| Library / Tipiṭaka / ติปิฎก • Tipiṭaka / ธมฺมสงฺคณิ-อฎฺฐกถา • Dhammasaṅgaṇi-aṭṭhakathā |
สุตฺตนฺติกทุกมาติกาปทวณฺณนา
Suttantikadukamātikāpadavaṇṇanā
๑๐๑-๑๐๘. สุตฺตนฺติกทุเกสุ สมฺปโยควเสน วิชฺชํ ภชนฺตีติ วิชฺชาภาคิโน; วิชฺชาภาเค วิชฺชาโกฎฺฐาเส วตฺตนฺตีติปิ วิชฺชาภาคิโนฯ ตตฺถ วิปสฺสนาญาณํ, มโนมยิทฺธิ, ฉ อภิญฺญาติ อฎฺฐ วิชฺชาฯ ปุริเมน อเตฺถน ตาหิ สมฺปยุตฺตธมฺมาปิ วิชฺชาภาคิโนฯ ปจฺฉิเมน อเตฺถน ตาสุ ยา กาจิ เอกา วิชฺชา วิชฺชาฯ เสสา วิชฺชาภาคิโนติฯ เอวํ วิชฺชาปิ วิชฺชาย สมฺปยุตฺตธมฺมาปิ วิชฺชาภาคิโนเตฺวว เวทิตพฺพาฯ อิธ ปน สมฺปยุตฺตธมฺมาว อธิเปฺปตาฯ สมฺปโยควเสเนว อวิชฺชํ ภชนฺตีติ อวิชฺชาภาคิโนฯ อวิชฺชาภาเค อวิชฺชาโกฎฺฐาเส วตฺตนฺตีติปิ อวิชฺชาภาคิโนฯ ตตฺถ ทุกฺขปฎิจฺฉาทกํ ตโม สมุทยาทิปฎิจฺฉาทกนฺติ จตโสฺส อวิชฺชาฯ ปุริมนเยเนว ตาหิ สมฺปยุตฺตธมฺมาปิ อวิชฺชาภาคิโนฯ ตาสุ ยา กาจิ เอกา อวิชฺชา อวิชฺชาฯ เสสา อวิชฺชาภาคิโนติฯ เอวํ อวิชฺชาปิ อวิชฺชาย สมฺปยุตฺตธมฺมาปิ อวิชฺชาภาคิโนเตฺวว เวทิตพฺพาฯ อิธ ปน สมฺปยุตฺตธมฺมาว อธิเปฺปตาฯ
101-108. Suttantikadukesu sampayogavasena vijjaṃ bhajantīti vijjābhāgino; vijjābhāge vijjākoṭṭhāse vattantītipi vijjābhāgino. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammāpi vijjābhāgino. Pacchimena atthena tāsu yā kāci ekā vijjā vijjā. Sesā vijjābhāginoti. Evaṃ vijjāpi vijjāya sampayuttadhammāpi vijjābhāginotveva veditabbā. Idha pana sampayuttadhammāva adhippetā. Sampayogavaseneva avijjaṃ bhajantīti avijjābhāgino. Avijjābhāge avijjākoṭṭhāse vattantītipi avijjābhāgino. Tattha dukkhapaṭicchādakaṃ tamo samudayādipaṭicchādakanti catasso avijjā. Purimanayeneva tāhi sampayuttadhammāpi avijjābhāgino. Tāsu yā kāci ekā avijjā avijjā. Sesā avijjābhāginoti. Evaṃ avijjāpi avijjāya sampayuttadhammāpi avijjābhāginotveva veditabbā. Idha pana sampayuttadhammāva adhippetā.
