| Library / Tipiṭaka / ਤਿਪਿਟਕ • Tipiṭaka / ਧਮ੍ਮਸਙ੍ਗਣੀ-ਮੂਲਟੀਕਾ • Dhammasaṅgaṇī-mūlaṭīkā |
ਸੁਤ੍ਤਨ੍ਤਿਕਦੁਕਮਾਤਿਕਾਪਦવਣ੍ਣਨਾ
Suttantikadukamātikāpadavaṇṇanā
੧੦੧-੧੦੮. વਿਜ੍ਜਾਰਾਸਨ੍ਤੋਗਧਧਮ੍ਮਾ વਿਜ੍ਜਾਸਭਾਗਤਾਯ ਤਦੇਕਦੇਸੇ વਿਜ੍ਜਾਕੋਟ੍ਠਾਸੇ વਤ੍ਤਨ੍ਤੀਤਿ વੁਤ੍ਤਾ। વਜਿਰਸ੍ਸ ਯਤ੍ਥ ਤਂ ਪਤਤਿ, ਤਤ੍ਥ ਅਭੇਜ੍ਜਂ ਨਾਮ ਕਿਞ੍ਚਿ ਮਣਿਪਾਸਾਣਾਦਿ ਨਤ੍ਥਿ, ਨ ਚ ਤੇਨ ਗਮਨਮਗ੍ਗੋ વਿਰੁਹਤਿ, ਏવਮੇવ ਅਰਹਤ੍ਤਮਗ੍ਗੇਨ ਯਤ੍ਥ ਸੋ ਉਪ੍ਪਜ੍ਜਤਿ, ਤਸ੍ਮਿਂ ਸਨ੍ਤਾਨੇ ਅਭੇਜ੍ਜੋ ਕਿਲੇਸੋ ਨਾਮ ਨਤ੍ਥਿ, ਨ ਚ ਭਿਨ੍ਨੋ ਪੁਨ વਿਰੁਹਤੀਤਿ વਜਿਰੁਪਮਤਾ વੇਦਿਤਬ੍ਬਾ। ਤਦੁਪਚਾਰੇਨ ਬਾਲਾ ਯਥਾ ‘‘ਮਞ੍ਚਾ ਘੋਸਨ੍ਤੀ’’ਤਿ। ਕਣ੍ਹਾਭਿਜਾਤੀਤਿ ਅਪਾਯਾ વੁਚ੍ਚਨ੍ਤਿ ਮਨੁਸ੍ਸੇਸੁ ਚ ਦੋਭਗ੍ਗਿਯਂ। ਤਪਨਸ੍ਸ વਾ ਦੁਕ੍ਖਸ੍ਸ ਹਿਤਾਤਿ ਤਪਨਿਯਾ।
101-108. Vijjārāsantogadhadhammā vijjāsabhāgatāya tadekadese vijjākoṭṭhāse vattantīti vuttā. Vajirassa yattha taṃ patati, tattha abhejjaṃ nāma kiñci maṇipāsāṇādi natthi, na ca tena gamanamaggo viruhati, evameva arahattamaggena yattha so uppajjati, tasmiṃ santāne abhejjo kileso nāma natthi, na ca bhinno puna viruhatīti vajirupamatā veditabbā. Tadupacārena bālā yathā ‘‘mañcā ghosantī’’ti. Kaṇhābhijātīti apāyā vuccanti manussesu ca dobhaggiyaṃ. Tapanassa vā dukkhassa hitāti tapaniyā.
