| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༦. སུཏྟཝིཉྙཏྟིསིཀྑཱཔདཾ
6. Suttaviññattisikkhāpadaṃ
༦༣༦. ཏེན སམཡེན བུདྡྷོ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཏེན ཁོ པན སམཡེན ཚབྦགྒིཡཱ བྷིཀྑཱུ ཙཱིཝརཀཱརསམཡེ བཧུཾ སུཏྟཾ ཝིཉྙཱཔེསུཾ། ཀཏེཔི ཙཱིཝརེ བཧུཾ སུཏྟཾ ཨཝསིཊྛཾ ཧོཏི། ཨཐ ཁོ ཚབྦགྒིཡཱནཾ བྷིཀྑཱུནཾ ཨེཏདཧོསི – ‘‘ཧནྡ མཡཾ, ཨཱཝུསོ, ཨཉྙམྤི སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེམཱ’’ཏི། ཨཐ ཁོ ཚབྦགྒིཡཱ བྷིཀྑཱུ ཨཉྙམྤི སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེསུཾ། ཝཱིཏེཔི ཙཱིཝརེ བཧུཾ སུཏྟཾ ཨཝསིཊྛཾ ཧོཏི། དུཏིཡམྤི ཁོ ཚབྦགྒིཡཱ བྷིཀྑཱུ ཨཉྙམྤི སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེསུཾ། ཝཱིཏེཔི ཙཱིཝརེ བཧུཾ སུཏྟཾ ཨཝསིཊྛཾ ཧོཏི། ཏཏིཡམྤི ཁོ ཚབྦགྒིཡཱ བྷིཀྑཱུ ཨཉྙམྤི སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེསུཾ། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སམཎཱ སཀྱཔུཏྟིཡཱ སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེསྶནྟཱི’’ཏི!
636. Tena samayena buddho bhagavā rājagahe viharati veḷuvane kalandakanivāpe. Tena kho pana samayena chabbaggiyā bhikkhū cīvarakārasamaye bahuṃ suttaṃ viññāpesuṃ. Katepi cīvare bahuṃ suttaṃ avasiṭṭhaṃ hoti. Atha kho chabbaggiyānaṃ bhikkhūnaṃ etadahosi – ‘‘handa mayaṃ, āvuso, aññampi suttaṃ viññāpetvā tantavāyehi cīvaraṃ vāyāpemā’’ti. Atha kho chabbaggiyā bhikkhū aññampi suttaṃ viññāpetvā tantavāyehi cīvaraṃ vāyāpesuṃ. Vītepi cīvare bahuṃ suttaṃ avasiṭṭhaṃ hoti. Dutiyampi kho chabbaggiyā bhikkhū aññampi suttaṃ viññāpetvā tantavāyehi cīvaraṃ vāyāpesuṃ. Vītepi cīvare bahuṃ suttaṃ avasiṭṭhaṃ hoti. Tatiyampi kho chabbaggiyā bhikkhū aññampi suttaṃ viññāpetvā tantavāyehi cīvaraṃ vāyāpesuṃ. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā sāmaṃ suttaṃ viññāpetvā tantavāyehi cīvaraṃ vāyāpessantī’’ti!
ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཡེ ཏེ བྷིཀྑཱུ ཨཔྤིཙྪཱ… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེསྶནྟཱི’’ཏི! ཨཐ ཁོ ཏེ བྷིཀྑཱུ ཚབྦགྒིཡེ བྷིཀྑཱུ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏུམྷེ, བྷིཀྑཝེ , སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེཐཱ’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā… te ujjhāyanti khiyyanti vipācenti – ‘‘kathañhi nāma chabbaggiyā bhikkhū sāmaṃ suttaṃ viññāpetvā tantavāyehi cīvaraṃ vāyāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave , sāmaṃ suttaṃ viññāpetvā tantavāyehi cīvaraṃ vāyāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, sāmaṃ suttaṃ viññāpetvā tantavāyehi cīvaraṃ vāyāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༦༣༧. ‘‘ཡོ པན བྷིཀྑུ སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཙཱིཝརཾ ཝཱཡཱཔེཡྻ, ནིསྶགྒིཡཾ པཱཙིཏྟིཡ’’ནྟི།
637.‘‘Yo pana bhikkhu sāmaṃ suttaṃ viññāpetvā tantavāyehi cīvaraṃ vāyāpeyya, nissaggiyaṃ pācittiya’’nti.
༦༣༨. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
638.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
སཱམནྟི སཡཾ ཝིཉྙཱཔེཏྭཱ།
Sāmanti sayaṃ viññāpetvā.
