| Library / Tipiṭaka / ತಿಪಿಟಕ • Tipiṭaka / ಪೇತವತ್ಥುಪಾಳಿ • Petavatthupāḷi |
೧೧. ಸುತ್ತಪೇತವತ್ಥು
11. Suttapetavatthu
೩೪೧.
341.
‘‘ಅಹಂ ಪುರೇ ಪಬ್ಬಜಿತಸ್ಸ ಭಿಕ್ಖುನೋ, ಸುತ್ತಂ ಅದಾಸಿಂ ಉಪಸಙ್ಕಮ್ಮ ಯಾಚಿತಾ।
‘‘Ahaṃ pure pabbajitassa bhikkhuno, suttaṃ adāsiṃ upasaṅkamma yācitā;
ತಸ್ಸ ವಿಪಾಕೋ ವಿಪುಲಫಲೂಪಲಬ್ಭತಿ, ಬಹುಕಾ ಚ ಮೇ ಉಪ್ಪಜ್ಜರೇ 1 ವತ್ಥಕೋಟಿಯೋ॥
Tassa vipāko vipulaphalūpalabbhati, bahukā ca me uppajjare 2 vatthakoṭiyo.
೩೪೨.
342.
‘‘ಪುಪ್ಫಾಭಿಕಿಣ್ಣಂ ರಮಿತಂ 3 ವಿಮಾನಂ, ಅನೇಕಚಿತ್ತಂ ನರನಾರಿಸೇವಿತಂ।
‘‘Pupphābhikiṇṇaṃ ramitaṃ 4 vimānaṃ, anekacittaṃ naranārisevitaṃ;
ಸಾಹಂ ಭುಞ್ಜಾಮಿ ಚ ಪಾರುಪಾಮಿ ಚ, ಪಹೂತವಿತ್ತಾ ನ ಚ ತಾವ ಖೀಯತಿ॥
Sāhaṃ bhuñjāmi ca pārupāmi ca, pahūtavittā na ca tāva khīyati.
೩೪೩.
343.
‘‘ತಸ್ಸೇವ ಕಮ್ಮಸ್ಸ ವಿಪಾಕಮನ್ವಯಾ, ಸುಖಞ್ಚ ಸಾತಞ್ಚ ಇಧೂಪಲಬ್ಭತಿ।
‘‘Tasseva kammassa vipākamanvayā, sukhañca sātañca idhūpalabbhati;
ಸಾಹಂ ಗನ್ತ್ವಾ ಪುನದೇವ ಮಾನುಸಂ, ಕಾಹಾಮಿ ಪುಞ್ಞಾನಿ ನಯಯ್ಯಪುತ್ತ ಮ’’ನ್ತಿ॥
Sāhaṃ gantvā punadeva mānusaṃ, kāhāmi puññāni nayayyaputta ma’’nti.
೩೪೪.
344.
‘‘ಸತ್ತ ತುವಂ ವಸ್ಸಸತಾ ಇಧಾಗತಾ,
‘‘Satta tuvaṃ vassasatā idhāgatā,
ಜಿಣ್ಣಾ ಚ ವುಡ್ಢಾ ಚ ತಹಿಂ ಭವಿಸ್ಸಸಿ।
Jiṇṇā ca vuḍḍhā ca tahiṃ bhavissasi;
ಸಬ್ಬೇವ ತೇ ಕಾಲಕತಾ ಚ ಞಾತಕಾ,
Sabbeva te kālakatā ca ñātakā,
ಕಿಂ ತತ್ಥ ಗನ್ತ್ವಾನ ಇತೋ ಕರಿಸ್ಸಸೀ’’ತಿ॥
Kiṃ tattha gantvāna ito karissasī’’ti.
೩೪೫.
345.
‘‘ಸತ್ತೇವ ವಸ್ಸಾನಿ ಇಧಾಗತಾಯ ಮೇ, ದಿಬ್ಬಞ್ಚ ಸುಖಞ್ಚ ಸಮಪ್ಪಿತಾಯ।
‘‘Satteva vassāni idhāgatāya me, dibbañca sukhañca samappitāya;
ಸಾಹಂ ಗನ್ತ್ವಾನ ಪುನದೇವ ಮಾನುಸಂ, ಕಾಹಾಮಿ ಪುಞ್ಞಾನಿ ನಯಯ್ಯಪುತ್ತ ಮ’’ನ್ತಿ॥
Sāhaṃ gantvāna punadeva mānusaṃ, kāhāmi puññāni nayayyaputta ma’’nti.
೩೪೬.
346.
ಸೋ ತಂ ಗಹೇತ್ವಾನ ಪಸಯ್ಹ ಬಾಹಾಯಂ, ಪಚ್ಚಾನಯಿತ್ವಾನ ಥೇರಿಂ ಸುದುಬ್ಬಲಂ।
So taṃ gahetvāna pasayha bāhāyaṃ, paccānayitvāna theriṃ sudubbalaṃ;
‘‘ವಜ್ಜೇಸಿ ಅಞ್ಞಮ್ಪಿ ಜನಂ ಇಧಾಗತಂ, ‘ಕರೋಥ ಪುಞ್ಞಾನಿ ಸುಖೂಪಲಬ್ಭತಿ’’॥
‘‘Vajjesi aññampi janaṃ idhāgataṃ, ‘karotha puññāni sukhūpalabbhati’’.
೩೪೭.
347.
‘‘ದಿಟ್ಠಾ ಮಯಾ ಅಕತೇನ ಸಾಧುನಾ, ಪೇತಾ ವಿಹಞ್ಞನ್ತಿ ತಥೇವ ಮನುಸ್ಸಾ।
‘‘Diṭṭhā mayā akatena sādhunā, petā vihaññanti tatheva manussā;
ಕಮ್ಮಞ್ಚ ಕತ್ವಾ ಸುಖವೇದನೀಯಂ, ದೇವಾ ಮನುಸ್ಸಾ ಚ ಸುಖೇ ಠಿತಾ ಪಜಾ’’ತಿ॥
Kammañca katvā sukhavedanīyaṃ, devā manussā ca sukhe ṭhitā pajā’’ti.
ಸುತ್ತಪೇತವತ್ಥು ಏಕಾದಸಮಂ।
Suttapetavatthu ekādasamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪೇತವತ್ಥು-ಅಟ್ಠಕಥಾ • Petavatthu-aṭṭhakathā / ೧೧. ಸುತ್ತಪೇತವತ್ಥುವಣ್ಣನಾ • 11. Suttapetavatthuvaṇṇanā
