| Library / Tipiṭaka / д̇ибидага • Tipiṭaka / бзд̇авад̇т̇у-адтагат̇аа • Petavatthu-aṭṭhakathā |
11. суд̇д̇абзд̇авад̇т̇уван̣н̣анаа
11. Suttapetavatthuvaṇṇanā
ахам̣ бурз баб̣б̣аж̇ид̇асса бхигкунод̇и ид̣̇ам̣ суд̇д̇абзд̇авад̇т̇у. д̇асса гаа уббад̇д̇и? саавад̇т̇ияаа гира авид̣̇уурз ан̃н̃ад̇арасмим̣ г̇аамагз амхаагам̣ сад̇т̇ари ануббаннзязва сад̇д̇аннам̣ вассасад̇аанам̣ убари ан̃н̃ад̇аро д̣̇аараго згам̣ бажжзгаб̣уд̣̇д̇хам̣ убадтахи. д̇асса маад̇аа д̇асмим̣ ваяаббад̇д̇з д̇ассад̇т̇ааяа самаанагулад̇о ан̃н̃ад̇арам̣ гулад̇хийд̇арам̣ аанзси. виваахад̣̇ивасзязва жа со гумааро сахааязхи сад̣̇д̇хим̣ нхааяид̇ум̣ г̇ад̇о ахинаа д̣̇адто гааламагааси, ‘‘яагкаг̇аахзнаа’’д̇иби вад̣̇анд̇и. со бажжзгаб̣уд̣̇д̇хасса убадтаанзна б̣ахум̣ гусалагаммам̣ гад̇ваа тид̇оби д̇ассаа д̣̇ааригааяа бадиб̣ад̣̇д̇хажид̇д̇ад̇ааяа вимаанабзд̇о худ̇ваа ниб̣б̣ад̇д̇и, махид̣̇д̇хиго бана ахоси махаанубхааво.
Ahaṃ pure pabbajitassa bhikkhunoti idaṃ suttapetavatthu. Tassa kā uppatti? Sāvatthiyā kira avidūre aññatarasmiṃ gāmake amhākaṃ satthari anuppanneyeva sattannaṃ vassasatānaṃ upari aññataro dārako ekaṃ paccekabuddhaṃ upaṭṭhahi. Tassa mātā tasmiṃ vayappatte tassatthāya samānakulato aññataraṃ kuladhītaraṃ ānesi. Vivāhadivaseyeva ca so kumāro sahāyehi saddhiṃ nhāyituṃ gato ahinā daṭṭho kālamakāsi, ‘‘yakkhagāhenā’’tipi vadanti. So paccekabuddhassa upaṭṭhānena bahuṃ kusalakammaṃ katvā ṭhitopi tassā dārikāya paṭibaddhacittatāya vimānapeto hutvā nibbatti, mahiddhiko pana ahosi mahānubhāvo.
ат̇а со д̇ам̣ д̣̇ааригам̣ ад̇д̇ано вимаанам̣ нзд̇угаамо ‘‘гзна ну ко убааязна зсаа д̣̇идтад̇хаммавзд̣̇анийяагаммам̣ гад̇ваа маяаа сад̣̇д̇хим̣ ид̇ха абхирамзяяаа’’д̇и д̇ассаа д̣̇иб̣б̣абхог̇асамбад̇д̇ияаа анубхаванахзд̇ум̣ виймам̣санд̇о бажжзгаб̣уд̣̇д̇хам̣ жийварагаммам̣ гаронд̇ам̣ д̣̇исваа мануссаруубзна г̇анд̇ваа ванд̣̇ид̇ваа ‘‘гим̣, бханд̇з, суд̇д̇агзна ад̇т̇о ад̇т̇ий’’д̇и ааха. ‘‘жийварагаммам̣ гароми, убаасагаа’’д̇и. ‘‘д̇зна хи, бханд̇з, асугасмим̣ таанз суд̇д̇абхигкам̣ жарат̇аа’’д̇и д̇ассаа д̣̇ааригааяа г̇зхам̣ д̣̇ассзси. бажжзгаб̣уд̣̇д̇хо д̇ад̇т̇а г̇анд̇ваа гхарад̣̇ваарз адтааси. ат̇а саа бажжзгаб̣уд̣̇д̇хам̣ д̇ад̇т̇а тид̇ам̣ д̣̇исваа басаннамаанасаа ‘‘суд̇д̇агзна мз аяяо ад̇т̇иго’’д̇и н̃ад̇ваа згам̣ суд̇д̇аг̇ул̣ам̣ ад̣̇ааси. ат̇а со амануссо мануссаруубзна д̇асса д̣̇ааригааяа гхарам̣ г̇анд̇ваа д̇ассаа маад̇арам̣ яаажид̇ваа д̇ааяа сад̣̇д̇хим̣ гад̇ибаахам̣ васид̇ваа д̇ассаа маад̇уяаа ануг̇г̇ахад̇т̇ам̣ д̇асмим̣ г̇зхз саб̣б̣абхааж̇анаани хиран̃н̃асуван̣н̣асса буурзд̇ваа саб̣б̣ад̇т̇а убари наамам̣ лики ‘‘ид̣̇ам̣ д̣̇звад̣̇ад̇д̇ияам̣ д̇ханам̣ на гзнажи г̇ахзд̇аб̣б̣а’’нд̇и, д̇ан̃жа д̣̇ааригам̣ г̇ахзд̇ваа ад̇д̇ано вимаанам̣ аг̇амааси. д̇ассаа маад̇аа бахууд̇ам̣ д̇ханам̣ лабхид̇ваа ад̇д̇ано н̃аад̇агаанам̣ габан̣ад̣̇д̇хигаад̣̇инан̃жа д̣̇ад̇ваа ад̇д̇анаа жа барибхун̃ж̇ид̇ваа гаалам̣ гаронд̇ий ‘‘мама д̇хийд̇аа ааг̇ажчад̇и жз, ид̣̇ам̣ д̇ханам̣ д̣̇ассзт̇аа’’д̇и н̃аад̇агаанам̣ гат̇зд̇ваа гааламагааси.
Atha so taṃ dārikaṃ attano vimānaṃ netukāmo ‘‘kena nu kho upāyena esā diṭṭhadhammavedanīyakammaṃ katvā mayā saddhiṃ idha abhirameyyā’’ti tassā dibbabhogasampattiyā anubhavanahetuṃ vīmaṃsanto paccekabuddhaṃ cīvarakammaṃ karontaṃ disvā manussarūpena gantvā vanditvā ‘‘kiṃ, bhante, suttakena attho atthī’’ti āha. ‘‘Cīvarakammaṃ karomi, upāsakā’’ti. ‘‘Tena hi, bhante, asukasmiṃ ṭhāne suttabhikkhaṃ carathā’’ti tassā dārikāya gehaṃ dassesi. Paccekabuddho tattha gantvā gharadvāre aṭṭhāsi. Atha sā paccekabuddhaṃ tattha ṭhitaṃ disvā pasannamānasā ‘‘suttakena me ayyo atthiko’’ti ñatvā ekaṃ suttaguḷaṃ adāsi. Atha so amanusso manussarūpena tassa dārikāya gharaṃ gantvā tassā mātaraṃ yācitvā tāya saddhiṃ katipāhaṃ vasitvā tassā mātuyā anuggahatthaṃ tasmiṃ gehe sabbabhājanāni hiraññasuvaṇṇassa pūretvā sabbattha upari nāmaṃ likhi ‘‘idaṃ devadattiyaṃ dhanaṃ na kenaci gahetabba’’nti, tañca dārikaṃ gahetvā attano vimānaṃ agamāsi. Tassā mātā pahūtaṃ dhanaṃ labhitvā attano ñātakānaṃ kapaṇaddhikādinañca datvā attanā ca paribhuñjitvā kālaṃ karontī ‘‘mama dhītā āgacchati ce, idaṃ dhanaṃ dassethā’’ti ñātakānaṃ kathetvā kālamakāsi.
д̇ад̇о сад̇д̇аннам̣ вассасад̇аанам̣ ажжаязна амхаагам̣ бхаг̇авад̇и логз уббаж̇ж̇ид̇ваа бавад̇д̇ид̇аварад̇хаммажаггз ануггамзна саавад̇т̇ияам̣ вихаранд̇з д̇ассаа ид̇т̇ияаа д̇зна амануссзна сад̣̇д̇хим̣ васанд̇ияаа угган̣таа уббаж̇ж̇и. саа д̇ам̣ ‘‘саад̇ху, аяяабуд̇д̇а, мам̣ саган̃н̃зва г̇зхам̣ бадинзхий’’д̇и вад̣̇анд̇ий –
Tato sattannaṃ vassasatānaṃ accayena amhākaṃ bhagavati loke uppajjitvā pavattitavaradhammacakke anukkamena sāvatthiyaṃ viharante tassā itthiyā tena amanussena saddhiṃ vasantiyā ukkaṇṭhā uppajji. Sā taṃ ‘‘sādhu, ayyaputta, maṃ sakaññeva gehaṃ paṭinehī’’ti vadantī –
341.