ਦਾਸਾਦੀਸੁਪਿ ਸਿਰਿવਡ੍ਢਕਾਦਿਸਦ੍ਦਾ વਿਯ ਅਤਥਤ੍ਤਾ વਚਨਮਤ੍ਤਮੇવ ਅਧਿਕਾਰਂ ਕਤ੍વਾ ਪવਤ੍ਤਾ ਅਧਿવਚਨਾ। ਯਸ੍ਮਾ ਪਨ ਅਧਿવਚਨਨਿਰੁਤ੍ਤਿਪਞ੍ਞਤ੍ਤਿਪਦਾਨਿ ਸਮਾਨਤ੍ਥਾਨਿ, ਸਬ੍ਬਞ੍ਚ વਚਨਂ ਅਧਿવਚਨਾਦਿਭਾવਂ ਭਜਤਿ, ਤਸ੍ਮਾ ਤੇਸੁਪਿ વਚਨવਿਸੇਸੇਸੁ વਿਸੇਸੇਨ ਪવਤ੍ਤੇਹਿ ਅਧਿવਚਨਾਦਿਸਦ੍ਦੇਹਿ ਸਬ੍ਬਾਨਿ વਚਨਾਨਿ ਅਤ੍ਥਪ੍ਪਕਾਸਨਸਾਮਞ੍ਞੇਨ વੁਤ੍ਤਾਨੀਤਿ ਏਤੇਨਾਧਿਪ੍ਪਾਯੇਨ ਅਯਂ ਅਤ੍ਥਯੋਜਨਾ ਕਤਾਤਿ વੇਦਿਤਬ੍ਬਾ। ਅਥ વਾ ਅਧਿ-ਸਦ੍ਦੋ ਉਪਰਿਭਾਗੇ, ਉਪਰਿ વਚਨਂ ਅਧਿવਚਨਂ। ਕਸ੍ਸ ਉਪਰਿ? ਪਕਾਸੇਤਬ੍ਬਸ੍ਸ ਅਤ੍ਥਸ੍ਸਾਤਿ વਿਦਿਤੋવਾਯਮਤ੍ਥੋ। ਅਧੀਨਂ વਾ વਚਨਂ ਅਧਿવਚਨਂ। ਕੇਨ ਅਧੀਨਂ? ਅਤ੍ਥੇਨ। ਤਥਾ ਤਂਤਂਅਤ੍ਥਪ੍ਪਕਾਸਨੇ ਨਿਚ੍ਛਿਤਂ, ਨਿਯਤਂ વਾ વਚਨਂ ਨਿਰੁਤ੍ਤਿ। ਪਥવੀਧਾਤੁਪੁਰਿਸਾਦਿਤਂਤਂਪਕਾਰੇਨ ਞਾਪਨਤੋ ਪਞ੍ਞਤ੍ਤੀਤਿ ਏવਂ ਅਧਿવਚਨਾਦਿਪਦਾਨਂ ਸਬ੍ਬવਚਨੇਸੁ ਪવਤ੍ਤਿ વੇਦਿਤਬ੍ਬਾ। ਅਞ੍ਞਥਾ ਸਿਰਿવਡ੍ਢਕਧਨવਡ੍ਢਕਪ੍ਪਕਾਰਾਨਮੇવ ਅਭਿਲਾਪਾਨਂ ਅਧਿવਚਨਤਾ, ਅਭਿਸਙ੍ਖਰੋਨ੍ਤੀਤਿ ਏવਂਪਕਾਰਾਨਮੇવ ਨਿਦ੍ਧਾਰਣવਚਨਾਨਂ ਨਿਰੁਤ੍ਤਿਤਾ, ਤਕ੍ਕੋ વਿਤਕ੍ਕੋਤਿ ਏવਂਪਕਾਰਾਨਮੇવ ਏਕਮੇવਤ੍ਥਂ ਤੇਨ ਤੇਨ ਪਕਾਰੇਨ ਞਾਪੇਨ੍ਤਾਨਂ ਪਞ੍ਞਤ੍ਤਿਤਾ ਚ ਆਪਜ੍ਜੇਯ੍ਯਾਤਿ।
Dāsādīsupi sirivaḍḍhakādisaddā viya atathattā vacanamattameva adhikāraṃ katvā pavattā adhivacanā. Yasmā pana adhivacananiruttipaññattipadāni samānatthāni, sabbañca vacanaṃ adhivacanādibhāvaṃ bhajati, tasmā tesupi vacanavisesesu visesena pavattehi adhivacanādisaddehi sabbāni vacanāni atthappakāsanasāmaññena vuttānīti etenādhippāyena ayaṃ atthayojanā katāti veditabbā. Atha vā adhi-saddo uparibhāge, upari vacanaṃ adhivacanaṃ. Kassa upari? Pakāsetabbassa atthassāti viditovāyamattho. Adhīnaṃ vā vacanaṃ adhivacanaṃ. Kena adhīnaṃ? Atthena. Tathā taṃtaṃatthappakāsane nicchitaṃ, niyataṃ vā vacanaṃ nirutti. Pathavīdhātupurisāditaṃtaṃpakārena ñāpanato paññattīti evaṃ adhivacanādipadānaṃ sabbavacanesu pavatti veditabbā. Aññathā sirivaḍḍhakadhanavaḍḍhakappakārānameva abhilāpānaṃ adhivacanatā, abhisaṅkharontīti evaṃpakārānameva niddhāraṇavacanānaṃ niruttitā, takko vitakkoti evaṃpakārānameva ekamevatthaṃ tena tena pakārena ñāpentānaṃ paññattitā ca āpajjeyyāti.
