| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
6. ஸுத்தவிஞ்ஞத்திஸிக்கா²பத³ங்
6. Suttaviññattisikkhāpadaṃ
636. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ச²ப்³ப³க்³கி³யா பி⁴க்கூ² சீவரகாரஸமயே ப³ஹுங் ஸுத்தங் விஞ்ஞாபேஸுங். கதேபி சீவரே ப³ஹுங் ஸுத்தங் அவஸிட்ட²ங் ஹோதி. அத² கோ² ச²ப்³ப³க்³கி³யானங் பி⁴க்கூ²னங் ஏதத³ஹோஸி – ‘‘ஹந்த³ மயங், ஆவுஸோ, அஞ்ஞம்பி ஸுத்தங் விஞ்ஞாபெத்வா தந்தவாயேஹி சீவரங் வாயாபேமா’’தி. அத² கோ² ச²ப்³ப³க்³கி³யா பி⁴க்கூ² அஞ்ஞம்பி ஸுத்தங் விஞ்ஞாபெத்வா தந்தவாயேஹி சீவரங் வாயாபேஸுங். வீதேபி சீவரே ப³ஹுங் ஸுத்தங் அவஸிட்ட²ங் ஹோதி. து³தியம்பி கோ² ச²ப்³ப³க்³கி³யா பி⁴க்கூ² அஞ்ஞம்பி ஸுத்தங் விஞ்ஞாபெத்வா தந்தவாயேஹி சீவரங் வாயாபேஸுங். வீதேபி சீவரே ப³ஹுங் ஸுத்தங் அவஸிட்ட²ங் ஹோதி. ததியம்பி கோ² ச²ப்³ப³க்³கி³யா பி⁴க்கூ² அஞ்ஞம்பி ஸுத்தங் விஞ்ஞாபெத்வா தந்தவாயேஹி சீவரங் வாயாபேஸுங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ஸாமங் ஸுத்தங் விஞ்ஞாபெத்வா தந்தவாயேஹி சீவரங் வாயாபெஸ்ஸந்தீ’’தி!
636. Tena samayena buddho bhagavā rājagahe viharati veḷuvane kalandakanivāpe. Tena kho pana samayena chabbaggiyā bhikkhū cīvarakārasamaye bahuṃ suttaṃ viññāpesuṃ. Katepi cīvare bahuṃ suttaṃ avasiṭṭhaṃ hoti. Atha kho chabbaggiyānaṃ bhikkhūnaṃ etadahosi – ‘‘handa mayaṃ, āvuso, aññampi suttaṃ viññāpetvā tantavāyehi cīvaraṃ vāyāpemā’’ti. Atha kho chabbaggiyā bhikkhū aññampi suttaṃ viññāpetvā tantavāyehi cīvaraṃ vāyāpesuṃ. Vītepi cīvare bahuṃ suttaṃ avasiṭṭhaṃ hoti. Dutiyampi kho chabbaggiyā bhikkhū aññampi suttaṃ viññāpetvā tantavāyehi cīvaraṃ vāyāpesuṃ. Vītepi cīvare bahuṃ suttaṃ avasiṭṭhaṃ hoti. Tatiyampi kho chabbaggiyā bhikkhū aññampi suttaṃ viññāpetvā tantavāyehi cīvaraṃ vāyāpesuṃ. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā sāmaṃ suttaṃ viññāpetvā tantavāyehi cīvaraṃ vāyāpessantī’’ti!
அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ஸாமங் ஸுத்தங் விஞ்ஞாபெத்வா தந்தவாயேஹி சீவரங் வாயாபெஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர தும்ஹே, பி⁴க்க²வே , ஸாமங் ஸுத்தங் விஞ்ஞாபெத்வா தந்தவாயேஹி சீவரங் வாயாபேதா²’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தும்ஹே, மோக⁴புரிஸா, ஸாமங் ஸுத்தங் விஞ்ஞாபெத்வா தந்தவாயேஹி சீவரங் வாயாபெஸ்ஸத²! நேதங், மோக⁴புரிஸா, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā… te ujjhāyanti khiyyanti vipācenti – ‘‘kathañhi nāma chabbaggiyā bhikkhū sāmaṃ suttaṃ viññāpetvā tantavāyehi cīvaraṃ vāyāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave , sāmaṃ suttaṃ viññāpetvā tantavāyehi cīvaraṃ vāyāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, sāmaṃ suttaṃ viññāpetvā tantavāyehi cīvaraṃ vāyāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
637. ‘‘யோ பன பி⁴க்கு² ஸாமங் ஸுத்தங் விஞ்ஞாபெத்வா தந்தவாயேஹி சீவரங் வாயாபெய்ய, நிஸ்ஸக்³கி³யங் பாசித்திய’’ந்தி.