341.
‘‘ахам̣ бурз баб̣б̣аж̇ид̇асса бхигкуно,
‘‘Ahaṃ pure pabbajitassa bhikkhuno,
суд̇д̇ам̣ ад̣̇аасим̣ убасан̇гамма яаажид̇аа;
Suttaṃ adāsiṃ upasaṅkamma yācitā;
д̇асса вибааго вибулапалуубалаб̣бхад̇и,
Tassa vipāko vipulaphalūpalabbhati,
б̣ахугаа жа мз уббаж̇ж̇арз вад̇т̇агодияо.
Bahukā ca me uppajjare vatthakoṭiyo.
342.
342.
‘‘бубпаабхигин̣н̣ам̣ рамид̇ам̣ вимаанам̣, анзгажид̇д̇ам̣ наранаарисзвид̇ам̣;
‘‘Pupphābhikiṇṇaṃ ramitaṃ vimānaṃ, anekacittaṃ naranārisevitaṃ;
саахам̣ бхун̃ж̇аами жа баарубаами жа, бахууд̇авид̇д̇аа на жа д̇аава кийяад̇и.
Sāhaṃ bhuñjāmi ca pārupāmi ca, pahūtavittā na ca tāva khīyati.
343.
343.
‘‘д̇ассзва гаммасса вибаагаманваяаа, сукан̃жа саад̇ан̃жа ид̇хуубалаб̣бхад̇и;
‘‘Tasseva kammassa vipākamanvayā, sukhañca sātañca idhūpalabbhati;
саахам̣ г̇анд̇ваа бунад̣̇зва маанусам̣, гаахаами бун̃н̃аани наяаяяабуд̇д̇а ма’’нд̇и. –
Sāhaṃ gantvā punadeva mānusaṃ, kāhāmi puññāni nayayyaputta ma’’nti. –
имаа г̇аат̇аа абхааси.
Imā gāthā abhāsi.
341. д̇ад̇т̇а ‘‘баб̣б̣аж̇ид̇асса бхигкуно’’д̇и ид̣̇ам̣ бажжзгаб̣уд̣̇д̇хам̣ сад̣̇д̇хааяа вуд̇д̇ам̣. со хи гаамаад̣̇ималаанам̣ ад̇д̇ано санд̇аанад̇о анавасзсад̇о баб̣б̣ааж̇ид̇ад̇д̇аа бахийнад̇д̇аа барамад̇т̇ад̇о ‘‘баб̣б̣аж̇ид̇о’’д̇и, бхиннагилзсад̇д̇аа ‘‘бхигкуу’’д̇и жа вад̇д̇аб̣б̣ад̇ам̣ арахад̇и. суд̇д̇анд̇и габбаасияасуд̇д̇ам̣. убасан̇гаммаад̇и маяхам̣ г̇зхам̣ убасан̇гамид̇ваа. яаажид̇аад̇и ‘‘уд̣̇д̣̇исса арияаа д̇идтанд̇и, зсаа арияаана яаажанаа’’д̇и (ж̇аа. 1.7.59) звам̣ вуд̇д̇ааяа гааяавин̃н̃ад̇д̇ибаяог̇асан̇каад̇ааяа бхигкаажарияааяа яаажид̇аа. д̇ассаад̇и д̇асса суд̇д̇ад̣̇аанасса. вибааго вибулапалуубалаб̣бхад̇ийд̇и вибулапало ул̣аарауд̣̇аяо махаауд̣̇аяо вибааго зд̇арахи убалаб̣бхад̇и бажжанубхавийяад̇и. б̣ахугаад̇и анзгаа. вад̇т̇агодияод̇и вад̇т̇аанам̣ годияо, анзгасад̇асахассабабхзд̣̇аани вад̇т̇аанийд̇и ад̇т̇о.