ปุน อนโชฺฌตฺถรณภาเวน กิเลสนฺธการํ วิทฺธํเสตุํ อสมตฺถตาย วิชฺชุ อุปมา เอเตสนฺติ วิชฺชูปมาฯ นิเสฺสสํ วิทฺธํสนสมตฺถตาย วชิรํ อุปมา เอเตสนฺติ วชิรูปมาฯ พาเลสุ ฐิตตฺตา ยตฺถ ฐิตา ตทุปจาเรน พาลาฯ ปณฺฑิเตสุ ฐิตตฺตา ปณฺฑิตาฯ พาลกรตฺตา วา พาลา, ปณฺฑิตกรตฺตา ปณฺฑิตาฯ กณฺหาติ กาฬกา, จิตฺตสฺส อปภสฺสรภาวกรณาฯ สุกฺกาติ โอทาตา , จิตฺตสฺส ปภสฺสรภาวกรณาฯ กณฺหาภิชาติเหตุโต วา กณฺหา; สุกฺกาภิชาติเหตุโต สุกฺกาฯ อิธ เจว สมฺปราเย จ ตเปนฺตีติ ตปนียาฯ น ตปนียา อตปนียาฯ
Puna anajjhottharaṇabhāvena kilesandhakāraṃ viddhaṃsetuṃ asamatthatāya vijju upamā etesanti vijjūpamā. Nissesaṃ viddhaṃsanasamatthatāya vajiraṃ upamā etesanti vajirūpamā. Bālesu ṭhitattā yattha ṭhitā tadupacārena bālā. Paṇḍitesu ṭhitattā paṇḍitā. Bālakarattā vā bālā, paṇḍitakarattā paṇḍitā. Kaṇhāti kāḷakā, cittassa apabhassarabhāvakaraṇā. Sukkāti odātā , cittassa pabhassarabhāvakaraṇā. Kaṇhābhijātihetuto vā kaṇhā; sukkābhijātihetuto sukkā. Idha ceva samparāye ca tapentīti tapanīyā. Na tapanīyā atapanīyā.
อธิวจนทุกาทโย ตโย อตฺถโต นินฺนานากรณา; พฺยญฺชนเมเวตฺถ นานํฯ สิริวฑฺฒโก ธนวฑฺฒโกติ อาทโย หิ วจนมตฺตเมว อธิการํ กตฺวา ปวตฺตา อธิวจนา นามฯ อธิวจนานํ ปถา อธิวจนปถาฯ ‘‘อภิสงฺขโรนฺตีติ โข, ภิกฺขเว, ตสฺมา สงฺขารา’’ติ (สํ. นิ. ๓.๗๙) เอวํ นิทฺธาเรตฺวา สเหตุกํ กตฺวา วุจฺจมานา อภิลาปา นิรุตฺติ นามฯ นิรุตฺตีนํ ปถา นิรุตฺติปถาฯ ตโกฺก วิตโกฺก สงฺกโปฺปติ (ธ. ส. ๗) เอวํ เตน เตน ปกาเรน ญาปนโต ปญฺญตฺติ นามฯ ปญฺญตฺตีนํ ปถา ปญฺญตฺติปถาฯ เอตฺถ จ เอกํ ทุกํ วตฺวาปิ อิตเรสํ วจเน ปโยชนํ เหตุโคจฺฉเก วุตฺตนเยเนว เวทิตพฺพํฯ
Adhivacanadukādayo tayo atthato ninnānākaraṇā; byañjanamevettha nānaṃ. Sirivaḍḍhako dhanavaḍḍhakoti ādayo hi vacanamattameva adhikāraṃ katvā pavattā adhivacanā nāma. Adhivacanānaṃ pathā adhivacanapathā. ‘‘Abhisaṅkharontīti kho, bhikkhave, tasmā saṅkhārā’’ti (saṃ. ni. 3.79) evaṃ niddhāretvā sahetukaṃ katvā vuccamānā abhilāpā nirutti nāma. Niruttīnaṃ pathā niruttipathā. Takko vitakko saṅkappoti (dha. sa. 7) evaṃ tena tena pakārena ñāpanato paññatti nāma. Paññattīnaṃ pathā paññattipathā. Ettha ca ekaṃ dukaṃ vatvāpi itaresaṃ vacane payojanaṃ hetugocchake vuttanayeneva veditabbaṃ.