੧੦੯-੧੧੮. ਫਸ੍ਸੋ વੇਦਨਾਤਿ ਸਬ੍ਬਦਾਪਿ ਅਰੂਪਧਮ੍ਮਾਨਂ ਫਸ੍ਸਾਦਿਨਾਮਕਤ੍ਤਾ ਪਥવਿਯਾਦੀਨਂ ਕੇਸਕੁਮ੍ਭਾਦਿਨਾਮਨ੍ਤਰਾਪਤ੍ਤਿ વਿਯ ਨਾਮਨ੍ਤਰਾਨਾਪਜ੍ਜਨਤੋ ਚ ਸਦਾ ਅਤ੍ਤਨਾવ ਕਤਨਾਮਤਾਯ ਚਤੁਕ੍ਖਨ੍ਧਨਿਬ੍ਬਾਨਾਨਿ ਨਾਮਕਰਣਟ੍ਠੇਨ ਨਾਮਂ। ਨਮਨਂ ਅવਿਨਾਭਾવਤੋ ਆਰਮ੍ਮਣਾਭਿਮੁਖਤਾ, ਨਮਨਹੇਤੁਭੂਤਤਾ ਨਾਮਨਂ। ਅਥ વਾ ਅਧਿવਚਨਸਮ੍ਫਸ੍ਸੋ વਿਯ ਅਧਿવਚਨਂ ਨਾਮਮਨ੍ਤਰੇਨ ਯੇ ਅਨੁਪਚਿਤਬੋਧਿਸਮ੍ਭਾਰਾਨਂ ਗਹਣਂ ਨ ਗਚ੍ਛਨ੍ਤਿ, ਤੇ ਨਾਮਾਯਤ੍ਤਗ੍ਗਹਣਾ ਨਾਮਂ। ਰੂਪਂ ਪਨ વਿਨਾਪਿ ਨਾਮਸਾਧਨਂ ਅਤ੍ਤਨੋ ਰੁਪ੍ਪਨਸਭਾવੇਨ ਗਹਣਂ ਉਪਯਾਤੀਤਿ ਰੂਪਂ।
109-118. Phasso vedanāti sabbadāpi arūpadhammānaṃ phassādināmakattā pathaviyādīnaṃ kesakumbhādināmantarāpatti viya nāmantarānāpajjanato ca sadā attanāva katanāmatāya catukkhandhanibbānāni nāmakaraṇaṭṭhena nāmaṃ. Namanaṃ avinābhāvato ārammaṇābhimukhatā, namanahetubhūtatā nāmanaṃ. Atha vā adhivacanasamphasso viya adhivacanaṃ nāmamantarena ye anupacitabodhisambhārānaṃ gahaṇaṃ na gacchanti, te nāmāyattaggahaṇā nāmaṃ. Rūpaṃ pana vināpi nāmasādhanaṃ attano ruppanasabhāvena gahaṇaṃ upayātīti rūpaṃ.