341. Tattha ‘‘pabbajitassa bhikkhuno’’ti idaṃ paccekabuddhaṃ saddhāya vuttaṃ. So hi kāmādimalānaṃ attano santānato anavasesato pabbājitattā pahīnattā paramatthato ‘‘pabbajito’’ti, bhinnakilesattā ‘‘bhikkhū’’ti ca vattabbataṃ arahati. Suttanti kappāsiyasuttaṃ. Upasaṅkammāti mayhaṃ gehaṃ upasaṅkamitvā. Yācitāti ‘‘uddissa ariyā tiṭṭhanti, esā ariyāna yācanā’’ti (jā. 1.7.59) evaṃ vuttāya kāyaviññattipayogasaṅkhātāya bhikkhācariyāya yācitā. Tassāti tassa suttadānassa. Vipāko vipulaphalūpalabbhatīti vipulaphalo uḷāraudayo mahāudayo vipāko etarahi upalabbhati paccanubhavīyati. Bahukāti anekā. Vatthakoṭiyoti vatthānaṃ koṭiyo, anekasatasahassapabhedāni vatthānīti attho.
342. анзгажид̇д̇анд̇и наанаавид̇хажид̇д̇агаммам̣, анзгзхи ваа муд̇д̇ааман̣иаад̣̇ийхи рад̇анзхи вижид̇д̇аруубам̣. наранаарисзвид̇анд̇и барижаарагабхууд̇зхи нарзхи наарийхи жа убасзвид̇ам̣. саахам̣ бхун̃ж̇аамийд̇и саа ахам̣ д̇ам̣ вимаанам̣ барибхун̃ж̇аами. баарубаамийд̇и анзгаасу вад̇т̇агодийсу ижчид̇ижчид̇ам̣ ниваасзми жзва барид̣̇ахаами жа. бахууд̇авид̇д̇аад̇и бахууд̇авид̇д̇уубагаран̣аа махад̣̇д̇ханаа махаабхог̇аа. на жа д̇аава кийяад̇ийд̇и д̇ан̃жа вид̇д̇ам̣ на кийяад̇и, на баригкаяам̣ барияаад̣̇аанам̣ г̇ажчад̇и.
342.Anekacittanti nānāvidhacittakammaṃ, anekehi vā muttāmaṇiādīhi ratanehi vicittarūpaṃ. Naranārisevitanti paricārakabhūtehi narehi nārīhi ca upasevitaṃ. Sāhaṃ bhuñjāmīti sā ahaṃ taṃ vimānaṃ paribhuñjāmi. Pārupāmīti anekāsu vatthakoṭīsu icchiticchitaṃ nivāsemi ceva paridahāmi ca. Pahūtavittāti pahūtavittūpakaraṇā mahaddhanā mahābhogā. Na ca tāva khīyatīti tañca vittaṃ na khīyati, na parikkhayaṃ pariyādānaṃ gacchati.
343. д̇ассзва гаммасса вибаагаманваяаад̇и д̇ассзва суд̇д̇ад̣̇аанамаяабун̃н̃агаммасса анваяаа бажжаяаа хзд̇убхаавзна вибаагабхууд̇ам̣ сукам̣, идтамад̇хурасан̇каад̇ам̣ саад̇ан̃жа ид̇ха имасмим̣ вимаанз убалаб̣бхад̇и. г̇анд̇ваа бунад̣̇зва маанусанд̇и буна зва мануссалогам̣ убаг̇анд̇ваа. гаахаами бун̃н̃аанийд̇и маяхам̣ сукависзсанибпаад̣̇агаани бун̃н̃аани гариссаами, язсам̣ ваа маяаа аяам̣ самбад̇д̇и лад̣̇д̇хаад̇и ад̇хиббааяо. наяаяяабуд̇д̇а манд̇и, аяяабуд̇д̇а, мам̣ мануссалогам̣ наяа, нзхийд̇и ад̇т̇о.
343.Tasseva kammassa vipākamanvayāti tasseva suttadānamayapuññakammassa anvayā paccayā hetubhāvena vipākabhūtaṃ sukhaṃ, iṭṭhamadhurasaṅkhātaṃ sātañca idha imasmiṃ vimāne upalabbhati. Gantvā punadeva mānusanti puna eva manussalokaṃ upagantvā. Kāhāmi puññānīti mayhaṃ sukhavisesanipphādakāni puññāni karissāmi, yesaṃ vā mayā ayaṃ sampatti laddhāti adhippāyo. Nayayyaputta manti, ayyaputta, maṃ manussalokaṃ naya, nehīti attho.
д̇ам̣ суд̇ваа со амануссо д̇ассаа бадиб̣ад̣̇д̇хажид̇д̇ад̇ааяа анугамбааяа г̇аманам̣ анижчанд̇о –
Taṃ sutvā so amanusso tassā paṭibaddhacittatāya anukampāya gamanaṃ anicchanto –
344.
344.
