| Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၆. သုတ္တဝိညတ္တိသိက္ခာပဒံ
6. Suttaviññattisikkhāpadaṃ
၆၃၆. တေန သမယေန ဗုဒ္ဓော ဘဂဝာ ရာဇဂဟေ ဝိဟရတိ ဝေဠုဝနေ ကလန္ဒကနိဝာပေ။ တေန ခော ပန သမယေန ဆဗ္ဗဂ္ဂိယာ ဘိက္ခူ စီဝရကာရသမယေ ဗဟုံ သုတ္တံ ဝိညာပေသုံ။ ကတေပိ စီဝရေ ဗဟုံ သုတ္တံ အဝသိဋ္ဌံ ဟောတိ။ အထ ခော ဆဗ္ဗဂ္ဂိယာနံ ဘိက္ခူနံ ဧတဒဟောသိ – ‘‘ဟန္ဒ မယံ, အာဝုသော, အညမ္ပိ သုတ္တံ ဝိညာပေတ္ဝာ တန္တဝာယေဟိ စီဝရံ ဝာယာပေမာ’’တိ။ အထ ခော ဆဗ္ဗဂ္ဂိယာ ဘိက္ခူ အညမ္ပိ သုတ္တံ ဝိညာပေတ္ဝာ တန္တဝာယေဟိ စီဝရံ ဝာယာပေသုံ။ ဝီတေပိ စီဝရေ ဗဟုံ သုတ္တံ အဝသိဋ္ဌံ ဟောတိ။ ဒုတိယမ္ပိ ခော ဆဗ္ဗဂ္ဂိယာ ဘိက္ခူ အညမ္ပိ သုတ္တံ ဝိညာပေတ္ဝာ တန္တဝာယေဟိ စီဝရံ ဝာယာပေသုံ။ ဝီတေပိ စီဝရေ ဗဟုံ သုတ္တံ အဝသိဋ္ဌံ ဟောတိ။ တတိယမ္ပိ ခော ဆဗ္ဗဂ္ဂိယာ ဘိက္ခူ အညမ္ပိ သုတ္တံ ဝိညာပေတ္ဝာ တန္တဝာယေဟိ စီဝရံ ဝာယာပေသုံ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သမဏာ သက္ယပုတ္တိယာ သာမံ သုတ္တံ ဝိညာပေတ္ဝာ တန္တဝာယေဟိ စီဝရံ ဝာယာပေသ္သန္တီ’’တိ!
636. Tena samayena buddho bhagavā rājagahe viharati veḷuvane kalandakanivāpe. Tena kho pana samayena chabbaggiyā bhikkhū cīvarakārasamaye bahuṃ suttaṃ viññāpesuṃ. Katepi cīvare bahuṃ suttaṃ avasiṭṭhaṃ hoti. Atha kho chabbaggiyānaṃ bhikkhūnaṃ etadahosi – ‘‘handa mayaṃ, āvuso, aññampi suttaṃ viññāpetvā tantavāyehi cīvaraṃ vāyāpemā’’ti. Atha kho chabbaggiyā bhikkhū aññampi suttaṃ viññāpetvā tantavāyehi cīvaraṃ vāyāpesuṃ. Vītepi cīvare bahuṃ suttaṃ avasiṭṭhaṃ hoti. Dutiyampi kho chabbaggiyā bhikkhū aññampi suttaṃ viññāpetvā tantavāyehi cīvaraṃ vāyāpesuṃ. Vītepi cīvare bahuṃ suttaṃ avasiṭṭhaṃ hoti. Tatiyampi kho chabbaggiyā bhikkhū aññampi suttaṃ viññāpetvā tantavāyehi cīvaraṃ vāyāpesuṃ. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā sāmaṃ suttaṃ viññāpetvā tantavāyehi cīvaraṃ vāyāpessantī’’ti!
အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ ယေ တေ ဘိက္ခူ အပ္ပိစ္ဆာ။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ သာမံ သုတ္တံ ဝိညာပေတ္ဝာ တန္တဝာယေဟိ စီဝရံ ဝာယာပေသ္သန္တီ’’တိ! အထ ခော တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမ္ဟေ, ဘိက္ခဝေ , သာမံ သုတ္တံ ဝိညာပေတ္ဝာ တန္တဝာယေဟိ စီဝရံ ဝာယာပေထာ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တုမ္ဟေ, မောဃပုရိသာ, သာမံ သုတ္တံ ဝိညာပေတ္ဝာ တန္တဝာယေဟိ စီဝရံ ဝာယာပေသ္သထ! နေတံ, မောဃပုရိသာ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā… te ujjhāyanti khiyyanti vipācenti – ‘‘kathañhi nāma chabbaggiyā bhikkhū sāmaṃ suttaṃ viññāpetvā tantavāyehi cīvaraṃ vāyāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave , sāmaṃ suttaṃ viññāpetvā tantavāyehi cīvaraṃ vāyāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, sāmaṃ suttaṃ viññāpetvā tantavāyehi cīvaraṃ vāyāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၆၃၇. ‘‘ယော ပန ဘိက္ခု သာမံ သုတ္တံ ဝိညာပေတ္ဝာ တန္တဝာယေဟိ စီဝရံ ဝာယာပေယ္ယ, နိသ္သဂ္ဂိယံ ပာစိတ္တိယ’’န္တိ။
637.‘‘Yo pana bhikkhu sāmaṃ suttaṃ viññāpetvā tantavāyehi cīvaraṃ vāyāpeyya, nissaggiyaṃ pācittiya’’nti.