637.‘‘Yo pana bhikkhu sāmaṃ suttaṃ viññāpetvā tantavāyehi cīvaraṃ vāyāpeyya, nissaggiyaṃ pācittiya’’nti.
638. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
638.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ஸாமந்தி ஸயங் விஞ்ஞாபெத்வா.
Sāmanti sayaṃ viññāpetvā.
ஸுத்தங் நாம ச² ஸுத்தானி – கோ²மங் கப்பாஸிகங் கோஸெய்யங் கம்ப³லங் ஸாணங் ப⁴ங்க³ங்.
Suttaṃ nāma cha suttāni – khomaṃ kappāsikaṃ koseyyaṃ kambalaṃ sāṇaṃ bhaṅgaṃ.
தந்தவாயேஹீதி பேஸகாரேஹி வாயாபேதி, பயோகே³ பயோகே³ து³க்கடங் 1. படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே, சீவரங் ஸாமங் ஸுத்தங் விஞ்ஞாபெத்வா தந்தவாயேஹி வாயாபிதங் நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
Tantavāyehīti pesakārehi vāyāpeti, payoge payoge dukkaṭaṃ 2. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ sāmaṃ suttaṃ viññāpetvā tantavāyehi vāyāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
639. வாயாபிதே வாயாபிதஸஞ்ஞீ, நிஸ்ஸக்³கி³யங் பாசித்தியங். வாயாபிதே வேமதிகோ, நிஸ்ஸக்³கி³யங் பாசித்தியங். வாயாபிதே அவாயாபிதஸஞ்ஞீ, நிஸ்ஸக்³கி³யங் பாசித்தியங்.
639. Vāyāpite vāyāpitasaññī, nissaggiyaṃ pācittiyaṃ. Vāyāpite vematiko, nissaggiyaṃ pācittiyaṃ. Vāyāpite avāyāpitasaññī, nissaggiyaṃ pācittiyaṃ.
அவாயாபிதே வாயாபிதஸஞ்ஞீ, ஆபத்தி து³க்கடஸ்ஸ. அவாயாபிதே வேமதிகோ, ஆபத்தி து³க்கடஸ்ஸ. அவாயாபிதே அவாயாபிதஸஞ்ஞீ, அனாபத்தி.
Avāyāpite vāyāpitasaññī, āpatti dukkaṭassa. Avāyāpite vematiko, āpatti dukkaṭassa. Avāyāpite avāyāpitasaññī, anāpatti.
640. அனாபத்தி – சீவரங் ஸிப்³பே³துங், ஆயோகே³, காயப³ந்த⁴னே, அங்ஸப³ந்த⁴கே 3, பத்தத்த²விகாய, பரிஸ்ஸாவனே, ஞாதகானங், பவாரிதானங், அஞ்ஞஸ்ஸத்தா²ய, அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.
640. Anāpatti – cīvaraṃ sibbetuṃ, āyoge, kāyabandhane, aṃsabandhake 4, pattatthavikāya, parissāvane, ñātakānaṃ, pavāritānaṃ, aññassatthāya, attano dhanena, ummattakassa, ādikammikassāti.
ஸுத்தவிஞ்ஞத்திஸிக்கா²பத³ங் நிட்டி²தங் ச²ட்ட²ங்.
Suttaviññattisikkhāpadaṃ niṭṭhitaṃ chaṭṭhaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. ஸுத்தவிஞ்ஞத்திஸிக்கா²பத³வண்ணனா • 6. Suttaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. ஸுத்தவிஞ்ஞத்திஸிக்கா²பத³வண்ணனா • 6. Suttaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. ஸுத்தவிஞ்ஞத்திஸிக்கா²பத³வண்ணனா • 6. Suttaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. ஸுத்தவிஞ்ஞத்திஸிக்கா²பத³வண்ணனா • 6. Suttaviññattisikkhāpadavaṇṇanā