‘‘сад̇д̇а д̇увам̣ вассасад̇аа ид̇хааг̇ад̇аа,
‘‘Satta tuvaṃ vassasatā idhāgatā,
ж̇ин̣н̣аа жа вуд̣дхаа жа д̇ахим̣ бхависсаси;
Jiṇṇā ca vuḍḍhā ca tahiṃ bhavissasi;
саб̣б̣зва д̇з гаалагад̇аа жа н̃аад̇агаа,
Sabbeva te kālakatā ca ñātakā,
гим̣ д̇ад̇т̇а г̇анд̇ваана ид̇о гариссасий’’д̇и. –
Kiṃ tattha gantvāna ito karissasī’’ti. –
г̇аат̇амааха. д̇ад̇т̇а сад̇д̇аад̇и вибхад̇д̇илобзна нид̣̇д̣̇зсо, ниссаггз ваа зд̇ам̣ бажжад̇д̇аважанам̣. вассасад̇аад̇и вассасад̇ад̇о, сад̇д̇ахи вассасад̇зхи уд̣̇д̇хам̣ д̇увам̣ ид̇хааг̇ад̇аа имам̣ вимаанам̣ ааг̇ад̇аа, ид̇хааг̇ад̇ааяа д̇уяхам̣ сад̇д̇а вассасад̇аани хонд̇ийд̇и ад̇т̇о. ж̇ин̣н̣аа жа вуд̣дхаа жа д̇ахим̣ бхависсасийд̇и ид̇ха д̣̇иб̣б̣зхи уд̇уаахаарзхи убат̇амбхид̇ад̇д̇абхааваа гаммаанубхаавзна зд̇д̇агам̣ гаалам̣ д̣̇ахараагаарзнзва тид̇аа. ид̇о бана г̇ад̇аа гаммасса жа баригкийн̣ад̇д̇аа мануссаанан̃жа уд̇уаахааравасзна ж̇арааж̇ин̣н̣аа ваяовуд̣дхаа жа д̇ахим̣ мануссалогз бхависсаси. гинд̇и? саб̣б̣зва д̇з гаалагад̇аа жа н̃аад̇агаад̇и д̣̇ийгхасса ад̣̇д̇хуно г̇ад̇ад̇д̇аа д̇ава н̃аад̇аяоби саб̣б̣з зва мад̇аа, д̇асмаа ид̇о д̣̇звалогад̇о д̇ад̇т̇а мануссалогам̣ г̇анд̇ваа гим̣ гариссаси, авасзсамби ааяун̃жа ид̇хзва кзбзхи, ид̇ха васаахийд̇и ад̇хиббааяо.
Gāthamāha. Tattha sattāti vibhattilopena niddeso, nissakke vā etaṃ paccattavacanaṃ. Vassasatāti vassasatato, sattahi vassasatehi uddhaṃ tuvaṃ idhāgatā imaṃ vimānaṃ āgatā, idhāgatāya tuyhaṃ satta vassasatāni hontīti attho. Jiṇṇā cavuḍḍhā ca tahiṃ bhavissasīti idha dibbehi utuāhārehi upathambhitattabhāvā kammānubhāvena ettakaṃ kālaṃ daharākāreneva ṭhitā. Ito pana gatā kammassa ca parikkhīṇattā manussānañca utuāhāravasena jarājiṇṇā vayovuḍḍhā ca tahiṃ manussaloke bhavissasi. Kinti? Sabbeva te kālakatā ca ñātakāti dīghassa addhuno gatattā tava ñātayopi sabbe eva matā, tasmā ito devalokato tattha manussalokaṃ gantvā kiṃ karissasi, avasesampi āyuñca idheva khepehi, idha vasāhīti adhippāyo.
звам̣ д̇зна вуд̇д̇аа саа д̇асса важанам̣ асад̣̇д̣̇аханд̇ий бунад̣̇зва –
Evaṃ tena vuttā sā tassa vacanaṃ asaddahantī punadeva –
345.
345.