੧੧੯-੧੨੩. ਇਤੋ ਪੁਬ੍ਬੇ ਪਰਿਕਮ੍ਮਂ ਪવਤ੍ਤਂ, ਇਤੋ ਪਰਂ ਭવਙ੍ਗਂ, ਮਜ੍ਝੇ ਸਮਾਪਤ੍ਤੀਤਿ ਏવਂ ਸਮਾਪਤ੍ਤੀਨਂ ਅਪ੍ਪਨਾਪਰਿਚ੍ਛੇਦਪਞ੍ਞਾ ਸਮਾਪਤ੍ਤਿਕੁਸਲਤਾ। વੁਟ੍ਠਾਨੇ ਕੁਸਲਭਾવੋ ਪੁਬ੍ਬੇ વੁਟ੍ਠਾਨੇ ਪਰਿਚ੍ਛੇਦਕਰਣਞਾਣਂ। ਲਕ੍ਖਣਾਦਿવਸੇਨ ਅਨਿਚ੍ਚਾਦਿવਸੇਨ ਚ ਮਨਸਿ ਕਰਣਂ ਮਨਸਿਕਾਰੋ।
119-123. Ito pubbe parikammaṃ pavattaṃ, ito paraṃ bhavaṅgaṃ, majjhe samāpattīti evaṃ samāpattīnaṃ appanāparicchedapaññā samāpattikusalatā. Vuṭṭhāne kusalabhāvo pubbe vuṭṭhāne paricchedakaraṇañāṇaṃ. Lakkhaṇādivasena aniccādivasena ca manasi karaṇaṃ manasikāro.
੧੨੪-੧੩੪. ਸੁਚਿਸੀਲਤਾ ਸੋਰਚ੍ਚਂ। ਸਾ ਹਿ ਸੋਭਨਕਮ੍ਮਰਤਤਾਤਿ। ਸਮ੍ਮੋਦਕਸ੍ਸ, ਸਮ੍ਮੋਦਕੋ વਾ ਮੁਦੁਭਾવੋ ਸਮ੍ਮੋਦਕਮੁਦੁਭਾવੋ, ਸਣ੍ਹવਾਚਤਾ। ‘‘ਅਗੁਤ੍ਤਦ੍વਾਰਤਾ’’ਤਿ વੁਤ੍ਤੇ ਕੇਸੁ ਦ੍વਾਰੇਸੂਤਿ ਨ ਪਞ੍ਞਾਯਤੀਤਿ ‘‘ਇਨ੍ਦ੍ਰਿਯੇਸੂ’’ਤਿ વੁਤ੍ਤਂ। ਸਮ੍ਪਜਾਨਾਤੀਤਿ ਸਮ੍ਪਜਾਨੋ, ਤਸ੍ਸ ਭਾવੋ ਸਮ੍ਪਜਞ੍ਞਂ। ਤਦਪਿ ਞਾਣਂ ਯਸ੍ਮਾ ਸਮ੍ਪਜਾਨਾਤਿ, ਤਸ੍ਮਾ ‘‘ਸਮ੍ਪਜਾਨਾਤੀਤਿ ਸਮ੍ਪਜਞ੍ਞ’’ਨ੍ਤਿ ਆਹ। ਅਪ੍ਪਟਿਸਙ੍ਖਾਨੇ ਨਿਮਿਤ੍ਤੇ વਿਸਯੇ વਾ। વੀਰਿਯਸੀਸੇਨਾਤਿ વੀਰਿਯਪਾਮੋਕ੍ਖੇਨ। ਉਪ੍ਪਨ੍ਨਂ ਬਲਨ੍ਤਿ વੀਰਿਯੋਪਤ੍ਥਮ੍ਭੇਨ ਹਿ ਕੁਸਲਭਾવਨਾ ਬਲવਤੀ ਥਿਰਾ ਉਪ੍ਪਜ੍ਜਤੀਤਿ ਤਥਾ ਉਪ੍ਪਨ੍ਨਾ ਬਲવਤੀ ਕੁਸਲਭਾવਨਾ ਬਲવਨ੍ਤੋ ਸਤ੍ਤ ਬੋਜ੍ਝਙ੍ਗਾਤਿਪਿ વੁਚ੍ਚਨ੍ਤਿ। ਕਸਿਣਨਿਮਿਤ੍ਤਂ વਿਯ ਸਞ੍ਞਾਣਂ વਿਯ ਸવਿਗ੍ਗਹਂ વਿਯ ਚ ਸੁਟ੍ਠੁ ਉਪਲਕ੍ਖੇਤਬ੍ਬਾਕਾਰਂ ‘‘ਨਿਮਿਤ੍ਤ’’ਨ੍ਤਿ વੁਚ੍ਚਤਿ। ਸਮਥੋ ਚ ਏવਂ ਆਕਾਰੋਤਿ ‘‘ਨਿਮਿਤ੍ਤ’’ਨ੍ਤਿ વੁਤ੍ਤੋ। ਤਥਾ ਹਿ ਸੋ ਪਚ੍ਚવੇਕ੍ਖਨ੍ਤੇਨ ਪਚ੍ਚવੇਕ੍ਖਣਤੋ ਗਯ੍ਹਤੀਤਿ। ਉਦ੍ਧਚ੍ਚਮਿવ ਚਿਤ੍ਤਂ ਨ વਿਕ੍ਖਿਪਤੀਤਿ, વਿਕ੍ਖੇਪਪਟਿਕ੍ਖੇਪੋ વਾ ਅવਿਕ੍ਖੇਪੋ।
124-134. Sucisīlatā soraccaṃ. Sā hi sobhanakammaratatāti. Sammodakassa, sammodako vā mudubhāvo sammodakamudubhāvo, saṇhavācatā. ‘‘Aguttadvāratā’’ti vutte kesu dvāresūti na paññāyatīti ‘‘indriyesū’’ti vuttaṃ. Sampajānātīti