ад̇о уд̣̇д̇хажжам̣, анидтан̇г̇ад̇о вижигижчам̣, т̇аамаг̇ад̇о анусаяам̣ баж̇ахад̇и; ган̣хасуггад̇хаммаа яуг̇анад̣̇д̇хаа самамзва вад̇д̇анд̇и; сам̣гилзсигаа маг̇г̇абхааванаа ход̇и…бз… д̇зна хи над̇т̇и маг̇г̇абхааванаа, над̇т̇и паласажчигирияаа, над̇т̇и гилзсаббахаанам̣, над̇т̇и д̇хаммаабхисамаяо’д̇и. ‘ад̇т̇и маг̇г̇абхааванаа…бз… ад̇т̇и д̇хаммаабхисамаяо’д̇и. яат̇аа гат̇ам̣ вияа? сзяяат̇ааби д̇арун̣о ругко…бз… абаад̇убхууд̇аанзва на баад̇убхаванд̇и’’д̇и (бади. ма. 3.21).
‘‘Hañci atīte kilese pajahati, tena hi khīṇaṃ khepeti, niruddhaṃ nirodheti, vigataṃ vigameti, atthaṅgataṃ atthaṃ gameti, atītaṃ yaṃ natthi taṃ pajahati. Hañci anāgate kilese pajahati, tena hi ajātaṃ pajahati, anibbattaṃ anuppannaṃ apātubhūtaṃ pajahati, anāgataṃ yaṃ natthi taṃ pajahati. Hañci paccuppanne kilese pajahati, tena hi ratto rāgaṃ pajahati, duṭṭho dosaṃ, mūḷho mohaṃ, vinibaddho mānaṃ, parāmaṭṭho diṭṭhiṃ, vikkhepagato uddhaccaṃ, aniṭṭhaṅgato vicikicchaṃ, thāmagato anusayaṃ pajahati; kaṇhasukkadhammā yuganaddhā samameva vattanti; saṃkilesikā maggabhāvanā hoti…pe… tena hi natthi maggabhāvanā, natthi phalasacchikiriyā, natthi kilesappahānaṃ, natthi dhammābhisamayo’ti. ‘Atthi maggabhāvanā…pe… atthi dhammābhisamayo’ti. Yathā kathaṃ viya? Seyyathāpi taruṇo rukkho…pe… apātubhūtāneva na pātubhavanti’’ti (paṭi. ma. 3.21).
ид̇и баал̣ияам̣ аж̇аад̇апаларугко ааг̇ад̇о; ж̇аад̇апаларугкзна бана д̣̇ийбзд̇аб̣б̣ам̣. яат̇аа хи сапало д̇арун̣аамб̣аругко. д̇асса палаани мануссаа барибхун̃ж̇зяяум̣, сзсаани баад̇зд̇ваа бажчияо буурзяяум̣. ат̇ан̃н̃о бурисо д̇ам̣ парасунаа чинд̣̇зяяа. д̇знасса нзва ад̇ийд̇аани палаани наасид̇аани хонд̇и, на анааг̇ад̇абажжуббаннаани жа наасид̇аани; ад̇ийд̇аани хи мануссзхи барибхуд̇д̇аани, анааг̇ад̇аани аниб̣б̣ад̇д̇аани на саггаа наасзд̇ум̣ . яасмим̣ бана самаяз со чинно д̇ад̣̇аа палааниязва над̇т̇ийд̇и бажжуббаннааниби анаасид̇аани. сажз бана ругко ажчинно асса, ат̇асса бат̇авийрасан̃жа ааборасан̃жа ааг̇амма яаани палаани ниб̣б̣ад̇д̇зяяум̣, д̇аани наасид̇аани хонд̇и. д̇аани хи аж̇аад̇аанзва на ж̇ааяанд̇и, аниб̣б̣ад̇д̇аанзва на ниб̣б̣ад̇д̇анд̇и, абаад̇убхууд̇аанзва на баад̇убхаванд̇и. звамзва маг̇г̇о нааби ад̇ийд̇аад̣̇ибхзд̣̇з гилзсз баж̇ахад̇и, нааби на баж̇ахад̇и. язсан̃хи гилзсаанам̣ маг̇г̇зна канд̇хзсу абарин̃н̃аад̇зсу уббад̇д̇и сияаа, маг̇г̇зна уббаж̇ж̇ид̇ваа канд̇хаанам̣ барин̃н̃аад̇ад̇д̇аа д̇з гилзсаа аж̇аад̇аава на ж̇ааяанд̇и, аниб̣б̣ад̇д̇аава на ниб̣б̣ад̇д̇анд̇и, абаад̇убхууд̇аава на баад̇убхаванд̇и. д̇арун̣абуд̇д̇ааяа ид̇т̇ияаа буна авиж̇ааяанад̇т̇ам̣ б̣яаад̇хид̇аанам̣ рог̇авуубасамад̇т̇ам̣ бийд̇абхзсаж̇ж̇зхи жааби аяамад̇т̇о вибхаавзд̇аб̣б̣о. звам̣ маг̇г̇о яз гилзсз баж̇ахад̇и, д̇з ад̇ийд̇аа ваа анааг̇ад̇аа ваа бажжуббаннаа ваад̇и на вад̇д̇аб̣б̣аа. на жа маг̇г̇о гилзсз на баж̇ахад̇и. яз бана маг̇г̇о гилзсз баж̇ахад̇и, д̇з санд̇хааяа ‘уббаннаанам̣ баабагаана’нд̇иаад̣̇и вуд̇д̇ам̣.