‘‘сад̇д̇зва вассаани ид̇хааг̇ад̇ааяа мз, д̣̇иб̣б̣ан̃жа сукан̃жа самаббид̇ааяа;
‘‘Satteva vassāni idhāgatāya me, dibbañca sukhañca samappitāya;
саахам̣ г̇анд̇ваа бунад̣̇зва маанусам̣, гаахаами бун̃н̃аани наяаяяабуд̇д̇а ма’’нд̇и. –
Sāhaṃ gantvā punadeva mānusaṃ, kāhāmi puññāni nayayyaputta ma’’nti. –
г̇аат̇амааха. д̇ад̇т̇а сад̇д̇зва вассаани ид̇хааг̇ад̇ааяа мзд̇и, аяяабуд̇д̇а, маяхам̣ ид̇хааг̇ад̇ааяа сад̇д̇зва вассаани ман̃н̃з вийд̇ивад̇д̇аани. сад̇д̇а вассасад̇аани д̣̇иб̣б̣асукасамаббид̇ааяа б̣ахумби гаалам̣ г̇ад̇ам̣ асаллагкзнд̇ий звамааха.
Gāthamāha. Tattha satteva vassāni idhāgatāya meti, ayyaputta, mayhaṃ idhāgatāya satteva vassāni maññe vītivattāni. Satta vassasatāni dibbasukhasamappitāya bahumpi kālaṃ gataṃ asallakkhentī evamāha.
звам̣ бана д̇ааяа вуд̇д̇о со вимаанабзд̇о наанаббагаарам̣ д̇ам̣ анусаасид̇ваа ‘‘д̇вам̣ ид̣̇аани сад̇д̇аахад̇о уд̇д̇ари д̇ад̇т̇а на ж̇ийвиссаси, маад̇уяаа д̇з нигкид̇д̇ам̣ маяаа д̣̇иннам̣ д̇ханам̣ ад̇т̇и, д̇ам̣ саман̣аб̣раахман̣аанам̣ д̣̇ад̇ваа ид̇хзва уббад̇д̇им̣ бад̇т̇зхий’’д̇и вад̇ваа д̇ам̣ б̣аахааяам̣ г̇ахзд̇ваа г̇аамамаж̇жхз табзд̇ваа ‘‘ид̇хааг̇ад̇з ан̃н̃зби ж̇анз ‘яат̇ааб̣алам̣ бун̃н̃аани гарот̇аа’д̇и овад̣̇зяяаасий’’д̇и вад̇ваа г̇ад̇о. д̇зна вуд̇д̇ам̣ –
Evaṃ pana tāya vutto so vimānapeto nānappakāraṃ taṃ anusāsitvā ‘‘tvaṃ idāni sattāhato uttari tattha na jīvissasi, mātuyā te nikkhittaṃ mayā dinnaṃ dhanaṃ atthi, taṃ samaṇabrāhmaṇānaṃ datvā idheva uppattiṃ patthehī’’ti vatvā taṃ bāhāyaṃ gahetvā gāmamajjhe ṭhapetvā ‘‘idhāgate aññepi jane ‘yathābalaṃ puññāni karothā’ti ovadeyyāsī’’ti vatvā gato. Tena vuttaṃ –
346.
346.
‘‘со д̇ам̣ г̇ахзд̇ваана басаяха б̣аахааяам̣, бажжаанаяид̇ваана т̇зрим̣ суд̣̇уб̣б̣алам̣;
‘‘So taṃ gahetvāna pasayha bāhāyaṃ, paccānayitvāna theriṃ sudubbalaṃ;
важ̇ж̇зси ‘ан̃н̃амби ж̇анам̣ ид̇хааг̇ад̇ам̣, гарот̇а бун̃н̃аани сукуубалаб̣бхад̇ий’’’д̇и.
Vajjesi ‘aññampi janaṃ idhāgataṃ, karotha puññāni sukhūpalabbhatī’’’ti.