๑๐๙-๑๑๘. นามรูปทุเก นามกรณเฎฺฐน นมนเฎฺฐน นามนเฎฺฐน จ นามํฯ รุปฺปนเฎฺฐน รูปํฯ อยเมตฺถ สเงฺขโปฯ วิตฺถาโร ปน นิเกฺขปกเณฺฑ อาวิ ภวิสฺสติฯ อวิชฺชาติ ทุกฺขาทีสุ อญฺญาณํฯ ภวตณฺหาติ ภวปตฺถนาฯ ภวทิฎฺฐีติ ภโว วุจฺจติ สสฺสตํ; สสฺสตวเสน อุปฺปชฺชนทิฎฺฐิฯ วิภวทิฎฺฐีติ วิภโว วุจฺจติ อุเจฺฉทํ; อุเจฺฉทวเสน อุปฺปชฺชนทิฎฺฐิฯ สสฺสโต อตฺตา จ โลโก จาติ ปวตฺตา ทิฎฺฐิ สสฺสตทิฎฺฐิฯ อุจฺฉิชฺชิสฺสตีติ ปวตฺตา ทิฎฺฐิ อุเจฺฉททิฎฺฐิฯ อนฺตวาติ ปวตฺตา ทิฎฺฐิ อนฺตวาทิฎฺฐิฯ อนนฺตวาติ ปวตฺตา ทิฎฺฐิ อนนฺตวาทิฎฺฐิฯ ปุพฺพนฺตํ อนุคตา ทิฎฺฐิ ปุพฺพนฺตานุทิฎฺฐิฯ อปรนฺตํ อนุคตา ทิฎฺฐิ อปรนฺตานุทิฎฺฐิฯ อหิริกนฺติ ยํ น หิริยติ หิริยิตเพฺพนาติ (ธ. ส. ๓๘๗) เอวํ วิตฺถาริตา นิลฺลชฺชตาฯ อโนตฺตปฺปนฺติ ยํ น โอตฺตปฺปติ โอตฺตปฺปิตเพฺพนาติ เอวํ วิตฺถาริโต อภายนกอากาโรฯ หิริยนา หิรี, โอตฺตปฺปนา โอตฺตปฺปํฯ โทวจสฺสตาทีสุ ทุกฺขํ วโจ เอตสฺมิํ วิปฺปฎิกูลคาหิมฺหิ วิปจฺจนีกสาเต อนาทเร ปุคฺคเลติ ทุพฺพโจฯ ตสฺส กมฺมํ โทวจสฺสํฯ ตสฺส ภาโว โทวจสฺสตาฯ ปาปา อสฺสทฺธาทโย ปุคฺคลา เอตสฺส มิตฺตาติ ปาปมิโตฺต; ตสฺส ภาโว ปาปมิตฺตตาฯ โสวจสฺสตา จ กลฺยาณมิตฺตตา จ วุตฺตปฎิปกฺขนเยน เวทิตพฺพาฯ
109-118. Nāmarūpaduke nāmakaraṇaṭṭhena namanaṭṭhena nāmanaṭṭhena ca nāmaṃ. Ruppanaṭṭhena rūpaṃ. Ayamettha saṅkhepo. Vitthāro pana nikkhepakaṇḍe āvi bhavissati. Avijjāti dukkhādīsu aññāṇaṃ. Bhavataṇhāti bhavapatthanā. Bhavadiṭṭhīti bhavo vuccati sassataṃ; sassatavasena uppajjanadiṭṭhi. Vibhavadiṭṭhīti vibhavo vuccati ucchedaṃ; ucchedavasena uppajjanadiṭṭhi. Sassato attā ca loko cāti pavattā diṭṭhi sassatadiṭṭhi. Ucchijjissatīti pavattā diṭṭhi ucchedadiṭṭhi. Antavāti pavattā diṭṭhi antavādiṭṭhi. Anantavāti pavattā diṭṭhi anantavādiṭṭhi. Pubbantaṃ anugatā diṭṭhi pubbantānudiṭṭhi. Aparantaṃ anugatā diṭṭhi aparantānudiṭṭhi. Ahirikanti yaṃ na hiriyati hiriyitabbenāti (dha. sa. 387) evaṃ vitthāritā nillajjatā. Anottappanti yaṃ na ottappati ottappitabbenāti evaṃ vitthārito abhāyanakaākāro. Hiriyanā hirī, ottappanā ottappaṃ. Dovacassatādīsu dukkhaṃ vaco etasmiṃ vippaṭikūlagāhimhi vipaccanīkasāte anādare puggaleti dubbaco. Tassa kammaṃ dovacassaṃ. Tassa bhāvo dovacassatā. Pāpā assaddhādayo puggalā etassa mittāti pāpamitto; tassa bhāvo pāpamittatā. Sovacassatā ca kalyāṇamittatā ca vuttapaṭipakkhanayena veditabbā.