sampajāno, tassa bhāvo sampajaññaṃ. Tadapi ñāṇaṃ yasmā sampajānāti, tasmā ‘‘sampajānātīti sampajañña’’nti āha. Appaṭisaṅkhāne nimitte visaye vā. Vīriyasīsenāti vīriyapāmokkhena. Uppannaṃ balanti vīriyopatthambhena hi kusalabhāvanā balavatī thirā uppajjatīti tathā uppannā balavatī kusalabhāvanā balavanto satta bojjhaṅgātipi vuccanti. Kasiṇanimittaṃ viya saññāṇaṃ viya saviggahaṃ viya ca suṭṭhu upalakkhetabbākāraṃ ‘‘nimitta’’nti vuccati. Samatho ca evaṃ ākāroti ‘‘nimitta’’nti vutto. Tathā hi so paccavekkhantena paccavekkhaṇato gayhatīti. Uddhaccamiva cittaṃ na vikkhipatīti, vikkhepapaṭikkhepo vā avikkhepo.
੧੩੫-੧੪੨. ਸੀਲਮੇવ ਪੁਨਪ੍ਪੁਨਂ ਆਸੇવਿਯਮਾਨਂ ਲੋਕਿਯਂ ਲੋਕੁਤ੍ਤਰਮ੍ਪਿ ਸੀਲਂ ਪਰਿਪੂਰੇਤੀਤਿ ‘‘ਸੀਲਪਰਿਪੂਰਣਤੋ’’ਤਿ વੁਤ੍ਤਂ। ਸੀਲਸ੍ਸ ਸਮ੍ਪਦਾਤਿ ਕਾਰਣਸੀਲਮ੍ਪਿ ਫਲਸੀਲਮ੍ਪਿ ਸਮ੍ਪਨ੍ਨਸਮੁਦਾਯਸ੍ਸ ਏਕਦੇਸવਸੇਨ વੁਤ੍ਤਂ। ਅਥ વਾ ‘‘ਕਤਮੇ ਚ ਥਪਤਿ ਅਕੁਸਲਾ ਸੀਲਾ? ਅਕੁਸਲਂ ਕਾਯਕਮ੍ਮਂ ਅਕੁਸਲਂ વਚੀਕਮ੍ਮਂ ਪਾਪਕੋ ਆਜੀવੋ’’ਤਿ (ਮ॰ ਨਿ॰ ੨.੨੬੪) વੁਤ੍ਤਤ੍ਤਾ ਸਬ੍ਬਮ੍ਪਿ ਕੁਸਲਾਕੁਸਲਂ ‘‘ਸੀਲ’’ਨ੍ਤਿ ਗਹੇਤ੍વਾ ਤਤ੍ਥ ਕੁਸਲਸੀਲਂ ਨਿਦ੍ਧਾਰੇਤ੍વਾ ‘‘ਸੀਲਸਮ੍ਪਦਾ’’ਤਿ વੁਤ੍ਤਂ। ਏવਂ ਦਿਟ੍ਠਿਸਮ੍ਪਦਾਪਿ વੇਦਿਤਬ੍ਬਾ।
135-142. Sīlameva punappunaṃ āseviyamānaṃ lokiyaṃ lokuttarampi sīlaṃ paripūretīti ‘‘sīlaparipūraṇato’’ti vuttaṃ. Sīlassa sampadāti kāraṇasīlampi phalasīlampi sampannasamudāyassa ekadesavasena vuttaṃ. Atha vā ‘‘katame ca thapati akusalā sīlā? Akusalaṃ kāyakammaṃ akusalaṃ vacīkammaṃ pāpako ājīvo’’ti (ma. ni. 2.264) vuttattā sabbampi kusalākusalaṃ ‘‘sīla’’nti gahetvā tattha kusalasīlaṃ niddhāretvā ‘‘sīlasampadā’’ti vuttaṃ. Evaṃ diṭṭhisampadāpi veditabbā.