д̇ад̇т̇а сод̇и со вимаанабзд̇о. д̇анд̇и д̇ам̣ ид̇т̇им̣. г̇ахзд̇ваана басаяха б̣аахааяанд̇и басаяха нзд̇аа вияа б̣аахааяам̣ д̇ам̣ г̇ахзд̇ваа. бажжаанаяид̇ваанаад̇и д̇ассаа ж̇аад̇асам̣вуд̣дхаг̇аамам̣ бунад̣̇зва аанаяид̇ваа. т̇зринд̇и т̇ааварим̣, ж̇ин̣н̣ам̣ вуд̣дханд̇и ад̇т̇о. суд̣̇уб̣б̣аланд̇и ж̇арааж̇ин̣н̣ад̇ааяа зва судту д̣̇уб̣б̣алам̣. саа гира д̇ад̇о вимаанад̇о абаг̇аманасамананд̇арамзва ж̇ин̣н̣аа вуд̣дхаа махаллигаа ад̣̇д̇хаг̇ад̇аа ваяоануббад̇д̇аа ахоси. важ̇ж̇зсийд̇и вад̣̇зяяааси. вад̇д̇аб̣б̣аважанаагааран̃жа д̣̇ассзд̇ум̣ ‘‘ан̃н̃амби ж̇ана’’нд̇иаад̣̇и вуд̇д̇ам̣. д̇ассад̇т̇о – бхад̣̇д̣̇з, д̇вамби бун̃н̃ам̣ гарзяяааси, ан̃н̃амби ж̇анам̣ ид̇ха д̇ава д̣̇ассанад̇т̇ааяа ааг̇ад̇ам̣ ‘‘бхад̣̇рамукаа, аад̣̇ид̇д̇ам̣ сийсам̣ ваа жзлам̣ ваа аж̇жхубзгкид̇вааби д̣̇аанасийлаад̣̇ийни бун̃н̃аани гарот̇аад̇и, гад̇з жа бун̃н̃з згам̣сзнзва д̇асса палабхууд̇ам̣ сукам̣ убалаб̣бхад̇и, на зд̇т̇а сам̣саяо гаад̇аб̣б̣о’’д̇и вад̣̇зяяааси овад̣̇зяяаасийд̇и.
Tattha soti so vimānapeto. Tanti taṃ itthiṃ. Gahetvāna pasayha bāhāyanti pasayha netā viya bāhāyaṃ taṃ gahetvā. Paccānayitvānāti tassā jātasaṃvuḍḍhagāmaṃ punadeva ānayitvā. Therinti thāvariṃ, jiṇṇaṃ vuḍḍhanti attho. Sudubbalanti jarājiṇṇatāya eva suṭṭhu dubbalaṃ. Sā kira tato vimānato apagamanasamanantarameva jiṇṇā vuḍḍhā mahallikā addhagatā vayoanuppattā ahosi. Vajjesīti vadeyyāsi. Vattabbavacanākārañca dassetuṃ ‘‘aññampi jana’’ntiādi vuttaṃ. Tassattho – bhadde, tvampi puññaṃ kareyyāsi, aññampi janaṃ idha tava dassanatthāya āgataṃ ‘‘bhadramukhā, ādittaṃ sīsaṃ vā celaṃ vā ajjhupekkhitvāpi dānasīlādīni puññāni karothāti, kate ca puññe ekaṃseneva tassa phalabhūtaṃ sukhaṃ upalabbhati, na ettha saṃsayo kātabbo’’ti vadeyyāsi ovadeyyāsīti.
зван̃жа вад̇ваа д̇асмим̣ г̇ад̇з саа ид̇т̇ий ад̇д̇ано н̃аад̇агаанам̣ васанадтаанам̣ г̇анд̇ваа д̇зсам̣ ад̇д̇аанам̣ ж̇аанаабзд̇ваа д̇зхи нияяаад̣̇ид̇ад̇ханам̣ г̇ахзд̇ваа саман̣аб̣раахман̣аанам̣ д̣̇аанам̣ д̣̇знд̇ий ад̇д̇ано санд̇игам̣ ааг̇ад̇ааг̇ад̇аанам̣ –
Evañca vatvā tasmiṃ gate sā itthī attano ñātakānaṃ vasanaṭṭhānaṃ gantvā tesaṃ attānaṃ jānāpetvā tehi niyyāditadhanaṃ gahetvā samaṇabrāhmaṇānaṃ dānaṃ dentī attano santikaṃ āgatāgatānaṃ –
347.
347.
‘‘д̣̇идтаа маяаа агад̇зна саад̇хунаа, бзд̇аа вихан̃н̃анд̇и д̇ат̇зва мануссаа;
‘‘Diṭṭhā mayā akatena sādhunā, petā vihaññanti tatheva manussā;
гамман̃жа гад̇ваа сукавзд̣̇анийяам̣, д̣̇зваа мануссаа жа сукз тид̇аа баж̇аа’’д̇и. –
Kammañca katvā sukhavedanīyaṃ, devā manussā ca sukhe ṭhitā pajā’’ti. –
г̇аат̇ааяа оваад̣̇амад̣̇ааси.
Gāthāya ovādamadāsi.
