| Library / Tipiṭaka / तिपिटक • Tipiṭaka / पेतवत्थुपाळि • Petavatthupāḷi |
११. सुत्तपेतवत्थु
11. Suttapetavatthu
३४१.
341.
‘‘अहं पुरे पब्बजितस्स भिक्खुनो, सुत्तं अदासिं उपसङ्कम्म याचिता।
‘‘Ahaṃ pure pabbajitassa bhikkhuno, suttaṃ adāsiṃ upasaṅkamma yācitā;
तस्स विपाको विपुलफलूपलब्भति, बहुका च मे उप्पज्जरे 1 वत्थकोटियो॥
Tassa vipāko vipulaphalūpalabbhati, bahukā ca me uppajjare 2 vatthakoṭiyo.
३४२.
342.
‘‘पुप्फाभिकिण्णं रमितं 3 विमानं, अनेकचित्तं नरनारिसेवितं।
‘‘Pupphābhikiṇṇaṃ ramitaṃ 4 vimānaṃ, anekacittaṃ naranārisevitaṃ;
साहं भुञ्जामि च पारुपामि च, पहूतवित्ता न च ताव खीयति॥
Sāhaṃ bhuñjāmi ca pārupāmi ca, pahūtavittā na ca tāva khīyati.
३४३.
343.
‘‘तस्सेव कम्मस्स विपाकमन्वया, सुखञ्च सातञ्च इधूपलब्भति।
‘‘Tasseva kammassa vipākamanvayā, sukhañca sātañca idhūpalabbhati;
साहं गन्त्वा पुनदेव मानुसं, काहामि पुञ्ञानि नयय्यपुत्त म’’न्ति॥
Sāhaṃ gantvā punadeva mānusaṃ, kāhāmi puññāni nayayyaputta ma’’nti.
३४४.
344.
‘‘सत्त तुवं वस्ससता इधागता,
‘‘Satta tuvaṃ vassasatā idhāgatā,
जिण्णा च वुड्ढा च तहिं भविस्ससि।
Jiṇṇā ca vuḍḍhā ca tahiṃ bhavissasi;
सब्बेव ते कालकता च ञातका,
Sabbeva te kālakatā ca ñātakā,
किं तत्थ गन्त्वान इतो करिस्ससी’’ति॥
Kiṃ tattha gantvāna ito karissasī’’ti.
३४५.
345.
‘‘सत्तेव वस्सानि इधागताय मे, दिब्बञ्च सुखञ्च समप्पिताय।
‘‘Satteva vassāni idhāgatāya me, dibbañca sukhañca samappitāya;
साहं गन्त्वान पुनदेव मानुसं, काहामि पुञ्ञानि नयय्यपुत्त म’’न्ति॥
Sāhaṃ gantvāna punadeva mānusaṃ, kāhāmi puññāni nayayyaputta ma’’nti.
३४६.
346.
सो तं गहेत्वान पसय्ह बाहायं, पच्चानयित्वान थेरिं सुदुब्बलं।
So taṃ gahetvāna pasayha bāhāyaṃ, paccānayitvāna theriṃ sudubbalaṃ;
‘‘वज्जेसि अञ्ञम्पि जनं इधागतं, ‘करोथ पुञ्ञानि सुखूपलब्भति’’॥
‘‘Vajjesi aññampi janaṃ idhāgataṃ, ‘karotha puññāni sukhūpalabbhati’’.
३४७.
347.
‘‘दिट्ठा मया अकतेन साधुना, पेता विहञ्ञन्ति तथेव मनुस्सा।
‘‘Diṭṭhā mayā akatena sādhunā, petā vihaññanti tatheva manussā;
कम्मञ्च कत्वा सुखवेदनीयं, देवा मनुस्सा च सुखे ठिता पजा’’ति॥
Kammañca katvā sukhavedanīyaṃ, devā manussā ca sukhe ṭhitā pajā’’ti.
सुत्तपेतवत्थु एकादसमं।
Suttapetavatthu ekādasamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पेतवत्थु-अट्ठकथा • Petavatthu-aṭṭhakathā / ११. सुत्तपेतवत्थुवण्णना • 11. Suttapetavatthuvaṇṇanā