၆၃၈. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။
638.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
သာမန္တိ သယံ ဝိညာပေတ္ဝာ။
Sāmanti sayaṃ viññāpetvā.
သုတ္တံ နာမ ဆ သုတ္တာနိ – ခောမံ ကပ္ပာသိကံ ကောသေယ္ယံ ကမ္ဗလံ သာဏံ ဘင္ဂံ။
Suttaṃ nāma cha suttāni – khomaṃ kappāsikaṃ koseyyaṃ kambalaṃ sāṇaṃ bhaṅgaṃ.
တန္တဝာယေဟီတိ ပေသကာရေဟိ ဝာယာပေတိ, ပယောဂေ ပယောဂေ ဒုက္ကဋံ 1။ ပဋိလာဘေန နိသ္သဂ္ဂိယံ ဟောတိ။ နိသ္သဇ္ဇိတဗ္ဗံ သင္ဃသ္သ ဝာ ဂဏသ္သ ဝာ ပုဂ္ဂလသ္သ ဝာ။ ဧဝဉ္စ ပန, ဘိက္ခဝေ, နိသ္သဇ္ဇိတဗ္ဗံ။ပေ.။ ဣဒံ မေ, ဘန္တေ, စီဝရံ သာမံ သုတ္တံ ဝိညာပေတ္ဝာ တန္တဝာယေဟိ ဝာယာပိတံ နိသ္သဂ္ဂိယံ။ ဣမာဟံ သင္ဃသ္သ နိသ္သဇ္ဇာမီတိ။ပေ.။ ဒဒေယ္ယာတိ။ပေ.။ ဒဒေယ္ယုန္တိ။ပေ.။ အာယသ္မတော ဒမ္မီတိ။
Tantavāyehīti pesakārehi vāyāpeti, payoge payoge dukkaṭaṃ 2. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ sāmaṃ suttaṃ viññāpetvā tantavāyehi vāyāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
၆၃၉. ဝာယာပိတေ ဝာယာပိတသညီ, နိသ္သဂ္ဂိယံ ပာစိတ္တိယံ။ ဝာယာပိတေ ဝေမတိကော, နိသ္သဂ္ဂိယံ ပာစိတ္တိယံ။ ဝာယာပိတေ အဝာယာပိတသညီ, နိသ္သဂ္ဂိယံ ပာစိတ္တိယံ။
639. Vāyāpite vāyāpitasaññī, nissaggiyaṃ pācittiyaṃ. Vāyāpite vematiko, nissaggiyaṃ pācittiyaṃ. Vāyāpite avāyāpitasaññī, nissaggiyaṃ pācittiyaṃ.
အဝာယာပိတေ ဝာယာပိတသညီ, အာပတ္တိ ဒုက္ကဋသ္သ။ အဝာယာပိတေ ဝေမတိကော, အာပတ္တိ ဒုက္ကဋသ္သ။ အဝာယာပိတေ အဝာယာပိတသညီ, အနာပတ္တိ။
Avāyāpite vāyāpitasaññī, āpatti dukkaṭassa. Avāyāpite vematiko, āpatti dukkaṭassa. Avāyāpite avāyāpitasaññī, anāpatti.
၆၄၀. အနာပတ္တိ – စီဝရံ သိဗ္ဗေတုံ, အာယောဂေ, ကာယဗန္ဓနေ, အံသဗန္ဓကေ 3, ပတ္တတ္ထဝိကာယ, ပရိသ္သာဝနေ, ဉာတကာနံ, ပဝာရိတာနံ, အညသ္သတ္ထာယ, အတ္တနော ဓနေန, ဥမ္မတ္တကသ္သ, အာဒိကမ္မိကသ္သာတိ။
640. Anāpatti – cīvaraṃ sibbetuṃ, āyoge, kāyabandhane, aṃsabandhake 4, pattatthavikāya, parissāvane, ñātakānaṃ, pavāritānaṃ, aññassatthāya, attano dhanena, ummattakassa, ādikammikassāti.
သုတ္တဝိညတ္တိသိက္ခာပဒံ နိဋ္ဌိတံ ဆဋ္ဌံ။
Suttaviññattisikkhāpadaṃ niṭṭhitaṃ chaṭṭhaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၆. သုတ္တဝိညတ္တိသိက္ခာပဒဝဏ္ဏနာ • 6. Suttaviññattisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၆. သုတ္တဝိညတ္တိသိက္ခာပဒဝဏ္ဏနာ • 6. Suttaviññattisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၆. သုတ္တဝိညတ္တိသိက္ခာပဒဝဏ္ဏနာ • 6. Suttaviññattisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၆. သုတ္တဝိညတ္တိသိက္ခာပဒဝဏ္ဏနာ • 6. Suttaviññattisikkhāpadavaṇṇanā