๑๑๙-๑๒๓. ‘ปญฺจปิ อาปตฺติกฺขนฺธา อาปตฺติโย, สตฺตปิ อาปตฺติกฺขนฺธา อาปตฺติโย’ติ (ธ. ส. ๑๓๓๖) เอวํ วุตฺตาสุ อาปตฺตีสุ กุสลภาโว อาปตฺติกุสลตาฯ ตาหิ อาปตฺตีหิ วุฎฺฐาเน กุสลภาโว อาปตฺติวุฎฺฐานกุสลตาฯ สมาปตฺตีสุ กุสลภาโว สมาปตฺติกุสลตาฯ สมาปตฺตีนํ อปฺปนาปริเจฺฉทปญฺญาเยตํ อธิวจนํฯ สมาปตฺตีหิ วุฎฺฐาเน กุสลภาโว สมาปตฺติวุฎฺฐานกุสลตาฯ อฎฺฐารสสุ ธาตูสุ กุสลภาโว ธาตุกุสลตาฯ ตาสํเยว ธาตูนํ มนสิกาเร กุสลภาโว มนสิการกุสลตาฯ จกฺขายตนาทีสุ กุสลภาโว อายตนกุสลตาฯ ทฺวาทสเงฺค ปฎิจฺจสมุปฺปาเท กุสลภาโว ปฎิจฺจสมุปฺปาทกุสลตาฯ ตสฺมิํ ตสฺมิํ ฐาเน กุสลภาโว ฐานกุสลตาฯ ฐานนฺติ การณํ วุจฺจติฯ ตสฺมิญฺหิ ตทายตฺตวุตฺติตาย ผลํ ติฎฺฐติ นาม, ตสฺมา ฐานนฺติ วุตฺตํฯ อฎฺฐาเน กุสลภาโว อฎฺฐานกุสลตาฯ
119-123. ‘Pañcapi āpattikkhandhā āpattiyo, sattapi āpattikkhandhā āpattiyo’ti (dha. sa. 1336) evaṃ vuttāsu āpattīsu kusalabhāvo āpattikusalatā. Tāhi āpattīhi vuṭṭhāne kusalabhāvo āpattivuṭṭhānakusalatā. Samāpattīsu kusalabhāvo samāpattikusalatā. Samāpattīnaṃ appanāparicchedapaññāyetaṃ adhivacanaṃ. Samāpattīhi vuṭṭhāne kusalabhāvo samāpattivuṭṭhānakusalatā. Aṭṭhārasasu dhātūsu kusalabhāvo dhātukusalatā. Tāsaṃyeva dhātūnaṃ manasikāre kusalabhāvo manasikārakusalatā. Cakkhāyatanādīsu kusalabhāvo āyatanakusalatā. Dvādasaṅge paṭiccasamuppāde kusalabhāvo paṭiccasamuppādakusalatā. Tasmiṃ tasmiṃ ṭhāne kusalabhāvo ṭhānakusalatā. Ṭhānanti kāraṇaṃ vuccati. Tasmiñhi tadāyattavuttitāya phalaṃ tiṭṭhati nāma, tasmā ṭhānanti vuttaṃ. Aṭṭhāne kusalabhāvo aṭṭhānakusalatā.
๑๒๔-๑๓๔. อุชุภาโว อชฺชโวฯ มุทุภาโว มทฺทโวฯ อธิวาสนสงฺขาโต ขมนภาโว ขนฺติฯ สุรตสฺส ภาโว โสรจฺจํฯ สโมฺมทกมุทุภาวสงฺขาโต สขิลภาโว สาขลฺยํฯ ยถา ปเรหิ สทฺธิํ อตฺตโน ฉิทฺทํ น โหติ เอวํ ธมฺมามิเสหิ ปฎิสนฺถรณํ ปฎิสนฺถาโรฯ อินฺทฺริยสํวรเภทสงฺขาโต มนจฺฉเฎฺฐสุ อินฺทฺริเยสุ อคุตฺตทฺวารภาโว อินฺทฺริเยสุ อคุตฺตทฺวารตาฯ ปฎิคฺคหณปริโภควเสน โภชเน มตฺตํ อชานนภาโว โภชเน อมตฺตญฺญุตาฯ อนนฺตรทุโก วุตฺตปฎิปกฺขนเยน เวทิตโพฺพฯ สติวิปฺปวาสสงฺขาโต มุฎฺฐสฺสติภาโว มุฎฺฐสฺสจฺจํฯ อสมฺปชานภาโว อสมฺปชญฺญํฯ สรตีติ สติฯ สมฺปชานาตีติ สมฺปชญฺญํฯ อปฺปฎิสงฺขาเน อกมฺปนเฎฺฐน ปฎิสงฺขานสงฺขาตํ พลํ ปฎิสงฺขานพลํฯ วีริยสีเสน สตฺต โพชฺฌเงฺค ภาเวนฺตสฺส อุปฺปนฺนํ พลํ ภาวนาพลํฯ ปจฺจนีกธเมฺม สเมตีติ สมโถฯ อนิจฺจาทิวเสน วิวิเธน อากาเรน ปสฺสตีติ วิปสฺสนาฯ สมโถว ตํ อาการํ คเหตฺวา ปุน ปวเตฺตตพฺพสฺส สมถสฺส นิมิตฺตวเสน สมถนิมิตฺตํฯ ปคฺคาหนิมิเตฺตปิ เอเสว นโยฯ สมฺปยุตฺตธเมฺม ปคฺคณฺหาตีติ ปคฺคาโหฯ น วิกฺขิปตีติ อวิเกฺขโปฯ