ਦਿਟ੍ਠਿવਿਸੁਦ੍ਧਿ ਖੋ ਪਨ ਯਥਾਦਿਟ੍ਠਿਸ੍ਸ ਚ ਪਧਾਨਨ੍ਤਿ ਕਮ੍ਮਸ੍ਸਕਤਞਾਣਾਦਿਸਙ੍ਖਾਤਾ ਦਿਟ੍ਠਿવਿਸੁਦ੍ਧਿ ਚੇવਾਤਿ ਪਟਿਪਾਟਿਯਾ ਦਿਟ੍ਠਿવਿਸੁਦ੍ਧਿ ਦਿਟ੍ਠਿવਿਸੁਦ੍ਧਿ ਖੋ ਪਨਾਤਿ ਚ ਪਦਦ੍વਯਸ੍ਸ ਸਮਾਨਤ੍ਤਾ ਪਞ੍ਞਾ। ਯਥਾਦਿਟ੍ਠਿਸ੍ਸਾਤਿ ਨਿਬ੍ਬਤ੍ਤਿਤਪ੍ਪਕਾਰਦਿਟ੍ਠਿਸ੍ਸ ਨਿਬ੍ਬਤ੍ਤੇਤਬ੍ਬਪਧਾਨਾਨੁਰੂਪਦਿਟ੍ਠਿਸ੍ਸ વਾ ਯਥਾਦਿਟ੍ਠਿਪવਤ੍ਤਕਿਰਿਯਸ੍ਸ વਾ। ਸਂવੇਗੋਤਿ ਸਹੋਤ੍ਤਪ੍ਪਂ ਞਾਣਂ, ਓਤ੍ਤਪ੍ਪਮੇવ વਾ। ਸਮਤ੍ਤਂ ਤੁਸ੍ਸਨਂ ਤਿਤ੍ਤਿ ਸਨ੍ਤੁਟ੍ਠਿ, ਨਤ੍ਥਿ ਏਤਸ੍ਸ ਸਨ੍ਤੁਟ੍ਠੀਤਿ ਅਸਨ੍ਤੁਟ੍ਠਿ, ਅਸਨ੍ਤੁਟ੍ਠਿਸ੍ਸ ਭਾવੋ ਅਸਨ੍ਤੁਟ੍ਠਿਤਾ। વੀਰਿਯਪ੍ਪવਾਹੇ ਪવਤ੍ਤਮਾਨੇ ਅਨ੍ਤਰਾ ਏવ ਪਟਿਗਮਨਂ ਨਿવਤ੍ਤਨਂ ਪਟਿવਾਨਂ, ਤਂ ਅਸ੍ਸ ਅਤ੍ਥੀਤਿ ਪਟਿવਾਨੀ , ਨ ਪਟਿવਾਨੀ ਅਪ੍ਪਟਿવਾਨੀ, ਤਸ੍ਸ ਭਾવੋ ਅਪ੍ਪਟਿવਾਨਿਤਾ। વਿਮੁਚ੍ਚਨਂ ਨਾਮ ਆਰਮ੍ਮਣੇ ਅਧਿਮੁਤ੍ਤਤਾ ਕਿਲੇਸੇਹਿ ਸਬ੍ਬਸਙ੍ਖਾਰੇਹਿ ਚ ਨਿਸ੍ਸਟਤਾ ਚ। ਪਟਿਸਨ੍ਧਿવਸੇਨਾਤਿ ਕਿਲੇਸਾਨਂ ਤਂਤਂਮਗ੍ਗવਜ੍ਝਾਨਂ ਉਪ੍ਪਨ੍ਨਮਗ੍ਗੇ ਖਨ੍ਧਸਨ੍ਤਾਨੇ ਪੁਨ ਸਂਦਹਨવਸੇਨ। ਅਨੁਪ੍ਪਾਦਭੂਤੇਤਿ ਤਂਤਂਫਲੇ। ਅਨੁਪ੍ਪਾਦਪਰਿਯੋਸਾਨੇਤਿ ਅਨੁਪ੍ਪਾਦਕਰੋ ਮਗ੍ਗੋ ਅਨੁਪ੍ਪਾਦੋ, ਤਸ੍ਸ ਪਰਿਯੋਸਾਨੇ।
Diṭṭhivisuddhi kho pana yathādiṭṭhissa ca padhānanti kammassakatañāṇādisaṅkhātā diṭṭhivisuddhi cevāti paṭipāṭiyā diṭṭhivisuddhi diṭṭhivisuddhi kho panāti ca padadvayassa samānattā paññā. Yathādiṭṭhissāti nibbattitappakāradiṭṭhissa nibbattetabbapadhānānurūpadiṭṭhissa vā yathādiṭṭhipavattakiriyassa vā. Saṃvegoti sahottappaṃ ñāṇaṃ, ottappameva