Iti pāḷiyaṃ ajātaphalarukkho āgato; jātaphalarukkhena pana dīpetabbaṃ. Yathā hi saphalo taruṇaambarukkho. Tassa phalāni manussā paribhuñjeyyuṃ, sesāni pātetvā pacchiyo pūreyyuṃ. Athañño puriso taṃ pharasunā chindeyya. Tenassa neva atītāni phalāni nāsitāni honti, na anāgatapaccuppannāni ca nāsitāni; atītāni hi manussehi paribhuttāni, anāgatāni anibbattāni na sakkā nāsetuṃ . Yasmiṃ pana samaye so chinno tadā phalāniyeva natthīti paccuppannānipi anāsitāni. Sace pana rukkho acchinno assa, athassa pathavīrasañca āporasañca āgamma yāni phalāni nibbatteyyuṃ, tāni nāsitāni honti. Tāni hi ajātāneva na jāyanti, anibbattāneva na nibbattanti, apātubhūtāneva na pātubhavanti. Evameva maggo nāpi atītādibhede kilese pajahati, nāpi na pajahati. Yesañhi kilesānaṃ maggena khandhesu apariññātesu uppatti siyā, maggena uppajjitvā khandhānaṃ pariññātattā te kilesā ajātāva na jāyanti, anibbattāva na nibbattanti, apātubhūtāva na pātubhavanti. Taruṇaputtāya itthiyā puna avijāyanatthaṃ byādhitānaṃ rogavūpasamatthaṃ pītabhesajjehi cāpi ayamattho vibhāvetabbo. Evaṃ maggo ye kilese pajahati, te atītā vā anāgatā vā paccuppannā vāti na vattabbā. Na ca maggo kilese na pajahati. Ye pana maggo kilese pajahati, te sandhāya ‘uppannānaṃ pāpakāna’ntiādi vuttaṃ.
на гзвалан̃жа маг̇г̇о гилзсзязва баж̇ахад̇и, гилзсаанам̣ бана аббахийнад̇д̇аа яз уббаж̇ж̇зяяум̣ убаад̣̇иннагканд̇хаа, д̇зби баж̇ахад̇иязва. вуд̇д̇амби жзд̇ам̣ ‘‘сод̇аабад̇д̇имаг̇г̇ан̃аан̣зна абхисан̇кааравин̃н̃аан̣асса нирод̇хзна сад̇д̇а бхавз табзд̇ваа анамад̇аг̇г̇з сам̣саарз яз уббаж̇ж̇зяяум̣ нааман̃жа руубан̃жа зд̇т̇зд̇з нируж̇жханд̇ий’’д̇и (жуул̣ани. аж̇ид̇амаан̣авабужчаанид̣̇д̣̇зса 6) вид̇т̇ааро. ид̇и маг̇г̇о убаад̣̇иннад̇о анубаад̣̇иннад̇о жа вудтаад̇и. бхававасзна бана сод̇аабад̇д̇имаг̇г̇о абааяабхавад̇о вудтаад̇и . сагад̣̇ааг̇аамимаг̇г̇о суг̇ад̇ибхавзгад̣̇зсад̇о; анааг̇аамимаг̇г̇о суг̇ад̇игаамабхавад̇о; вудтаад̇и арахад̇д̇амаг̇г̇о руубааруубабхавад̇о вудтаад̇и, саб̣б̣абхавзхи вудтаад̇иязваад̇иби вад̣̇анд̇и.
Na kevalañca maggo kileseyeva pajahati, kilesānaṃ pana appahīnattā ye uppajjeyyuṃ upādinnakkhandhā, tepi pajahatiyeva. Vuttampi cetaṃ ‘‘sotāpattimaggañāṇena abhisaṅkhāraviññāṇassa nirodhena satta bhave ṭhapetvā anamatagge saṃsāre ye uppajjeyyuṃ nāmañca rūpañca etthete nirujjhantī’’ti (cūḷani. ajitamāṇavapucchāniddesa 6) vitthāro. Iti maggo upādinnato anupādinnato ca vuṭṭhāti. Bhavavasena pana sotāpattimaggo apāyabhavato vuṭṭhāti . Sakadāgāmimaggo sugatibhavekadesato; anāgāmimaggo sugatikāmabhavato; vuṭṭhāti arahattamaggo rūpārūpabhavato vuṭṭhāti, sabbabhavehi vuṭṭhātiyevātipi vadanti.
ат̇а маг̇г̇агкан̣з гат̇ам̣ ануббаннаанам̣ уббаад̣̇ааяа бхааванаа ход̇и? гат̇ам̣ ваа уббаннаанам̣ тид̇ияаад̇и? маг̇г̇аббавад̇д̇ияаа зва. маг̇г̇о хи бавад̇д̇амаано буб̣б̣з ануббаннабуб̣б̣ад̇д̇аа ануббанно наама вужжад̇и. анааг̇ад̇абуб̣б̣ан̃хи таанам̣ г̇анд̇ваа ананубхууд̇абуб̣б̣ам̣ ваа аарамман̣ам̣ анубхавид̇ваа вад̇д̇ааро бхаванд̇и – ‘анааг̇ад̇адтаанам̣ ааг̇ад̇амха, ананубхууд̇ам̣ аарамман̣ам̣ анубхаваамаа’д̇и. яаа жасса бавад̇д̇и, аяамзва тид̇и наамаад̇и тид̇ияаа бхаавзд̇ийд̇и вад̇д̇ум̣ ваддад̇и. звамзд̇асса бхигкуно ид̣̇ам̣ логуд̇д̇арамаг̇г̇агкан̣з вийрияам̣ ‘‘ануббаннаанам̣ баабагаанам̣ агусалаанам̣ д̇хаммаанам̣ ануббаад̣̇ааяаа’’д̇иаад̣̇ийни жад̇д̇аари наамаани лабхад̇и. аяам̣ логуд̇д̇арамаг̇г̇агкан̣з саммаббад̇хаанагат̇аа. звамзд̇т̇а логияалогуд̇д̇арамиссагаа саммаббад̇хаанаа нид̣̇д̣̇идтаад̇и.
Atha maggakkhaṇe kathaṃ anuppannānaṃ uppādāya bhāvanā hoti? Kathaṃ vā uppannānaṃ ṭhitiyāti? Maggappavattiyā eva. Maggo hi pavattamāno pubbe anuppannapubbattā anuppanno nāma vuccati. Anāgatapubbañhi ṭhānaṃ gantvā ananubhūtapubbaṃ vā ārammaṇaṃ anubhavitvā vattāro bhavanti – ‘anāgataṭṭhānaṃ āgatamha, ananubhūtaṃ ārammaṇaṃ anubhavāmā’ti. Yā cassa pavatti, ayameva ṭhiti nāmāti ṭhitiyā bhāvetīti vattuṃ vaṭṭati. Evametassa bhikkhuno idaṃ lokuttaramaggakkhaṇe vīriyaṃ ‘‘anuppannānaṃ pāpakānaṃ akusalānaṃ dhammānaṃ anuppādāyā’’tiādīni cattāri nāmāni labhati. Ayaṃ lokuttaramaggakkhaṇe sammappadhānakathā. Evamettha lokiyalokuttaramissakā sammappadhānā niddiṭṭhāti.
суд̇д̇анд̇абхааж̇анийяаван̣н̣анаа.
Suttantabhājanīyavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / вибхан̇г̇абаал̣и • Vibhaṅgapāḷi / 8. саммаббад̇хаанавибхан̇г̇о • 8. Sammappadhānavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-мууладийгаа • Vibhaṅga-mūlaṭīkā / 8. саммаббад̇хаанавибхан̇г̇о • 8. Sammappadhānavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-анудийгаа • Vibhaṅga-anuṭīkā / 8. саммаббад̇хаанавибхан̇г̇о • 8. Sammappadhānavibhaṅgo