124-134. Ujubhāvo ajjavo. Mudubhāvo maddavo. Adhivāsanasaṅkhāto khamanabhāvo khanti. Suratassa bhāvo soraccaṃ. Sammodakamudubhāvasaṅkhāto sakhilabhāvo sākhalyaṃ. Yathā parehi saddhiṃ attano chiddaṃ na hoti evaṃ dhammāmisehi paṭisantharaṇaṃ paṭisanthāro. Indriyasaṃvarabhedasaṅkhāto manacchaṭṭhesu indriyesu aguttadvārabhāvo indriyesu aguttadvāratā. Paṭiggahaṇaparibhogavasena bhojane mattaṃ ajānanabhāvo bhojane amattaññutā. Anantaraduko vuttapaṭipakkhanayena veditabbo. Sativippavāsasaṅkhāto muṭṭhassatibhāvo muṭṭhassaccaṃ. Asampajānabhāvo asampajaññaṃ. Saratīti sati. Sampajānātīti sampajaññaṃ. Appaṭisaṅkhāne akampanaṭṭhena paṭisaṅkhānasaṅkhātaṃ balaṃ paṭisaṅkhānabalaṃ. Vīriyasīsena satta bojjhaṅge bhāventassa uppannaṃ balaṃ bhāvanābalaṃ. Paccanīkadhamme sametīti samatho. Aniccādivasena vividhena ākārena passatīti vipassanā. Samathova taṃ ākāraṃ gahetvā puna pavattetabbassa samathassa nimittavasena samathanimittaṃ. Paggāhanimittepi eseva nayo. Sampayuttadhamme paggaṇhātīti paggāho. Na vikkhipatīti avikkhepo.
๑๓๕-๑๔๒. สีลวินาสิกา อสํวรสงฺขาตา สีลสฺส วิปตฺติ สีลวิปตฺติฯ สมฺมาทิฎฺฐิวินาสิกา มิจฺฉาทิฎฺฐิสงฺขาตา ทิฎฺฐิยา วิปตฺติ ทิฎฺฐิวิปตฺติฯ โสรจฺจเมว สีลสฺส สมฺปาทนโต สีลปริปูรณโต สีลสฺส สมฺปทาติ สีลสมฺปทาฯ ทิฎฺฐิปาริปูริภูตํ ญาณํ ทิฎฺฐิยา สมฺปทาติ ทิฎฺฐิสมฺปทาฯ วิสุทฺธิภาวํ สมฺปตฺตา สีลสงฺขาตา สีลสฺส วิสุทฺธิ, สีลวิสุทฺธิฯ นิพฺพานสงฺขาตํ วิสุทฺธิํ ปาเปตุํ สมตฺถา, ทสฺสนสงฺขาตา, ทิฎฺฐิยา วิสุทฺธิ ทิฎฺฐิวิสุทฺธิฯ ทิฎฺฐิวิสุทฺธิ โข ปน ยถาทิฎฺฐิสฺส จ ปธานนฺติ กมฺมสฺสกตญฺญาณาทิสงฺขาตา ทิฎฺฐิวิสุทฺธิ เจว ยถาทิฎฺฐิสฺส จ อนุรูปทิฎฺฐิสฺส กลฺยาณทิฎฺฐิสฺส ตํสมฺปยุตฺตเมว ปธานํฯ สํเวโคติ ชาติอาทีนิ ปฎิจฺจ อุปฺปนฺนภยสงฺขาตํ สํวิชฺชนํฯ สํเวชนิยฎฺฐานนฺติ สํเวคชนกํ ชาติอาทิการณํฯ สํวิคฺคสฺส จ โยนิโสปธานนฺติ เอวํ สํเวคชาตสฺส อุปายปธานํฯ อสนฺตุฎฺฐิตา จ กุสเลสุ ธเมฺมสูติ กุสลธมฺมปูรเณ อสนฺตุฎฺฐิภาโวฯ อปฺปฎิวานิตา จ ปธานสฺมินฺติ อรหตฺตํ อปตฺวา ปธานสฺมิํ อนิวตฺตนตา อโนสกฺกนตาฯ วิชานนโต วิชฺชาฯ วิมุจฺจนโต วิมุตฺติฯ ขเย ญาณนฺติ กิเลสกฺขยกเร อริยมเคฺค ญาณํฯ อนุปฺปาเท ญาณนฺติ ปฎิสนฺธิวเสน อนุปฺปาทภูเต ตํตํมคฺควชฺฌกิเลสานํ อนุปฺปาทปริโยสาเน อุปฺปเนฺน อริยผเล ญาณํฯ อยํ มาติกาย อนุปุพฺพปทวณฺณนาฯ
135-142. Sīlavināsikā asaṃvarasaṅkhātā sīlassa vipatti sīlavipatti. Sammādiṭṭhivināsikā micchādiṭṭhisaṅkhātā diṭṭhiyā vipatti diṭṭhivipatti. Soraccameva sīlassa sampādanato sīlaparipūraṇato sīlassa sampadāti sīlasampadā. Diṭṭhipāripūribhūtaṃ ñāṇaṃ diṭṭhiyā sampadāti diṭṭhisampadā. Visuddhibhāvaṃ sampattā sīlasaṅkhātā sīlassa visuddhi, sīlavisuddhi. Nibbānasaṅkhātaṃ visuddhiṃ pāpetuṃ samatthā, dassanasaṅkhātā, diṭṭhiyā visuddhi diṭṭhivisuddhi. Diṭṭhivisuddhi kho pana yathādiṭṭhissa ca padhānanti kammassakataññāṇādisaṅkhātā diṭṭhivisuddhi ceva yathādiṭṭhissa ca anurūpadiṭṭhissa kalyāṇadiṭṭhissa taṃsampayuttameva padhānaṃ. Saṃvegoti jātiādīni paṭicca uppannabhayasaṅkhātaṃ saṃvijjanaṃ. Saṃvejaniyaṭṭhānanti saṃvegajanakaṃ jātiādikāraṇaṃ. Saṃviggassa ca yonisopadhānanti evaṃ saṃvegajātassa upāyapadhānaṃ. Asantuṭṭhitā ca kusalesu dhammesūti kusaladhammapūraṇe asantuṭṭhibhāvo. Appaṭivānitā ca padhānasminti arahattaṃ apatvā padhānasmiṃ anivattanatā anosakkanatā. Vijānanato vijjā. Vimuccanato vimutti. Khaye ñāṇanti kilesakkhayakare ariyamagge ñāṇaṃ. Anuppāde ñāṇanti paṭisandhivasena anuppādabhūte taṃtaṃmaggavajjhakilesānaṃ anuppādapariyosāne uppanne ariyaphale ñāṇaṃ. Ayaṃ mātikāya anupubbapadavaṇṇanā.
ทุกมาติกาปทวณฺณนา นิฎฺฐิตาฯ
Dukamātikāpadavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / อภิธมฺมปิฎก • Abhidhammapiṭaka / ธมฺมสงฺคณีปาฬิ • Dhammasaṅgaṇīpāḷi / สุตฺตนฺติกทุกมาติกา • Suttantikadukamātikā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ธมฺมสงฺคณี-มูลฎีกา • Dhammasaṅgaṇī-mūlaṭīkā / สุตฺตนฺติกทุกมาติกาปทวณฺณนา • Suttantikadukamātikāpadavaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ธมฺมสงฺคณี-อนุฎีกา • Dhammasaṅgaṇī-anuṭīkā / สุตฺตนฺติกทุกมาติกาปทวณฺณนา • Suttantikadukamātikāpadavaṇṇanā