སུཏྟཾ ནཱམ ཚ སུཏྟཱནི – ཁོམཾ ཀཔྤཱསིཀཾ ཀོསེཡྻཾ ཀམྦལཾ སཱཎཾ བྷངྒཾ།
Suttaṃ nāma cha suttāni – khomaṃ kappāsikaṃ koseyyaṃ kambalaṃ sāṇaṃ bhaṅgaṃ.
ཏནྟཝཱཡེཧཱིཏི པེསཀཱརེཧི ཝཱཡཱཔེཏི, པཡོགེ པཡོགེ དུཀྐཊཾ 1། པཊིལཱབྷེན ནིསྶགྒིཡཾ ཧོཏི། ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ། ཨེཝཉྩ པན, བྷིཀྑཝེ, ནིསྶཛྫིཏབྦཾ…པེ॰… ཨིདཾ མེ, བྷནྟེ, ཙཱིཝརཾ སཱམཾ སུཏྟཾ ཝིཉྙཱཔེཏྭཱ ཏནྟཝཱཡེཧི ཝཱཡཱཔིཏཾ ནིསྶགྒིཡཾ། ཨིམཱཧཾ སངྒྷསྶ ནིསྶཛྫཱམཱིཏི…པེ॰… དདེཡྻཱཏི…པེ॰… དདེཡྻུནྟི…པེ॰… ཨཱཡསྨཏོ དམྨཱིཏི།
Tantavāyehīti pesakārehi vāyāpeti, payoge payoge dukkaṭaṃ 2. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ sāmaṃ suttaṃ viññāpetvā tantavāyehi vāyāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
༦༣༩. ཝཱཡཱཔིཏེ ཝཱཡཱཔིཏསཉྙཱི, ནིསྶགྒིཡཾ པཱཙིཏྟིཡཾ། ཝཱཡཱཔིཏེ ཝེམཏིཀོ, ནིསྶགྒིཡཾ པཱཙིཏྟིཡཾ། ཝཱཡཱཔིཏེ ཨཝཱཡཱཔིཏསཉྙཱི, ནིསྶགྒིཡཾ པཱཙིཏྟིཡཾ།
639. Vāyāpite vāyāpitasaññī, nissaggiyaṃ pācittiyaṃ. Vāyāpite vematiko, nissaggiyaṃ pācittiyaṃ. Vāyāpite avāyāpitasaññī, nissaggiyaṃ pācittiyaṃ.
ཨཝཱཡཱཔིཏེ ཝཱཡཱཔིཏསཉྙཱི, ཨཱཔཏྟི དུཀྐཊསྶ། ཨཝཱཡཱཔིཏེ ཝེམཏིཀོ, ཨཱཔཏྟི དུཀྐཊསྶ། ཨཝཱཡཱཔིཏེ ཨཝཱཡཱཔིཏསཉྙཱི, ཨནཱཔཏྟི།
Avāyāpite vāyāpitasaññī, āpatti dukkaṭassa. Avāyāpite vematiko, āpatti dukkaṭassa. Avāyāpite avāyāpitasaññī, anāpatti.
༦༤༠. ཨནཱཔཏྟི – ཙཱིཝརཾ སིབྦེཏུཾ, ཨཱཡོགེ, ཀཱཡབནྡྷནེ, ཨཾསབནྡྷཀེ 3, པཏྟཏྠཝིཀཱཡ, པརིསྶཱཝནེ, ཉཱཏཀཱནཾ, པཝཱརིཏཱནཾ, ཨཉྙསྶཏྠཱཡ, ཨཏྟནོ དྷནེན, ཨུམྨཏྟཀསྶ, ཨཱདིཀམྨིཀསྶཱཏི།
640. Anāpatti – cīvaraṃ sibbetuṃ, āyoge, kāyabandhane, aṃsabandhake 4, pattatthavikāya, parissāvane, ñātakānaṃ, pavāritānaṃ, aññassatthāya, attano dhanena, ummattakassa, ādikammikassāti.
སུཏྟཝིཉྙཏྟིསིཀྑཱཔདཾ ནིཊྛིཏཾ ཚཊྛཾ།
Suttaviññattisikkhāpadaṃ niṭṭhitaṃ chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༦. སུཏྟཝིཉྙཏྟིསིཀྑཱཔདཝཎྞནཱ • 6. Suttaviññattisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༦. སུཏྟཝིཉྙཏྟིསིཀྑཱཔདཝཎྞནཱ • 6. Suttaviññattisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༦. སུཏྟཝིཉྙཏྟིསིཀྑཱཔདཝཎྞནཱ • 6. Suttaviññattisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༦. སུཏྟཝིཉྙཏྟིསིཀྑཱཔདཝཎྞནཱ • 6. Suttaviññattisikkhāpadavaṇṇanā