д̇ад̇т̇а агад̇знаад̇и аниб̣б̣ад̇д̇ид̇зна ад̇д̇анаа анубажид̇зна. саад̇хунаад̇и гусалагаммзна, ид̇т̇амбхууд̇алагкан̣з гаран̣аважанам̣. вихан̃н̃анд̇ийд̇и вигхаад̇ам̣ аабаж̇ж̇анд̇и. сукавзд̣̇анийяанд̇и сукавибаагам̣ бун̃н̃агаммам̣. сукз тид̇аад̇и сукз бад̇идтид̇аа. ‘‘сукзд̇хид̇аа’’д̇и ваа баато, сукзна абхивуд̣дхаа пийд̇аад̇и ад̇т̇о. аяан̃хзд̇т̇а ад̇хиббааяо – яат̇аа бзд̇аа д̇ат̇зва мануссаа агад̇зна гусалзна, гад̇зна жа агусалзна вихан̃н̃амаанаа куббибаасаад̣̇инаа вигхаад̇ам̣ аабаж̇ж̇анд̇аа махаад̣̇угкам̣ анубхаванд̇аа д̣̇идтаа маяаа. сукавзд̣̇анийяам̣ бана гаммам̣ гад̇ваа д̇зна гад̇зна гусалагаммзна, агад̇зна жа агусалагаммзна д̣̇звамануссабарияаабаннаа баж̇аа сукз тид̇аа д̣̇идтаа маяаа, ад̇д̇абажжагкамзд̇ам̣, д̇асмаа баабам̣ д̣̇уурад̇ова бариваж̇ж̇знд̇аа бун̃н̃агирияааяа яуд̇д̇абаяуд̇д̇аа хот̇аад̇и.
Tattha akatenāti anibbattitena attanā anupacitena. Sādhunāti kusalakammena, itthambhūtalakkhaṇe karaṇavacanaṃ. Vihaññantīti vighātaṃ āpajjanti. Sukhavedanīyanti sukhavipākaṃ puññakammaṃ. Sukhe ṭhitāti sukhe patiṭṭhitā. ‘‘Sukhedhitā’’ti vā pāṭho, sukhena abhivuḍḍhā phītāti attho. Ayañhettha adhippāyo – yathā petā tatheva manussā akatena kusalena, katena ca akusalena vihaññamānā khuppipāsādinā vighātaṃ āpajjantā mahādukkhaṃ anubhavantā diṭṭhā mayā. Sukhavedanīyaṃ pana kammaṃ katvā tena katena kusalakammena, akatena ca akusalakammena devamanussapariyāpannā pajā sukhe ṭhitā diṭṭhā mayā, attapaccakkhametaṃ, tasmā pāpaṃ dūratova parivajjentā puññakiriyāya yuttapayuttā hothāti.
звам̣ бана оваад̣̇ам̣ д̣̇знд̇ий саман̣аб̣раахман̣аад̣̇ийнам̣ сад̇д̇аахам̣ махаад̣̇аанам̣ бавад̇д̇зд̇ваа сад̇д̇амз д̣̇ивасз гаалам̣ гад̇ваа д̇аавад̇им̣сзсу ниб̣б̣ад̇д̇и. бхигкуу д̇ам̣ бавад̇д̇им̣ бхаг̇авад̇о аарожзсум̣. бхаг̇аваа д̇амад̇т̇ам̣ адтуббад̇д̇им̣ гад̇ваа самбад̇д̇абарисааяа д̇хаммам̣ д̣̇зсзси, висзсад̇о жа бажжзгаб̣уд̣̇д̇хзсу бавад̇д̇ид̇ад̣̇аанасса махабпалад̇ам̣ махаанисам̣сад̇ан̃жа багаасзси. д̇ам̣ суд̇ваа махааж̇ано виг̇ад̇амаламажчзро д̣̇аанаад̣̇ибун̃н̃аабхирад̇о ахосийд̇и.
Evaṃ pana ovādaṃ dentī samaṇabrāhmaṇādīnaṃ sattāhaṃ mahādānaṃ pavattetvā sattame divase kālaṃ katvā tāvatiṃsesu nibbatti. Bhikkhū taṃ pavattiṃ bhagavato ārocesuṃ. Bhagavā tamatthaṃ aṭṭhuppattiṃ katvā sampattaparisāya dhammaṃ desesi, visesato ca paccekabuddhesu pavattitadānassa mahapphalataṃ mahānisaṃsatañca pakāsesi. Taṃ sutvā mahājano vigatamalamacchero dānādipuññābhirato ahosīti.
суд̇д̇абзд̇авад̇т̇уван̣н̣анаа нидтид̇аа.
Suttapetavatthuvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бзд̇авад̇т̇убаал̣и • Petavatthupāḷi / 11. суд̇д̇абзд̇авад̇т̇у • 11. Suttapetavatthu