vā. Samattaṃ tussanaṃ titti santuṭṭhi, natthi etassa santuṭṭhīti asantuṭṭhi, asantuṭṭhissa bhāvo asantuṭṭhitā. Vīriyappavāhe pavattamāne antarā eva paṭigamanaṃ nivattanaṃ paṭivānaṃ, taṃ assa atthīti paṭivānī , na paṭivānī appaṭivānī, tassa bhāvo appaṭivānitā. Vimuccanaṃ nāma ārammaṇe adhimuttatā kilesehi sabbasaṅkhārehi ca nissaṭatā ca. Paṭisandhivasenāti kilesānaṃ taṃtaṃmaggavajjhānaṃ uppannamagge khandhasantāne puna saṃdahanavasena. Anuppādabhūteti taṃtaṃphale. Anuppādapariyosāneti anuppādakaro maggo anuppādo, tassa pariyosāne.
ਸੁਤ੍ਤਨ੍ਤਿਕਦੁਕਮਾਤਿਕਾਪਦવਣ੍ਣਨਾ ਨਿਟ੍ਠਿਤਾ।
Suttantikadukamātikāpadavaṇṇanā niṭṭhitā.
ਦੁਕਮਾਤਿਕਾਪਦવਣ੍ਣਨਾ ਨਿਟ੍ਠਿਤਾ।
Dukamātikāpadavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਧਮ੍ਮਸਙ੍ਗਣੀਪਾਲ਼ਿ • Dhammasaṅgaṇīpāḷi / ਸੁਤ੍ਤਨ੍ਤਿਕਦੁਕਮਾਤਿਕਾ • Suttantikadukamātikā
ਅਟ੍ਠਕਥਾ • Aṭṭhakathā / ਅਭਿਧਮ੍ਮਪਿਟਕ (ਅਟ੍ਠਕਥਾ) • Abhidhammapiṭaka (aṭṭhakathā) / ਧਮ੍ਮਸਙ੍ਗਣਿ-ਅਟ੍ਠਕਥਾ • Dhammasaṅgaṇi-aṭṭhakathā / ਸੁਤ੍ਤਨ੍ਤਿਕਦੁਕਮਾਤਿਕਾਪਦવਣ੍ਣਨਾ • Suttantikadukamātikāpadavaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਧਮ੍ਮਸਙ੍ਗਣੀ-ਅਨੁਟੀਕਾ • Dhammasaṅgaṇī-anuṭīkā / ਸੁਤ੍ਤਨ੍ਤਿਕਦੁਕਮਾਤਿਕਾਪਦવਣ੍ਣਨਾ • Suttantikadukamātikāpadavaṇṇanā
